༩. ཧེ་མ་ཝ་ཏ་སུ་ཏྟཾ
༡༥༣. ‘‘ཨ་ཛྫ པ་ནྣ་ར་སོ ཨུ་པོ་ས་ཐོ, (ཨི་ཏི སཱ་ཏཱ་གི་རོ ཡ་ཀྑོ)
དི་བྦཱ [དི་བྱཱ (སཱི. སྱཱ. ཀཾ. པཱི.)] ར་ཏྟི ཨུ་པ་ཊྛི་ཏཱ;
ཨ་ནོ་མ་ནཱ་མཾ ས་ཏྠཱ་རཾ, ཧ་ནྡ པ་སྶཱ་མ གོ་ཏ་མཾ’’.
༡༥༤. ‘‘ཀ་ཙྩི མ་ནོ སུ་པ་ཎི་ཧི་ཏོ, (ཨི་ཏི ཧེ་མ་ཝ་ཏོ ཡ་ཀྑོ)
ས་བྦ་བྷཱུ་ཏེ་སུ ཏཱ་དི་ནོ;
ཀ་ཙྩི ཨི་ཊྛེ ཨ་ནི་ཊྛེ ཙ, ས་ངྐ་པྤ་སྶ ཝ་སཱི་ཀ་ཏཱ’’.
༡༥༥. ‘‘མ་ནོ ཙ་སྶ སུ་པ་ཎི་ཧི་ཏོ, (ཨི་ཏི སཱ་ཏཱ་གི་རོ ཡ་ཀྑོ)
ས་བྦ་བྷཱུ་ཏེ་སུ ཏཱ་དི་ནོ;
ཨ་ཐོ ཨི་ཊྛེ ཨ་ནི་ཊྛེ ཙ, ས་ངྐ་པྤ་སྶ ཝ་སཱི་ཀ་ཏཱ’’.
༡༥༦. ‘‘ཀ་ཙྩི ཨ་དི་ནྣཾ ནཱ་དི་ཡ་ཏི, (ཨི་ཏི ཧེ་མ་ཝ་ཏོ ཡ་ཀྑོ)
ཀ་ཙྩི པཱ་ཎེ་སུ ས་ཉྙ་ཏོ;
ཀ་ཙྩི ཨཱ་རཱ པ་མཱ་ད་མྷཱ, ཀ་ཙྩི ཛྷཱ་ནཾ ན རི་ཉྩ་ཏི’’.
༡༥༧. ‘‘ན སོ ཨ་དི་ནྣཾ ཨཱ་དི་ཡ་ཏི, (ཨི་ཏི སཱ་ཏཱ་གི་རོ ཡ་ཀྑོ)
ཨ་ཐོ པཱ་ཎེ་སུ ས་ཉྙ་ཏོ;
ཨ་ཐོ ཨཱ་རཱ པ་མཱ་ད་མྷཱ, བུ་དྡྷོ ཛྷཱ་ནཾ ན རི་ཉྩ་ཏི’’.
༡༥༨. ‘‘ཀ་ཙྩི མུ་སཱ ན བྷ་ཎ་ཏི, (ཨི་ཏི ཧེ་མ་ཝ་ཏོ ཡ་ཀྑོ)
ཀ་ཙྩི ན ཁཱི་ཎ་བྱ་པྤ་ཐོ;
ཀ་ཙྩི ཝེ་བྷཱུ་ཏི་ཡཾ ནཱ་ཧ, ཀ་ཙྩི ས་མྥཾ ན བྷཱ་ས་ཏི’’.
༡༥༩. ‘‘མུ་སཱ ཙ སོ ན བྷ་ཎ་ཏི, (ཨི་ཏི སཱ་ཏཱ་གི་རོ ཡ་ཀྑོ)
ཨ་ཐོ ན ཁཱི་ཎ་བྱ་པྤ་ཐོ;
ཨ་ཐོ ཝེ་བྷཱུ་ཏི་ཡཾ ནཱ་ཧ, མ་ནྟཱ ཨ་ཏྠཾ ཙ [ཨ་ཏྠཾ སོ (སཱི. པཱི. ཀ.)] བྷཱ་ས་ཏི’’.
