༦. ན་ལ༹་མཱ་ལི་ཀཱ་ཐེ་རཱི་ཨ་པ་དཱ་ནཾ
༨༦. ‘‘ཙ་ནྡ་བྷཱ་གཱ་ན་དཱི་ཏཱི་རེ, ཨ་ཧོ་སིཾ ཀི་ནྣ་རཱི ཏ་དཱ;
ཨ་དྡ་སཾ ཝི་ར་ཛཾ བུ་དྡྷཾ, ས་ཡ་མྦྷུཾ ཨ་པ་རཱ་ཛི་ཏཾ.
༨༧. ‘‘པ་ས་ནྣ་ཙི་ཏྟཱ སུ་མ་ནཱ, ཝེ་ད་ཛཱ་ཏཱ ཀ་ཏ་ཉྫ་ལཱི;
ན་ལ༹་མཱ་ལཾ ག་ཧེ་ཏྭཱ་ན, ས་ཡ་མྦྷུཾ ཨ་བྷི་པཱུ་ཛ་ཡིཾ.
༨༨. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ ཀི་ནྣ་རཱི་དེ་ཧཾ [མཱ་ན་སཾ དེ་ཧཾ (སཱི. པཱི. ཀ.) སུ་མེ་དྷཱ་ཝ་གྒེ་པི], ཏཱ་ཝ་ཏིཾ་ས་མ་ག་ཙྪ་ཧཾ.
༨༩. ‘‘ཚ་ཏྟིཾ་ས་དེ་ཝ་རཱ་ཛཱུ་ནཾ, མ་ཧེ་སི་ཏྟ་མ་ཀཱ་ར་ཡིཾ;
མ་ན་སཱ པ་ཏྠི་ཏཾ མ་ཡ྄ཧཾ, ནི་བྦ་ཏྟ་ཏི ཡ་ཐི་ཙྪི་ཏཾ.
༩༠. ‘‘ད་ས་ནྣཾ ཙ་ཀྐ་ཝ་ཏྟཱི་ནཾ, མ་ཧེ་སི་ཏྟ་མ་ཀཱ་ར་ཡིཾ;
ཨོ་ཙི་ཏ་ཏྟཱ་ཝ [སུ་ཙི་ཏ་ཏྟཱ་ཝ (པཱི.)] ཧུ་ཏྭཱ་ན, སཾ་ས་རཱ་མི བྷ་ཝེ་སྭ་ཧཾ.
༩༡. ‘‘ཀུ་ས་ལཾ ཝི་ཛྫ་ཏེ མ་ཡ྄ཧཾ, པ་བྦ་ཛིཾ ཨ་ན་གཱ་རི་ཡཾ;
པཱུ་ཛཱ་ར་ཧཱ ཨ་ཧཾ ཨ་ཛྫ, ས་ཀྱ་པུ་ཏྟ་སྶ སཱ་ས་ནེ.
༩༢. ‘‘ཝི་སུ་དྡྷ་མ་ན་སཱ ཨ་ཛྫ, ཨ་པེ་ཏ་མ་ན་པཱ་པི་ཀཱ;
ས་བྦཱ་ས་ཝ་པ་རི་ཀྑཱི་ཎཱ, ན་ཏྠི དཱ་ནི པུ་ན་བྦྷ་ཝོ.
༩༣. ‘‘ཙ་ཏུ་ནྣ་ཝུ་ཏི་ཏོ ཀ་པྤེ, ཡཾ བུ་དྡྷ་མ་བྷི་པཱུ་ཛ་ཡིཾ;
དུ་གྒ་ཏིཾ ནཱ་བྷི་ཛཱ་ནཱ་མི, ན་ལ༹་མཱ་ལཱ་ཡི་དཾ ཕ་ལཾ.
༩༤. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝཱ.
༩༥. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༩༦. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ན་ལ༹་མཱ་ལི་ཀཱ བྷི་ཀྑུ་ནཱི ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ན་ལ༹་མཱ་ལི་ཀཱ་ཐེ་རི་ཡཱ་པ་དཱ་ནཾ ཚ་ཊྛཾ.