༡༣. མ་ཧཱ་བྱཱུ་ཧ་སུ་ཏྟཾ
༩༠༡. ཡེ ཀེ་ཙི་མེ དི་ཊྛི་པ་རི་བྦ་སཱ་ནཱ, ཨི་ད་མེ་ཝ ས་ཙྩ་ནྟི ཝི་ཝཱ་ད་ཡ་ནྟི [ཝི་ཝཱ་དི་ཡ་ནྟི (སཱི. པཱི.)];
ས་བྦེ་ཝ ཏེ ནི་ནྡ་མ་ནྭཱ་ན་ཡ་ནྟི, ཨ་ཐོ པ་སཾ་ས་མྤི ལ་བྷ་ནྟི ཏ་ཏྠ.
༩༠༢. ཨ་པྤ་ཉྷི ཨེ་ཏཾ ན ཨ་ལཾ ས་མཱ་ཡ, དུ་ཝེ ཝི་ཝཱ་ད་སྶ ཕ་ལཱ་ནི བྲཱུ་མི;
ཨེ་ཏ་མྤི དི་སྭཱ ན ཝི་ཝཱ་ད་ཡེ་ཐ, ཁེ་མཱ་བྷི་པ་སྶཾ ཨ་ཝི་ཝཱ་ད་བྷཱུ་མིཾ.
༩༠༣. ཡཱ ཀཱ་ཙི་མཱ ས་མྨུ་ཏི་ཡོ པུ་ཐུ་ཛྫཱ, ས་བྦཱ་ཝ ཨེ་ཏཱ ན ཨུ་པེ་ཏི ཝི་དྭཱ;
ཨ་ནཱུ་པ་ཡོ སོ ཨུ་པ་ཡཾ ཀི་མེ་ཡྻ, དི་ཊྛེ སུ་ཏེ ཁ་ནྟི་མ་ཀུ་བྦ་མཱ་ནོ.
༩༠༤. སཱི་ལུ་ཏྟ་མཱ ས་ཉྙ་མེ་ནཱ་ཧུ སུ་དྡྷིཾ, ཝ་ཏཾ ས་མཱ་དཱ་ཡ ཨུ་པ་ཊྛི་ཏཱ་སེ;
ཨི་དྷེ་ཝ སི་ཀྑེ་མ ཨ་ཐ་སྶ སུ་དྡྷིཾ, བྷ་ཝཱུ་པ་ནཱི་ཏཱ ཀུ་ས་ལཱ ཝ་དཱ་ནཱ.
༩༠༥. ས་ཙེ ཙུ་ཏོ སཱི་ལ་ཝ་ཏ་ཏོ ཧོ་ཏི, པ་ཝེ་དྷ་ཏཱི [ས ཝེ་དྷ་ཏི (སཱི. པཱི.)] ཀ་མྨ ཝི་རཱ་དྷ་ཡི་ཏྭཱ;
པ་ཛ་པྤ་ཏཱི པ་ཏྠ་ཡ་ཏཱི ཙ སུ་དྡྷིཾ, ས་ཏྠཱ་ཝ ཧཱི་ནོ པ་ཝ་སཾ གྷ་ར་མྷཱ.
༩༠༦. སཱི་ལ་བྦ་ཏཾ ཝཱ་པི པ་ཧཱ་ཡ ས་བྦཾ, ཀ་མྨ་ཉྩ སཱ་ཝ་ཛྫ་ན་ཝ་ཛྫ་མེ་ཏཾ;
སུ་དྡྷིཾ ཨ་སུ་དྡྷི་ནྟི ཨ་པ་ཏྠ་ཡཱ་ནོ, ཝི་ར་ཏོ ཙ་རེ ས་ནྟི་མ་ནུ་གྒ་ཧཱ་ཡ.
༩༠༧. ཏ་མཱུ་པ་ནི་སྶཱ་ཡ ཛི་གུ་ཙྪི་ཏཾ ཝཱ, ཨ་ཐ་ཝཱ་པི དི་ཊྛཾ ཝ སུ་ཏཾ མུ་ཏཾ ཝཱ;
ཨུ་དྡྷཾ་ས་རཱ སུ་དྡྷི་མ་ནུ་ཏྠུ་ན་ནྟི, ཨ་ཝཱི་ཏ་ཏ་ཎྷཱ་སེ བྷ་ཝཱ་བྷ་ཝེ་སུ.
