༢. ཙཱུ་ལ༹་ཝ་གྒོ
༡. ར་ཏ་ན་སུ་ཏྟཾ
༢༢༤. ཡཱ་ནཱི་དྷ བྷཱུ་ཏཱ་ནི ས་མཱ་ག་ཏཱ་ནི, བྷུ་མྨཱ་ནི [བྷཱུ་མཱ་ནི (ཀ.)] ཝཱ ཡཱ་ནི ཝ ཨ་ནྟ་ལི་ཀྑེ;
ས་བྦེ་ཝ བྷཱུ་ཏཱ སུ་མ་ནཱ བྷ་ཝ་ནྟུ, ཨ་ཐོ་པི ས་ཀྐ་ཙྩ སུ་ཎ་ནྟུ བྷཱ་སི་ཏཾ.
༢༢༥. ཏ་སྨཱ ཧི བྷཱུ་ཏཱ ནི་སཱ་མེ་ཐ ས་བྦེ, མེ་ཏྟཾ ཀ་རོ་ཐ མཱ་ནུ་སི་ཡཱ པ་ཛཱ་ཡ;
དི་ཝཱ ཙ ར་ཏྟོ ཙ ཧ་ར་ནྟི ཡེ བ་ལིཾ, ཏ་སྨཱ ཧི ནེ ར་ཀྑ་ཐ ཨ་པྤ་མ་ཏྟཱ.
༢༢༦. ཡཾ ཀི་ཉྩི ཝི་ཏྟཾ ཨི་དྷ ཝཱ ཧུ་རཾ ཝཱ, ས་གྒེ་སུ ཝཱ ཡཾ ར་ཏ་ནཾ པ་ཎཱི་ཏཾ;
ན ནོ ས་མཾ ཨ་ཏྠི ཏ་ཐཱ་ག་ཏེ་ན, ཨི་ད་མྤི བུ་དྡྷེ ར་ཏ་ནཾ པ་ཎཱི་ཏཾ;
ཨེ་ཏེ་ན ས་ཙྩེ་ན སུ་ཝ་ཏྠི ཧོ་ཏུ.
༢༢༧. ཁ་ཡཾ ཝི་རཱ་གཾ ཨ་མ་ཏཾ པ་ཎཱི་ཏཾ, ཡ་ད་ཛ྄ཛྷ་གཱ ས་ཀྱ་མུ་ནཱི ས་མཱ་ཧི་ཏོ;
ན ཏེ་ན དྷ་མྨེ་ན ས་མ་ཏྠི ཀི་ཉྩི, ཨི་ད་མྤི དྷ་མྨེ ར་ཏ་ནཾ པ་ཎཱི་ཏཾ;
ཨེ་ཏེ་ན ས་ཙྩེ་ན སུ་ཝ་ཏྠི ཧོ་ཏུ.
༢༢༨. ཡཾ བུ་དྡྷ་སེ་ཊྛོ པ་རི་ཝ་ཎྞ་ཡཱི སུ་ཙིཾ, ས་མཱ་དྷི་མཱ་ན་ནྟ་རི་ཀ་ཉྙ་མཱ་ཧུ;
ས་མཱ་དྷི་ནཱ ཏེ་ན ས་མོ ན ཝི་ཛྫ་ཏི, ཨི་ད་མྤི དྷ་མྨེ ར་ཏ་ནཾ པ་ཎཱི་ཏཾ;
ཨེ་ཏེ་ན ས་ཙྩེ་ན སུ་ཝ་ཏྠི ཧོ་ཏུ.
༢༢༩. ཡེ པུ་གྒ་ལཱ ཨ་ཊྛ ས་ཏཾ པ་ས་ཏྠཱ, ཙ་ཏྟཱ་རི ཨེ་ཏཱ་ནི ཡུ་གཱ་ནི ཧོ་ནྟི;
ཏེ ད་ཀྑི་ཎེ་ཡྻཱ སུ་ག་ཏ་སྶ སཱ་ཝ་ཀཱ, ཨེ་ཏེ་སུ དི་ནྣཱ་ནི མ་ཧ་པྥ་ལཱ་ནི;
ཨི་ད་མྤི ས་ངྒྷེ ར་ཏ་ནཾ པ་ཎཱི་ཏཾ, ཨེ་ཏེ་ན ས་ཙྩེ་ན སུ་ཝ་ཏྠི ཧོ་ཏུ.
༢༣༠. ཡེ སུ་པྤ་ཡུ་ཏྟཱ མ་ན་སཱ ད་ལ༹ྷེ་ན, ནི་ཀྐཱ་མི་ནོ གོ་ཏ་མ་སཱ་ས་ན་མྷི;
ཏེ པ་ཏྟི་པ་ཏྟཱ ཨ་མ་ཏཾ ཝི་ག་ཡ྄ཧ, ལ་དྡྷཱ མུ་དྷཱ ནི་བྦུ་ཏིཾ [ནི་བྦུ་ཏི (ཀ.)] བྷུ་ཉྫ་མཱ་ནཱ;
ཨི་ད་མྤི ས་ངྒྷེ ར་ཏ་ནཾ པ་ཎཱི་ཏཾ, ཨེ་ཏེ་ན ས་ཙྩེ་ན སུ་ཝ་ཏྠི ཧོ་ཏུ.
