༡༣. ས་མྨཱ་པ་རི་བྦཱ་ཛ་ནཱི་ཡ་སུ་ཏྟཾ
༣༦༡. ‘‘པུ་ཙྪཱ་མི མུ་ནིཾ པ་ཧཱུ་ཏ་པ་ཉྙཾ,
ཏི་ཎྞཾ པཱ་ར་ངྒ་ཏཾ པ་རི་ནི་བྦུ་ཏཾ ཋི་ཏ་ཏྟཾ;
ནི་ཀྑ་མྨ གྷ་རཱ པ་ནུ་ཛྫ ཀཱ་མེ, ཀ་ཐཾ བྷི་ཀྑུ
ས་མྨཱ སོ ལོ་ཀེ པ་རི་བྦ་ཛེ་ཡྻ’’.
༣༦༢. ‘‘ཡ་སྶ མ་ངྒ་ལཱ ས་མཱུ་ཧ་ཏཱ, (ཨི་ཏི བྷ་ག་ཝཱ)
ཨུ་པྤཱ་ཏཱ སུ་པི་ནཱ ཙ ལ་ཀྑ་ཎཱ ཙ;
སོ མ་ངྒ་ལ་དོ་ས་ཝི་པྤ་ཧཱི་ནོ,
ས་མྨཱ སོ ལོ་ཀེ པ་རི་བྦ་ཛེ་ཡྻ.
༣༦༣. ‘‘རཱ་གཾ ཝི་ན་ཡེ་ཐ མཱ་ནུ་སེ་སུ, དི་བྦེ་སུ ཀཱ་མེ་སུ ཙཱ་པི བྷི་ཀྑུ;
ཨ་ཏི་ཀྐ་མྨ བྷ་ཝཾ ས་མེ་ཙྩ དྷ་མྨཾ, ས་མྨཱ སོ ལོ་ཀེ པ་རི་བྦ་ཛེ་ཡྻ.
༣༦༤. ‘‘ཝི་པི་ཊྛི་ཀ་ཏྭཱ་ན པེ་སུ་ཎཱ་ནི, ཀོ་དྷཾ ཀ་ད་རི་ཡཾ ཛ་ཧེ་ཡྻ བྷི་ཀྑུ;
ཨ་ནུ་རོ་དྷ་ཝི་རོ་དྷ་ཝི་པྤ་ཧཱི་ནོ, ས་མྨཱ སོ ལོ་ཀེ པ་རི་བྦ་ཛེ་ཡྻ.
༣༦༥. ‘‘ཧི་ཏྭཱ་ན པི་ཡ་ཉྩ ཨ་པྤི་ཡ་ཉྩ, ཨ་ནུ་པཱ་དཱ་ཡ ཨ་ནི་སྶི་ཏོ ཀུ་ཧི་ཉྩི;
སཾ་ཡོ་ཛ་ནི་ཡེ་ཧི ཝི་པྤ་མུ་ཏྟོ, ས་མྨཱ སོ ལོ་ཀེ པ་རི་བྦ་ཛེ་ཡྻ.
༣༦༦. ‘‘ན སོ ཨུ་པ་དྷཱི་སུ སཱ་ར་མེ་ཏི, ཨཱ་དཱ་ནེ་སུ ཝི་ནེ་ཡྻ ཚ་ནྡ་རཱ་གཾ;
སོ ཨ་ནི་སྶི་ཏོ ཨ་ན་ཉྙ་ནེ་ཡྻོ, ས་མྨཱ སོ ལོ་ཀེ པ་རི་བྦ་ཛེ་ཡྻ.
༣༦༧. ‘‘ཝ་ཙ་སཱ མ་ན་སཱ ཙ ཀ་མྨུ་ནཱ ཙ, ཨ་ཝི་རུ་དྡྷོ ས་མྨཱ ཝི་དི་ཏྭཱ དྷ་མྨཾ;
ནི་བྦཱ་ན་པ་དཱ་བྷི་པ་ཏྠ་ཡཱ་ནོ, ས་མྨཱ སོ ལོ་ཀེ པ་རི་བྦ་ཛེ་ཡྻ.
༣༦༨. ‘‘ཡོ ཝ་ནྡ་ཏི མ་ནྟི ནུ་ཎྞ་མེ་ཡྻ [ནུ་ནྣ་མེ་ཡྻ (?)], ཨ་ཀྐུ་ཊྛོ་པི ན ས་ནྡྷི་ཡེ་ཐ བྷི་ཀྑུ;
ལ་དྡྷཱ པ་ར་བྷོ་ཛ་ནཾ ན མ་ཛྫེ, ས་མྨཱ སོ ལོ་ཀེ པ་རི་བྦ་ཛེ་ཡྻ.
༣༦༩. ‘‘ལོ་བྷ་ཉྩ བྷ་ཝ་ཉྩ ཝི་པྤ་ཧཱ་ཡ, ཝི་ར་ཏོ ཚེ་ད་ན་བ་ནྡྷ་ནཱ ཙ [ཚེ་ད་ན་བ་ནྡྷ་ན་ཏོ (སཱི. སྱཱ.)] བྷི་ཀྑུ;
སོ ཏི་ཎྞ་ཀ་ཐཾ་ཀ་ཐོ ཝི་ས་ལློ, ས་མྨཱ སོ ལོ་ཀེ པ་རི་བྦ་ཛེ་ཡྻ.
