༨. པ་སཱུ་ར་སུ་ཏྟཾ
༨༣༠. ཨི་དྷེ་ཝ སུ་དྡྷི ཨི་ཏི ཝཱ་ད་ཡ་ནྟི [ཝི་དི་ཡ་ནྟི (སཱི. པཱི.)], ནཱ་ཉྙེ་སུ དྷ་མྨེ་སུ ཝི་སུ་དྡྷི་མཱ་ཧུ;
ཡཾ ནི་སྶི་ཏཱ ཏ་ཏྠ སུ་བྷཾ ཝ་དཱ་ནཱ, པ་ཙྩེ་ཀ་ས་ཙྩེ་སུ པུ་ཐཱུ ནི་ཝི་ཊྛཱ.
༨༣༡. ཏེ ཝཱ་ད་ཀཱ་མཱ པ་རི་སཾ ཝི་ག་ཡ྄ཧ, བཱ་ལཾ ད་ཧ་ནྟཱི མི་ཐུ ཨ་ཉྙ་མ་ཉྙཾ;
ཝ་ད་ནྟི ཏེ ཨ་ཉྙ་སི་ཏཱ ཀ་ཐོ་ཛྫཾ, པ་སཾ་ས་ཀཱ་མཱ ཀུ་ས་ལཱ ཝ་དཱ་ནཱ.
༨༣༢. ཡུ་ཏྟོ ཀ་ཐཱ་ཡཾ པ་རི་སཱ་ཡ མ་ཛ྄ཛྷེ, པ་སཾ་ས་མི་ཙྪཾ ཝི་ནི་གྷཱ་ཏི ཧོ་ཏི;
ཨ་པཱ་ཧ་ཏ་སྨིཾ པ་ན མ་ངྐུ ཧོ་ཏི, ནི་ནྡཱ་ཡ སོ ཀུ་པྤ་ཏི ར་ནྡྷ་མེ་སཱི.
༨༣༣. ཡ་མ་སྶ ཝཱ་དཾ པ་རི་ཧཱི་ན་མཱ་ཧུ, ཨ་པཱ་ཧ་ཏཾ པ་ཉྷ་ཝི་མཾ་ས་ཀཱ་སེ;
པ་རི་དེ་ཝ་ཏི སོ་ཙ་ཏི ཧཱི་ན་ཝཱ་དོ, ཨུ་པ་ཙྩ་གཱ མ་ནྟི ཨ་ནུ་ཏྠུ་ནཱ་ཏི.
༨༣༤. ཨེ་ཏེ ཝི་ཝཱ་དཱ ས་མ་ཎེ་སུ ཛཱ་ཏཱ, ཨེ་ཏེ་སུ ཨུ་གྒྷཱ་ཏི ནི་གྷཱ་ཏི ཧོ་ཏི;
ཨེ་ཏ་མྤི དི་སྭཱ ཝི་ར་མེ ཀ་ཐོ་ཛྫཾ, ན ཧ་ཉྙ་ད་ཏྠ་ཏྠི་པ་སཾ་ས་ལཱ་བྷཱ.
༨༣༥. པ་སཾ་སི་ཏོ ཝཱ པ་ན ཏ་ཏྠ ཧོ་ཏི, ཨ་ཀྑཱ་ཡ ཝཱ་དཾ པ་རི་སཱ་ཡ མ་ཛ྄ཛྷེ;
སོ ཧ་སྶ་ཏཱི ཨུ་ཎྞ་མ་ཏཱི [ཨུ་ནྣ་མ་ཏཱི (?)] ཙ ཏེ་ན, པ་པྤུ་ཡྻ ཏ་མ་ཏྠཾ ཡ་ཐཱ མ་ནོ ཨ་ཧུ.
༨༣༦. ཡཱ ཨུ་ཎྞ་ཏཱི [ཨུ་ནྣ་ཏཱི (?)] སཱ་སྶ ཝི་གྷཱ་ཏ་བྷཱུ་མི, མཱ་ནཱ་ཏི་མཱ་ནཾ ཝ་ད་ཏེ པ་ནེ་སོ;
ཨེ་ཏ་མྤི དི་སྭཱ ན ཝི་ཝཱ་ད་ཡེ་ཐ, ན ཧི ཏེ་ན སུ་དྡྷིཾ ཀུ་ས་ལཱ ཝ་ད་ནྟི.
༨༣༧. སཱུ་རོ ཡ་ཐཱ རཱ་ཛ་ཁཱ་དཱ་ཡ པུ་ཊྛོ, ཨ་བྷི་ག་ཛྫ་མེ་ཏི པ་ཊི་སཱུ་ར་མི་ཙྪཾ;
ཡེ་ནེ་ཝ སོ ཏེ་ན པ་ལེ་ཧི སཱུ་ར, པུ་བྦེ་ཝ ན་ཏྠི ཡ་དི་དཾ ཡུ་དྷཱ་ཡ.
༨༣༨. ཡེ དི་ཊྛི་མུ་གྒ་ཡ྄ཧ ཝི་ཝཱ་ད་ཡ་ནྟི [ཝི་ཝཱ་དི་ཡ་ནྟི (སཱི. པཱི.)], ཨི་ད་མེ་ཝ ས་ཙྩ་ནྟི ཙ ཝཱ་ད་ཡ་ནྟི;
ཏེ ཏྭཾ ཝ་ད་སྶཱུ ན ཧི ཏེ་དྷ ཨ་ཏྠི, ཝཱ་ད་མྷི ཛཱ་ཏེ པ་ཊི་སེ་ནི་ཀ་ཏྟཱ.
༨༣༩. ཝི་སེ་ནི་ཀ་ཏྭཱ པ་ན ཡེ ཙ་ར་ནྟི, དི་ཊྛཱི་ཧི དི་ཊྛིཾ ཨ་ཝི་རུ་ཛ྄ཛྷ་མཱ་ནཱ;
ཏེ་སུ ཏྭཾ ཀིཾ ལ་བྷེ་ཐོ པ་སཱུ་ར, ཡེ་སཱི་དྷ ན་ཏྠཱི པ་ར་མུ་གྒ་ཧཱི་ཏཾ.
༨༤༠. ཨ་ཐ ཏྭཾ པ་ཝི་ཏ་ཀྐ་མཱ་ག་མཱ, མ་ན་སཱ དི་ཊྛི་ག་ཏཱ་ནི ཙི་ནྟ་ཡ་ནྟོ;
དྷོ་ནེ་ན ཡུ་གཾ ས་མཱ་ག་མཱ, ན ཧི ཏྭཾ ས་ཀྑ་སི ས་མྤ་ཡཱ་ཏ་ཝེ་ཏི.
པ་སཱུ་ར་སུ་ཏྟཾ ཨ་ཊྛ་མཾ ནི་ཊྛི་ཏཾ.