༤. སུ་ནྡ་རི་ཀ་བྷཱ་ར་དྭཱ་ཛ་སུ་ཏྟཾ
ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ ཀོ་ས་ལེ་སུ ཝི་ཧ་ར་ཏི སུ་ནྡ་རི་ཀཱ་ཡ ན་དི་ཡཱ ཏཱི་རེ. ཏེ་ན ཁོ པ་ན ས་མ་ཡེ་ན སུ་ནྡ་རི་ཀ་བྷཱ་ར་དྭཱ་ཛོ བྲཱ་ཧྨ་ཎོ སུ་ནྡ་རི་ཀཱ་ཡ ན་དི་ཡཱ ཏཱི་རེ ཨ་གྒིཾ ཛུ་ཧ་ཏི, ཨ་གྒི་ཧུ་ཏྟཾ པ་རི་ཙ་ར་ཏི. ཨ་ཐ ཁོ སུ་ནྡ་རི་ཀ་བྷཱ་ར་དྭཱ་ཛོ བྲཱ་ཧྨ་ཎོ ཨ་གྒིཾ ཛུ་ཧི་ཏྭཱ ཨ་གྒི་ཧུ་ཏྟཾ པ་རི་ཙ་རི་ཏྭཱ ཨུ་ཊྛཱ་ཡཱ་ས་ནཱ ས་མ་ནྟཱ ཙ་ཏུ་དྡི་སཱ ཨ་ནུ་ཝི་ལོ་ཀེ་སི – ‘‘ཀོ ནུ ཁོ ཨི་མཾ ཧ་བྱ་སེ་སཾ བྷུ་ཉྫེ་ཡྻཱ’’ཏི? ཨ་དྡ་སཱ ཁོ སུ་ནྡ་རི་ཀ་བྷཱ་ར་དྭཱ་ཛོ བྲཱ་ཧྨ་ཎོ བྷ་ག་ཝ་ནྟཾ ཨ་ཝི་དཱུ་རེ ཨ་ཉྙ་ཏ་ར་སྨིཾ རུ་ཀྑ་མཱུ་ལེ ས་སཱི་སཾ པཱ་རུ་ཏཾ ནི་སི་ནྣཾ; དི་སྭཱ་ན ཝཱ་མེ་ན ཧ་ཏྠེ་ན ཧ་བྱ་སེ་སཾ ག་ཧེ་ཏྭཱ ད་ཀྑི་ཎེ་ན ཧ་ཏྠེ་ན ཀ་མ་ཎྜ་ལུཾ ག་ཧེ་ཏྭཱ ཡེ་ན བྷ་ག་ཝཱ ཏེ་ནུ་པ་ས་ངྐ་མི.
ཨ་ཐ ཁོ བྷ་ག་ཝཱ སུ་ནྡ་རི་ཀ་བྷཱ་ར་དྭཱ་ཛ་སྶ བྲཱ་ཧྨ་ཎ་སྶ པ་ད་ས་དྡེ་ན སཱི་སཾ ཝི་ཝ་རི. ཨ་ཐ ཁོ སུ་ནྡ་རི་ཀ་བྷཱ་ར་དྭཱ་ཛོ བྲཱ་ཧྨ་ཎོ – ‘‘མུ་ཎྜོ ཨ་ཡཾ བྷ་ཝཾ, མུ་ཎྜ་ཀོ ཨ་ཡཾ བྷ་ཝ’’ནྟི ཏ་ཏོ་ཝ པུ་ན ནི་ཝ་ཏྟི་ཏུ་ཀཱ་མོ ཨ་ཧོ་སི. ཨ་ཐ ཁོ སུ་ནྡ་རི་ཀ་བྷཱ་ར་དྭཱ་ཛ་སྶ བྲཱ་ཧྨ་ཎ་སྶ ཨེ་ཏ་ད་ཧོ་སི – ‘‘མུ་ཎྜཱ་པི ཧི ཨི་དྷེ་ཀ་ཙྩེ བྲཱ་ཧྨ་ཎཱ བྷ་ཝ་ནྟི, ཡཾ་ནཱུ་ནཱ་ཧཾ ཨུ་པ་ས་ངྐ་མི་ཏྭཱ ཛཱ་ཏིཾ པུ་ཙྪེ་ཡྻ’’ནྟི. ཨ་ཐ ཁོ སུ་ནྡ་རི་ཀ་བྷཱ་ར་དྭཱ་ཛོ བྲཱ་ཧྨ་ཎོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཀིཾ་ཛ་ཙྩོ བྷ་ཝ’’ནྟི?
