༣. ཨུ་པྤ་ལ་དཱ་ཡི་ཀཱ་ཐེ་རཱི་ཨ་པ་དཱ་ནཾ
༥༧. ‘‘ན་ག་རེ ཨ་རུ་ཎ་ཝ་ཏི་ཡཱ, ཨ་རུ་ཎོ ནཱ་མ ཁ་ཏྟི་ཡོ;
ཏ་སྶ ར་ཉྙོ ཨ་ཧུཾ བྷ་རི་ཡཱ, ཨེ་ཀ་ཛ྄ཛྷཾ ཙཱ་ར་ཡཱ་མ་ཧཾ.
༥༨. ‘‘ར་ཧོ་ག་ཏཱ ནི་སཱི་དི་ཏྭཱ, ཨེ་ཝཾ ཙི་ནྟེ་ས་ཧཾ ཏ་དཱ;
‘ཀུ་ས་ལཾ མེ ཀ་ཏཾ ན་ཏྠི, ཨཱ་དཱ་ཡ ག་མི་ཡཾ མ་མ.
༥༩. ‘‘‘མ་ཧཱ་བྷི་ཏཱ་པཾ ཀ་ཊུ་ཀཾ, གྷོ་ར་རཱུ་པཾ སུ་དཱ་རུ་ཎཾ;
ནི་ར་ཡཾ ནཱུ་ན ག་ཙྪཱ་མི, ཨེ་ཏྠ མེ ན་ཏྠི སཾ་ས་ཡོ’.
༦༠. ‘‘ཨེ་ཝཱ་ཧཾ ཙི་ནྟ་ཡི་ཏྭཱ་ན, པ་ཧཾ་སེ་ཏྭཱ་ན མཱ་ན་སཾ;
རཱ་ཛཱ་ནཾ ཨུ་པ་ག་ནྟྭཱ་ན, ཨི་དཾ ཝ་ཙ་ན་མ་བྲ་ཝིཾ.
༦༡. ‘‘‘ཨི་ཏྠཱི ནཱ་མ མ་ཡཾ དེ་ཝ, པུ་རི་སཱ་ནི་ཏྟ་རཱ ཨ་ཧུ [པུ་རི་སཱ་ནུ་ག་ཏཱ ས་དཱ (སཱི.), པུ་རི་སཱ ན བྷ་ཝཱ་མ ནོ (སྱཱ.), པུ་རི་སཱ་ནཾ བྷ་རཱ མ་ཡཾ (པཱི.)];
ཨེ་ཀཾ མེ ས་མ་ཎཾ དེ་ཧི, བྷོ་ཛ་ཡི་སྶཱ་མི ཁ་ཏྟི་ཡ’.
༦༢. ‘‘ཨ་དཱ་སི མེ ཏ་དཱ རཱ་ཛཱ, ས་མ་ཎཾ བྷཱ་ཝི་ཏི་ནྡྲི་ཡཾ;
ཏ་སྶ པ་ཏྟཾ ག་ཧེ་ཏྭཱ་ན, པ་ར་མ་ནྣེ་ན པཱུ་ར་ཡིཾ.
༦༣. ‘‘པཱུ་རེ་ཏྭཱ པ་ར་མཾ ཨ་ནྣཾ, ས་ཧ སུ་ག་ནྡྷ་ལེ་པ་ནཾ;
མ་ཧཱ་ཙེ་ལེ་ན ཚཱ་དི་ཏྭཱ, ཨ་དཱ་སིཾ ཏུ་ཊྛ་མཱ་ན་སཱ.
༦༤. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༦༥. ‘‘ས་ཧ་སྶ་དེ་ཝ་རཱ་ཛཱུ་ནཾ, མ་ཧེ་སི་ཏྟ་མ་ཀཱ་ར་ཡིཾ;
ས་ཧ་སྶ་ཙ་ཀྐ་ཝ་ཏྟཱི་ནཾ, མ་ཧེ་སི་ཏྟ་མ་ཀཱ་ར་ཡིཾ.
༦༦. ‘‘པ་དེ་ས་ར་ཛྫཾ ཝི་པུ་ལཾ, ག་ཎ་ནཱ་ཏོ ཨ་ས་ངྑི་ཡཾ;
ནཱ་ནཱ་ཝི་དྷཾ བ་ཧུཾ ཨ་ཉྙཾ, ཏ་སྶ ཀ་མྨ་ཕ་ལཾ ཏ་ཏོ.
༦༧. ‘‘ཨུ་པྤ་ལ་སྶེ་ཝ མེ ཝ་ཎྞོ, ཨ་བྷི་རཱུ་པཱ སུ་ད་སྶ་ནཱ;
ཨི་ཏྠི་ས་བྦ་ངྒ་ས་མྤ་ནྣཱ, ཨ་བྷི་ཛཱ་ཏཱ ཛུ་ཏི་ནྡྷ་རཱ.
