༨. ནཱ་ཝཱ་སུ་ཏྟཾ

༣༡༨. ཡ་སྨཱ ཧི དྷ་མྨཾ པུ་རི་སོ ཝི་ཛ་ཉྙཱ, ཨི་ནྡཾ་ཝ ནཾ དེ་ཝ་ཏཱ པཱུ་ཛ་ཡེ་ཡྻ;

སོ པཱུ་ཛི་ཏོ ཏ་སྨི པ་ས་ནྣ་ཙི་ཏྟོ, བ་ཧུ་སྶུ་ཏོ པཱ་ཏུ་ཀ་རོ་ཏི དྷ་མྨཾ.

༣༡༩. ཏ་ད་ཊྛི་ཀ་ཏྭཱ་ན ནི་ས་མྨ དྷཱི་རོ, དྷ་མྨཱ་ནུ་དྷ་མྨཾ པ་ཊི་པ་ཛྫ་མཱ་ནོ;

ཝི་ཉྙཱུ ཝི་བྷཱ་ཝཱི ནི་པུ་ཎོ ཙ ཧོ་ཏི, ཡོ ཏཱ་དི་སཾ བྷ་ཛ་ཏི ཨ་པྤ་མ་ཏྟོ.

༣༢༠. ཁུ་དྡ་ཉྩ བཱ་ལཾ ཨུ་པ་སེ་ཝ་མཱ་ནོ, ཨ་ནཱ་ག་ཏ་ཏྠ་ཉྩ ཨུ་སཱུ་ཡ་ཀ་ཉྩ;

ཨི་དྷེ་ཝ དྷ་མྨཾ ཨ་ཝི་བྷཱ་ཝ་ཡི་ཏྭཱ, ཨ་ཝི་ཏི་ཎྞ་ཀ་ངྑོ མ་ར་ཎཾ ཨུ་པེ་ཏི.

༣༢༡. ཡ་ཐཱ ན་རོ ཨཱ་པ་ག་མོ་ཏ་རི་ཏྭཱ, མ་ཧོ་ད་ཀཾ ས་ལི་ལཾ སཱི་གྷ་སོ་ཏཾ;

སོ ཝུ་ཡ྄ཧ་མཱ་ནོ ཨ་ནུ་སོ་ཏ་གཱ་མཱི, ཀིཾ སོ པ་རེ ས་ཀྑ་ཏི ཏཱ་ར་ཡེ་ཏུཾ.

༣༢༢. ཏ་ཐེ་ཝ དྷ་མྨཾ ཨ་ཝི་བྷཱ་ཝ་ཡི་ཏྭཱ, བ་ཧུ་སྶུ་ཏཱ་ནཾ ཨ་ནི་སཱ་མ་ཡ་ཏྠཾ;

ས་ཡཾ ཨ་ཛཱ་ནཾ ཨ་ཝི་ཏི་ཎྞ་ཀ་ངྑོ, ཀིཾ སོ པ་རེ ས་ཀྑ་ཏི ནི་ཛ྄ཛྷ་པེ་ཏུཾ.

༣༢༣. ཡ་ཐཱ་པི ནཱ་ཝཾ ད་ལ༹ྷ་མཱ་རུ་ཧི་ཏྭཱ, ཕི་ཡེ་ན [པི་ཡེ་ན (སཱི. སྱཱ.)] རི་ཏྟེ་ན ས་མ་ངྒི་བྷཱུ་ཏོ;

སོ ཏཱ་ར་ཡེ ཏ་ཏྠ བ་ཧཱུ་པི ཨ་ཉྙེ, ཏ་ཏྲཱུ་པ་ཡ་ཉྙཱུ ཀུ་ས་ལོ མུ་ཏཱི་མཱ [མ་ཏཱི་མཱ (སྱཱ. ཀ.)].

༣༢༤. ཨེ་ཝ་མྤི ཡོ ཝེ་ད་གུ བྷཱ་ཝི་ཏ་ཏྟོ, བ་ཧུ་སྶུ་ཏོ ཧོ་ཏི ཨ་ཝེ་དྷ་དྷ་མྨོ;

སོ ཁོ པ་རེ ནི་ཛ྄ཛྷ་པ་ཡེ པ་ཛཱ་ནཾ, སོ་ཏཱ་ཝ་དྷཱ་ནཱུ་པ་ནི་སཱུ་པ་པ་ནྣེ.

༣༢༥. ཏ་སྨཱ ཧ་ཝེ ས་པྤུ་རི་སཾ བྷ་ཛེ་ཐ, མེ་དྷཱ་ཝི་ན་ཉྩེ་ཝ བ་ཧུ་སྶུ་ཏ་ཉྩ;

ཨ་ཉྙཱ་ཡ ཨ་ཏྠཾ པ་ཊི་པ་ཛྫ་མཱ་ནོ, ཝི་ཉྙཱ་ཏ་དྷ་མྨོ ས སུ་ཁཾ [སོ སུ་ཁཾ (སཱི.)] ལ་བྷེ་ཐཱ་ཏི.

ནཱ་ཝཱ་སུ་ཏྟཾ ཨ་ཊྛ་མཾ ནི་ཊྛི་ཏཾ.