༧. མ་ཧཱ་པ་ཛཱ་པ་ཏི་གོ་ཏ་མཱི་ཐེ་རཱི་ཨ་པ་དཱ་ནཾ
༩༧. ‘‘ཨེ་ཀ་དཱ ལོ་ཀ་པ་ཛྫོ་ཏོ, ཝེ་སཱ་ལི་ཡཾ མ་ཧཱ་ཝ་ནེ;
ཀཱུ་ཊཱ་གཱ་རེ སུ་སཱ་ལཱ་ཡཾ, ཝ་ས་ཏེ ན་ར་སཱ་ར་ཐི.
༩༨. ‘‘ཏ་དཱ ཛི་ན་སྶ མཱ་ཏུ་ཙྪཱ, མ་ཧཱ་གོ་ཏ་མི བྷི་ཀྑུ་ནཱི;
ཏ་ཧིཾ ཀ་ཏེ [ཏ་ཧིཾ་ཡེ་ཝ (སྱཱ.)] པུ་རེ ར་མྨེ, ཝ་སཱི བྷི་ཀྑུ་ནུ་པ་སྶ་ཡེ.
༩༩. ‘‘བྷི་ཀྑུ་ནཱི་ཧི ཝི་མུ་ཏྟཱ་ཧི, ས་ཏེ་ཧི ས་ཧ པ་ཉྩ་ཧི;
ར་ཧོ་ག་ཏཱ་ཡ ཏ་སྶེ་ཝཾ, ཙི་ཏ་སྶཱ་སི [ཙི་ཏྟ་སྶཱ་པི (སྱཱ.)] ཝི་ཏ་ཀྐི་ཏཾ.
༡༠༠. ‘‘བུ་དྡྷ་སྶ པ་རི་ནི་བྦཱ་ནཾ, སཱ་ཝ་ཀ་གྒ་ཡུ་ག་སྶ ཝཱ;
རཱ་ཧུ་ལཱ་ན་ནྡ་ན་ནྡཱ་ནཾ, ནཱ་ཧཾ ལ་ཙྪཱ་མི པ་སྶི་ཏུཾ.
༡༠༡. ‘‘བུ་དྡྷ་སྶ པ་རི་ནི་བྦཱ་ནཱ, སཱ་ཝ་ཀ་གྒ་ཡུ་ག་སྶ ཝཱ;
མ་ཧཱ་ཀ་སྶ་པ་ན་ནྡཱ་ནཾ, ཨཱ་ན་ནྡ་རཱ་ཧུ་ལཱ་ན ཙ.
༡༠༢. ‘‘པ་ཊི་ཀ་ཙྩཱ་ཡུ་ས་ངྑཱ་རཾ [པ་ཊི་ག་ཙྩཱ་ཡུ་ས་ངྑཱ་རེ (སཱི.)], ཨོ་ས་ཛྫི་ཏྭཱ་ན ནི་བྦུ་ཏིཾ;
ག་ཙྪེ་ཡྻཾ ལོ་ཀ་ནཱ་ཐེ་ན, ཨ་ནུ་ཉྙཱ་ཏཱ མ་ཧེ་སི་ནཱ.
༡༠༣. ‘‘ཏ་ཐཱ པ་ཉྩ་ས་ཏཱ་ན་མྤི, བྷི་ཀྑུ་ནཱི་ནཾ ཝི་ཏ་ཀྐི་ཏཾ;
ཨཱ་སི ཁེ་མཱ་དི་ཀཱ་ན་མྤི, ཨེ་ཏ་དེ་ཝ ཝི་ཏ་ཀྐི་ཏཾ.
༡༠༤. ‘‘བྷཱུ་མི་ཙཱ་ལོ ཏ་དཱ ཨཱ་སི, ནཱ་དི་ཏཱ དེ་ཝ་དུ་ནྡུ་བྷཱི;
ཨུ་པ་སྶ་ཡཱ་དྷི་ཝ་ཏྠཱ་ཡོ, དེ་ཝ་ཏཱ སོ་ཀ་པཱི་ལི༹་ཏཱ.
༡༠༥. ‘‘ཝི་ལ་པ་ནྟཱ སུ་ཀ་རུ་ཎཾ [ས་ཀ་རུ་ཎཾ (སཱི. སྱཱ. པཱི.)], ཏ་ཏྠ་སྶཱུ་ནི པ་ཝ་ཏྟ་ཡུཾ;
མི་ཏྟཱ [ས་བྦཱ (སྱཱ. པཱི.)] བྷི་ཀྑུ་ནི་ཡོ ཏཱ་ཧི, ཨུ་པ་ག་ནྟྭཱ་ན གོ་ཏ་མིཾ.
