༢. ཀི་སཱ་གོ་ཏ་མཱི་ཐེ་རཱི་ཨ་པ་དཱ་ནཾ
༥༥. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་དྷ་མྨཱ་ན པཱ་ར་གཱུ;
ཨི་ཏོ ས་ཏ་ས་ཧ་སྶ་མྷི, ཀ་པྤེ ཨུ་པྤ་ཛྫི ནཱ་ཡ་ཀོ.
༥༦. ‘‘ཏ་དཱ་ཧཾ ཧཾ་ས་ཝ་ཏི་ཡཾ, ཛཱ་ཏཱ ཨ་ཉྙ་ཏ་རེ ཀུ་ལེ;
ཨུ་པེ་ཏྭཱ ཏཾ ན་ར་ཝ་རཾ, ས་ར་ཎཾ ས་མུ་པཱ་ག་མིཾ.
༥༧. ‘‘དྷ་མྨ་ཉྩ ཏ་སྶ ཨ་སྶོ་སིཾ, ཙ་ཏུ་ས་ཙྩཱུ་པ་ས་ཉྷི་ཏཾ;
མ་དྷུ་རཾ པ་ར་མ་སྶཱ་དཾ, ཝ་ཊྚ་ས་ནྟི་སུ་ཁཱ་ཝ་ཧཾ [ཙི་ཏྟ་ས་ནྟི … (སྱཱ.)].
༥༨. ‘‘ཏ་དཱ ཙ བྷི་ཀྑུ་ནིཾ ཝཱི་རོ, ལཱུ་ཁ་ཙཱི་ཝ་ར་དྷཱ་རི་ནིཾ;
ཋ་པེ་ནྟོ ཨེ་ཏ་ད་གྒ་མྷི, ཝ་ཎྞ་ཡཱི པུ་རི་སུ་ཏྟ་མོ.
༥༩. ‘‘ཛ་ནེ་ཏྭཱ་ན་པྤ་ཀཾ པཱི་ཏིཾ, སུ་ཏྭཱ བྷི་ཀྑུ་ནི་ཡཱ གུ་ཎེ;
ཀཱ་རཾ ཀ་ཏྭཱ་ན བུ་དྡྷ་སྶ, ཡ་ཐཱ་ས་ཏྟི ཡ་ཐཱ་བ་ལཾ.
༦༠. ‘‘ནི་པ་ཙྩ མུ་ནི་ཝ་རཾ ཏཾ, ཏཾ ཋཱ་ན་མ་བྷི་པ་ཏྠ་ཡིཾ;
ཏ་དཱ་ནུ་མོ་དི ས་མྦུ་དྡྷོ, ཋཱ་ན་ལཱ་བྷཱ་ཡ ནཱ་ཡ་ཀོ.
༦༡. ‘‘‘ས་ཏ་ས་ཧ་སྶི་ཏོ ཀ་པྤེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༦༢. ‘‘‘ཏ་སྶ དྷ་མྨེ་སུ དཱ་ཡཱ་དཱ, ཨོ་ར་སཱ དྷ་མྨ་ནི་མྨི་ཏཱ;
ཀི་སཱ་གོ་ཏ་མཱི [གོ་ཏ་མཱི ནཱ་མ (སཱི. ཀ.)] ནཱ་མེ་ན, ཧེ་སྶ་ཏི ས་ཏྠུ སཱ་ཝི་ཀཱ’.
༦༣. ‘‘ཏཾ སུ་ཏྭཱ མུ་དི་ཏཱ ཧུ་ཏྭཱ, ཡཱ་ཝ་ཛཱི་ཝཾ ཏ་དཱ ཛི་ནཾ;
མེ་ཏྟ་ཙི་ཏྟཱ པ་རི་ཙ་རིཾ, པ་ཙྩ་ཡེ་ཧི ཝི་ནཱ་ཡ་ཀཾ.
༦༤. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༦༥. ‘‘ཨི་མ་མྷི བྷ་དྡ་ཀེ ཀ་པྤེ, བྲ་ཧྨ་བ་ནྡྷུ མ་ཧཱ་ཡ་སོ;
ཀ་སྶ་པོ ནཱ་མ གོ་ཏྟེ་ན, ཨུ་པྤ་ཛྫི ཝ་ད་ཏཾ ཝ་རོ.
