༡༢. དྭ་ཡ་ཏཱ་ནུ་པ་སྶ་ནཱ་སུ་ཏྟཾ
ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི པུ་བྦཱ་རཱ་མེ མི་གཱ་ར་མཱ་ཏུ་པཱ་སཱ་དེ. ཏེ་ན ཁོ པ་ན ས་མ་ཡེ་ན བྷ་ག་ཝཱ ཏ་ད་ཧུ་པོ་ས་ཐེ པ་ནྣ་ར་སེ པུ་ཎྞཱ་ཡ པུ་ཎྞ་མཱ་ཡ ར་ཏྟི་ཡཱ བྷི་ཀྑུ་ས་ངྒྷ་པ་རི་ཝུ་ཏོ ཨ་བྦྷོ་ཀཱ་སེ ནི་སི་ནྣོ ཧོ་ཏི. ཨ་ཐ ཁོ བྷ་ག་ཝཱ ཏུ་ཎྷཱི་བྷཱུ་ཏཾ ཏུ་ཎྷཱི་བྷཱུ་ཏཾ བྷི་ཀྑུ་ས་ངྒྷཾ ཨ་ནུ་ཝི་ལོ་ཀེ་ཏྭཱ བྷི་ཀྑཱུ ཨཱ་མ་ནྟེ་སི –
‘‘‘ཡེ ཏེ, བྷི་ཀྑ་ཝེ, ཀུ་ས་ལཱ དྷ་མྨཱ ཨ་རི་ཡཱ ནི་ཡྻཱ་ནི་ཀཱ ས་མྦོ་དྷ་གཱ་མི་ནོ, ཏེ་སཾ ཝོ, བྷི་ཀྑ་ཝེ, ཀུ་ས་ལཱ་ནཾ དྷ་མྨཱ་ནཾ ཨ་རི་ཡཱ་ནཾ ནི་ཡྻཱ་ནི་ཀཱ་ནཾ ས་མྦོ་དྷ་གཱ་མཱི་ནཾ ཀཱ ཨུ་པ་ནི་སཱ ས་ཝ་ནཱ་ཡཱ’ཏི ཨི་ཏི ཙེ, བྷི་ཀྑ་ཝེ, པུ་ཙྪི་ཏཱ་རོ ཨ་སྶུ, ཏེ ཨེ་ཝ་མ་སྶུ ཝ་ཙ་ནཱི་ཡཱ – ‘ཡཱ་ཝ་དེ་ཝ དྭ་ཡ་ཏཱ་ནཾ དྷ་མྨཱ་ནཾ ཡ་ཐཱ་བྷཱུ་ཏཾ ཉཱ་ཎཱ་ཡཱ’ཏི. ཀི་ཉྩ དྭ་ཡ་ཏཾ ཝ་དེ་ཐ?
(༡) ‘‘ཨི་དཾ དུ་ཀྑཾ, ཨ་ཡཾ དུ་ཀྑ་ས་མུ་ད་ཡོ་ཏི ཨ་ཡ་མེ་ཀཱ་ནུ་པ་སྶ་ནཱ. ཨ་ཡཾ དུ་ཀྑ་ནི་རོ་དྷོ, ཨ་ཡཾ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ་ཏི, ཨ་ཡཾ དུ་ཏི་ཡཱ་ནུ་པ་སྶ་ནཱ. ཨེ་ཝཾ ས་མྨཱ དྭ་ཡ་ཏཱ་ནུ་པ་སྶི་ནོ ཁོ, བྷི་ཀྑ་ཝེ, བྷི་ཀྑུ་ནོ ཨ་པྤ་མ་ཏྟ་སྶ ཨཱ་ཏཱ་པི་ནོ པ་ཧི་ཏ་ཏྟ་སྶ ཝི་ཧ་ར་ཏོ དྭི་ནྣཾ ཕ་ལཱ་ནཾ ཨ་ཉྙ་ཏ་རཾ ཕ་ལཾ པཱ་ཊི་ཀ་ངྑཾ – དི་ཊྛེ་ཝ དྷ་མྨེ ཨ་ཉྙཱ, ས་ཏི ཝཱ ཨུ་པཱ་དི་སེ་སེ ཨ་ནཱ་གཱ་མི་ཏཱ’’ཏི.
ཨི་ད་མ་ཝོ་ཙ བྷ་ག་ཝཱ. ཨི་དཾ ཝ་ཏྭཱ་ན སུ་ག་ཏོ ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –
༧༢༩. ‘‘ཡེ དུ་ཀྑཾ ན་པྤ་ཛཱ་ན་ནྟི, ཨ་ཐོ དུ་ཀྑ་སྶ ས་མྦྷ་ཝཾ;
ཡ་ཏྠ ཙ ས་བྦ་སོ དུ་ཀྑཾ, ཨ་སེ་སཾ ཨུ་པ་རུ་ཛ྄ཛྷ་ཏི;
ཏ་ཉྩ མ་གྒཾ ན ཛཱ་ན་ནྟི, དུ་ཀྑཱུ་པ་ས་མ་གཱ་མི་ནཾ.
༧༣༠. ‘‘ཙེ་ཏོ་ཝི་མུ་ཏྟི་ཧཱི་ནཱ ཏེ, ཨ་ཐོ པ་ཉྙཱ་ཝི་མུ་ཏྟི་ཡཱ;
ཨ་བྷ་བྦཱ ཏེ ཨ་ནྟ་ཀི་རི་ཡཱ་ཡ, ཏེ ཝེ ཛཱ་ཏི་ཛ་རཱུ་པ་གཱ.
༧༣༡. ‘‘ཡེ ཙ དུ་ཀྑཾ པ་ཛཱ་ན་ནྟི, ཨ་ཐོ དུ་ཀྑ་སྶ ས་མྦྷ་ཝཾ;
ཡ་ཏྠ ཙ ས་བྦ་སོ དུ་ཀྑཾ, ཨ་སེ་སཾ ཨུ་པ་རུ་ཛ྄ཛྷ་ཏི;
ཏ་ཉྩ མ་གྒཾ པ་ཛཱ་ན་ནྟི, དུ་ཀྑཱུ་པ་ས་མ་གཱ་མི་ནཾ.