༡༠༦. ‘‘ནི་པ་ཙྩ སི་ར་སཱ པཱ་དེ, ཨི་དཾ ཝ་ཙ་ན་མ་བྲ་ཝུཾ;
‘ཏ་ཏྠ ཏོ་ཡ་ལ་ཝཱ་སི་ཏྟཱ, མ་ཡ་མ་ཡྻེ ར་ཧོ་ག་ཏཱ.
༡༠༧. ‘‘‘སཱ ཙ་ལཱ ཙ་ལི་ཏཱ བྷཱུ་མི, ནཱ་དི་ཏཱ དེ་ཝ་དུ་ནྡུ་བྷཱི;
པ་རི་དེ་ཝཱ ཙ སུ་ཡྻ་ནྟེ, ཀི་མ་ཏྠཾ ནཱུ་ན གོ་ཏ་མཱི’.
༡༠༨. ‘‘ཏ་དཱ ཨ་ཝོ་ཙ སཱ ས་བྦཾ, ཡ་ཐཱ་པ་རི་ཝི་ཏ་ཀྐི་ཏཾ;
ཏཱ་ཡོ་པི ས་བྦཱ ཨཱ་ཧཾ་སུ, ཡ་ཐཱ་པ་རི་ཝི་ཏ་ཀྐི་ཏཾ.
༡༠༩. ‘‘‘ཡ་དི ཏེ རུ་ཙི་ཏཾ ཨ་ཡྻེ, ནི་བྦཱ་ནཾ པ་ར་མཾ སི་ཝཾ;
ནི་བྦཱ་ཡི་སྶཱ་མ ས་བྦཱ་པི, བུ་དྡྷཱ་ནུ་ཉྙཱ་ཡ སུ་བྦ་ཏེ.
༡༡༠. ‘‘‘མ་ཡཾ ས་ཧཱ་ཝ ནི་ཀྑ་ནྟཱ, གྷ་རཱ་པི ཙ བྷ་ཝཱ་པི ཙ;
ས་ཧཱ་ཡེ་ཝ ག་མི་སྶཱ་མ, ནི་བྦཱ་ནཾ པ་ད་མུ་ཏྟ་མཾ’.
༡༡༡. ‘‘‘ནི་བྦཱ་ནཱ་ཡ ཝ་ཛ་ནྟཱི་ནཾ, ཀིཾ ཝ་ཀྑཱ་མཱི’ཏི སཱ ཝ་དཾ;
ས་ཧ ས་བྦཱ་ཧི ནི་གྒ་ཉྪི, བྷི་ཀྑུ་ནཱི་ནི་ལ་ཡཱ ཏ་དཱ.
༡༡༢. ‘‘ཨུ་པ་སྶ་ཡེ ཡཱ་དྷི་ཝ་ཏྠཱ, དེ་ཝ་ཏཱ ཏཱ ཁ་མ་ནྟུ མེ;
བྷི་ཀྑུ་ནཱི་ནི་ལ་ཡ་སྶེ་དཾ, པ་ཙྪི་མཾ ད་སྶ་ནཾ མ་མ.
༡༡༣. ‘‘ན ཛ་རཱ མ་ཙྩུ ཝཱ ཡ་ཏྠ, ཨ་པྤི་ཡེ་ཧི ས་མཱ་ག་མོ;
པི་ཡེ་ཧི ན ཝི་ཡོ་གོ་ཏྠི, ཏཾ ཝ་ཛི་སྶཾ [ཏཾ ཝ་ཛྫི་ཡཾ (སྱཱ.)] ཨ་ས་ངྑ་ཏཾ.
༡༡༤. ‘‘ཨ་ཝཱི་ཏ་རཱ་གཱ ཏཾ སུ་ཏྭཱ, ཝ་ཙ་ནཾ སུ་ག་ཏོ་ར་སཱ;
སོ་ཀ་ཊྚཱ པ་རི་དེ་ཝིཾ་སུ, ཨ་ཧོ ནོ ཨ་པྤ་པུ་ཉྙ་ཏཱ.
༡༡༥. ‘‘བྷི་ཀྑུ་ནཱི་ནི་ལ་ཡོ སུ་ཉྙོ, བྷཱུ་ཏོ ཏཱ་ཧི ཝི་ནཱ ཨ་ཡཾ;
པ་བྷཱ་ཏེ ཝི་ཡ ཏཱ་རཱ་ཡོ, ན དི་སྶ་ནྟི ཛི་ནོ་ར་སཱ.
