༣. དྷ་མྨ་དི་ནྣཱ་ཐེ་རཱི་ཨ་པ་དཱ་ནཾ
༩༥. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་དྷ་མྨཱ་ན པཱ་ར་གཱུ;
ཨི་ཏོ ས་ཏ་ས་ཧ་སྶ་མྷི, ཀ་པྤེ ཨུ་པྤ་ཛྫི ནཱ་ཡ་ཀོ.
༩༦. ‘‘ཏ་དཱ་ཧཾ ཧཾ་ས་ཝ་ཏི་ཡཾ, ཀུ་ལེ ཨ་ཉྙ་ཏ་རེ ཨ་ཧུཾ;
པ་ར་ཀ་མྨ་ཀཱ་རཱི ཨཱ་སིཾ, ནི་པ་ཀཱ སཱི་ལ་སཾ་ཝུ་ཏཱ.
༩༧. ‘‘པ་དུ་མུ་ཏྟ་ར་བུ་དྡྷ་སྶ, སུ་ཛཱ་ཏོ ཨ་གྒ་སཱ་ཝ་ཀོ;
ཝི་ཧཱ་རཱ ཨ་བྷི་ནི་ཀྑ་མྨ, པི་ཎྜ་པཱ་ཏཱ་ཡ [པ་ཏྟ་མཱ་དཱ་ཡ (ཀ.)] ག་ཙྪ་ཏི.
༩༨. ‘‘གྷ་ཊཾ ག་ཧེ་ཏྭཱ ག་ཙྪ་ནྟཱི, ཏ་དཱ ཨུ་ད་ཀ་ཧཱ་རི་ཀཱ;
ཏཾ དི་སྭཱ ཨ་ད་དཾ པཱུ་པཾ, པ་ས་ནྣཱ སེ་ཧི པཱ་ཎི་བྷི.
༩༩. ‘‘པ་ཊི་གྒ་ཧེ་ཏྭཱ ཏ་ཏྠེ་ཝ, ནི་སི་ནྣོ པ་རི་བྷུ་ཉྫི སོ;
ཏ་ཏོ ནེ་ཏྭཱ་ན ཏཾ གེ་ཧཾ, ཨ་དཱ་སིཾ ཏ་སྶ བྷོ་ཛ་ནཾ.
༡༠༠. ‘‘ཏ་ཏོ མེ ཨ་ཡྻ་ཀོ ཏུ་ཊྛོ, ཨ་ཀ་རཱི སུ་ཎི་སཾ ས་ཀཾ;
ས་སྶུ་ཡཱ ས་ཧ ག་ནྟྭཱ་ན, ས་མྦུ་དྡྷཾ ཨ་བྷི་ཝཱ་ད་ཡིཾ.
༡༠༡. ‘‘ཏ་དཱ སོ དྷ་མྨ་ཀ་ཐི་ཀཾ, བྷི་ཀྑུ་ནིཾ པ་རི་ཀི་ཏྟ་ཡཾ;
ཋ་པེ་སི ཨེ་ཏ་ད་གྒ་མྷི, ཏཾ སུ་ཏྭཱ མུ་དི་ཏཱ ཨ་ཧཾ.
༡༠༢. ‘‘ནི་མ་ནྟ་ཡི་ཏྭཱ སུ་ག་ཏཾ, ས་ས་ངྒྷཾ ལོ་ཀ་ནཱ་ཡ་ཀཾ;
མ་ཧཱ་དཱ་ནཾ ད་དི་ཏྭཱ་ན, ཏཾ ཋཱ་ན་མ་བྷི་པ་ཏྠ་ཡིཾ.
༡༠༣. ‘‘ཏ་ཏོ མཾ སུ་ག་ཏོ ཨཱ་ཧ, གྷ་ན་ནི་ནྣཱ་ད་སུ་སྶ་རོ [གྷ་ན་ནི་ནྣཱ་ད་སུ་སྶ་རེ (ཀ.)];
‘མ་མུ་པ་ཊྛཱ་ན་ནི་ར་ཏེ, ས་ས་ངྒྷ་པ་རི་ཝེ་སི་ཀེ.
༡༠༤. ‘‘‘ས་དྡྷ་མྨ་སྶ་ཝ་ནེ ཡུ་ཏྟེ, གུ་ཎ་ཝ་དྡྷི་ཏ་མཱ་ན་སེ;
བྷ་དྡེ བྷ་ཝ་སྶུ མུ་དི་ཏཱ, ལ་ཙྪ་སེ པ་ཎི་དྷཱི་ཕ་ལཾ.