༡༦༠. ‘‘ཀ་ཙྩི ན ར་ཛྫ་ཏི ཀཱ་མེ་སུ, (ཨི་ཏི ཧེ་མ་ཝ་ཏོ ཡ་ཀྑོ)
ཀ་ཙྩི ཙི་ཏྟཾ ཨ་ནཱ་ཝི་ལཾ;
ཀ་ཙྩི མོ་ཧཾ ཨ་ཏི་ཀྐ་ནྟོ, ཀ་ཙྩི དྷ་མྨེ་སུ ཙ་ཀྑུ་མཱ’’.
༡༦༡. ‘‘ན སོ ར་ཛྫ་ཏི ཀཱ་མེ་སུ, (ཨི་ཏི སཱ་ཏཱ་གི་རོ ཡ་ཀྑོ)
ཨ་ཐོ ཙི་ཏྟཾ ཨ་ནཱ་ཝི་ལཾ;
ས་བྦ་མོ་ཧཾ ཨ་ཏི་ཀྐ་ནྟོ, བུ་དྡྷོ དྷ་མྨེ་སུ ཙ་ཀྑུ་མཱ’’.
༡༦༢. ‘‘ཀ་ཙྩི ཝི་ཛྫཱ་ཡ ས་མྤ་ནྣོ, (ཨི་ཏི ཧེ་མ་ཝ་ཏོ ཡ་ཀྑོ )
ཀ་ཙྩི སཾ་སུ་དྡྷ་ཙཱ་ར་ཎོ;
ཀ་ཙྩི་སྶ ཨཱ་ས་ཝཱ ཁཱི་ཎཱ, ཀ་ཙྩི ན་ཏྠི པུ་ན་བྦྷ་ཝོ’’.
༡༦༣. ‘‘ཝི་ཛྫཱ་ཡ ཙེ་ཝ ས་མྤ་ནྣོ, (ཨི་ཏི སཱ་ཏཱ་གི་རོ ཡ་ཀྑོ)
ཨ་ཐོ སཾ་སུ་དྡྷ་ཙཱ་ར་ཎོ;
ས་བྦ་སྶ ཨཱ་ས་ཝཱ ཁཱི་ཎཱ, ན་ཏྠི ཏ་སྶ པུ་ན་བྦྷ་ཝོ’’.
༡༦༤. ‘‘ས་མྤ་ནྣཾ མུ་ནི་ནོ ཙི་ཏྟཾ, ཀ་མྨུ་ནཱ བྱ་པྤ་ཐེ་ན ཙ;
ཝི་ཛྫཱ་ཙ་ར་ཎ་ས་མྤ་ནྣཾ, དྷ་མྨ་ཏོ ནཾ པ་སཾ་ས་ཏི’’.
༡༦༥. ‘‘ས་མྤ་ནྣཾ མུ་ནི་ནོ ཙི་ཏྟཾ, ཀ་མྨུ་ནཱ བྱ་པྤ་ཐེ་ན ཙ;
ཝི་ཛྫཱ་ཙ་ར་ཎ་ས་མྤ་ནྣཾ, དྷ་མྨ་ཏོ ཨ་ནུ་མོ་ད་སི’’.
༡༦༦. ‘‘ས་མྤ་ནྣཾ མུ་ནི་ནོ ཙི་ཏྟཾ, ཀ་མྨུ་ནཱ བྱ་པྤ་ཐེ་ན ཙ;
ཝི་ཛྫཱ་ཙ་ར་ཎ་ས་མྤ་ནྣཾ, ཧ་ནྡ པ་སྶཱ་མ གོ་ཏ་མཾ.
