༧. བྷ་དྡ་ཀཱ་པི་ལཱ་ནཱི་ཐེ་རཱི་ཨ་པ་དཱ་ནཾ
༢༤༤. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་དྷ་མྨཱ་ན པཱ་ར་གཱུ [ས་བྦ་དྷ་མྨེ་སུ ཙ་ཀྑུ་མཱ (སཱི. པཱི.)];
ཨི་ཏོ ས་ཏ་ས་ཧ་སྶ་མྷི, ཀ་པྤེ ཨུ་པྤ་ཛྫི ནཱ་ཡ་ཀོ.
༢༤༥. ‘‘ཏ་དཱ་ཧུ ཧཾ་ས་ཝ་ཏི་ཡཾ, ཝི་དེ་ཧོ ནཱ་མ ནཱ་མ་ཏོ [ནཱ་མ་ཀོ (སྱཱ. པཱི.)];
སེ་ཊྛཱི པ་ཧཱུ་ཏ་ར་ཏ་ནོ, ཏ་སྶ ཛཱ་ཡཱ ཨ་ཧོ་ས་ཧཾ.
༢༤༦. ‘‘ཀ་དཱ་ཙི སོ ན་རཱ་དི་ཙྩཾ, ཨུ་པེ་ཙྩ ས་པ་རི་ཛྫ་ནོ;
དྷ་མྨ་མ་སྶོ་སི བུ་དྡྷ་སྶ, ས་བྦ་དུ་ཀྑ་བྷ་ཡ་པྤ་ཧཾ [དུ་ཀྑ་ཀྑ་ཡཱ་ཝ་ཧཾ (སྱཱ.)].
༢༤༧. ‘‘སཱ་ཝ་ཀཾ དྷུ་ཏ་ཝཱ་དཱ་ནཾ, ཨ་གྒཾ ཀི་ཏྟེ་སི ནཱ་ཡ་ཀོ;
སུ་ཏྭཱ ས་ཏྟཱ་ཧི་ཀཾ དཱ་ནཾ, ད་ཏྭཱ བུ་དྡྷ་སྶ ཏཱ་དི་ནོ.
༢༤༨. ‘‘ནི་པ་ཙྩ སི་ར་སཱ པཱ་དེ, ཏཾ ཋཱ་ན་མ་བྷི་པ་ཏྠ་ཡིཾ;
ས ཧཱ་ས་ཡ་ནྟོ པ་རི་སཾ, ཏ་དཱ ཧི ན་ར་པུ་ངྒ་ཝོ.
༢༤༩. ‘‘སེ་ཊྛི་ནོ ཨ་ནུ་ཀ་མྤཱ་ཡ, ཨི་མཱ གཱ་ཐཱ ཨ་བྷཱ་ས་ཐ;
‘ལ་ཙྪ་སེ པ་ཏྠི་ཏཾ ཋཱ་ནཾ, ནི་བྦུ་ཏོ ཧོ་ཧི པུ་ཏྟ་ཀ.
༢༥༠. ‘‘‘ས་ཏ་ས་ཧ་སྶི་ཏོ ཀ་པྤེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༢༥༡. ‘‘‘ཏ་སྶ དྷ་མྨེ་སུ དཱ་ཡཱ་དོ, ཨོ་ར་སོ དྷ་མྨ་ནི་མྨི་ཏོ;
ཀ་སྶ་པོ ནཱ་མ གོ་ཏྟེ་ན, ཧེ་སྶ་ཏི ས་ཏྠུ སཱ་ཝ་ཀོ’.
༢༥༢. ‘‘ཏཾ སུ་ཏྭཱ མུ་དི་ཏོ ཧུ་ཏྭཱ, ཡཱ་ཝ་ཛཱི་ཝཾ ཏ་དཱ ཛི་ནཾ;
མེ་ཏྟ་ཙི་ཏྟོ པ་རི་ཙ་རི, པ་ཙྩ་ཡེ་ཧི ཝི་ནཱ་ཡ་ཀཾ.
