༥. མཱ་གྷ་སུ་ཏྟཾ

ཨེ་ཝཾ མེ སུ་ཏཾ – ཨེ་ཀ ས་མ་ཡཾ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི གི་ཛ྄ཛྷ་ཀཱུ་ཊེ པ་བྦ་ཏེ. ཨ་ཐ ཁོ མཱ་གྷོ མཱ་ཎ་ཝོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ཏཱ ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ མཱ་གྷོ མཱ་ཎ་ཝོ བྷ་ག་ཝ་ནྟཾ ཨེ་ཏ་ད་ཝོ་ཙ –

‘‘ཨ་ཧ་ཉྷི, བྷོ གོ་ཏ་མ, དཱ་ཡ་ཀོ དཱ་ན་པ་ཏི ཝ་ད་ཉྙཱུ ཡཱ་ཙ་ཡོ་གོ; དྷ་མྨེ་ན བྷོ་གེ པ་རི་ཡེ་སཱ་མི; དྷ་མྨེ་ན བྷོ་གེ པ་རི་ཡེ་སི་ཏྭཱ དྷ་མྨ་ལ་དྡྷེ་ཧི བྷོ་གེ་ཧི དྷ་མྨཱ་དྷི་ག་ཏེ་ཧི ཨེ་ཀ་སྶ་པི ད་དཱ་མི དྭི་ནྣ་མྤི ཏི་ཎྞ་མྤི ཙ་ཏུ་ནྣ་མྤི པ་ཉྩ་ནྣ་མྤི ཚ་ནྣ་མྤི ས་ཏྟ་ནྣ་མྤི ཨ་ཊྛ་ནྣ་མྤི ན་ཝ་ནྣ་མྤི ད་ས་ནྣ་མྤི ད་དཱ་མི, ཝཱི་སཱ་ཡ་པི ཏིཾ་སཱ་ཡ་པི ཙ་ཏྟཱ་ལཱི་སཱ་ཡ་པི པ་ཉྙཱ་སཱ་ཡ་པི ད་དཱ་མི, ས་ཏ་སྶ་པི ད་དཱ་མི, བྷི་ཡྻོ་པི ད་དཱ་མི. ཀ་ཙྩཱ་ཧཾ, བྷོ གོ་ཏ་མ, ཨེ་ཝཾ ད་ད་ནྟོ ཨེ་ཝཾ ཡ་ཛ་ནྟོ བ་ཧུཾ པུ་ཉྙཾ པ་ས་ཝཱ་མཱི’’ཏི?

‘‘ཏ་གྒྷ ཏྭཾ, མཱ་ཎ་ཝ, ཨེ་ཝཾ ད་ད་ནྟོ ཨེ་ཝཾ ཡ་ཛ་ནྟོ བ་ཧུཾ པུ་ཉྙཾ པ་ས་ཝ་སི. ཡོ ཁོ, མཱ་ཎ་ཝ, དཱ་ཡ་ཀོ དཱ་ན་པ་ཏི ཝ་ད་ཉྙཱུ ཡཱ་ཙ་ཡོ་གོ; དྷ་མྨེ་ན བྷོ་གེ པ་རི་ཡེ་ས་ཏི; དྷ་མྨེ་ན བྷོ་གེ པ་རི་ཡེ་སི་ཏྭཱ དྷ་མྨ་ལ་དྡྷེ་ཧི བྷོ་གེ་ཧི དྷ་མྨཱ་དྷི་ག་ཏེ་ཧི ཨེ་ཀ་སྶ་པི ད་དཱ་ཏི…པེ… ས་ཏ་སྶ་པི ད་དཱ་ཏི, བྷི་ཡྻོ་པི ད་དཱ་ཏི, བ་ཧུཾ སོ པུ་ཉྙཾ པ་ས་ཝ་ཏཱི’’ཏི. ཨ་ཐ ཁོ མཱ་གྷོ མཱ་ཎ་ཝོ བྷ་ག་ཝ་ནྟཾ གཱ་ཐཱ་ཡ ཨ་ཛ྄ཛྷ་བྷཱ་སི –

༤༩༡. ‘‘པུ་ཙྪཱ་མ་ཧཾ གོ་ཏ་མཾ ཝ་ད་ཉྙུཾ, (ཨི་ཏི མཱ་གྷོ མཱ་ཎ་ཝོ)

ཀཱ་སཱ་ཡ་ཝཱ་སིཾ ཨ་ག་ཧཾ [ཨ་གི་ཧཾ (སཱི.), ཨ་གེ་ཧཾ (པཱི.)] ཙ་ར་ནྟཾ;

ཡོ ཡཱ་ཙ་ཡོ་གོ དཱ་ན་པ་ཏི [དཱ་ན་པ་ཏཱི (སཱི. སྱཱ. པཱི.)] ག་ཧ་ཊྛོ, པུ་ཉྙ་ཏྠི་ཀོ [པུ་ཉྙ་པེ་ཁོ (སཱི. པཱི. ཀ.)] ཡ་ཛ་ཏི པུ་ཉྙ་པེ་ཀྑོ;

ད་དཾ པ་རེ་སཾ ཨི་དྷ ཨ་ནྣ་པཱ་ནཾ, ཀ་ཐཾ ཧུ་ཏཾ ཡ་ཛ་མཱ་ན་སྶ སུ་ཛ྄ཛྷེ’’.

༤༩༢. ‘‘ཡོ ཡཱ་ཙ་ཡོ་གོ དཱ་ན་པ་ཏི ག་ཧ་ཊྛོ, (མཱ་གྷཱ་ཏི བྷ་ག་ཝཱ)

པུ་ཉྙ་ཏྠི་ཀོ ཡ་ཛ་ཏི པུ་ཉྙ་པེ་ཀྑོ;

ད་དཾ པ་རེ་སཾ ཨི་དྷ ཨ་ནྣ་པཱ་ནཾ, ཨཱ་རཱ་དྷ་ཡེ ད་ཀྑི་ཎེ་ཡྻེ་བྷི ཏཱ་དི’’.

༤༩༣. ‘‘ཡོ ཡཱ་ཙ་ཡོ་གོ དཱ་ན་པ་ཏི ག་ཧ་ཊྛོ, (ཨི་ཏི མཱ་གྷོ མཱ་ཎ་ཝོ)

པུ་ཉྙ་ཏྠི་ཀོ ཡ་ཛ་ཏི པུ་ཉྙ་པེ་ཀྑོ;

ད་དཾ པ་རེ་སཾ ཨི་དྷ ཨ་ནྣ་པཱ་ནཾ, ཨ་ཀྑཱ་ཧི མེ བྷ་ག་ཝཱ ད་ཀྑི་ཎེ་ཡྻེ’’.

༤༩༤. ‘‘ཡེ ཝེ ཨ་ས་ཏྟཱ [ཨ་ལ་གྒཱ (སྱཱ.)] ཝི་ཙ་ར་ནྟི ལོ་ཀེ, ཨ་ཀི་ཉྩ་ནཱ ཀེ་ཝ་ལི་ནོ ཡ་ཏ་ཏྟཱ;