༦༨. ‘‘པ་ཙྪི་མེ བྷ་ཝེ ས་མྤ་ཏྟེ, ཨ་ཛཱ་ཡིཾ སཱ་ཀི་ཡེ ཀུ་ལེ;
ནཱ་རཱི་ས་ཧ་སྶ་པཱ་མོ་ཀྑཱ, སུ་དྡྷོ་ད་ན་སུ་ཏ་སྶ་ཧཾ.
༦༩. ‘‘ནི་བྦི་ནྡི་ཏྭཱ ཨ་གཱ་རེ་ཧཾ, པ་བྦ་ཛིཾ ཨ་ན་གཱ་རི་ཡཾ;
ས་ཏྟ་མཱི་ར་ཏྟི་ས་མྤ་ཏྟཱ [ས་ཏྟ་མིཾ་ར་ཏྟི་མ་པ་ཏྟཱ (སཱི. སྱཱ. པཱི.)], ཙ་ཏུ་ས་ཙྩ་མ་པཱ་པུ་ཎིཾ.
༧༠. ‘‘ཙཱི་ཝ་རཾ པི་ཎྜ་པཱ་ཏ་ཉྩ, པ་ཙྩ་ཡཾ ས་ཡ་ནཱ་ས་ནཾ;
པ་རི་མེ་ཏུཾ ན ས་ཀྐོ་མི, པི་ཎྜ་པཱ་ཏ་སྶི་དཾ ཕ་ལཾ.
༧༡. ‘‘ཡཾ མ་ཡ྄ཧཾ པཱུ་རི་ཏཾ ཀ་མྨཾ, ཀུ་ས་ལཾ ས་ར་སེ མུ་ནི;
ཏུ་ཡ྄ཧ་ཏྠཱ་ཡ མ་ཧཱ་ཝཱི་ར, པ་རི་ཙ་ཏྟཾ བ་ཧུཾ མ་ཡཱ.
༧༢. ‘‘ཨེ་ཀ་ཏྟིཾ་སེ ཨི་ཏོ ཀ་པྤེ, ཡཾ དཱ་ན་མ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, པི་ཎྜ་པཱ་ཏ་སྶི་དཾ ཕ་ལཾ.
༧༣. ‘‘དྭེ ག་ཏི་ཡོ པ་ཛཱ་ནཱ་མི, དེ་ཝ་ཏྟཾ ཨ་ཐ མཱ་ནུ་སཾ;
ཨ་ཉྙཾ ག་ཏིཾ ན ཛཱ་ནཱ་མི, པི་ཎྜ་པཱ་ཏ་སྶི་དཾ ཕ་ལཾ.
༧༤. ‘‘ཨུ་ཙྩེ ཀུ་ལེ པ་ཛཱ་ཡཱ་མི, མ་ཧཱ་སཱ་ལེ [ཏ་ཡོ སཱ་ལ (ཀ.)] མ་ཧ་དྡྷ་ནེ;
ཨ་ཉྙེ ཀུ་ལེ ན ཛཱ་ཡཱ་མི, པི་ཎྜ་པཱ་ཏ་སྶི་དཾ ཕ་ལཾ.
༧༥. ‘‘བྷ་ཝཱ་བྷ་ཝེ སཾ་ས་རི་ཏྭཱ, སུ་ཀྐ་མཱུ་ལེ་ན ཙོ་དི་ཏཱ;
ཨ་མ་ནཱ་པཾ ན པ་སྶཱ་མི, སོ་མ་ན་སྶ་ཀ་ཏཾ ཕ་ལཾ.
༧༦. ‘‘ཨི་དྡྷཱི་སུ ཙ ཝ་སཱི ཧོ་མི, དི་བྦཱ་ཡ སོ་ཏ་དྷཱ་ཏུ་ཡཱ;
ཙེ་ཏོ་པ་རི་ཡ་ཉཱ་ཎ་སྶ, ཝ་སཱི ཧོ་མི མ་ཧཱ་མུ་ནེ.
༧༧. ‘‘པུ་བྦེ་ནི་ཝཱ་སཾ ཛཱ་ནཱ་མི, དི་བྦ་ཙ་ཀྑུ ཝི་སོ་དྷི་ཏཾ;
ས་བྦཱ་ས་ཝ་པ་རི་ཀྑཱི་ཎཱ, ན་ཏྠི དཱ་ནི པུ་ན་བྦྷ་ཝོ.
༧༨. ‘‘ཨ་ཏྠ་དྷ་མྨ་ནི་རུ་ཏྟཱི་སུ, པ་ཊི་བྷཱ་ནེ ཏ་ཐེ་ཝ ཙ;
ཉཱ་ཎཾ མ་མ མ་ཧཱ་ཝཱི་ར, ཨུ་པྤ་ནྣཾ ཏ་ཝ ས་ནྟི་ཀེ.
༧༩. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝཱ.
༨༠. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༨༡. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨུ་པྤ་ལ་དཱ་ཡི་ཀཱ བྷི་ཀྑུ་ནཱི བྷ་ག་ཝ་ཏོ ས་མྨུ་ཁཱ ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨུ་པྤ་ལ་དཱ་ཡི་ཀཱ་ཐེ་རི་ཡཱ་པ་དཱ་ནཾ ཏ་ཏི་ཡཾ.