༡༢. ཙཱུ་ལ༹་བྱཱུ་ཧ་སུ་ཏྟཾ [ཙཱུ་ལ༹་ཝི་ཡཱུ་ཧ་སུ་ཏྟཾ (སཱི. སྱཱ. ནི་དྡེ་ས)]
༨༨༤. ས་ཀཾ་ས་ཀཾ་དི་ཊྛི་པ་རི་བྦ་སཱ་ནཱ, ཝི་གྒ་ཡ྄ཧ ནཱ་ནཱ ཀུ་ས་ལཱ ཝ་ད་ནྟི;
ཡོ ཨེ་ཝཾ ཛཱ་ནཱ་ཏི ས ཝེ་དི དྷ་མྨཾ, ཨི་དཾ པ་ཊི་ཀྐོ་ས་མ་ཀེ་ཝ་ལཱི སོ.
༨༨༥. ཨེ་ཝ་མྤི ཝི་གྒ་ཡ྄ཧ ཝི་ཝཱ་ད་ཡ་ནྟི, བཱ་ལོ པ་རོ ཨ་ཀྐུ་ས་ལོ་ཏི [ཨ་ཀུ་ས་ལོ་ཏི (སཱི. སྱཱ. པཱི.)] ཙཱ་ཧུ;
ས་ཙྩོ ནུ ཝཱ་དོ ཀ་ཏ་མོ ཨི་མེ་སཾ, ས་བྦེ་ཝ ཧཱི་མེ ཀུ་ས་ལཱ ཝ་དཱ་ནཱ.
༨༨༦. པ་ར་སྶ ཙེ དྷ་མྨ་མ་ནཱ་ནུ་ཛཱ་ནཾ, བཱ་ལོ་མ་ཀོ [བཱ་ལོ མ་གོ (སཱི. སྱཱ. ཀ.)] ཧོ་ཏི ནི་ཧཱི་ན་པ་ཉྙོ;
ས་བྦེ་ཝ བཱ་ལཱ སུ་ནི་ཧཱི་ན་པ་ཉྙཱ, ས་བྦེ་ཝི་མེ དི་ཊྛི་པ་རི་བྦ་སཱ་ནཱ.
༨༨༧. ས་ནྡི་ཊྛི་ཡཱ ཙེ་ཝ ན ཝཱི་ཝ་དཱ་ཏཱ, སཾ་སུ་དྡྷ་པ་ཉྙཱ ཀུ་ས་ལཱ མུ་ཏཱི་མཱ;
ན ཏེ་སཾ ཀོ་ཙི པ་རི་ཧཱི་ན་པ་ཉྙོ [ཀོ་ཙི་པི ནི་ཧཱི་ན་པ་ཉྙོ (སཱི. སྱཱ. ཀ.)], དི་ཊྛཱི ཧི ཏེ་ས་མྤི ཏ་ཐཱ ས་མ་ཏྟཱ.
༨༨༨. ན ཝཱ་ཧ་མེ་ཏཾ ཏ་ཐི་ཡ་ནྟི [ཏ་ཐི་ཝ་ནྟི (སྱཱ. ཀ.)] བྲཱུ་མི, ཡ་མཱ་ཧུ བཱ་ལཱ མི་ཐུ ཨ་ཉྙ་མ་ཉྙཾ;
ས་ཀཾ་ས་ཀཾ་དི་ཊྛི་མ་ཀཾ་སུ ས་ཙྩཾ, ཏ་སྨཱ ཧི བཱ་ལོ་ཏི པ་རཾ ད་ཧ་ནྟི.
༨༨༩. ཡ་མཱ་ཧུ ས་ཙྩཾ ཏ་ཐི་ཡ་ནྟི ཨེ་ཀེ, ཏ་མཱ་ཧུ ཨ་ཉྙེ [ཨ་ཉྙེ་པི (སྱཱ.), ཨ་ཉྙེ ཙ (?)] ཏུ་ཙྪཾ མུ་སཱ་ཏི;
ཨེ་ཝ་མྤི ཝི་ག་ཡ྄ཧ ཝི་ཝཱ་ད་ཡ་ནྟི, ཀ་སྨཱ ན ཨེ་ཀཾ ས་མ་ཎཱ ཝ་ད་ནྟི.
༨༩༠. ཨེ་ཀ་ཉྷི ས་ཙྩཾ ན དུ་ཏཱི་ཡ་མ་ཏྠི, ཡ་སྨིཾ པ་ཛཱ ནོ ཝི་ཝ་དེ པ་ཛཱ་ནཾ;
ནཱ་ནཱ ཏེ [ནཱ་ནཱ་ཏོ (ཀ.)] ས་ཙྩཱ་ནི ས་ཡཾ ཐུ་ན་ནྟི, ཏ་སྨཱ ན ཨེ་ཀཾ ས་མ་ཎཱ ཝ་ད་ནྟི.
༨༩༡. ཀ་སྨཱ ནུ ས་ཙྩཱ་ནི ཝ་ད་ནྟི ནཱ་ནཱ, པ་ཝཱ་དི་ཡཱ་སེ ཀུ་ས་ལཱ ཝ་དཱ་ནཱ;
ས་ཙྩཱ་ནི སུ་ཏཱ་ནི བ་ཧཱུ་ནི ནཱ་ནཱ, ཨུ་དཱ་ཧུ ཏེ ཏ་ཀྐ་མ་ནུ་སྶ་ར་ནྟི.
