༤. ཨེ་ཀཱ་ས་ན་དཱ་ཡི་ཀཱ་ཐེ་རཱི་ཨ་པ་དཱ་ནཾ
༣༧. ‘‘ན་ག་རེ ཧཾ་ས་ཝ་ཏི་ཡཱ, ཨ་ཧོ་སིཾ བཱ་ལི་ཀཱ [མཱ་ལི་ཀཱ (སྱཱ. པཱི.)] ཏ་དཱ;
མཱ་ཏཱ ཙ མེ པི་ཏཱ ཙེ་ཝ, ཀ་མྨ་ནྟཾ ཨ་ག་མཾ་སུ ཏེ.
༣༨. ‘‘མ་ཛ྄ཛྷ་ནྷི་ཀ་མྷི སཱུ་རི་ཡེ, ཨ་དྡ་སཾ ས་མ་ཎཾ ཨ་ཧཾ;
ཝཱི་ཐི་ཡཱ ཨ་ནུ་ག་ཙྪ་ནྟཾ, ཨཱ་ས་ནཾ པ་ཉྙ་པེ་ས་ཧཾ.
༣༩. ‘‘གོ་ན་ཀཱ་ཝི་ཀ་ཏི་ཀཱ་ཧི [གོ་ན་ཀ་ཙི་ཏྟ་ཀཱ་དཱི་ཧི (སཱི.)], པ་ཉྙ་པེ་ཏྭཱ མ་མཱ་ས་ནཾ;
པ་ས་ནྣ་ཙི་ཏྟཱ སུ་མ་ནཱ, ཨི་དཾ ཝ་ཙ་ན་མ་བྲ་ཝིཾ.
༤༠. ‘‘‘ས་ནྟ་ཏྟཱ ཀུ་ཐི་ཏཱ བྷཱུ་མི, སཱུ་རོ མ་ཛ྄ཛྷ་ནྷི་ཀེ ཋི་ཏོ;
མཱ་ལུ་ཏཱ ཙ ན ཝཱ་ཡ་ནྟི, ཀཱ་ལོ ཙེ་ཝེ་ཏྠ མེ་ཧི་ཏི [ཙེ་ཏྠ ཨུ་པ་ཊྛི་ཏོ (སཱི.), ཙེ་ཝ་ཏྠཾ ཨེ་ཏི ཏཾ (པཱི.)].
༤༡. ‘‘‘པ་ཉྙ་ཏྟ་མཱ་ས་ན་མི་དཾ, ཏ་ཝ་ཏྠཱ་ཡ མ་ཧཱ་མུ་ནི;
ཨ་ནུ་ཀ་མྤཾ ཨུ་པཱ་དཱ་ཡ, ནི་སཱི་ད མ་མ ཨཱ་ས་ནེ’.
༤༢. ‘‘ནི་སཱི་དི ཏ་ཏྠ ས་མ་ཎོ, སུ་ད་ནྟོ སུ་དྡྷ་མཱ་ན་སོ;
ཏ་སྶ པ་ཏྟཾ ག་ཧེ་ཏྭཱ་ན, ཡ་ཐཱ་ར་ནྡྷཾ ཨ་དཱ་ས་ཧཾ.
༤༣. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༤༤. ‘‘ཏ་ཏྠ མེ སུ་ཀ་ཏཾ བྱ་མྷཾ, ཨཱ་ས་ནེ་ན སུ་ནི་མྨི་ཏཾ;
ས་ཊྛི་ཡོ་ཛ་ན་མུ་བྦེ་དྷཾ, ཏིཾ་ས་ཡོ་ཛ་ན་ཝི་ཏྠ་ཏཾ.
༤༥. ‘‘སོ་ཎྞ་མ་ཡཱ མ་ཎི་མ་ཡཱ, ཨ་ཐོ་པི ཕ་ལི་ཀཱ་མ་ཡཱ;
ལོ་ཧི་ཏ་ངྒ་མ་ཡཱ ཙེ་ཝ, པ་ལླ་ངྐཱ ཝི་ཝི་དྷཱ མ་མ.
༤༦. ‘‘ཏཱུ་ལི་ཀཱ ཝི་ཀ་ཏི་ཀཱ་ཧི, ཀ་ཊྚི་སྶ་ཙི་ཏྟ་ཀཱ་ཧི ཙ;
ཨུ་དྡ་ཨེ་ཀ་ནྟ་ལོ་མཱི ཙ, པ་ལླ་ངྐཱ མེ སུ་ས་ཎྛི་ཏཱ [སུ་ས་ནྠ་ཏཱ (སཱི.)].
༤༧. ‘‘ཡ་དཱ ཨི་ཙྪཱ་མི ག་མ་ནཾ, ཧཱ་ས་ཁི་ཌྜ་ས་མ་པྤི་ཏཱ;
ས་ཧ པ་ལླ་ངྐ་སེ་ཊྛེ་ན, ག་ཙྪཱ་མི མ་མ པ་ཏྠི་ཏཾ.
༤༨. ‘‘ཨ་སཱི་ཏི དེ་ཝ་རཱ་ཛཱུ་ནཾ, མ་ཧེ་སི་ཏྟ་མ་ཀཱ་ར་ཡིཾ;
ས་ཏྟ་ཏི ཙ་ཀྐ་ཝ་ཏྟཱི་ནཾ, མ་ཧེ་སི་ཏྟ་མ་ཀཱ་ར་ཡིཾ.
