༡༠. པ་ཊཱ་ཙཱ་རཱ་ཐེ་རཱི་ཨ་པ་དཱ་ནཾ
༤༦༨. ‘‘པ་དུ་མུ་ཏྟ་རོ ནཱ་མ ཛི་ནོ, ས་བྦ་དྷ་མྨཱ་ན པཱ་ར་གཱུ;
ཨི་ཏོ ས་ཏ་ས་ཧ་སྶ་མྷི, ཀ་པྤེ ཨུ་པྤ་ཛྫི ནཱ་ཡ་ཀོ.
༤༦༩. ‘‘ཏ་དཱ་ཧཾ ཧཾ་ས་ཝ་ཏི་ཡཾ, ཛཱ་ཏཱ སེ་ཊྛི་ཀུ་ལེ ཨ་ཧུཾ;
ནཱ་ནཱ་ར་ཏ་ན་པ་ཛྫོ་ཏེ, མ་ཧཱ་སུ་ཁ་ས་མ་པྤི་ཏཱ.
༤༧༠. ‘‘ཨུ་པེ་ཏྭཱ ཏཾ མ་ཧཱ་ཝཱི་རཾ, ཨ་སྶོ་སིཾ དྷ་མྨ་དེ་ས་ནཾ;
ཏ་ཏོ ཛཱ་ཏ་པ་སཱ་དཱ་ཧཾ, ཨུ་པེ་སིཾ ས་ར་ཎཾ ཛི་ནཾ.
༤༧༡. ‘‘ཏ་ཏོ ཝི་ན་ཡ་དྷཱ་རཱི་ནཾ, ཨ་གྒཾ ཝ་ཎྞེ་སི ནཱ་ཡ་ཀོ;
བྷི་ཀྑུ་ནིཾ ལ་ཛྫི་ནིཾ ཏཱ་དིཾ, ཀ་པྤཱ་ཀ་པྤ་ཝི་སཱ་ར་དཾ.
༤༧༢. ‘‘ཏ་དཱ མུ་དི་ཏ་ཙི་ཏྟཱ་ཧཾ, ཏཾ ཋཱ་ན་མ་བྷི་ཀ་ངྑི་ནཱི;
ནི་མ་ནྟེ་ཏྭཱ ད་ས་བ་ལཾ, ས་ས་ངྒྷཾ ལོ་ཀ་ནཱ་ཡ་ཀཾ.
༤༧༣. ‘‘བྷོ་ཛ་ཡི་ཏྭཱ་ན ས་ཏྟཱ་ཧཾ, ད་དི་ཏྭཱ་ཝ ཏི་ཙཱི་ཝ་རཾ [ད་དི་ཏྭཱ པ་ཏྟ་ཙཱི་ཝ་རཾ (སྱཱ.)];
ནི་པ་ཙྩ སི་ར་སཱ པཱ་དེ, ཨི་དཾ ཝ་ཙ་ན་མ་བྲ་ཝིཾ.
༤༧༤. ‘‘‘ཡཱ ཏ་ཡཱ ཝ་ཎྞི་ཏཱ ཝཱི་ར, ཨི་ཏོ ཨ་ཊྛ་མ་ཀེ མུ་ནི;
ཏཱ་དི་སཱ་ཧཾ བྷ་ཝི་སྶཱ་མི, ཡ་དི སི་ཛ྄ཛྷ་ཏི ནཱ་ཡ་ཀ’.
༤༧༥. ‘‘ཏ་དཱ ཨ་ཝོ་ཙ མཾ ས་ཏྠཱ, ‘བྷ་དྡེ མཱ བྷཱ་ཡི ཨ་སྶ་ས;
ཨ་ནཱ་ག་ཏ་མྷི ཨ་དྡྷཱ་ནེ, ལ་ཙྪ་སེ ཏཾ མ་ནོ་ར་ཐཾ.
