༧. བྲཱ་ཧྨ་ཎ་དྷ་མྨི་ཀ་སུ་ཏྟཾ
ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཨ་ཐ ཁོ ས་མྦ་ཧུ་ལཱ ཀོ་ས་ལ་ཀཱ བྲཱ་ཧྨ་ཎ་མ་ཧཱ་སཱ་ལཱ ཛི་ཎྞཱ ཝུ་ཌྜྷཱ མ་ཧ་ལླ་ཀཱ ཨ་དྡྷ་ག་ཏཱ ཝ་ཡོ་ཨ་ནུ་པྤ་ཏྟཱ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ བྷ་ག་ཝ་ཏཱ ས་དྡྷིཾ ས་མྨོ་དིཾ་སུ. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣཱ ཁོ ཏེ བྲཱ་ཧྨ་ཎ་མ་ཧཱ་སཱ་ལཱ བྷ་ག་ཝ་ནྟཾ ཨེ་ཏ་ད་ཝོ་ཙུཾ – ‘‘ས་ནྡི་སྶ་ནྟི ནུ ཁོ, བྷོ གོ་ཏ་མ, ཨེ་ཏ་ར་ཧི བྲཱ་ཧྨ་ཎཱ པོ་རཱ་ཎཱ་ནཾ བྲཱ་ཧྨ་ཎཱ་ནཾ བྲཱ་ཧྨ་ཎ་དྷ་མྨེ’’ཏི? ‘‘ན ཁོ, བྲཱ་ཧྨ་ཎཱ, ས་ནྡི་སྶ་ནྟི ཨེ་ཏ་ར་ཧི བྲཱ་ཧྨ་ཎཱ པོ་རཱ་ཎཱ་ནཾ བྲཱ་ཧྨ་ཎཱ་ནཾ བྲཱ་ཧྨ་ཎ་དྷ་མྨེ’’ཏི. ‘‘སཱ་དྷུ ནོ བྷ་ཝཾ གོ་ཏ་མོ པོ་རཱ་ཎཱ་ནཾ བྲཱ་ཧྨ་ཎཱ་ནཾ བྲཱ་ཧྨ་ཎ་དྷ་མྨཾ བྷཱ་ས་ཏུ, ས་ཙེ བྷོ་ཏོ གོ་ཏ་མ་སྶ ཨ་ག་རཱུ’’ཏི. ‘‘ཏེ་ན ཧི, བྲཱ་ཧྨ་ཎཱ, སུ་ཎཱ་ཐ, སཱ་དྷུ་ཀཾ མ་ན་སི ཀ་རོ་ཐ, བྷཱ་སི་སྶཱ་མཱི’’ཏི. ‘‘ཨེ་ཝཾ, བྷོ’’ཏི ཁོ ཏེ བྲཱ་ཧྨ་ཎ་མ་ཧཱ་སཱ་ལཱ བྷ་ག་ཝ་ཏོ པ་ཙྩ་སྶོ་སུཾ. བྷ་ག་ཝཱ ཨེ་ཏ་ད་ཝོ་ཙ –
༢༨༦. ‘‘ཨི་ས་ཡོ པུ་བྦ་ཀཱ ཨཱ་སུཾ, ས་ཉྙ་ཏ་ཏྟཱ ཏ་པ་སྶི་ནོ;
པ་ཉྩ ཀཱ་མ་གུ་ཎེ ཧི་ཏྭཱ, ཨ་ཏྟ་ད་ཏྠ་མ་ཙཱ་རི་སུཾ.
༢༨༧. ‘‘ན པ་སཱུ བྲཱ་ཧྨ་ཎཱ་ནཱ་སུཾ, ན ཧི་ར་ཉྙཾ ན དྷཱ་ནི་ཡཾ;
ས་ཛ྄ཛྷཱ་ཡ་དྷ་ན་དྷ་ཉྙཱ་སུཾ, བྲ་ཧྨཾ ནི་དྷི་མ་པཱ་ལ་ཡུཾ.