༡༡༦. ‘‘ནི་བྦཱ་ནཾ གོ་ཏ་མཱི ཡཱ་ཏི, ས་ཏེ་ཧི ས་ཧ པ་ཉྩ་ཧི;
ན་དཱི་ས་ཏེ་ཧི་ཝ ས་ཧ, ག་ངྒཱ པ་ཉྩ་ཧི སཱ་ག་རཾ.
༡༡༧. ‘‘ར་ཐི་ཡཱ་ཡ ཝ་ཛ་ནྟི་ཡོ [ཝ་ཛ་ནྟིཾ ཏཾ (སཱི.), ཝ་ཛ་ནྟི ཏཾ (སྱཱ.), ཝ་ཛ་ནྟཱ་ནཾ (པཱི.)], དི་སྭཱ ས་དྡྷཱ ཨུ་པཱ་སི་ཀཱ;
གྷ་རཱ ནི་ཀྑ་མྨ པཱ་དེ་སུ, ནི་པ་ཙྩ ཨི་ད་མ་བྲ་ཝུཾ.
༡༡༨. ‘‘‘པ་སཱི་ད་སྶུ མ་ཧཱ་བྷོ་གེ, ཨ་ནཱ་ཐཱ་ཡོ ཝི་ཧཱ་ཡ ནོ;
ཏ་ཡཱ ན ཡུ་ཏྟཱ [ཡུ་ཏྟཾ (སཱི. སྱཱ. པཱི.)] ནི་བྦཱ་ཏུཾ, ཨི་ཙྪ་ཊྚཱ ཝི་ལ་པིཾ་སུ ཏཱ’.
༡༡༩. ‘‘ཏཱ་སཾ སོ་ཀ་པ་ཧཱ་ན་ཏྠཾ, ཨ་ཝོ་ཙ མ་དྷུ་རཾ གི་རཾ;
‘རུ་དི་ཏེ་ན ཨ་ལཾ པུ་ཏྟཱ, ཧཱ་ས་ཀཱ་ལོ་ཡ་མ་ཛྫ ཝོ.
༡༢༠. ‘‘‘པ་རི་ཉྙཱ་ཏཾ མ་ཡཱ དུ་ཀྑཾ, དུ་ཀྑ་ཧེ་ཏུ ཝི་ཝ་ཛྫི་ཏོ;
ནི་རོ་དྷོ མེ ས་ཙྪི་ཀ་ཏོ, མ་གྒོ ཙཱ་པི སུ་བྷཱ་ཝི་ཏོ.
པ་ཋ་མཾ བྷཱ་ཎ་ཝཱ་རཾ.
༡༢༡. ‘‘‘པ་རི་ཙི་ཎྞོ མ་ཡཱ ས་ཏྠཱ, ཀ་ཏཾ བུ་དྡྷ་སྶ སཱ་ས་ནཾ;
ཨོ་ཧི་ཏོ ག་རུ་ཀོ བྷཱ་རོ, བྷ་ཝ་ནེ་ཏྟི ས་མཱུ་ཧ་ཏཱ.
༡༢༢. ‘‘‘ཡ་སྶ་ཏྠཱ་ཡ པ་བྦ་ཛི་ཏཱ, ཨ་གཱ་ར་སྨཱ་ན་གཱ་རི་ཡཾ;
སོ མེ ཨ་ཏྠོ ཨ་ནུ་པྤ་ཏྟོ, ས་བྦ་སཾ་ཡོ་ཛ་ན་ཀྑ་ཡོ.
༡༢༣. ‘‘‘བུ་དྡྷོ ཏ་སྶ ཙ ས་དྡྷ་མྨོ, ཨ་ནཱུ་ནོ ཡཱ་ཝ ཏི་ཊྛ་ཏི;
ནི་བྦཱ་ཏུཾ ཏཱ་ཝ ཀཱ་ལོ མེ, མཱ མཾ སོ་ཙ་ཐ པུ་ཏྟི་ཀཱ.
༡༢༤. ‘‘‘ཀོ་ཎྜ་ཉྙཱ་ན་ནྡ་ན་ནྡཱ་དཱི, ཏི་ཊྛ་ནྟི རཱ་ཧུ་ལོ ཛི་ནོ;
སུ་ཁི་ཏོ ས་ཧི་ཏོ ས་ངྒྷོ, ཧ་ཏ་ད་བྦཱ ཙ ཏི་ཏྠི་ཡཱ.
