༡༡. ནཱ་ལ་ཀ་སུ་ཏྟཾ
༦༨༤. ཨཱ་ན་ནྡ་ཛཱ་ཏེ ཏི་ད་ས་ག་ཎེ པ་ཏཱི་ཏེ, ས་ཀྐ་ཉྩ ཨི་ནྡཾ སུ་ཙི་ཝ་ས་ནེ ཙ དེ་ཝེ;
དུ་སྶཾ ག་ཧེ་ཏྭཱ ཨ་ཏི་རི་ཝ ཐོ་མ་ཡ་ནྟེ, ཨ་སི་ཏོ ཨི་སི ཨ་དྡ་ས དི་ཝཱ་ཝི་ཧཱ་རེ.
༦༨༥. དི་སྭཱ་ན དེ་ཝེ མུ་དི་ཏ་མ་ནེ ཨུ་ད་གྒེ, ཙི་ཏྟིཾ ཀ་རི་ཏྭཱ་ན ཨི་ད་མ་ཝོ་ཙ [ཀ་རི་ཏྭཱ ཨི་ད་མ་ཝོ་ཙཱ་སི (སཱི.)] ཏ་ཏྠ;
‘‘ཀིཾ དེ་ཝ་ས་ངྒྷོ ཨ་ཏི་རི་ཝ ཀ་ལྱ་རཱུ་པོ, དུ་སྶཾ ག་ཧེ་ཏྭཱ ར་མ་ཡ་ཐ [བྷ་མ་ཡ་ཐ (སཱི.)] ཀིཾ པ་ཊི་ཙྩ.
༦༨༦. ‘‘ཡ་དཱ་པི ཨཱ་སཱི ཨ་སུ་རེ་ཧི ས་ངྒ་མོ, ཛ་ཡོ སུ་རཱ་ནཾ ཨ་སུ་རཱ པ་རཱ་ཛི་ཏཱ.
ཏ་དཱ་པི ནེ་ཏཱ་དི་སོ ལོ་མ་ཧཾ་ས་ནོ, ཀི་མ་བྦྷུ་ཏཾ ད་ཊྛུ མ་རཱུ པ་མོ་དི་ཏཱ.
༦༨༧. ‘‘སེ་ལེ༹་ནྟི གཱ་ཡ་ནྟི ཙ ཝཱ་ད་ཡ་ནྟི ཙ, བྷུ་ཛཱ་ནི ཕོ་ཊེ་ནྟི [པོ་ཋེ་ནྟི (སཱི. པཱི.), པོ་ཐེ་ནྟི (ཀ.)] ཙ ན་ཙྩ་ཡ་ནྟི ཙ;
པུ་ཙྪཱ་མི ཝོ་ཧཾ མེ་རུ་མུ་དྡྷ་ཝཱ་སི་ནེ, དྷུ་ནཱ་ཐ མེ སཾ་ས་ཡཾ ཁི་པྤ མཱ་རི་སཱ’’.
༦༨༨. ‘‘སོ བོ་དྷི་ས་ཏྟོ ར་ཏ་ན་ཝ་རོ ཨ་ཏུ་ལྱོ, མ་ནུ་སྶ་ལོ་ཀེ ཧི་ཏ་སུ་ཁ་ཏྠཱ་ཡ [ཧི་ཏ་སུ་ཁ་ཏཱ་ཡ (སཱི. སྱཱ. པཱི.)] ཛཱ་ཏོ;
ས་ཀྱཱ་ན གཱ་མེ ཛ་ན་པ་དེ ལུ་མྦི་ནེ་ཡྻེ, ཏེ་ན་མྷ ཏུ་ཊྛཱ ཨ་ཏི་རི་ཝ ཀ་ལྱ་རཱུ་པཱ.
