༥. ན་ནྡཱ་ཐེ་རཱི་ཨ་པ་དཱ་ནཾ
༡༦༦. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་དྷ་མྨཱ་ན པཱ་ར་གཱུ;
ཨི་ཏོ ས་ཏ་ས་ཧ་སྶ་མྷི, ཀ་པྤེ ཨུ་པྤ་ཛྫི ནཱ་ཡ་ཀོ.
༡༦༧. ‘‘ཨོ་ཝཱ་ད་ཀོ ཝི་ཉྙཱ་པ་ཀོ, ཏཱ་ར་ཀོ ས་བྦ་པཱ་ཎི་ནཾ;
དེ་ས་ནཱ་ཀུ་ས་ལོ བུ་དྡྷོ, ཏཱ་རེ་སི ཛ་ན་ཏཾ བ་ཧུཾ.
༡༦༨. ‘‘ཨ་ནུ་ཀ་མྤ་ཀོ ཀཱ་རུ་ཎི་ཀོ, ཧི་ཏེ་སཱི ས་བྦ་པཱ་ཎི་ནཾ;
ས་མྤ་ཏྟེ ཏི་ཏྠི་ཡེ ས་བྦེ, པ་ཉྩ་སཱི་ལེ པ་ཏི་ཊྛ་པི.
༡༦༩. ‘‘ཨེ་ཝཾ ནི་རཱ་ཀུ་ལཾ ཨཱ་སི, སུ་ཉྙ་ཏཾ ཏི་ཏྠི་ཡེ་ཧི ཙ;
ཝི་ཙི་ཏྟཾ ཨ་ར་ཧ་ནྟེ་ཧི, ཝ་སཱི་བྷཱུ་ཏེ་ཧི ཏཱ་དི་བྷི.
༡༧༠. ‘‘ར་ཏ་ནཱ་ན་ཊྛ་པ་ཉྙཱ་སཾ, ཨུ་གྒ་ཏོ་ཝ མ་ཧཱ་མུ་ནི;
ཀ་ཉྩ་ན་གྒྷི་ཡ་ས་ངྐཱ་སོ, བཱ་ཏྟིཾ་ས་ཝ་ར་ལ་ཀྑ་ཎོ.
༡༧༡. ‘‘ཝ་སྶ་ས་ཏ་ས་ཧ་སྶཱ་ནི, ཨཱ་ཡུ ཝི་ཛྫ་ཏི ཏཱ་ཝ་དེ;
ཏཱ་ཝ་ཏཱ ཏི་ཊྛ་མཱ་ནོ སོ, ཏཱ་རེ་སི ཛ་ན་ཏཾ བ་ཧུཾ.
༡༧༢. ‘‘ཏ་དཱ་ཧཾ ཧཾ་ས་ཝ་ཏི་ཡཾ, ཛཱ་ཏཱ སེ་ཊྛི་ཀུ་ལེ ཨ་ཧུཾ;
ནཱ་ནཱ་ར་ཏ་ན་པ་ཛྫོ་ཏེ, མ་ཧཱ་སུ་ཁ་ས་མ་པྤི་ཏཱ.
༡༧༣. ‘‘ཨུ་པེ་ཏྭཱ ཏཾ མ་ཧཱ་ཝཱི་རཾ, ཨ་སྶོ་སིཾ དྷ་མྨ་དེ་ས་ནཾ;
ཨ་མ་ཏཾ པ་ར་མ་སྶཱ་དཾ, པ་ར་མ་ཏྠ་ནི་ཝེ་ད་ཀཾ.
༡༧༤. ‘‘ཏ་དཱ ནི་མ་ནྟ་ཡི་ཏྭཱ་ན, ས་ས་ངྒྷཾ ལོ་ཀ་ནཱ་ཡ་ཀཾ;
ད་ཏྭཱ ཏ་སྶ མ་ཧཱ་དཱ་ནཾ, པ་ས་ནྣཱ སེ་ཧི པཱ་ཎི་བྷི.
