༡༠. ཨཱ་ལ༹་ཝ་ཀ་སུ་ཏྟཾ
ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ ཨཱ་ལ༹་ཝི་ཡཾ ཝི་ཧ་ར་ཏི ཨཱ་ལ༹་ཝ་ཀ་སྶ ཡ་ཀྑ་སྶ བྷ་ཝ་ནེ. ཨ་ཐ ཁོ ཨཱ་ལ༹་ཝ་ཀོ ཡ་ཀྑོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ནི་ཀྑ་མ, ས་མ་ཎཱ’’ཏི. ‘‘སཱ་དྷཱ་ཝུ་སོ’’ཏི བྷ་ག་ཝཱ ནི་ཀྑ་མི. ‘‘པ་ཝི་ས, ས་མ་ཎཱ’’ཏི. ‘‘སཱ་དྷཱ་ཝུ་སོ’’ཏི བྷ་ག་ཝཱ པཱ་ཝི་སི.
དུ་ཏི་ཡ་མྤི ཁོ…པེ… ཏ་ཏི་ཡ་མྤི ཁོ ཨཱ་ལ༹་ཝ་ཀོ ཡ་ཀྑོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ནི་ཀྑ་མ, ས་མ་ཎཱ’’ཏི. ‘‘སཱ་དྷཱ་ཝུ་སོ’’ཏི བྷ་ག་ཝཱ ནི་ཀྑ་མི. ‘‘པ་ཝི་ས, ས་མ་ཎཱ’’ཏི. ‘‘སཱ་དྷཱ་ཝུ་སོ’’ཏི བྷ་ག་ཝཱ པཱ་ཝི་སི.
ཙ་ཏུ་ཏྠ་མྤི ཁོ ཨཱ་ལ༹་ཝ་ཀོ ཡ་ཀྑོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ནི་ཀྑ་མ, ས་མ་ཎཱ’’ཏི. ‘‘ན ཁྭཱ་ཧཾ ཏཾ, ཨཱ་ཝུ་སོ, ནི་ཀྑ་མི་སྶཱ་མི. ཡཾ ཏེ ཀ་ར་ཎཱི་ཡཾ, ཏཾ ཀ་རོ་ཧཱི’’ཏི.
‘‘པ་ཉྷཾ ཏཾ, ས་མ་ཎ, པུ་ཙྪི་སྶཱ་མི. ས་ཙེ མེ ན བྱཱ་ཀ་རི་སྶ་སི, ཙི་ཏྟཾ ཝཱ ཏེ ཁི་པི་སྶཱ་མི, ཧ་ད་ཡཾ ཝཱ ཏེ ཕཱ་ལེ་སྶཱ་མི, པཱ་དེ་སུ ཝཱ ག་ཧེ་ཏྭཱ པཱ་ར་ག་ངྒཱ་ཡ ཁི་པི་སྶཱ་མཱི’’ཏི.
‘‘ན ཁྭཱ་ཧཾ ཏཾ, ཨཱ་ཝུ་སོ, པ་སྶཱ་མི ས་དེ་ཝ་ཀེ ལོ་ཀེ ས་མཱ་ར་ཀེ ས་བྲ་ཧྨ་ཀེ ས་སྶ་མ་ཎ་བྲཱ་ཧྨ་ཎི་ཡཱ པ་ཛཱ་ཡ ས་དེ་ཝ་མ་ནུ་སྶཱ་ཡ ཡོ མེ ཙི་ཏྟཾ ཝཱ ཁི་པེ་ཡྻ ཧ་ད་ཡཾ ཝཱ ཕཱ་ལེ་ཡྻ པཱ་དེ་སུ ཝཱ ག་ཧེ་ཏྭཱ པཱ་ར་ག་ངྒཱ་ཡ ཁི་པེ་ཡྻ. ཨ་པི ཙ ཏྭཾ, ཨཱ་ཝུ་སོ, པུ་ཙྪ ཡ་དཱ་ཀ་ངྑ་སཱི’’ཏི. ཨ་ཐ ཁོ ཨཱ་ལ༹་ཝ་ཀོ ཡ་ཀྑོ བྷ་ག་ཝ་ནྟཾ གཱ་ཐཱ་ཡ ཨ་ཛ྄ཛྷ་བྷཱ་སི –
༡༨༣. ‘‘ཀིཾ སཱུ་དྷ ཝི་ཏྟཾ པུ་རི་ས་སྶ སེ་ཊྛཾ, ཀིཾ སུ སུ་ཙི་ཎྞཾ སུ་ཁ་མཱ་ཝ་ཧཱ་ཏི;
ཀིཾ སུ [ཀིཾ སཱུ (སཱི.)] ཧ་ཝེ སཱ་དུ་ཏ་རཾ ར་སཱ་ནཾ, ཀ་ཐཾ ཛཱི་ཝིཾ ཛཱི་ཝི་ཏ་མཱ་ཧུ སེ་ཊྛཾ’’.
༡༨༤. ‘‘ས་དྡྷཱི་དྷ ཝི་ཏྟཾ པུ་རི་ས་སྶ སེ་ཊྛཾ, དྷ་མྨོ སུ་ཙི་ཎྞོ སུ་ཁ་མཱ་ཝ་ཧཱ་ཏི;
ས་ཙྩཾ ཧ་ཝེ སཱ་དུ་ཏ་རཾ ར་སཱ་ནཾ, པ་ཉྙཱ་ཛཱི་ཝིཾ ཛཱི་ཝི་ཏ་མཱ་ཧུ སེ་ཊྛཾ’’.