༦༨༩. ‘‘སོ ས་བྦ་ས་ཏྟུ་ཏྟ་མོ ཨ་གྒ་པུ་གྒ་ལོ, ན་རཱ་ས་བྷོ ས་བྦ་པ་ཛཱ་ན་མུ་ཏྟ་མོ;
ཝ་ཏྟེ་སྶ་ཏི ཙ་ཀྐ་མི་སི་ཝ྄ཧ་ཡེ ཝ་ནེ, ན་དཾ་ཝ སཱི་ཧོ བ་ལ་ཝཱ མི་གཱ་བྷི་བྷཱུ’’.
༦༩༠. ཏཾ ས་དྡཾ སུ་ཏྭཱ ཏུ་རི་ཏ་མ་ཝ་ས་རཱི སོ, སུ་དྡྷོ་ད་ན་སྶ ཏ་ད བྷ་ཝ་ནཾ ཨུ་པཱ་ཝི་སི [ཨུ་པཱ་ག་མི (སཱི. པཱི.)];
ནི་ས་ཛྫ ཏ་ཏྠ ཨི་ད་མ་ཝོ་ཙཱ་སི ས་ཀྱེ, ‘‘ཀུ་ཧིཾ ཀུ་མཱ་རོ ཨ་ཧ་མ་པི ད་ཊྛུ་ཀཱ་མོ’’.
༦༩༡. ཏ་ཏོ ཀུ་མཱ་རཾ ཛ་ལི་ཏ་མི་ཝ སུ་ཝ་ཎྞཾ, ཨུ་ཀྐཱ་མུ་ཁེ་ཝ སུ་ཀུ་ས་ལ་ས་མྤ་ཧ་ཊྛཾ [སུ་ཀུ་ས་ལེ་ན ས་མྤ་ཧ་ཊྛཾ (ཀ.)];
ད་དྡ་ལླ་མཱ་ནཾ [ད་དྡ་ལ༹ྷ་མཱ་ནཾ (ཀ.)] སི་རི་ཡཱ ཨ་ནོ་མ་ཝ་ཎྞཾ, ད་སྶེ་སུ པུ་ཏྟཾ ཨ་སི་ཏ་ཝ྄ཧ་ཡ་སྶ ས་ཀྱཱ.
༦༩༢. དི་སྭཱ ཀུ་མཱ་རཾ སི་ཁི་མི་ཝ པ་ཛྫ་ལ་ནྟཾ, ཏཱ་རཱ་ས་བྷཾ་ཝ ན་བྷ་སི་ག་མཾ ཝི་སུ་དྡྷཾ;
སཱུ་རི་ཡཾ ཏ་པ་ནྟཾ ས་ར་ད་རི་ཝ་བྦྷ་མུ་ཏྟཾ, ཨཱ་ན་ནྡ་ཛཱ་ཏོ ཝི་པུ་ལ་མ་ལ་ཏྠ པཱི་ཏིཾ.
༦༩༣. ཨ་ནེ་ཀ་སཱ་ཁ་ཉྩ ས་ཧ་སྶ་མ་ཎྜ་ལཾ, ཚ་ཏྟཾ མ་རཱུ དྷཱ་ར་ཡུ་མ་ནྟ་ལི་ཀྑེ;
སུ་ཝ་ཎྞ་ད་ཎྜཱ ཝཱི་ཏི་པ་ཏ་ནྟི ཙཱ་མ་རཱ, ན དི་སྶ་རེ ཙཱ་མ་ར་ཚ་ཏྟ་གཱ་ཧ་ཀཱ.
༦༩༤. དི་སྭཱ ཛ་ཊཱི ཀ་ཎྷ་སི་རི་ཝ྄ཧ་ཡོ ཨི་སི, སུ་ཝ་ཎྞ་ནི་ཀྑཾ ཝི་ཡ པ་ཎྜུ་ཀ་མྦ་ལེ;
སེ་ཏ་ཉྩ ཚ་ཏྟཾ དྷ་རི་ཡ་ནྟ [དྷཱ་རི་ཡ་ནྟ (སྱཱ.), དྷཱ་ར་ཡ་ནྟཾ (སཱི. ཀ.)] མུ་དྡྷ་ནི, ཨུ་ད་གྒ་ཙི་ཏྟོ སུ་མ་ནོ པ་ཊི་གྒ་ཧེ.