༤༩. ‘‘བྷ་ཝཱ་བྷ་ཝེ སཾ་ས་ར་ནྟཱི, མ་ཧཱ་བྷོ་གཾ ལ་བྷཱ་མ་ཧཾ;
བྷོ་གེ མེ ཨཱུ་ན་ཏཱ ན་ཏྠི, ཨེ་ཀཱ་ས་ན་སྶི་དཾ ཕ་ལཾ [ཨེ་ཀཱ་ས་ན་ཕ་ལཾ ཨི་དཾ (ས་བྦ་ཏྠ) ཨེ་ཝ་མུ་པ་རི་པི].
༥༠. ‘‘དུ་ཝེ བྷ་ཝེ སཾ་ས་རཱ་མི, དེ་ཝ་ཏྟེ ཨ་ཐ མཱ་ནུ་སེ;
ཨ་ཉྙེ བྷ་ཝེ ན ཛཱ་ནཱ་མི, ཨེ་ཀཱ་ས་ན་སྶི་དཾ ཕ་ལཾ.
༥༡. ‘‘དུ་ཝེ ཀུ་ལེ པ་ཛཱ་ཡཱ་མི, ཁ་ཏྟི་ཡེ ཙཱ་པི བྲཱ་ཧྨ་ཎེ;
ཨུ་ཙྩཱ་ཀུ་ལཱི་ནཱ [ཨུ་ཙྩཱ་ཀུ་ལི་ཀཱ (སྱཱ. པཱི. ཀ.)] ས་བྦ་ཏྠ, ཨེ་ཀཱ་ས་ན་སྶི་དཾ ཕ་ལཾ.
༥༢. ‘‘དོ་མ་ན་སྶཾ ན ཛཱ་ནཱ་མི, ཙི་ཏྟ་ས་ནྟཱ་པ་ནཾ མ་མ;
ཝེ་ཝ་ཎྞི་ཡཾ ན ཛཱ་ནཱ་མི, ཨེ་ཀཱ་ས་ན་སྶི་དཾ ཕ་ལཾ.
༥༣. ‘‘དྷཱ་ཏི་ཡོ མཾ ཨུ་པ་ཊྛ་ནྟི, ཁུ་ཛྫཱ ཙེ་ལཱ་པི་ཀཱ [ཁེ་ལཱ་པི་ཀཱ (སཱི.), ཙེ་ལཱ་ཝི་ཀཱ (པཱི.)] བ་ཧཱུ;
ཨ་ངྐེ་ན ཨ་ངྐཾ ག་ཙྪཱ་མི, ཨེ་ཀཱ་ས་ན་སྶི་དཾ ཕ་ལཾ.
༥༤. ‘‘ཨ་ཉྙཱ ནྷཱ་པེ་ནྟི བྷོ་ཛེ་ནྟི, ཨ་ཉྙཱ ར་མེ་ནྟི མཾ ས་དཱ;
ཨ་ཉྙཱ ག་ནྡྷཾ ཝི་ལི་མྤ་ནྟི, ཨེ་ཀཱ་ས་ན་སྶི་དཾ ཕ་ལཾ [ཨ་ཉྙཱ མ་མེ་ཝ ནྷཱ་པེ་ནྟི, ཨ་ཉྙཱ བྷོ་ཛེ་ནྟི བྷོ་ཛ་ནཾ; ཨ་ཉྙཱ མཾ ཨ་ལ་ངྐ་རོ་ནྟི, ཨ་ཉྙཱ ར་མེ་ནྟི མཾ ས་དྡྷཱ; (སྱཱ.)].
༥༥. ‘‘མ་ཎྜ་པེ རུ་ཀྑ་མཱུ་ལེ ཝཱ, སུ་ཉྙཱ་གཱ་རེ ཝ་ས་ནྟི་ཡཱ;
མ་མ ས་ངྐ་པྤ་མ་ཉྙཱ་ཡ, པ་ལླ་ངྐོ ཨུ་པ་ཏི་ཊྛ་ཏི.
༥༦. ‘‘ཨ་ཡཾ པ་ཙྪི་མ་ཀོ མ་ཡ྄ཧཾ, ཙ་རི་མོ ཝ་ཏྟ་ཏེ བྷ་ཝོ;
ཨ་ཛྫཱ་པི ར་ཛྫཾ ཚ་ཌྜེ་ཏྭཱ, པ་བྦ་ཛིཾ ཨ་ན་གཱ་རི་ཡཾ.
༥༧. ‘‘ས་ཏ་ས་ཧ་སྶི་ཏོ ཀ་པྤེ, ཡཾ དཱ་ན་མ་ད་དིཾ ཏ་དཱ;
དུ་གྒ་ཏིཾ ནཱ་བྷི་ཛཱ་ནཱ་མི, ཨེ་ཀཱ་ས་ན་སྶི་དཾ ཕ་ལཾ.
༥༨. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝཱ.
༥༩. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༦༠. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ ཨེ་ཀཱ་ས་ན་དཱ་ཡི་ཀཱ བྷི་ཀྑུ་ནཱི ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
ཨེ་ཀཱ་ས་ན་དཱ་ཡི་ཀཱ་ཐེ་རི་ཡཱ་པ་དཱ་ནཾ ཙ་ཏུ་ཏྠཾ.