༢༣༡. ཡ་ཐི་ནྡ་ཁཱི་ལོ པ་ཐ་ཝི་སྶི་ཏོ [པ་ད་ཝི་སྶི་ཏོ (ཀ. སཱི.), པ་ཋ་ཝིཾ སི་ཏོ (ཀ. སཱི. སྱཱ. ཀཾ. པཱི.)] སི་ཡཱ, ཙ་ཏུ་བྦྷི ཝཱ་ཏེ་ཧི ཨ་ས་མྤ་ཀ་མྤི་ཡོ;
ཏ་ཐཱུ་པ་མཾ ས་པྤུ་རི་སཾ ཝ་དཱ་མི, ཡོ ཨ་རི་ཡ་ས་ཙྩཱ་ནི ཨ་ཝེ་ཙྩ པ་སྶ་ཏི;
ཨི་ད་མྤི ས་ངྒྷེ ར་ཏ་ནཾ པ་ཎཱི་ཏཾ, ཨེ་ཏེ་ན ས་ཙྩེ་ན སུ་ཝ་ཏྠི ཧོ་ཏུ.
༢༣༢. ཡེ ཨ་རི་ཡ་ས་ཙྩཱ་ནི ཝི་བྷཱ་ཝ་ཡ་ནྟི, ག་མྦྷཱི་ར་པ་ཉྙེ་ན སུ་དེ་སི་ཏཱ་ནི;
ཀི་ཉྩཱ་པི ཏེ ཧོ་ནྟི བྷུ་སཾ པ་མ་ཏྟཱ, ན ཏེ བྷ་ཝཾ ཨ་ཊྛ་མ་མཱ་དི་ཡ་ནྟི;
ཨི་ད་མྤི ས་ངྒྷེ ར་ཏ་ནཾ པ་ཎཱི་ཏཾ, ཨེ་ཏེ་ན ས་ཙྩེ་ན སུ་ཝ་ཏྠི ཧོ་ཏུ.
༢༣༣. ས་ཧཱ་ཝ་སྶ ད་སྶ་ན་ས་མྤ་དཱ་ཡ [ས་ཧཱ་ཝ་ས་དྡ་སྶ་ན་ས་མྤ་དཱ་ཡ (ཀ.)], ཏ་ཡ་སྶུ དྷ་མྨཱ ཛ་ཧི་ཏཱ བྷ་ཝ་ནྟི;
ས་ཀྐཱ་ཡ་དི་ཊྛི ཝི་ཙི་ཀི་ཙྪི་ཏ་ཉྩ, སཱི་ལ་བྦ་ཏཾ ཝཱ་པི ཡ་ད་ཏྠི ཀི་ཉྩི.
༢༣༤. ཙ་ཏཱུ་ཧ་པཱ་ཡེ་ཧི ཙ ཝི་པྤ་མུ་ཏྟོ, ཚ་ཙྩཱ་བྷི་ཋཱ་ནཱ་ནི [ཚ ཙཱ་བྷི་ཋཱ་ནཱ་ནི (སཱི. སྱཱ.)] བྷ་བྦ ཀཱ་ཏུཾ [ཨ་བྷ་བྦོ ཀཱ་ཏུཾ (སཱི.)];
ཨི་ད་མྤི ས་ངྒྷེ ར་ཏ་ནཾ པ་ཎཱི་ཏཾ, ཨེ་ཏེ་ན ས་ཙྩེ་ན སུ་ཝ་ཏྠི ཧོ་ཏུ.
༢༣༥. ཀི་ཉྩཱ་པི སོ ཀ་མྨ [ཀ་མྨཾ (སཱི. སྱཱ. ཀཾ. པཱི.)] ཀ་རོ་ཏི པཱ་པ་ཀཾ, ཀཱ་ཡེ་ན ཝཱ་ཙཱ ཨུ་ད ཙེ་ཏ་སཱ ཝཱ;
ཨ་བྷ་བྦ [ཨ་བྷ་བྦོ (བ་ཧཱུ་སུ)] སོ ཏ་སྶ པ་ཊི་ཙྪ་དཱ་ཡ [པ་ཊི་ཙྪཱ་དཱ་ཡ (སཱི.)], ཨ་བྷ་བྦ་ཏཱ དི་ཊྛ་པ་ད་སྶ ཝུ་ཏྟཱ;
ཨི་ད་མྤི ས་ངྒྷེ ར་ཏ་ནཾ པ་ཎཱི་ཏཾ, ཨེ་ཏེ་ན ས་ཙྩེ་ན སུ་ཝ་ཏྠི ཧོ་ཏུ.
༢༣༦. ཝ་ན་པྤ་གུ་མྦེ ཡ་ཐ [ཡ་ཐཱ (སཱི. སྱཱ.)] ཕུ་སྶི་ཏ་གྒེ, གི་མྷཱ་ན་མཱ་སེ པ་ཋ་མ་སྨིཾ [པ་ཋ་མ་སྨི (?)] གི་མྷེ;
ཏ་ཐཱུ་པ་མཾ དྷ་མྨ་ཝ་རཾ ཨ་དེ་ས་ཡི [ཨ་དེ་ས་ཡཱི (སཱི.)], ནི་བྦཱ་ན་གཱ་མིཾ པ་ར་མཾ ཧི་ཏཱ་ཡ;
ཨི་ད་མྤི བུ་དྡྷེ ར་ཏ་ནཾ པ་ཎཱི་ཏཾ, ཨེ་ཏེ་ན ས་ཙྩེ་ན སུ་ཝ་ཏྠི ཧོ་ཏུ.
༢༣༧. ཝ་རོ ཝ་ར་ཉྙཱུ ཝ་ར་དོ ཝ་རཱ་ཧ་རོ, ཨ་ནུ་ཏྟ་རོ དྷ་མྨ་ཝ་རཾ ཨ་དེ་ས་ཡི;
ཨི་ད་མྤི བུ་དྡྷེ ར་ཏ་ནཾ པ་ཎཱི་ཏཾ, ཨེ་ཏེ་ན ས་ཙྩེ་ན སུ་ཝ་ཏྠི ཧོ་ཏུ.