༢༨༨. ‘‘ཡཾ ནེ་སཾ པ་ཀ་ཏཾ ཨཱ་སི, དྭཱ་ར་བྷ་ཏྟཾ ཨུ་པ་ཊྛི་ཏཾ;
ས་དྡྷཱ་པ་ཀ་ཏ་མེ་སཱ་ནཾ, དཱ་ཏ་ཝེ ཏ་ད་མ་ཉྙི་སུཾ.
༢༨༩. ‘‘ནཱ་ནཱ་ར་ཏྟེ་ཧི ཝ་ཏྠེ་ཧི, ས་ཡ་ནེ་ཧཱ་ཝ་ས་ཐེ་ཧི ཙ;
ཕཱི་ཏཱ ཛ་ན་པ་དཱ ར་ཊྛཱ, ཏེ ན་མ་སྶིཾ་སུ བྲཱ་ཧྨ་ཎེ.
༢༩༠. ‘‘ཨ་ཝ་ཛ྄ཛྷཱ བྲཱ་ཧྨ་ཎཱ ཨཱ་སུཾ, ཨ་ཛེ་ཡྻཱ དྷ་མྨ་ར་ཀྑི་ཏཱ;
ན ནེ ཀོ་ཙི ནི་ཝཱ་རེ་སི, ཀུ་ལ་དྭཱ་རེ་སུ ས་བྦ་སོ.
༢༩༡. ‘‘ཨ་ཊྛ་ཙ་ཏྟཱ་ལཱི་སཾ ཝ་སྶཱ་ནི, (ཀོ་མཱ་ར) བྲ་ཧྨ་ཙ་རི་ཡཾ ཙ་རིཾ་སུ ཏེ;
ཝི་ཛྫཱ་ཙ་ར་ཎ་པ་རི་ཡེ་ཊྛིཾ, ཨ་ཙ་རུཾ བྲཱ་ཧྨ་ཎཱ པུ་རེ.
༢༩༢. ‘‘ན བྲཱ་ཧྨ་ཎཱ ཨ་ཉྙ་མ་ག་མུཾ, ན་པི བྷ་རི་ཡཾ ཀི་ཎིཾ་སུ ཏེ;
ས་མྤི་ཡེ་ནེ་ཝ སཾ་ཝཱ་སཾ, ས་ངྒ་ནྟྭཱ ས་མ་རོ་ཙ་ཡུཾ.
༢༩༣. ‘‘ཨ་ཉྙ་ཏྲ ཏ་མྷཱ ས་མ་ཡཱ, ཨུ་ཏུ་ཝེ་ར་མ་ཎིཾ པ་ཏི;
ཨ་ནྟ་རཱ མེ་ཐུ་ནཾ དྷ་མྨཾ, ནཱ་སྶུ ག་ཙྪ་ནྟི བྲཱ་ཧྨ་ཎཱ.
༢༩༤. ‘‘བྲ་ཧྨ་ཙ་རི་ཡ་ཉྩ སཱི་ལ་ཉྩ, ཨ་ཛྫ་ཝཾ མ་དྡ་ཝཾ ཏ་པཾ;
སོ་ར་ཙྩཾ ཨ་ཝི་ཧིཾ་ས་ཉྩ, ཁ་ནྟི་ཉྩཱ་པི ཨ་ཝ་ཎྞ་ཡུཾ.
༢༩༥. ‘‘ཡོ ནེ་སཾ པ་ར་མོ ཨཱ་སི, བྲ་ཧྨཱ ད་ལ༹ྷ་པ་ར་ཀྐ་མོ;
ས ཝཱ་པི མེ་ཐུ་ནཾ དྷ་མྨཾ, སུ་པི་ན་ནྟེ་པི ནཱ་ག་མཱ.
༢༩༦. ‘‘ཏ་སྶ ཝ་ཏྟ་མ་ནུ་སི་ཀྑ་ནྟཱ, ཨི་དྷེ་ཀེ ཝི་ཉྙུ་ཛཱ་ཏི་ཀཱ;
བྲ་ཧྨ་ཙ་རི་ཡ་ཉྩ སཱི་ལ་ཉྩ, ཁ་ནྟི་ཉྩཱ་པི ཨ་ཝ་ཎྞ་ཡུཾ.
