༣. ཁ་གྒ་ཝི་སཱ་ཎ་སུ་ཏྟཾ
༣༥. ས་བྦེ་སུ བྷཱུ་ཏེ་སུ ནི་དྷཱ་ཡ ད་ཎྜཾ, ཨ་ཝི་ཧེ་ཋ་ཡཾ ཨ་ཉྙ་ཏ་ར་མྤི ཏེ་སཾ;
ན པུ་ཏྟ་མི་ཙྪེ་ཡྻ ཀུ་ཏོ ས་ཧཱ་ཡཾ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༣༦. སཾ་ས་གྒ་ཛཱ་ཏ་སྶ བྷ་ཝ་ནྟི སྣེ་ཧཱ, སྣེ་ཧ་ནྭ་ཡཾ དུ་ཀྑ་མི་དཾ པ་ཧོ་ཏི;
ཨཱ་དཱི་ན་ཝཾ སྣེ་ཧ་ཛཾ པེ་ཀྑ་མཱ་ནོ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༣༧. མི་ཏྟེ སུ་ཧ་ཛྫེ ཨ་ནུ་ཀ་མྤ་མཱ་ནོ, ཧཱ་པེ་ཏི ཨ་ཏྠཾ པ་ཊི་བ་དྡྷ་ཙི་ཏྟོ;
ཨེ་ཏཾ བྷ་ཡཾ ས་ནྠ་ཝེ [ས་ནྡྷ་ཝེ (ཀ.)] པེ་ཀྑ་མཱ་ནོ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༣༨. ཝཾ་སོ ཝི་སཱ་ལོ་ཝ ཡ་ཐཱ ཝི་ས་ཏྟོ, པུ་ཏྟེ་སུ དཱ་རེ་སུ ཙ ཡཱ ཨ་པེ་ཀྑཱ;
ཝཾ་ས་ཀྐ་ལཱི༹་རོ་ཝ [ཝཾ་ས་ཀ་ལཱི༹་རོ་ཝ (སཱི.), ཝཾ་སཱ་ཀ་ལཱི༹་རོ་ཝ (སྱཱ. ཀཾ. པཱི.), ཝཾ་སེ་ཀ་ལཱི༹་རོ་ཝ (ནི་དྡེ་ས)] ཨ་ས་ཛྫ་མཱ་ནོ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༣༩. མི་གོ ཨ་ར་ཉྙ་མྷི ཡ་ཐཱ ཨ་བ་དྡྷོ [ཨ་བ་ནྡྷོ (སྱཱ. ཀཾ.)], ཡེ་ནི་ཙྪ་ཀཾ ག་ཙྪ་ཏི གོ་ཙ་རཱ་ཡ;
ཝི་ཉྙཱུ ན་རོ སེ་རི་ཏཾ པེ་ཀྑ་མཱ་ནོ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༤༠. ཨཱ་མ་ནྟ་ནཱ ཧོ་ཏི ས་ཧཱ་ཡ་མ་ཛ྄ཛྷེ, ཝཱ་སེ ཋཱ་ནེ ག་མ་ནེ ཙཱ་རི་ཀཱ་ཡ;
ཨ་ན་བྷི་ཛ྄ཛྷི་ཏཾ སེ་རི་ཏཾ པེ་ཀྑ་མཱ་ནོ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༤༡. ཁི་ཌྜཱ ར་ཏཱི ཧོ་ཏི ས་ཧཱ་ཡ་མ་ཛ྄ཛྷེ, པུ་ཏྟེ་སུ ཙ ཝི་པུ་ལཾ ཧོ་ཏི པེ་མཾ;
པི་ཡ་ཝི་པྤ་ཡོ་གཾ ཝི་ཛི་གུ་ཙྪ་མཱ་ནོ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༤༢. ཙཱ་ཏུ་དྡི་སོ ཨ་པྤ་ཊི་གྷོ ཙ ཧོ་ཏི, ས་ནྟུ་སྶ་མཱ་ནོ ཨི་ཏ་རཱི་ཏ་རེ་ན;
པ་རི་སྶ་ཡཱ་ནཾ ས་ཧི་ཏཱ ཨ་ཚ་མྦྷཱི, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༤༣. དུ་སྶ་ངྒ་ཧཱ པ་བྦ་ཛི་ཏཱ་པི ཨེ་ཀེ, ཨ་ཐོ ག་ཧ་ཊྛཱ གྷ་ར་མཱ་ཝ་ས་ནྟཱ;