ཨ་ཐ ཁོ བྷ་ག་ཝཱ སུ་ནྡ་རི་ཀ་བྷཱ་ར་དྭཱ་ཛཾ བྲཱ་ཧྨ་ཎཾ གཱ་ཐཱ་ཧི ཨ་ཛ྄ཛྷ་བྷཱ་སི –
༤༥༧. ‘‘ན བྲཱ་ཧྨ་ཎོ ནོ་མྷི ན རཱ་ཛ་པུ་ཏྟོ, ན ཝེ་སྶཱ་ཡ་ནོ ཨུ་ད ཀོ་ཙི ནོ་མྷི;
གོ་ཏྟཾ པ་རི་ཉྙཱ་ཡ པུ་ཐུ་ཛྫ་ནཱ་ནཾ, ཨ་ཀི་ཉྩ་ནོ མ་ནྟ ཙ་རཱ་མི ལོ་ཀེ.
༤༥༨. ‘‘ས་ངྒྷཱ་ཊི་ཝཱ་སཱི ཨ་ག་ཧོ ཙ་རཱ་མི [ཨ་གི་ཧོ (ཀ. སཱི. པཱི.) ཨ་གེ་ཧོ (ཀ་ཏྠ་ཙི)], ནི་ཝུ་ཏྟ་ཀེ་སོ ཨ་བྷི་ནི་བྦུ་ཏ་ཏྟོ;
ཨ་ལི་པྤ་མཱ་ནོ ཨི་དྷ མཱ་ཎ་ཝེ་ཧི, ཨ་ཀ་ལླཾ མཾ བྲཱ་ཧྨ་ཎ པུ་ཙྪ་སི གོ་ཏྟ་པ་ཉྷཾ’’.
༤༥༩. ‘‘པུ་ཙྪ་ནྟི ཝེ བྷོ བྲཱ་ཧྨ་ཎཱ, བྲཱ་ཧྨ་ཎེ་བྷི ས་ཧ བྲཱ་ཧྨ་ཎོ ནོ བྷ་ཝ’’ནྟི.
༤༦༠. ‘‘བྲཱ་ཧྨ་ཎོ ཧི ཙེ ཏྭཾ བྲཱུ་སི, མ་ཉྩ བྲཱུ་སི ཨ་བྲཱ་ཧྨ་ཎཾ;
ཏཾ ཏཾ སཱ་ཝི་ཏྟིཾ པུ་ཙྪཱ་མི, ཏི་པ་དཾ ཙ་ཏུ་ཝཱི་ས་ཏ་ཀྑ་རཾ.
༤༦༡. ‘‘ཀིཾ ནི་སྶི་ཏཱ ཨི་ས་ཡོ མ་ནུ་ཛཱ, ཁ་ཏྟི་ཡཱ བྲཱ་ཧྨ་ཎཱ [པ་ཋ་མ་པཱ་ད་ནྟོ] དེ་ཝ་ཏཱ་ནཾ;
ཡ་ཉྙ་མ་ཀ་པྤ་ཡིཾ་སུ པུ་ཐཱུ ཨི་དྷ ལོ་ཀེ [དུ་ཏི་ཡ་པཱ་ད་ནྟོ (སཱི.)].
༤༦༢. ‘‘ཡ་ད་ནྟ་གཱུ ཝེ་ད་གཱུ ཡ་ཉྙ་ཀཱ་ལེ, ཡ་སྶཱ་ཧུ་ཏིཾ ལ་བྷེ ཏ་སྶི་ཛ྄ཛྷེ་ཏི བྲཱུ་མི’’.