༦༩༥. པ་ཊི་གྒ་ཧེ་ཏྭཱ པ་ན ས་ཀྱ་པུ་ངྒ་ཝཾ, ཛི་གཱི་ས་ཏོ [ཛི་གིཾ་ས་ཀོ (སཱི. སྱཱ. པཱི.)] ལ་ཀྑ་ཎ་མ་ནྟ་པཱ་ར་གཱུ;
པ་ས་ནྣ་ཙི་ཏྟོ གི་ར་མ་བྦྷུ་དཱི་ར་ཡི, ‘‘ཨ་ནུ་ཏྟ་རཱ་ཡཾ དྭི་པ་དཱ་ན་མུ་ཏྟ་མོ’’ [དི་པ་དཱ་ན་མུ་ཏྟ་མོ (སཱི. སྱཱ. པཱི.)].
༦༩༦. ཨ་ཐ་ཏྟ་ནོ ག་མ་ན་མ་ནུ་སྶ་ར་ནྟོ, ཨ་ཀ་ལྱ་རཱུ་པོ ག་ལ༹་ཡ་ཏི ཨ་སྶུ་ཀཱ་ནི;
དི་སྭཱ་ན ས་ཀྱཱ ཨི་སི་མ་ཝོ་ཙུཾ རུ་ད་ནྟཾ,
‘‘ནོ ཙེ ཀུ་མཱ་རེ བྷ་ཝི་སྶ་ཏི ཨ་ནྟ་རཱ་ཡོ’’.
༦༩༧. དི་སྭཱ་ན ས་ཀྱེ ཨི་སི་མ་ཝོ་ཙ ཨ་ཀ་ལྱེ, ‘‘ནཱ་ཧཾ ཀུ་མཱ་རེ ཨ་ཧི་ཏ་མ་ནུ་སྶ་རཱ་མི;
ན ཙཱ་པི་མ་སྶ བྷ་ཝི་སྶ་ཏི ཨ་ནྟ་རཱ་ཡོ, ན ཨོ་ར་ཀཱ་ཡཾ ཨ་དྷི་མཱ་ན་སཱ [ཨ་དྷི་མ་ན་སཱ (སཱི. སྱཱ.)] བྷ་ཝཱ་ཐ.
༦༩༨. ‘‘ས་མྦོ་དྷི་ཡ་གྒཾ ཕུ་སི་སྶ་ཏཱ་ཡཾ ཀུ་མཱ་རོ, སོ དྷ་མྨ་ཙ་ཀྐཾ པ་ར་མ་ཝི་སུ་དྡྷ་ད་སྶཱི;
ཝ་ཏྟེ་སྶ་ཏཱ་ཡཾ བ་ཧུ་ཛ་ན་ཧི་ཏཱ་ནུ་ཀ་མྤཱི, ཝི་ཏྠཱ་རི་ཀ་སྶ བྷ་ཝི་སྶ་ཏི བྲ་ཧྨ་ཙ་རི་ཡཾ.
༦༩༩. ‘‘མ་མ་ཉྩ ཨཱ་ཡུ ན ཙི་ར་མི་དྷཱ་ཝ་སེ་སོ, ཨ་ཐ་ནྟ་རཱ མེ བྷ་ཝི་སྶ་ཏི ཀཱ་ལ་ཀི་རི་ཡཱ;
སོ་ཧཾ ན སོ་སྶཾ [སུ་སྶཾ (སཱི. སྱཱ.)] ཨ་ས་མ་དྷུ་ར་སྶ དྷ་མྨཾ, ཏེ་ན་མྷི ཨ་ཊྚོ བྱ་ས་ནཾ་ག་ཏོ ཨ་གྷཱ་ཝཱི’’.