༢༩༧. ‘‘ཏ་ཎྜུ་ལཾ ས་ཡ་ནཾ ཝ་ཏྠཾ, ས་པྤི་ཏེ་ལ་ཉྩ ཡཱ་ཙི་ཡ;
དྷ་མྨེ་ན ས་མོ་དྷཱ་ནེ་ཏྭཱ, ཏ་ཏོ ཡ་ཉྙ་མ་ཀ་པྤ་ཡུཾ.
༢༩༨. ‘‘ཨུ་པ་ཊྛི་ཏ་སྨིཾ ཡ་ཉྙ་སྨིཾ, ནཱ་སྶུ གཱ་ཝོ ཧ་ནིཾ་སུ ཏེ;
ཡ་ཐཱ མཱ་ཏཱ པི་ཏཱ བྷཱ་ཏཱ, ཨ་ཉྙེ ཝཱ་པི ཙ ཉཱ་ཏ་ཀཱ;
གཱ་ཝོ ནོ པ་ར་མཱ མི་ཏྟཱ, ཡཱ་སུ ཛཱ་ཡ་ནྟི ཨོ་ས་དྷཱ.
༢༩༩. ‘‘ཨ་ནྣ་དཱ བ་ལ་དཱ ཙེ་ཏཱ, ཝ་ཎྞ་དཱ སུ་ཁ་དཱ ཏ་ཐཱ [སུ་ཁ་དཱ ཙ ཏཱ (ཀ.)];
ཨེ་ཏ་མ་ཏྠ་ཝ་སཾ ཉ་ཏྭཱ, ནཱ་སྶུ གཱ་ཝོ ཧ་ནིཾ་སུ ཏེ.
༣༠༠. ‘‘སུ་ཁུ་མཱ་ལཱ མ་ཧཱ་ཀཱ་ཡཱ, ཝ་ཎྞ་ཝ་ནྟོ ཡ་ས་སྶི་ནོ;
བྲཱ་ཧྨ་ཎཱ སེ་ཧི དྷ་མྨེ་ཧི, ཀི་ཙྩཱ་ཀི་ཙྩེ་སུ ཨུ་སྶུ་ཀཱ;
ཡཱ་ཝ ལོ་ཀེ ཨ་ཝ་ཏྟིཾ་སུ, སུ་ཁ་མེ་དྷི་ཏྠ་ཡཾ པ་ཛཱ.
༣༠༡. ‘‘ཏེ་སཾ ཨཱ་སི ཝི་པ་ལླཱ་སོ, དི་སྭཱ་ན ཨ་ཎུ་ཏོ ཨ་ཎུཾ;
རཱ་ཛི་ནོ ཙ ཝི་ཡཱ་ཀཱ་རཾ, ནཱ་རི་ཡོ ས་མ་ལ་ངྐ་ཏཱ.
༣༠༢. ‘‘ར་ཐེ ཙཱ་ཛ་ཉྙ་སཾ་ཡུ་ཏྟེ, སུ་ཀ་ཏེ ཙི་ཏྟ་སི་བྦ་ནེ;
ནི་ཝེ་ས་ནེ ནི་ཝེ་སེ ཙ, ཝི་བྷ་ཏྟེ བྷཱ་ག་སོ མི་ཏེ.
༣༠༣. ‘‘གོ་མ་ཎྜ་ལ་པ་རི་བྱཱུ་ལ༹ྷཾ, ནཱ་རཱི་ཝ་ར་ག་ཎཱ་ཡུ་ཏཾ;
ཨུ་ལཱ༹་རཾ མཱ་ནུ་སཾ བྷོ་གཾ, ཨ་བྷི་ཛ྄ཛྷཱ་ཡིཾ་སུ བྲཱ་ཧྨ་ཎཱ.
༣༠༤. ‘‘ཏེ ཏ་ཏྠ མ་ནྟེ ག་ནྠེ་ཏྭཱ, ཨོ་ཀྐཱ་ཀཾ ཏ་དུ་པཱ་ག་མུཾ;
པ་ཧཱུ་ཏ་དྷ་ན་དྷ་ཉྙོ་སི, ཡ་ཛ་སྶུ བ་ཧུ ཏེ ཝི་ཏྟཾ;
ཡ་ཛ་སྶུ བ་ཧུ ཏེ དྷ་ནཾ.