༨༩༢. ན ཧེ་ཝ ས་ཙྩཱ་ནི བ་ཧཱུ་ནི ནཱ་ནཱ, ཨ་ཉྙ་ཏྲ ས་ཉྙཱ་ཡ ནི་ཙྩཱ་ནི ལོ་ཀེ;
ཏ་ཀྐ་ཉྩ དི་ཊྛཱི་སུ པ་ཀ་པྤ་ཡི་ཏྭཱ, ས་ཙྩཾ མུ་སཱ་ཏི དྭ་ཡ་དྷ་མྨ་མཱ་ཧུ.
༨༩༣. དི་ཊྛེ སུ་ཏེ སཱི་ལ་ཝ་ཏེ མུ་ཏེ ཝཱ, ཨེ་ཏེ ཙ ནི་སྶཱ་ཡ ཝི་མཱ་ན་ད་སྶཱི;
ཝི་ནི་ཙྪ་ཡེ ཋ་ཏྭཱ པ་ཧ་སྶ་མཱ་ནོ, བཱ་ལོ པ་རོ ཨ་ཀྐུ་ས་ལོ་ཏི ཙཱ་ཧ.
༨༩༤. ཡེ་ནེ་ཝ བཱ་ལོ་ཏི པ་རཾ ད་ཧཱ་ཏི, ཏེ་ནཱ་ཏུ་མཱ་ནཾ ཀུ་ས་ལོ་ཏི ཙཱ་ཧ;
ས་ཡ་མ་ཏྟ་ནཱ སོ ཀུ་ས་ལོ ཝ་དཱ་ནོ, ཨ་ཉྙཾ ཝི་མཱ་ནེ་ཏི ཏ་དེ་ཝ པཱ་ཝ.
༨༩༥. ཨ་ཏི་སཱ་ར་དི་ཊྛི་ཡཱ་ཝ སོ ས་མ་ཏྟོ, མཱ་ནེ་ན མ་ཏྟོ པ་རི་པུ་ཎྞ་མཱ་ནཱི;
ས་ཡ་མེ་ཝ སཱ་མཾ མ་ན་སཱ་བྷི་སི་ཏྟོ, དི་ཊྛཱི ཧི སཱ ཏ་སྶ ཏ་ཐཱ ས་མ་ཏྟཱ.
༨༩༦. པ་ར་སྶ ཙེ ཧི ཝ་ཙ་སཱ ནི་ཧཱི་ནོ, ཏུ་མོ ས་ཧཱ ཧོ་ཏི ནི་ཧཱི་ན་པ་ཉྙོ;
ཨ་ཐ ཙེ ས་ཡཾ ཝེ་ད་གཱུ ཧོ་ཏི དྷཱི་རོ, ན ཀོ་ཙི བཱ་ལོ ས་མ་ཎེ་སུ ཨ་ཏྠི.
༨༩༧. ཨ་ཉྙཾ ཨི་ཏོ ཡཱ་བྷི་ཝ་ད་ནྟི དྷ་མྨཾ, ཨ་པ་ར་དྡྷཱ སུ་དྡྷི་མ་ཀེ་ཝ་ལཱི ཏེ [སུ་དྡྷི་མ་ཀེ་ཝ་ལཱི་ནོ (སཱི.)];
ཨེ་ཝ་མྤི ཏི་ཏྠྱཱ པུ་ཐུ་སོ ཝ་ད་ནྟི, ས་ནྡི་ཊྛི་རཱ་གེ་ན ཧི ཏེ་བྷི་ར་ཏྟཱ [ཏྱཱ་བྷི་ར་ཏྟཱ (སྱཱ. ཀ.)].
༨༩༨. ཨི་དྷེ་ཝ སུ་དྡྷི ཨི་ཏི ཝཱ་ད་ཡ་ནྟི, ནཱ་ཉྙེ་སུ དྷ་མྨེ་སུ ཝི་སུ་དྡྷི་མཱ་ཧུ;
ཨེ་ཝ་མྤི ཏི་ཏྠྱཱ པུ་ཐུ་སོ ནི་ཝི་ཊྛཱ, ས་ཀཱ་ཡ་ནེ ཏ་ཏྠ ད་ལ༹ྷཾ ཝ་དཱ་ནཱ.
༨༩༩. ས་ཀཱ་ཡ་ནེ ཝཱ་པི ད་ལ༹ྷཾ ཝ་དཱ་ནོ, ཀ་མེ་ཏྠ བཱ་ལོ་ཏི པ་རཾ ད་ཧེ་ཡྻ;
ས་ཡ་མེ་ཝ སོ མེ་དྷ་ག་མཱ་ཝ་ཧེ་ཡྻ [མེ་དྷ་ཀཾ ཨཱ་ཝ་ཧེ་ཡྻ (སཱི. པཱི.)], པ་རཾ ཝ་དཾ བཱ་ལ་མ་སུ་དྡྷི་དྷ་མྨཾ.
༩༠༠. ཝི་ནི་ཙྪ་ཡེ ཋ་ཏྭཱ ས་ཡཾ པ་མཱ་ཡ, ཨུ་དྡྷཾ ས [ཨུ་དྡཾ སོ (སཱི. སྱཱ. པཱི.)] ལོ་ཀ་སྨིཾ ཝི་ཝཱ་ད་མེ་ཏི;
ཧི་ཏྭཱ་ན ས་བྦཱ་ནི ཝི་ནི་ཙྪ་ཡཱ་ནི, ན མེ་དྷ་གཾ ཀུ་བྦ་ཏི ཛ་ནྟུ ལོ་ཀེ་ཏི.
ཙཱུ་ལ༹་བྱཱུ་ཧ་སུ་ཏྟཾ དྭཱ་ད་ས་མཾ ནི་ཊྛི་ཏཾ.