༧༠༠. སོ སཱ་ཀི་ཡཱ་ནཾ ཝི་པུ་ལཾ ཛ་ནེ་ཏྭཱ པཱི་ཏིཾ, ཨ་ནྟེ་པུ་ར་མྷཱ ནི་གྒ་མཱ [ནི་ར་ག་མཱ (སཱི. སྱཱ.), ནི་ག་མཱ (ཀ. སཱི.), ནི་ར་ག་མ (པཱི.)] བྲ་ཧྨ་ཙཱ་རཱི;
སོ བྷཱ་གི་ནེ་ཡྻཾ ས་ཡཾ ཨ་ནུ་ཀ་མྤ་མཱ་ནོ, ས་མཱ་ད་པེ་སི ཨ་ས་མ་དྷུ་ར་སྶ དྷ་མྨེ.
༧༠༡. ‘‘བུ་དྡྷོ་ཏི གྷོ་སཾ ཡ་ད [ཡ་དི (སྱཱ. ཀ.)] པ་ར་ཏོ སུ་ཎཱ་སི, ས་མྦོ་དྷི་པ་ཏྟོ ཝི་ཝ་ར་ཏི དྷ་མྨ་མ་གྒཾ;
ག་ནྟྭཱ་ན ཏ་ཏྠ ས་མ་ཡཾ པ་རི་པུ་ཙྪ་མཱ་ནོ [ས་ཡཾ པ་རི་པུ་ཙྪི་ཡཱ་ནོ (སཱི. སྱཱ.)], ཙ་ར་སྶུ ཏ་སྨིཾ བྷ་ག་ཝ་ཏི བྲ་ཧྨ་ཙ་རི་ཡཾ’’.
༧༠༢. ཏེ་ནཱ་ནུ་སི་ཊྛོ ཧི་ཏ་མ་ནེ་ན ཏཱ་དི་ནཱ, ཨ་ནཱ་ག་ཏེ པ་ར་མ་ཝི་སུ་དྡྷ་ད་སྶི་ནཱ;
སོ ནཱ་ལ་ཀོ ཨུ་པ་ཙི་ཏ་པུ་ཉྙ་ས་ཉྩ་ཡོ, ཛི་ནཾ པ་ཏི་ཀྑཾ [པ་ཏི + ཨི་ཀྑཾ = པ་ཏི་ཀྑཾ] པ་རི་ཝ་སི ར་ཀྑི་ཏི་ནྡྲི་ཡོ.
༧༠༣. སུ་ཏྭཱ་ན གྷོ་སཾ ཛི་ན་ཝ་ར་ཙ་ཀྐ་ཝ་ཏྟ་ནེ, ག་ནྟྭཱ་ན དི་སྭཱ ཨི་སི་ནི་ས་བྷཾ པ་ས་ནྣོ;
མོ་ནེ་ཡྻ་སེ་ཊྛཾ མུ་ནི་པ་ཝ་རཾ ཨ་པུ་ཙྪི, ས་མཱ་ག་ཏེ ཨ་སི་ཏཱ་ཝ྄ཧ་ཡ་སྶ སཱ་ས་ནེ་ཏི.
ཝ་ཏྠུ་གཱ་ཐཱ ནི་ཊྛི་ཏཱ.
༧༠༤. ‘‘ཨ་ཉྙཱ་ཏ་མེ་ཏཾ ཝ་ཙ་ནཾ, ཨ་སི་ཏ་སྶ ཡ་ཐཱ་ཏ་ཐཾ;
ཏཾ ཏཾ གོ་ཏ་མ པུ་ཙྪཱ་མི, ས་བྦ་དྷ་མྨཱ་ན པཱ་ར་གུཾ.
