༡༢. མུ་ནི་སུ་ཏྟཾ
༢༠༩. ས་ནྠ་ཝཱ་ཏོ [ས་ནྡྷ་ཝ་ཏོ (ཀ.)] བྷ་ཡཾ ཛཱ་ཏཾ, ནི་ཀེ་ཏཱ ཛཱ་ཡ་ཏེ ར་ཛོ;
ཨ་ནི་ཀེ་ཏ་མ་ས་ནྠ་ཝཾ, ཨེ་ཏཾ ཝེ མུ་ནི་ད་སྶ་ནཾ.
༢༡༠. ཡོ ཛཱ་ཏ་མུ་ཙྪི་ཛྫ ན རོ་པ་ཡེ་ཡྻ, ཛཱ་ཡ་ནྟ་མ་སྶ ནཱ་ནུ་པྤ་ཝེ་ཙྪེ;
ཏ་མཱ་ཧུ ཨེ་ཀཾ མུ་ནི་ནཾ ཙ་ར་ནྟཾ, ཨ་དྡ་ཀྑི སོ ས་ནྟི་པ་དཾ མ་ཧེ་སི.
༢༡༡. ས་ངྑཱ་ཡ ཝ་ཏྠཱུ་ནི པ་མཱ་ཡ [པ་ཧཱ་ཡ (ཀ. སཱི. ཀ.), ས་མཱ་ཡ (ཀ.) པ + མཱི + ཏྭཱ = པ་མཱ་ཡ, ཡ་ཐཱ ནི་སྶཱ་ཡཱ་ཏི་པ་དཾ] བཱི་ཛཾ, སི་ནེ་ཧ་མ་སྶ ནཱ་ནུ་པྤ་ཝེ་ཙྪེ;
ས ཝེ མུ་ནཱི ཛཱ་ཏི་ཁ་ཡ་ནྟ་ད་སྶཱི, ཏ་ཀྐཾ པ་ཧཱ་ཡ ན ཨུ་པེ་ཏི ས་ངྑཾ.
༢༡༢. ཨ་ཉྙཱ་ཡ ས་བྦཱ་ནི ནི་ཝེ་ས་ནཱ་ནི, ཨ་ནི་ཀཱ་མ་ཡཾ ཨ་ཉྙ་ཏ་ར་མྤི ཏེ་སཾ;
ས ཝེ མུ་ནཱི ཝཱི་ཏ་གེ་དྷོ ཨ་གི་དྡྷོ, ནཱ་ཡཱུ་ཧ་ཏཱི པཱ་ར་ག་ཏོ ཧི ཧོ་ཏི.
༢༡༣. ས་བྦཱ་བྷི་བྷུཾ ས་བྦ་ཝི་དུཾ སུ་མེ་དྷཾ, ས་བྦེ་སུ དྷ་མྨེ་སུ ཨ་ནཱུ་པ་ལི་ཏྟཾ;
ས་བྦ་ཉྫ་ཧཾ ཏ་ཎྷ་ཀྑ་ཡེ ཝི་མུ་ཏྟཾ, ཏཾ ཝཱ་པི དྷཱི་རཱ མུ་ནི [མུ་ནིཾ (སཱི. པཱི.)] ཝེ་ད་ཡ་ནྟི.
༢༡༤. པ་ཉྙཱ་བ་ལཾ སཱི་ལ་ཝ་ཏཱུ་པ་པ་ནྣཾ, ས་མཱ་ཧི་ཏཾ ཛྷཱ་ན་ར་ཏཾ ས་ཏཱི་མཾ;
ས་ངྒཱ པ་མུ་ཏྟཾ ཨ་ཁི་ལཾ ཨ་ནཱ་ས་ཝཾ, ཏཾ ཝཱ་པི དྷཱི་རཱ མུ་ནི ཝེ་ད་ཡ་ནྟི.
༢༡༥. ཨེ་ཀཾ ཙ་ར་ནྟཾ མུ་ནི་མ་པྤ་མ་ཏྟཾ, ནི་ནྡཱ་པ་སཾ་སཱ་སུ ཨ་ཝེ་དྷ་མཱ་ནཾ;
སཱི་ཧཾ་ཝ ས་དྡེ་སུ ཨ་ས་ནྟ་ས་ནྟཾ, ཝཱ་ཏཾ་ཝ ཛཱ་ལ་མྷི ཨ་ས་ཛྫ་མཱ་ནཾ;
པ་དྨཾ་ཝ [པ་དུ་མཾ་ཝ (སཱི. སྱཱ. པཱི.)] ཏོ་ཡེ་ན ཨ་ལི་པྤ་མཱ་ནཾ [ཨ་ལི་མྤ་མཱ་ནཾ (སྱཱ. ཀ.)], ནེ་ཏཱ་ར་མ་ཉྙེ་ས་མ་ན་ཉྙ་ནེ་ཡྻཾ;
ཏཾ ཝཱ་པི དྷཱི་རཱ མུ་ནི ཝེ་ད་ཡ་ནྟི.