༢༣༨. ཁཱི་ཎཾ པུ་རཱ་ཎཾ ན་ཝ ན་ཏྠི ས་མྦྷ་ཝཾ, ཝི་ར་ཏྟ་ཙི་ཏྟཱ་ཡ་ཏི་ཀེ བྷ་ཝ་སྨིཾ;
ཏེ ཁཱི་ཎ་བཱི་ཛཱ ཨ་ཝི་རཱུ་ལ༹ྷི་ཚ་ནྡཱ, ནི་བྦ་ནྟི དྷཱི་རཱ ཡ་ཐཱ་ཡཾ [ཡ་ཐ་ཡཾ (ཀ.)] པ་དཱི་པོ;
ཨི་ད་མྤི ས་ངྒྷེ ར་ཏ་ནཾ པ་ཎཱི་ཏཾ, ཨེ་ཏེ་ན ས་ཙྩེ་ན སུ་ཝ་ཏྠི ཧོ་ཏུ.
༢༣༩. ཡཱ་ནཱི་དྷ བྷཱུ་ཏཱ་ནི ས་མཱ་ག་ཏཱ་ནི, བྷུ་མྨཱ་ནི ཝཱ ཡཱ་ནི ཝ ཨ་ནྟ་ལི་ཀྑེ;
ཏ་ཐཱ་ག་ཏཾ དེ་ཝ་མ་ནུ་སྶ་པཱུ་ཛི་ཏཾ, བུ་དྡྷཾ ན་མ་སྶཱ་མ སུ་ཝ་ཏྠི ཧོ་ཏུ.
༢༤༠. ཡཱ་ནཱི་དྷ བྷཱུ་ཏཱ་ནི ས་མཱ་ག་ཏཱ་ནི, བྷུ་མྨཱ་ནི ཝཱ ཡཱ་ནི ཝ ཨ་ནྟ་ལི་ཀྑེ;
ཏ་ཐཱ་ག་ཏཾ དེ་ཝ་མ་ནུ་སྶ་པཱུ་ཛི་ཏཾ, དྷ་མྨཾ ན་མ་སྶཱ་མ སུ་ཝ་ཏྠི ཧོ་ཏུ.
༢༤༡. ཡཱ་ནཱི་དྷ བྷཱུ་ཏཱ་ནི ས་མཱ་ག་ཏཱ་ནི, བྷུ་མྨཱ་ནི ཝཱ ཡཱ་ནི ཝ ཨ་ནྟ་ལི་ཀྑེ;
ཏ་ཐཱ་ག་ཏཾ དེ་ཝ་མ་ནུ་སྶ་པཱུ་ཛི་ཏཾ, ས་ངྒྷཾ ན་མ་སྶཱ་མ སུ་ཝ་ཏྠི ཧོ་ཏཱུ་ཏི.
ར་ཏ་ན་སུ་ཏྟཾ པ་ཋ་མཾ ནི་ཊྛི་ཏཾ.
༢. ཨཱ་མ་ག་ནྡྷ་སུ་ཏྟཾ
༢༤༢. ‘‘སཱ་མཱ་ཀ་ཙི་ངྒཱུ་ལ་ཀ་ཙཱི་ན་ཀཱ་ནི ཙ, པ་ཏྟ་པྥ་ལཾ མཱུ་ལ་ཕ་ལཾ ག་ཝི་པྥ་ལཾ;
དྷ་མྨེ་ན ལ་དྡྷཾ ས་ཏ་མ་སྣ་མཱ་ནཱ [ས་ཏ་མ་ས་མཱ་ནཱ (སཱི. པཱི.), ས་ཏ་མ་སྶ་མཱ་ནཱ (སྱཱ. ཀཾ.)], ན ཀཱ་མ་ཀཱ་མཱ ཨ་ལི་ཀཾ བྷ་ཎ་ནྟི.
༢༤༣. ‘‘ཡ་ད་སྣ་མཱ་ནོ སུ་ཀ་ཏཾ སུ་ནི་ཊྛི་ཏཾ, པ་རེ་ཧི དི་ནྣཾ པ་ཡ་ཏཾ པ་ཎཱི་ཏཾ;
སཱ་ལཱི་ན་མ་ནྣཾ པ་རི་བྷུ་ཉྫ་མཱ་ནོ, སོ བྷུ་ཉྫ་སཱི ཀ་སྶ་པ ཨཱ་མ་ག་ནྡྷཾ.
༢༤༤. ‘‘ན ཨཱ་མ་ག་ནྡྷོ མ་མ ཀ་པྤ་ཏཱི་ཏི, ཨི་ཙྩེ་ཝ ཏྭཾ བྷཱ་ས་སི བྲ་ཧྨ་བ་ནྡྷུ;
སཱ་ལཱི་ན་མ་ནྣཾ པ་རི་བྷུ་ཉྫ་མཱ་ནོ, ས་ཀུ་ནྟ་མཾ་སེ་ཧི སུ་ས་ངྑ་ཏེ་ཧི;
པུ་ཙྪཱ་མི ཏཾ ཀ་སྶ་པ ཨེ་ཏ་མ་ཏྠཾ, ཀ་ཐཾ པ་ཀཱ་རོ ཏ་ཝ ཨཱ་མ་ག་ནྡྷོ’’.
༢༤༥. ‘‘པཱ་ཎཱ་ཏི་པཱ་ཏོ ཝ་དྷ་ཚེ་ད་བ་ནྡྷ་ནཾ, ཐེ་ཡྻཾ མུ་སཱ་ཝཱ་དོ ནི་ཀ་ཏི་ཝ་ཉྩ་ནཱ་ནི ཙ;
ཨ་ཛ྄ཛྷེ་ན་ཀུ་ཏྟཾ [ཨ་ཛ྄ཛྷེ་ན ཀུ་ཛྫཾ (སཱི. པཱི.)] པ་ར་དཱ་ར་སེ་ཝ་ནཱ, ཨེ་སཱ་མ་ག་ནྡྷོ ན ཧི མཾ་ས་བྷོ་ཛ་ནཾ.