༧༠༥. ‘‘ཨ་ན་གཱ་རི་ཡུ་པེ་ཏ་སྶ, བྷི་ཀྑཱ་ཙ་རི་ཡཾ ཛི་གཱི་ས་ཏོ;
མུ་ནི པ་བྲཱུ་ཧི མེ པུ་ཊྛོ, མོ་ནེ་ཡྻཾ ཨུ་ཏྟ་མཾ པ་དཾ’’.
༧༠༦. ‘‘མོ་ནེ་ཡྻཾ ཏེ ཨུ་པ་ཉྙི་སྶཾ, (ཨི་ཏི བྷ་ག་ཝཱ) དུ་ཀྐ་རཾ དུ་ར་བྷི་ས་མྦྷ་ཝཾ;
ཧ་ནྡ ཏེ ནཾ པ་ཝ་ཀྑཱ་མི, ས་ནྠ་མྦྷ་སྶུ ད་ལ༹ྷོ བྷ་ཝ.
༧༠༧. ‘‘ས་མཱ་ན་བྷཱ་གཾ ཀུ་བྦེ་ཐ, གཱ་མེ ཨ་ཀྐུ་ཊྛ་ཝ་ནྡི་ཏཾ;
མ་ནོ་པ་དོ་སཾ ར་ཀྑེ་ཡྻ, ས་ནྟོ ཨ་ནུ་ཎྞ་ཏོ ཙ་རེ.
༧༠༨. ‘‘ཨུ་ཙྩཱ་ཝ་ཙཱ ནི་ཙྪ་ར་ནྟི, དཱ་ཡེ ཨ་གྒི་སི་ཁཱུ་པ་མཱ;
ནཱ་རི་ཡོ མུ་ནིཾ པ་ལོ་བྷེ་ནྟི, ཏཱ་སུ ཏཾ མཱ པ་ལོ་བྷ་ཡུཾ.
༧༠༩. ‘‘ཝི་ར་ཏོ མེ་ཐུ་ནཱ དྷ་མྨཱ, ཧི་ཏྭཱ ཀཱ་མེ པ་རོ་པ་རེ [པ་རོ་ཝ་རེ (སཱི. པཱི.), ཝ་རཱ་ཝ་རེ (སྱཱ.)];
ཨ་ཝི་རུ་དྡྷོ ཨ་སཱ་ར་ཏྟོ, པཱ་ཎེ་སུ ཏ་ས་ཐཱ་ཝ་རེ.
༧༡༠. ‘‘ཡ་ཐཱ ཨ་ཧཾ ཏ་ཐཱ ཨེ་ཏེ, ཡ་ཐཱ ཨེ་ཏེ ཏ་ཐཱ ཨ་ཧཾ;
ཨ་ཏྟཱ་ནཾ ཨུ་པ་མཾ ཀ་ཏྭཱ, ན ཧ་ནེ་ཡྻ ན གྷཱ་ཏ་ཡེ.
༧༡༡. ‘‘ཧི་ཏྭཱ ཨི་ཙྪ་ཉྩ ལོ་བྷ་ཉྩ, ཡ་ཏྠ ས་ཏྟོ པུ་ཐུ་ཛྫ་ནོ;
ཙ་ཀྑུ་མཱ པ་ཊི་པ་ཛྫེ་ཡྻ, ཏ་རེ་ཡྻ ན་ར་ཀཾ ཨི་མཾ.
༧༡༢. ‘‘ཨཱུ་ནཱུ་ད་རོ མི་ཏཱ་ཧཱ་རོ, ཨ་པྤི་ཙྪ་སྶ ཨ་ལོ་ལུ་པོ;
ས་དཱ [ས ཝེ (པཱི.)] ཨི་ཙྪཱ་ཡ ནི་ཙྪཱ་ཏོ, ཨ་ནི་ཙྪོ ཧོ་ཏི ནི་བྦུ་ཏོ.