ཨ་པྤོ་སྶུ་ཀྐོ པ་ར་པུ་ཏྟེ་སུ ཧུ་ཏྭཱ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༤༤. ཨོ་རོ་པ་ཡི་ཏྭཱ གི་ཧི་བྱ་ཉྫ་ནཱ་ནི [གི་ཧི་ཝྱ་ཉྫ་ནཱ་ནི (སྱཱ. ཀཾ. པཱི.)], ས་ཉྪི་ནྣ་པ་ཏྟོ [སཾ་སཱི་ན་པ་ཏྟོ (སཱི.)] ཡ་ཐཱ ཀོ་ཝི་ལཱ༹་རོ;
ཚེ་ཏྭཱ་ན ཝཱི་རོ གི་ཧི་བ་ནྡྷ་ནཱ་ནི, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༤༥. ས་ཙེ ལ་བྷེ་ཐ ནི་པ་ཀཾ ས་ཧཱ་ཡཾ, ས་དྡྷིཾ ཙ་རཾ སཱ་དྷུ་ཝི་ཧཱ་རི་དྷཱི་རཾ;
ཨ་བྷི་བྷུ་ཡྻ ས་བྦཱ་ནི པ་རི་སྶ་ཡཱ་ནི, ཙ་རེ་ཡྻ ཏེ་ན་ཏྟ་མ་ནོ ས་ཏཱི་མཱ.
༤༦. ནོ ཙེ ལ་བྷེ་ཐ ནི་པ་ཀཾ ས་ཧཱ་ཡཾ, ས་དྡྷིཾ ཙ་རཾ སཱ་དྷུ་ཝི་ཧཱ་རི་དྷཱི་རཾ;
རཱ་ཛཱ་ཝ ར་ཊྛཾ ཝི་ཛི་ཏཾ པ་ཧཱ་ཡ, ཨེ་ཀོ ཙ་རེ མཱ་ཏ་ངྒ་ར་ཉྙེ་ཝ ནཱ་གོ.
༤༧. ཨ་དྡྷཱ པ་སཾ་སཱ་མ ས་ཧཱ་ཡ་ས་མྤ་དཾ, སེ་ཊྛཱ ས་མཱ སེ་ཝི་ཏ་བྦཱ ས་ཧཱ་ཡཱ;
ཨེ་ཏེ ཨ་ལ་དྡྷཱ ཨ་ན་ཝ་ཛྫ་བྷོ་ཛཱི, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༤༨. དི་སྭཱ སུ་ཝ་ཎྞ་སྶ པ་བྷ་སྶ་རཱ་ནི, ཀ་མྨཱ་ར་པུ་ཏྟེ་ན སུ་ནི་ཊྛི་ཏཱ་ནི;
ས་ངྒྷ་ཊྚ་མཱ་ནཱ་ནི དུ་ཝེ བྷུ་ཛ་སྨིཾ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༤༩. ཨེ་ཝཾ དུ་ཏི་ཡེ་ན [དུ་ཏི་ཡེ་ན (ས་བྦ་ཏྠ)] ས་ཧཱ མ་མ་སྶ, ཝཱ་ཙཱ་བྷི་ལཱ་པོ ཨ་བྷི་ས་ཛྫ་ནཱ ཝཱ;
ཨེ་ཏཾ བྷ་ཡཾ ཨཱ་ཡ་ཏིཾ པེ་ཀྑ་མཱ་ནོ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༥༠. ཀཱ་མཱ ཧི ཙི་ཏྲཱ མ་དྷུ་རཱ མ་ནོ་ར་མཱ, ཝི་རཱུ་པ་རཱུ་པེ་ན མ་ཐེ་ནྟི ཙི་ཏྟཾ;
ཨཱ་དཱི་ན་ཝཾ ཀཱ་མ་གུ་ཎེ་སུ དི་སྭཱ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༥༡. ཨཱི་ཏཱི ཙ ག་ཎྜོ ཙ ཨུ་པ་དྡ་ཝོ ཙ, རོ་གོ ཙ ས་ལླ་ཉྩ བྷ་ཡ་ཉྩ མེ་ཏཾ;
