༥. པ་ཉྩ་དཱི་པ་དཱ་ཡི་ཀཱ་ཐེ་རཱི་ཨ་པ་དཱ་ནཾ
༦༡. ‘‘ན་ག་རེ ཧཾ་ས་ཝ་ཏི་ཡཱ, ཙཱ་རི་ཀཱི [ཙཱ་རི་ཀཱ (སཱི. སྱཱ.)] ཨཱ་ས་ཧཾ ཏ་དཱ;
ཨཱ་རཱ་མེ་ན ཙ ཨཱ་རཱ་མཾ [ཨཱ་རཱ་མེ་ན ཝི་ཧཱ་རེ་ན (སྱཱ. པཱི.)], ཙ་རཱ་མི ཀུ་ས་ལ་ཏྠི་ཀཱ.
༦༢. ‘‘ཀཱ་ལ༹་པ་ཀྑ་མྷི དི་ཝ་སེ, ཨ་དྡ་སཾ བོ་དྷི་མུ་ཏྟ་མཾ;
ཏ་ཏྠ ཙི་ཏྟཾ པ་སཱ་དེ་ཏྭཱ, བོ་དྷི་མཱུ་ལེ ནི་སཱི་ད་ཧཾ.
༦༣. ‘‘ག་རུ་ཙི་ཏྟཾ ཨུ་པ་ཊྛེ་ཏྭཱ, སི་རེ ཀ་ཏྭཱ་ན ཨ་ཉྫ་ལིཾ;
སོ་མ་ན་སྶཾ པ་ཝེ་དེ་ཏྭཱ, ཨེ་ཝཾ ཙི་ནྟེ་སི ཏཱ་ཝ་དེ.
༦༤. ‘‘‘ཡ་དི བུ་དྡྷོ ཨ་མི་ཏ་གུ་ཎོ, ཨ་ས་མ་པྤ་ཊི་པུ་གྒ་ལོ;
ད་སྶེ་ཏུ པཱ་ཊི་ཧཱི་རཾ མེ, བོ་དྷི ཨོ་བྷཱ་ས་ཏུ ཨ་ཡཾ’.
༦༥. ‘‘ས་ཧ ཨཱ་ཝ་ཛྫི་ཏེ མ་ཡ྄ཧཾ, བོ་དྷི པ་ཛྫ་ལི ཏཱ་ཝ་དེ;
ས་བྦ་སོ་ཎྞ་མ་ཡཱ ཨཱ་སི, དི་སཱ ས་བྦཱ ཝི་རོ་ཙ་ཏི.
༦༦. ‘‘ས་ཏྟ་ར་ཏྟི་ནྡི་ཝཾ ཏ་ཏྠ, བོ་དྷི་མཱུ་ལེ ནི་སཱི་ད་ཧཾ;
ས་ཏྟ་མེ དི་ཝ་སེ པ་ཏྟེ, དཱི་པ་པཱུ་ཛཾ ཨ་ཀཱ་ས་ཧཾ.
༦༧. ‘‘ཨཱ་ས་ནཾ པ་རི་ཝཱ་རེ་ཏྭཱ, པ་ཉྩ དཱི་པཱ་ནི པ་ཛྫ་ལུཾ;
ཡཱ་ཝ ཨུ་དེ་ཏི སཱུ་རི་ཡོ, དཱི་པཱ མེ པ་ཛྫ་ལུཾ ཏ་དཱ.
༦༨. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༦༩. ‘‘ཏ་ཏྠ མེ སུ་ཀ་ཏཾ བྱ་མྷཾ, པ་ཉྩ་དཱི་པཱ་ཏི ཝུ་ཙྩ་ཏི;
ས་ཊྛི་ཡོ་ཛ་ན་མུ་བྦེ་དྷཾ, ཏིཾ་ས་ཡོ་ཛ་ན་ཝི་ཏྠ་ཏཾ.
༧༠. ‘‘ཨ་ས་ངྑི་ཡཱ་ནི དཱི་པཱ་ནི, པ་རི་ཝཱ་རེ ཛ་ལིཾ་སུ མེ;
ཡཱ་ཝ་ཏཱ དེ་ཝ་བྷ་ཝ་ནཾ, དཱི་པཱ་ལོ་ཀེ་ན ཛོ་ཏ་ཏི.
༧༡. ‘‘པ་ར་མྨུ་ཁཱ [པུ་བྦ་མུ་ཁཱ (སྱཱ.)] ནི་སཱི་དི་ཏྭཱ, ཡ་དི ཨི་ཙྪཱ་མི པ་སྶི་ཏུཾ;
ཨུ་དྡྷཾ ཨ་དྷོ ཙ ཏི་རི་ཡཾ, ས་བྦཾ པ་སྶཱ་མི ཙ་ཀྑུ་ནཱ.