༢༥༣. ‘‘སཱ་ས་ནཾ ཛོ་ཏ་ཡི་ཏྭཱ་ན, སོ མ་དྡི་ཏྭཱ ཀུ་ཏི་ཏྠི་ཡེ;
ཝེ་ནེ་ཡྻཾ ཝི་ན་ཡི་ཏྭཱ ཙ, ནི་བྦུ་ཏོ སོ ས་སཱ་ཝ་ཀོ.
༢༥༤. ‘‘ནི་བྦུ་ཏེ ཏ་མྷི ལོ་ཀ་གྒེ, པཱུ་ཛ་ན་ཏྠཱ་ཡ ས་ཏྠུ་ནོ;
ཉཱ་ཏི་མི་ཏྟེ ས་མཱ་ནེ་ཏྭཱ, ས་ཧ ཏེ་ཧི ཨ་ཀཱ་ར་ཡི.
༢༥༥. ‘‘ས་ཏྟ་ཡོ་ཛ་ནི་ཀཾ ཐཱུ་པཾ, ཨུ་བྦི་དྡྷཾ ར་ཏ་ནཱ་མ་ཡཾ;
ཛ་ལ་ནྟཾ ས་ཏ་རཾ་སིཾ་ཝ, སཱ་ལ་རཱ་ཛཾ་ཝ ཕུ་ལླི་ཏཾ.
༢༥༦. ‘‘ས་ཏྟ་ས་ཏ་ས་ཧ་སྶཱ་ནི, པཱ་ཏི་ཡོ [ཙཱ་ཏི་ཡོ (སྱཱ.)] ཏ་ཏྠ ཀཱ་ར་ཡི;
ན་ལ༹་གྒཱི ཝི་ཡ ཛོ་ཏ་ནྟཱི [ཛོ་ཏ་ནྟེ (སྱཱ. པཱི.)], ར་ཏ་ནེ་ཧེ་ཝ ས་ཏྟ་ཧི.
༢༥༧. ‘‘ག་ནྡྷ་ཏེ་ལེ་ན པཱུ་རེ་ཏྭཱ, དཱི་པཱ་ནུ་ཛྫ་ལ་ཡཱི ཏ་ཧིཾ;
པཱུ་ཛ་ན་ཏྠཱ་ཡ [པཱུ་ཛ་ཏྠཱ་ཡ (སཱི. ཀ.)] མ་ཧེ་སི་སྶ, ས་བྦ་བྷཱུ་ཏཱ་ནུ་ཀ་མྤི་ནོ.
༢༥༨. ‘‘ས་ཏྟ་ས་ཏ་ས་ཧ་སྶཱ་ནི, པུ་ཎྞ་ཀུ་མྦྷཱ་ནི ཀཱ་ར་ཡི;
ར་ཏ་ནེ་ཧེ་ཝ པུ་ཎྞཱ་ནི, པཱུ་ཛ་ན་ཏྠཱ་ཡ མ་ཧེ་སི་ནོ.
༢༥༩. ‘‘མ་ཛ྄ཛྷེ ཨ་ཊྛ་ཊྛ་ཀུ་མྦྷཱི་ནཾ, ཨུ་སྶི་ཏཱ ཀ་ཉྩ་ན་གྒྷི་ཡོ;
ཨ་ཏི་རོ་ཙ་ནྟི ཝ་ཎྞེ་ན, ས་ར་དེ་ཝ དི་ཝཱ་ཀ་རོ.
༢༦༠. ‘‘ཙ་ཏུ་དྭཱ་རེ་སུ སོ་བྷ་ནྟི, ཏོ་ར་ཎཱ ར་ཏ་ནཱ་མ་ཡཱ;
ཨུ་སྶི་ཏཱ ཕ་ལ་ཀཱ ར་མྨཱ, སོ་བྷ་ནྟི ར་ཏ་ནཱ་མ་ཡཱ.