ཨེ་ཏཾ བྷ་ཡཾ ཀཱ་མ་གུ་ཎེ་སུ དི་སྭཱ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༥༢. སཱི་ཏ་ཉྩ ཨུ་ཎྷ་ཉྩ ཁུ་དཾ པི་པཱ་སཾ, ཝཱ་ཏཱ་ཏ་པེ ཌཾ་ས་ས་རཱི་ས་པེ [ཌཾ་ས་སི་རིཾ་ས་པེ (སཱི. སྱཱ. ཀཾ. པཱི.)] ཙ;
ས་བྦཱ་ནི་པེ་ཏཱ་ནི ཨ་བྷི་ས་མྦྷ་ཝི་ཏྭཱ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༥༣. ནཱ་གོ་ཝ ཡཱུ་ཐཱ་ནི ཝི་ཝ་ཛྫ་ཡི་ཏྭཱ, ས་ཉྫཱ་ཏ་ཁ་ནྡྷོ པ་དུ་མཱི ཨུ་ལཱ༹་རོ;
ཡ་ཐཱ་བྷི་ར་ནྟཾ ཝི་ཧ་རཾ [ཝི་ཧ་རེ (སཱི. པཱི. ནི་དྡེ་ས)] ཨ་ར་ཉྙེ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༥༤. ཨ་ཊྛཱ་ན་ཏཾ ས་ངྒ་ཎི་ཀཱ་ར་ཏ་སྶ, ཡཾ ཕ་སྶ་ཡེ [ཕུ་སྶ་ཡེ (སྱཱ.)] སཱ་མ་ཡི་ཀཾ ཝི་མུ་ཏྟིཾ;
ཨཱ་དི་ཙྩ་བ་ནྡྷུ་སྶ ཝ་ཙོ ནི་ས་མྨ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༥༥. དི་ཊྛཱི་ཝི་སཱུ་ཀཱ་ནི ཨུ་པཱ་ཏི་ཝ་ཏྟོ, པ་ཏྟོ ནི་ཡཱ་མཾ པ་ཊི་ལ་དྡྷ་མ་གྒོ;
ཨུ་པྤ་ནྣ་ཉཱ་ཎོ་མྷི ཨ་ན་ཉྙ་ནེ་ཡྻོ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༥༦. ནི་ལློ་ལུ་པོ ནི་ཀྐུ་ཧོ ནི་པྤི་པཱ་སོ, ནི་མྨ་ཀྑོ ནི་དྡྷ་ནྟ་ཀ་སཱ་ཝ་མོ་ཧོ;
ནི་རཱ་ས་ཡོ [ནི་རཱ་སཱ་སོ (ཀ.)] ས་བྦ་ལོ་ཀེ བྷ་ཝི་ཏྭཱ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༥༧. པཱ་པཾ ས་ཧཱ་ཡཾ པ་རི་ཝ་ཛྫ་ཡེ་ཐ, ཨ་ན་ཏྠ་ད་སྶིཾ ཝི་ས་མེ ནི་ཝི་ཊྛཾ;
ས་ཡཾ ན སེ་ཝེ པ་སུ་ཏཾ པ་མ་ཏྟཾ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༥༨. བ་ཧུ་སྶུ་ཏཾ དྷ་མྨ་དྷ་རཾ བྷ་ཛེ་ཐ, མི་ཏྟཾ ཨུ་ལཱ༹་རཾ པ་ཊི་བྷཱ་ན་ཝ་ནྟཾ;
ཨ་ཉྙཱ་ཡ ཨ་ཏྠཱ་ནི ཝི་ནེ་ཡྻ ཀ་ངྑཾ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༥༩. ཁི་ཌྜཾ ར་ཏིཾ ཀཱ་མ་སུ་ཁ་ཉྩ ལོ་ཀེ, ཨ་ན་ལ་ངྐ་རི་ཏྭཱ ཨ་ན་པེ་ཀྑ་མཱ་ནོ;