༡༦༧. ‘‘ཨེ་ཎི་ཛ་ངྒྷཾ ཀི་སཾ ཝཱི་རཾ [དྷཱི་རཾ (སྱཱ.)], ཨ་པྤཱ་ཧཱ་རཾ ཨ་ལོ་ལུ་པཾ;
མུ་ནིཾ ཝ་ན་སྨིཾ ཛྷཱ་ཡ་ནྟཾ, ཨེ་ཧི པ་སྶཱ་མ གོ་ཏ་མཾ.
༡༦༨. ‘‘སཱི་ཧཾ་ཝེ་ཀ་ཙ་རཾ ནཱ་གཾ, ཀཱ་མེ་སུ ཨ་ན་པེ་ཀྑི་ནཾ;
ཨུ་པ་ས་ངྐ་མྨ པུ་ཙྪཱ་མ, མ་ཙྩུ་པཱ་ས་པྤ་མོ་ཙ་ནཾ.
༡༦༩. ‘‘ཨ་ཀྑཱ་ཏཱ་རཾ པ་ཝ་ཏྟཱ་རཾ, ས་བྦ་དྷ་མྨཱ་ན པཱ་ར་གུཾ;
བུ་དྡྷཾ ཝེ་ར་བྷ་ཡཱ་ཏཱི་ཏཾ, མ་ཡཾ པུ་ཙྪཱ་མ གོ་ཏ་མཾ’’.
༡༧༠. ‘‘ཀི་སྨིཾ ལོ་ཀོ ས་མུ་པྤ་ནྣོ, (ཨི་ཏི ཧེ་མ་ཝ་ཏོ ཡ་ཀྑོ)
ཀི་སྨིཾ ཀུ་བྦ་ཏི ས་ནྠ་ཝཾ [ས་ནྡྷ་ཝཾ (ཀ.)];
ཀི་སྶ ལོ་ཀོ ཨུ་པཱ་དཱ་ཡ, ཀི་སྨིཾ ལོ་ཀོ ཝི་ཧ་ཉྙ་ཏི’’.
༡༧༡. ‘‘ཚ་སུ [ཚ་སྶུ (སཱི. པཱི.)] ལོ་ཀོ ས་མུ་པྤ་ནྣོ, (ཧེ་མ་ཝ་ཏཱ་ཏི བྷ་ག་ཝཱ)
ཚ་སུ ཀུ་བྦ་ཏི ས་ནྠ་ཝཾ;
ཚ་ནྣ་མེ་ཝ ཨུ་པཱ་དཱ་ཡ, ཚ་སུ ལོ་ཀོ ཝི་ཧ་ཉྙ་ཏི’’.
༡༧༢. ‘‘ཀ་ཏ་མཾ ཏཾ ཨུ་པཱ་དཱ་ནཾ, ཡ་ཏྠ ལོ་ཀོ ཝི་ཧ་ཉྙ་ཏི;
ནི་ཡྻཱ་ནཾ པུ་ཙྪི་ཏོ བྲཱུ་ཧི, ཀ་ཐཾ དུ་ཀྑཱ པ་མུ་ཙྩ་ཏི’’ [པ་མུ་ཉྩ་ཏི (སྱཱ.)].
༡༧༣. ‘‘པ་ཉྩ ཀཱ་མ་གུ་ཎཱ ལོ་ཀེ, མ་ནོ་ཚ་ཊྛཱ པ་ཝེ་དི་ཏཱ;
ཨེ་ཏྠ ཚ་ནྡཾ ཝི་རཱ་ཛེ་ཏྭཱ, ཨེ་ཝཾ དུ་ཀྑཱ པ་མུ་ཙྩ་ཏི.
༡༧༤. ‘‘ཨེ་ཏཾ ལོ་ཀ་སྶ ནི་ཡྻཱ་ནཾ, ཨ་ཀྑཱ་ཏཾ ཝོ ཡ་ཐཱ་ཏ་ཐཾ;
ཨེ་ཏཾ ཝོ ཨ་ཧ་མ་ཀྑཱ་མི, ཨེ་ཝཾ དུ་ཀྑཱ པ་མུ་ཙྩ་ཏི’’.