༢༦༡. ‘‘ཝི་རོ་ཙ་ནྟི པ་རི་ཀྑི་ཏྟཱ [པ་རི་ཀྑཱ་ཡོ (སྱཱ.)], ཨ་ཝ་ཊཾ་སཱ སུ་ནི་མྨི་ཏཱ;
ཨུ་སྶི་ཏཱ་ནི པ་ཊཱ་ཀཱ་ནི, ར་ཏ་ནཱ་ནི ཝི་རོ་ཙ་རེ.
༢༦༢. ‘‘སུ་ར་ཏྟཾ སུ་ཀ་ཏཾ ཙི་ཏྟཾ, ཙེ་ཏི་ཡཾ ར་ཏ་ནཱ་མ་ཡཾ;
ཨ་ཏི་རོ་ཙ་ཏི ཝ་ཎྞེ་ན, ས་ས་ཉྫྷོ་ཝ [ས་ས་ཛ྄ཛྷཱ་ཝ (སྱཱ. ཀ.), ས་ས་ཉྫཱ་ཝ (པཱི.)] དི་ཝཱ་ཀ་རོ.
༢༦༣. ‘‘ཐཱུ་པ་སྶ ཝེ་དི་ཡོ ཏི་སྶོ, ཧ་རི་ཏཱ་ལེ་ན པཱུ་ར་ཡི;
ཨེ་ཀཾ མ་ནོ་སི་ལཱ་ཡེ་ཀཾ, ཨ་ཉྫ་ནེ་ན ཙ ཨེ་ཀི་ཀཾ.
༢༦༤. ‘‘པཱུ་ཛཾ ཨེ་ཏཱ་དི་སཾ ར་མྨཾ, ཀཱ་རེ་ཏྭཱ ཝ་ར་ཝཱ་དི་ནོ;
ཨ་དཱ་སི དཱ་ནཾ ས་ངྒྷ་སྶ, ཡཱ་ཝ་ཛཱི་ཝཾ ཡ་ཐཱ་བ་ལཾ.
༢༦༥. ‘‘ས་ཧཱ་ཝ སེ་ཊྛི་ནཱ ཏེ་ན, ཏཱ་ནི པུ་ཉྙཱ་ནི ས་བྦ་སོ;
ཡཱ་ཝ་ཛཱི་ཝཾ ཀ་རི་ཏྭཱ་ན, ས་ཧཱ་ཝ སུ་ག་ཏིཾ ག་ཏཱ.
༢༦༦. ‘‘ས་མྤ་ཏྟི་ཡོ་ནུ་བྷོ་ཏྭཱ་ན, དེ་ཝ་ཏྟེ ཨ་ཐ མཱ་ནུ་སེ;
ཚཱ་ཡཱ ཝི་ཡ ས་རཱི་རེ་ན, ས་ཧ ཏེ་ནེ་ཝ སཾ་ས་རིཾ.
༢༦༧. ‘‘ཨེ་ཀ་ན་ཝུ་ཏི་ཏོ ཀ་པྤེ, ཝི་པ་སྶཱི ནཱ་མ ནཱ་ཡ་ཀོ;
ཨུ་པྤ་ཛྫི ཙཱ་རུ་ད་སྶ་ནོ, ས་བྦ་དྷ་མྨ་ཝི་པ་སྶ་ཀོ.
༢༦༨. ‘‘ཏ་དཱ་ཡཾ བ་ནྡྷུ་མ་ཏི་ཡཾ, བྲཱ་ཧྨ་ཎོ སཱ་དྷུ་ས་མྨ་ཏོ;
ཨ་ཌྜྷོ ས་ནྟོ གུ་ཎེ་ནཱ་པི [ས་ཏྠཱ་ག་མེ་ནཱ་སི (སཱི.)], དྷ་ནེ་ན ཙ སུ་དུ་གྒ་ཏོ.
༢༦༩. ‘‘ཏ་དཱ་པི ཏ་སྶཱ་ཧཾ ཨཱ་སིཾ, བྲཱ་ཧྨ་ཎཱི ས་མ་ཙེ་ཏ་སཱ;
ཀ་དཱ་ཙི སོ དི་ཛ་ཝ་རོ, ས་ངྒ་མེ་སི མ་ཧཱ་མུ་ནིཾ.