༢༤༦. ‘‘ཡེ ཨི་དྷ ཀཱ་མེ་སུ ཨ་ས་ཉྙ་ཏཱ ཛ་ནཱ, ར་སེ་སུ གི་དྡྷཱ ཨ་སུ་ཙི་བྷཱ་ཝ་མ་སྶི་ཏཱ [ཨ་སུ་ཙཱི་ཀ་མི་སྶི་ཏཱ (སཱི. སྱཱ. ཀཾ. པཱི.)];
ན་ཏྠི་ཀ་དི་ཊྛཱི ཝི་ས་མཱ དུ་ར་ནྣ་ཡཱ, ཨེ་སཱ་མ་ག་ནྡྷོ ན ཧི མཾ་ས་བྷོ་ཛ་ནཾ.
༢༤༧. ‘‘ཡེ ལཱུ་ཁ་སཱ དཱ་རུ་ཎཱ པི་ཊྛི་མཾ་སི་ཀཱ [ཡེ ལཱུ་ཁ་ར་སཱ དཱ་རུ་ཎཱ པ་ར་པི་ཊྛི་མཾ་སི་ཀཱ (ཀ.)], མི་ཏྟ་དྡུ་ནོ ནི་ཀྐ་རུ་ཎཱ་ཏི་མཱ་ནི་ནོ;
ཨ་དཱ་ན་སཱི་ལཱ ན ཙ དེ་ནྟི ཀ་སྶ་ཙི, ཨེ་སཱ་མ་ག་ནྡྷོ ན ཧི མཾ་ས་བྷོ་ཛ་ནཾ.
༢༤༨. ‘‘ཀོ་དྷོ མ་དོ ཐ་མྦྷོ པ་ཙྩུ་པ་ཊྛཱ་པ་ནཱ [པ་ཙྩུ་ཊྛཱ་པ་ནཱ ཙ (སཱི. སྱཱ.), པ་ཙྩུ་ཊྛཱ་པ་ནཱ (པཱི.)], མཱ་ཡཱ ཨུ་སཱུ་ཡཱ བྷ་སྶ་ས་མུ་སྶ་ཡོ ཙ;
མཱ་ནཱ་ཏི་མཱ་ནོ ཙ ཨ་ས་བྦྷི ས་ནྠ་ཝོ, ཨེ་སཱ་མ་ག་ནྡྷོ ན ཧི མཾ་ས་བྷོ་ཛ་ནཾ.
༢༤༩. ‘‘ཡེ པཱ་པ་སཱི་ལཱ ཨི་ཎ་གྷཱ་ཏ་སཱུ་ཙ་ཀཱ, ཝོ་ཧཱ་ར་ཀཱུ་ཊཱ ཨི་དྷ པཱ་ཊི་རཱུ་པི་ཀཱ [པཱ་ཏི་རཱུ་པི་ཀཱ (?)];
ན་རཱ་དྷ་མཱ ཡེ་དྷ ཀ་རོ་ནྟི ཀི་བྦི་སཾ, ཨེ་སཱ་མ་ག་ནྡྷོ ན ཧི མཾ་ས་བྷོ་ཛ་ནཾ.
༢༥༠. ‘‘ཡེ ཨི་དྷ པཱ་ཎེ་སུ ཨ་ས་ཉྙ་ཏཱ ཛ་ནཱ, པ་རེ་ས་མཱ་དཱ་ཡ ཝི་ཧེ་ས་མུ་ཡྻུ་ཏཱ;
དུ་སྶཱི་ལ་ལུ་དྡཱ ཕ་རུ་སཱ ཨ་ནཱ་ད་རཱ, ཨེ་སཱ་མ་ག་ནྡྷོ ན ཧི མཾ་ས་བྷོ་ཛ་ནཾ.
༢༥༡. ‘‘ཨེ་ཏེ་སུ གི་དྡྷཱ ཝི་རུ་དྡྷཱ་ཏི་པཱ་ཏི་ནོ, ནི་ཙྩུ་ཡྻུ་ཏཱ པེ་ཙྩ ཏ་མཾ ཝ་ཛ་ནྟི ཡེ;
པ་ཏ་ནྟི ས་ཏྟཱ ནི་ར་ཡཾ ཨ་ཝཾ་སི་རཱ, ཨེ་སཱ་མ་ག་ནྡྷོ ན ཧི མཾ་ས་བྷོ་ཛ་ནཾ.
༢༥༢. ‘‘ན མ་ཙྪ་མཾ་སཱ་ན་མ་ནཱ་ས་ཀ་ཏྟཾ [ན མ་ཙྪ་མཾ་སཾ ན ཨ་ནཱ་ས་ཀ་ཏྟཾ (སཱི. ཨ་ཊྛ མཱུ་ལ་པཱ་ཋོ), ན མཾ་ཙྪ་མཾ་སཱ་ནཱ་ནཱ་ས་ཀ་ཏྟཾ (སྱཱ. ཀ.)], ན ན་གྒི་ཡཾ ན མུ་ཎྜི་ཡཾ ཛ་ཊཱ་ཛ་ལླཾ;
ཁ་རཱ་ཛི་ནཱ་ནི ནཱ་གྒི་ཧུ་ཏྟ་སྶུ་པ་སེ་ཝ་ནཱ, ཡེ ཝཱ་པི ལོ་ཀེ ཨ་མ་རཱ བ་ཧཱུ ཏ་པཱ;
མ་ནྟཱ་ཧུ་ཏཱི ཡ་ཉྙ་མུ་ཏཱུ་པ་སེ་ཝ་ནཱ, སོ་དྷེ་ནྟི མ་ཙྩཾ ཨ་ཝི་ཏི་ཎྞ་ཀ་ངྑཾ.