༧༣༢. ‘‘ཙེ་ཏོ་ཝི་མུ་ཏྟི་ས་མྤ་ནྣཱ, ཨ་ཐོ པ་ཉྙཱ་ཝི་མུ་ཏྟི་ཡཱ;
བྷ་བྦཱ ཏེ ཨ་ནྟ་ཀི་རི་ཡཱ་ཡ, ན ཏེ ཛཱ་ཏི་ཛ་རཱུ་པ་གཱ’’ཏི.
(༢) ‘‘‘སི་ཡཱ ཨ་ཉྙེ་ན་པི པ་རི་ཡཱ་ཡེ་ན ས་མྨཱ དྭ་ཡ་ཏཱ་ནུ་པ་སྶ་ནཱ’ཏི, ཨི་ཏི ཙེ, བྷི་ཀྑ་ཝེ, པུ་ཙྪི་ཏཱ་རོ ཨ་སྶུ; ‘སི་ཡཱ’ཏི་སྶུ ཝ་ཙ་ནཱི་ཡཱ. ཀ་ཐ་ཉྩ སི་ཡཱ? ཡཾ ཀི་ཉྩི དུ་ཀྑཾ ས་མྦྷོ་ཏི ས་བྦཾ ཨུ་པ་དྷི་པ་ཙྩ་ཡཱ་ཏི, ཨ་ཡ་མེ་ཀཱ་ནུ་པ་སྶ་ནཱ. ཨུ་པ་དྷཱི་ནཾ ཏྭེ་ཝ ཨ་སེ་ས་ཝི་རཱ་ག་ནི་རོ་དྷཱ ན་ཏྠི དུ་ཀྑ་སྶ ས་མྦྷ་ཝོ་ཏི, ཨ་ཡཾ དུ་ཏི་ཡཱ་ནུ་པ་སྶ་ནཱ. ཨེ་ཝཾ ས་མྨཱ…པེ… ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –
༧༣༣. ‘‘ཨུ་པ་དྷི་ནི་དཱ་ནཱ པ་བྷ་ཝ་ནྟི དུ་ཀྑཱ, ཡེ ཀེ་ཙི ལོ་ཀ་སྨི་མ་ནེ་ཀ་རཱུ་པཱ;
ཡོ ཝེ ཨ་ཝི་དྭཱ ཨུ་པ་དྷིཾ ཀ་རོ་ཏི, པུ་ན་པྤུ་ནཾ དུ་ཀྑ་མུ་པེ་ཏི མ་ནྡོ;
ཏ་སྨཱ པ་ཛཱ་ནཾ ཨུ་པ་དྷིཾ ན ཀ་ཡི་རཱ, དུ་ཀྑ་སྶ ཛཱ་ཏི་པྤ་བྷ་ཝཱ་ནུ་པ་སྶཱི’’ཏི.
(༣) ‘‘‘སི་ཡཱ ཨ་ཉྙེ་ན་པི པ་རི་ཡཱ་ཡེ་ན ས་མྨཱ དྭ་ཡ་ཏཱ་ནུ་པ་སྶ་ནཱ’ཏི, ཨི་ཏི ཙེ, བྷི་ཀྑ་ཝེ, པུ་ཙྪི་ཏཱ་རོ ཨ་སྶུ; ‘སི་ཡཱ’ཏི་སྶུ ཝ་ཙ་ནཱི་ཡཱ. ཀ་ཐ་ཉྩ སི་ཡཱ? ཡཾ ཀི་ཉྩི དུ་ཀྑཾ ས་མྦྷོ་ཏི ས་བྦཾ ཨ་ཝི་ཛྫཱ་པ་ཙྩ་ཡཱ་ཏི, ཨ་ཡ་མེ་ཀཱ་ནུ་པ་སྶ་ནཱ. ཨ་ཝི་ཛྫཱ་ཡ ཏྭེ་ཝ ཨ་སེ་ས་ཝི་རཱ་ག་ནི་རོ་དྷཱ ན་ཏྠི དུ་ཀྑ་སྶ ས་མྦྷ་ཝོ་ཏི, ཨ་ཡཾ དུ་ཏི་ཡཱ་ནུ་པ་སྶ་ནཱ. ཨེ་ཝཾ ས་མྨཱ…པེ… ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –
༧༣༤. ‘‘ཛཱ་ཏི་མ་ར་ཎ་སཾ་སཱ་རཾ, ཡེ ཝ་ཛ་ནྟི པུ་ན་པྤུ་ནཾ;
ཨི་ཏྠ་བྷཱ་ཝ་ཉྙ་ཐཱ་བྷཱ་ཝཾ, ཨ་ཝི་ཛྫཱ་ཡེ་ཝ སཱ ག་ཏི.
༧༣༥. ‘‘ཨ་ཝི་ཛྫཱ ཧཱ་ཡཾ མ་ཧཱ་མོ་ཧོ, ཡེ་ནི་དཾ སཾ་སི་ཏཾ ཙི་རཾ;
ཝི་ཛྫཱ་ག་ཏཱ ཙ ཡེ ས་ཏྟཱ, ན ཏེ ག་ཙྪ་ནྟི [ནཱ་ག་ཙྪ་ནྟི (སཱི. པཱི.)] པུ་ན་བྦྷ་ཝ’’ནྟི.
