༡༡. ཀ་ལ་ཧ་ཝི་ཝཱ་ད་སུ་ཏྟཾ
༨༦༨. ‘‘ཀུ་ཏོ་པ་ཧཱུ་ཏཱ ཀ་ལ་ཧཱ ཝི་ཝཱ་དཱ, པ་རི་དེ་ཝ་སོ་ཀཱ ས་ཧ་མ་ཙྪ་རཱ ཙ;
མཱ་ནཱ་ཏི་མཱ་ནཱ ས་ཧ་པེ་སུ་ཎཱ ཙ, ཀུ་ཏོ་པ་ཧཱུ་ཏཱ ཏེ ཏ་དི་ངྒྷ བྲཱུ་ཧི’’.
༨༦༩. ‘‘པི་ཡ་པྤ་ཧཱུ་ཏཱ ཀ་ལ་ཧཱ ཝི་ཝཱ་དཱ,
པ་རི་དེ་ཝ་སོ་ཀཱ ས་ཧ་མ་ཙྪ་རཱ ཙ;
མཱ་ནཱ་ཏི་མཱ་ནཱ ས་ཧ་པེ་སུ་ཎཱ ཙ,
མ་ཙྪེ་ར་ཡུ་ཏྟཱ ཀ་ལ་ཧཱ ཝི་ཝཱ་དཱ;
ཝི་ཝཱ་ད་ཛཱ་ཏེ་སུ ཙ པེ་སུ་ཎཱ་ནི’’.
༨༧༠. ‘‘པི་ཡཱ སུ [པི་ཡཱ་ནུ (སྱཱ.), པི་ཡ་སྶུ (ཀ.)] ལོ་ཀ་སྨིཾ ཀུ་ཏོ་ནི་དཱ་ནཱ, ཡེ ཙཱ་པི [ཡེ ཝཱ་པི (སཱི. སྱཱ. པཱི.)] ལོ་བྷཱ ཝི་ཙ་ར་ནྟི ལོ་ཀེ;
ཨཱ་སཱ ཙ ནི་ཊྛཱ ཙ ཀུ་ཏོ་ནི་དཱ་ནཱ, ཡེ ས་མྤ་རཱ་ཡཱ་ཡ ན་ར་སྶ ཧོ་ནྟི’’.
༨༧༡. ‘‘ཚ་ནྡཱ་ནི་དཱ་ནཱ་ནི པི་ཡཱ་ནི ལོ་ཀེ, ཡེ ཙཱ་པི ལོ་བྷཱ ཝི་ཙ་ར་ནྟི ལོ་ཀེ;
ཨཱ་སཱ ཙ ནི་ཊྛཱ ཙ ཨི་ཏོ་ནི་དཱ་ནཱ, ཡེ ས་མྤ་རཱ་ཡཱ་ཡ ན་ར་སྶ ཧོ་ནྟི’’.
༨༧༢. ‘‘ཚ་ནྡོ ནུ ལོ་ཀ་སྨིཾ ཀུ་ཏོ་ནི་དཱ་ནོ, ཝི་ནི་ཙྪ་ཡཱ ཙཱ་པི [ཝཱ་པི (སཱི. སྱཱ. པཱི.)] ཀུ་ཏོ་པ་ཧཱུ་ཏཱ;
ཀོ་དྷོ མོ་ས་ཝ་ཛྫ་ཉྩ ཀ་ཐཾ་ཀ་ཐཱ ཙ, ཡེ ཝཱ་པི དྷ་མྨཱ ས་མ་ཎེ་ན ཝུ་ཏྟཱ’’.
༨༧༣. ‘‘སཱ་ཏཾ ཨ་སཱ་ཏ་ནྟི ཡ་མཱ་ཧུ ལོ་ཀེ, ཏ་མཱུ་པ་ནི་སྶཱ་ཡ པ་ཧོ་ཏི ཚ་ནྡོ;
རཱུ་པེ་སུ དི་སྭཱ ཝི་བྷ་ཝཾ བྷ་ཝ་ཉྩ, ཝི་ནི་ཙྪ་ཡཾ ཀུ་བྦ་ཏི [ཀུ་རུ་ཏེ (བ་ཧཱུ་སུ)] ཛ་ནྟུ ལོ་ཀེ.
༨༧༤. ‘‘ཀོ་དྷོ མོ་ས་ཝ་ཛྫ་ཉྩ ཀ་ཐཾ་ཀ་ཐཱ ཙ, ཨེ་ཏེ་པི དྷ་མྨཱ དྭ་ཡ་མེ་ཝ ས་ནྟེ;
ཀ་ཐཾ་ཀ་ཐཱི ཉཱ་ཎ་པ་ཐཱ་ཡ སི་ཀྑེ, ཉ་ཏྭཱ པ་ཝུ་ཏྟཱ ས་མ་ཎེ་ན དྷ་མྨཱ’’.
༨༧༥. ‘‘སཱ་ཏཾ ཨ་སཱ་ཏ་ཉྩ ཀུ་ཏོ་ནི་དཱ་ནཱ, ཀི་སྨིཾ ཨ་ས་ནྟེ ན བྷ་ཝ་ནྟི ཧེ་ཏེ;
ཝི་བྷ་ཝཾ བྷ་ཝ་ཉྩཱ་པི ཡ་མེ་ཏ་མ་ཏྠཾ, ཨེ་ཏཾ མེ པ་བྲཱུ་ཧི ཡ་ཏོ་ནི་དཱ་ནཾ’’.