༤༧༦. ‘‘‘ས་ཏ་ས་ཧ་སྶི་ཏོ ཀ་པྤེ, ཨོ་ཀྐཱ་ཀ་ཀུ་ལ་ས་མྦྷ་ཝོ;
གོ་ཏ་མོ ནཱ་མ གོ་ཏྟེ་ན, ས་ཏྠཱ ལོ་ཀེ བྷ་ཝི་སྶ་ཏི.
༤༧༧. ‘‘‘ཏ་སྶ དྷ་མྨེ་སུ དཱ་ཡཱ་དཱ, ཨོ་ར་སཱ དྷ་མྨ་ནི་མྨི་ཏཱ;
པ་ཊཱ་ཙཱ་རཱ་ཏི ནཱ་མེ་ན, ཧེ་སྶ་ཏི ས་ཏྠུ སཱ་ཝི་ཀཱ’.
༤༧༨. ‘‘ཏ་དཱ་ཧཾ མུ་དི་ཏཱ [པ་མུ་དཱི (ཀ.)] ཧུ་ཏྭཱ, ཡཱ་ཝ་ཛཱི་ཝཾ ཏ་དཱ ཛི་ནཾ;
མེ་ཏྟ་ཙི་ཏྟཱ པ་རི་ཙ་རིཾ, ས་ས་ངྒྷཾ ལོ་ཀ་ནཱ་ཡ་ཀཾ.
༤༧༩. ‘‘ཏེ་ན ཀ་མྨེ་ན སུ་ཀ་ཏེ་ན, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༤༨༠. ‘‘ཨི་མ་མྷི བྷ་དྡ་ཀེ ཀ་པྤེ, བྲ་ཧྨ་བ་ནྡྷུ མ་ཧཱ་ཡ་སོ;
ཀ་སྶ་པོ ནཱ་མ གོ་ཏྟེ་ན, ཨུ་པྤ་ཛྫི ཝ་ད་ཏཾ ཝ་རོ.
༤༨༡. ‘‘ཨུ་པ་ཊྛཱ་ཀོ མ་ཧེ་སི་སྶ, ཏ་དཱ ཨཱ་སི ན་རི་སྶ་རོ;
ཀཱ་སི་རཱ་ཛཱ ཀི་ཀཱི ནཱ་མ, བཱ་རཱ་ཎ་སི་པུ་རུ་ཏྟ་མེ.
༤༨༢. ‘‘ཏ་སྶཱ་སིཾ ཏ་ཏི་ཡཱ དྷཱི་ཏཱ, བྷི་ཀྑུ་ནཱི ཨི་ཏི ཝི་སྶུ་ཏཱ;
དྷ་མྨཾ སུ་ཏྭཱ ཛི་ན་གྒ་སྶ, པ་བྦ་ཛྫཾ ས་མ་རོ་ཙ་ཡིཾ.
༤༨༣. ‘‘ཨ་ནུ་ཛཱ་ནི ན ནོ ཏཱ་ཏོ, ཨ་གཱ་རེ་ཝ ཏ་དཱ མ་ཡཾ;
ཝཱི་ས་ཝ་སྶ་ས་ཧ་སྶཱ་ནི, ཝི་ཙ་རི་མྷ ཨ་ཏ་ནྡི་ཏཱ.
༤༨༤. ‘‘ཀོ་མཱ་རི་བྲ་ཧྨ་ཙ་རི་ཡཾ, རཱ་ཛ་ཀ་ཉྙཱ སུ་ཁེ་དྷི་ཏཱ;
བུ་དྡྷོ་པ་ཊྛཱ་ན་ནི་ར་ཏཱ, མུ་དི་ཏཱ ས་ཏྟ་དྷཱི་ཏ་རོ.
༤༨༥. ‘‘ས་མ་ཎཱི ས་མ་ཎ་གུ་ཏྟཱ ཙ, བྷི་ཀྑུ་ནཱི བྷི་ཀྑུ་དཱ་ཡི་ཀཱ;
དྷ་མྨཱ ཙེ་ཝ སུ་དྷ་མྨཱ ཙ, ས་ཏྟ་མཱི ས་ངྒྷ་དཱ་ཡི་ཀཱ.