༡༠༥. ‘‘‘ས་ཏ་ས་ཧ་སྶི་ཏོ ཀ་པྤེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༡༠༦. ‘‘‘ཏ་སྶ དྷ་མྨེ་སུ དཱ་ཡཱ་དཱ, ཨོ་ར་སཱ དྷ་མྨ་ནི་མྨི་ཏཱ;
དྷ་མྨ་དི་ནྣཱ་ཏི ནཱ་མེ་ན, ཧེ་སྶ་ཏི ས་ཏྠུ སཱ་ཝི་ཀཱ’.
༡༠༧. ‘‘ཏཾ སུ་ཏྭཱ མུ་དི་ཏཱ ཧུ་ཏྭཱ, ཡཱ་ཝ་ཛཱི་ཝཾ མ་ཧཱ་མུ་ནིཾ;
མེ་ཏྟ་ཙི་ཏྟཱ པ་རི་ཙ་རིཾ, པ་ཙྩ་ཡེ་ཧི ཝི་ནཱ་ཡ་ཀཾ.
༡༠༨. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༡༠༩. ‘‘ཨི་མ་མྷི བྷ་དྡ་ཀེ ཀ་པྤེ, བྲ་ཧྨ་བ་ནྡྷུ མ་ཧཱ་ཡ་སོ;
ཀ་སྶ་པོ ནཱ་མ གོ་ཏྟེ་ན, ཨུ་པྤ་ཛྫི ཝ་ད་ཏཾ ཝ་རོ.
༡༡༠. ‘‘ཨུ་པ་ཊྛཱ་ཀོ མ་ཧེ་སི་སྶ, ཏ་དཱ ཨཱ་སི ན་རི་སྶ་རོ;
ཀཱ་སི་རཱ་ཛཱ ཀི་ཀཱི ནཱ་མ, བཱ་རཱ་ཎ་སི་པུ་རུ་ཏྟ་མེ.
༡༡༡. ‘‘ཚ་ཊྛཱ ཏ་སྶཱ་ས་ཧཾ དྷཱི་ཏཱ, སུ་དྷ་མྨཱ ཨི་ཏི ཝི་སྶུ་ཏཱ;
དྷ་མྨཾ སུ་ཏྭཱ ཛི་ན་གྒ་སྶ, པ་བྦ་ཛྫཾ ས་མ་རོ་ཙ་ཡིཾ.
༡༡༢. ‘‘ཨ་ནུ་ཛཱ་ནི ན ནོ ཏཱ་ཏོ, ཨ་གཱ་རེ་ཝ ཏ་དཱ མ་ཡཾ;
ཝཱི་ས་ཝ་སྶ་ས་ཧ་སྶཱ་ནི, ཝི་ཙ་རི་མྷ ཨ་ཏ་ནྡི་ཏཱ.
ཏ་ཏི་ཡཾ བྷཱ་ཎ་ཝཱ་རཾ.
༡༡༣. ‘‘ཀོ་མཱ་རི་བྲ་ཧྨ་ཙ་རི་ཡཾ, རཱ་ཛ་ཀ་ཉྙཱ སུ་ཁེ་དྷི་ཏཱ;
བུ་དྡྷོ་པ་ཊྛཱ་ན་ནི་ར་ཏཱ, མུ་དི་ཏཱ ས་ཏྟ དྷཱི་ཏ་རོ.
༡༡༤. ‘‘ས་མ་ཎཱི ས་མ་ཎ་གུ་ཏྟཱ ཙ, བྷི་ཀྑུ་ནཱི བྷི་ཀྑུ་དཱ་ཡི་ཀཱ;
དྷ་མྨཱ ཙེ་ཝ སུ་དྷ་མྨཱ ཙ, ས་ཏྟ་མཱི ས་ངྒྷ་དཱ་ཡི་ཀཱ.
༡༡༥. ‘‘ཁེ་མཱ ཨུ་པྤ་ལ་ཝ་ཎྞཱ ཙ, པ་ཊཱ་ཙཱ་རཱ ཙ ཀུ་ཎྜ་ལཱ;
གོ་ཏ་མཱི ཙ ཨ་ཧ་ཉྩེ་ཝ, ཝི་སཱ་ཁཱ ཧོ་ཏི ས་ཏྟ་མཱི.
༡༡༦. ‘‘ཏེ་ཧི ཀ་མྨེ་ཧི སུ་ཀ་ཏེ་ཧི, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༡༡༧. ‘‘པ་ཙྪི་མེ ཙ བྷ་ཝེ དཱ་ནི, གི་རི་བྦ་ཛ་པུ་རུ་ཏྟ་མེ;
ཛཱ་ཏཱ སེ་ཊྛི་ཀུ་ལེ ཕཱི་ཏེ, ས་བྦ་ཀཱ་མ་ས་མི་དྡྷི་ནེ.