ཝི་བྷཱུ་ས་ན་ཊྛཱ་ནཱ ཝི་ར་ཏོ ས་ཙྩ་ཝཱ་དཱི, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༦༠. པུ་ཏྟ་ཉྩ དཱ་རཾ པི་ཏ་ར་ཉྩ མཱ་ཏ་རཾ, དྷ་ནཱ་ནི དྷ་ཉྙཱ་ནི ཙ བ་ནྡྷ་ཝཱ་ནི [བ་ནྡྷ་ཝཱ་ནི ཙ (པཱི.)];
ཧི་ཏྭཱ་ན ཀཱ་མཱ་ནི ཡ་ཐོ་དྷི་ཀཱ་ནི, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༦༡. ས་ངྒོ ཨེ་སོ པ་རི་ཏྟ་མེ་ཏྠ སོ་ཁྱཾ, ཨ་པྤ་སྶཱ་དོ དུ་ཀྑ་མེ་ཏྠ བྷི་ཡྻོ;
ག་ལོ༹ ཨེ་སོ ཨི་ཏི ཉ་ཏྭཱ མུ་ཏཱི་མཱ [མ་ཏཱི་མཱ (སྱཱ. ཀ.)], ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༦༢. ས་ནྡཱ་ལ་ཡི་ཏྭཱ་ན [པ་དཱ་ལ་ཡི་ཏྭཱ་ན (ཀ.)] སཾ་ཡོ་ཛ་ནཱ་ནི, ཛཱ་ལཾ་ཝ བྷེ་ཏྭཱ ས་ལི་ལ་མྦུ་ཙཱ་རཱི;
ཨ་གྒཱི་ཝ ད་ཌྜྷཾ ཨ་ནི་ཝ་ཏྟ་མཱ་ནོ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༦༣. ཨོ་ཀྑི་ཏྟ་ཙ་ཀྑཱུ ན ཙ པཱ་ད་ལོ་ལོ, གུ་ཏྟི་ནྡྲི་ཡོ ར་ཀྑི་ཏ་མཱ་ན་སཱ་ནོ;
ཨ་ན་ཝ་སྶུ་ཏོ ཨ་པ་རི་ཌ་ཡ྄ཧ་མཱ་ནོ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༦༤. ཨོ་ཧཱ་ར་ཡི་ཏྭཱ གི་ཧི་བྱ་ཉྫ་ནཱ་ནི, ས་ཉྪ་ནྣ་པ་ཏྟོ [ས་ཉྪི་ནྣ་པ་ཏྟོ (སྱཱ. པཱི.), པ་ཙྪི་ནྣ་པ་ཏྟོ (ཀ.)] ཡ་ཐཱ པཱ་རི་ཚ་ཏྟོ;
ཀཱ་སཱ་ཡ་ཝ་ཏྠོ ཨ་བྷི་ནི་ཀྑ་མི་ཏྭཱ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༦༥. ར་སེ་སུ གེ་དྷཾ ཨ་ཀ་རཾ ཨ་ལོ་ལོ, ཨ་ན་ཉྙ་པོ་སཱི ས་པ་དཱ་ན་ཙཱ་རཱི;
ཀུ་ལེ ཀུ་ལེ ཨ་པྤ་ཊི་བ་དྡྷ་ཙི་ཏྟོ [ཨ་པྤ་ཊི་བ་ནྡྷ་ཙི་ཏྟོ (ཀ.)], ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༦༦. པ་ཧཱ་ཡ པ་ཉྩཱ་ཝ་ར་ཎཱ་ནི ཙེ་ཏ་སོ, ཨུ་པ་ཀྐི་ལེ་སེ བྱ་པ་ནུ་ཛྫ ས་བྦེ;
ཨ་ནི་སྶི་ཏོ ཚེ་ཏྭ [ཚེ་ཏྭཱ (སྱཱ. པཱི. ཀ.)] སི་ནེ་ཧ་དོ་སཾ [སྣེ་ཧ་དོ་སཾ (ཀ.)], ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༦༧. ཝི་པི་ཊྛི་ཀ་ཏྭཱ་ན སུ་ཁཾ དུ་ཁ་ཉྩ, པུ་བྦེ་ཝ ཙ སོ་མ་ན་སྶ་དོ་མ་ན་སྶཾ;