༡༧༥. ‘‘ཀོ སཱུ་དྷ ཏ་ར་ཏི ཨོ་གྷཾ, ཀོ་དྷ ཏ་ར་ཏི ཨ་ཎྞ་ཝཾ;
ཨ་པྤ་ཏི་ཊྛེ ཨ་ནཱ་ལ་མྦེ, ཀོ ག་མྦྷཱི་རེ ན སཱི་ད་ཏི’’.
༡༧༦. ‘‘ས་བྦ་དཱ སཱི་ལ་ས་མྤ་ནྣོ, པ་ཉྙ་ཝཱ སུ་ས་མཱ་ཧི་ཏོ;
ཨ་ཛ྄ཛྷ་ཏྟ་ཙི་ནྟཱི [ཨ་ཛ྄ཛྷ་ཏྟ་ས་ཉྙཱི (སྱཱ. ཀཾ. ཀ.)] ས་ཏི་མཱ, ཨོ་གྷཾ ཏ་ར་ཏི དུ་ཏྟ་རཾ.
༡༧༧. ‘‘ཝི་ར་ཏོ ཀཱ་མ་ས་ཉྙཱ་ཡ, ས་བྦ་སཾ་ཡོ་ཛ་ནཱ་ཏི་གོ;
ན་ནྡཱི་བྷ་ཝ་པ་རི་ཀྑཱི་ཎོ, སོ ག་མྦྷཱི་རེ ན སཱི་ད་ཏི’’.
༡༧༨. ‘‘ག་བྦྷཱི་ར་པ་ཉྙཾ ནི་པུ་ཎ་ཏྠ་ད་སྶིཾ, ཨ་ཀི་ཉྩ་ནཾ ཀཱ་མ་བྷ་ཝེ ཨ་ས་ཏྟཾ;
ཏཾ པ་སྶ་ཐ ས་བྦ་དྷི ཝི་པྤ་མུ་ཏྟཾ, དི་བྦེ པ་ཐེ ཀ་མ་མཱ་ནཾ མ་ཧེ་སིཾ.
༡༧༩. ‘‘ཨ་ནོ་མ་ནཱ་མཾ ནི་པུ་ཎ་ཏྠ་ད་སྶིཾ, པ་ཉྙཱ་ད་དཾ ཀཱ་མཱ་ལ་ཡེ ཨ་ས་ཏྟཾ;
ཏཾ པ་སྶ་ཐ ས་བྦ་ཝི་དུཾ སུ་མེ་དྷཾ, ཨ་རི་ཡེ པ་ཐེ ཀ་མ་མཱ་ནཾ མ་ཧེ་སིཾ.
༡༨༠. ‘‘སུ་དི་ཊྛཾ ཝ་ཏ ནོ ཨ་ཛྫ, སུ་པྤ་བྷཱ་ཏཾ སུ་ཧུ་ཊྛི་ཏཾ;
ཡཾ ཨ་དྡ་སཱ་མ ས་མྦུ་དྡྷཾ, ཨོ་གྷ་ཏི་ཎྞ་མ་ནཱ་ས་ཝཾ.
༡༨༡. ‘‘ཨི་མེ ད་ས་ས་ཏཱ ཡ་ཀྑཱ, ཨི་དྡྷི་མ་ནྟོ ཡ་ས་སྶི་ནོ;
ས་བྦེ ཏཾ ས་ར་ཎཾ ཡ་ནྟི, ཏྭཾ ནོ ས་ཏྠཱ ཨ་ནུ་ཏྟ་རོ.
༡༨༢. ‘‘ཏེ མ་ཡཾ ཝི་ཙ་རི་སྶཱ་མ, གཱ་མཱ གཱ་མཾ ན་གཱ ན་གཾ;
ན་མ་སྶ་མཱ་ནཱ ས་མྦུ་དྡྷཾ, དྷ་མྨ་སྶ ཙ སུ་དྷ་མྨ་ཏ’’ནྟི.
ཧེ་མ་ཝ་ཏ་སུ་ཏྟཾ ན་ཝ་མཾ ནི་ཊྛི་ཏཾ.