༡༤. དྷ་མྨི་ཀ་སུ་ཏྟཾ
ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཨ་ཐ ཁོ དྷ་མྨི་ཀོ ཨུ་པཱ་ས་ཀོ པ་ཉྩ་ཧི ཨུ་པཱ་ས་ཀ་ས་ཏེ་ཧི ས་དྡྷིཾ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ དྷ་མྨི་ཀོ ཨུ་པཱ་ས་ཀོ བྷ་ག་ཝ་ནྟཾ གཱ་ཐཱ་ཧི ཨ་ཛ྄ཛྷ་བྷཱ་སི –
༣༧༨. ‘‘པུ་ཙྪཱ་མི ཏཾ གོ་ཏ་མ བྷཱུ་རི་པ་ཉྙ, ཀ་ཐཾ་ཀ་རོ སཱ་ཝ་ཀོ སཱ་དྷུ ཧོ་ཏི;
ཡོ ཝཱ ཨ་གཱ་རཱ ཨ་ན་གཱ་ར་མེ་ཏི, ཨ་གཱ་རི་ནོ ཝཱ པ་ནུ་པཱ་ས་ཀཱ་སེ.
༣༧༩. ‘‘ཏུ་ཝ་ཉྷི ལོ་ཀ་སྶ ས་དེ་ཝ་ཀ་སྶ, ག་ཏིཾ པ་ཛཱ་ནཱ་སི པ་རཱ་ཡ་ཎ་ཉྩ;
ན ཙ་ཏྠི ཏུ་ལྱོ ནི་པུ་ཎ་ཏྠ་ད་སྶཱི, ཏུ་ཝ་ཉྷི བུ་དྡྷཾ པ་ཝ་རཾ ཝ་ད་ནྟི.
༣༨༠. ‘‘ས་བྦཾ ཏུ་ཝཾ ཉཱ་ཎ་མ་ཝེ་ཙྩ དྷ་མྨཾ, པ་ཀཱ་སེ་སི ས་ཏྟེ ཨ་ནུ་ཀ་མྤ་མཱ་ནོ;
ཝི་ཝ་ཊྚ་ཙྪ་དོ་སི ས་མ་ནྟ་ཙ་ཀྑུ, ཝི་རོ་ཙ་སི ཝི་མ་ལོ ས་བྦ་ལོ་ཀེ.
༣༨༡. ‘‘ཨཱ་ག་ཉྪི ཏེ ས་ནྟི་ཀེ ནཱ་ག་རཱ་ཛཱ, ཨེ་རཱ་ཝ་ཎོ ནཱ་མ ཛི་ནོ་ཏི སུ་ཏྭཱ;
སོ་པི ཏ་ཡཱ མ་ནྟ་ཡི་ཏྭཱ་ཛ྄ཛྷ་ག་མཱ, སཱ་དྷཱུ་ཏི སུ་ཏྭཱ་ན པ་ཏཱི་ཏ་རཱུ་པོ.
༣༨༢. ‘‘རཱ་ཛཱ་པི ཏཾ ཝེ་སྶ་ཝ་ཎོ ཀུ་ཝེ་རོ, ཨུ་པེ་ཏི དྷ་མྨཾ པ་རི་པུ་ཙྪ་མཱ་ནོ;
ཏ་སྶཱ་པི ཏྭཾ པུ་ཙྪི་ཏོ བྲཱུ་སི དྷཱི་ར, སོ ཙཱ་པི སུ་ཏྭཱ་ན པ་ཏཱི་ཏ་རཱུ་པོ.
༣༨༣. ‘‘ཡེ ཀེ་ཙི་མེ ཏི་ཏྠི་ཡཱ ཝཱ་ད་སཱི་ལཱ, ཨཱ་ཛཱི་ཝ་ཀཱ ཝཱ ཡ་དི ཝཱ ནི་ག་ཎྛཱ;
པ་ཉྙཱ་ཡ ཏཾ ནཱ་ཏི་ཏ་ར་ནྟི ས་བྦེ, ཋི་ཏོ ཝ་ཛ་ནྟཾ ཝི་ཡ སཱི་གྷ་གཱ་མིཾ.
༣༨༤. ‘‘ཡེ ཀེ་ཙི་མེ བྲཱ་ཧྨ་ཎཱ ཝཱ་ད་སཱི་ལཱ, ཝུ་དྡྷཱ ཙཱ་པི བྲཱ་ཧྨ་ཎཱ ས་ནྟི ཀེ་ཙི;
ས་བྦེ ཏ་ཡི ཨ་ཏྠ་བ་དྡྷཱ བྷ་ཝ་ནྟི, ཡེ ཙཱ་པི ཨ་ཉྙེ ཝཱ་དི་ནོ མ་ཉྙ་མཱ་ནཱ.