༡༧༥. ‘‘ཛྷཱ་ཡི་ནཱི་ནཾ བྷི་ཀྑུ་ནཱི་ནཾ, ཨ་གྒ་ཊྛཱ་ན་མ་པ་ཏྠ་ཡིཾ;
ནི་པ་ཙྩ སི་ར་སཱ དྷཱི་རཾ, ས་ས་ངྒྷཾ ལོ་ཀ་ནཱ་ཡ་ཀཾ.
༡༧༦. ‘‘ཏ་དཱ ཨ་ད་ནྟ་ད་མ་ཀོ, ཏི་ལོ་ཀ་ས་ར་ཎོ པ་བྷཱུ;
བྱཱ་ཀཱ་སི ན་ར་སཱ་ར་ཐི, ‘ལ་ཙྪ་སེ ཏཾ སུ་པ་ཏྠི་ཏཾ.
༡༧༧. ‘‘‘ས་ཏ་ས་ཧ་སྶི་ཏོ ཀ་པྤེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༡༧༨. ‘‘‘ཏ་སྶ དྷ་མྨེ་སུ དཱ་ཡཱ་དཱ, ཨོ་ར་སཱ དྷ་མྨ་ནི་མྨི་ཏཱ;
ན་ནྡཱ་ཏི ནཱ་མ ནཱ་མེ་ན, ཧེ་སྶ་ཏི ས་ཏྠུ སཱ་ཝི་ཀཱ’.
༡༧༩. ‘‘ཏཾ སུ་ཏྭཱ མུ་དི་ཏཱ ཧུ་ཏྭཱ, ཡཱ་ཝ་ཛཱི་ཝཾ ཏ་དཱ ཛི་ནཾ;
མེ་ཏྟ་ཙི་ཏྟཱ པ་རི་ཙ་རིཾ, པ་ཙྩ་ཡེ་ཧི ཝི་ནཱ་ཡ་ཀཾ.
༡༨༠. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༡༨༡. ‘‘ཏ་ཏོ ཙུ་ཏཱ ཡཱ་མ་མ་གཾ, ཏ་ཏོ་ཧཾ ཏུ་སི་ཏཾ ག་ཏཱ [ཨ་གཾ (སཱི. པཱི. ཀ.)];
ཏ་ཏོ ཙ ནི་མྨཱ་ན་ར་ཏིཾ, ཝ་ས་ཝ་ཏྟི་པུ་རཾ ཏ་ཏོ [ག་ཏཱ (སྱཱ.)].
༡༨༢. ‘‘ཡ་ཏྠ ཡ་ཏྠཱུ་པ་པ་ཛྫཱ་མི, ཏ་སྶ ཀ་མྨ་སྶ ཝཱ་ཧ་སཱ;
ཏ་ཏྠ ཏ་ཏྠེ་ཝ རཱ་ཛཱུ་ནཾ, མ་ཧེ་སི་ཏྟ་མ་ཀཱ་ར་ཡིཾ.
༡༨༣. ‘‘ཏ་ཏོ ཙུ་ཏཱ མ་ནུ་སྶ་ཏྟེ, རཱ་ཛཱ་ནཾ ཙ་ཀྐ་ཝ་ཏྟི་ནཾ;
མ་ཎྜ་ལཱི་ན་ཉྩ རཱ་ཛཱུ་ནཾ, མ་ཧེ་སི་ཏྟ་མ་ཀཱ་ར་ཡིཾ.
༡༨༤. ‘‘ས་མྤ་ཏྟིཾ ཨ་ནུ་བྷོ་ཏྭཱ་ན, དེ་ཝེ་སུ མ་ནུ་ཛེ་སུ ཙ;
ས་བྦ་ཏྠ སུ་ཁི་ཏཱ ཧུ་ཏྭཱ, ནེ་ཀ་ཀ་པྤེ་སུ སཾ་ས་རིཾ.