ལ་དྡྷཱ་ནུ་པེ་ཀྑཾ ས་མ་ཐཾ ཝི་སུ་དྡྷཾ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༦༨. ཨཱ་ར་དྡྷ་ཝཱི་རི་ཡོ པ་ར་མ་ཏྠ་པ་ཏྟི་ཡཱ, ཨ་ལཱི་ན་ཙི་ཏྟོ ཨ་ཀུ་སཱི་ཏ་ཝུ་ཏྟི;
ད་ལ༹ྷ་ནི་ཀྐ་མོ ཐཱ་མ་བ་ལཱུ་པ་པ་ནྣོ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༦༩. པ་ཊི་ས་ལླཱ་ནཾ ཛྷཱ་ན་མ་རི་ཉྩ་མཱ་ནོ, དྷ་མྨེ་སུ ནི་ཙྩཾ ཨ་ནུ་དྷ་མྨ་ཙཱ་རཱི;
ཨཱ་དཱི་ན་ཝཾ ས་མྨ་སི་ཏཱ བྷ་ཝེ་སུ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༧༠. ཏ་ཎྷ་ཀྑ་ཡཾ པ་ཏྠ་ཡ་མ་པྤ་མ་ཏྟོ, ཨ་ནེ་ལ༹་མཱུ་གོ [ཨ་ནེ་ལ་མཱུ་གོ (སྱཱ. པཱི. ཀ.)] སུ་ཏ་ཝཱ ས་ཏཱི་མཱ;
ས་ངྑཱ་ཏ་དྷ་མྨོ ནི་ཡ་ཏོ པ་དྷཱ་ན་ཝཱ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༧༡. སཱི་ཧོ་ཝ ས་དྡེ་སུ ཨ་ས་ནྟ་ས་ནྟོ, ཝཱ་ཏོ་ཝ ཛཱ་ལ་མྷི ཨ་ས་ཛྫ་མཱ་ནོ;
པ་དུ་མཾ་ཝ ཏོ་ཡེ་ན ཨ་ལི་པྤ་མཱ་ནོ [ཨ་ལི་མྤ་མཱ་ནོ (སཱི. སྱཱ. ཀ.)], ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༧༢. སཱི་ཧོ ཡ་ཐཱ དཱ་ཋ་བ་ལཱི པ་ས་ཡ྄ཧ, རཱ་ཛཱ མི་གཱ་ནཾ ཨ་བྷི་བྷུ་ཡྻ ཙཱ་རཱི;
སེ་ཝེ་ཐ པ་ནྟཱ་ནི སེ་ནཱ་ས་ནཱ་ནི, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༧༣. མེ་ཏྟཾ ཨུ་པེ་ཀྑཾ ཀ་རུ་ཎཾ ཝི་མུ་ཏྟིཾ, ཨཱ་སེ་ཝ་མཱ་ནོ མུ་དི་ཏ་ཉྩ ཀཱ་ལེ;
ས་བྦེ་ན ལོ་ཀེ་ན ཨ་ཝི་རུ་ཛ྄ཛྷ་མཱ་ནོ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༧༤. རཱ་ག་ཉྩ དོ་ས་ཉྩ པ་ཧཱ་ཡ མོ་ཧཾ, ས་ནྡཱ་ལ་ཡི་ཏྭཱ་ན སཾ་ཡོ་ཛ་ནཱ་ནི;
ཨ་ས་ནྟ་སཾ ཛཱི་ཝི་ཏ་ས་ངྑ་ཡ་མྷི, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
༧༥. བྷ་ཛ་ནྟི སེ་ཝ་ནྟི ཙ ཀཱ་ར་ཎ་ཏྠཱ, ནི་ཀྐཱ་ར་ཎཱ དུ་ལླ་བྷཱ ཨ་ཛྫ མི་ཏྟཱ;
ཨ་ཏྟ་ཊྛ་པ་ཉྙཱ ཨ་སུ་ཙཱི མ་ནུ་སྶཱ, ཨེ་ཀོ ཙ་རེ ཁ་གྒ་ཝི་སཱ་ཎ་ཀ་པྤོ.
ཁ་གྒ་ཝི་སཱ་ཎ་སུ་ཏྟཾ ཏ་ཏི་ཡཾ ནི་ཊྛི་ཏཾ.