༤. ས་ཀུ་ལཱ་ཐེ་རཱི་ཨ་པ་དཱ་ནཾ
༡༣༡. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་དྷ་མྨཱ་ན པཱ་ར་གཱུ;
ཨི་ཏོ ས་ཏ་ས་ཧ་སྶ་མྷི, ཀ་པྤེ ཨུ་པྤ་ཛྫི ནཱ་ཡ་ཀོ.
༡༣༢. ‘‘ཧི་ཏཱ་ཡ ས་བྦ་ས་ཏྟཱ་ནཾ, སུ་ཁཱ་ཡ ཝ་ད་ཏཾ ཝ་རོ;
ཨ་ཏྠཱ་ཡ པུ་རི་སཱ་ཛ་ཉྙོ, པ་ཊི་པ་ནྣོ ས་དེ་ཝ་ཀེ.
༡༣༣. ‘‘ཡ་ས་གྒ་པ་ཏྟོ སི་རི་མཱ, ཀི་ཏྟི་ཝ་ཎྞ་ག་ཏོ ཛི་ནོ;
པཱུ་ཛི་ཏོ ས་བྦ་ལོ་ཀ་སྶ, དི་སཱ་ས་བྦཱ་སུ ཝི་སྶུ་ཏོ.
༡༣༤. ‘‘ཨུ་ཏྟི་ཎྞ་ཝི་ཙི་ཀི་ཙྪོ སོ, ཝཱི་ཏི་ཝ་ཏྟ་ཀ་ཐཾ་ཀ་ཐོ;
ས་མྤུ་ཎྞ་མ་ན་ས་ངྐ་པྤོ, པ་ཏྟོ ས་མྦོ་དྷི་མུ་ཏྟ་མཾ.
༡༣༥. ‘‘ཨ་ནུ་པྤ་ནྣ་སྶ མ་གྒ་སྶ, ཨུ་པྤཱ་དེ་ཏཱ ན་རུ་ཏྟ་མོ;
ཨ་ན་ཀྑཱ་ཏ་ཉྩ ཨ་ཀྑཱ་སི, ཨ་ས་ཉྫཱ་ཏ་ཉྩ ས་ཉྫ་ནཱི.
༡༣༦. ‘‘མ་གྒ་ཉྙཱུ ཙ མ་གྒ་ཝི་དཱུ, མ་གྒ་ཀྑཱ་ཡཱི ན་རཱ་ས་བྷོ;
མ་གྒ་སྶ ཀུ་ས་ལོ ས་ཏྠཱ, སཱ་ར་ཐཱི་ནཾ ཝ་རུ་ཏྟ་མོ.
༡༣༧. ‘‘མ་ཧཱ་ཀཱ་རུ་ཎི་ཀོ ས་ཏྠཱ, དྷ་མྨཾ དེ་སེ་སི ནཱ་ཡ་ཀོ;
ནི་མུ་གྒེ ཀཱ་མ་པ་ངྐ་མྷི, ས་མུ་དྡྷ་ར་ཏི པཱ་ཎི་ནེ.
༡༣༨. ‘‘ཏ་དཱ་ཧཾ ཧཾ་ས་ཝ་ཏི་ཡཾ, ཛཱ་ཏཱ ཁ་ཏྟི་ཡ་ན་ནྡ་ནཱ;
སུ་རཱུ་པཱ ས་དྷ་ནཱ ཙཱ་པི, ད་ཡི་ཏཱ ཙ སི་རཱི་མ་ཏཱི.
༡༣༩. ‘‘ཨཱ་ན་ནྡ་སྶ མ་ཧཱ་ར་ཉྙོ, དྷཱི་ཏཱ པ་ར་མ་སོ་བྷ་ཎཱ;
ཝེ་མཱ་ཏཱ [ཝེ་མཱ་ཏུ (སཱི.)] བྷ་གི་ནཱི ཙཱ་པི, པ་དུ་མུ་ཏྟ་ར་ནཱ་མི་ནོ.
༡༤༠. ‘‘རཱ་ཛ་ཀ་ཉྙཱ་ཧི ས་ཧི་ཏཱ, ས་བྦཱ་བྷ་ར་ཎ་བྷཱུ་སི་ཏཱ;
ཨུ་པཱ་ག་མྨ མ་ཧཱ་ཝཱི་རཾ, ཨ་སྶོ་སིཾ དྷ་མྨ་དེ་ས་ནཾ.