༢༧༠. ‘‘ནི་སི་ནྣཾ ཛ་ན་ཀཱ་ཡ་མྷི, དེ་སེ་ནྟཾ ཨ་མ་ཏཾ པ་དཾ;
སུ་ཏྭཱ དྷ་མྨཾ པ་མུ་དི་ཏོ, ཨ་དཱ་སི ཨེ་ཀ་སཱ་ཊ་ཀཾ.
༢༧༡. ‘‘གྷ་ར་མེ་ཀེ་ན ཝ་ཏྠེ་ན, ག་ནྟྭཱ་ནེ་ཏཾ ས མ་བྲ་ཝི [མ་མ་བྲ་ཝི (སཱི. སྱཱ. པཱི.)];
‘ཨ་ནུ་མོ་ད མ་ཧཱ་པུ་ཉྙཾ [མ་ཧཱ་པ་ཉྙེ (སཱི.), མ་ཧཱ་པུ་ཉྙེ (སྱཱ. ཀ.)], དི་ནྣཾ བུ་དྡྷ་སྶ སཱ་ཊ་ཀཾ’.
༢༧༢. ‘‘ཏ་དཱ་ཧཾ ཨ་ཉྫ་ལིཾ ཀ་ཏྭཱ, ཨ་ནུ་མོ་དིཾ སུ་པཱི་ཎི་ཏཱ [སུ་ཝི་དི་ཏཱ (སྱཱ.), སུ་པཱི་ཏི་ཡཱ (ཀ.)];
‘སུ་དི་ནྣོ སཱ་ཊ་ཀོ སཱ་མི, བུ་དྡྷ་སེ་ཊྛ་སྶ ཏཱ་དི་ནོ’.
༢༧༣. ‘‘སུ་ཁི་ཏོ ས་ཛྫི་ཏོ ཧུ་ཏྭཱ, སཾ་ས་ར་ནྟོ བྷ་ཝཱ་བྷ་ཝེ;
བཱ་རཱ་ཎ་སི་པུ་རེ ར་མྨེ, རཱ་ཛཱ ཨཱ་སི མ་ཧཱི་པ་ཏི.
༢༧༤. ‘‘ཏ་དཱ ཏ་སྶ མ་ཧེ་སཱི་ཧཾ, ཨི་ཏྠི་གུ་མྦ་སྶ ཨུ་ཏྟ་མཱ;
ཏ་སྶཱ་ཏི ད་ཡི་ཏཱ [ཏ་སྶཱ་ཝི དུ་ཏི་ཡི་ཀཱ (སྱཱ.)] ཨཱ་སིཾ, པུ་བྦ་སྣེ་ཧེ་ན བྷ་ཏྟུ་ནོ [ཙུ་ཏྟ་རི (སྱཱ. པཱི. ཀ.)].
༢༧༥. ‘‘པི་ཎྜཱ་ཡ ཝི་ཙ་ར་ནྟེ ཏེ [སོ (སཱི. སྱཱ. པཱི.)], ཨ་ཊྛ པ་ཙྩེ་ཀ་ནཱ་ཡ་ཀེ;
དི་སྭཱ པ་མུ་དི་ཏོ ཧུ་ཏྭཱ, ད་ཏྭཱ པི་ཎྜཾ མ་ཧཱ་ར་ཧཾ.
༢༧༦. ‘‘པུ་ནོ ནི་མ་ནྟ་ཡི་ཏྭཱ་ན, ཀ་ཏྭཱ ར་ཏ་ན་མ་ཎྜ་པཾ;
ཀ་མྨཱ་རེ་ཧི ཀ་ཏཾ པ་ཏྟཾ [ཀ་ཏཾ ཚ་ཏྟཾ (སཱི.), ཀ་ཏ་མ་ཊྛཾ (སྱཱ.)], སོ་ཝ་ཎྞཾ ཝ་ཏ ཏ་ཏྟ་ཀཾ.