༦༦. ‘‘ཨུ་པ་ཊྛཱ་ཀོ མ་ཧེ་སི་སྶ, ཏ་དཱ ཨཱ་སི ན་རི་སྶ་རོ;
ཀཱ་སི་རཱ་ཛཱ ཀི་ཀཱི ནཱ་མ, བཱ་རཱ་ཎ་སི་པུ་རུ་ཏྟ་མེ.
༦༧. ‘‘པ་ཉྩ་མཱི ཏ་སྶ དྷཱི་ཏཱ་སིཾ, དྷ་མྨཱ ནཱ་མེ་ན ཝི་སྶུ་ཏཱ;
དྷ་མྨཾ སུ་ཏྭཱ ཛི་ན་གྒ་སྶ, པ་བྦ་ཛྫཾ ས་མ་རོ་ཙ་ཡིཾ.
༦༨. ‘‘ཨ་ནུ་ཛཱ་ནི ན ནོ ཏཱ་ཏོ, ཨ་གཱ་རེ་ཝ ཏ་དཱ མ་ཡཾ;
ཝཱི་ས་ཝ་སྶ་ས་ཧ་སྶཱ་ནི, ཝི་ཙ་རི་མྷ ཨ་ཏ་ནྡི་ཏཱ.
༦༩. ‘‘ཀོ་མཱ་རི་བྲ་ཧྨ་ཙ་རི་ཡཾ, རཱ་ཛ་ཀ་ཉྙཱ སུ་ཁེ་དྷི་ཏཱ;
བུ་དྡྷོ་པ་ཊྛཱ་ན་ནི་ར་ཏཱ, མུ་དི་ཏཱ ས་ཏྟ དྷཱི་ཏ་རོ.
༧༠. ‘‘ས་མ་ཎཱི ས་མ་ཎ་གུ་ཏྟཱ ཙ, བྷི་ཀྑུ་ནཱི བྷི་ཀྑུ་དཱ་ཡི་ཀཱ;
དྷ་མྨཱ ཙེ་ཝ སུ་དྷ་མྨཱ ཙ, ས་ཏྟ་མཱི ས་ངྒྷ་དཱ་ཡི་ཀཱ.
༧༡. ‘‘ཁེ་མཱ ཨུ་པྤ་ལ་ཝ་ཎྞཱ ཙ, པ་ཊཱ་ཙཱ་རཱ ཙ ཀུ་ཎྜ་ལཱ;
ཨ་ཧ་ཉྩ དྷ་མྨ་དི་ནྣཱ ཙ, ཝི་སཱ་ཁཱ ཧོ་ཏི ས་ཏྟ་མཱི.
༧༢. ‘‘ཏེ་ཧི ཀ་མྨེ་ཧི སུ་ཀ་ཏེ་ཧི, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༧༣. ‘‘པ་ཙྪི་མེ ཙ བྷ་ཝེ དཱ་ནི, ཛཱ་ཏཱ སེ་ཊྛི་ཀུ་ལེ ཨ་ཧཾ;
དུ་གྒ་ཏེ ཨ་དྷ་ནེ ན་ཊྛེ [ནཱི་ཙེ (སྱཱ.), ནི་དྡྷེ (པཱི.)], ག་ཏཱ ཙ ས་དྷ་ནཾ ཀུ་ལཾ.
༧༤. ‘‘པ་ཏིཾ ཋ་པེ་ཏྭཱ སེ་སཱ མེ, དེ་སྶ་ནྟི ཨ་དྷ་ནཱ ཨི་ཏི;
ཡ་དཱ ཙ པ་སཱུ་ཏཱ [ས་སུ་ཏཱ (སཱི. པཱི.)] ཨཱ་སིཾ, ས་བྦེ་སཾ ད་ཡི་ཏཱ ཏ་དཱ.