༡༤༡. ‘‘ཏ་དཱ ཧི སོ ལོ་ཀ་ག་རུ, བྷི་ཀྑུ་ནིཾ དི་བྦ་ཙ་ཀྑུ་ཀཾ;
ཀི་ཏྟ་ཡཾ པ་རི་སཱ་མ་ཛ྄ཛྷེ [ཙ་ཏུ་པ་རི་སཱ་ཡ མ་ཛ྄ཛྷེ (སྱཱ.)], ཨ་གྒ་ཊྛཱ་ནེ ཋ་པེ་སི ཏཾ.
༡༤༢. ‘‘སུ་ཎི་ཏྭཱ ཏ་མ་ཧཾ ཧ་ཊྛཱ, དཱ་ནཾ ད་ཏྭཱ་ན ས་ཏྠུ་ནོ;
པཱུ་ཛི་ཏྭཱ་ན ཙ ས་མྦུ་དྡྷཾ, དི་བྦ་ཙ་ཀྑུཾ ཨ་པ་ཏྠ་ཡིཾ.
༡༤༣. ‘‘ཏ་ཏོ ཨ་ཝོ་ཙ མཾ ས་ཏྠཱ, ‘ན་ནྡེ ལ་ཙྪ་སི པ་ཏྠི་ཏཾ;
པ་དཱི་པ་དྷ་མྨ་དཱ་ནཱ་ནཾ, ཕ་ལ་མེ་ཏཾ སུ་ནི་ཙྪི་ཏཾ.
༡༤༤. ‘‘‘ས་ཏ་ས་ཧ་སྶི་ཏོ ཀ་པྤེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༡༤༥. ‘‘‘ཏ་སྶ དྷ་མྨེ་སུ དཱ་ཡཱ་དཱ, ཨོ་ར་སཱ དྷ་མྨ་ནི་མྨི་ཏཱ;
ས་ཀུ་ལཱ ནཱ་མ ནཱ་མེ་ན [ས་ཀུ་ལཱ་ཏི ཙ ནཱ་མེ་ན (སྱཱ.)], ཧེ་སྶ་ཏི ས་ཏྠུ སཱ་ཝི་ཀཱ’.
༡༤༦. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༡༤༧. ‘‘ཨི་མ་མྷི བྷ་དྡ་ཀེ ཀ་པྤེ, བྲ་ཧྨ་བ་ནྡྷུ མ་ཧཱ་ཡ་སོ;
ཀ་སྶ་པོ ནཱ་མ གོ་ཏྟེ་ན, ཨུ་པྤ་ཛྫི ཝ་ད་ཏཾ ཝ་རོ.
༡༤༨. ‘‘པ་རི་བྦཱ་ཛ་ཀི་ནཱི ཨཱ་སིཾ, ཏ་དཱ་ཧཾ ཨེ་ཀ་ཙཱ་རི་ནཱི;
བྷི་ཀྑཱ་ཡ ཝི་ཙ་རི་ཏྭཱ་ན, ཨ་ལ་བྷིཾ ཏེ་ལ་མ་ཏྟ་ཀཾ.
༡༤༩. ‘‘ཏེ་ན དཱི་པཾ པ་དཱི་པེ་ཏྭཱ, ཨུ་པ་ཊྛིཾ ས་བྦ་སཾ་ཝ་རིཾ;
ཙེ་ཏི་ཡཾ དྭི་པ་ད་གྒ་སྶ [དི་པ་ད་གྒ་སྶ (སཱི. སྱཱ. པཱི.)], ཝི་པྤ་ས་ནྣེ་ན ཙེ་ཏ་སཱ.
༡༥༠. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༡༥༡. ‘‘ཡ་ཏྠ ཡ་ཏྠཱུ་པ་པ་ཛྫཱ་མི, ཏ་སྶ ཀ་མྨ་སྶ ཝཱ་ཧ་སཱ;
པ་ཛྫ་ལ་ནྟི [ས་ཉྫ་ལ་ནྟི (སྱཱ. ཀ.), སཾ་ཙ་ར་ནྟི (པཱི.)] མ་ཧཱ་དཱི་པཱ, ཏ་ཏྠ ཏ་ཏྠ ག་ཏཱ་ཡ མེ.
༡༥༢. ‘‘ཏི་རོ་ཀུ་ཊྚཾ ཏི་རོ་སེ་ལཾ, ས་མ་ཏི་གྒ་ཡ྄ཧ པ་བྦ་ཏཾ;
པ་སྶཱ་མ་ཧཾ ཡ་དི་ཙྪཱ་མི, དཱི་པ་དཱ་ན་སྶི་དཾ ཕ་ལཾ.