༢༥༣. ‘‘ཡོ ཏེ་སུ [སོ་ཏེ་སུ (སཱི. པཱི.)] གུ་ཏྟོ ཝི་དི་ཏི་ནྡྲི་ཡོ ཙ་རེ, དྷ་མྨེ ཋི་ཏོ ཨ་ཛྫ་ཝ་མ་དྡ་ཝེ ར་ཏོ;
ས་ངྒཱ་ཏི་གོ ས་བྦ་དུ་ཀྑ་པྤ་ཧཱི་ནོ, ན ལི་པྤ་ཏི [ན ལི་མྤ་ཏི (སྱཱ. ཀཾ ཀ.)] དི་ཊྛ་སུ་ཏེ་སུ དྷཱི་རོ’’.
༢༥༤. ཨི་ཙྩེ་ཏ་མ་ཏྠཾ བྷ་ག་ཝཱ པུ་ན་པྤུ་ནཾ, ཨ་ཀྑཱ་སི ནཾ [ཏཾ (སཱི. པཱི.)] ཝེ་ད་ཡི མ་ནྟ་པཱ་ར་གཱུ;
ཙི་ཏྲཱ་ཧི གཱ་ཐཱ་ཧི མུ་ནཱི པ་ཀཱ་ས་ཡི, ནི་རཱ་མ་ག་ནྡྷོ ཨ་སི་ཏོ དུ་ར་ནྣ་ཡོ.
༢༥༥. སུ་ཏྭཱ་ན བུ་དྡྷ་སྶ སུ་བྷཱ་སི་ཏཾ པ་དཾ, ནི་རཱ་མ་ག་ནྡྷཾ ས་བྦ་དུ་ཀྑ་པྤ་ནཱུ་ད་ནཾ;
ནཱི་ཙ་མ་ནོ ཝ་ནྡི ཏ་ཐཱ་ག་ཏ་སྶ, ཏ་ཏྠེ་ཝ པ་བྦ་ཛྫ་མ་རོ་ཙ་ཡི་ཏྠཱ་ཏི.
ཨཱ་མ་ག་ནྡྷ་སུ་ཏྟཾ དུ་ཏི་ཡཾ ནི་ཊྛི་ཏཾ.
༣. ཧི་རི་སུ་ཏྟཾ
༢༥༦. ཧི་རིཾ ཏ་ར་ནྟཾ ཝི་ཛི་གུ་ཙྪ་མཱ་ནཾ, ཏ་ཝཱ་ཧ་མ་སྨི [ས་ཁཱ་ཧ་མ་སྨི (སཱི. སྱཱ. ཀཾ. པཱི.)] ཨི་ཏི བྷཱ་ས་མཱ་ནཾ;
ས་ཡ྄ཧཱ་ནི ཀ་མྨཱ་ནི ཨ་ནཱ་དི་ཡ་ནྟཾ, ནེ་སོ མ་མ་ནྟི ཨི་ཏི ནཾ ཝི་ཛ་ཉྙཱ.
༢༥༧. ཨ་ན་ནྭ་ཡཾ [ཨ་ཏྠ་ནྭ་ཡཾ (ཀ.)] པི་ཡཾ ཝཱ་ཙཾ, ཡོ མི་ཏྟེ་སུ པ་ཀུ་བྦ་ཏི;
ཨ་ཀ་རོ་ནྟཾ བྷཱ་ས་མཱ་ནཾ, པ་རི་ཛཱ་ན་ནྟི པ་ཎྜི་ཏཱ.
༢༥༨. ན སོ མི་ཏྟོ ཡོ ས་དཱ ཨ་པྤ་མ་ཏྟོ, བྷེ་དཱ་ས་ངྐཱི ར་ནྡྷ་མེ་ཝཱ་ནུ་པ་སྶཱི;
ཡ་སྨི་ཉྩ སེ་ཏི ཨུ་ར་སཱི་ཝ པུ་ཏྟོ, ས ཝེ མི་ཏྟོ ཡོ པ་རེ་ཧི ཨ་བྷེ་ཛྫོ.
༢༥༩. པཱ་མུ་ཛྫ་ཀ་ར་ཎཾ ཋཱ་ནཾ, པ་སཾ་སཱ་ཝ་ཧ་ནཾ སུ་ཁཾ;
ཕ་ལཱ་ནི་སཾ་སོ བྷཱ་ཝེ་ཏི, ཝ་ཧ་ནྟོ པོ་རི་སཾ དྷུ་རཾ.
༢༦༠. པ་ཝི་ཝེ་ཀ་ར་སཾ པི་ཏྭཱ, ར་སཾ ཨུ་པ་ས་མ་སྶ ཙ;
ནི་དྡ་རོ ཧོ་ཏི ནི་པྤཱ་པོ, དྷ་མྨ་པཱི་ཏི་ར་སཾ པི་ཝ་ནྟི.
ཧི་རི་སུ་ཏྟཾ ཏ་ཏི་ཡཾ ནི་ཊྛི་ཏཾ.