༤༦༣. ‘‘ཨ་དྡྷཱ ཧི ཏ་སྶ ཧུ་ཏ་མི་ཛ྄ཛྷེ, (ཨི་ཏི བྲཱ་ཧྨ་ཎོ)
ཡཾ ཏཱ་དི་སཾ ཝེ་ད་གུ་མ་དྡ་སཱ་མ;
ཏུ་མྷཱ་དི་སཱ་ན་ཉྷི ཨ་ད་སྶ་ནེ་ན, ཨ་ཉྙོ ཛ་ནོ བྷུ་ཉྫ་ཏི པཱུ་ར་ལཱ༹་སཾ’’.
༤༦༤. ‘‘ཏ་སྨཱ་ཏི་ཧ ཏྭཾ བྲཱ་ཧྨ་ཎ ཨ་ཏྠེ་ན, ཨ་ཏྠི་ཀོ ཨུ་པ་ས་ངྐ་མྨ པུ་ཙྪ;
ས་ནྟཾ ཝི་དྷཱུ་མཾ ཨ་ནཱི་གྷཾ ནི་རཱ་སཾ, ཨ་པྤེ་ཝི་དྷ ཨ་བྷི་ཝི་ནྡེ སུ་མེ་དྷཾ’’.
༤༦༥. ‘‘ཡ་ཉྙེ ར་ཏོ་ཧཾ བྷོ གོ་ཏ་མ, ཡ་ཉྙཾ ཡི་ཊྛུ་ཀཱ་མོ ནཱ་ཧཾ པ་ཛཱ་ནཱ་མི;
ཨ་ནུ་སཱ་ས་ཏུ མཾ བྷ་ཝཾ, ཡ་ཏྠ ཧུ་ཏཾ ཨི་ཛ྄ཛྷ་ཏེ བྲཱུ་ཧི མེ ཏཾ’’.
‘‘ཏེ་ན ཧི ཏྭཾ, བྲཱ་ཧྨ་ཎ, ཨོ་ད་ཧ་སྶུ སོ་ཏཾ; དྷ་མྨཾ ཏེ དེ་སེ་སྶཱ་མི –
༤༦༦. ‘‘མཱ ཛཱ་ཏིཾ པུ་ཙྪཱི ཙ་ར་ཎ་ཉྩ པུ་ཙྪ, ཀ་ཊྛཱ ཧ་ཝེ ཛཱ་ཡ་ཏི ཛཱ་ཏ་ཝེ་དོ;
ནཱི་ཙཱ་ཀུ་ལཱི་ནོ་པི མུ་ནཱི དྷི་ཏཱི་མཱ, ཨཱ་ཛཱ་ནི་ཡོ ཧོ་ཏི ཧི་རཱི་ནི་སེ་དྷོ.
༤༦༧. ‘‘ས་ཙྩེ་ན ད་ནྟོ ད་མ་སཱ ཨུ་པེ་ཏོ, ཝེ་ད་ནྟ་གཱུ ཝཱུ་སི་ཏ་བྲ་ཧྨ་ཙ་རི་ཡོ;
ཀཱ་ལེ་ན ཏ་མྷི ཧ་བྱཾ པ་ཝེ་ཙྪེ, ཡོ བྲཱ་ཧྨ་ཎོ པུ་ཉྙ་པེ་ཀྑོ [པུ་ཉྙ་པེ་ཁོ (སཱི. པཱི.)] ཡ་ཛེ་ཐ.
༤༦༨. ‘‘ཡེ ཀཱ་མེ ཧི་ཏྭཱ ཨ་ག་ཧཱ ཙ་ར་ནྟི, སུ་ས་ཉྙ་ཏ་ཏྟཱ ཏ་ས་རཾ་ཝ ཨུ་ཛྫུཾ;
ཀཱ་ལེ་ན ཏེ་སུ ཧ་བྱཾ པ་ཝེ་ཙྪེ, ཡོ བྲཱ་ཧྨ་ཎོ པུ་ཉྙ་པེ་ཀྑོ ཡ་ཛེ་ཐ.