(༤) ‘‘སི་ཡཱ ཨ་ཉྙེ་ན་པི…པེ… ཀ་ཐ་ཉྩ སི་ཡཱ? ཡཾ ཀི་ཉྩི དུ་ཀྑཾ ས་མྦྷོ་ཏི ས་བྦཾ ས་ངྑཱ་ར་པ་ཙྩ་ཡཱ་ཏི, ཨ་ཡ་མེ་ཀཱ་ནུ་པ་སྶ་ནཱ. ས་ངྑཱ་རཱ་ནཾ ཏྭེ་ཝ ཨ་སེ་ས་ཝི་རཱ་ག་ནི་རོ་དྷཱ ན་ཏྠི དུ་ཀྑ་སྶ ས་མྦྷ་ཝོ་ཏི, ཨ་ཡཾ དུ་ཏི་ཡཱ་ནུ་པ་སྶ་ནཱ. ཨེ་ཝཾ ས་མྨཱ…པེ… ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –
༧༣༦. ‘‘ཡཾ ཀི་ཉྩི དུ་ཀྑཾ ས་མྦྷོ་ཏི, ས་བྦཾ ས་ངྑཱ་ར་པ་ཙྩ་ཡཱ;
ས་ངྑཱ་རཱ་ནཾ ནི་རོ་དྷེ་ན, ན་ཏྠི དུ་ཀྑ་སྶ ས་མྦྷ་ཝོ.
༧༣༧. ‘‘ཨེ་ཏ་མཱ་དཱི་ན་ཝཾ ཉ་ཏྭཱ, དུ་ཀྑཾ ས་ངྑཱ་ར་པ་ཙྩ་ཡཱ;
ས་བྦ་ས་ངྑཱ་ར་ས་མ་ཐཱ, ས་ཉྙཱ་ནཾ ཨུ་པ་རོ་དྷ་ནཱ;
ཨེ་ཝཾ དུ་ཀྑ་ཀྑ་ཡོ ཧོ་ཏི, ཨེ་ཏཾ ཉ་ཏྭཱ ཡ་ཐཱ་ཏ་ཐཾ.
༧༣༨. ‘‘ས་མྨ་དྡ་སཱ ཝེ་ད་གུ་ནོ, ས་མྨ་ད་ཉྙཱ་ཡ པ་ཎྜི་ཏཱ;
ཨ་བྷི་བྷུ་ཡྻ མཱ་ར་སཾ་ཡོ་གཾ, ན ག་ཙྪ་ནྟི [ནཱ་ག་ཙྪ་ནྟི (སཱི. པཱི.)] པུ་ན་བྦྷ་ཝ’’ནྟི.
(༥) ‘‘སི་ཡཱ ཨ་ཉྙེ་ན་པི…པེ… ཀ་ཐ་ཉྩ སི་ཡཱ? ཡཾ ཀི་ཉྩི དུ་ཀྑཾ ས་མྦྷོ་ཏི ས་བྦཾ ཝི་ཉྙཱ་ཎ་པ་ཙྩ་ཡཱ་ཏི, ཨ་ཡ་མེ་ཀཱ་ནུ་པ་སྶ་ནཱ. ཝི་ཉྙཱ་ཎ་སྶ ཏྭེ་ཝ ཨ་སེ་ས་ཝི་རཱ་ག་ནི་རོ་དྷཱ ན་ཏྠི དུ་ཀྑ་སྶ ས་མྦྷ་ཝོ་ཏི, ཨ་ཡཾ དུ་ཏི་ཡཱ་ནུ་པ་སྶ་ནཱ. ཨེ་ཝཾ ས་མྨཱ…པེ… ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –
༧༣༩. ‘‘ཡཾ ཀི་ཉྩི དུ་ཀྑཾ ས་མྦྷོ་ཏི, ས་བྦཾ ཝི་ཉྙཱ་ཎ་པ་ཙྩ་ཡཱ;
ཝི་ཉྙཱ་ཎ་སྶ ནི་རོ་དྷེ་ན, ན་ཏྠི དུ་ཀྑ་སྶ ས་མྦྷ་ཝོ.
༧༤༠. ‘‘ཨེ་ཏ་མཱ་དཱི་ན་ཝཾ ཉ་ཏྭཱ, དུ་ཀྑཾ ཝི་ཉྙཱ་ཎ་པ་ཙྩ་ཡཱ;
ཝི་ཉྙཱ་ཎཱུ་པ་ས་མཱ བྷི་ཀྑུ, ནི་ཙྪཱ་ཏོ པ་རི་ནི་བྦུ་ཏོ’’ཏི.
(༦) ‘‘སི་ཡཱ ཨ་ཉྙེ་ན་པི…པེ… ཀ་ཐ་ཉྩ སི་ཡཱ? ཡཾ ཀི་ཉྩི དུ་ཀྑཾ ས་མྦྷོ་ཏི ས་བྦཾ ཕ་སྶ་པ་ཙྩ་ཡཱ་ཏི, ཨ་ཡ་མེ་ཀཱ་ནུ་པ་སྶ་ནཱ. ཕ་སྶ་སྶ ཏྭེ་ཝ ཨ་སེ་ས་ཝི་རཱ་ག་ནི་རོ་དྷཱ ན་ཏྠི དུ་ཀྑ་སྶ ས་མྦྷ་ཝོ་ཏི, ཨ་ཡཾ དུ་ཏི་ཡཱ་ནུ་པ་སྶ་ནཱ. ཨེ་ཝཾ ས་མྨཱ…པེ… ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –
༧༤༡. ‘‘ཏེ་སཾ ཕ་སྶ་པ་རེ་ཏཱ་ནཾ, བྷ་ཝ་སོ་ཏཱ་ནུ་སཱ་རི་ནཾ;
ཀུ་མྨ་གྒ་པ་ཊི་པ་ནྣཱ་ནཾ, ཨཱ་རཱ སཾ་ཡོ་ཛ་ན་ཀྑ་ཡོ.
༧༤༢. ‘‘ཡེ ཙ ཕ་སྶཾ པ་རི་ཉྙཱ་ཡ, ཨ་ཉྙཱ་ཡུ་པ་ས་མེ [པ་ཉྙཱ་ཡ ཨུ་པ་ས་མེ (སྱཱ.)] ར་ཏཱ;
ཏེ ཝེ ཕ་སྶཱ་བྷི་ས་མ་ཡཱ, ནི་ཙྪཱ་ཏཱ པ་རི་ནི་བྦུ་ཏཱ’’ཏི.