༡༨༥. ‘‘པ་ཙྪི་མེ བྷ་ཝེ ས་མྤ་ཏྟེ, སུ་ར་མྨེ [པུ་ར་སྨིཾ (སྱཱ.)] ཀ་པི་ལ་ཝ྄ཧ་ཡེ;
ར་ཉྙོ སུ་དྡྷོ་ད་ན་སྶཱ་ཧཾ, དྷཱི་ཏཱ ཨཱ་སིཾ ཨ་ནི་ནྡི་ཏཱ.
༡༨༦. ‘‘སི་རི་ཡཱ [སི་རིཾ་ཝ (སཱི.), རཾ་སི་རི་ཝ (སྱཱ.)] རཱུ་པི་ནིཾ དི་སྭཱ, ན་ནྡི་ཏཾ ཨཱ་སི ཏཾ ཀུ་ལཾ;
ཏེ་ན ན་ནྡཱ་ཏི མེ ནཱ་མཾ, སུ་ནྡ་རཾ པ་ཝ་རཾ ཨ་ཧུ.
༡༨༧. ‘‘ཡུ་ཝ་ཏཱི་ན་ཉྩ ས་བྦཱ་སཾ, ཀ་ལྱཱ་ཎཱི་ཏི ཙ ཝི་སྶུ་ཏཱ;
ཏ་སྨི་མྤི ན་ག་རེ ར་མྨེ, ཋ་པེ་ཏྭཱ ཏཾ ཡ་སོ་དྷ་རཾ.
༡༨༨. ‘‘ཛེ་ཊྛོ བྷཱ་ཏཱ ཏི་ལོ་ཀ་གྒོ, པ་ཙྪི་མོ [མ་ཛ྄ཛྷི་མོ (པཱི.)] ཨ་ར་ཧཱ ཏ་ཐཱ;
ཨེ་ཀཱ་ཀི་ནཱི ག་ཧ་ཊྛཱ་ཧཾ, མཱ་ཏ་རཱ པ་རི་ཙོ་དི་ཏཱ.
༡༨༩. ‘‘‘སཱ་ཀི་ཡ་མྷི ཀུ་ལེ ཛཱ་ཏཱ, པུ་ཏྟེ བུ་དྡྷཱ་ནུ་ཛཱ ཏུ་ཝཾ;
ན་ནྡེ་ན་པི ཝི་ནཱ བྷཱུ་ཏཱ, ཨ་གཱ་རེ ཀིཾ ནུ ཨ་ཙྪ་སི.
༡༩༠. ‘‘‘ཛ་རཱ་ཝ་སཱ་ནཾ ཡོ་བྦ་ཉྙཾ, རཱུ་པཾ ཨ་སུ་ཙི་ས་མྨ་ཏཾ;
རོ་ག་ནྟ་མ་པི་ཙཱ་རོ་གྱཾ, ཛཱི་ཝི་ཏཾ མ་ར་ཎ་ནྟི་ཀཾ.
༡༩༡. ‘‘‘ཨི་ད་མྤི ཏེ སུ་བྷཾ རཱུ་པཾ, ས་སཱི་ཀ་ནྟཾ མ་ནོ་ཧ་རཾ;
བྷཱུ་ས་ནཱ་ནཾ ཨ་ལ་ངྐཱ་རཾ, སི་རི་ས་ངྒྷཱ་ཊ་ས་ནྣི་བྷཾ.
༡༩༢. ‘‘‘པུ་ཉྫི་ཏཾ ལོ་ཀ་སཱ་རཾ་ཝ, ན་ཡ་ནཱ་ནཾ ར་སཱ་ཡ་ནཾ;
པུ་ཉྙཱ་ནཾ ཀི་ཏྟི་ཛ་ན་ནཾ, ཨུ་ཀྐཱ་ཀ་ཀུ་ལ་ན་ནྡ་ནཾ.
༡༩༣. ‘‘‘ན ཙི་རེ་ནེ་ཝ ཀཱ་ལེ་ན, ཛ་རཱ ས་མ་དྷི་སེ་སྶ་ཏི [ས་མ་བྷི་བྷོ་སྶ་ཏི (སཱི. སྱཱ.), ས་མ་དྷི་ཧེ་སྶ་ཏི (པཱི.)];
ཝི་ཧཱ་ཡ གེ་ཧཾ ཀཱ་རུ་ཉྙེ [ཀཱ་རུ་ཉྙེ (སཱི. པཱི.), པཱ་ར་ཡ྄ཧིཾ (སྱཱ.)], ཙ་ར དྷ་མྨ་མ་ནི་ནྡི་ཏེ’.