༤༨༦. ‘‘ཨ་ཧཾ ཨུ་པྤ་ལ་ཝ་ཎྞཱ ཙ, ཁེ་མཱ བྷ་དྡཱ ཙ བྷི་ཀྑུ་ནཱི;
ཀི་སཱ་གོ་ཏ་མཱི དྷ་མྨ་དི་ནྣཱ, ཝི་སཱ་ཁཱ ཧོ་ཏི ས་ཏྟ་མཱི.
༤༨༧. ‘‘ཏེ་ཧི ཀ་མྨེ་ཧི སུ་ཀ་ཏེ་ཧི, ཙེ་ཏ་ནཱ་པ་ཎི་དྷཱི་ཧི ཙ;
ཛ་ཧི་ཏྭཱ མཱ་ནུ་སཾ དེ་ཧཾ, ཏཱ་ཝ་ཏིཾ་ས་མ་ག་ཙྪ་ཧཾ.
༤༨༨. ‘‘པ་ཙྪི་མེ ཙ བྷ་ཝེ དཱ་ནི, ཛཱ་ཏཱ སེ་ཊྛི་ཀུ་ལེ ཨ་ཧཾ;
སཱ་ཝ་ཏྠི་ཡཾ པུ་ར་ཝ་རེ, ཨི་དྡྷེ ཕཱི་ཏེ མ་ཧ་དྡྷ་ནེ.
༤༨༩. ‘‘ཡ་དཱ ཙ ཡོ་བྦ་ནཱུ་པེ་ཏཱ, ཝི་ཏ་ཀྐ་ཝ་ས་གཱ ཨ་ཧཾ;
ན་རཾ ཛཱ་ར་པ་ཏིཾ དི་སྭཱ, ཏེ་ན ས་དྡྷིཾ ཨ་ག་ཙྪ་ཧཾ.
༤༩༠. ‘‘ཨེ་ཀ་པུ་ཏྟ་པ་སཱུ་ཏཱ་ཧཾ, དུ་ཏི་ཡོ ཀུ་ཙྪི་ཡཱ མ་མཾ;
ཏ་དཱ་ཧཾ མཱ་ཏཱ་པི་ཏ་རོ, ཨོ་ཀྑཱ་མཱི་ཏི [ཨི་ཀྑཱ་མཱི་ཏི (སྱཱ.), ད་ཀྑཱ་མཱི་ཏི (སཱི.)] སུ་ནི་ཙྪི་ཏཱ.
༤༩༡. ‘‘ནཱ་རོ་ཙེ་སིཾ པ་ཏིཾ མ་ཡ྄ཧཾ, ཏ་དཱ ཏ་མྷི པ་ཝཱ་སི་ཏེ;
ཨེ་ཀི་ཀཱ ནི་གྒ་ཏཱ གེ་ཧཱ, ག་ནྟུཾ སཱ་ཝ་ཏྠི་མུ་ཏྟ་མཾ.
༤༩༢. ‘‘ཏ་ཏོ མེ སཱ་མི ཨཱ་ག་ནྟྭཱ, ས་མྦྷཱ་ཝེ་སི པ་ཐེ མ་མཾ;
ཏ་དཱ མེ ཀ་མྨ་ཛཱ ཝཱ་ཏཱ, ཨུ་པྤ་ནྣཱ ཨ་ཏི་དཱ་རུ་ཎཱ.
༤༩༣. ‘‘ཨུ་ཊྛི་ཏོ ཙ མ་ཧཱ་མེ་གྷོ, པ་སཱུ་ཏི་ས་མ་ཡེ མ་མ;
ད་བྦ་ཏྠཱ་ཡ ཏ་དཱ ག་ནྟྭཱ, སཱ་མི ས་པྤེ་ན མཱ་རི་ཏོ.
༤༩༤. ‘‘ཏ་དཱ ཝི་ཛཱ་ཏ་དུ་ཀྑེ་ན, ཨ་ནཱ་ཐཱ ཀ་པ་ཎཱ ཨ་ཧཾ;
ཀུ་ནྣ་དིཾ པཱུ་རི་ཏཾ དི་སྭཱ, ག་ཙྪ་ནྟཱི ས་ཀུ་ལཱ་ལ་ཡཾ.
