༤. སི་ངྒཱ་ལ་མཱ་ཏུ་ཐེ་རཱི་ཨ་པ་དཱ་ནཾ
༨༢. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་དྷ་མྨཱ་ན པཱ་ར་གཱུ;
ཨི་ཏོ ས་ཏ་ས་ཧ་སྶ་མྷི, ཀ་པྤེ ཨུ་པྤ་ཛྫི ནཱ་ཡ་ཀོ.
༨༣. ‘‘ཏ་དཱ་ཧཾ ཧཾ་ས་ཝ་ཏི་ཡཾ, ཛཱ་ཏཱ་མ་ཙྩ་ཀུ་ལེ ཨ་ཧུཾ;
ནཱ་ནཱ་ར་ཏ་ན་པ་ཛྫོ་ཏེ, ཨི་དྡྷེ ཕཱི་ཏེ མ་ཧ་དྡྷ་ནེ.
༨༤. ‘‘པི་ཏུ་ནཱ ས་ཧ ག་ནྟྭཱ་ན, མ་ཧཱ་ཛ་ན་པུ་ར་ཀྑ་ཏཱ;
དྷ་མྨཾ བུ་དྡྷ་སྶ སུ་ཏྭཱ་ན, པ་བྦ་ཛིཾ ཨ་ན་གཱ་རི་ཡཾ.
༨༥. ‘‘པ་བྦ་ཛི་ཏྭཱ་ན ཀཱ་ཡེ་ན, པཱ་པ་ཀ་མྨཾ ཝི་ཝ་ཛྫ་ཡིཾ;
ཝ་ཙཱི་དུ་ཙྩ་རི་ཏཾ ཧི་ཏྭཱ, ཨཱ་ཛཱི་ཝཾ པ་རི་སོ་དྷ་ཡིཾ.
༨༦. ‘‘བུ་དྡྷེ པ་ས་ནྣཱ དྷ་མྨེ ཙ, ས་ངྒྷེ ཙ ཏི་བྦ་གཱ་ར་ཝཱ;
ས་དྡྷ་མྨ་སྶ་ཝ་ནེ ཡུ་ཏྟཱ, བུ་དྡྷ་ད་སྶ་ན་ལཱ་ལ་སཱ [བུ་དྡྷ་ད་སྶ་ན་སཱ་ལ་ཡཱ (སྱཱ.)].
༨༧. ‘‘ཨ་གྒཾ ས་དྡྷཱ་དྷི་མུ་ཏྟཱ་ནཾ, ཨ་སྶོ་སིཾ བྷི་ཀྑུ་ནིཾ ཏ་དཱ;
ཏཾ ཋཱ་ནཾ པ་ཏྠ་ཡི་ཏྭཱ་ན, ཏི་སྶོ སི་ཀྑཱ ཨ་པཱུ་ར་ཡིཾ.
༨༨. ‘‘ཏ་ཏོ མཾ སུ་ག་ཏོ ཨཱ་ཧ, ཀ་རུ་ཎཱ་ནུ་ག་ཏཱ་ས་ཡོ;
‘ཡ་སྶ ས་དྡྷཱ ཏ་ཐཱ་ག་ཏེ, ཨ་ཙ་ལཱ སུ་པྤ་ཏི་ཊྛི་ཏཱ;
སཱི་ལ་ཉྩ ཡ་སྶ ཀ་ལྱཱ་ཎཾ, ཨ་རི་ཡ་ཀ་ནྟཾ པ་སཾ་སི་ཏཾ.
༨༩. ‘‘‘ས་ངྒྷེ པ་སཱ་དོ ཡ་སྶ་ཏྠི, ཨུ་ཛུ་བྷཱུ་ཏ་ཉྩ ད་སྶ་ནཾ;
ཨ་ད་ལི་དྡོ་ཏི ཏཾ ཨཱ་ཧུ, ཨ་མོ་གྷཾ ཏ་སྶ ཛཱི་ཝི་ཏཾ.
