༡༠. པེ་ས་ལཱ་ཐེ་རཱི་ཨ་པ་དཱ་ནཾ
༢༢༠. ‘‘ཨི་མ་མྷི བྷ་དྡ་ཀེ ཀ་པྤེ, བྲ་ཧྨ་བ་ནྡྷུ མ་ཧཱ་ཡ་སོ;
ཀ་སྶ་པོ ནཱ་མ གོ་ཏྟེ་ན, ཨུ་པྤ་ཛྫི ཝ་ད་ཏཾ ཝ་རོ.
༢༢༡. ‘‘སཱ་ཝ་ཏྠི་ཡཾ པུ་རེ ཝ་རེ, ཨུ་པཱ་ས་ཀ་ཀུ་ལེ ཨ་ཧཾ;
པ་སཱུ་ཏཱ ཏཾ [ནཾ (སྱཱ.)] ཛི་ན་ཝ་རཾ, དི་སྭཱ སུ་ཏྭཱ ཙ དེ་ས་ནཾ.
༢༢༢. ‘‘ཏཾ ཝཱི་རཾ ས་ར་ཎཾ ག་ནྟྭཱ, སཱི་ལཱ་ནི ཙ ས་མཱ་དི་ཡིཾ;
ཀ་དཱ་ཙི སོ མ་ཧཱ་ཝཱི་རོ, མ་ཧཱ་ཛ་ན་ས་མཱ་ག་མེ.
༢༢༣. ‘‘ཨ་ཏྟ་ནོ ཨ་བྷི་ས་མྦོ་དྷིཾ, པ་ཀཱ་སེ་སི ན་རཱ་ས་བྷོ;
ཨ་ན་ནུ་སྶུ་ཏ་དྷ་མྨེ་སུ, པུ་བྦེ དུ་ཀྑཱ་དི་ཀེ་སུ ཙ.
༢༢༤. ‘‘ཙ་ཀྑུ ཉཱ་ཎ་ཉྩ པ་ཉྙཱ ཙ, ཝི་ཛྫཱ་ལོ་ཀོ ཙ ཨཱ་སི མེ;
ཏཾ སུ་ཏྭཱ ཨུ་གྒ་ཧེ་ཏྭཱ་ན, པ་རི་པུ་ཙྪི་ཉྩ བྷི་ཀྑ་ཝོ.
༢༢༥. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༢༢༦. ‘‘པ་ཙྪི་མེ ཙ བྷ་ཝེ དཱ་ནི, ཛཱ་ཏཱ སེ་ཊྛི་མ་ཧཱ་ཀུ་ལེ;
ཨུ་པེ་ཙྩ བུ་དྡྷཾ ས་དྡྷ་མྨཾ, སུ་ཏྭཱ ས་ཙྩཱུ་པ་སཾ་ཧི་ཏཾ.
༢༢༧. ‘‘པ་བྦ་ཛི་ཏྭཱ་ཙི་རེ་ནེ་ཝ, ས་ཙྩ་ཏྠཱ་ནི [ས་བྦ་ཏྠཱ་ནི (སྱཱ. ཀ.)] ཝི་ཙི་ནྟ་ཡཾ;
ཁེ་པེ་ཏྭཱ ཨཱ་ས་ཝེ ས་བྦེ, ཨ་ར་ཧ་ཏྟ་མ་པཱ་པུ་ཎིཾ.
༢༢༨. ‘‘ཨི་དྡྷཱི་སུ ཙ ཝ་སཱི ཧོ་མི, དི་བྦཱ་ཡ སོ་ཏ་དྷཱ་ཏུ་ཡཱ;
ཙེ་ཏོ་པ་རི་ཡ་ཉཱ་ཎ་སྶ, ཝ་སཱི ཧོ་མི མ་ཧཱ་མུ་ནེ.
༢༢༩. ‘‘པུ་བྦེ་ནི་ཝཱ་སཾ ཛཱ་ནཱ་མི, དི་བྦ་ཙ་ཀྑུ ཝི་སོ་དྷི་ཏཾ;
ས་བྦཱ་ས་ཝ་པ་རི་ཀྑཱི་ཎཱ, ན་ཏྠི དཱ་ནི པུ་ན་བྦྷ་ཝོ.
༢༣༠. ‘‘ཨ་ཏྠ་དྷ་མྨ་ནི་རུ་ཏྟཱི་སུ, པ་ཊི་བྷཱ་ནེ ཏ་ཐེ་ཝ ཙ;
ཉཱ་ཎཾ མེ ཝི་མ་ལཾ སུ་དྡྷཾ, བུ་དྡྷ་སེ་ཊྛ་སྶ ཝཱ་ཧ་སཱ.
༢༣༡. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ, བྷ་ཝཱ ས་བྦེ ས་མཱུ་ཧ་ཏཱ;
ནཱ་གཱི་ཝ བ་ནྡྷ་ནཾ ཚེ་ཏྭཱ, ཝི་ཧ་རཱ་མི ཨ་ནཱ་ས་ཝཱ.
༢༣༢. ‘‘སྭཱ་ག་ཏཾ ཝ་ཏ མེ ཨཱ་སི, མ་མ བུ་དྡྷ་སྶ ས་ནྟི་ཀེ;
ཏི་སྶོ ཝི་ཛྫཱ ཨ་ནུ་པྤ་ཏྟཱ, ཀ་ཏཾ བུ་དྡྷ་སྶ སཱ་ས་ནཾ.
༢༣༣. ‘‘པ་ཊི་ས་མྦྷི་དཱ ཙ་ཏ་སྶོ, ཝི་མོ་ཀྑཱ་པི ཙ ཨ་ཊྛི་མེ;
ཚ་ལ༹་བྷི་ཉྙཱ ས་ཙྪི་ཀ་ཏཱ, ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ པེ་ས་ལཱ [སེ་ལཱ (སྱཱ. པཱི.)] བྷི་ཀྑུ་ནཱི ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
པེ་ས་ལཱ་ཐེ་རི་ཡཱ་པ་དཱ་ནཾ ད་ས་མཾ.
ཁ་ཏྟི་ཡཱ་ཝ་གྒོ ཙ་ཏུ་ཏྠོ.