༡༠. པུ་རཱ་བྷེ་ད་སུ་ཏྟཾ
༨༥༤. ‘‘ཀ་ཐཾ་ད་སྶཱི ཀ་ཐཾ་སཱི་ལོ, ཨུ་པ་ས་ནྟོ་ཏི ཝུ་ཙྩ་ཏི;
ཏཾ མེ གོ་ཏ་མ པ་བྲཱུ་ཧི, པུ་ཙྪི་ཏོ ཨུ་ཏྟ་མཾ ན་རཾ’’.
༨༥༥. ‘‘ཝཱི་ཏ་ཏ་ཎྷོ པུ་རཱ བྷེ་དཱ, (ཨི་ཏི བྷ་ག་ཝཱ) པུ་བྦ་མ་ནྟ་མ་ནི་སྶི་ཏོ;
ཝེ་མ་ཛ྄ཛྷེ ནུ་པ་ས་ངྑེ་ཡྻོ, ཏ་སྶ ན་ཏྠི པུ་ར་ཀྑ་ཏཾ.
༨༥༦. ‘‘ཨ་ཀྐོ་དྷ་ནོ ཨ་ས་ནྟཱ་སཱི, ཨ་ཝི་ཀ་ཏྠཱི ཨ་ཀུ་ཀྐུ་ཙོ;
མ་ནྟ་བྷཱ་ཎཱི [མ་ནྟཱ་བྷཱ་ཎཱི (སྱཱ. པཱི.)] ཨ་ནུ་དྡྷ་ཏོ, ས ཝེ ཝཱ་ཙཱ་ཡ་ཏོ མུ་ནི.
༨༥༧. ‘‘ནི་རཱ་ས་ཏྟི ཨ་ནཱ་ག་ཏེ, ཨ་ཏཱི་ཏཾ ནཱ་ནུ་སོ་ཙ་ཏི;
ཝི་ཝེ་ཀ་ད་སྶཱི ཕ་སྶེ་སུ, དི་ཊྛཱི་སུ ཙ ན ནཱི་ཡ་ཏི [ནི་ཡྻ་ཏི (བ་ཧཱུ་སུ)].
༨༥༨. ‘‘པ་ཏི་ལཱི་ནོ ཨ་ཀུ་ཧ་ཀོ, ཨ་པི་ཧཱ་ལུ ཨ་མ་ཙྪ་རཱི;
ཨ་པྤ་ག་བྦྷོ ཨ་ཛེ་གུ་ཙྪོ, པེ་སུ་ཎེ་ཡྻེ ཙ ནོ ཡུ་ཏོ.
༨༥༩. ‘‘སཱ་ཏི་ཡེ་སུ ཨ་ན་སྶཱ་ཝཱི, ཨ་ཏི་མཱ་ནེ ཙ ནོ ཡུ་ཏོ;
ས་ཎྷོ ཙ པ་ཊི་བྷཱ་ན་ཝཱ [པ་ཊི་བྷཱ་ཎ་ཝཱ (སྱཱ. པཱི.)], ན ས་དྡྷོ ན ཝི་ར་ཛྫ་ཏི.
༨༦༠. ‘‘ལཱ་བྷ་ཀ་མྱཱ ན སི་ཀྑ་ཏི, ཨ་ལཱ་བྷེ ཙ ན ཀུ་པྤ་ཏི;
ཨ་ཝི་རུ་དྡྷོ ཙ ཏ་ཎྷཱ་ཡ, ར་སེ་སུ ནཱ་ནུ་གི་ཛ྄ཛྷ་ཏི.
༨༦༡. ‘‘ཨུ་པེ་ཀྑ་ཀོ ས་དཱ ས་ཏོ, ན ལོ་ཀེ མ་ཉྙ་ཏེ ས་མཾ;
ན ཝི་སེ་སཱི ན ནཱི་ཙེ་ཡྻོ, ཏ་སྶ ནོ ས་ནྟི ཨུ་སྶ་དཱ.
༨༦༢. ‘‘ཡ་སྶ ནི་སྶ་ཡ་ནཱ [ནི་སྶ་ཡ་ཏཱ (སཱི. སྱཱ. པཱི.)] ན་ཏྠི, ཉ་ཏྭཱ དྷ་མྨཾ ཨ་ནི་སྶི་ཏོ;
བྷ་ཝཱ་ཡ ཝི་བྷ་ཝཱ་ཡ ཝཱ, ཏ་ཎྷཱ ཡ་སྶ ན ཝི་ཛྫ་ཏི.
༨༦༣. ‘‘ཏཾ བྲཱུ་མི ཨུ་པ་ས་ནྟོ་ཏི, ཀཱ་མེ་སུ ཨ་ན་པེ་ཀྑི་ནཾ;
ག་ནྠཱ ཏ་སྶ ན ཝི་ཛྫ་ནྟི, ཨ་ཏ་རཱི སོ ཝི་ས་ཏྟི་ཀཾ.
༨༦༤. ‘‘ན ཏ་སྶ པུ་ཏྟཱ པ་ས་ཝོ, ཁེ་ཏྟཾ ཝ་ཏྠུ་ཉྩ ཝི་ཛྫ་ཏི;
ཨ་ཏྟཱ ཝཱ་པི ནི་ར་ཏྟཱ ཝཱ [ཨ་ཏྟཾ ཝཱ་པི ནི་ར་ཏྟཾ ཝཱ (བ་ཧཱུ་སུ)], ན ཏ་སྨིཾ ཨུ་པ་ལ་བྦྷ་ཏི.
༨༦༥. ‘‘ཡེ་ན ནཾ ཝ་ཛྫུཾ པུ་ཐུ་ཛྫ་ནཱ, ཨ་ཐོ ས་མ་ཎ་བྲཱ་ཧྨ་ཎཱ;
ཏཾ ཏ་སྶ ཨ་པུ་ར་ཀྑ་ཏཾ, ཏ་སྨཱ ཝཱ་དེ་སུ ནེ་ཛ་ཏི.
༨༦༦. ‘‘ཝཱི་ཏ་གེ་དྷོ ཨ་མ་ཙྪ་རཱི, ན ཨུ་སྶེ་སུ ཝ་ད་ཏེ མུ་ནི;
ན ས་མེ་སུ ན ཨོ་མེ་སུ, ཀ་པྤཾ ནེ་ཏི ཨ་ཀ་པྤི་ཡོ.
༨༦༧. ‘‘ཡ་སྶ ལོ་ཀེ ས་ཀཾ ན་ཏྠི, ཨ་ས་ཏཱ ཙ ན སོ་ཙ་ཏི;
དྷ་མྨེ་སུ ཙ ན ག་ཙྪ་ཏི, ས ཝེ ས་ནྟོ་ཏི ཝུ་ཙྩ་ཏཱི’’ཏི.
པུ་རཱ་བྷེ་ད་སུ་ཏྟཾ ད་ས་མཾ ནི་ཊྛི་ཏཾ.