༩༠. ‘‘‘ཏ་སྨཱ ས་དྡྷ་ཉྩ སཱི་ལ་ཉྩ, པ་སཱ་དཾ དྷ་མྨ་ད་སྶ་ནཾ;
ཨ་ནུ་ཡུ་ཉྫེ་ཐ མེ་དྷཱ་ཝཱི, ས་རཾ བུ་དྡྷཱ་ན [བུ་དྡྷཱ་ནུ་སཱ་ས་ནཾ (སཱི.), བུ་དྡྷཱ་ནཾ སཱ་ས་ནཾ (སྱཱ.)] སཱ་ས་ནཾ’.
༩༡. ‘‘ཏཾ སུ་ཏྭཱ་ཧཾ པ་མུ་དི་ཏཱ, ཨ་པུ་ཙྪིཾ པ་ཎི་དྷིཾ མ་མ;
ཏ་དཱ ཨ་ནོ་མོ ཨ་མི་ཏོ, བྱཱ་ཀ་རི་ཏྠ ཝི་ནཱ་ཡ་ཀོ;
‘བུ་དྡྷེ པ་ས་ནྣཱ ཀ་ལྱཱ་ཎཱི, ལ་ཙྪ་སེ ཏཾ སུ་པ་ཏྠི་ཏཾ.
༩༢. ‘‘‘ས་ཏ་ས་ཧ་སྶི་ཏོ ཀ་པྤེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༩༣. ‘‘‘ཏ་སྶ དྷ་མྨེ་སུ དཱ་ཡཱ་དཱ, ཨོ་ར་སཱ དྷ་མྨ་ནི་མྨི་ཏཱ;
སི་ངྒཱ་ལ་ཀ་སྶ [སི་གཱ་ལ་ཀ་སྶ (སཱི. པཱི.)] མཱ་ཏཱ་ཏི, ཧེ་སྶ་ཏི ས་ཏྠུ སཱ་ཝི་ཀཱ’.
༩༤. ‘‘ཏཾ སུ་ཏྭཱ མུ་དི་ཏཱ ཧུ་ཏྭཱ, ཡཱ་ཝ་ཛཱི་ཝཾ ཏ་དཱ ཛི་ནཾ;
མེ་ཏྟ་ཙི་ཏྟཱ པ་རི་ཙ་རིཾ, པ་ཊི་པ་ཏྟཱི་ཧི ནཱ་ཡ་ཀཾ.
༩༥. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༩༦. ‘‘པ་ཙྪི་མེ ཙ བྷ་ཝེ དཱ་ནི, གི་རི་བྦ་ཛ་པུ་རུ་ཏྟ་མེ;
ཛཱ་ཏཱ སེ་ཊྛི་ཀུ་ལེ ཕཱི་ཏེ, མ་ཧཱ་ར་ཏ་ན་ས་ཉྩ་ཡེ.
༩༧. ‘‘པུ་ཏྟོ སི་ངྒཱ་ལ་ཀོ ནཱ་མ, མ་མཱ་སི ཝི་པ་ཐེ ར་ཏོ;
དི་ཊྛི་ག་ཧ་ན་པ་ཀྑ་ནྡོ, དི་སཱ་པཱུ་ཛ་ན་ཏ་པྤ་རོ.
༩༨. ‘‘ནཱ་ནཱ་དི་སཱ ན་མ་སྶ་ནྟཾ [ན་མ་སྶ་ཏི (སྱཱ.)], པི་ཎྜཱ་ཡ ན་ག་རཾ ཝ་ཛཾ;
ཏཾ དི་སྭཱ ཨོ་ཝ་དཱི བུ་དྡྷོ, མ་གྒེ ཋ་ཏྭཱ ཝི་ནཱ་ཡ་ཀོ.
༩༩. ‘‘ཏ་སྶ དེ་ས་ཡ་ཏོ དྷ་མྨཾ, པ་ནཱ་དོ ཝི་མྷ་ཡོ ཨ་ཧུ;
དྭེ་ཀོ་ཊི་ན་ར་ནཱ་རཱི་ནཾ, དྷ་མྨཱ་བྷི་ས་མ་ཡོ ཨ་ཧུ.