༡༥༣. ‘‘ཝི་སུ་དྡྷ་ན་ཡ་ནཱ ཧོ་མི, ཡ་ས་སཱ ཙ ཛ་ལཱ་མ་ཧཾ;
ས་དྡྷཱ་པ་ཉྙཱ་ཝ་ཏཱི ཙེ་ཝ, དཱི་པ་དཱ་ན་སྶི་དཾ ཕ་ལཾ.
༡༥༤. ‘‘པ་ཙྪི་མེ ཙ བྷ་ཝེ དཱ་ནི, ཛཱ་ཏཱ ཝི་པྤ་ཀུ་ལེ ཨ་ཧཾ;
པ་ཧཱུ་ཏ་དྷ་ན་དྷ་ཉྙ་མྷི, མུ་དི་ཏེ རཱ་ཛ་པཱུ་ཛི་ཏེ.
༡༥༥. ‘‘ཨ་ཧཾ ས་བྦ་ངྒ་ས་མྤ་ནྣཱ, ས་བྦཱ་བྷ་ར་ཎ་བྷཱུ་སི་ཏཱ;
པུ་ར་པྤ་ཝེ་སེ སུ་ག་ཏཾ, ཝཱ་ཏ་པཱ་ནེ ཋི་ཏཱ ཨ་ཧཾ.
༡༥༦. ‘‘དི་སྭཱ ཛ་ལ་ནྟཾ ཡ་ས་སཱ, དེ་ཝ་མ་ནུ་སྶ་ས་ཀྐ་ཏཾ;
ཨ་ནུ་བྱ་ཉྫ་ན་ས་མྤ་ནྣཾ, ལ་ཀྑ་ཎེ་ཧི ཝི་བྷཱུ་སི་ཏཾ.
༡༥༧. ‘‘ཨུ་ད་གྒ་ཙི་ཏྟཱ སུ་མ་ནཱ, པ་བྦ་ཛྫཾ ས་མ་རོ་ཙ་ཡིཾ;
ན ཙི་རེ་ནེ་ཝ ཀཱ་ལེ་ན, ཨ་ར་ཧ་ཏྟ་མ་པཱ་པུ་ཎིཾ.
༡༥༨. ‘‘ཨི་དྡྷཱི་སུ ཙ ཝ་སཱི ཧོ་མི, དི་བྦཱ་ཡ སོ་ཏ་དྷཱ་ཏུ་ཡཱ;
པ་ར་ཙི་ཏྟཱ་ནི ཛཱ་ནཱ་མི, ས་ཏྠུ་སཱ་ས་ན་ཀཱ་རི་ཀཱ.
༡༥༩. ‘‘པུ་བྦེ་ནི་ཝཱ་སཾ ཛཱ་ནཱ་མི, དི་བྦ་ཙ་ཀྑུ ཝི་སོ་དྷི་ཏཾ;
ཁེ་པེ་ཏྭཱ ཨཱ་ས་ཝེ ས་བྦེ, ཝི་སུ་དྡྷཱ་སིཾ སུ་ནི་མྨ་ལཱ.
༡༦༠. ‘‘པ་རི་ཙི་ཎྞོ མ་ཡཱ ས་ཏྠཱ, ཀ་ཏཾ བུ་དྡྷ་སྶ སཱ་ས་ནཾ;
ཨོ་ཧི་ཏོ ག་རུ་ཀོ བྷཱ་རོ, བྷ་ཝ་ནེ་ཏྟི ས་མཱུ་ཧ་ཏཱ.
༡༦༡. ‘‘ཡ་སྶ་ཏྠཱ་ཡ པ་བྦ་ཛི་ཏཱ, ཨ་གཱ་ར་སྨཱ་ན་གཱ་རི་ཡཾ;
སོ མེ ཨ་ཏྠོ ཨ་ནུ་པྤ་ཏྟོ, ས་བྦ་སཾ་ཡོ་ཛ་ན་ཀྑ་ཡོ.
༡༦༢. ‘‘ཏ་ཏོ མ་ཧཱ་ཀཱ་རུ་ཎི་ཀོ, ཨེ་ཏ་ད་གྒེ ཋ་པེ་སི མཾ;
དི་བྦ་ཙ་ཀྑུ་ཀཱ་ནཾ ཨ་གྒཱ, ས་ཀུ་ལཱ་ཏི ན་རུ་ཏྟ་མོ.
༡༦༣. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝཱ.
༡༦༤. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༡༦༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ས་ཀུ་ལཱ བྷི་ཀྑུ་ནཱི ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ས་ཀུ་ལཱ་ཐེ་རི་ཡཱ་པ་དཱ་ནཾ ཙ་ཏུ་ཏྠཾ.