༤༦༩. ‘‘ཡེ ཝཱི་ཏ་རཱ་གཱ སུ་ས་མཱ་ཧི་ཏི་ནྡྲི་ཡཱ, ཙ་ནྡོ་ཝ རཱ་ཧུ་གྒ་ཧ་ཎཱ པ་མུ་ཏྟཱ;
ཀཱ་ལེ་ན ཏེ་སུ ཧ་བྱཾ པ་ཝེ་ཙྪེ, ཡོ བྲཱ་ཧྨ་ཎོ པུ་ཉྙ་པེ་ཀྑོ ཡ་ཛེ་ཐ.
༤༧༠. ‘‘ཨ་ས་ཛྫ་མཱ་ནཱ ཝི་ཙ་ར་ནྟི ལོ་ཀེ, ས་དཱ ས་ཏཱ ཧི་ཏྭཱ མ་མཱ་ཡི་ཏཱ་ནི;
ཀཱ་ལེ་ན ཏེ་སུ ཧ་བྱཾ པ་ཝེ་ཙྪེ, ཡོ བྲཱ་ཧྨ་ཎོ པུ་ཉྙ་པེ་ཀྑོ ཡ་ཛེ་ཐ.
༤༧༡. ‘‘ཡོ ཀཱ་མེ ཧི་ཏྭཱ ཨ་བྷི་བྷུ་ཡྻ་ཙཱ་རཱི, ཡོ ཝེ་དི ཛཱ་ཏཱི་མ་ར་ཎ་སྶ ཨ་ནྟཾ;
པ་རི་ནི་བྦུ་ཏོ ཨུ་ད་ཀ་ར་ཧ་དོ་ཝ སཱི་ཏོ, ཏ་ཐཱ་ག་ཏོ ཨ་ར་ཧ་ཏི པཱུ་ར་ལཱ༹་སཾ.
༤༧༢. ‘‘ས་མོ ས་མེ་ཧི ཝི་ས་མེ་ཧི དཱུ་རེ, ཏ་ཐཱ་ག་ཏོ ཧོ་ཏི ཨ་ན་ནྟ་པ་ཉྙོ;
ཨ་ནཱུ་པ་ལི་ཏྟོ ཨི་དྷ ཝཱ ཧུ་རཾ ཝཱ, ཏ་ཐཱ་ག་ཏོ ཨ་ར་ཧ་ཏི པཱུ་ར་ལཱ༹་སཾ.
༤༧༣. ‘‘ཡ་མྷི ན མཱ་ཡཱ ཝ་ས་ཏི ན མཱ་ནོ, ཡོ ཝཱི་ཏ་ལོ་བྷོ ཨ་མ་མོ ནི་རཱ་སོ;
པ་ནུ་ཎྞ་ཀོ་དྷོ ཨ་བྷི་ནི་བྦུ་ཏ་ཏྟོ, ཡོ བྲཱ་ཧྨ་ཎོ སོ་ཀ་མ་ལཾ ཨ་ཧཱ་སི;
ཏ་ཐཱ་ག་ཏོ ཨ་ར་ཧ་ཏི པཱུ་ར་ལཱ༹་སཾ.
༤༧༤.
‘‘ནི་ཝེ་ས་ནཾ ཡོ མ་ན་སོ ཨ་ཧཱ་སི, པ་རི་གྒ་ཧཱ ཡ་སྶ ན ས་ནྟི ཀེ་ཙི;
ཨ་ནུ་པཱ་དི་ཡཱ་ནོ ཨི་དྷ ཝཱ ཧུ་རཾ ཝཱ, ཏ་ཐཱ་ག་ཏོ ཨ་ར་ཧ་ཏི པཱུ་ར་ལཱ༹་སཾ.
༤༧༥. ‘‘ས་མཱ་ཧི་ཏོ ཡོ ཨུ་ད་ཏཱ་རི ཨོ་གྷཾ, དྷ་མྨཾ ཙ་ཉྙཱ་སི པ་ར་མཱ་ཡ དི་ཊྛི་ཡཱ;
ཁཱི་ཎཱ་ས་ཝོ ཨ་ནྟི་མ་དེ་ཧ་དྷཱ་རཱི, ཏ་ཐཱ་ག་ཏོ ཨ་ར་ཧ་ཏི པཱུ་ར་ལཱ༹་སཾ.
