༥. པ་ར་མ་ཊྛ་ཀ་སུ་ཏྟཾ
༨༠༢. པ་ར་མ་ནྟི དི་ཊྛཱི་སུ པ་རི་བྦ་སཱ་ནོ, ཡ་དུ་ཏྟ་རི ཀུ་རུ་ཏེ ཛ་ནྟུ ལོ་ཀེ;
ཧཱི་ནཱ་ཏི ཨ་ཉྙེ ཏ་ཏོ ས་བྦ་མཱ་ཧ, ཏ་སྨཱ ཝི་ཝཱ་དཱ་ནི ཨ་ཝཱི་ཏི་ཝ་ཏྟོ.
༨༠༣. ཡ་ད་ཏྟ་ནཱི པ་སྶ་ཏི ཨཱ་ནི་སཾ་སཾ, དི་ཊྛེ སུ་ཏེ སཱི་ལ་ཝ་ཏེ [སཱི་ལ་བྦ་ཏེ (སྱཱ.)] མུ་ཏེ ཝཱ;
ཏ་དེ་ཝ སོ ཏ་ཏྠ ས་མུ་གྒ་ཧཱ་ཡ, ནི་ཧཱི་ན་ཏོ པ་སྶ་ཏི ས་བྦ་མ་ཉྙཾ.
༨༠༤. ཏཾ ཝཱ་པི ག་ནྠཾ ཀུ་ས་ལཱ ཝ་ད་ནྟི, ཡཾ ནི་སྶི་ཏོ པ་སྶ་ཏི ཧཱི་ན་མ་ཉྙཾ;
ཏ་སྨཱ ཧི དི་ཊྛཾ ཝ སུ་ཏཾ མུ་ཏཾ ཝཱ, སཱི་ལ་བྦ་ཏཾ བྷི་ཀྑུ ན ནི་སྶ་ཡེ་ཡྻ.
༨༠༥. དི་ཊྛི་མྤི ལོ་ཀ་སྨིཾ ན ཀ་པྤ་ཡེ་ཡྻ, ཉཱ་ཎེ་ན ཝཱ སཱི་ལ་ཝ་ཏེ་ན ཝཱ་པི;
ས་མོ་ཏི ཨ་ཏྟཱ་ན་མ་ནཱུ་པ་ནེ་ཡྻ, ཧཱི་ནོ ན མ་ཉྙེ་ཐ ཝི་སེ་སི ཝཱ་པི.
༨༠༦. ཨ་ཏྟཾ པ་ཧཱ་ཡ ཨ་ནུ་པཱ་དི་ཡཱ་ནོ, ཉཱ་ཎེ་པི སོ ནི་སྶ་ཡཾ ནོ ཀ་རོ་ཏི;
ས ཝེ ཝི་ཡ་ཏྟེ་སུ [ཝི་ཡུ་ཏྟེ་སུ (སཱི. ཨ་ཊྛ.), དྭི་ཡ་ཏྟེ་སུ (ཀ.)] ན ཝ་གྒ་སཱ་རཱི, དི་ཊྛི་མྤི [དི་ཊྛི་མ་པི (ཀ.)] སོ ན པ་ཙྩེ་ཏི ཀི་ཉྩི.
༨༠༧. ཡ་སྶཱུ་བྷ་ཡ་ནྟེ པ་ཎི་དྷཱི་དྷ ན་ཏྠི, བྷ་ཝཱ་བྷ་ཝཱ་ཡ ཨི་དྷ ཝཱ ཧུ་རཾ ཝཱ;
ནི་ཝེ་ས་ནཱ ཏ་སྶ ན ས་ནྟི ཀེ་ཙི, དྷ་མྨེ་སུ ནི་ཙྪེ་ཡྻ ས་མུ་གྒ་ཧཱི་ཏཾ.
༨༠༨. ཏ་སྶཱི་དྷ དི་ཊྛེ ཝ སུ་ཏེ མུ་ཏེ ཝཱ, པ་ཀ་པྤི་ཏཱ ན་ཏྠི ཨ་ཎཱུ་པི ས་ཉྙཱ;
ཏཾ བྲཱ་ཧྨ་ཎཾ དི་ཊྛི་མ་ནཱ་དི་ཡཱ་ནཾ, ཀེ་ནཱི་དྷ ལོ་ཀ་སྨིཾ ཝི་ཀ་པྤ་ཡེ་ཡྻ.
༨༠༩. ན ཀ་པྤ་ཡ་ནྟི ན པུ་རེ་ཀྑ་རོ་ནྟི, དྷ་མྨཱ་པི ཏེ་སཾ ན པ་ཊི་ཙྪི་ཏཱ་སེ;
ན བྲཱ་ཧྨ་ཎོ སཱི་ལ་ཝ་ཏེ་ན ནེ་ཡྻོ, པཱ་ར་ངྒ་ཏོ ན པ་ཙྩེ་ཏི ཏཱ་དཱི་ཏི.
པ་ར་མ་ཊྛ་ཀ་སུ་ཏྟཾ པ་ཉྩ་མཾ ནི་ཊྛི་ཏཾ.