༡༢༥. ‘‘‘ཨོ་ཀྐཱ་ཀ་ཝཾ་ས་སྶ ཡ་སོ, ཨུ་སྶི་ཏོ མཱ་ར་མ་དྡ་ནོ;
ན་ནུ ས་མྤ་ཏི ཀཱ་ལོ མེ, ནི་བྦཱ་ན་ཏྠཱ་ཡ པུ་ཏྟི་ཀཱ.
༡༢༦. ‘‘‘ཙི་ར་པྤ་བྷུ་ཏི ཡཾ མ་ཡ྄ཧཾ, པ་ཏྠི་ཏཾ ཨ་ཛྫ སི་ཛ྄ཛྷ་ཏེ;
ཨཱ་ན་ནྡ་བྷེ་རི་ཀཱ་ལོ་ཡཾ, ཀིཾ ཝོ ཨ་སྶཱུ་ཧི པུ་ཏྟི་ཀཱ.
༡༢༧. ‘‘‘ས་ཙེ མ་ཡི ད་ཡཱ ཨ་ཏྠི, ཡ་དི ཙ་ཏྠི ཀ་ཏ་ཉྙུ་ཏཱ;
ས་དྡྷ་མྨ་ཊྛི་ཏི་ཡཱ ས་བྦཱ, ཀ་རོ་ཐ ཝཱི་རི་ཡཾ ད་ལ༹ྷཾ.
༡༢༨. ‘‘‘ཐཱི་ནཾ ཨ་དཱ་སི པ་བྦ་ཛྫཾ, ས་མྦུ་དྡྷོ ཡཱ་ཙི་ཏོ མ་ཡཱ;
ཏ་སྨཱ ཡ་ཐཱ་ཧཾ ན་ནྡི་སྶཾ, ཏ་ཐཱ ཏ་མ་ནུ་ཏི་ཊྛ་ཐ’.
༡༢༩. ‘‘ཏཱ ཨེ་ཝ་མ་ནུ་སཱ་སི་ཏྭཱ, བྷི་ཀྑུ་ནཱི་ཧི པུ་ར་ཀྑ་ཏཱ;
ཨུ་པེ་ཙྩ བུ་དྡྷཾ ཝ་ནྡི་ཏྭཱ, ཨི་དཾ ཝ་ཙ་ན་མ་བྲ་ཝི.
༡༣༠. ‘‘‘ཨ་ཧཾ སུ་ག་ཏ ཏེ མཱ་ཏཱ, ཏྭ་ཉྩ ཝཱི་ར པི་ཏཱ མ་མ;
ས་དྡྷ་མྨ་སུ་ཁ་ད [ས་དྡྷ་མྨ་སུ་ཁ་དོ (སཱི. སྱཱ. པཱི.)] ནཱ་ཐ, ཏ་ཡཱ ཛཱ་ཏཱ་མྷི གོ་ཏ་མ.
༡༣༡. ‘‘‘སཾ་ཝ་དྡྷི་ཏོ་ཡཾ སུ་ག་ཏ, རཱུ་པ་ཀཱ་ཡོ མ་ཡཱ ཏ་ཝ;
ཨ་ནི་ནྡི་ཏོ [ཨཱ་ན་ནྡི་ཡོ (སྱཱ.), ཨ་ནི་ནྡི་ཡོ (པཱི.)] དྷ་མྨ་ཀཱ་ཡོ [དྷ་མྨ་ཏ་ནུ (སཱི. པཱི. ཀ.)], མ་མ སཾ་ཝ་དྡྷི་ཏོ ཏ་ཡཱ.
༡༣༢. ‘‘‘མུ་ཧུ་ཏྟཾ ཏ་ཎྷཱ་ས་མ་ཎཾ, ཁཱི་རཾ ཏྭཾ པཱ་ཡི་ཏོ མ་ཡཱ;
ཏ་ཡཱ་ཧཾ ས་ནྟ་མ་ཙྩ་ནྟཾ, དྷ་མྨ་ཁཱི་ར་ཉྷི [དྷ་མྨ་ཁཱི་ར་མྤི (སྱཱ., ཀ.)] པཱ་ཡི་ཏཱ.
༡༣༣. ‘‘‘བ་ནྡྷ་ནཱ་ར་ཀྑ་ནེ མ་ཡ྄ཧཾ, ཨ་ཎ་ཎོ [ཨ་ན་ཎོ (སཱི. སྱཱ. པཱི.)] ཏྭཾ མ་ཧཱ་མུ་ནེ;
པུ་ཏྟ་ཀཱ་མཱ ཐི་ཡོ ཡཱ་ཙཾ, ལ་བྷ་ནྟི ཏཱ་དི་སཾ སུ་ཏཾ.