༤༧༦. ‘‘བྷ་ཝཱ་ས་ཝཱ ཡ་སྶ ཝ་ཙཱི ཁ་རཱ ཙ, ཝི་དྷཱུ་པི་ཏཱ ཨ་ཏྠ་ག་ཏཱ ན ས་ནྟི;
ས ཝེ་ད་གཱུ ས་བྦ་དྷི ཝི་པྤ་མུ་ཏྟོ, ཏ་ཐཱ་ག་ཏོ ཨ་ར་ཧ་ཏི པཱུ་ར་ལཱ༹་སཾ.
༤༧༧. ‘‘ས་ངྒཱ་ཏི་གོ ཡ་སྶ ན ས་ནྟི ས་ངྒཱ, ཡོ མཱ་ན་ས་ཏྟེ་སུ ཨ་མཱ་ན་ས་ཏྟོ;
དུ་ཀྑཾ པ་རི་ཉྙཱ་ཡ ས་ཁེ་ཏྟ་ཝ་ཏྠུཾ, ཏ་ཐཱ་ག་ཏོ ཨ་ར་ཧ་ཏི པཱུ་ར་ལཱ༹་སཾ.
༤༧༨. ‘‘ཨཱ་སཾ ཨ་ནི་སྶཱ་ཡ ཝི་ཝེ་ཀ་ད་སྶཱི, པ་ར་ཝེ་དི་ཡཾ དི་ཊྛི་མུ་པཱ་ཏི་ཝ་ཏྟོ;
ཨཱ་ར་མྨ་ཎཱ ཡ་སྶ ན ས་ནྟི ཀེ་ཙི, ཏ་ཐཱ་ག་ཏོ ཨ་ར་ཧ་ཏི པཱུ་ར་ལཱ༹་སཾ.
༤༧༩. ‘‘པ་རོ་པ་རཱ [པ་རོ་ཝ་རཱ (སཱི. པཱི.)] ཡ་སྶ ས་མེ་ཙྩ དྷ་མྨཱ, ཝི་དྷཱུ་པི་ཏཱ ཨ་ཏྠ་ག་ཏཱ ན ས་ནྟི;
ས་ནྟོ ཨུ་པཱ་དཱ་ན་ཁ་ཡེ ཝི་མུ་ཏྟོ, ཏ་ཐཱ་ག་ཏོ ཨ་ར་ཧ་ཏི པཱུ་ར་ལཱ༹་སཾ.
༤༨༠. ‘‘སཾ་ཡོ་ཛ་ནཾ ཛཱ་ཏི་ཁ་ཡ་ནྟ་ད་སྶཱི, ཡོ་པཱ་ནུ་དི རཱ་ག་པ་ཐཾ ཨ་སེ་སཾ;
སུ་དྡྷོ ནི་དོ་སོ ཝི་མ་ལོ ཨ་ཀཱ་ཙོ [ཨ་ཀཱ་མོ (སཱི. སྱཱ.)], ཏ་ཐཱ་ག་ཏོ ཨ་ར་ཧ་ཏི པཱུ་ར་ལཱ༹་སཾ.
༤༨༡. ‘‘ཡོ ཨ་ཏྟ་ནོ ཨ་ཏྟཱ་ནཾ [ཨ་ཏྟ་ནཱ་ཏྟཱ་ནཾ (སཱི. སྱཱ.)] ནཱ་ནུ་པ་སྶ་ཏི, ས་མཱ་ཧི་ཏོ ཨུ་ཛྫུ་ག་ཏོ ཋི་ཏ་ཏྟོ;
ས ཝེ ཨ་ནེ་ཛོ ཨ་ཁི་ལོ ཨ་ཀ་ངྑོ, ཏ་ཐཱ་ག་ཏོ ཨ་ར་ཧ་ཏི པཱུ་ར་ལཱ༹་སཾ.