༧༥. ‘‘ཡ་དཱ སོ ཏ་རུ་ཎོ བྷ་དྡོ [པུ་ཏྟོ (སཱི. སྱཱ.)], ཀོ་མ་ལ་ཀོ [ཀོ་མཱ་ར་ཀོ (སྱཱ.), ཀོ་མ་ལ་ངྒོ (སཱི. པཱི.)] སུ་ཁེ་དྷི་ཏོ;
ས་པཱ་ཎ་མི་ཝ ཀ་ནྟོ མེ, ཏ་དཱ ཡ་མ་ཝ་སཾ ག་ཏོ.
༧༦. ‘‘སོ་ཀ་ཊྚཱ དཱི་ན་ཝ་ད་ནཱ, ཨ་སྶུ་ནེ་ཏྟཱ རུ་ད་མྨུ་ཁཱ;
མ་ཏཾ ཀུ་ཎ་པ་མཱ་དཱ་ཡ, ཝི་ལ་པ་ནྟཱི ག་མཱ་མ་ཧཾ.
༧༧. ‘‘ཏ་དཱ ཨེ་ཀེ་ན ས་ནྡི་ཊྛཱ, ཨུ་པེ་ཏྭཱ་བྷི་ས་ཀྐུ་ཏྟ་མཾ;
ཨ་ཝོ་ཙཾ དེ་ཧི བྷེ་ས་ཛྫཾ, པུ་ཏྟ་ས་ཉྫཱི་ཝ་ན་ནྟི བྷོ.
༧༨. ‘‘ན ཝི་ཛྫ་ནྟེ མ་ཏཱ ཡ་སྨིཾ, གེ་ཧེ སི་དྡྷ་ཏྠ་ཀཾ ཏ་ཏོ;
ཨཱ་ཧ་རཱ་ཏི ཛི་ནོ ཨཱ་ཧ, ཝི་ན་ཡོ་པཱ་ཡ་ཀོ་ཝི་དོ.
༧༩. ‘‘ཏ་དཱ ག་མི་ཏྭཱ སཱ་ཝ་ཏྠིཾ, ན ལ་བྷིཾ ཏཱ་དི་སཾ གྷ་རཾ;
ཀུ་ཏོ སི་དྡྷ་ཏྠ་ཀཾ ཏ་སྨཱ, ཏ་ཏོ ལ་དྡྷཱ ས་ཏིཾ ཨ་ཧཾ.
༨༠. ‘‘ཀུ་ཎ་པཾ ཚ་ཌྜ་ཡི་ཏྭཱ་ན, ཨུ་པེ་སིཾ ལོ་ཀ་ནཱ་ཡ་ཀཾ;
དཱུ་ར་ཏོ་ཝ མ་མཾ དི་སྭཱ, ཨ་ཝོ་ཙ མ་དྷུ་ར་སྶ་རོ.
༨༡. ‘‘‘ཡོ ཙ ཝ་སྶ་ས་ཏཾ ཛཱི་ཝེ, ཨ་པ་སྶཾ ཨུ་ད་ཡ་བྦ་ཡཾ;
ཨེ་ཀཱ་ཧཾ ཛཱི་ཝི་ཏཾ སེ་ཡྻོ, པ་སྶ་ཏོ ཨུ་ད་ཡ་བྦ་ཡཾ.
༨༢. ‘‘‘ན གཱ་མ་དྷ་མྨོ ནི་ག་མ་སྶ དྷ་མྨོ, ན ཙཱ་པི་ཡཾ ཨེ་ཀ་ཀུ་ལ་སྶ དྷ་མྨོ;
ས་བྦ་སྶ ལོ་ཀ་སྶ ས་དེ་ཝ་ཀ་སྶ, ཨེ་སེ་ཝ དྷ་མྨོ ཡ་དི་དཾ ཨ་ནི་ཙྩ་ཏཱ’.
༨༣. ‘‘སཱ་ཧཾ སུ་ཏྭཱ་ནི་མཱ [ས་ཧ་སུ་ཏྭཱ་ནི་མཱ (ཀ.)] གཱ་ཐཱ, དྷ་མྨ་ཙ་ཀྑུཾ ཝི་སོ་དྷ་ཡིཾ;
ཏ་ཏོ ཝི་ཉྙཱ་ཏ་ས་དྡྷ་མྨཱ, པ་བྦ་ཛིཾ ཨ་ན་གཱ་རི་ཡཾ.
