༤. སུ་དྡྷ་ཊྛ་ཀ་སུ་ཏྟཾ

༧༩༤. པ་སྶཱ་མི སུ་དྡྷཾ པ་ར་མཾ ཨ་རོ་གཾ, དི་ཊྛེ་ན སཾ་སུ་དྡྷི ན་ར་སྶ ཧོ་ཏི;

ཨེ་ཝཱ་བྷི་ཛཱ་ནཾ [ཨེ་ཏཱ་བྷི་ཛཱ་ནཾ (སཱི. པཱི.)] པ་ར་མ་ནྟི ཉ་ཏྭཱ, སུ་དྡྷཱ་ནུ་པ་སྶཱི་ཏི པ་ཙྩེ་ཏི ཉཱ་ཎཾ.

༧༩༥. དི་ཊྛེ་ན ཙེ སུ་དྡྷི ན་ར་སྶ ཧོ་ཏི, ཉཱ་ཎེ་ན ཝཱ སོ པ་ཛ་ཧཱ་ཏི དུ་ཀྑཾ;

ཨ་ཉྙེ་ན སོ སུ་ཛ྄ཛྷ་ཏི སོ་པ་དྷཱི་ཀོ, དི་ཊྛཱི ཧི ནཾ པཱ་ཝ ཏ་ཐཱ ཝ་དཱ་ནཾ.

༧༩༦. ན བྲཱ་ཧྨ་ཎོ ཨ་ཉྙ་ཏོ སུ་དྡྷི་མཱ་ཧ, དི་ཊྛེ སུ་ཏེ སཱི་ལ་ཝ་ཏེ མུ་ཏེ ཝཱ;

པུ་ཉྙེ ཙ པཱ་པེ ཙ ཨ་ནཱུ་པ་ལི་ཏྟོ, ཨ་ཏྟ་ཉྫ་ཧོ ན་ཡི་དྷ པ་ཀུ་བྦ་མཱ་ནོ.

༧༩༧. པུ་རི་མཾ པ་ཧཱ་ཡ ཨ་པ་རཾ སི་ཏཱ་སེ, ཨེ་ཛཱ་ནུ་གཱ ཏེ ན ཏ་ར་ནྟི ས་ངྒཾ;

ཏེ ཨུ་གྒ་ཧཱ་ཡ་ནྟི ནི་ར་སྶ་ཛ་ནྟི, ཀ་པཱི་ཝ སཱ་ཁཾ པ་མུ་ཉྩཾ ག་ཧཱ་ཡཾ [པ་མུ་ཁཾ ག་ཧཱ་ཡ (སྱཱ.), པ་མུ་ཉྩ ག་ཧཱ་ཡ (ཀ.)].

༧༩༨. ས་ཡཾ ས་མཱ་དཱ་ཡ ཝ་ཏཱ་ནི ཛ་ནྟུ, ཨུ་ཙྩཱ་ཝ་ཙཾ ག་ཙྪ་ཏི ས་ཉྙ་ས་ཏྟོ;

ཝི་དྭཱ ཙ ཝེ་དེ་ཧི ས་མེ་ཙྩ དྷ་མྨཾ, ན ཨུ་ཙྩཱ་ཝ་ཙཾ ག་ཙྪ་ཏི བྷཱུ་རི་པ་ཉྙོ.

༧༩༩. ས ས་བྦ་དྷ་མྨེ་སུ ཝི་སེ་ནི་བྷཱུ་ཏོ, ཡཾ ཀི་ཉྩི དི་ཊྛཾ ཝ སུ་ཏཾ མུ་ཏཾ ཝཱ;

ཏ་མེ་ཝ ད་སྶིཾ ཝི་ཝ་ཊཾ ཙ་ར་ནྟཾ, ཀེ་ནཱི་དྷ ལོ་ཀ་སྨི ཝི་ཀ་པྤ་ཡེ་ཡྻ.

༨༠༠. ན ཀ་པྤ་ཡ་ནྟི ན པུ་རེ་ཀྑ་རོ་ནྟི, ཨ་ཙྩ་ནྟ་སུ་དྡྷཱི་ཏི ན ཏེ ཝ་ད་ནྟི;

ཨཱ་དཱ་ན་ག་ནྠཾ ག་ཐི་ཏཾ ཝི་ས་ཛྫ, ཨཱ་སཾ ན ཀུ་བྦ་ནྟི ཀུ་ཧི་ཉྩི ལོ་ཀེ.

༨༠༡. སཱི་མཱ་ཏི་གོ བྲཱ་ཧྨ་ཎོ ཏ་སྶ ན་ཏྠི, ཉ་ཏྭཱ ཝ དི་སྭཱ ཝ [ཉ་ཏྭཱ ཙ དི་སྭཱ ཙ (ཀ. སཱི. ཀ.)] ས་མུ་གྒ་ཧཱི་ཏཾ;

ན རཱ་ག་རཱ་གཱི ན ཝི་རཱ་ག་ར་ཏྟོ, ཏ་སྶཱི་དྷ ན་ཏྠཱི པ་ར་མུ་གྒ་ཧཱི་ཏ་ནྟི.

སུ་དྡྷ་ཊྛ་ཀ་སུ་ཏྟཾ ཙ་ཏུ་ཏྠཾ ནི་ཊྛི་ཏཾ.