༡༩༤. ‘‘སུ་ཏྭཱ་ཧཾ མཱ་ཏུ ཝ་ཙ་ནཾ, པ་བྦ་ཛིཾ ཨ་ན་གཱ་རི་ཡཾ;
དེ་ཧེ་ན ན ཏུ ཙི་ཏྟེ་ན, རཱུ་པ་ཡོ་བྦ་ན་ལཱ་ལི༹་ཏཱ.
༡༩༥. ‘‘མ་ཧ་ཏཱ ཙ པ་ཡ་ཏྟེ་ན, ཛྷཱ་ན་ཛ྄ཛྷེ་ན པ་རཾ མ་མ;
ཀཱ་ཏུ་ཉྩ ཝ་ད་ཏེ མཱ་ཏཱ, ན ཙཱ་ཧཾ ཏ་ཏྠ ཨུ་སྶུ་ཀཱ.
༡༩༦. ‘‘ཏ་ཏོ མ་ཧཱ་ཀཱ་རུ་ཎི་ཀོ, དི་སྭཱ མཾ ཀཱ་མ་ལཱ་ལ་སཾ [ཀ་མ་ལཱ་ན་ནཾ (སྱཱ.)];
ནི་བྦི་ནྡ་ན་ཏྠཾ རཱུ་པ་སྨིཾ, མ་མ ཙ་ཀྑུ་པ་ཐེ ཛི་ནོ.
༡༩༧. ‘‘ས་ཀེ་ན ཨཱ་ནུ་བྷཱ་ཝེ་ན, ཨི་ཏྠིཾ མཱ་པེ་སི སོ་བྷི་ནིཾ;
ད་སྶ་ནཱི་ཡཾ སུ་རུ་ཙི་རཾ, མ་མ་ཏོ་པི སུ་རཱུ་པི་ནིཾ.
༡༩༨. ‘‘ཏ་མ་ཧཾ ཝི་མྷི་ཏཱ དི་སྭཱ, ཨ་ཏི་ཝི་མྷི་ཏ་དེ་ཧི་ནིཾ;
ཙི་ནྟ་ཡིཾ ས་ཕ་ལཾ མེ་ཏི, ནེ་ཏྟ་ལཱ་བྷ་ཉྩ མཱ་ནུ་སཾ.
༡༩༩. ‘‘ཏ་མ་ཧཾ ཨེ་ཧི སུ་བྷ་གེ, ཡེ་ན་ཏྠོ ཏཾ ཝ་དེ་ཧི མེ;
ཀུ་ལཾ ཏེ ནཱ་མ་གོ་ཏྟ་ཉྩ, ཝ་ད མེ ཡ་དི ཏེ པི་ཡཾ.
༢༠༠. ‘ན ཝ་ཉྩ་ཀཱ་ལོ སུ་བྷ་གེ [པ་ཉྷ་ཀཱ་ལོ སུ་བྷ་ཎེ (སཱི. སྱཱ. པཱི.)], ཨུ་ཙྪ་ངྒེ མཾ ནི་ཝཱ་ས་ཡ;
སཱི་ད་ནྟཱི་ཝ མ་མ་ངྒཱ་ནི, པ་སུ་པྤ་ཡ མུ་ཧུ་ཏྟ་ཀཾ’.
༢༠༡. ‘‘ཏ་ཏོ སཱི་སཾ མ་མ་ངྐེ སཱ, ཀ་ཏྭཱ ས་ཡི སུ་ལོ་ཙ་ནཱ;
ཏ་སྶཱ ན་ལཱ་ཊེ པ་ཏི་ཏཱ, ལུ་དྡྷཱ [ལཱུ་ཏཱ (སྱཱ.)] པ་ར་མ་དཱ་རུ་ཎཱ.