༤༩༥. ‘‘བཱ་ལཾ ཨཱ་དཱ་ཡ ཨ་ཏ་རིཾ, པཱ་ར་ཀཱུ་ལེ ཙ ཨེ་ཀ་ཀཾ;
སཱ་ཡེ་ཏྭཱ [པཱ་ཡེ་ཏྭཱ (སྱཱ.), པཱ་ཏེ་ཏྭཱ (ཀ.)] བཱ་ལ་ཀཾ པུ་ཏྟཾ, ཨི་ཏ་རཾ ཏ་ར་ཎཱ་ཡ་ཧཾ.
༤༩༦. ‘‘ནི་ཝ་ཏྟཱ ཨུ་ཀྐུ་སོ ཧཱ་སི, ཏ་རུ་ཎཾ ཝི་ལ་པ་ནྟ་ཀཾ;
ཨི་ཏ་ར་ཉྩ ཝ་ཧཱི སོ་ཏོ, སཱ་ཧཾ སོ་ཀ་ས་མ་པྤི་ཏཱ.
༤༩༧. ‘‘སཱ་ཝ་ཏྠི་ན་ག་རཾ ག་ནྟྭཱ, ཨ་སྶོ་སིཾ ས་ཛ་ནེ མ་ཏེ;
ཏ་དཱ ཨ་ཝོ་ཙཾ སོ་ཀ་ཊྚཱ, མ་ཧཱ་སོ་ཀ་ས་མ་པྤི་ཏཱ.
༤༩༨. ‘‘ཨུ་བྷོ པུ་ཏྟཱ ཀཱ་ལ་ངྐ་ཏཱ, པ་ནྠེ མ་ཡ྄ཧཾ པ་ཏཱི མ་ཏོ;
མཱ་ཏཱ པི་ཏཱ ཙ བྷཱ་ཏཱ ཙ, ཨེ་ཀ་ཙི་ཏ་མྷི ཌ་ཡ྄ཧ་རེ.
༤༩༩. ‘‘ཏ་དཱ ཀི་སཱ ཙ པ་ཎྜུ ཙ, ཨ་ནཱ་ཐཱ དཱི་ན་མཱ་ན་སཱ;
ཨི་ཏོ ཏ་ཏོ བྷ་མ་ནྟཱི་ཧཾ [ག་ཙྪ་ནྟཱི་ཧཾ (སྱཱ.), ག་མེ་ནྟཱི་ཧཾ (ཀ.)], ཨ་དྡ་སཾ ན་ར་སཱ་ར་ཐིཾ.
༥༠༠. ‘‘ཏ་ཏོ ཨ་ཝོ་ཙ མཾ ས་ཏྠཱ, ‘པུ་ཏྟེ མཱ སོ་ཙི ཨ་སྶ་ས;
ཨ་ཏྟཱ་ནཾ ཏེ ག་ཝེ་ས་སྶུ, ཀིཾ ནི་ར་ཏྠཾ ཝི་ཧ་ཉྙ་སི.
༥༠༡. ‘‘‘ན ས་ནྟི པུ་ཏྟཱ ཏཱ་ཎཱ་ཡ, ན ཉཱ་ཏཱི ན་པི བ་ནྡྷ་ཝཱ;
ཨ་ནྟ་ཀེ་ནཱ་དྷི་པ་ནྣ་སྶ, ན་ཏྠི ཉཱ་ཏཱི་སུ ཏཱ་ཎ་ཏཱ’.
༥༠༢. ‘‘ཏཾ སུ་ཏྭཱ མུ་ནི་ནོ ཝཱ་ཀྱཾ, པ་ཋ་མཾ ཕ་ལ་མ་ཛ྄ཛྷ་གཾ;
པ་བྦ་ཛི་ཏྭཱ་ན ན་ཙི་རཾ, ཨ་ར་ཧ་ཏྟ་མ་པཱ་པུ་ཎིཾ.