༨༧༦. ‘‘ཕ་སྶ་ནི་དཱ་ནཾ སཱ་ཏཾ ཨ་སཱ་ཏཾ, ཕ་སྶེ ཨ་ས་ནྟེ ན བྷ་ཝ་ནྟི ཧེ་ཏེ;
ཝི་བྷ་ཝཾ བྷ་ཝ་ཉྩཱ་པི ཡ་མེ་ཏ་མ་ཏྠཾ, ཨེ་ཏཾ ཏེ པ་བྲཱུ་མི ཨི་ཏོ་ནི་དཱ་ནཾ’’.
༨༧༧. ‘‘ཕ་སྶོ ནུ ལོ་ཀ་སྨི ཀུ་ཏོ་ནི་དཱ་ནོ, པ་རི་གྒ་ཧཱ ཙཱ་པི ཀུ་ཏོ་པ་ཧཱུ་ཏཱ;
ཀི་སྨིཾ ཨ་ས་ནྟེ ན མ་མ་ཏྟ་མ་ཏྠི, ཀི་སྨིཾ ཝི་བྷཱུ་ཏེ ན ཕུ་ས་ནྟི ཕ་སྶཱ’’.
༨༧༨. ‘‘ནཱ་མ་ཉྩ རཱུ་པ་ཉྩ པ་ཊི་ཙྩ ཕ་སྶོ, ཨི་ཙྪཱ་ནི་དཱ་ནཱ་ནི པ་རི་གྒ་ཧཱ་ནི;
ཨི་ཙྪཱ་ཡ་ས་ནྟྱཱ ན མ་མ་ཏྟ་མ་ཏྠི, རཱུ་པེ ཝི་བྷཱུ་ཏེ ན ཕུ་ས་ནྟི ཕ་སྶཱ’’.
༨༧༩. ‘‘ཀ་ཐཾ་ས་མེ་ཏ་སྶ ཝི་བྷོ་ཏི རཱུ་པཾ, སུ་ཁཾ དུ་ཁ་ཉྩཱ་པི [དུ་ཁཾ ཝཱ་པི (སཱི. སྱཱ.)] ཀ་ཐཾ ཝི་བྷོ་ཏི;
ཨེ་ཏཾ མེ པ་བྲཱུ་ཧི ཡ་ཐཱ ཝི་བྷོ་ཏི, ཏཾ ཛཱ་ནི་ཡཱ་མཱ་ཏི [ཛཱ་ནི་སྶཱ་མཱ་ཏི (སཱི. ཀ.)] མེ མ་ནོ ཨ་ཧུ’’.
༨༨༠. ‘‘ན ས་ཉྙ་ས་ཉྙཱི ན ཝི་ས་ཉྙ་ས་ཉྙཱི, ནོ་པི ཨ་ས་ཉྙཱི ན ཝི་བྷཱུ་ཏ་ས་ཉྙཱི;
ཨེ་ཝཾ་ས་མེ་ཏ་སྶ ཝི་བྷོ་ཏི རཱུ་པཾ, ས་ཉྙཱ་ནི་དཱ་ནཱ ཧི པ་པ་ཉྩ་ས་ངྑཱ’’.
༨༨༡. ‘‘ཡཾ ཏཾ ཨ་པུ་ཙྪི་མྷ ཨ་ཀི་ཏྟ་ཡཱི ནོ,
ཨ་ཉྙཾ ཏཾ པུ་ཙྪཱ་མ ཏ་དི་ངྒྷ བྲཱུ་ཧི;
ཨེ་ཏྟཱ་ཝ་ཏ་གྒཾ ནུ [ནོ (སཱི. སྱཱ.)] ཝ་ད་ནྟི ཧེ་ཀེ,
ཡ་ཀྑ་སྶ སུ་དྡྷིཾ ཨི་དྷ པ་ཎྜི་ཏཱ་སེ;
ཨུ་དཱ་ཧུ ཨ་ཉྙ་མྤི ཝ་ད་ནྟི ཨེ་ཏྟོ.
༨༨༢. ‘‘ཨེ་ཏྟཱ་ཝ་ཏ་གྒ་མྤི ཝ་ད་ནྟི ཧེ་ཀེ, ཡ་ཀྑ་སྶ སུ་དྡྷིཾ ཨི་དྷ པ་ཎྜི་ཏཱ་སེ;
ཏེ་སཾ པ་ནེ་ཀེ ས་མ་ཡཾ ཝ་ད་ནྟི, ཨ་ནུ་པཱ་དི་སེ་སེ ཀུ་ས་ལཱ ཝ་དཱ་ནཱ.
༨༨༣. ‘‘ཨེ་ཏེ ཙ ཉ་ཏྭཱ ཨུ་པ་ནི་སྶི་ཏཱ་ཏི, ཉ་ཏྭཱ མུ་ནཱི ནི་སྶ་ཡེ སོ ཝི་མཾ་སཱི;
ཉ་ཏྭཱ ཝི་མུ་ཏྟོ ན ཝི་ཝཱ་ད་མེ་ཏི, བྷ་ཝཱ་བྷ་ཝཱ་ཡ ན ས་མེ་ཏི དྷཱི་རོ’’ཏི.
ཀ་ལ་ཧ་ཝི་ཝཱ་ད་སུ་ཏྟཾ ཨེ་ཀཱ་ད་ས་མཾ ནི་ཊྛི་ཏཾ.