༧. ཏི་སྶ་མེ་ཏྟེ་ཡྻ་སུ་ཏྟཾ
༨༢༠. ‘‘མེ་ཐུ་ན་མ་ནུ་ཡུ་ཏྟ་སྶ, (ཨི་ཙྩཱ་ཡ་སྨཱ ཏི་སྶོ མེ་ཏྟེ་ཡྻོ) ཝི་གྷཱ་ཏཾ བྲཱུ་ཧི མཱ་རི་ས;
སུ་ཏྭཱ་ན ཏ་ཝ སཱ་ས་ནཾ, ཝི་ཝེ་ཀེ སི་ཀྑི་སྶཱ་མ་སེ.
༨༢༡. ‘‘མེ་ཐུ་ན་མ་ནུ་ཡུ་ཏྟ་སྶ, (མེ་ཏྟེ་ཡྻཱ་ཏི བྷ་ག་ཝཱ) མུ་སྶ་ཏེ ཝཱ་པི སཱ་ས་ནཾ;
མི་ཙྪཱ ཙ པ་ཊི་པ་ཛྫ་ཏི, ཨེ་ཏཾ ཏ་སྨིཾ ཨ་ནཱ་རི་ཡཾ.
༨༢༢. ‘‘ཨེ་ཀོ པུ་བྦེ ཙ་རི་ཏྭཱ་ན, མེ་ཐུ་ནཾ ཡོ ནི་སེ་ཝ་ཏི;
ཡཱ་ནཾ བྷ་ནྟཾ ཝ ཏཾ ལོ་ཀེ, ཧཱི་ན་མཱ་ཧུ པུ་ཐུ་ཛྫ་ནཾ.
༨༢༣. ‘‘ཡ་སོ ཀི་ཏྟི ཙ ཡཱ པུ་བྦེ, ཧཱ་ཡ་ཏེ ཝཱ་པི ཏ་སྶ སཱ;
ཨེ་ཏ་མྤི དི་སྭཱ སི་ཀྑེ་ཐ, མེ་ཐུ་ནཾ ཝི་པྤ་ཧཱ་ཏ་ཝེ.
༨༢༤. ‘‘ས་ངྐ་པྤེ་ཧི པ་རེ་ཏོ སོ, ཀ་པ་ཎོ ཝི་ཡ ཛྷཱ་ཡ་ཏི;
སུ་ཏྭཱ པ་རེ་སཾ ནི་གྒྷོ་སཾ, མ་ངྐུ ཧོ་ཏི ཏ་ཐཱ་ཝི་དྷོ.
༨༢༥. ‘‘ཨ་ཐ ས་ཏྠཱ་ནི ཀུ་རུ་ཏེ, པ་ར་ཝཱ་དེ་ཧི ཙོ་དི་ཏོ;
ཨེ་ས ཁྭ་སྶ མ་ཧཱ་གེ་དྷོ, མོ་ས་ཝ་ཛྫཾ པ་གཱ་ཧ་ཏི.
༨༢༦. ‘‘པ་ཎྜི་ཏོ་ཏི ས་མ་ཉྙཱ་ཏོ, ཨེ་ཀ་ཙ་རི་ཡཾ ཨ་དྷི་ཊྛི་ཏོ;
ཨ་ཐཱ་པི [ས ཙཱ་པི (ནི་དྡེ་སེ)] མེ་ཐུ་ནེ ཡུ་ཏྟོ, མ་ནྡོ་ཝ པ་རི་ཀི་སྶ་ཏི [པ་རི་ཀི་ལི་སྶ་ཏི (སཱི.)].
༨༢༧. ‘‘ཨེ་ཏ་མཱ་དཱི་ན་ཝཾ ཉ་ཏྭཱ, མུ་ནི པུ་བྦཱ་པ་རེ ཨི་དྷ;
ཨེ་ཀ་ཙ་རི་ཡཾ ད་ལ༹ྷཾ ཀ་ཡི་རཱ, ན ནི་སེ་ཝེ་ཐ མེ་ཐུ་ནཾ.
༨༢༨. ‘‘ཝི་ཝེ་ཀ་ཉྙེ་ཝ སི་ཀྑེ་ཐ, ཨེ་ཏ་ད་རི་ཡཱ་ན་མུ་ཏྟ་མཾ;
ན ཏེ་ན སེ་ཊྛོ མ་ཉྙེ་ཐ, ས ཝེ ནི་བྦཱ་ན་ས་ནྟི་ཀེ.
༨༢༩. ‘‘རི་ཏྟ་སྶ མུ་ནི་ནོ ཙ་ར་ཏོ, ཀཱ་མེ་སུ ཨ་ན་པེ་ཀྑི་ནོ;
ཨོ་གྷ་ཏི་ཎྞ་སྶ པི་ཧ་ཡ་ནྟི, ཀཱ་མེ་སུ ག་དྷི་ཏཱ [ག་ཐི་ཏཱ (སཱི.)] པ་ཛཱ’’ཏི.
ཏི་སྶ་མེ་ཏྟེ་ཡྻ་སུ་ཏྟཾ ས་ཏྟ་མཾ ནི་ཊྛི་ཏཾ.