༣༨༥. ‘‘ཨ་ཡ་ཉྷི དྷ་མྨོ ནི་པུ་ཎོ སུ་ཁོ ཙ, ཡོ་ཡཾ ཏ་ཡཱ བྷ་ག་ཝཱ སུ་པྤ་ཝུ་ཏྟོ;
ཏ་མེ་ཝ ས་བྦེ་པི [ས་བྦེ མ་ཡཾ (སྱཱ.)] སུ་སྶཱུ་ས་མཱ་ནཱ, ཏཾ ནོ ཝ་ད པུ་ཙྪི་ཏོ བུ་དྡྷ་སེ་ཊྛ.
༣༨༦. ‘‘ས་བྦེ་པི མེ བྷི་ཀྑ་ཝོ ས་ནྣི་སི་ནྣཱ, ཨུ་པཱ་ས་ཀཱ ཙཱ་པི ཏ་ཐེ་ཝ སོ་ཏུཾ;
སུ་ཎ་ནྟུ དྷ་མྨཾ ཝི་མ་ལེ་ནཱ་ནུ་བུ་དྡྷཾ, སུ་བྷཱ་སི་ཏཾ ཝཱ་ས་ཝ་སྶེ་ཝ དེ་ཝཱ’’.
༣༨༧. ‘‘སུ་ཎཱ་ཐ མེ བྷི་ཀྑ་ཝོ སཱ་ཝ་ཡཱ་མི ཝོ, དྷ་མྨཾ དྷུ་ཏཾ ཏ་ཉྩ ཙ་རཱ་ཐ ས་བྦེ;
ཨི་རི་ཡཱ་པ་ཐཾ པ་བྦ་ཛི་ཏཱ་ནུ་ལོ་མི་ཀཾ, སེ་ཝེ་ཐ ནཾ ཨ་ཏྠ་ད་སོ མུ་ཏཱི་མཱ.
༣༨༨. ‘‘ནོ ཝེ ཝི་ཀཱ་ལེ ཝི་ཙ་རེ་ཡྻ བྷི་ཀྑུ, གཱ་མེ ཙ པི་ཎྜཱ་ཡ ཙ་རེ་ཡྻ ཀཱ་ལེ;
ཨ་ཀཱ་ལ་ཙཱ་རི་ཉྷི ས་ཛ་ནྟི ས་ངྒཱ, ཏ་སྨཱ ཝི་ཀཱ་ལེ ན ཙ་ར་ནྟི བུ་དྡྷཱ.
༣༨༩. ‘‘རཱུ་པཱ ཙ ས་དྡཱ ཙ ར་སཱ ཙ ག་ནྡྷཱ, ཕ་སྶཱ ཙ ཡེ ས་མྨ་ད་ཡ་ནྟི ས་ཏྟེ;
ཨེ་ཏེ་སུ དྷ་མྨེ་སུ ཝི་ནེ་ཡྻ ཚ་ནྡཾ, ཀཱ་ལེ་ན སོ པ་ཝི་སེ པཱ་ཏ་རཱ་སཾ.
༣༩༠. ‘‘པི་ཎྜ་ཉྩ བྷི་ཀྑུ ས་མ་ཡེ་ན ལ་དྡྷཱ, ཨེ་ཀོ པ་ཊི་ཀྐ་མྨ ར་ཧོ ནི་སཱི་དེ;
ཨ་ཛ྄ཛྷ་ཏྟ་ཙི་ནྟཱི ན མ་ནོ བ་ཧི་དྡྷཱ, ནི་ཙྪཱ་ར་ཡེ ས་ངྒ་ཧི་ཏ་ཏྟ་བྷཱ་ཝོ.
༣༩༡. ‘‘ས་ཙེ་པི སོ ས་ལླ་པེ སཱ་ཝ་ཀེ་ན, ཨ་ཉྙེ་ན ཝཱ ཀེ་ན་ཙི བྷི་ཀྑུ་ནཱ ཝཱ;
དྷ་མྨཾ པ་ཎཱི་ཏཾ ཏ་མུ་དཱ་ཧ་རེ་ཡྻ, ན པེ་སུ་ཎཾ ནོ་པི པ་རཱུ་པ་ཝཱ་དཾ.
༣༩༢. ‘‘ཝཱ་ད་ཉྷི ཨེ་ཀེ པ་ཊི་སེ་ནི་ཡ་ནྟི, ན ཏེ པ་སཾ་སཱ་མ པ་རི་ཏྟ་པ་ཉྙེ;
ཏ་ཏོ ཏ་ཏོ ནེ པ་ས་ཛ་ནྟི ས་ངྒཱ, ཙི་ཏྟ་ཉྷི ཏེ ཏ་ཏྠ ག་མེ་ནྟི དཱུ་རེ.