༧༡༣. ‘‘ས པི་ཎྜ་ཙཱ་རཾ ཙ་རི་ཏྭཱ, ཝ་ན་ནྟ་མ་བྷི་ཧཱ་ར་ཡེ;
ཨུ་པ་ཊྛི་ཏོ རུ་ཀྑ་མཱུ་ལ་སྨིཾ, ཨཱ་ས་ནཱུ་པ་ག་ཏོ མུ་ནི.
༧༡༤. ‘‘ས ཛྷཱ་ན་པ་སུ་ཏོ དྷཱི་རོ, ཝ་ན་ནྟེ ར་མི་ཏོ སི་ཡཱ;
ཛྷཱ་ཡེ་ཐ རུ་ཀྑ་མཱུ་ལ་སྨིཾ, ཨ་ཏྟཱ་ན་མ་བྷི་ཏོ་ས་ཡཾ.
༧༡༥. ‘‘ཏ་ཏོ ར་ཏྱཱ ཝི་ཝ་སཱ་ནེ [ཝི་ཝ་ས་ནེ (སཱི. སྱཱ. པཱི.)], གཱ་མ་ནྟ་མ་བྷི་ཧཱ་ར་ཡེ;
ཨ་ཝ྄ཧཱ་ནཾ ནཱ་བྷི་ན་ནྡེ་ཡྻ, ཨ་བྷི་ཧཱ་ར་ཉྩ གཱ་མ་ཏོ.
༧༡༦. ‘‘ན མུ་ནཱི གཱ་མ་མཱ་ག་མྨ, ཀུ་ལེ་སུ ས་ཧ་སཱ ཙ་རེ;
གྷཱ་སེ་ས་ནཾ ཚི་ནྣ་ཀ་ཐོ, ན ཝཱ་ཙཾ པ་ཡུ་ཏཾ བྷ་ཎེ.
༧༡༧. ‘‘ཨ་ལ་ཏྠཾ ཡ་དི་དཾ སཱ་དྷུ, ནཱ་ལ་ཏྠཾ ཀུ་ས་ལཾ ཨི་ཏི;
ཨུ་བྷ་ཡེ་ནེ་ཝ སོ ཏཱ་དཱི, རུ་ཀྑཾ་ཝུ་པ་ནི་ཝ་ཏྟ་ཏི [རུ་ཀྑཾ་ཝུ’པ་ཏི་ཝ་ཏྟ་ཏི (ཀ.), རུ་ཀྑཾ་ཝ ཨུ་པཱ་ཏི་ཝ་ཏྟ་ཏི (སྱཱ.)].
༧༡༨. ‘‘ས པ་ཏྟ་པཱ་ཎི ཝི་ཙ་ར་ནྟོ, ཨ་མཱུ་གོ མཱུ་ག་ས་མྨ་ཏོ;
ཨ་པྤཾ དཱ་ནཾ ན ཧཱི་ལེ༹་ཡྻ, དཱ་ཏཱ་རཾ ནཱ་ཝ་ཛཱ་ནི་ཡཱ.
༧༡༩. ‘‘ཨུ་ཙྩཱ་ཝ་ཙཱ ཧི པ་ཊི་པ་དཱ, ས་མ་ཎེ་ན པ་ཀཱ་སི་ཏཱ;
ན པཱ་རཾ དི་གུ་ཎཾ ཡ་ནྟི, ན་ཡི་དཾ ཨེ་ཀ་གུ་ཎཾ མུ་ཏཾ.
༧༢༠. ‘‘ཡ་སྶ ཙ ཝི་ས་ཏཱ ན་ཏྠི, ཚི་ནྣ་སོ་ཏ་སྶ བྷི་ཀྑུ་ནོ;
ཀི་ཙྩཱ་ཀི་ཙྩ་པྤ་ཧཱི་ན་སྶ, པ་རི་ལཱ༹་ཧོ ན ཝི་ཛྫ་ཏི.