༡༣༤. ‘‘‘མ་ནྡྷཱ་ཏཱ་དི་ན་རི་ནྡཱ་ནཾ, ཡཱ མཱ་ཏཱ སཱ བྷ་ཝ་ཎྞ་ཝེ;
ནི་མུ་གྒཱ་ཧཾ ཏ་ཡཱ པུ་ཏྟ, ཏཱ་རི་ཏཱ བྷ་ཝ་སཱ་ག་རཱ.
༡༣༥. ‘‘‘ར་ཉྙོ མཱ་ཏཱ མ་ཧེ་སཱི་ཏི, སུ་ལ་བྷཾ ནཱ་མ་མི་ཏྠི་ནཾ;
བུ་དྡྷ་མཱ་ཏཱ་ཏི ཡཾ ནཱ་མཾ, ཨེ་ཏཾ པ་ར་མ་དུ་ལླ་བྷཾ.
༡༣༦. ‘‘‘ཏ་ཉྩ ལ་དྡྷཾ མ་ཧཱ་ཝཱི་ར, པ་ཎི་དྷཱ་ནཾ མ་མཾ ཏ་ཡཱ;
ཨ་ཎུ་ཀཾ ཝཱ མ་ཧ་ནྟཾ ཝཱ, ཏཾ ས་བྦཾ པཱུ་རི་ཏཾ མ་ཡཱ.
༡༣༧. ‘‘‘པ་རི་ནི་བྦཱ་ཏུ་མི་ཙྪཱ་མི, ཝི་ཧཱ་ཡེ་མཾ ཀ་ལེ༹་ཝ་རཾ;
ཨ་ནུ་ཛཱ་ནཱ་ཧི མེ ཝཱི་ར, དུ་ཀྑ་ནྟ་ཀ་ར ནཱ་ཡ་ཀ.
༡༣༨. ‘‘‘ཙ་ཀྐ་ངྐུ་ས་དྷ་ཛཱ་ཀི་ཎྞེ, པཱ་དེ ཀ་མ་ལ་ཀོ་མ་ལེ;
པ་སཱ་རེ་ཧི པ་ཎཱ་མཾ ཏེ, ཀ་རི་སྶཾ པུ་ཏྟ་ཨུ་ཏྟ་མེ [པུ་ཏྟ་པེ་མ་སཱ (སཱི. པཱི.), པུ་ཏྟ་པེ་མ་ཧཾ (སྱཱ.)].
༡༣༩. ‘‘‘སུ་ཝ་ཎྞ་རཱ་སི་ས་ངྐཱ་སཾ, ས་རཱི་རཾ ཀུ་རུ པཱ་ཀ་ཊཾ;
ཀ་ཏྭཱ དེ་ཧཾ སུ་དི་ཊྛཾ ཏེ, ས་ནྟིཾ ག་ཙྪཱ་མི ནཱ་ཡ་ཀ’.
༡༤༠. ‘‘དྭ་ཏྟིཾ་ས་ལ་ཀྑ་ཎཱུ་པེ་ཏཾ, སུ་པྤ་བྷཱ་ལ་ངྐ་ཏཾ ཏ་ནུཾ;
ས་ཉྫྷཱ་གྷ་ནཱ་ཝ བཱ་ལ་ཀྐཾ, མཱ་ཏུ་ཙྪཾ ད་སྶ་ཡཱི ཛི་ནོ.
༡༤༡. ‘‘ཕུ་ལླཱ་ར་ཝི་ནྡ་སཾ་ཀཱ་སེ, ཏ་རུ་ཎཱ་དི་ཙྩ་ས་པྤ་བྷེ;
ཙ་ཀྐ་ངྐི་ཏེ པཱ་ད་ཏ་ལེ, ཏ་ཏོ སཱ སི་ར་སཱ པ་ཏི.
༡༤༢. ‘‘‘པ་ཎ་མཱ་མི ན་རཱ་དི་ཙྩ, ཨཱ་དི་ཙྩ་ཀུ་ལ་ཀེ་ཏུ་ཀཾ;
པ་ཙྪི་མེ མ་ར་ཎེ མ་ཡ྄ཧཾ [ས་ར་ཎཾ མ་ཡ྄ཧཾ (སྱཱ.)], ན ཏཾ ཨི་ཀྑཱ་མ་ཧཾ པུ་ནོ.