༢༧༧. ‘‘ས་མཱ་ནེ་ཏྭཱ་ན ཏེ ས་བྦེ, ཏེ་སཾ དཱ་ན་མ་དཱ་སི སོ;
སོ་ཎྞཱ་ས་ནེ པ་ཝི་ཊྛཱ་ནཾ, པ་ས་ནྣོ སེ་ཧི པཱ་ཎི་བྷི.
༢༧༨. ‘‘ཏ་མྤི དཱ་ནཾ ས་ཧཱ་དཱ་སིཾ, ཀཱ་སི་རཱ་ཛེ་ན་ཧཾ ཏ་དཱ;
པུ་ནཱ་ཧཾ བཱ་རཱ་ཎ་སི་ཡཾ, ཛཱ་ཏཱ ཀཱ་སི་ཀ་གཱ་མ་ཀེ.
༢༧༩. ‘‘ཀུ་ཊུ་མྦི་ཀ་ཀུ་ལེ ཕཱི་ཏེ, སུ་ཁི་ཏོ སོ ས་བྷཱ་ཏུ་ཀོ;
ཛེ་ཊྛ་སྶ བྷཱ་ཏུ་ནོ ཛཱ་ཡཱ, ཨ་ཧོ་སིཾ སུ་པ་ཏི་བྦ་ཏཱ.
༢༨༠. ‘‘པ་ཙྩེ་ཀ་བུ་དྡྷཾ དི་སྭཱ་ན, ཀ་ནི་ཡ་སྶ མ་མ བྷ་ཏྟུ་ནོ [བྷ་ཏྟུ་ཀ་ནི་ཡ་སོ (སྱཱ.)];
བྷཱ་ག་ནྣཾ ཏ་སྶ ད་ཏྭཱ་ན, ཨཱ་ག་ཏེ ཏ་མྷི པཱ་ཝ་དིཾ.
༢༨༡. ‘‘ནཱ་བྷི་ན་ནྡི་ཏྠ སོ དཱ་ནཾ, ཏ་ཏོ ཏ་སྶ ཨ་དཱ་ས་ཧཾ;
ཨུ་ཁཱ [བུ་དྡྷཱ (སྱཱ.)] ཨཱ་ནི་ཡ ཏཾ ཨ་ནྣཾ, པུ་ནོ ཏ་སྶེ་ཝ སོ ཨ་དཱ.
༢༨༢. ‘‘ཏ་ད་ནྣཾ ཚ་ཌྜ་ཡི་ཏྭཱ་ན, དུ་ཊྛཱ བུ་དྡྷ་སྶ་ཧཾ ཏ་དཱ;
པ་ཏྟཾ ཀ་ལ་ལ་པུ་ཎྞཾ ཏཾ, ཨ་དཱ་སིཾ ཏ་སྶ ཏཱ་དི་ནོ.
༢༨༣. ‘‘དཱ་ནེ ཙ ག་ཧ་ཎེ ཙེ་ཝ, ཨ་པ་ཙེ པ་དུ་སེ་པི ཙ;
ས་མ་ཙི་ཏྟ་མུ་ཁཾ དི་སྭཱ, ཏ་དཱ་ཧཾ སཾ་ཝི་ཛིཾ བྷུ་སཾ.
༢༨༤. ‘‘པུ་ནོ པ་ཏྟཾ ག་ཧེ་ཏྭཱ་ན, སོ་དྷ་ཡི་ཏྭཱ སུ་ག་ནྡྷི་ནཱ;
པ་ས་ནྣ་ཙི་ཏྟཱ པཱུ་རེ་ཏྭཱ, ས་གྷ་ཏཾ ས་ཀྐ་རཾ ཨ་དཾ.
༢༨༥. ‘‘ཡ་ཏྠ ཡ་ཏྠཱུ་པ་པ་ཛྫཱ་མི, སུ་རཱུ་པཱ ཧོ་མི དཱ་ན་ཏོ;
བུ་དྡྷ་སྶ ཨ་པ་ཀཱ་རེ་ན, དུ་གྒ་ནྡྷཱ ཝ་ད་ནེ་ན ཙ.
