༦. ཨ་བྷི་རཱུ་པ་ན་ནྡཱ་ཐེ་རཱི་ཨ་པ་དཱ་ནཾ
༡༤༣. ‘‘ཨེ་ཀ་ན་ཝུ་ཏི་ཏོ ཀ་པྤེ, ཝི་པ་སྶཱི ནཱ་མ ནཱ་ཡ་ཀོ;
ཨུ་པྤ་ཛྫི ཙཱ་རུ་ད་སྶ་ནོ, ས་བྦ་དྷ་མྨེ་སུ ཙ་ཀྑུ་མཱ.
༡༤༤. ‘‘ཏ་དཱ་ཧཾ བ་ནྡྷུ་མ་ཏི་ཡཾ, ཨི་དྡྷེ ཕཱི་ཏེ མ་ཧཱ་ཀུ་ལེ;
ཛཱ་ཏཱ སུ་རཱུ་པཱ ད་ཡི་ཏཱ, པཱུ་ཛ་ནཱི་ཡཱ ཛ་ན་སྶ ཙ.
༡༤༥. ‘‘ཨུ་པ་ག་ནྟྭཱ མ་ཧཱ་ཝཱི་རཾ, ཝི་པ་སྶིཾ ལོ་ཀ་ནཱ་ཡ་ཀཾ;
དྷ་མྨཾ སུ་ཎི་ཏྭཱ ས་ར་ཎཾ, ཨུ་པེ་སིཾ ན་ར་ནཱ་ཡ་ཀཾ.
༡༤༦. ‘‘སཱི་ལེ་སུ སཾ་ཝུ་ཏཱ ཧུ་ཏྭཱ, ནི་བྦུ་ཏེ ཙ ན་རུ་ཏྟ་མེ;
དྷཱ་ཏུ་ཐཱུ་པ་སྶ ཨུ་པ་རི, སོ་ཎྞ་ཙྪ་ཏྟ་མ་པཱུ་ཛ་ཡིཾ.
༡༤༧. ‘‘མུ་ཏྟ་ཙཱ་གཱ སཱི་ལ་ཝ་ཏཱི, ཡཱ་ཝ་ཛཱི་ཝཾ ཏ་ཏོ ཙུ་ཏཱ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་སཱུ་པ་གཱ ཨ་ཧཾ.
༡༤༨. ‘‘ཏ་དཱ ད་ས་ཧི ཋཱ་ནེ་ཧི, ཨ་དྷི་བྷོ་ཏྭཱ་ན སེ་ས་ཀེ [ཨ་དྷི་བྷོ་ཏྭཱ ཨ་སེ་ས་ཏོ (སྱཱ.)];
རཱུ་པ་ས་དྡེ་ཧི ག་ནྡྷེ་ཧི, ར་སེ་ཧི ཕུ་ས་ནེ་ཧི ཙ.
༡༤༩. ‘‘ཨཱ་ཡུ་ནཱ་པི ཙ ཝ་ཎྞེ་ན, སུ་ཁེ་ན ཡ་ས་སཱ་པི ཙ;
ཏ་ཐེ་ཝཱ་དྷི་པ་ཏེ་ཡྻེ་ན, ཨ་དྷི་ག་ཡ྄ཧ ཝི་རོ་ཙ་ཧཾ.
༡༥༠. ‘‘པ་ཙྪི་མེ ཙ བྷ་ཝེ དཱ་ནི, ཛཱ་ཏཱ་ཧཾ ཀ་པི་ལ་ཝ྄ཧ་ཡེ;
དྷཱི་ཏཱ ཁེ་མ་ཀ་ས་ཀྐ་སྶ, ན་ནྡཱ ནཱ་མཱ་ཏི ཝི་སྶུ་ཏཱ.
༡༥༡. ‘‘ཨ་བྷི་རཱུ་པ་ས་མྤ་ད་མྤི [ཨ་བྷི་རུ་པཾ ཨུ་པ་པ་དཾ (སཱི.), ཨ་བྷི་རུ་པཾ ཨུ་པྤཱ་དཾ (པཱི.)], ཨ་ཧུ མེ ཀ་ནྟི་སཱུ་ཙ་ཀཾ;
ཡ་དཱ་ཧཾ ཡོ་བྦ་ན་པྤ་ཏྟཱ, རཱུ་པ་ལཱ་ཝ་ཉྙ་བྷཱུ་སི་ཏཱ.
༡༥༢. ‘‘ཏ་དཱ [ཏ་དཱ མ་མ་ཏྠཾ (སཱི.), ཨི་དྷ མ་མ་ཏྟེ (སྱཱ. ཀ.)] མ་ཏྠེ ས་ཀྱཱ་ནཾ, ཝི་ཝཱ་དོ སུ་མ་ཧཱ ཨ་ཧུ;
པ་བྦཱ་ཛེ་སི ཏ་ཏོ ཏཱ་ཏོ, མཱ ས་ཀྱཱ ཝི་ན་སྶིཾ་སུ་ཏི.
༡༥༣. ‘‘པ་བྦ་ཛི་ཏྭཱ ཏ་ཐཱ་ག་ཏཾ, རཱུ་པ་དེ་སྶིཾ ན་རུ་ཏྟ་མཾ;
སུ་ཏྭཱ་ན ནོ་པ་ག་ཙྪཱ་མི, མ་མ རཱུ་པེ་ན ག་བྦི་ཏཱ.