༢༠༢. ‘‘ས་ཧ ཏ་སྶཱ ནི་པཱ་ཏེ་ན, པི་ལ༹་ཀཱ ཨུ་པ་པ་ཛྫ་ཐ;
པ་གྒྷ་རིཾ་སུ པ་བྷི་ནྣཱ ཙ, ཀུ་ཎ་པཱ པུ་བྦ་ལོ་ཧི་ཏཱ.
༢༠༣. ‘‘པ་བྷི་ནྣཾ ཝ་ད་ན་ཉྩཱ་པི, ཀུ་ཎ་པཾ པཱུ་ཏི་ག་ནྡྷ་ནཾ;
ཨུ་དྡྷུ་མཱ་ཏཾ ཝི་ནི་ལ་ཉྩ, པུ་བྦ་ཉྩཱ་པི ས་རཱི་ར་ཀཾ.
༢༠༤. ‘‘སཱ པ་ཝེ་དི་ཏ་ས་བྦ་ངྒཱི, ནི་སྶ་ས་ནྟཱི མུ་ཧུཾ མུ་ཧུཾ;
ཝེ་ད་ཡ་ནྟཱི ས་ཀཾ དུ་ཀྑཾ, ཀ་རུ་ཎཾ པ་རི་དེ་ཝ་ཡི.
༢༠༥. ‘‘‘དུ་ཀྑེ་ན དུ་ཀྑི་ཏཱ ཧོ་མི, ཕུ་ས་ཡ་ནྟི ཙ ཝེ་ད་ནཱ;
མ་ཧཱ་དུ་ཀྑེ ནི་མུ་གྒ་མྷི, ས་ར་ཎཾ ཧོ་ཧི མེ ས་ཁཱི’.
༢༠༦. ‘‘‘ཀུ་ཧིཾ ཝ་ད་ན་སོ་བྷཾ ཏེ, ཀུ་ཧིཾ ཏེ ཏུ་ངྒ་ནཱ་སི་ཀཱ;
ཏ་མྦ་བི་མྦ་ཝ་རོ་ཊྛཾ ཏེ, ཝ་ད་ནཾ ཏེ ཀུ་ཧིཾ ག་ཏཾ.
༢༠༧. ‘‘‘ཀུ་ཧིཾ ས་སཱི་ནི་བྷཾ ཝ་ཎྞཾ, ཀ་མྦུ་གཱི་ཝཱ ཀུ་ཧིཾ ག་ཏཱ;
དོ་ལཱ༹་ལོ་ལཱ་ཝ [དཱ་མཱ་མཱ་ལ་ཉྩ (སྱཱ.), དོ་ལོ་ལུ་ལླཱ་ཝ (ཀ.)] ཏེ ཀ་ཎྞཱ, ཝེ་ཝ་ཎྞཾ ས་མུ་པཱ་ག་ཏཱ.
༢༠༨. ‘‘‘མ་ཀུ་ལ༹་ཁཱ་ར་ཀཱ་ཀཱ་རཱ [མ་ཀུ་ལ་མྦུ་རཱུ་ཧཱ་ཀཱ་རཱ (སཱི.), མ་ཀུ་ལ༹་པ་དུ་མཱ་ཀཱ་རཱ (སྱཱ.)], ཀ་ལི་ཀཱ་ཝ [ཀ་ལ་སཱ་ཝ (སཱི. སྱཱ. པཱི.)] པ་ཡོ་དྷ་རཱ;
པ་བྷི་ནྣཱ པཱུ་ཏི་ཀུ་ཎ་པཱ, དུ་ཊྛ་ག་ནྡྷི་ཏྟ་མཱ་ག་ཏཱ.