༥༠༣. ‘‘ཨི་དྡྷཱི་སུ ཙ ཝ་སཱི ཧོ་མི, དི་བྦཱ་ཡ སོ་ཏ་དྷཱ་ཏུ་ཡཱ;
པ་ར་ཙི་ཏྟཱ་ནི ཛཱ་ནཱ་མི, ས་ཏྠུ་སཱ་ས་ན་ཀཱ་རི་ཀཱ.
༥༠༤. ‘‘པུ་བྦེ་ནི་ཝཱ་སཾ ཛཱ་ནཱ་མི, དི་བྦ་ཙ་ཀྑུ ཝི་སོ་དྷི་ཏཾ;
ཁེ་པེ་ཏྭཱ ཨཱ་ས་ཝེ ས་བྦེ, ཝི་སུ་དྡྷཱ་སིཾ སུ་ནི་མྨ་ལཱ.
༥༠༥. ‘‘ཏ་ཏོ་ཧཾ ཝི་ན་ཡཾ ས་བྦཾ, ས་ནྟི་ཀེ ས་བྦ་ད་སྶི་ནོ;
ཨུ་གྒ་ཧིཾ ས་བྦ་ཝི་ཏྠཱ་རཾ, བྱཱ་ཧ་རི་ཉྩ ཡ་ཐཱ་ཏ་ཐཾ.
༥༠༦. ‘‘ཛི་ནོ ཏ་སྨིཾ གུ་ཎེ ཏུ་ཊྛོ, ཨེ་ཏ་ད་གྒེ ཋ་པེ་སི མཾ;
ཨ་གྒཱ ཝི་ན་ཡ་དྷཱ་རཱི་ནཾ, པ་ཊཱ་ཙཱ་རཱ་ཝ ཨེ་ཀི་ཀཱ.
༥༠༧. ‘‘པ་རི་ཙི་ཎྞོ མ་ཡཱ ས་ཏྠཱ, ཀ་ཏཾ བུ་དྡྷ་སྶ སཱ་ས་ནཾ;
ཨོ་ཧི་ཏོ ག་རུ་ཀོ བྷཱ་རོ, བྷ་ཝ་ནེ་ཏྟི ས་མཱུ་ཧ་ཏཱ.
༥༠༨. ‘‘ཡ་སྶ་ཏྠཱ་ཡ པ་བྦ་ཛི་ཏཱ, ཨ་གཱ་ར་སྨཱ་ན་གཱ་རི་ཡཾ;
སོ མེ ཨ་ཏྠོ ཨ་ནུ་པྤ་ཏྟོ, ས་བྦ་སཾ་ཡོ་ཛ་ན་ཀྑ་ཡོ.
༥༠༩. ‘‘ཀི་ལེ་སཱ ཛྷཱ་པི་ཏཱ མ་ཡ྄ཧཾ…པེ… ཝི་ཧ་རཱ་མི ཨ་ནཱ་ས་ཝཱ.
༥༡༠. ‘‘སྭཱ་ག་ཏཾ ཝ་ཏ མེ ཨཱ་སི…པེ… ཀ་ཏཾ བུ་དྡྷ་སྶ སཱ་ས་ནཾ.
༥༡༡. ‘‘པ་ཊི་ས་མྦྷི་དཱ ཙ་ཏ་སྶོ…པེ… ཀ་ཏཾ བུ་དྡྷ་སྶ སཱ་ས་ནཾ’’.
ཨི་ཏྠཾ སུ་དཾ པ་ཊཱ་ཙཱ་རཱ བྷི་ཀྑུ་ནཱི ཨི་མཱ གཱ་ཐཱ་ཡོ ཨ་བྷཱ་སི་ཏྠཱ་ཏི.
པ་ཊཱ་ཙཱ་རཱ་ཐེ་རི་ཡཱ་པ་དཱ་ནཾ ད་ས་མཾ.
ཨེ་ཀཱུ་པོ་ས་ཐི་ཀ་ཝ་གྒོ དུ་ཏི་ཡོ.