༤༨༢. ‘‘མོ་ཧ་ནྟ་རཱ ཡ་སྶ ན ས་ནྟི ཀེ་ཙི, ས་བྦེ་སུ དྷ་མྨེ་སུ ཙ ཉཱ་ཎ་ད་སྶཱི;
ས་རཱི་ར་ཉྩ ཨ་ནྟི་མཾ དྷཱ་རེ་ཏི, པ་ཏྟོ ཙ ས་མྦོ་དྷི་མ་ནུ་ཏྟ་རཾ སི་ཝཾ;
ཨེ་ཏྟཱ་ཝ་ཏཱ ཡ་ཀྑ་སྶ སུ་དྡྷི, ཏ་ཐཱ་ག་ཏོ ཨ་ར་ཧ་ཏི པཱུ་ར་ལཱ༹་སཾ’’.
༤༨༣. ‘‘ཧུ་ཏ་ཉྩ [ཧུ་ཏྟ་ཉྩ (སཱི. ཀ.)] མ་ཡ྄ཧཾ ཧུ་ཏ་མ་ཏྠུ ས་ཙྩཾ, ཡཾ ཏཱ་དི་སཾ ཝེ་ད་གུ་ནཾ ཨ་ལ་ཏྠཾ;
བྲ་ཧྨཱ ཧི ས་ཀྑི པ་ཊི་ག་ཎྷཱ་ཏུ མེ བྷ་ག་ཝཱ, བྷུ་ཉྫ་ཏུ མེ བྷ་ག་ཝཱ པཱུ་ར་ལཱ༹་སཾ’’.
༤༨༤. ‘‘གཱ་ཐཱ་བྷི་གཱི་ཏཾ མེ ཨ་བྷོ་ཛ་ནེ་ཡྻཾ, ས་མྤ་སྶ་ཏཾ བྲཱ་ཧྨ་ཎ ནེ་ས དྷ་མྨོ;
གཱ་ཐཱ་བྷི་གཱི་ཏཾ པ་ནུ་ད་ནྟི བུ་དྡྷཱ, དྷ་མྨེ ས་ཏཱི བྲཱ་ཧྨ་ཎ ཝུ་ཏྟི་རེ་སཱ.
༤༨༥. ‘‘ཨ་ཉྙེ་ན ཙ ཀེ་ཝ་ལི་ནཾ མ་ཧེ་སིཾ, ཁཱི་ཎཱ་ས་ཝཾ ཀུ་ཀྐུ་ཙྩ་ཝཱུ་པ་ས་ནྟཾ;
ཨ་ནྣེ་ན པཱ་ནེ་ན ཨུ་པ་ཊྛ་ཧ་སྶུ, ཁེ་ཏྟ་ཉྷི ཏཾ པུ་ཉྙ་པེ་ཀྑ་སྶ ཧོ་ཏི’’.
༤༨༦. ‘‘སཱ་དྷཱ་ཧཾ བྷ་ག་ཝཱ ཏ་ཐཱ ཝི་ཛ་ཉྙཾ, ཡོ ད་ཀྑི་ཎཾ བྷུ་ཉྫེ་ཡྻ མཱ་དི་ས་སྶ;
ཡཾ ཡ་ཉྙ་ཀཱ་ལེ པ་རི་ཡེ་ས་མཱ་ནོ, པ་པྤུ་ཡྻ ཏ་ཝ སཱ་ས་ནཾ’’.
༤༨༧. ‘‘སཱ་ར་མྦྷཱ ཡ་སྶ ཝི་ག་ཏཱ, ཙི་ཏྟཾ ཡ་སྶ ཨ་ནཱ་ཝི་ལཾ;
ཝི་པྤ་མུ་ཏྟོ ཙ ཀཱ་མེ་ཧི, ཐི་ནཾ ཡ་སྶ པ་ནཱུ་དི་ཏཾ.
༤༨༨. ‘‘སཱི་མ་ནྟཱ་ནཾ ཝི་ནེ་ཏཱ་རཾ, ཛཱ་ཏི་མ་ར་ཎ་ཀོ་ཝི་དཾ;
མུ་ནིཾ མོ་ནེ་ཡྻ་ས་མྤ་ནྣཾ, ཏཱ་དི་སཾ ཡ་ཉྙ་མཱ་ག་ཏཾ.