༣༠༥. ‘‘ཏ་ཏོ ཙ རཱ་ཛཱ ས་ཉྙ་ཏྟོ, བྲཱ་ཧྨ་ཎེ་ཧི ར་ཐེ་ས་བྷོ;
ཨ་སྶ་མེ་དྷཾ པུ་རི་ས་མེ་དྷཾ, ས་མྨཱ་པཱ་སཾ ཝཱ་ཛ་པེ་ཡྻཾ ནི་ར་གྒ་ལ༹ཾ;
ཨེ་ཏེ ཡཱ་གེ ཡ་ཛི་ཏྭཱ་ན, བྲཱ་ཧྨ་ཎཱ་ན་མ་དཱ དྷ་ནཾ.
༣༠༦. ‘‘གཱ་ཝོ ས་ཡ་ན་ཉྩ ཝ་ཏྠ་ཉྩ, ནཱ་རི་ཡོ ས་མ་ལ་ངྐ་ཏཱ;
ར་ཐེ ཙཱ་ཛ་ཉྙ་སཾ་ཡུ་ཏྟེ, སུ་ཀ་ཏེ ཙི་ཏྟ་སི་བྦ་ནེ.
༣༠༧. ‘‘ནི་ཝེ་ས་ནཱ་ནི ར་མྨཱ་ནི, སུ་ཝི་བྷ་ཏྟཱ་ནི བྷཱ་ག་སོ;
ནཱ་ནཱ་དྷ་ཉྙ་སྶ པཱུ་རེ་ཏྭཱ, བྲཱ་ཧྨ་ཎཱ་ན་མ་དཱ དྷ་ནཾ.
༣༠༨. ‘‘ཏེ ཙ ཏ་ཏྠ དྷ་ནཾ ལ་དྡྷཱ, ས་ནྣི་དྷིཾ ས་མ་རོ་ཙ་ཡུཾ;
ཏེ་སཾ ཨི་ཙྪཱ་ཝ་ཏི་ཎྞཱ་ནཾ, བྷི་ཡྻོ ཏ་ཎྷཱ པ་ཝ་ཌྜྷ་ཐ;
ཏེ ཏ་ཏྠ མ་ནྟེ ག་ནྠེ་ཏྭཱ, ཨོ་ཀྐཱ་ཀཾ པུ་ན་མུ་པཱ་ག་མུཾ.
༣༠༩. ‘‘ཡ་ཐཱ ཨཱ་པོ ཙ པ་ཐ་ཝཱི ཙ, ཧི་ར་ཉྙཾ དྷ་ན་དྷཱ་ནི་ཡཾ;
ཨེ་ཝཾ གཱ་ཝོ མ་ནུ་སྶཱ་ནཾ, པ་རི་ཀྑཱ་རོ སོ ཧི པཱ་ཎི་ནཾ;
ཡ་ཛ་སྶུ བ་ཧུ ཏེ ཝི་ཏྟཾ, ཡ་ཛ་སྶུ བ་ཧུ ཏེ དྷ་ནཾ.
༣༡༠. ‘‘ཏ་ཏོ ཙ རཱ་ཛཱ ས་ཉྙ་ཏྟོ, བྲཱ་ཧྨ་ཎེ་ཧི ར་ཐེ་ས་བྷོ;
ནེ་ཀཱ ས་ཏ་ས་ཧ་སྶི་ཡོ, གཱ་ཝོ ཡ་ཉྙེ ཨ་གྷཱ་ཏ་ཡི.
༣༡༡. ‘‘ན པཱ་དཱ ན ཝི་སཱ་ཎེ་ན, ནཱ་སྶུ ཧིཾ་ས་ནྟི ཀེ་ན་ཙི;
གཱ་ཝོ ཨེ་ལ༹་ཀ་ས་མཱ་ནཱ, སོ་ར་ཏཱ ཀུ་མྦྷ་དཱུ་ཧ་ནཱ;
ཏཱ ཝི་སཱ་ཎེ ག་ཧེ་ཏྭཱ་ན, རཱ་ཛཱ ས་ཏྠེ་ན གྷཱ་ཏ་ཡི.