༡༠༠. ‘‘ཏ་དཱ་ཧཾ པ་རི་སཾ ག་ནྟྭཱ, སུ་ཏྭཱ སུ་ག་ཏ་བྷཱ་སི་ཏཾ;
སོ་ཏཱ་པ་ཏྟི་ཕ་ལཾ པ་ཏྟཱ, པ་བྦ་ཛིཾ ཨ་ན་གཱ་རི་ཡཾ.
༡༠༡. ‘‘ན ཙི་རེ་ནེ་ཝ ཀཱ་ལེ་ན, བུ་དྡྷ་ད་སྶ་ན་ལཱ་ལ་སཱ;
ཨ་ནུ་སྶ་ཏིཾ ཏཾ བྷཱ་ཝེ་ཏྭཱ, ཨ་ར་ཧ་ཏྟ་མ་པཱ་པུ་ཎིཾ.
༡༠༢. ‘‘ད་སྶ་ན་ཏྠཱ་ཡ བུ་དྡྷ་སྶ, ས་བྦ་དཱ ཙ ཝ་ཛཱ་མ་ཧཾ;
ཨ་ཏི་ཏྟཱ་ཡེ་ཝ པ་སྶཱ་མི, རཱུ་པཾ ན་ཡ་ན་ན་ནྡ་ནཾ.
༡༠༣. ‘‘ས་བྦ་པཱ་ར་མི་ས་མྦྷཱུ་ཏཾ, ལ་ཀྑཱི་ནི་ལ་ཡ་ནཾ ཝ་རཾ;
རཱུ་པཾ ས་བྦ་སུ་བྷཱ་ཀི་ཎྞཾ, ཨ་ཏི་ཏྟཱ ཝི་ཧ་རཱ་མ་ཧཾ.
༡༠༤. ‘‘ཛི་ནོ ཏ་སྨིཾ གུ་ཎེ ཏུ་ཊྛོ, ཨེ་ཏ་ད་གྒེ ཋ་པེ་སི མཾ;
སི་ངྒཱ་ལ་ཀ་སྶ ཡཱ མཱ་ཏཱ, ཨ་གྒཱ ས་དྡྷཱ་དྷི་མུ་ཏྟི་ཀཱ [སཾ་གྷ་ཝི་མུ་ཏྟི་ཀཱ (པཱི.), མ་མཱ་དྷི་མུ་ཏྟི་ཀཱ (ཀ.)].
༡༠༥. ‘‘ཨི་དྡྷཱི་སུ ཙ ཝ་སཱི ཧོ་མི, དི་བྦཱ་ཡ སོ་ཏ་དྷཱ་ཏུ་ཡཱ;
ཙེ་ཏོ་པ་རི་ཡ་ཉཱ་ཎ་སྶ, ཝ་སཱི ཧོ་མི མ་ཧཱ་མུ་ནི.
༡༠༦. ‘‘པུ་བྦེ་ནི་ཝཱ་སཾ ཛཱ་ནཱ་མི, དི་བྦ་ཙ་ཀྑུ ཝི་སོ་དྷི་ཏཾ;
ས་བྦཱ་ས་ཝ་པ་རི་ཀྑཱི་ཎཱ, ན་ཏྠི དཱ་ནི པུ་ན་བྦྷ་ཝོ.
༡༠༧. ‘‘ཨ་ཏྠ་དྷ་མྨ་ནི་རུ་ཏྟཱི་སུ, པ་ཊི་བྷཱ་ནེ ཏ་ཐེ་ཝ ཙ;
ཉཱ་ཎཾ མ་མ མ་ཧཱ་ཝཱི་ར, ཨུ་པྤ་ནྣཾ ཏ་ཝ ས་ནྟི་ཀེ.
༡༠༨. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝཱ.
༡༠༩. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༡༡༠. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ སི་ངྒཱ་ལ་མཱ་ཏཱ བྷི་ཀྑུ་ནཱི ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
སི་ངྒཱ་ལ་མཱ་ཏུ་ཐེ་རི་ཡཱ་པ་དཱ་ནཾ ཙ་ཏུ་ཏྠཾ.