༨༤. ‘‘ཏ་ཐཱ པ་བྦ་ཛི་ཏཱ ས་ནྟཱི, ཡུ་ཉྫ་ནྟཱི ཛི་ན་སཱ་ས་ནེ;
ན ཙི་རེ་ནེ་ཝ ཀཱ་ལེ་ན, ཨ་ར་ཧ་ཏྟ་མ་པཱ་པུ་ཎིཾ.
༨༥. ‘‘ཨི་དྡྷཱི་སུ ཙ ཝ་སཱི ཧོ་མི, དི་བྦཱ་ཡ སོ་ཏ་དྷཱ་ཏུ་ཡཱ;
པ་ར་ཙི་ཏྟཱ་ནི ཛཱ་ནཱ་མི, ས་ཏྠུ་སཱ་ས་ན་ཀཱ་རི་ཀཱ.
༨༦. ‘‘པུ་བྦེ་ནི་ཝཱ་སཾ ཛཱ་ནཱ་མི, དི་བྦ་ཙ་ཀྑུ ཝི་སོ་དྷི་ཏཾ;
ཁེ་པེ་ཏྭཱ ཨཱ་ས་ཝེ ས་བྦེ, ཝི་སུ་དྡྷཱ་སིཾ སུ་ནི་མྨ་ལཱ.
༨༧. ‘‘པ་རི་ཙི་ཎྞོ མ་ཡཱ ས་ཏྠཱ, ཀ་ཏཾ བུ་དྡྷ་སྶ སཱ་ས་ནཾ;
ཨོ་ཧི་ཏོ ག་རུ་ཀོ བྷཱ་རོ, བྷ་ཝ་ནེ་ཏྟི ས་མཱུ་ཧ་ཏཱ.
༨༨. ‘‘ཡ་སྶ་ཏྠཱ་ཡ པ་བྦ་ཛི་ཏཱ, ཨ་གཱ་ར་སྨཱ་ན་གཱ་རི་ཡཾ;
སོ མེ ཨ་ཏྠོ ཨ་ནུ་པྤ་ཏྟོ, ས་བྦ་སཾ་ཡོ་ཛ་ན་ཀྑ་ཡོ.
༨༩. ‘‘ཨ་ཏྠ་དྷ་མྨ་ནི་རུ་ཏྟཱི་སུ, པ་ཊི་བྷཱ་ནེ ཏ་ཐེ་ཝ ཙ;
ཉཱ་ཎཾ མེ ཝི་མ་ལཾ སུ་དྡྷཾ, བུ་དྡྷ་སེ་ཊྛ་སྶ ཝཱ་ཧ་སཱ.
༩༠. ‘‘ས་ངྐཱ་ར་ཀཱུ་ཊཱ ཨཱ་ཧི་ཏྭཱ, སུ་སཱ་ནཱ ར་ཐི་ཡཱ་པི ཙ;
ཏ་ཏོ ས་ངྒྷཱ་ཊི་ཀཾ ཀ་ཏྭཱ, ལཱུ་ཁཾ དྷཱ་རེ་མི ཙཱི་ཝ་རཾ.
༩༡. ‘‘ཛི་ནོ ཏ་སྨིཾ གུ་ཎེ ཏུ་ཊྛོ, ལཱུ་ཁ་ཙཱི་ཝ་ར་དྷཱ་ར་ཎེ;
ཋ་པེ་སི ཨེ་ཏ་ད་གྒ་མྷི, པ་རི་སཱ་སུ ཝི་ནཱ་ཡ་ཀོ.
༩༢. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝཱ.
༩༣. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༩༤. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཀི་སཱ་གོ་ཏ་མཱི བྷི་ཀྑུ་ནཱི ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཀི་སཱ་གོ་ཏ་མཱི་ཐེ་རི་ཡཱ་པ་དཱ་ནཾ དུ་ཏི་ཡཾ.