༣༩༣. ‘‘པི་ཎྜཾ ཝི་ཧཱ་རཾ ས་ཡ་ནཱ་ས་ན་ཉྩ, ཨཱ་པ་ཉྩ ས་ངྒྷཱ་ཊི་ར་ཛཱུ་པ་ཝཱ་ཧ་ནཾ;
སུ་ཏྭཱ་ན དྷ་མྨཾ སུ་ག་ཏེ་ན དེ་སི་ཏཾ, ས་ངྑཱ་ཡ སེ་ཝེ ཝ་ར་པ་ཉྙ་སཱ་ཝ་ཀོ.
༣༩༤. ‘‘ཏ་སྨཱ ཧི པི་ཎྜེ ས་ཡ་ནཱ་ས་ནེ ཙ, ཨཱ་པེ ཙ ས་ངྒྷཱ་ཊི་ར་ཛཱུ་པ་ཝཱ་ཧ་ནེ;
ཨེ་ཏེ་སུ དྷ་མྨེ་སུ ཨ་ནཱུ་པ་ལི་ཏྟོ, བྷི་ཀྑུ ཡ་ཐཱ པོ་ཀྑ་རེ ཝཱ་རི་བི་ནྡུ.
༣༩༥. ‘‘ག་ཧ་ཊྛ་ཝ་ཏྟཾ པ་ན ཝོ ཝ་དཱ་མི, ཡ་ཐཱ་ཀ་རོ སཱ་ཝ་ཀོ སཱ་དྷུ ཧོ་ཏི;
ན ཧེ་ས [ན ཧེ་སོ (སཱི.)] ལ་བྦྷཱ ས་པ་རི་གྒ་ཧེ་ན, ཕ་སྶེ་ཏུཾ ཡོ ཀེ་ཝ་ལོ བྷི་ཀྑུ་དྷ་མྨོ.
༣༩༦. ‘‘པཱ་ཎཾ ན ཧ་ནེ [ན ཧཱ་ནེ (སཱི.)] ན ཙ གྷཱ་ཏ་ཡེ་ཡྻ, ན ཙཱ་ནུ་ཛ་ཉྙཱ ཧ་ན་ཏཾ པ་རེ་སཾ;
ས་བྦེ་སུ བྷཱུ་ཏེ་སུ ནི་དྷཱ་ཡ ད་ཎྜཾ, ཡེ ཐཱ་ཝ་རཱ ཡེ ཙ ཏ་སཱ ས་ནྟི [ཏ་ས་ནྟི (སཱི. པཱི.)] ལོ་ཀེ.
༣༩༧. ‘‘ཏ་ཏོ ཨ་དི་ནྣཾ པ་རི་ཝ་ཛྫ་ཡེ་ཡྻ, ཀི་ཉྩི ཀྭ་ཙི སཱ་ཝ་ཀོ བུ་ཛ྄ཛྷ་མཱ་ནོ;
ན ཧཱ་ར་ཡེ ཧ་ར་ཏཾ ནཱ་ནུ་ཛ་ཉྙཱ, ས་བྦཾ ཨ་དི་ནྣཾ པ་རི་ཝ་ཛྫ་ཡེ་ཡྻ.
༣༩༨. ‘‘ཨ་བྲ་ཧྨ་ཙ་རི་ཡཾ པ་རི་ཝ་ཛྫ་ཡེ་ཡྻ, ཨ་ངྒཱ་ར་ཀཱ་སུཾ ཛ་ལི་ཏཾ་ཝ ཝི་ཉྙཱུ;
ཨ་ས་མྦྷུ་ཎ་ནྟོ པ་ན བྲ་ཧྨ་ཙ་རི་ཡཾ, པ་ར་སྶ དཱ་རཾ ན ཨ་ཏི་ཀྐ་མེ་ཡྻ.
༣༩༩. ‘‘ས་བྷ་གྒ་ཏོ ཝཱ པ་རི་ས་གྒ་ཏོ ཝཱ, ཨེ་ཀ་སྶ ཝེ་ཀོ [ཙེ་ཏོ (སཱི. སྱཱ.)] ན མུ་སཱ བྷ་ཎེ་ཡྻ;
ན བྷཱ་ཎ་ཡེ བྷ་ཎ་ཏཾ ནཱ་ནུ་ཛ་ཉྙཱ, ས་བྦཾ ཨ་བྷཱུ་ཏཾ པ་རི་ཝ་ཛྫ་ཡེ་ཡྻ.