༤. མ་ངྒ་ལ་སུ་ཏྟཾ
ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཨ་ཐ ཁོ ཨ་ཉྙ་ཏ་རཱ དེ་ཝ་ཏཱ ཨ་བྷི་ཀྐ་ནྟཱ་ཡ ར་ཏྟི་ཡཱ ཨ་བྷི་ཀྐ་ནྟ་ཝ་ཎྞཱ ཀེ་ཝ་ལ་ཀ་པྤཾ ཛེ་ཏ་ཝ་ནཾ ཨོ་བྷཱ་སེ་ཏྭཱ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ཨ་ཊྛཱ་སི. ཨེ་ཀ་མ་ནྟཾ ཋི་ཏཱ ཁོ སཱ དེ་ཝ་ཏཱ བྷ་ག་ཝ་ནྟཾ གཱ་ཐཱ་ཡ ཨ་ཛ྄ཛྷ་བྷཱ་སི –
༢༦༡. ‘‘བ་ཧཱུ དེ་ཝཱ མ་ནུ་སྶཱ ཙ, མ་ངྒ་ལཱ་ནི ཨ་ཙི་ནྟ་ཡུཾ;
ཨཱ་ཀ་ངྑ་མཱ་ནཱ སོ་ཏྠཱ་ནཾ, བྲཱུ་ཧི མ་ངྒ་ལ་མུ་ཏྟ་མཾ’’.
༢༦༢. ‘‘ཨ་སེ་ཝ་ནཱ ཙ བཱ་ལཱ་ནཾ, པ་ཎྜི་ཏཱ་ན་ཉྩ སེ་ཝ་ནཱ;
པཱུ་ཛཱ ཙ པཱུ་ཛ་ནེ་ཡྻཱ་ནཾ [པཱུ་ཛ་ནཱི་ཡཱ་ནཾ (སཱི. སྱཱ. ཀཾ. པཱི.)], ཨེ་ཏཾ མ་ངྒ་ལ་མུ་ཏྟ་མཾ.
༢༦༣. ‘‘པ་ཏི་རཱུ་པ་དེ་ས་ཝཱ་སོ ཙ, པུ་བྦེ ཙ ཀ་ཏ་པུ་ཉྙ་ཏཱ;
ཨ་ཏྟ་ས་མྨཱ་པ་ཎི་དྷི [ཨ་ཏྟ་ས་མྨཱ་པ་ཎཱི་དྷཱི (ཀ་ཏྠ་ཙི)] ཙ, ཨེ་ཏཾ མ་ངྒ་ལ་མུ་ཏྟ་མཾ.
༢༦༤. ‘‘བཱ་ཧུ་ས་ཙྩ་ཉྩ སི་པྤ་ཉྩ, ཝི་ན་ཡོ ཙ སུ་སི་ཀྑི་ཏོ;
སུ་བྷཱ་སི་ཏཱ ཙ ཡཱ ཝཱ་ཙཱ, ཨེ་ཏཾ མ་ངྒ་ལ་མུ་ཏྟ་མཾ.
༢༦༥. ‘‘མཱ་ཏཱ་པི་ཏུ ཨུ་པ་ཊྛཱ་ནཾ, པུ་ཏྟ་དཱ་ར་སྶ ས་ངྒ་ཧོ;
ཨ་ནཱ་ཀུ་ལཱ ཙ ཀ་མྨ་ནྟཱ, ཨེ་ཏཾ མ་ངྒ་ལ་མུ་ཏྟ་མཾ.
༢༦༦. ‘‘དཱ་ན་ཉྩ དྷ་མྨ་ཙ་རི་ཡཱ ཙ, ཉཱ་ཏ་ཀཱ་ན་ཉྩ ས་ངྒ་ཧོ;
ཨ་ན་ཝ་ཛྫཱ་ནི ཀ་མྨཱ་ནི, ཨེ་ཏཾ མ་ངྒ་ལ་མུ་ཏྟ་མཾ.
༢༦༧. ‘‘ཨཱ་ར་ཏཱི ཝི་ར་ཏཱི པཱ་པཱ, མ་ཛྫ་པཱ་ནཱ ཙ སཾ་ཡ་མོ;
ཨ་པྤ་མཱ་དོ ཙ དྷ་མྨེ་སུ, ཨེ་ཏཾ མ་ངྒ་ལ་མུ་ཏྟ་མཾ.
༢༦༨. ‘‘གཱ་ར་ཝོ ཙ ནི་ཝཱ་ཏོ ཙ, ས་ནྟུ་ཊྛི ཙ ཀ་ཏ་ཉྙུ་ཏཱ;
ཀཱ་ལེ་ན དྷ་མྨ་སྶ་ཝ་ནཾ [དྷ་མྨ་ས་ཝ་ཎཾ (ཀ་ཏྠ་ཙི), དྷ་མྨ་ས་ཝ་ནཾ (སཱི. ཀ.)], ཨེ་ཏཾ མ་ངྒ་ལ་མུ་ཏྟ་མཾ.
༢༦༩. ‘‘ཁ་ནྟཱི ཙ སོ་ཝ་ཙ་སྶ་ཏཱ, ས་མ་ཎཱ་ན་ཉྩ ད་སྶ་ནཾ;
ཀཱ་ལེ་ན དྷ་མྨ་སཱ་ཀ་ཙྪཱ, ཨེ་ཏཾ མ་ངྒ་ལ་མུ་ཏྟ་མཾ.
༢༧༠. ‘‘ཏ་པོ ཙ བྲ་ཧྨ་ཙ་རི་ཡ་ཉྩ, ཨ་རི་ཡ་ས་ཙྩཱ་ན ད་སྶ་ནཾ;
ནི་བྦཱ་ན་ས་ཙྪི་ཀི་རི་ཡཱ ཙ, ཨེ་ཏཾ མ་ངྒ་ལ་མུ་ཏྟ་མཾ.
༢༧༡. ‘‘ཕུ་ཊྛ་སྶ ལོ་ཀ་དྷ་མྨེ་ཧི, ཙི་ཏྟཾ ཡ་སྶ ན ཀ་མྤ་ཏི;
ཨ་སོ་ཀཾ ཝི་ར་ཛཾ ཁེ་མཾ, ཨེ་ཏཾ མ་ངྒ་ལ་མུ་ཏྟ་མཾ.