༡༤༣. ‘‘‘ཨི་ཏྠི་ཡོ ནཱ་མ ལོ་ཀ་གྒ, ས་བྦ་དོ་སཱ་ཀ་རཱ མ་ཏཱ;
ཡ་དི ཀོ ཙ་ཏྠི དོ་སོ མེ, ཁ་མ་སྶུ ཀ་རུ་ཎཱ་ཀ་ར.
༡༤༤. ‘‘‘ཨི་ཏྠི་ཀཱ་ན་ཉྩ པ་བྦ་ཛྫཾ, ཧཾ ཏཾ ཡཱ་ཙིཾ པུ་ན་པྤུ་ནཾ;
ཏ་ཏྠ ཙེ ཨ་ཏྠི དོ་སོ མེ, ཏཾ ཁ་མ་སྶུ ན་རཱ་ས་བྷ.
༡༤༥. ‘‘‘མ་ཡཱ བྷི་ཀྑུ་ནི་ཡོ ཝཱི་ར, ཏ་ཝཱ་ནུ་ཉྙཱ་ཡ སཱ་སི་ཏཱ;
ཏ་ཏྲ ཙེ ཨ་ཏྠི དུ་ནྣཱི་ཏཾ, ཏཾ ཁ་མ་སྶུ ཁ་མཱ་དྷི་པ [ཁ་མཱ་དྷི་ཏི (སྱཱ.), ཁ་མཱ་པི་ཏོ (ཀ.)].
༡༤༦. ‘‘‘ཨ་ཀྑ་ནྟེ ནཱ་མ ཁ་ནྟ་བྦཾ, ཀིཾ བྷ་ཝེ གུ་ཎ་བྷཱུ་ས་ནེ;
ཀི་མུ་ཏྟ་རཾ ཏེ ཝ་ཀྑཱ་མི, ནི་བྦཱ་ནཱ་ཡ ཝ་ཛ་ནྟི་ཡཱ.
༡༤༧. ‘‘‘སུ་དྡྷེ ཨ་ནཱུ་ནེ མ་མ བྷི་ཀྑུ་ས་ངྒྷེ, ལོ་ཀཱ ཨི་ཏོ ནི་སྶ་རི་ཏུཾ ཁ་མ་ནྟེ;
པ་བྷཱ་ཏ་ཀཱ་ལེ བྱ་ས་ན་ངྒ་ཏཱ་ནཾ, དི་སྭཱ་ན ནི་ཡྻཱ་ཏི་ཝ ཙ་ནྡ་ལེ་ཁཱ’.
༡༤༨. ‘‘‘ཏ་དེ་ཏ་རཱ བྷི་ཀྑུ་ནི་ཡོ ཛི་ན་གྒཾ, ཏཱ་རཱ་ཝ ཙ་ནྡཱ་ནུ་ག་ཏཱ སུ་མེ་རུཾ;
པ་ད་ཀྑི་ཎཾ ཀ་ཙྩ ནི་པ་ཙྩ པཱ་དེ, ཋི་ཏཱ མུ་ཁ་ནྟཾ ས་མུ་དི་ཀྑ་མཱ་ནཱ.
༡༤༩. ‘‘‘ན ཏི་ཏྟི་པུ་བྦཾ ཏ་ཝ ད་སྶ་ནེ་ན, ཙ་ཀྑུཾ ན སོ་ཏཾ ཏ་ཝ བྷཱ་སི་ཏེ་ན;
ཙི་ཏྟཾ མ་མཾ ཀེ་ཝ་ལ་མེ་ཀ་མེ་ཝ, པ་པྤུ་ཡྻ ཏཾ དྷ་མྨ་ར་སེ་ན ཏི་ཏྟི.
༡༥༠. ‘‘‘ན་ད་ཏོ པ་རི་སཱ་ཡཾ ཏེ, ཝཱ་དི་ཏ་བྦ་པ་ཧཱ་རི་ནོ;
ཡེ ཏེ ད་ཀྑ་ནྟི ཝ་ད་ནཾ, དྷ་ཉྙཱ ཏེ ན་ར་པུ་ངྒ་ཝ.
༡༥༡. ‘‘‘དཱི་གྷ་ངྒུ་ལཱི ཏ་མྦ་ན་ཁེ, སུ་བྷེ ཨཱ་ཡ་ཏ་པ་ཎྷི་ཀེ;
ཡེ པཱ་དེ པ་ཎ་མི་སྶ་ནྟི [པ་ཎ་མཱ་ཡ་ནྟི (སྱཱ.)], ཏེ་པི དྷ་ཉྙཱ གུ་ཎ་ནྡྷ་ར.