༢༨༦. ‘‘པུ་ན ཀ་སྶ་པ་ཝཱི་ར་སྶ, ནི་དྷཱ་ཡ་ནྟ་མྷི ཙེ་ཏི་ཡེ;
སོ་ཝ་ཎྞཾ ཨི་ཊྛ་ཀཾ ཝ་རཾ, ཨ་དཱ་སིཾ མུ་དི་ཏཱ ཨ་ཧཾ.
༢༨༧. ‘‘ཙ་ཏུ་ཛྫཱ་ཏེ་ན ག་ནྡྷེ་ན, ནི་ཙ་ཡི་ཏྭཱ ཏ་མི་ཊྛ་ཀཾ;
མུ་ཏྟཱ དུ་གྒ་ནྡྷ་དོ་ས་མྷཱ, ས་བྦ་ངྒ་སུ་ས་མཱ་ག་ཏཱ.
༢༨༨. ‘‘ས་ཏྟ་པཱ་ཏི་ས་ཧ་སྶཱ་ནི, ར་ཏ་ནེ་ཧེ་ཝ ས་ཏྟ་ཧི;
ཀཱ་རེ་ཏྭཱ གྷ་ཏ་པཱུ་རཱ་ནི, ཝ་ཊྚཱི་ནི [ཝ་ཊྚཱི་ཡོ (སཱི.)] ཙ ས་ཧ་སྶ་སོ.
༢༨༩. ‘‘པ་ཀྑི་པི་ཏྭཱ པ་དཱི་པེ་ཏྭཱ, ཋ་པ་ཡིཾ ས་ཏྟ་པ་ནྟི་ཡོ;
པཱུ་ཛ་ན་ཏྠཾ ལོ་ཀ་ནཱ་ཐ་སྶ, ཝི་པྤ་ས་ནྣེ་ན ཙེ་ཏ་སཱ.
༢༩༠. ‘‘ཏ་དཱ་པི ཏ་མྷི པུ་ཉྙ་མྷི, བྷཱ་གི་ནཱི་ཡི ཝི་སེ་ས་ཏོ;
པུ་ན ཀཱ་སཱི་སུ ས་ཉྫཱ་ཏོ, སུ་མི་ཏྟཱ ཨི་ཏི ཝི་སྶུ་ཏོ.
༢༩༡. ‘‘ཏ་སྶཱ་ཧཾ བྷ་རི་ཡཱ ཨཱ་སིཾ, སུ་ཁི་ཏཱ ས་ཛྫི་ཏཱ པི་ཡཱ;
ཏ་དཱ པ་ཙྩེ་ཀ་མུ་ནི་ནོ, ཨ་དཱ་སིཾ གྷ་ན་ཝེ་ཋ་ནཾ.
༢༩༢. ‘‘ཏ་སྶཱ་པི བྷཱ་གི་ནཱི ཨཱ་སིཾ, མོ་དི་ཏྭཱ དཱ་ན་མུ་ཏྟ་མཾ;
པུ་ནཱ་པི ཀཱ་སི་ར་ཊྛ་མྷི, ཛཱ་ཏོ ཀོ་ལི་ཡ་ཛཱ་ཏི་ཡཱ.
༢༩༣. ‘‘ཏ་དཱ ཀོ་ལི་ཡ་པུ་ཏྟཱ་ནཾ, ས་ཏེ་ཧི ས་ཧ པ་ཉྩ་ཧི;
པ་ཉྩ་པ་ཙྩེ་ཀ་བུ་དྡྷཱ་ནཾ, ས་ཏཱ་ནི ས་མུ་པ་ཊྛ་ཧི.
༢༩༤. ‘‘ཏེ་མཱ་སཾ ཏ་པྤ་ཡི་ཏྭཱ་ན [ཝཱ་ས་ཡི་ཏྭཱ་ན (སྱཱ. པཱི.)], ཨ་དཱ་སི ཙ ཏི་ཙཱི་ཝ་རེ [ཏི་ཙཱི་ཝ་རཾ (སྱཱ.)];
ཛཱ་ཡཱ ཏ་སྶ ཏ་དཱ ཨཱ་སིཾ, པུ་ཉྙ་ཀ་མྨ་པ་ཐཱ་ནུ་གཱ.