༢༧༢. ‘‘ཨེ་ཏཱ་དི་སཱ་ནི ཀ་ཏྭཱ་ན, ས་བྦ་ཏྠ་མ་པ་རཱ་ཛི་ཏཱ;
ས་བྦ་ཏྠ སོ་ཏྠིཾ ག་ཙྪ་ནྟི, ཏཾ ཏེ་སཾ མ་ངྒ་ལ་མུ་ཏྟ་མ’’ནྟི.
མ་ངྒ་ལ་སུ་ཏྟཾ ཙ་ཏུ་ཏྠཾ ནི་ཊྛི་ཏཾ.
༥. སཱུ་ཙི་ལོ་མ་སུ་ཏྟཾ
ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ ག་ཡཱ་ཡཾ ཝི་ཧ་ར་ཏི ཊ་ངྐི་ཏ་མ་ཉྩེ སཱུ་ཙི་ལོ་མ་སྶ ཡ་ཀྑ་སྶ བྷ་ཝ་ནེ. ཏེ་ན ཁོ པ་ན ས་མ་ཡེ་ན ཁ་རོ ཙ ཡ་ཀྑོ སཱུ་ཙི་ལོ་མོ ཙ ཡ་ཀྑོ བྷ་ག་ཝ་ཏོ ཨ་ཝི་དཱུ་རེ ཨ་ཏི་ཀྐ་མ་ནྟི. ཨ་ཐ ཁོ ཁ་རོ ཡ་ཀྑོ སཱུ་ཙི་ལོ་མཾ ཡ་ཀྑཾ ཨེ་ཏ་ད་ཝོ་ཙ – ‘‘ཨེ་སོ ས་མ་ཎོ’’ཏི. ‘‘ནེ་སོ ས་མ་ཎོ, ས་མ་ཎ་ཀོ ཨེ་སོ. ཡཱ་ཝཱ་ཧཾ ཛཱ་ནཱ་མི [ཡཱ་ཝ ཛཱ་ནཱ་མི (སཱི. པཱི.)] ཡ་དི ཝཱ སོ ས་མ་ཎོ [ཡ་དི ཝཱ ས་མ་ཎོ (སྱཱ.)], ཡ་དི ཝཱ སོ ས་མ་ཎ་ཀོ’’ཏི [ཡ་དི ཝཱ ས་མ་ཎ་ཀོ་ཏི (སཱི. སྱཱ. པཱི.)].
ཨ་ཐ ཁོ སཱུ་ཙི་ལོ་མོ ཡ་ཀྑོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ཏོ ཀཱ་ཡཾ ཨུ་པ་ནཱ་མེ་སི. ཨ་ཐ ཁོ བྷ་ག་ཝཱ ཀཱ་ཡཾ ཨ་པ་ནཱ་མེ་སི. ཨ་ཐ ཁོ སཱུ་ཙི་ལོ་མོ ཡ་ཀྑོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘བྷཱ་ཡ་སི མཾ, ས་མ་ཎཱ’’ཏི? ‘‘ན ཁྭཱ་ཧཾ ཏཾ, ཨཱ་ཝུ་སོ, བྷཱ་ཡཱ་མི; ཨ་པི ཙ ཏེ ས་པྥ་སྶོ པཱ་པ་ཀོ’’ཏི.
‘‘པ་ཉྷཾ ཏཾ, ས་མ་ཎ, པུ་ཙྪི་སྶཱ་མི. ས་ཙེ མེ ན བྱཱ་ཀ་རི་སྶ་སི, ཙི་ཏྟཾ ཝཱ ཏེ ཁི་པི་སྶཱ་མི, ཧ་ད་ཡཾ ཝཱ ཏེ ཕཱ་ལེ་སྶཱ་མི, པཱ་དེ་སུ ཝཱ ག་ཧེ་ཏྭཱ པཱ་ར་ག་ངྒཱ་ཡ ཁི་པི་སྶཱ་མཱི’’ཏི.
‘‘ན ཁྭཱ་ཧཾ ཏཾ, ཨཱ་ཝུ་སོ, པ་སྶཱ་མི ས་དེ་ཝ་ཀེ ལོ་ཀེ ས་མཱ་ར་ཀེ ས་བྲ་ཧྨ་ཀེ ས་སྶ་མ་ཎ་བྲཱ་ཧྨ་ཎི་ཡཱ པ་ཛཱ་ཡ ས་དེ་ཝ་མ་ནུ་སྶཱ་ཡ ཡོ མེ ཙི་ཏྟཾ ཝཱ ཁི་པེ་ཡྻ ཧ་ད་ཡཾ ཝཱ ཕཱ་ལེ་ཡྻ པཱ་དེ་སུ ཝཱ ག་ཧེ་ཏྭཱ པཱ་ར་ག་ངྒཱ་ཡ ཁི་པེ་ཡྻ. ཨ་པི ཙ ཏྭཾ, ཨཱ་ཝུ་སོ, པུ་ཙྪ ཡ་དཱ་ཀ་ངྑ་སཱི’’ཏི. ཨ་ཐ ཁོ སཱུ་ཙི་ལོ་མོ ཡ་ཀྑོ བྷ་ག་ཝ་ནྟཾ གཱ་ཐཱ་ཡ ཨ་ཛ྄ཛྷ་བྷཱ་སི –
༢༧༣. ‘‘རཱ་གོ ཙ དོ་སོ ཙ ཀུ་ཏོ་ནི་དཱ་ནཱ, ཨ་ར་ཏཱི ར་ཏཱི ལོ་མ་ཧཾ་སོ ཀུ་ཏོ་ཛཱ;
ཀུ་ཏོ ས་མུ་ཊྛཱ་ཡ མ་ནོ་ཝི་ཏ་ཀྐཱ, ཀུ་མཱ་ར་ཀཱ དྷ་ངྐ་མི་ཝོ་སྶ་ཛ་ནྟི’’.