(༧) ‘‘སི་ཡཱ ཨ་ཉྙེ་ན་པི…པེ… ཀ་ཐ་ཉྩ སི་ཡཱ? ཡཾ ཀི་ཉྩི དུ་ཀྑཾ ས་མྦྷོ་ཏི ས་བྦཾ ཝེ་ད་ནཱ་པ་ཙྩ་ཡཱ་ཏི, ཨ་ཡ་མེ་ཀཱ་ནུ་པ་སྶ་ནཱ. ཝེ་ད་ནཱ་ནཾ ཏྭེ་ཝ ཨ་སེ་ས་ཝི་རཱ་ག་ནི་རོ་དྷཱ ན་ཏྠི དུ་ཀྑ་སྶ ས་མྦྷ་ཝོ་ཏི, ཨ་ཡཾ དུ་ཏི་ཡཱ་ནུ་པ་སྶ་ནཱ. ཨེ་ཝཾ ས་མྨཱ…པེ… ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –
༧༤༣. ‘‘སུ་ཁཾ ཝཱ ཡ་དི ཝཱ དུ་ཀྑཾ, ཨ་དུ་ཀྑ་མ་སུ་ཁཾ ས་ཧ;
ཨ་ཛ྄ཛྷ་ཏྟ་ཉྩ བ་ཧི་དྡྷཱ ཙ, ཡཾ ཀི་ཉྩི ཨ་ཏྠི ཝེ་དི་ཏཾ.
༧༤༤. ‘‘ཨེ་ཏཾ དུ་ཀྑ་ནྟི ཉ་ཏྭཱ་ན, མོ་ས་དྷ་མྨཾ པ་ལོ་ཀི་ནཾ [པ་ལོ་ཀི་ཏཾ (སཱི.)];
ཕུ་སྶ ཕུ་སྶ ཝ་ཡཾ པ་སྶཾ, ཨེ་ཝཾ ཏ་ཏྠ ཝི་ཛཱ་ན་ཏི [ཝི་ར་ཛྫ་ཏི (ཀ. སཱི.)];
ཝེ་ད་ནཱ་ནཾ ཁ་ཡཱ བྷི་ཀྑུ, ནི་ཙྪཱ་ཏོ པ་རི་ནི་བྦུ་ཏོ’’ཏི.
(༨) ‘‘སི་ཡཱ ཨ་ཉྙེ་ན་པི…པེ… ཀ་ཐ་ཉྩ སི་ཡཱ? ཡཾ ཀི་ཉྩི དུ་ཀྑཾ ས་མྦྷོ་ཏི ས་བྦཾ ཏ་ཎྷཱ་པ་ཙྩ་ཡཱ་ཏི, ཨ་ཡ་མེ་ཀཱ་ནུ་པ་སྶ་ནཱ. ཏ་ཎྷཱ་ཡ ཏྭེ་ཝ ཨ་སེ་ས་ཝི་རཱ་ག་ནི་རོ་དྷཱ ན་ཏྠི དུ་ཀྑ་སྶ ས་མྦྷ་ཝོ་ཏི, ཨ་ཡཾ དུ་ཏི་ཡཱ་ནུ་པ་སྶ་ནཱ. ཨེ་ཝཾ ས་མྨཱ…པེ… ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –
༧༤༥. ‘‘ཏ་ཎྷཱ་དུ་ཏི་ཡོ པུ་རི་སོ, དཱི་གྷ་མ་དྡྷཱ་ན སཾ་ས་རཾ;
ཨི་ཏྠ་བྷཱ་ཝ་ཉྙ་ཐཱ་བྷཱ་ཝཾ, སཾ་སཱ་རཾ ནཱ་ཏི་ཝ་ཏྟ་ཏི.
༧༤༦. ‘‘ཨེ་ཏ་མཱ་དཱི་ན་ཝཾ ཉ་ཏྭཱ, ཏ་ཎྷཾ [ཏ་ཎྷཱ (བ་ཧཱུ་སུ) ཨི་ཏི་ཝུ་ཏྟ་ཀེ ༡༥ པ་སྶི་ཏ་བྦཾ] དུ་ཀྑ་སྶ ས་མྦྷ་ཝཾ;
ཝཱི་ཏ་ཏ་ཎྷོ ཨ་ནཱ་དཱ་ནོ, ས་ཏོ བྷི་ཀྑུ པ་རི་བྦ་ཛེ’’ཏི.
(༩) ‘‘སི་ཡཱ ཨ་ཉྙེ་ན་པི…པེ… ཀ་ཐ་ཉྩ སི་ཡཱ? ཡཾ ཀི་ཉྩི དུ་ཀྑཾ ས་མྦྷོ་ཏི ས་བྦཾ ཨུ་པཱ་དཱ་ན་པ་ཙྩ་ཡཱ་ཏི, ཨ་ཡ་མེ་ཀཱ་ནུ་པ་སྶ་ནཱ. ཨུ་པཱ་དཱ་ནཱ་ནཾ [ཨུ་པཱ་དཱ་ན་སྶ (སྱཱ. ཀ.)] ཏྭེ་ཝ ཨ་སེ་ས་ཝི་རཱ་ག་ནི་རོ་དྷཱ ན་ཏྠི དུ་ཀྑ་སྶ ས་མྦྷ་ཝོ་ཏི, ཨ་ཡཾ དུ་ཏི་ཡཱ་ནུ་པ་སྶ་ནཱ. ཨེ་ཝཾ ས་མྨཱ…པེ… ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –
༧༤༧. ‘‘ཨུ་པཱ་དཱ་ན་པ་ཙྩ་ཡཱ བྷ་ཝོ, བྷཱུ་ཏོ དུ་ཀྑཾ ནི་ག་ཙྪ་ཏི;
ཛཱ་ཏ་སྶ མ་ར་ཎཾ ཧོ་ཏི, ཨེ་སོ དུ་ཀྑ་སྶ ས་མྦྷ་ཝོ.