༡༨༥. ‘‘ཀ་ཐཾ སུ ཏ་ར་ཏི ཨོ་གྷཾ, ཀ་ཐཾ སུ ཏ་ར་ཏི ཨ་ཎྞ་ཝཾ;
ཀ་ཐཾ སུ དུ་ཀྑ་མ་ཙྩེ་ཏི, ཀ་ཐཾ སུ པ་རི་སུ་ཛ྄ཛྷ་ཏི’’.
༡༨༦. ‘‘ས་དྡྷཱ ཏ་ར་ཏི ཨོ་གྷཾ, ཨ་པྤ་མཱ་དེ་ན ཨ་ཎྞ་ཝཾ;
ཝཱི་རི་ཡེ་ན [ཝི་རི་ཡེ་ན (སཱི. སྱཱ. ཀཾ. པཱི.)] དུ་ཀྑ་མ་ཙྩེ་ཏི, པ་ཉྙཱ་ཡ པ་རི་སུ་ཛ྄ཛྷ་ཏི’’.
༡༨༧. ‘‘ཀ་ཐཾ སུ ལ་བྷ་ཏེ པ་ཉྙཾ, ཀ་ཐཾ སུ ཝི་ནྡ་ཏེ དྷ་ནཾ;
ཀ་ཐཾ སུ ཀི་ཏྟིཾ པ་པྤོ་ཏི, ཀ་ཐཾ མི་ཏྟཱ་ནི ག་ནྠ་ཏི;
ཨ་སྨཱ ལོ་ཀཱ པ་རཾ ལོ་ཀཾ, ཀ་ཐཾ པེ་ཙྩ ན སོ་ཙ་ཏི’’.
༡༨༨. ‘‘ས་དྡ་ཧཱ་ནོ ཨ་ར་ཧ་ཏཾ, དྷ་མྨཾ ནི་བྦཱ་ན་པ་ཏྟི་ཡཱ;
སུ་སྶཱུ་སཾ [སུ་སྶཱུ་སཱ (སཱི. པཱི.)] ལ་བྷ་ཏེ པ་ཉྙཾ, ཨ་པྤ་མ་ཏྟོ ཝི་ཙ་ཀྑ་ཎོ.
༡༨༩. ‘‘པ་ཏི་རཱུ་པ་ཀཱ་རཱི དྷུ་ར་ཝཱ, ཨུ་ཊྛཱ་ཏཱ ཝི་ནྡ་ཏེ དྷ་ནཾ;
ས་ཙྩེ་ན ཀི་ཏྟིཾ པ་པྤོ་ཏི, ད་དཾ མི་ཏྟཱ་ནི ག་ནྠ་ཏི.
༡༩༠. ‘‘ཡ་སྶེ་ཏེ ཙ་ཏུ་རོ དྷ་མྨཱ, ས་དྡྷ་སྶ གྷ་ར་མེ་སི་ནོ;
ས་ཙྩཾ དྷ་མྨོ [ད་མོ (?)] དྷི་ཏི ཙཱ་གོ, ས ཝེ པེ་ཙྩ ན སོ་ཙ་ཏི.
༡༩༡. ‘‘ཨི་ངྒྷ ཨ་ཉྙེ་པི པུ་ཙྪ་སྶུ, པུ་ཐཱུ ས་མ་ཎ་བྲཱ་ཧྨ་ཎེ;
ཡ་དི ས་ཙྩཱ ད་མཱ ཙཱ་གཱ, ཁ་ནྟྱཱ བྷི་ཡྻོ་དྷ ཝི་ཛྫ་ཏི’’.
༡༩༢. ‘‘ཀ་ཐཾ ནུ དཱ་ནི པུ་ཙྪེ་ཡྻཾ, པུ་ཐཱུ ས་མ་ཎ་བྲཱ་ཧྨ་ཎེ;
ཡོ་ཧཾ [སོ་ཧཾ (སཱི. པཱི.)] ཨ་ཛྫ པ་ཛཱ་ནཱ་མི, ཡོ ཨ་ཏྠོ ས་མྤ་རཱ་ཡི་ཀོ.
༡༩༣. ‘‘ཨ་ཏྠཱ་ཡ ཝ་ཏ མེ བུ་དྡྷོ, ཝཱ་སཱ་ཡཱ་ལ༹་ཝི་མཱ་ག་མཱ;
ཡོ་ཧཾ [ཨ་ཊྛི་ནྷཱ་རཱུ་ཧི སཾ་ཡུ་ཏྟོ (སྱཱ. ཀ.)] ཨ་ཛྫ པ་ཛཱ་ནཱ་མི, ཡ་ཏྠ དི་ནྣཾ མ་ཧ་པྥ་ལཾ.
༡༩༤. ‘‘སོ ཨ་ཧཾ ཝི་ཙ་རི་སྶཱ་མི, གཱ་མཱ གཱ་མཾ པུ་རཱ པུ་རཾ;
ན་མ་སྶ་མཱ་ནོ ས་མྦུ་དྡྷཾ, དྷ་མྨ་སྶ ཙ སུ་དྷ་མྨ་ཏ’’ནྟི.
ཨཱ་ལ༹་ཝ་ཀ་སུ་ཏྟཾ ད་ས་མཾ ནི་ཊྛི་ཏཾ.