༡༥༢. ‘‘‘མ་དྷུ་རཱ་ནི པ་ཧ་ཊྛཱ་ནི, དོ་ས་གྒྷཱ་ནི ཧི་ཏཱ་ནི ཙ;
ཡེ ཏེ ཝཱ་ཀྱཱ་ནི སུ་ཡྻ་ནྟི, ཏེ་པི དྷ་ཉྙཱ ན་རུ་ཏྟ་མ.
༡༥༣. ‘‘‘དྷ་ཉྙཱ་ཧཾ ཏེ མ་ཧཱ་ཝཱི་ར, པཱ་ད་པཱུ་ཛ་ན་ཏ་པྤ་རཱ [མཱ་ན་པཱུ་ཛ་ན་ཏ་པྤ་རཱ (ཀ.)];
ཏི་ཎྞ་སཾ་སཱ་ར་ཀ་ནྟཱ་རཱ, སུ་ཝཱ་ཀྱེ་ན སི་རཱི་མ་ཏོ’.
༡༥༤. ‘‘ཏ་ཏོ སཱ ཨ་ནུ་སཱ་ཝེ་ཏྭཱ [ཨ་ནུ་མཱ་ནེ ཏྭཱ (ཀ.)], བྷི་ཀྑུ་ས་ངྒྷ་མྤི སུ་བྦ་ཏཱ;
རཱ་ཧུ་ལཱ་ན་ནྡ་ན་ནྡེ ཙ, ཝ་ནྡི་ཏྭཱ ཨི་ད་མ་བྲ་ཝི.
༡༥༥. ‘‘‘ཨཱ་སཱི་ཝི་སཱ་ལ་ཡ་ས་མེ, རོ་གཱ་ཝཱ་སེ ཀ་ལེ༹་ཝ་རེ;
ནི་བྦི་ནྡཱ དུ་ཀྑ་ས་ངྒྷཱ་ཊེ, ཛ་རཱ་མ་ར་ཎ་གོ་ཙ་རེ.
༡༥༦. ‘‘‘ནཱ་ནཱ་ཀ་ལི་མ་ལཱ་ཀི་ཎྞེ [ནཱ་ནཱ་ཀུ་ཎ་པ་མ་ལཱ་ཀི་ཎྞེ (སྱཱ.), ནཱ་ནཱ་ཀཱ་ལ༹་མ་ལཱ་ཀི་ཎྞེ (ཀ.)], པ་རཱ་ཡ་ཏྟེ ནི་རཱི་ཧ་ཀེ;
ཏེ་ན ནི་བྦཱ་ཏུ་མི་ཙྪཱ་མི, ཨ་ནུ་མ་ཉྙ་ཐ པུ་ཏྟ་ཀཱ’.
༡༥༧. ‘‘ན་ནྡོ རཱ་ཧུ་ལ་བྷ་དྡོ ཙ, ཝཱི་ཏ་སོ་ཀཱ ནི་རཱ་ས་ཝཱ;
ཋི་ཏཱ་ཙ་ལ་ཊྛི་ཏི ཐི་རཱ, དྷ་མྨ་ཏ་མ་ནུ་ཙི་ནྟ་ཡུཾ.
༡༥༨. ‘‘‘དྷི་ར་ཏྠུ ས་ངྑ་ཏཾ ལོ་ལཾ, ཨ་སཱ་རཾ ཀ་ད་ལཱུ་པ་མཾ;
མཱ་ཡཱ་མ་རཱི་ཙི་ས་དི་སཾ, ཨི་ཏ་རཾ ཨ་ན་ཝ་ཊྛི་ཏཾ.
༡༥༩. ‘‘‘ཡ་ཏྠ ནཱ་མ ཛི་ན་སྶཱ་ཡཾ, མཱ་ཏུ་ཙྪཱ བུ་དྡྷ་པོ་སི་ཀཱ;
གོ་ཏ་མཱི ནི་དྷ་ནཾ ཡཱ་ཏི, ཨ་ནི་ཙྩཾ ས་བྦ་ས་ངྑ་ཏཾ’.
༡༦༠. ‘‘ཨཱ་ན་ནྡོ ཙ ཏ་དཱ སེ་ཁོ, སོ་ཀ་ཊྚོ [ཀ་ནི་ཊྛོ (སྱཱ.)] ཛི་ན་ཝ་ཙྪ་ལོ;
ཏ་ཏྠ་སྶཱུ་ནི ཀ་རོ་ནྟོ སོ, ཀ་རུ་ཎཾ པ་རི་དེ་ཝ་ཏི.