༧༤༨. ‘‘ཏ་སྨཱ ཨུ་པཱ་དཱ་ན་ཀྑ་ཡཱ, ས་མྨ་ད་ཉྙཱ་ཡ པ་ཎྜི་ཏཱ;
ཛཱ་ཏི་ཀྑ་ཡཾ ཨ་བྷི་ཉྙཱ་ཡ, ན ག་ཙྪ་ནྟི པུ་ན་བྦྷ་ཝ’’ནྟི.
(༡༠) ‘‘སི་ཡཱ ཨ་ཉྙེ་ན་པི…པེ… ཀ་ཐ་ཉྩ སི་ཡཱ? ཡཾ ཀི་ཉྩི དུ་ཀྑཾ ས་མྦྷོ་ཏི ས་བྦཾ ཨཱ་ར་མྦྷ་པ་ཙྩ་ཡཱ་ཏི, ཨ་ཡ་མེ་ཀཱ་ནུ་པ་སྶ་ནཱ. ཨཱ་ར་མྦྷཱ་ནཾ ཏྭེ་ཝ ཨ་སེ་ས་ཝི་རཱ་ག་ནི་རོ་དྷཱ ན་ཏྠི དུ་ཀྑ་སྶ ས་མྦྷ་ཝོ་ཏི, ཨ་ཡཾ དུ་ཏི་ཡཱ་ནུ་པ་སྶ་ནཱ. ཨེ་ཝཾ ས་མྨཱ…པེ… ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –
༧༤༩. ‘‘ཡཾ ཀི་ཉྩི དུ་ཀྑཾ ས་མྦྷོ་ཏི, ས་བྦཾ ཨཱ་ར་མྦྷ་པ་ཙྩ་ཡཱ;
ཨཱ་ར་མྦྷཱ་ནཾ ནི་རོ་དྷེ་ན, ན་ཏྠི དུ་ཀྑ་སྶ ས་མྦྷ་ཝོ.
༧༥༠. ‘‘ཨེ་ཏ་མཱ་དཱི་ན་ཝཾ ཉ་ཏྭཱ, དུ་ཀྑཾ ཨཱ་ར་མྦྷ་པ་ཙྩ་ཡཱ;
ས་བྦཱ་ར་མྦྷཾ པ་ཊི་ནི་སྶ་ཛྫ, ཨ་ནཱ་ར་མྦྷེ ཝི་མུ་ཏྟི་ནོ.
༧༥༡. ‘‘ཨུ་ཙྪི་ནྣ་བྷ་ཝ་ཏ་ཎྷ་སྶ, ས་ནྟ་ཙི་ཏྟ་སྶ བྷི་ཀྑུ་ནོ;
ཝི་ཀྑཱི་ཎོ [ཝི་ཏི་ཎྞོ (སཱི.)] ཛཱ་ཏི་སཾ་སཱ་རོ, ན་ཏྠི ཏ་སྶ པུ་ན་བྦྷ་ཝོ’’ཏི.
(༡༡) ‘‘སི་ཡཱ ཨ་ཉྙེ་ན་པི…པེ… ཀ་ཐ་ཉྩ སི་ཡཱ? ཡཾ ཀི་ཉྩི དུ་ཀྑཾ ས་མྦྷོ་ཏི ས་བྦཾ ཨཱ་ཧཱ་ར་པ་ཙྩ་ཡཱ་ཏི, ཨ་ཡ་མེ་ཀཱ་ནུ་པ་སྶ་ནཱ. ཨཱ་ཧཱ་རཱ་ནཾ ཏྭེ་ཝ ཨ་སེ་ས་ཝི་རཱ་ག་ནི་རོ་དྷཱ ན་ཏྠི དུ་ཀྑ་སྶ ས་མྦྷ་ཝོ་ཏི, ཨ་ཡཾ དུ་ཏི་ཡཱ་ནུ་པ་སྶ་ནཱ. ཨེ་ཝཾ ས་མྨཱ…པེ… ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –
༧༥༢. ‘‘ཡཾ ཀི་ཉྩི དུ་ཀྑཾ ས་མྦྷོ་ཏི, ས་བྦཾ ཨཱ་ཧཱ་ར་པ་ཙྩ་ཡཱ;
ཨཱ་ཧཱ་རཱ་ནཾ ནི་རོ་དྷེ་ན, ན་ཏྠི དུ་ཀྑ་སྶ ས་མྦྷ་ཝོ.
༧༥༣. ‘‘ཨེ་ཏ་མཱ་དཱི་ན་ཝཾ ཉ་ཏྭཱ, དུ་ཀྑཾ ཨཱ་ཧཱ་ར་པ་ཙྩ་ཡཱ;
ས་བྦཱ་ཧཱ་རཾ པ་རི་ཉྙཱ་ཡ, ས་བྦཱ་ཧཱ་ར་མ་ནི་སྶི་ཏོ.
༧༥༤. ‘‘ཨཱ་རོ་གྱཾ ས་མྨ་ད་ཉྙཱ་ཡ, ཨཱ་ས་ཝཱ་ནཾ པ་རི་ཀྑ་ཡཱ;
ས་ངྑཱ་ཡ སེ་ཝཱི དྷ་མྨ་ཊྛོ, ས་ངྑྱཾ [ས་ངྑཾ (སཱི. པཱི.)] ནོ་པེ་ཏི ཝེ་ད་གཱུ’’ཏི.
(༡༢) ‘‘སི་ཡཱ ཨ་ཉྙེ་ན་པི…པེ… ཀ་ཐ་ཉྩ སི་ཡཱ? ཡཾ ཀི་ཉྩི དུ་ཀྑཾ ས་མྦྷོ་ཏི ས་བྦཾ ཨི་ཉྫི་ཏ་པ་ཙྩ་ཡཱ་ཏི, ཨ་ཡ་མེ་ཀཱ་ནུ་པ་སྶ་ནཱ. ཨི་ཉྫི་ཏཱ་ནཾ ཏྭེ་ཝ ཨ་སེ་ས་ཝི་རཱ་ག་ནི་རོ་དྷཱ ན་ཏྠི དུ་ཀྑ་སྶ ས་མྦྷ་ཝོ་ཏི, ཨ་ཡཾ དུ་ཏི་ཡཱ་ནུ་པ་སྶ་ནཱ. ཨེ་ཝཾ ས་མྨཱ…པེ… ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –
༧༥༥. ‘‘ཡཾ ཀི་ཉྩི དུ་ཀྑཾ ས་མྦྷོ་ཏི, ས་བྦཾ ཨི་ཉྫི་ཏ་པ་ཙྩ་ཡཱ;
ཨི་ཉྫི་ཏཱ་ནཾ ནི་རོ་དྷེ་ན, ན་ཏྠི དུ་ཀྑ་སྶ ས་མྦྷ་ཝོ.