༡༥༤. ‘‘ཨོ་ཝཱ་ད་མྤི ན ག་ཙྪཱ་མི, བུ་དྡྷ་ད་སྶ་ན་བྷཱི་རུ་ཏཱ;
ཏ་དཱ ཛི་ནོ ཨུ་པཱ་ཡེ་ན, ཨུ་པ་ནེ་ཏྭཱ ས་ས་ནྟི་ཀཾ.
༡༥༥. ‘‘ཏི་སྶི་ཏྠི་ཡོ [ཏི་སྶོ ཐཱི་ཡོ (སཱི. པཱི.)] ནི་ད་སྶེ་སི, ཨི་དྡྷི་ཡཱ མ་གྒ་ཀོ་ཝི་དོ;
ཨ་ཙྪ་རཱ་རཱུ་པ་ས་དི་སཾ, ཏ་རུ་ཎིཾ ཛ་རི་ཏཾ [ཛ་རི་ཀཾ (སྱཱ. ཀ.)] མ་ཏཾ.
༡༥༦. ‘‘ཏཱ་ཡོ དི་སྭཱ སུ་སཾ་ཝི་གྒཱ, ཝི་ར་ཏྟཱ་སེ ཀ་ལེ༹་ཝ་རེ;
ཨ་ཊྛཱ་སིཾ བྷ་ཝ་ནི་བྦི་ནྡཱ, ཏ་དཱ མཾ ཨཱ་ཧ ནཱ་ཡ་ཀོ.
༡༥༧. ‘‘‘ཨཱ་ཏུ་རཾ ཨ་སུ་ཙིཾ པཱུ་ཏིཾ, པ་སྶ ན་ནྡེ ས་མུ་སྶ་ཡཾ;
ཨུ་གྒྷ་ར་ནྟཾ པ་གྒྷ་ར་ནྟཾ, བཱ་ལཱ་ནཾ ཨ་བྷི་ན་ནྡི་ཏཾ.
༡༥༨. ‘‘‘ཨ་སུ་བྷཱ་ཡ ཙི་ཏྟཾ བྷཱ་ཝེ་ཧི, ཨེ་ཀ་གྒཾ སུ་ས་མཱ་ཧི་ཏཾ;
ཡ་ཐཱ ཨི་དཾ ཏ་ཐཱ ཨེ་ཏཾ, ཡ་ཐཱ ཨེ་ཏཾ ཏ་ཐཱ ཨི་དཾ.
༡༥༩. ‘‘‘ཨེ་ཝ་མེ་ཏཾ ཨ་ཝེ་ཀྑ་ནྟཱི, ར་ཏྟི་ནྡི་ཝ་མ་ཏ་ནྡི་ཏཱ;
ཏ་ཏོ ས་ཀཱ་ཡ པ་ཉྙཱ་ཡ, ཨ་བྷི་ནི་བྦི་ཛ྄ཛྷ ཝ་ཙྪ་སི’.
༡༦༠. ‘‘ཏ་སྶཱ མེ ཨ་པྤ་མ་ཏྟཱ་ཡ, ཝི་ཙ་ར་ནྟི་ཡཱ [ཝི་ཙ་ར་ནྟྭཱ་དྷ (སཱི.), ཝི་ཙི་ན་ནྟཱི་དྷ (སྱཱ. པཱི.)] ཡོ་ནི་སོ;
ཡ་ཐཱ་བྷཱུ་ཏཾ ཨ་ཡཾ ཀཱ་ཡོ, དི་ཊྛོ ས་ནྟ་ར་བཱ་ཧི་རོ.
༡༦༡. ‘‘ཨ་ཐ ནི་བྦི་ནྡ་ཧཾ ཀཱ་ཡེ, ཨ་ཛ྄ཛྷ་ཏྟ་ཉྩ ཝི་ར་ཛྫ་ཧཾ;
ཨ་པྤ་མ་ཏྟཱ ཝི་སཾ་ཡུ་ཏྟཱ, ཨུ་པ་ས་ནྟཱ་མྷི ནི་བྦུ་ཏཱ.
༡༦༢. ‘‘ཨི་དྡྷཱི་སུ ཙ ཝ་སཱི ཧོ་མི, དི་བྦཱ་ཡ སོ་ཏ་དྷཱ་ཏུ་ཡཱ;
ཙེ་ཏོ་པ་རི་ཡ་ཉཱ་ཎ་སྶ, ཝ་སཱི ཧོ་མི མ་ཧཱ་མུ་ནེ.
༡༦༣. ‘‘པུ་བྦེ་ནི་ཝཱ་སཾ ཛཱ་ནཱ་མི, དི་བྦ་ཙ་ཀྑུ ཝི་སོ་དྷི་ཏཾ;
ས་བྦཱ་ས་ཝ་པ་རི་ཀྑཱི་ཎཱ, ན་ཏྠི དཱ་ནི པུ་ན་བྦྷ་ཝོ.
༡༦༤. ‘‘ཨ་ཏྠ་དྷ་མྨ་ནི་རུ་ཏྟཱི་སུ, པ་ཊི་བྷཱ་ནེ ཏ་ཐེ་ཝ ཙ;
ཉཱ་ཎཾ མ་མ མ་ཧཱ་ཝཱི་ར, ཨུ་པྤ་ནྣཾ ཏ་ཝ ས་ནྟི་ཀེ.
༡༦༥. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝཱ.
༡༦༦. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༡༦༧. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨ་བྷི་རཱུ་པ་ན་ནྡཱ བྷི་ཀྑུ་ནཱི ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨ་བྷི་རཱུ་པ་ན་ནྡཱ་ཐེ་རི་ཡཱ་པ་དཱ་ནཾ ཚ་ཊྛཾ.