༡༡. ཝི་ཛ་ཡ་སུ་ཏྟཾ
༡༩༥. ཙ་རཾ ཝཱ ཡ་དི ཝཱ ཏི་ཊྛཾ, ནི་སི་ནྣོ ཨུ་ད ཝཱ ས་ཡཾ;
ས་མི་ཉྫེ་ཏི པ་སཱ་རེ་ཏི, ཨེ་སཱ ཀཱ་ཡ་སྶ ཨི་ཉྫ་ནཱ.
༡༩༦. ཨ་ཊྛི་ན་ཧཱ་རུ་སཾ་ཡུ་ཏྟོ, ཏ་ཙ་མཾ་སཱ་ཝ་ལེ་པ་ནོ;
ཚ་ཝི་ཡཱ ཀཱ་ཡོ པ་ཊི་ཙྪ་ནྣོ, ཡ་ཐཱ་བྷཱུ་ཏཾ ན དི་སྶ་ཏི.
༡༩༧. ཨ་ནྟ་པཱུ་རོ ཨུ་ད་ར་པཱུ་རོ, ཡ་ཀ་ན་པེ་ལ༹་སྶ [ཡ་ཀ་པེ་ལ༹་སྶ (སཱི. སྱཱ.)] ཝ་ཏྠི་ནོ;
ཧ་ད་ཡ་སྶ པ་པྥཱ་ས་སྶ, ཝ་ཀྐ་སྶ པི་ཧ་ཀ་སྶ ཙ.
༡༩༨. སི་ངྒྷཱ་ཎི་ཀཱ་ཡ ཁེ་ལ༹་སྶ, སེ་ད་སྶ ཙ མེ་ད་སྶ ཙ;
ལོ་ཧི་ཏ་སྶ ལ་སི་ཀཱ་ཡ, པི་ཏྟ་སྶ ཙ ཝ་སཱ་ཡ ཙ.
༡༩༩. ཨ་ཐ་སྶ ན་ཝ་ཧི སོ་ཏེ་ཧི, ཨ་སུ་ཙཱི ས་ཝ་ཏི ས་བྦ་དཱ;
ཨ་ཀྑི་མྷཱ ཨ་ཀྑི་གཱུ་ཐ་ཀོ, ཀ་ཎྞ་མྷཱ ཀ་ཎྞ་གཱུ་ཐ་ཀོ.
༢༠༠. སི་ངྒྷཱ་ཎི་ཀཱ ཙ ནཱ་ས་ཏོ, མུ་ཁེ་ན ཝ་མ་ཏེ་ཀ་དཱ;
པི་ཏྟཾ སེ་མྷ་ཉྩ ཝ་མ་ཏི, ཀཱ་ཡ་མྷཱ སེ་ད་ཛ་ལླི་ཀཱ.
༢༠༡. ཨ་ཐ་སྶ སུ་སི་རཾ སཱི་སཾ, མ་ཏྠ་ལུ་ངྒ་སྶ པཱུ་རི་ཏཾ;
སུ་བྷ་ཏོ ནཾ མ་ཉྙ་ཏི, བཱ་ལོ ཨ་ཝི་ཛྫཱ་ཡ པུ་ར་ཀྑ་ཏོ.
༢༠༢. ཡ་དཱ ཙ སོ མ་ཏོ སེ་ཏི, ཨུ་དྡྷུ་མཱ་ཏོ ཝི་ནཱི་ལ་ཀོ;
ཨ་པ་ཝི་དྡྷོ སུ་སཱ་ན་སྨིཾ, ཨ་ན་པེ་ཀྑཱ ཧོ་ནྟི ཉཱ་ཏ་ཡོ.
༢༠༣. ཁཱ་ད་ནྟི ནཾ སུ་ཝཱ་ནཱ [སུ་པཱ་ཎཱ (པཱི.)] ཙ, སི་ངྒཱ་ལཱ [སི་གཱ་ལཱ (སཱི. སྱཱ. ཀཾ. པཱི.)] ཝ་ཀཱ ཀི་མཱི;
ཀཱ་ཀཱ གི་ཛ྄ཛྷཱ ཙ ཁཱ་ད་ནྟི, ཡེ ཙ་ཉྙེ ས་ནྟི པཱ་ཎི་ནོ.
༢༠༤. སུ་ཏྭཱ་ན བུ་དྡྷ་ཝ་ཙ་ནཾ, བྷི་ཀྑུ པ་ཉྙཱ་ཎ་ཝཱ ཨི་དྷ;
སོ ཁོ ནཾ པ་རི་ཛཱ་ནཱ་ཏི, ཡ་ཐཱ་བྷཱུ་ཏ་ཉྷི པ་སྶ་ཏི.
༢༠༥. ཡ་ཐཱ ཨི་དཾ ཏ་ཐཱ ཨེ་ཏཾ, ཡ་ཐཱ ཨེ་ཏཾ ཏ་ཐཱ ཨི་དཾ;
ཨ་ཛ྄ཛྷ་ཏྟ་ཉྩ བ་ཧི་དྡྷཱ ཙ, ཀཱ་ཡེ ཚ་ནྡཾ ཝི་རཱ་ཛ་ཡེ.
༢༠༦. ཚ་ནྡ་རཱ་ག་ཝི་ར་ཏྟོ སོ, བྷི་ཀྑུ པ་ཉྙཱ་ཎ་ཝཱ ཨི་དྷ;
ཨ་ཛ྄ཛྷ་གཱ ཨ་མ་ཏཾ ས་ནྟིཾ, ནི་བྦཱ་ནཾ པ་ད་མ་ཙྩུ་ཏཾ.
༢༠༧. དྭི་པཱ་ད་ཀོ་ཡཾ [དི་པཱ་ད་ཀོ་ཡཾ (སཱི. སྱཱ. ཀཾ. པཱི.)] ཨ་སུ་ཙི, དུ་གྒ་ནྡྷོ པ་རི་ཧཱ་ར་ཏི [པ་རི་ཧཱི་ར་ཏི (སཱི. སྱཱ. ཀཾ. པཱི.)];
ནཱ་ནཱ་ཀུ་ཎ་པ་པ་རི་པཱུ་རོ, ཝི་སྶ་ཝ་ནྟོ ཏ་ཏོ ཏ་ཏོ.
༢༠༨. ཨེ་ཏཱ་དི་སེ་ན ཀཱ་ཡེ་ན, ཡོ མ་ཉྙེ ཨུ་ཎྞ་མེ་ཏ་ཝེ [ཨུ་ནྣ་མེ་ཏ་ཝེ (?)];
པ་རཾ ཝཱ ཨ་ཝ་ཛཱ་ནེ་ཡྻ, ཀི་མ་ཉྙ་ཏྲ ཨ་ད་སྶ་ནཱ་ཏི.
ཝི་ཛ་ཡ་སུ་ཏྟཾ ཨེ་ཀཱ་ད་ས་མཾ ནི་ཊྛི་ཏཾ.