༧༥༦. ‘‘ཨེ་ཏ་མཱ་དཱི་ན་ཝཾ ཉ་ཏྭཱ, དུ་ཀྑཾ ཨི་ཉྫི་ཏ་པ་ཙྩ་ཡཱ;
ཏ་སྨཱ ཧི ཨེ་ཛཾ ཝོ་སྶ་ཛྫ, ས་ངྑཱ་རེ ཨུ་པ་རུ་ནྡྷི་ཡ;
ཨ་ནེ་ཛོ ཨ་ནུ་པཱ་དཱ་ནོ, ས་ཏོ བྷི་ཀྑུ པ་རི་བྦ་ཛེ’’ཏི.
(༡༣) ‘‘སི་ཡཱ ཨ་ཉྙེ་ན་པི…པེ… ཀ་ཐ་ཉྩ སི་ཡཱ? ནི་སྶི་ཏ་སྶ ཙ་ལི་ཏཾ ཧོ་ཏཱི་ཏི, ཨ་ཡ་མེ་ཀཱ་ནུ་པ་སྶ་ནཱ. ཨ་ནི་སྶི་ཏོ ན ཙ་ལ་ཏཱི་ཏི, ཨ་ཡཾ དུ་ཏི་ཡཱ་ནུ་པ་སྶ་ནཱ. ཨེ་ཝཾ ས་མྨཱ…པེ… ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –
༧༥༧. ‘‘ཨ་ནི་སྶི་ཏོ ན ཙ་ལ་ཏི, ནི་སྶི་ཏོ ཙ ཨུ་པཱ་དི་ཡཾ;
ཨི་ཏྠ་བྷཱ་ཝ་ཉྙ་ཐཱ་བྷཱ་ཝཾ, སཾ་སཱ་རཾ ནཱ་ཏི་ཝ་ཏྟ་ཏི.
༧༥༨. ‘‘ཨེ་ཏ་མཱ་དཱི་ན་ཝཾ ཉ་ཏྭཱ, ནི་སྶ་ཡེ་སུ མ་ཧ་བྦྷ་ཡཾ;
ཨ་ནི་སྶི་ཏོ ཨ་ནུ་པཱ་དཱ་ནོ, ས་ཏོ བྷི་ཀྑུ པ་རི་བྦ་ཛེ’’ཏི.
(༡༤) ‘‘སི་ཡཱ ཨ་ཉྙེ་ན་པི…པེ… ཀ་ཐ་ཉྩ སི་ཡཱ? རཱུ་པེ་ཧི, བྷི་ཀྑ་ཝེ, ཨ་རཱུ་པཱ [ཨཱ་རུ་པྤཱ (སཱི. པཱི.)] ས་ནྟ་ཏ་རཱ་ཏི, ཨ་ཡ་མེ་ཀཱ་ནུ་པ་སྶ་ནཱ. ཨ་རཱུ་པེ་ཧི ནི་རོ་དྷོ ས་ནྟ་ཏ་རོ་ཏི, ཨ་ཡཾ དུ་ཏི་ཡཱ་ནུ་པ་སྶ་ནཱ. ཨེ་ཝཾ ས་མྨཱ…པེ… ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –
༧༥༩. ‘‘ཡེ ཙ རཱུ་པཱུ་པ་གཱ ས་ཏྟཱ, ཡེ ཙ ཨ་རཱུ་པ་ཊྛཱ་ཡི་ནོ [ཨཱ་རུ་པྤ་ཝཱ་སི་ནོ (སཱི. པཱི.)];
ནི་རོ་དྷཾ ཨ་པྤ་ཛཱ་ན་ནྟཱ, ཨཱ་ག་ནྟཱ་རོ པུ་ན་བྦྷ་ཝཾ.
༧༦༠. ‘‘ཡེ ཙ རཱུ་པེ པ་རི་ཉྙཱ་ཡ, ཨ་རཱུ་པེ་སུ ཨ་ས་ཎྛི་ཏཱ [སུ་ས་ཎྛི་ཏཱ (སཱི. སྱཱ. པཱི.)];
ནི་རོ་དྷེ ཡེ ཝི་མུ་ཙྩ་ནྟི, ཏེ ཛ་ནཱ མ་ཙྩུ་ཧཱ་ཡི་ནོ’’ཏི.