༢༩༥. ‘‘ཏ་ཏོ ཙུ་ཏོ ཨ་ཧུ རཱ་ཛཱ, ན་ནྡོ ནཱ་མ མ་ཧཱ་ཡ་སོ;
ཏ་སྶཱ་པི མ་ཧེ་སཱི ཨཱ་སིཾ, ས་བྦ་ཀཱ་མ་ས་མི་དྡྷི་ནཱི.
༢༩༦. ‘‘ཏ་དཱ རཱ་ཛཱ བྷ་ཝི་ཏྭཱ་ན, བྲ་ཧྨ་ད་ཏྟོ མ་ཧཱི་པ་ཏི;
པ་དུ་མ་ཝ་ཏཱི་པུ་ཏྟཱ་ནཾ, པ་ཙྩེ་ཀ་མུ་ནི་ནཾ ཏ་དཱ.
༢༩༧. ‘‘ས་ཏཱ་ནི པ་ཉྩ་ནཱུ་ནཱ་ནི, ཡཱ་ཝ་ཛཱི་ཝཾ ཨུ་པ་ཊྛ་ཧིཾ;
རཱ་ཛུ་ཡྻཱ་ནེ ནི་ཝཱ་སེ་ཏྭཱ, ནི་བྦུ་ཏཱ་ནི ཙ པཱུ་ཛ་ཡིཾ.
༢༩༨. ‘‘ཙེ་ཏི་ཡཱ་ནི ཙ ཀཱ་རེ་ཏྭཱ, པ་བྦ་ཛི་ཏྭཱ ཨུ་བྷོ མ་ཡཾ;
བྷཱ་ཝེ་ཏྭཱ ཨ་པྤ་མ་ཉྙཱ་ཡོ, བྲ་ཧྨ་ལོ་ཀཾ ཨ་ག་མྷ་སེ.
༢༩༩. ‘‘ཏ་ཏོ ཙུ་ཏོ མ་ཧཱ་ཏི་ཏྠེ, སུ་ཛཱ་ཏོ པི་པྥ་ལཱ་ཡ་ནོ;
མཱ་ཏཱ སུ་མ་ན་དེ་ཝཱི་ཏི, ཀོ་སི་གོ་ཏྟོ དི་ཛོ པི་ཏཱ.
༣༠༠. ‘‘ཨ་ཧཾ མ་དྡེ ཛ་ན་པ་དེ, སཱ་ཀ་ལཱ་ཡ པུ་རུ་ཏྟ་མེ;
ཀ་པྤི་ལ་སྶ དི་ཛ་སྶཱ་སིཾ, དྷཱི་ཏཱ མཱ་ཏཱ སུ་ཙཱི་མ་ཏི.
༣༠༡. ‘‘གྷ་ན་ཀ་ཉྩ་ན་བི་མྦེ་ན, ནི་མྨི་ནི་ཏྭཱ་ན མཾ པི་ཏཱ;
ཨ་དཱ ཀ་སྶ་པ་དྷཱི་ར་སྶ, ཀཱ་མེ་ཧི ཝ་ཛྫི་ཏ་སྶ་མཾ.
༣༠༢. ‘‘ཀ་དཱ་ཙི སོ ཀཱ་རུ་ཎི་ཀོ, ག་ནྟྭཱ ཀ་མྨ་ནྟ་པེ་ཀྑ་ཀོ;
ཀཱ་ཀཱ་དི་ཀེ་ཧི ཁ་ཛྫ་ནྟེ, པཱ་ཎེ དི་སྭཱ་ན སཾ་ཝི་ཛི.