༡༡༨. ‘‘ཡ་དཱ རཱུ་པ་གུ་ཎཱུ་པེ་ཏཱ, པ་ཋ་མེ ཡོ་བྦ་ནེ ཋི་ཏཱ;
ཏ་དཱ པ་ར་ཀུ་ལཾ ག་ནྟྭཱ, ཝ་སིཾ སུ་ཁ་ས་མ་པྤི་ཏཱ.
༡༡༩. ‘‘ཨུ་པེ་ཏྭཱ ལོ་ཀ་ས་ར་ཎཾ, སུ་ཎི་ཏྭཱ དྷ་མྨ་དེ་ས་ནཾ;
ཨ་ནཱ་གཱ་མི་ཕ་ལཾ པ་ཏྟོ, སཱ་མི་ཀོ མེ སུ་བུ་དྡྷི་མཱ.
༡༢༠. ‘‘ཏ་དཱ་ཧཾ ཨ་ནུ་ཛཱ་ནེ་ཏྭཱ, པ་བྦ་ཛིཾ ཨ་ན་གཱ་རི་ཡཾ;
ན ཙི་རེ་ནེ་ཝ ཀཱ་ལེ་ན, ཨ་ར་ཧ་ཏྟ་མ་པཱ་པུ་ཎིཾ.
༡༢༡. ‘‘ཏ་དཱ ཨུ་པཱ་ས་ཀོ སོ མཾ, ཨུ་པ་ག་ནྟྭཱ ཨ་པུ་ཙྪ་ཐ;
ག་མྦྷཱི་རེ ནི་པུ་ཎེ པ་ཉྷེ, ཏེ ས་བྦེ བྱཱ་ཀ་རིཾ ཨ་ཧཾ.
༡༢༢. ‘‘ཛི་ནོ ཏ་སྨིཾ གུ་ཎེ ཏུ་ཊྛོ, ཨེ་ཏ་ད་གྒེ ཋ་པེ་སི མཾ;
‘བྷི་ཀྑུ་ནིཾ དྷ་མྨ་ཀ་ཐི་ཀཾ, ནཱ་ཉྙཾ པ་སྶཱ་མི ཨེ་དི་སིཾ.
༡༢༣. ‘དྷ་མྨ་དི་ནྣཱ ཡ་ཐཱ དྷཱི་རཱ, ཨེ་ཝཾ དྷཱ་རེ་ཐ བྷི་ཀྑ་ཝོ’;
‘‘ཨེ་ཝཱ་ཧཾ པ་ཎྜི་ཏཱ ཧོ་མི [ཛཱ་ཏཱ (སཱི.), ནཱ་མ (སྱཱ.)], ནཱ་ཡ་ཀེ་ནཱ་ནུ་ཀ་མྤི་ཏཱ.
༡༢༤. ‘‘པ་རི་ཙི་ཎྞོ མ་ཡཱ ས་ཏྠཱ, ཀ་ཏཾ བུ་དྡྷ་སྶ སཱ་ས་ནཾ;
ཨོ་ཧི་ཏོ ག་རུ་ཀོ བྷཱ་རོ, བྷ་ཝ་ནེ་ཏྟི ས་མཱུ་ཧ་ཏཱ.
༡༢༥. ‘‘ཡ་སྶ་ཏྠཱ་ཡ པ་བྦ་ཛི་ཏཱ, ཨ་གཱ་ར་སྨཱ་ན་གཱ་རི་ཡཾ;
སོ མེ ཨ་ཏྠོ ཨ་ནུ་པྤ་ཏྟོ, ས་བྦ་སཾ་ཡོ་ཛ་ན་ཀྑ་ཡོ.
༡༢༦. ‘‘ཨི་དྡྷཱི་སུ ཙ ཝ་སཱི ཧོ་མི, དི་བྦཱ་ཡ སོ་ཏ་དྷཱ་ཏུ་ཡཱ;
པ་ར་ཙི་ཏྟཱ་ནི ཛཱ་ནཱ་མི, ས་ཏྠུ་སཱ་ས་ན་ཀཱ་རི་ཀཱ.
༡༢༧. ‘‘པུ་བྦེ་ནི་ཝཱ་སཾ ཛཱ་ནཱ་མི, དི་བྦ་ཙ་ཀྑུ ཝི་སོ་དྷི་ཏཾ;
ཁེ་པེ་ཏྭཱ ཨཱ་ས་ཝེ ས་བྦེ, ཝི་སུ་དྡྷཱ་སིཾ སུ་ནི་མྨ་ལཱ.
༡༢༨. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝཱ.
༡༢༩. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༡༣༠. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ དྷ་མྨ་དི་ནྣཱ བྷི་ཀྑུ་ནཱི ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
དྷ་མྨ་དི་ནྣཱ་ཐེ་རི་ཡཱ་པ་དཱ་ནཾ ཏ་ཏི་ཡཾ.