༤༠༠. ‘‘མ་ཛྫ་ཉྩ པཱ་ནཾ ན ས་མཱ་ཙ་རེ་ཡྻ, དྷ་མྨཾ ཨི་མཾ རོ་ཙ་ཡེ ཡོ ག་ཧ་ཊྛོ;
ན པཱ་ཡ་ཡེ པི་ཝ་ཏཾ ནཱ་ནུ་ཛ་ཉྙཱ, ཨུ་མྨཱ་ད་ན་ནྟཾ ཨི་ཏི ནཾ ཝི་དི་ཏྭཱ.
༤༠༡. ‘‘མ་དཱ ཧི པཱ་པཱ་ནི ཀ་རོ་ནྟི བཱ་ལཱ, ཀཱ་རེ་ནྟི ཙ་ཉྙེ་པི ཛ་ནེ པ་མ་ཏྟེ;
ཨེ་ཏཾ ཨ་པུ་ཉྙཱ་ཡ་ཏ་ནཾ ཝི་ཝ་ཛྫ་ཡེ, ཨུ་མྨཱ་ད་ནཾ མོ་ཧ་ནཾ བཱ་ལ་ཀ་ནྟཾ.
༤༠༢. ‘‘པཱ་ཎཾ ན ཧ་ནེ ན ཙཱ་དི་ནྣ་མཱ་དི་ཡེ, མུ་སཱ ན བྷཱ་སེ ན ཙ མ་ཛྫ་པོ སི་ཡཱ;
ཨ་བྲ་ཧྨ་ཙ་རི་ཡཱ ཝི་ར་མེ་ཡྻ མེ་ཐུ་ནཱ, ར་ཏྟིཾ ན བྷུ་ཉྫེ་ཡྻ ཝི་ཀཱ་ལ་བྷོ་ཛ་ནཾ.
༤༠༣. ‘‘མཱ་ལཾ ན དྷཱ་རེ ན ཙ ག་ནྡྷ་མཱ་ཙ་རེ, མ་ཉྩེ ཚ་མཱ་ཡཾ ཝ ས་ཡེ་ཐ ས་ནྠ་ཏེ;
ཨེ་ཏ་ཉྷི ཨ་ཊྛ་ངྒི་ཀ་མཱ་ཧུ་པོ་ས་ཐཾ, བུ་དྡྷེ་ན དུ་ཀྑ་ནྟ་གུ་ནཱ པ་ཀཱ་སི་ཏཾ.
༤༠༤. ‘‘ཏ་ཏོ ཙ པ་ཀྑ་སྶུ་པ་ཝ་སྶུ་པོ་ས་ཐཾ, ཙཱ་ཏུ་དྡ་སིཾ པ་ཉྩ་ད་སི་ཉྩ ཨ་ཊྛ་མིཾ;
པཱ་ཊི་ཧཱ་རི་ཡ་པ་ཀྑ་ཉྩ པ་ས་ནྣ་མཱ་ན་སོ, ཨ་ཊྛ་ངྒུ་པེ་ཏཾ སུ་ས་མ་ཏྟ་རཱུ་པཾ.
༤༠༥. ‘‘ཏ་ཏོ ཙ པཱ་ཏོ ཨུ་པ་ཝུ་ཏྠུ་པོ་ས་ཐོ, ཨ་ནྣེ་ན པཱ་ནེ་ན ཙ བྷི་ཀྑུ་ས་ངྒྷཾ;
པ་ས་ནྣ་ཙི་ཏྟོ ཨ་ནུ་མོ་ད་མཱ་ནོ, ཡ་ཐཱ་ར་ཧཾ སཾ་ཝི་བྷ་ཛེ་ཐ ཝི་ཉྙཱུ.
༤༠༦. ‘‘དྷ་མྨེ་ན མཱ་ཏཱ་པི་ཏ་རོ བྷ་རེ་ཡྻ, པ་ཡོ་ཛ་ཡེ དྷ་མྨི་ཀཾ སོ ཝ་ཎི་ཛྫཾ;
ཨེ་ཏཾ གི་ཧཱི ཝ་ཏྟ་ཡ་མ་པྤ་མ་ཏྟོ, ས་ཡ་མྤ་བྷེ ནཱ་མ ཨུ་པེ་ཏི དེ་ཝེ’’ཏི.
དྷ་མྨི་ཀ་སུ་ཏྟཾ ཙུ་དྡ་ས་མཾ ནི་ཊྛི་ཏཾ.
ཙཱུ་ལ༹་ཝ་གྒོ དུ་ཏི་ཡོ ནི་ཊྛི་ཏོ.