(༡༥) ‘‘སི་ཡཱ ཨ་ཉྙེ་ན་པི…པེ… ཀ་ཐ་ཉྩ སི་ཡཱ? ཡཾ, བྷི་ཀྑ་ཝེ, ས་དེ་ཝ་ཀ་སྶ ལོ་ཀ་སྶ ས་མཱ་ར་ཀ་སྶ ས་བྲ་ཧྨ་ཀ་སྶ ས་སྶ་མ་ཎ་བྲཱ་ཧྨ་ཎི་ཡཱ པ་ཛཱ་ཡ ས་དེ་ཝ་མ་ནུ་སྶཱ་ཡ ཨི་དཾ ས་ཙྩ་ནྟི ཨུ་པ་ནི་ཛ྄ཛྷཱ་ཡི་ཏཾ ཏ་ད་མ་རི་ཡཱ་ནཾ ཨེ་ཏཾ མུ་སཱ་ཏི ཡ་ཐཱ་བྷཱུ་ཏཾ ས་མྨ་པྤ་ཉྙཱ་ཡ སུ་དི་ཊྛཾ, ཨ་ཡ་མེ་ཀཱ་ནུ་པ་སྶ་ནཱ. ཡཾ, བྷི་ཀྑ་ཝེ, ས་དེ་ཝ་ཀ་སྶ…པེ… ས་དེ་ཝ་མ་ནུ་སྶཱ་ཡ ཨི་དཾ མུ་སཱ་ཏི ཨུ་པ་ནི་ཛ྄ཛྷཱ་ཡི་ཏཾ, ཏ་ད་མ་རི་ཡཱ་ནཾ ཨེ་ཏཾ ས་ཙྩ་ནྟི ཡ་ཐཱ་བྷཱུ་ཏཾ ས་མྨ་པྤ་ཉྙཱ་ཡ སུ་དི་ཊྛཾ, ཨ་ཡཾ དུ་ཏི་ཡཱ་ནུ་པ་སྶ་ནཱ. ཨེ་ཝཾ ས་མྨཱ…པེ… ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –
༧༦༡. ‘‘ཨ་ན་ཏྟ་ནི ཨ་ཏྟ་མཱ་ནིཾ [ཨ་ཏྟ་མཱ་ནཱི (སྱཱ.), ཨ་ཏྟ་མཱ་ནཾ (པཱི. ཀ.)], པ་སྶ ལོ་ཀཾ ས་དེ་ཝ་ཀཾ;
ནི་ཝི་ཊྛཾ ནཱ་མ་རཱུ་པ་སྨིཾ, ཨི་དཾ ས་ཙྩ་ནྟི མ་ཉྙ་ཏི.
༧༦༢. ‘‘ཡེ་ན ཡེ་ན ཧི མ་ཉྙ་ནྟི, ཏ་ཏོ ཏཾ ཧོ་ཏི ཨ་ཉྙ་ཐཱ;
ཏ་ཉྷི ཏ་སྶ མུ་སཱ ཧོ་ཏི, མོ་ས་དྷ་མྨ་ཉྷི ཨི་ཏྟ་རཾ.
༧༦༣. ‘‘ཨ་མོ་ས་དྷ་མྨཾ ནི་བྦཱ་ནཾ, ཏ་ད་རི་ཡཱ ས་ཙྩ་ཏོ ཝི་དཱུ;
ཏེ ཝེ ས་ཙྩཱ་བྷི་ས་མ་ཡཱ, ནི་ཙྪཱ་ཏཱ པ་རི་ནི་བྦུ་ཏཱ’’ཏི.
(༡༦) ‘‘‘སི་ཡཱ ཨ་ཉྙེ་ན་པི པ་རི་ཡཱ་ཡེ་ན ས་མྨཱ དྭ་ཡ་ཏཱ་ནུ་པ་སྶ་ནཱ’ཏི, ཨི་ཏི ཙེ, བྷི་ཀྑ་ཝེ, པུ་ཙྪི་ཏཱ་རོ ཨ་སྶུ; ‘སི་ཡཱ’ཏི་སྶུ ཝ་ཙ་ནཱི་ཡཱ. ཀ་ཐ་ཉྩ སི་ཡཱ? ཡཾ, བྷི་ཀྑ་ཝེ, ས་དེ་ཝ་ཀ་སྶ ལོ་ཀ་སྶ ས་མཱ་ར་ཀ་སྶ ས་བྲ་ཧྨ་ཀ་སྶ ས་སྶ་མ་ཎ་བྲཱ་ཧྨ་ཎི་ཡཱ པ་ཛཱ་ཡ ས་དེ་ཝ་མ་ནུ་སྶཱ་ཡ ཨི་དཾ སུ་ཁ་ནྟི ཨུ་པ་ནི་ཛ྄ཛྷཱ་ཡི་ཏཾ, ཏ་ད་མ་རི་ཡཱ་ནཾ ཨེ་ཏཾ དུ་ཀྑ་ནྟི ཡ་ཐཱ་བྷཱུ་ཏཾ ས་མྨ་པྤ་ཉྙཱ་ཡ སུ་དི་ཊྛཾ, ཨ་ཡ་མེ་ཀཱ་ནུ་པ་སྶ་ནཱ. ཡཾ, བྷི་ཀྑ་ཝེ, ས་དེ་ཝ་ཀ་སྶ…པེ… ས་དེ་ཝ་མ་ནུ་སྶཱ་ཡ ཨི་དཾ དུ་ཀྑ་ནྟི ཨུ་པ་ནི་ཛ྄ཛྷཱ་ཡི་ཏཾ ཏ་ད་མ་རི་ཡཱ་ནཾ ཨེ་ཏཾ སུ་ཁ་ནྟི ཡ་ཐཱ་བྷཱུ་ཏཾ ས་མྨ་པྤ་ཉྙཱ་ཡ སུ་དི་ཊྛཾ, ཨ་ཡཾ དུ་ཏི་ཡཱ་ནུ་པ་སྶ་ནཱ. ཨེ་ཝཾ ས་མྨཱ དྭ་ཡ་ཏཱ་ནུ་པ་སྶི་ནོ ཁོ, བྷི་ཀྑ་ཝེ, བྷི་ཀྑུ་ནོ ཨ་པྤ་མ་ཏྟ་སྶ ཨཱ་ཏཱ་པི་ནོ པ་ཧི་ཏ་ཏྟ་སྶ ཝི་ཧ་ར་ཏོ དྭི་ནྣཾ ཕ་ལཱ་ནཾ ཨ་ཉྙ་ཏ་རཾ ཕ་ལཾ པཱ་ཊི་ཀ་ངྑཾ – དི་ཊྛེ་ཝ དྷ་མྨེ ཨ་ཉྙཱ, ས་ཏི ཝཱ ཨུ་པཱ་དི་སེ་སེ ཨ་ནཱ་གཱ་མི་ཏཱ་ཏི. ཨི་ད་མ་ཝོ་ཙ བྷ་ག་ཝཱ. ཨི་དཾ ཝ་ཏྭཱ་ན སུ་ག་ཏོ ཨ་ཐཱ་པ་རཾ ཨེ་ཏ་ད་ཝོ་ཙ ས་ཏྠཱ –
༧༦༤. ‘‘རཱུ་པཱ ས་དྡཱ ར་སཱ ག་ནྡྷཱ, ཕ་སྶཱ དྷ་མྨཱ ཙ ཀེ་ཝ་ལཱ;
ཨི་ཊྛཱ ཀ་ནྟཱ མ་ནཱ་པཱ ཙ, ཡཱ་ཝ་ཏ་ཏྠཱི་ཏི ཝུ་ཙྩ་ཏི.