༢༧༤. ‘‘རཱ་གོ ཙ དོ་སོ ཙ ཨི་ཏོ་ནི་དཱ་ནཱ, ཨ་ར་ཏཱི ར་ཏཱི ལོ་མ་ཧཾ་སོ ཨི་ཏོ་ཛཱ;
ཨི་ཏོ ས་མུ་ཊྛཱ་ཡ མ་ནོ་ཝི་ཏ་ཀྐཱ, ཀུ་མཱ་ར་ཀཱ དྷ་ངྐ་མི་ཝོ་སྶ་ཛ་ནྟི.
༢༧༤. ‘‘སྣེ་ཧ་ཛཱ ཨ་ཏྟ་ས་མྦྷཱུ་ཏཱ, ནི་གྲོ་དྷ་སྶེ་ཝ ཁ་ནྡྷ་ཛཱ;
པུ་ཐཱུ ཝི་ས་ཏྟཱ ཀཱ་མེ་སུ, མཱ་ལུ་ཝཱ་ཝ ཝི་ཏ་ཏཱ་ཝ་ནེ.
༢༧༥. ‘‘ཡེ ནཾ པ་ཛཱ་ན་ནྟི ཡ་ཏོ་ནི་དཱ་ནཾ, ཏེ ནཾ ཝི་ནོ་དེ་ནྟི སུ་ཎོ་ཧི ཡ་ཀྑ;
ཏེ དུ་ཏྟ་རཾ ཨོ་གྷ་མི་མཾ ཏ་ར་ནྟི, ཨ་ཏི་ཎྞ་པུ་བྦཾ ཨ་པུ་ན་བྦྷ་ཝཱ་ཡཱ’’ཏི.
སཱུ་ཙི་ལོ་མ་སུ་ཏྟཾ པ་ཉྩ་མཾ ནི་ཊྛི་ཏཾ.
༦. དྷ་མྨ་ཙ་རི་ཡ་སུ་ཏྟཾ
༢༧༦. དྷ་མྨ་ཙ་རི་ཡཾ བྲ་ཧྨ་ཙ་རི་ཡཾ, ཨེ་ཏ་དཱ་ཧུ ཝ་སུ་ཏྟ་མཾ;
པ་བྦ་ཛི་ཏོ་པི ཙེ ཧོ་ཏི, ཨ་གཱ་རཱ ཨ་ན་གཱ་རི་ཡཾ.
༢༧༧. སོ ཙེ མུ་ཁ་ར་ཛཱ་ཏི་ཀོ, ཝི་ཧེ་སཱ་བྷི་ར་ཏོ མ་གོ;
ཛཱི་ཝི་ཏཾ ཏ་སྶ པཱ་པི་ཡོ, ར་ཛཾ ཝ་ཌྜྷེ་ཏི ཨ་ཏྟ་ནོ.
༢༧༨. ཀ་ལ་ཧཱ་བྷི་ར་ཏོ བྷི་ཀྑུ, མོ་ཧ་དྷ་མྨེ་ན ཨཱ་ཝུ་ཏོ;
ཨ་ཀྑཱ་ཏ་མྤི ན ཛཱ་ནཱ་ཏི, དྷ་མྨཾ བུ་དྡྷེ་ན དེ་སི་ཏཾ.
༢༧༩. ཝི་ཧེ་སཾ བྷཱ་ཝི་ཏ་ཏྟཱ་ནཾ, ཨ་ཝི་ཛྫཱ་ཡ པུ་ར་ཀྑ་ཏོ;
སཾ་ཀི་ལེ་སཾ ན ཛཱ་ནཱ་ཏི, མ་གྒཾ ནི་ར་ཡ་གཱ་མི་ནཾ.
༢༨༠. ཝི་ནི་པཱ་ཏཾ ས་མཱ་པ་ནྣོ, ག་བྦྷཱ ག་བྦྷཾ ཏ་མཱ ཏ་མཾ;
ས ཝེ ཏཱ་དི་ས་ཀོ བྷི་ཀྑུ, པེ་ཙྩ དུ་ཀྑཾ ནི་ག་ཙྪ་ཏི.
༢༨༡. གཱུ་ཐ་ཀཱུ་པོ ཡ་ཐཱ ཨ་སྶ, ས་མྤུ་ཎྞོ ག་ཎ་ཝ་སྶི་ཀོ;
ཡོ ཙ ཨེ་ཝ་རཱུ་པོ ཨ་སྶ, དུ་བྦི་སོ་དྷོ ཧི སཱ་ངྒ་ཎོ.
༢༨༢. ཡཾ ཨེ་ཝ་རཱུ་པཾ ཛཱ་ནཱ་ཐ, བྷི་ཀྑ་ཝོ གེ་ཧ་ནི་སྶི་ཏཾ;
པཱ་པི་ཙྪཾ པཱ་པ་ས་ངྐ་པྤཾ, པཱ་པ་ཨཱ་ཙཱ་ར་གོ་ཙ་རཾ.
༢༨༣. ས་བྦེ ས་མ་གྒཱ ཧུ་ཏྭཱ་ན, ཨ་བྷི་ནི་བྦ་ཛྫི་ཡཱ་ཐ [ཨ་བྷི་ནི་བྦ་ཛྫ་ཡཱ་ཐ (སཱི. པཱི. ཨ. ནི. ༨.༡༠)] ནཾ;