༢༡༦. ཡོ ཨོ་ག་ཧ་ཎེ ཐ་མྦྷོ་རི་ཝཱ་བྷི་ཛཱ་ཡ་ཏི, ཡ་སྨིཾ པ་རེ ཝཱ་ཙཱ་པ་རི་ཡ་ནྟཾ [ཝཱ་ཙཾ པ་རི་ཡ་ནྟཾ (ཀ.)] ཝ་ད་ནྟི;
ཏཾ ཝཱི་ཏ་རཱ་གཾ སུ་ས་མཱ་ཧི་ཏི་ནྡྲི་ཡཾ, ཏཾ ཝཱ་པི དྷཱི་རཱ མུ་ནི ཝེ་ད་ཡ་ནྟི.
༢༡༧. ཡོ ཝེ ཋི་ཏ་ཏྟོ ཏ་ས་རཾ་ཝ ཨུ་ཛྫུ, ཛི་གུ་ཙྪ་ཏི ཀ་མྨེ་ཧི པཱ་པ་ཀེ་ཧི;
ཝཱི་མཾ་ས་མཱ་ནོ ཝི་ས་མཾ ས་མ་ཉྩ, ཏཾ ཝཱ་པི དྷཱི་རཱ མུ་ནི ཝེ་ད་ཡ་ནྟི.
༢༡༨. ཡོ ས་ཉྙ་ཏ་ཏྟོ ན ཀ་རོ་ཏི པཱ་པཾ, ད་ཧ་རོ མ་ཛ྄ཛྷི་མོ ཙ མུ་ནི [ད་ཧ་རོ ཙ མ་ཛ྄ཛྷོ ཙ མུ་ནཱི (སཱི. སྱཱ. ཀཾ. པཱི.)] ཡ་ཏ་ཏྟོ;
ཨ་རོ་ས་ནེ་ཡྻོ ན སོ རོ་སེ་ཏི ཀ་ཉྩི [ན རོ་སེ་ཏི (སྱཱ.)], ཏཾ ཝཱ་པི དྷཱི་རཱ མུ་ནི ཝེ་ད་ཡ་ནྟི.
༢༡༩. ཡ་ད་གྒ་ཏོ མ་ཛ྄ཛྷ་ཏོ སེ་ས་ཏོ ཝཱ, པི་ཎྜཾ ལ་བྷེ་ཐ པ་ར་ད་ཏྟཱུ་པ་ཛཱི་ཝཱི;
ནཱ་ལཾ ཐུ་ཏུཾ ནོ་པི ནི་པ་ཙྩ་ཝཱ་དཱི, ཏཾ ཝཱ་པི དྷཱི་རཱ མུ་ནི ཝེ་ད་ཡ་ནྟི.
༢༢༠. མུ་ནིཾ ཙ་ར་ནྟཾ ཝི་ར་ཏཾ མེ་ཐུ་ན་སྨཱ, ཡོ ཡོ་བྦ་ནེ ནོ་པ་ནི་བ་ཛ྄ཛྷ་ཏེ ཀྭ་ཙི;
མ་ད་པྤ་མཱ་དཱ ཝི་ར་ཏཾ ཝི་པྤ་མུ་ཏྟཾ, ཏཾ ཝཱ་པི དྷཱི་རཱ མུ་ནི ཝེ་ད་ཡ་ནྟི.
༢༢༡. ཨ་ཉྙཱ་ཡ ལོ་ཀཾ པ་ར་མ་ཏྠ་ད་སྶིཾ, ཨོ་གྷཾ ས་མུ་དྡཾ ཨ་ཏི་ཏ་རི་ཡ ཏཱ་དིཾ;
ཏཾ ཚི་ནྣ་ག་ནྠཾ ཨ་སི་ཏཾ ཨ་ནཱ་ས་ཝཾ, ཏཾ ཝཱ་པི དྷཱི་རཱ མུ་ནི ཝེ་ད་ཡ་ནྟི.
༢༢༢. ཨ་ས་མཱ ཨུ་བྷོ དཱུ་ར་ཝི་ཧཱ་ར་ཝུ་ཏྟི་ནོ, གི་ཧཱི [གི་ཧི (ཀ.)] དཱ་ར་པོ་སཱི ཨ་མ་མོ ཙ སུ་བྦ་ཏོ;
པ་ར་པཱ་ཎ་རོ་དྷཱ་ཡ གི་ཧཱི ཨ་ས་ཉྙ་ཏོ, ནི་ཙྩཾ མུ་ནཱི ར་ཀྑ་ཏི པཱ་ཎི་ནེ [པཱ་ཎི་ནོ (སཱི.)] ཡ་ཏོ.
༢༢༣. སི་ཁཱི ཡ་ཐཱ ནཱི་ལ་གཱི་ཝོ [ནཱི་ལ་གི་ཝོ (སྱཱ.)] ཝི་ཧ་ངྒ་མོ, ཧཾ་ས་སྶ ནོ་པེ་ཏི ཛ་ཝཾ ཀུ་དཱ་ཙ་ནཾ;
ཨེ་ཝཾ གི་ཧཱི ནཱ་ནུ་ཀ་རོ་ཏི བྷི་ཀྑུ་ནོ, མུ་ནི་ནོ ཝི་ཝི་ཏྟ་སྶ ཝ་ན་མྷི ཛྷཱ་ཡ་ཏོ་ཏི.
མུ་ནི་སུ་ཏྟཾ དྭཱ་ད་ས་མཾ ནི་ཊྛི་ཏཾ.
ཨུ་ར་ག་ཝ་གྒོ པ་ཋ་མོ ནི་ཊྛི་ཏོ.