༧༦༥. ‘‘ས་དེ་ཝ་ཀ་སྶ ལོ་ཀ་སྶ, ཨེ་ཏེ ཝོ སུ་ཁ་ས་མྨ་ཏཱ;
ཡ་ཏྠ ཙེ་ཏེ ནི་རུ་ཛ྄ཛྷ་ནྟི, ཏཾ ནེ་སཾ དུ་ཀྑ་ས་མྨ་ཏཾ.
༧༦༦. ‘‘སུ་ཁ་ནྟི དི་ཊྛ་མ་རི་ཡེ་ཧི, ས་ཀྐཱ་ཡ་སྶུ་པ་རོ་དྷ་ནཾ;
པ་ཙྩ་ནཱི་ཀ་མི་དཾ ཧོ་ཏི, ས་བྦ་ལོ་ཀེ་ན པ་སྶ་ཏཾ.
༧༦༧. ‘‘ཡཾ པ་རེ སུ་ཁ་ཏོ ཨཱ་ཧུ, ཏ་ད་རི་ཡཱ ཨཱ་ཧུ དུ་ཀྑ་ཏོ;
ཡཾ པ་རེ དུ་ཀྑ་ཏོ ཨཱ་ཧུ, ཏ་ད་རི་ཡཱ སུ་ཁ་ཏོ ཝི་དཱུ.
༧༦༨. ‘‘པ་སྶ དྷ་མྨཾ དུ་རཱ་ཛཱ་ནཾ, ས་མྤ་མཱུ་ལ༹ྷེ་ཏྠ་ཝི་དྡ་སུ [ས་མྤ་མཱུ་ལ༹ྷེ་ཏྠ ཨ་ཝི་དྡ་སུ (སཱི. པཱི.), ས་མྨཱུ་ལ༹ྷེ་ཏྠ ཨ་ཝི་དྡ་སུ (?)];
ནི་ཝུ་ཏཱ་ནཾ ཏ་མོ ཧོ་ཏི, ཨ་ནྡྷ་ཀཱ་རོ ཨ་པ་སྶ་ཏཾ.
༧༦༩. ‘‘ས་ཏ་ཉྩ ཝི་ཝ་ཊཾ ཧོ་ཏི, ཨཱ་ལོ་ཀོ པ་སྶ་ཏཱ་མི་ཝ;
ས་ནྟི་ཀེ ན ཝི་ཛཱ་ན་ནྟི, མ་གྒཱ དྷ་མྨ་སྶ ཀོ་ཝི་དཱ.
༧༧༠. ‘‘བྷ་ཝ་རཱ་ག་པ་རེ་ཏེ་ཧི, བྷ་ཝ་སོ་ཏཱ་ནུ་སཱ་རི་བྷི;
མཱ་ར་དྷེ་ཡྻཱ་ནུ་པ་ནྣེ་ཧི, ནཱ་ཡཾ དྷ་མྨོ སུ་ས་མྦུ་དྷོ.
༧༧༡. ‘‘ཀོ ནུ ཨ་ཉྙ་ཏྲ་མ་རི་ཡེ་ཧི, པ་དཾ ས་མྦུ་དྡྷུ་མ་ར་ཧ་ཏི;
ཡཾ པ་དཾ ས་མྨ་ད་ཉྙཱ་ཡ, པ་རི་ནི་བྦ་ནྟི ཨ་ནཱ་ས་ཝཱ’’ཏི.
ཨི་ད་མ་ཝོ་ཙ བྷ་ག་ཝཱ. ཨ་ཏྟ་མ་ནཱ ཏེ བྷི་ཀྑཱུ བྷ་ག་ཝ་ཏོ བྷཱ་སི་ཏཾ ཨ་བྷི་ན་ནྡུ་ནྟི. ཨི་མ་སྨིཾ ཙ [ཨི་མ་སྨིཾ ཁོ (སཱི.)] པ་ན ཝེ་ཡྻཱ་ཀ་ར་ཎ་སྨིཾ བྷ་ཉྙ་མཱ་ནེ ས་ཊྛི་མ་ཏྟཱ་ནཾ བྷི་ཀྑཱུ་ནཾ ཨ་ནུ་པཱ་དཱ་ཡ ཨཱ་ས་ཝེ་ཧི ཙི་ཏྟཱ་ནི ཝི་མུ་ཙྩིཾ་སཱུ་ཏི.
དྭ་ཡ་ཏཱ་ནུ་པ་སྶ་ནཱ་སུ་ཏྟཾ དྭཱ་ད་ས་མཾ ནི་ཊྛི་ཏཾ.
ཏ་སྶུ་དྡཱ་ནཾ –
ས་ཙྩཾ ཨུ་པ་དྷི ཨ་ཝི་ཛྫཱ ཙ, ས་ངྑཱ་རེ ཝི་ཉྙཱ་ཎ་པ་ཉྩ་མཾ;
ཕ་སྶ་ཝེ་ད་ནི་ཡཱ ཏ་ཎྷཱ, ཨུ་པཱ་དཱ་ནཱ་ར་མྦྷ་ཨཱ་ཧཱ་རཱ;
ཨི་ཉྫི་ཏཾ ཙ་ལི་ཏཾ རཱུ་པཾ, ས་ཙྩཾ དུ་ཀྑེ་ན སོ་ལ༹་སཱ་ཏི.
མ་ཧཱ་ཝ་གྒོ ཏ་ཏི་ཡོ ནི་ཊྛི་ཏོ.