༤༨༩. ‘‘བྷ་ཀུ་ཊིཾ [བྷཱུ་ཀུ་ཊིཾ (ཀ. སཱི.), བྷཱ་ཀུ་ཊིཾ (ཀ. སཱི., མ. ནི. ༡.༢༢༦)] ཝི་ན་ཡི་ཏྭཱ་ན, པ་ཉྫ་ལི་ཀཱ ན་མ་སྶ་ཐ;
པཱུ་ཛེ་ཐ ཨ་ནྣ་པཱ་ནེ་ན, ཨེ་ཝཾ ཨི་ཛ྄ཛྷ་ནྟི ད་ཀྑི་ཎཱ.
༤༩༠. ‘‘བུ་དྡྷོ བྷ་ཝཾ ཨ་ར་ཧ་ཏི པཱུ་ར་ལཱ༹་སཾ, པུ་ཉྙ་ཁེ་ཏྟ་མ་ནུ་ཏྟ་རཾ;
ཨཱ་ཡཱ་གོ ས་བྦ་ལོ་ཀ་སྶ, བྷོ་ཏོ དི་ནྣཾ མ་ཧ་པྥ་ལ’’ནྟི.
ཨ་ཐ ཁོ སུ་ནྡ་རི་ཀ་བྷཱ་ར་དྭཱ་ཛོ བྲཱ་ཧྨ་ཎོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་བྷི་ཀྐ་ནྟཾ, བྷོ གོ་ཏ་མ, ཨ་བྷི་ཀྐ་ནྟཾ, བྷོ གོ་ཏ་མ! སེ་ཡྻ་ཐཱ་པི, བྷོ གོ་ཏ་མ, ནི་ཀྐུ་ཛྫི་ཏཾ ཝཱ ཨུ་ཀྐུ་ཛྫེ་ཡྻ, པ་ཊི་ཙྪ་ནྣཾ ཝཱ ཝི་ཝ་རེ་ཡྻ, མཱུ་ལ༹ྷ་སྶ ཝཱ མ་གྒཾ ཨཱ་ཙི་ཀྑེ་ཡྻ, ཨ་ནྡྷ་ཀཱ་རེ ཝཱ ཏེ་ལ་པ་ཛྫོ་ཏཾ དྷཱ་རེ་ཡྻ – ཙ་ཀྑུ་མ་ནྟོ རཱུ་པཱ་ནི ད་ཀྑ་ནྟཱི་ཏི; ཨེ་ཝ་མེ་ཝཾ བྷོ་ཏཱ གོ་ཏ་མེ་ན ཨ་ནེ་ཀ་པ་རི་ཡཱ་ཡེ་ན དྷ་མྨོ པ་ཀཱ་སི་ཏོ. ཨེ་སཱ་ཧཾ བྷ་ཝ་ནྟཾ གོ་ཏ་མཾ ས་ར་ཎཾ ག་ཙྪཱ་མི དྷ་མྨ་ཉྩ བྷི་ཀྑུ་ས་ངྒྷ་ཉྩ. ལ་བྷེ་ཡྻཱ་ཧཾ བྷོ་ཏོ གོ་ཏ་མ་སྶ ས་ནྟི་ཀེ པ་བྦ་ཛྫཾ, ལ་བྷེ་ཡྻཾ ཨུ་པ་ས་མྤ་ད’’ནྟི. ཨ་ལ་ཏྠ ཁོ སུ་ནྡ་རི་ཀ་བྷཱ་ར་དྭཱ་ཛོ བྲཱ་ཧྨ་ཎོ…པེ… ཨ་ར་ཧ་ཏཾ ཨ་ཧོ་སཱི་ཏི.
སུ་ནྡ་རི་ཀ་བྷཱ་ར་དྭཱ་ཛ་སུ་ཏྟཾ ཙ་ཏུ་ཏྠཾ ནི་ཊྛི་ཏཾ.