༧༢. ‘‘ཡཱ་ཝ་ཏཱ ཨ་བྷི་ཀ་ངྑཱ་མི, ད་ཊྛུཾ སུ་ག་ཏ་དུ་གྒ་ཏེ [སུ་ཀ་ཏ་དུ་ཀྐ་ཊེ (པཱི.)];
ཏ་ཏྠ ཨཱ་ཝ་ར་ཎཾ ན་ཏྠི, རུ་ཀྑེ་སུ པ་བྦ་ཏེ་སུ ཝཱ.
༧༣. ‘‘ཨ་སཱི་ཏི དེ་ཝ་རཱ་ཛཱུ་ནཾ, མ་ཧེ་སི་ཏྟ་མ་ཀཱ་ར་ཡིཾ;
ས་ཏཱ་ནཾ ཙ་ཀྐ་ཝ་ཏྟཱི་ནཾ, མ་ཧེ་སི་ཏྟ་མ་ཀཱ་ར་ཡིཾ.
༧༤. ‘‘ཡཾ ཡཾ ཡོ་ནུ་པ་པ་ཛྫཱ་མི, དེ་ཝ་ཏྟཾ ཨ་ཐ མཱ་ནུ་སཾ;
དཱི་པ་ས་ཏ་ས་ཧ་སྶཱ་ནི, པ་རི་ཝཱ་རེ ཛ་ལ་ནྟི མེ.
༧༥. ‘‘དེ་ཝ་ལོ་ཀཱ ཙ་ཝི་ཏྭཱ་ན, ཨུ་པྤ་ཛྫིཾ མཱ་ཏུ་ཀུ་ཙྪི་ཡཾ;
མཱ་ཏུ་ཀུ་ཙྪི་ག་ཏཱ ས་ནྟཱི, ཨ་ཀྑི མེ ན ནི་མཱི་ལ་ཏི.
༧༦. ‘‘དཱི་པ་ས་ཏ་ས་ཧ་སྶཱ་ནི, པུ་ཉྙ་ཀ་མྨ་ས་མ་ངྒི་ཏཱ;
ཛ་ལ་ནྟི སཱུ་ཏི་ཀཱ་གེ་ཧེ, པ་ཉྩ་དཱི་པཱ་ནི་དཾ ཕ་ལཾ.
༧༧. ‘‘པ་ཙྪི་མེ བྷ་ཝེ ས་མྤ་ཏྟེ, མཱ་ན་སཾ ཝི་ནི་ཝ་ཏྟ་ཡིཾ;
ཨ་ཛ་རཱ་མ་ཏཾ སཱི་ཏི་བྷཱ་ཝཾ, ནི་བྦཱ་ནཾ ཕ་སྶ་ཡིཾ ཨ་ཧཾ.
༧༨. ‘‘ཛཱ་ཏི་ཡཱ ས་ཏྟ་ཝ་སྶཱ་ཧཾ, ཨ་ར་ཧ་ཏྟ་མ་པཱ་པུ་ཎིཾ;
ཨུ་པ་ས་མྤཱ་ད་ཡཱི བུ་དྡྷོ, གུ་ཎ་མ་ཉྙཱ་ཡ གོ་ཏ་མོ.
༧༩. ‘‘མ་ཎྜ་པེ རུ་ཀྑ་མཱུ་ལེ ཝཱ, སུ་ཉྙཱ་གཱ་རེ ཝ་ས་ནྟི་ཡཱ;
ས་དཱ པ་ཛྫ་ལ་ཏེ དཱི་པཾ, པ་ཉྩ་དཱི་པཱ་ནི་དཾ ཕ་ལཾ.
༨༠. ‘‘དི་བྦ་ཙ་ཀྑུ ཝི་སུ་དྡྷཾ མེ, ས་མཱ་དྷི་ཀུ་ས་ལཱ ཨ་ཧཾ;
ཨ་བྷི་ཉྙཱ་པཱ་ར་མི་པྤ་ཏྟཱ, པ་ཉྩ་དཱི་པཱ་ནི་དཾ ཕ་ལཾ.
༨༡. ‘‘ས་བྦ་ཝོ་སི་ཏ་ཝོ་སཱ་ནཱ, ཀ་ཏ་ཀི་ཙྩཱ ཨ་ནཱ་ས་ཝཱ;
པ་ཉྩ་དཱི་པཱ མ་ཧཱ་ཝཱི་ར, པཱ་དེ ཝ་ནྡཱ་མི ཙ་ཀྑུ་མ.
༨༢. ‘‘ས་ཏ་ས་ཧ་སྶི་ཏོ ཀ་པྤེ, ཡཾ དཱི་པ་མ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, པ་ཉྩ་དཱི་པཱ་ནི་དཾ ཕ་ལཾ.
༨༣. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝཱ.
༨༤. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༨༥. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ པ་ཉྩ་དཱི་པ་དཱ་ཡི་ཀཱ བྷི་ཀྑུ་ནཱི ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
པ་ཉྩ་དཱི་པ་དཱ་ཡི་ཀཱ་ཐེ་རི་ཡཱ་པ་དཱ་ནཾ པ་ཉྩ་མཾ.