༩༠༨. པ་ཏྠ་ཡ་མཱ་ན་སྶ ཧི ཛ་པྤི་ཏཱ་ནི, པ་ཝེ་དྷི་ཏཾ ཝཱ་པི པ་ཀ་པྤི་ཏེ་སུ;
ཙུ་ཏཱུ་པ་པཱ་ཏོ ཨི་དྷ ཡ་སྶ ན་ཏྠི, ས ཀེ་ན ཝེ་དྷེ་ཡྻ ཀུ་ཧིཾ་ཝ ཛ་པྤེ [ཀུ་ཧི་ཉྩི ཛ་པྤེ (སཱི. སྱཱ. ཀ.), ཀུ་ཧིཾ པ་ཛ་པྤེ (པཱི.) ནི་དྡེ་སོ པ་སྶི་ཏ་བྦོ].
༩༠༩. ཡ་མཱ་ཧུ དྷ་མྨཾ པ་ར་མ་ནྟི ཨེ་ཀེ, ཏ་མེ་ཝ ཧཱི་ན་ནྟི པ་ནཱ་ཧུ ཨ་ཉྙེ;
ས་ཙྩོ ནུ ཝཱ་དོ ཀ་ཏ་མོ ཨི་མེ་སཾ, ས་བྦེ་ཝ ཧཱི་མེ ཀུ་ས་ལཱ ཝ་དཱ་ནཱ.
༩༡༠. ས་ཀ་ཉྷི དྷ་མྨཾ པ་རི་པུ་ཎྞ་མཱ་ཧུ, ཨ་ཉྙ་སྶ དྷ་མྨཾ པ་ན ཧཱི་ན་མཱ་ཧུ;
ཨེ་ཝ་མྤི ཝི་གྒ་ཡ྄ཧ ཝི་ཝཱ་ད་ཡ་ནྟི, ས་ཀཾ ས་ཀཾ ས་མྨུ་ཏི་མཱ་ཧུ ས་ཙྩཾ.
༩༡༡. པ་ར་སྶ ཙེ ཝ་མྦྷ་ཡི་ཏེ་ན ཧཱི་ནོ, ན ཀོ་ཙི དྷ་མྨེ་སུ ཝི་སེ་སི ཨ་སྶ;
པུ་ཐཱུ ཧི ཨ་ཉྙ་སྶ ཝ་ད་ནྟི དྷ་མྨཾ, ནི་ཧཱི་ན་ཏོ ས་མྷི ད་ལ༹ྷཾ ཝ་དཱ་ནཱ.
༩༡༢. ས་དྡྷ་མྨ་པཱུ་ཛཱ་པི ནེ་སཾ ཏ་ཐེ་ཝ, ཡ་ཐཱ པ་སཾ་ས་ནྟི ས་ཀཱ་ཡ་ནཱ་ནི;
ས་བྦེ་ཝ ཝཱ་དཱ [ས་བྦེ པ་ཝཱ་དཱ (སྱཱ.)] ཏ་ཐི་ཡཱ [ཏ་ཐི་ཝཱ (ས་བྦ་ཏྠ)] བྷ་ཝེ་ཡྻུཾ, སུ་དྡྷཱི ཧི ནེ་སཾ པ་ཙྩ་ཏྟ་མེ་ཝ.
༩༡༣. ན བྲཱ་ཧྨ་ཎ་སྶ པ་ར་ནེ་ཡྻ་མ་ཏྠི, དྷ་མྨེ་སུ ནི་ཙྪེ་ཡྻ ས་མུ་གྒ་ཧཱི་ཏཾ;
ཏ་སྨཱ ཝི་ཝཱ་དཱ་ནི ཨུ་པཱ་ཏི་ཝ་ཏྟོ, ན ཧི སེ་ཊྛ་ཏོ པ་སྶ་ཏི དྷ་མྨ་མ་ཉྙཾ.