༣༡༢. ‘‘ཏ་ཏོ དེ་ཝཱ པི་ཏ་རོ ཙ [ཏ་ཏོ ཙ དེ་ཝཱ པི་ཏ་རོ (སཱི. སྱཱ.)], ཨི་ནྡོ ཨ་སུ་ར་ར་ཀྑ་སཱ;
ཨ་དྷ་མྨོ ཨི་ཏི པ་ཀྐ་ནྡུཾ, ཡཾ ས་ཏྠཾ ནི་པ་ཏཱི ག་ཝེ.
༣༡༣. ‘‘ཏ་ཡོ རོ་གཱ པུ་རེ ཨཱ་སུཾ, ཨི་ཙྪཱ ཨ་ན་ས་ནཾ ཛ་རཱ;
པ་སཱུ་ན་ཉྩ ས་མཱ་ར་མྦྷཱ, ཨ་ཊྛཱ་ན་ཝུ་ཏི་མཱ་ག་མུཾ.
༣༡༤. ‘‘ཨེ་སོ ཨ་དྷ་མྨོ ད་ཎྜཱ་ནཾ, ཨོ་ཀྐ་ནྟོ པུ་རཱ་ཎོ ཨ་ཧུ;
ཨ་དཱུ་སི་ཀཱ་ཡོ ཧ་ཉྙ་ནྟི, དྷ་མྨཱ དྷཾ་ས་ནྟི [དྷཾ་སེ་ནྟི (སཱི. པཱི.)] ཡཱ་ཛ་ཀཱ.
༣༡༥. ‘‘ཨེ་ཝ་མེ་སོ ཨ་ཎུ་དྷ་མྨོ, པོ་རཱ་ཎོ ཝི་ཉྙུ་ག་ར་ཧི་ཏོ;
ཡ་ཏྠ ཨེ་དི་ས་ཀཾ པ་སྶ་ཏི, ཡཱ་ཛ་ཀཾ ག་ར་ཧ་ཏཱི [ག་ར་ཧཱི (ཀ.)] ཛ་ནོ.
༣༡༦. ‘‘ཨེ་ཝཾ དྷ་མྨེ ཝི་ཡཱ་པ་ནྣེ, ཝི་བྷི་ནྣཱ སུ་དྡ་ཝེ་སྶི་ཀཱ;
པུ་ཐཱུ ཝི་བྷི་ནྣཱ ཁ་ཏྟི་ཡཱ, པ་ཏིཾ བྷ་རི་ཡཱ་ཝ་མ་ཉྙ་ཐ.
༣༡༧. ‘‘ཁ་ཏྟི་ཡཱ བྲ་ཧྨ་བ་ནྡྷཱུ ཙ, ཡེ ཙ་ཉྙེ གོ་ཏྟ་ར་ཀྑི་ཏཱ;
ཛཱ་ཏི་ཝཱ་དཾ ནི་རཾ་ཀ་ཏྭཱ [ནི་རཱ་ཀ་ཏྭཱ (?) ཡ་ཐཱ ཨ་ནི་རཱ་ཀ་ཏ་ཛ྄ཛྷཱ་ནོ་ཏི], ཀཱ་མཱ་ནཾ ཝ་ས་མ་ནྭ་གུ’’ནྟི.
ཨེ་ཝཾ ཝུ་ཏྟེ, ཏེ བྲཱ་ཧྨ་ཎ་མ་ཧཱ་སཱ་ལཱ བྷ་ག་ཝ་ནྟཾ ཨེ་ཏ་ད་ཝོ་ཙུཾ – ‘‘ཨ་བྷི་ཀྐ་ནྟཾ, བྷོ གོ་ཏ་མ…པེ. … ཨུ་པཱ་ས་ཀེ ནོ བྷ་ཝཾ གོ་ཏ་མོ དྷཱ་རེ་ཏུ ཨ་ཛྫ་ཏ་གྒེ པཱ་ཎུ་པེ་ཏེ ས་ར་ཎཾ ག་ཏེ’’ཏི.
བྲཱ་ཧྨ་ཎ་དྷ་མྨི་ཀ་སུ་ཏྟཾ ས་ཏྟ་མཾ ནི་ཊྛི་ཏཾ.