༣༠༣. ‘‘གྷ་རེ་ཝཱ་ཧཾ ཏི་ལེ ཛཱ་ཏེ, དི་སྭཱ་ནཱ་ཏ་པ་ཏཱ་པ་ནེ;
ཀི་མི ཀཱ་ཀེ་ཧི ཁ་ཛྫ་ནྟེ, སཾ་ཝེ་ག་མ་ལ་བྷིཾ ཏ་དཱ.
༣༠༤. ‘‘ཏ་དཱ སོ པ་བྦ་ཛཱི དྷཱི་རོ, ཨ་ཧཾ ཏ་མ་ནུ་པ་བྦ་ཛིཾ;
པ་ཉྩ་ཝ་སྶཱ་ནི ནི་ཝ་སིཾ, པ་རི་བྦཱ་ཛ་ཝ་ཏེ [པ་རི་བྦཱ་ཛ་པ་ཐེ (སྱཱ. པཱི.)] ཨ་ཧཾ.
༣༠༥. ‘‘ཡ་དཱ པ་བྦ་ཛི་ཏཱ ཨཱ་སི, གོ་ཏ་མཱི ཛི་ན་པོ་སི་ཀཱ;
ཏ་དཱ་ཧཾ ཏ་མུ་པ་ག་ནྟྭཱ, བུ་དྡྷེ་ན ཨ་ནུ་སཱ་སི་ཏཱ.
༣༠༦. ‘‘ན ཙི་རེ་ནེ་ཝ ཀཱ་ལེ་ན, ཨ་ར་ཧ་ཏྟ་མ་པཱ་པུ་ཎིཾ;
ཨ་ཧོ ཀ་ལྱཱ་ཎ་མི་ཏྟ་ཏྟཾ, ཀ་སྶ་པ་སྶ སི་རཱི་མ་ཏོ.
༣༠༧. ‘‘སུ་ཏོ བུ་དྡྷ་སྶ དཱ་ཡཱ་དོ, ཀ་སྶ་པོ སུ་ས་མཱ་ཧི་ཏོ;
པུ་བྦེ་ནི་ཝཱ་སཾ ཡོ ཝེ་དི, ས་གྒཱ་པཱ་ཡ་ཉྩ པ་སྶ་ཏི.
༣༠༨. ‘‘ཨ་ཐོ ཛཱ་ཏི་ཀྑ་ཡཾ པ་ཏྟོ, ཨ་བྷི་ཉྙཱ་ཝོ་སི་ཏོ མུ་ནི;
ཨེ་ཏཱ་ཧི ཏཱི་ཧི ཝི་ཛྫཱ་ཧི, ཏེ་ཝི་ཛྫོ ཧོ་ཏི བྲཱ་ཧྨ་ཎོ.
༣༠༩. ‘‘ཏ་ཐེ་ཝ བྷ་དྡ་ཀཱ་པི་ལཱ་ནཱི [བྷ་དྡཱ་ཀཱ་པི་ལཱ་ནཱི (སཱི. པཱི.)], ཏེ་ཝི་ཛྫཱ མ་ཙྩུ་ཧཱ་ཡི་ནཱི;
དྷཱ་རེ་ཏི ཨ་ནྟི་མཾ དེ་ཧཾ, ཛི་ཏྭཱ མཱ་རཾ ས་ཝཱ་ཧ་ནཾ.
༣༡༠. ‘‘དི་སྭཱ ཨཱ་དཱི་ན་ཝཾ ལོ་ཀེ, ཨུ་བྷོ པ་བྦ་ཛི་ཏཱ མ་ཡཾ;
ཏྱ་མྷ ཁཱི་ཎཱ་ས་ཝཱ ད་ནྟཱ, སཱི་ཏི་བྷཱུ་ཏཱ་མྷ ནི་བྦུ་ཏཱ.
༣༡༡. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝཱ.
༣༡༢. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༣༡༣. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ བྷ་དྡ་ཀཱ་པི་ལཱ་ནཱི བྷི་ཀྑུ་ནཱི ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
བྷ་དྡ་ཀཱ་པི་ལཱ་ནཱི་ཐེ་རི་ཡཱ་པ་དཱ་ནཾ ས་ཏྟ་མཾ.