༡༥. ཨ་ཏྟ་ད་ཎྜ་སུ་ཏྟཾ
༩༤༡. ‘‘ཨ་ཏྟ་ད་ཎྜཱ བྷ་ཡཾ ཛཱ་ཏཾ, ཛ་ནཾ པ་སྶ་ཐ མེ་དྷ་གཾ;
སཾ་ཝེ་གཾ ཀི་ཏྟ་ཡི་སྶཱ་མི, ཡ་ཐཱ སཾ་ཝི་ཛི་ཏཾ མ་ཡཱ.
༩༤༢. ‘‘ཕ་ནྡ་མཱ་ནཾ པ་ཛཾ དི་སྭཱ, མ་ཙྪེ ཨ་པྤོ་ད་ཀེ ཡ་ཐཱ;
ཨ་ཉྙ་མ་ཉྙེ་ཧི བྱཱ་རུ་དྡྷེ, དི་སྭཱ མཾ བྷ་ཡ་མཱ་ཝི་སི.
༩༤༣. ‘‘ས་མ་ནྟ་མ་སཱ་རོ ལོ་ཀོ, དི་སཱ ས་བྦཱ ས་མེ་རི་ཏཱ;
ཨི་ཙྪཾ བྷ་ཝ་ན་མ་ཏྟ་ནོ, ནཱ་དྡ་སཱ་སིཾ ཨ་ནོ་སི་ཏཾ.
༩༤༤. ‘‘ཨོ་སཱ་ནེ་ཏྭེ་ཝ བྱཱ་རུ་དྡྷེ, དི་སྭཱ མེ ཨ་ར་ཏཱི ཨ་ཧུ;
ཨ་ཐེ་ཏྠ ས་ལླ་མ་དྡ་ཀྑིཾ, དུ་དྡ་སཾ ཧ་ད་ཡ་ནི་སྶི་ཏཾ.
༩༤༥. ‘‘ཡེ་ན ས་ལླེ་ན ཨོ་ཏི་ཎྞོ, དི་སཱ ས་བྦཱ ཝི་དྷཱ་ཝ་ཏི;
ཏ་མེ་ཝ ས་ལླ་མ་བྦུ་ཡ྄ཧ, ན དྷཱ་ཝ་ཏི ན སཱི་ད་ཏི.
༩༤༦. ‘‘ཏ་ཏྠ སི་ཀྑཱ་ནུ་གཱི་ཡ་ནྟི [སི་ཀྑཱ་ནུ་ཀི་རི་ཡ་ནྟི (ཀ.)], ཡཱ་ནི ལོ་ཀེ ག་དྷི་ཏཱ་ནི;
ན ཏེ་སུ པ་སུ་ཏོ སི་ཡཱ, ནི་བྦི་ཛ྄ཛྷ ས་བྦ་སོ ཀཱ་མེ;
སི་ཀྑེ ནི་བྦཱ་ན་མ་ཏྟ་ནོ.
༩༤༧. ‘‘ས་ཙྩོ སི་ཡཱ ཨ་པྤ་ག་བྦྷོ, ཨ་མཱ་ཡོ རི་ཏྟ་པེ་སུ་ཎོ;
ཨ་ཀྐོ་དྷ་ནོ ལོ་བྷ་པཱ་པཾ, ཝེ་ཝི་ཙྪཾ ཝི་ཏ་རེ མུ་ནི.
༩༤༨. ‘‘ནི་དྡཾ ཏ་ནྡིཾ ས་ཧེ ཐཱི་ནཾ, པ་མཱ་དེ་ན ན སཾ་ཝ་སེ;
ཨ་ཏི་མཱ་ནེ ན ཏི་ཊྛེ་ཡྻ, ནི་བྦཱ་ན་མ་ན་སོ ན་རོ.
༩༤༩. ‘‘མོ་ས་ཝ་ཛྫེ ན ནཱི་ཡེ་ཐ, རཱུ་པེ སྣེ་ཧཾ ན ཀུ་བྦ་ཡེ;
མཱ་ན་ཉྩ པ་རི་ཛཱ་ནེ་ཡྻ, སཱ་ཧ་སཱ ཝི་ར་ཏོ ཙ་རེ.
༩༥༠. ‘‘པུ་རཱ་ཎཾ ནཱ་བྷི་ན་ནྡེ་ཡྻ, ན་ཝེ ཁ་ནྟིཾ ན ཀུ་བྦ་ཡེ;
ཧི་ཡྻ་མཱ་ནེ ན སོ་ཙེ་ཡྻ, ཨཱ་ཀཱ་སཾ ན སི་ཏོ སི་ཡཱ.