༧༢༡. ‘‘མོ་ནེ་ཡྻཾ ཏེ ཨུ་པ་ཉྙི་སྶཾ, ཁུ་ར་དྷཱ་རཱུ་པ་མོ བྷ་ཝེ;
ཛི་ཝ྄ཧཱ་ཡ ཏཱ་ལུ་མཱ་ཧ་ཙྩ, ཨུ་ད་རེ ས་ཉྙ་ཏོ སི་ཡཱ.
༧༢༢. ‘‘ཨ་ལཱི་ན་ཙི་ཏྟོ ཙ སི་ཡཱ, ན ཙཱ་པི བ་ཧུ ཙི་ནྟ་ཡེ;
ནི་རཱ་མ་ག་ནྡྷོ ཨ་སི་ཏོ, བྲ་ཧྨ་ཙ་རི་ཡ་པ་རཱ་ཡ་ཎོ.
༧༢༣. ‘‘ཨེ་ཀཱ་ས་ན་སྶ སི་ཀྑེ་ཐ, ས་མ་ཎཱུ་པཱ་ས་ན་སྶ ཙ;
ཨེ་ཀ་ཏྟཾ མོ་ན་མ་ཀྑཱ་ཏཾ, ཨེ་ཀོ ཙེ ཨ་བྷི་ར་མི་སྶ་སི;
ཨ་ཐ བྷཱ་ཧི་སི [བྷཱ་སི་ཧི (སཱི. སྱཱ. པཱི.)] ད་ས་དི་སཱ.
༧༢༤. ‘‘སུ་ཏྭཱ དྷཱི་རཱ་ནཾ ནི་གྒྷོ་སཾ, ཛྷཱ་ཡཱི་ནཾ ཀཱ་མ་ཙཱ་གི་ནཾ;
ཏ་ཏོ ཧི་རི་ཉྩ ས་དྡྷ་ཉྩ, བྷི་ཡྻོ ཀུ་བྦེ་ཐ མཱ་མ་ཀོ.
༧༢༥. ‘‘ཏཾ ན་དཱི་ཧི ཝི་ཛཱ་ནཱ་ཐ, སོ་བྦྷེ་སུ པ་ད་རེ་སུ ཙ;
ས་ཎ་ནྟཱ ཡ་ནྟི ཀུ་སོ་བྦྷཱ [ཀུ་སྶུ་བྦྷཱ (སཱི.)], ཏུ་ཎྷཱི་ཡ་ནྟི མ་ཧོ་ད་དྷཱི.
༧༢༦. ‘‘ཡ་དཱུ་ན་ཀཾ ཏཾ ས་ཎ་ཏི, ཡཾ པཱུ་རཾ ས་ནྟ་མེ་ཝ ཏཾ;
ཨ་ཌྜྷ་ཀུ་མྦྷཱུ་པ་མོ བཱ་ལོ, ར་ཧ་དོ པཱུ་རོ་ཝ པ་ཎྜི་ཏོ.
༧༢༧. ‘‘ཡཾ ས་མ་ཎོ བ་ཧུཾ བྷཱ་ས་ཏི, ཨུ་པེ་ཏཾ ཨ་ཏྠ་ས་ཉྷི་ཏཾ;
ཛཱ་ནཾ སོ དྷ་མྨཾ དེ་སེ་ཏི, ཛཱ་ནཾ སོ བ་ཧུ བྷཱ་ས་ཏི.
༧༢༨. ‘‘ཡོ ཙ ཛཱ་ནཾ སཾ་ཡ་ཏ་ཏྟོ, ཛཱ་ནཾ ན བ་ཧུ བྷཱ་ས་ཏི;
ས མུ་ནཱི མོ་ན་མ་ར་ཧ་ཏི, ས མུ་ནཱི མོ་ན་མ་ཛ྄ཛྷ་གཱ’’ཏི.
ནཱ་ལ་ཀ་སུ་ཏྟཾ ཨེ་ཀཱ་ད་ས་མཾ ནི་ཊྛི་ཏཾ.