༢༠༩. ‘‘‘ཝེ་དི་མ་ཛ྄ཛྷཱ་ཝ སུ་སྶོ་ཎཱི [ཏ་ནུ་མ་ཛ྄ཛྷཱ པུ་ཐུ་སྶོ་ཎཱི (སཱི. སྱཱ.), ཝེ་དི་མ་ཛ྄ཛྷཱ པུ་ཐུ་སྶོ་ཎཱི (པཱི.)], སཱུ་ནཱ་ཝ ནཱི་ཏ་ཀི་བྦི་སཱ;
ཛཱ་ཏཱ ཨ་མེ་ཛ྄ཛྷ་བྷ་རི་ཏཱ, ཨ་ཧོ རཱུ་པ་མ་ས་སྶ་ཏཾ.
༢༡༠. ‘‘‘ས་བྦཾ ས་རཱི་ར་ས་ཉྫཱ་ཏཾ, པཱུ་ཏི་ག་ནྡྷཾ བྷ་ཡཱ་ན་ཀཾ;
སུ་སཱ་ན་མི་ཝ བཱི་བྷ་ཙྪཾ, ར་མ་ནྟེ ཡ་ཏྠ བཱ་ལི་སཱ’.
༢༡༡. ‘‘ཏ་དཱ མ་ཧཱ་ཀཱ་རུ་ཎི་ཀོ, བྷཱ་ཏཱ མེ ལོ་ཀ་ནཱ་ཡ་ཀོ;
དི་སྭཱ སཾ་ཝི་གྒ་ཙི་ཏྟཾ མཾ, ཨི་མཱ གཱ་ཐཱ ཨ་བྷཱ་ས་ཐ.
༢༡༢. ‘‘‘ཨཱ་ཏུ་རཾ ཀུ་ཎ་པཾ པཱུ་ཏིཾ, པ་སྶ ན་ནྡེ ས་མུ་སྶ་ཡཾ;
ཨ་སུ་བྷཱ་ཡ ཙི་ཏྟཾ བྷཱ་ཝེ་ཧི, ཨེ་ཀ་གྒཾ སུ་ས་མཱ་ཧི་ཏཾ.
༢༡༣. ‘‘‘ཡ་ཐཱ ཨི་དཾ ཏ་ཐཱ ཨེ་ཏཾ, ཡ་ཐཱ ཨེ་ཏཾ ཏ་ཐཱ ཨི་དཾ;
དུ་གྒ་ནྡྷཾ པཱུ་ཏི་ཀཾ ཝཱ་ཏི, བཱ་ལཱ་ནཾ ཨ་བྷི་ན་ནྡི་ཏཾ.
༢༡༤. ‘‘‘ཨེ་ཝ་མེ་ཏཾ ཨ་ཝེ་ཀྑ་ནྟཱི, ར་ཏྟི་ནྡི་ཝ་མ་ཏ་ནྡི་ཏཱ;
ཏ་ཏོ ས་ཀཱ་ཡ པ་ཉྙཱ་ཡ, ཨ་བྷི་ནི་བྦི་ཛ྄ཛྷ ད་ཀྑ་སི’.
༢༡༥. ‘‘ཏ་ཏོ་ཧཾ ཨ་ཏི་སཾ་ཝི་གྒཱ, སུ་ཏྭཱ གཱ་ཐཱ སུ་བྷཱ་སི་ཏཱ;
ཏ་ཏྲ་ཊྛི་ཏཱ་ཝ་ཧཾ ས་ནྟཱི, ཨ་ར་ཧ་ཏྟ་མ་པཱ་པུ་ཎིཾ.
༢༡༦. ‘‘ཡ་ཏྠ ཡ་ཏྠ ནི་སི་ནྣཱ་ཧཾ, ས་དཱ ཛྷཱ་ན་པ་རཱ་ཡ་ནཱ;
ཛི་ནོ ཏ་སྨིཾ གུ་ཎེ ཏུ་ཊྛོ, ཨེ་ཏ་ད་གྒེ ཋ་པེ་སི མཾ.
༢༡༧. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝཱ.
༢༡༨. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༢༡༩. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ན་ནྡཱ བྷི་ཀྑུ་ནཱི ཛ་ན་པ་ད་ཀ་ལྱཱ་ཎཱི ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ན་ནྡཱ་ཐེ་རི་ཡཱ་པ་དཱ་ནཾ པ་ཉྩ་མཾ.