༣༧༠. ‘‘སཱ་རུ་པྤཾ ཨ་ཏྟ་ནོ ཝི་དི་ཏྭཱ, ནོ ཙ བྷི་ཀྑུ ཧིཾ་སེ་ཡྻ ཀ་ཉྩི ལོ་ཀེ;
ཡ་ཐཱ ཏ་ཐི་ཡཾ ཝི་དི་ཏྭཱ དྷ་མྨཾ, ས་མྨཱ སོ ལོ་ཀེ པ་རི་བྦ་ཛེ་ཡྻ.
༣༧༡. ‘‘ཡ་སྶཱ་ནུ་ས་ཡཱ ན ས་ནྟི ཀེ་ཙི, མཱུ་ལཱ ཙ [མཱུ་ལཱ (སཱི. སྱཱ.)] ཨ་ཀུ་ས་ལཱ ས་མཱུ་ཧ་ཏཱ་སེ;
སོ ནི་རཱ་སོ [ནི་རཱ་ས་ཡོ (སཱི.), ནི་རཱ་ས་སོ (སྱཱ.)] ཨ་ནཱ་སི་སཱ་ནོ [ཨ་ནཱ་ས་ཡཱ་ནོ (སཱི. པཱི.), ཨ་ནཱ་ས་སཱ་ནོ (སྱཱ.)], ས་མྨཱ སོ ལོ་ཀེ པ་རི་བྦ་ཛེ་ཡྻ.
༣༧༢. ‘‘ཨཱ་ས་ཝ་ཁཱི་ཎོ པ་ཧཱི་ན་མཱ་ནོ, ས་བྦཾ རཱ་ག་པ་ཐཾ ཨུ་པཱ་ཏི་ཝ་ཏྟོ;
ད་ནྟོ པ་རི་ནི་བྦུ་ཏོ ཋི་ཏ་ཏྟོ, ས་མྨཱ སོ ལོ་ཀེ པ་རི་བྦ་ཛེ་ཡྻ.
༣༧༣. ‘‘ས་དྡྷོ སུ་ཏ་ཝཱ ནི་ཡཱ་མ་ད་སྶཱི, ཝ་གྒ་ག་ཏེ་སུ ན ཝ་གྒ་སཱ་རི དྷཱི་རོ;
ལོ་བྷཾ དོ་སཾ ཝི་ནེ་ཡྻ པ་ཊི་གྷཾ, ས་མྨཱ སོ ལོ་ཀེ པ་རི་བྦ་ཛེ་ཡྻ.
༣༧༤. ‘‘སཾ་སུ་དྡྷ་ཛི་ནོ ཝི་ཝ་ཊྚ་ཙྪ་དོ, དྷ་མྨེ་སུ ཝ་སཱི པཱ་ར་གཱུ ཨ་ནེ་ཛོ;
ས་ངྑཱ་ར་ནི་རོ་དྷ་ཉཱ་ཎ་ཀུ་ས་ལོ, ས་མྨཱ སོ ལོ་ཀེ པ་རི་བྦ་ཛེ་ཡྻ.
༣༧༥. ‘‘ཨ་ཏཱི་ཏེ་སུ ཨ་ནཱ་ག་ཏེ་སུ ཙཱ་པི, ཀ་པྤཱ་ཏཱི་ཏོ ཨ་ཏི་ཙྩ་སུ་དྡྷི་པ་ཉྙོ;
ས་བྦཱ་ཡ་ཏ་ནེ་ཧི ཝི་པྤ་མུ་ཏྟོ, ས་མྨཱ སོ ལོ་ཀེ པ་རི་བྦ་ཛེ་ཡྻ.
༣༧༦. ‘‘ཨ་ཉྙཱ་ཡ པ་དཾ ས་མེ་ཙྩ དྷ་མྨཾ, ཝི་ཝ་ཊཾ དི་སྭཱ་ན པ་ཧཱ་ན་མཱ་ས་ཝཱ་ནཾ;
ས་བྦུ་པ་དྷཱི་ནཾ པ་རི་ཀྑ་ཡཱ་ནོ [པ་རི་ཀྑ་ཡཱ (པཱི.)], ས་མྨཱ སོ ལོ་ཀེ པ་རི་བྦ་ཛེ་ཡྻ’’.
༣༧༧. ‘‘ཨ་དྡྷཱ ཧི བྷ་ག་ཝཱ ཏ་ཐེ་ཝ ཨེ་ཏཾ, ཡོ སོ ཨེ་ཝཾ་ཝི་ཧཱ་རཱི ད་ནྟོ བྷི་ཀྑུ;
ས་བྦ་སཾ་ཡོ་ཛ་ན་ཡོ་ག་ཝཱི་ཏི་ཝ་ཏྟོ [ས་བྦ་སཾ་ཡོ་ཛ་ནི་ཡེ ཙ ཝཱི་ཏི་ཝ་ཏྟོ (སཱི. སྱཱ. པཱི.)], ས་མྨཱ སོ ལོ་ཀེ པ་རི་བྦ་ཛེ་ཡྻཱ’’ཏི.
ས་མྨཱ་པ་རི་བྦཱ་ཛ་ནཱི་ཡ་སུ་ཏྟཾ ཏེ་ར་ས་མཾ ནི་ཊྛི་ཏཾ.