༩༡༤. ཛཱ་ནཱ་མི པ་སྶཱ་མི ཏ་ཐེ་ཝ ཨེ་ཏཾ, དི་ཊྛི་ཡཱ ཨེ་ཀེ པ་ཙྩེ་ནྟི སུ་དྡྷིཾ;
ཨ་དྡ་ཀྑི ཙེ ཀི་ཉྷི ཏུ་མ་སྶ ཏེ་ན, ཨ་ཏི་སི་ཏྭཱ ཨ་ཉྙེ་ན ཝ་ད་ནྟི སུ་དྡྷིཾ.
༩༡༥. པ་སྶཾ ན་རོ ད་ཀྑ་ཏི [ད་ཀྑི་ཏི (སཱི.)] ནཱ་མ་རཱུ་པཾ, དི་སྭཱ་ན ཝཱ ཉ་སྶ་ཏི ཏཱ་ནི་མེ་ཝ;
ཀཱ་མཾ བ་ཧུཾ པ་སྶ་ཏུ ཨ་པྤ་ཀཾ ཝཱ, ན ཧི ཏེ་ན སུ་དྡྷིཾ ཀུ་ས་ལཱ ཝ་ད་ནྟི.
༩༡༦. ནི་ཝི་སྶ་ཝཱ་དཱི ན ཧི སུ་བྦི་ནཱ་ཡོ, པ་ཀ་པྤི་ཏཾ དི་ཊྛི པུ་རེ་ཀྑ་རཱ་ནོ;
ཡཾ ནི་སྶི་ཏོ ཏ་ཏྠ སུ་བྷཾ ཝ་དཱ་ནོ, སུ་དྡྷིཾ་ཝ་དོ ཏ་ཏྠ ཏ་ཐ་དྡ་སཱ སོ.
༩༡༧. ན བྲཱ་ཧྨ་ཎོ ཀ་པྤ་མུ་པེ་ཏི ས་ངྑཱ [ས་ངྑཾ (སཱི. སྱཱ. པཱི.)], ན དི་ཊྛི་སཱ་རཱི ན་པི ཉཱ་ཎ་བ་ནྡྷུ;
ཉ་ཏྭཱ ཙ སོ ས་མྨུ་ཏི་ཡོ [ས་མྨ་ཏི་ཡོ (སྱཱ.)] པུ་ཐུ་ཛྫཱ, ཨུ་པེ་ཀྑ་ཏཱི ཨུ་གྒ་ཧ་ཎ་ནྟི མ་ཉྙེ.
༩༡༨. ཝི་སྶ་ཛྫ ག་ནྠཱ་ནི མུ་ནཱི་དྷ ལོ་ཀེ, ཝི་ཝཱ་ད་ཛཱ་ཏེ་སུ ན ཝ་གྒ་སཱ་རཱི;
ས་ནྟོ ཨ་ས་ནྟེ་སུ ཨུ་པེ་ཀྑ་ཀོ སོ, ཨ་ནུ་གྒ་ཧོ ཨུ་གྒ་ཧ་ཎ་ནྟི མ་ཉྙེ.
༩༡༩. པུ་བྦཱ་ས་ཝེ ཧི་ཏྭཱ ན་ཝེ ཨ་ཀུ་བྦཾ, ན ཚ་ནྡ་གཱུ ནོ་པི ནི་ཝི་སྶ་ཝཱ་དཱི;
ས ཝི་པྤ་མུ་ཏྟོ དི་ཊྛི་ག་ཏེ་ཧི དྷཱི་རོ, ན ལི་མྤ་ཏི [ན ལི་པྤ་ཏི (སཱི. པཱི.)] ལོ་ཀེ ཨ་ན་ཏྟ་ག་ར་ཧཱི.
༩༢༠. ས ས་བྦ་དྷ་མྨེ་སུ ཝི་སེ་ནི་བྷཱུ་ཏོ, ཡཾ ཀི་ཉྩི དི་ཊྛཾ ཝ སུ་ཏཾ མུ་ཏཾ ཝཱ;
ས པ་ནྣ་བྷཱ་རོ མུ་ནི ཝི་པྤ་མུ་ཏྟོ, ན ཀ་པྤི་ཡོ ནཱུ་པ་ར་ཏོ ན པ་ཏྠི་ཡོ་ཏི.
མ་ཧཱ་བྱཱུ་ཧ་སུ་ཏྟཾ ཏེ་ར་ས་མཾ ནི་ཊྛི་ཏཾ.