༡༦༡. ‘‘ཧཱ ས་ནྟིཾ [བྷཱ་ས་ནྟཱི (སྱཱ.)] གོ་ཏ་མཱི ཡཱ་ཏི, ནཱུ་ན བུ་དྡྷོ་པི ནི་བྦུ་ཏིཾ;
ག་ཙྪ་ཏི ན ཙི་རེ་ནེ་ཝ, ཨ་གྒི་རི་ཝ ནི་རི་ནྡྷ་ནོ.
༡༦༢. ‘‘ཨེ་ཝཾ ཝི་ལཱ་པ་མཱ་ནཾ ཏཾ, ཨཱ་ན་ནྡཾ ཨཱ་ཧ གོ་ཏ་མཱི;
སུ་ཏ་སཱ་ག་ར་ག་མྦྷཱི་ར, བུ་དྡྷོ་པ་ཊྛཱ་ན་ཏ་པྤ་ར.
༡༦༣. ‘‘‘ན ཡུ་ཏྟཾ སོ་ཙི་ཏུཾ པུ་ཏྟ, ཧཱ་ས་ཀཱ་ལེ ཨུ་པ་ཊྛི་ཏེ;
ཏ་ཡཱ མེ ས་ར་ཎཾ པུ་ཏྟ, ནི་བྦཱ་ནཾ ཏ་མུ་པཱ་ག་ཏཾ.
༡༦༤. ‘‘‘ཏ་ཡཱ ཏཱ་ཏ ས་མ་ཛ྄ཛྷི་ཊྛོ, པ་བྦ་ཛྫཾ ཨ་ནུ་ཛཱ་ནི ནོ;
མཱ པུ་ཏྟ ཝི་མ་ནོ ཧོ་ཧི, ས་ཕ་ལོ ཏེ པ་རི་སྶ་མོ.
༡༦༥. ‘‘‘ཡཾ ན དི་ཊྛཾ པུ་རཱ་ཎེ་ཧི, ཏི་ཏྠི་ཀཱ་ཙ་རི་ཡེ་ཧི་པི;
ཏཾ པ་དཾ སུ་ཀུ་མཱ་རཱི་ཧི, ས་ཏྟ་ཝ་སྶཱ་ཧི ཝེ་དི་ཏཾ.
༡༦༦. ‘‘‘བུ་དྡྷ་སཱ་ས་ན་པཱ་ལེ་ཏ, པ་ཙྪི་མཾ ད་སྶ་ནཾ ཏ་ཝ;
ཏ་ཏྠ ག་ཙྪཱ་མ་ཧཾ པུ་ཏྟ, ག་ཏོ ཡ་ཏྠ ན དི་སྶ་ཏེ.
༡༦༧. ‘‘‘ཀ་དཱ་ཙི དྷ་མྨཾ དེ་སེ་ནྟོ, ཁི་པཱི ལོ་ཀ་གྒ་ནཱ་ཡ་ཀོ;
ཏ་དཱ་ཧཾ ཨཱ་སཱི་ས་ཝཱ་ཙཾ, ཨ་ཝོ་ཙཾ ཨ་ནུ་ཀ་མྤི་ཀཱ.
༡༦༨. ‘‘‘ཙི་རཾ ཛཱི་ཝ མ་ཧཱ་ཝཱི་ར, ཀ་པྤཾ ཏི་ཊྛ མ་ཧཱ་མུ་ནེ;
ས་བྦ་ལོ་ཀ་སྶ ཨ་ཏྠཱ་ཡ, བྷ་ཝ་སྶུ ཨ་ཛ་རཱ་མ་རོ.
༡༦༩. ‘‘‘ཏཾ ཏ་ཐཱ་ཝཱ་དི་ནིཾ བུ་དྡྷོ, མ་མཾ སོ ཨེ་ཏ་ད་བྲ་ཝི;
‘ན ཧེ་ཝཾ ཝ་ནྡི་ཡཱ བུ་དྡྷཱ, ཡ་ཐཱ ཝ་ནྡ་སི གོ་ཏ་མཱི.
༡༧༠. ‘‘‘ཀ་ཐཾ ཙ་ར་ཧི ས་བྦ་ཉྙཱུ, ཝ་ནྡི་ཏ་བྦཱ ཏ་ཐཱ་ག་ཏཱ;
ཀ་ཐཾ ཨ་ཝ་ནྡི་ཡཱ བུ་དྡྷཱ, ཏཾ མེ ཨ་ཀྑཱ་ཧི པུ་ཙྪི་ཏོ.