༩༥༡. ‘‘གེ་དྷཾ བྲཱུ་མི མ་ཧོ་གྷོ་ཏི, ཨཱ་ཛ་ཝཾ བྲཱུ་མི ཛ་པྤ་ནཾ;
ཨཱ་ར་མྨ་ཎཾ པ་ཀ་པྤ་ནཾ, ཀཱ་མ་པ་ངྐོ དུ་ར་ཙྩ་ཡོ.
༩༥༢. ‘‘ས་ཙྩཱ ཨ་ཝོ་ཀྐ་མྨ [ཨ་ཝོ་ཀྐ་མཾ (ནི་དྡེ་ས)] མུ་ནི, ཐ་ལེ ཏི་ཊྛ་ཏི བྲཱ་ཧྨ་ཎོ;
ས་བྦཾ སོ [ས་བྦ་སོ (སྱཱ. ཀ.)] པ་ཊི་ནི་སྶ་ཛྫ, ས ཝེ ས་ནྟོ་ཏི ཝུ་ཙྩ་ཏི.
༩༥༣. ‘‘ས ཝེ ཝི་དྭཱ ས ཝེ་ད་གཱུ, ཉ་ཏྭཱ དྷ་མྨཾ ཨ་ནི་སྶི་ཏོ;
ས་མྨཱ སོ ལོ་ཀེ ཨི་རི་ཡཱ་ནོ, ན པི་ཧེ་ཏཱི་དྷ ཀ་སྶ་ཙི.
༩༥༤. ‘‘ཡོ་དྷ ཀཱ་མེ ཨ་ཙྩ་ཏ་རི, ས་ངྒཾ ལོ་ཀེ དུ་ར་ཙྩ་ཡཾ;
ན སོ སོ་ཙ་ཏི ནཱ་ཛ྄ཛྷེ་ཏི, ཚི་ནྣ་སོ་ཏོ ཨ་བ་ནྡྷ་ནོ.
༩༥༥. ‘‘ཡཾ པུ་བྦེ ཏཾ ཝི་སོ་སེ་ཧི, པ་ཙྪཱ ཏེ མཱ་ཧུ ཀི་ཉྩ་ནཾ;
མ་ཛ྄ཛྷེ ཙེ ནོ ག་ཧེ་སྶ་སི, ཨུ་པ་ས་ནྟོ ཙ་རི་སྶ་སི.
༩༥༦. ‘‘ས་བྦ་སོ ནཱ་མ་རཱུ་པ་སྨིཾ, ཡ་སྶ ན་ཏྠི མ་མཱ་ཡི་ཏཾ;
ཨ་ས་ཏཱ ཙ ན སོ་ཙ་ཏི, ས ཝེ ལོ་ཀེ ན ཛཱི་ཡ་ཏི.
༩༥༧. ‘‘ཡ་སྶ ན་ཏྠི ཨི་དཾ མེ་ཏི, པ་རེ་སཾ ཝཱ་པི ཀི་ཉྩ་ནཾ;
མ་མ་ཏྟཾ སོ ཨ་སཾ་ཝི་ནྡཾ, ན་ཏྠི མེ་ཏི ན སོ་ཙ་ཏི.
༩༥༨. ‘‘ཨ་ནི་ཊྛུ་རཱི ཨ་ན་ནུ་གི་དྡྷོ, ཨ་ནེ་ཛོ ས་བྦ་དྷཱི ས་མོ;
ཏ་མཱ་ནི་སཾ་སཾ པ་བྲཱུ་མི, པུ་ཙྪི་ཏོ ཨ་ཝི་ཀ་མྤི་ནཾ.
༩༥༩. ‘‘ཨ་ནེ་ཛ་སྶ ཝི་ཛཱ་ན་ཏོ, ན་ཏྠི ཀཱ་ཙི ནི་ས་ངྑ་ཏི [ནི་ས་ངྑི་ཏི (སཱི. པཱི.)].
ཝི་ར་ཏོ སོ ཝི་ཡཱ་ར་བྦྷཱ, ཁེ་མཾ པ་སྶ་ཏི ས་བྦ་དྷི.
༩༦༠. ‘‘ན ས་མེ་སུ ན ཨོ་མེ་སུ, ན ཨུ་སྶེ་སུ ཝ་ད་ཏེ མུ་ནི;
ས་ནྟོ སོ ཝཱི་ཏ་མ་ཙྪ་རོ, ནཱ་དེ་ཏི ན ནི་ར་སྶ་ཏཱི’’ཏི.
ཨ་ཏྟ་ད་ཎྜ་སུ་ཏྟཾ པ་ནྣ་ར་ས་མཾ ནི་ཊྛི་ཏཾ.