༢. དྷ་ནི་ཡ་སུ་ཏྟཾ
༡༨. ‘‘པ་ཀྐོ་ད་ནོ དུ་དྡྷ་ཁཱི་རོ་ཧ་མ་སྨི, (ཨི་ཏི དྷ་ནི་ཡོ གོ་པོ)
ཨ་ནུ་ཏཱི་རེ མ་ཧི་ཡཱ ས་མཱ་ན་ཝཱ་སོ;
ཚ་ནྣཱ ཀུ་ཊི ཨཱ་ཧི་ཏོ གི་ནི, ཨ་ཐ ཙེ པ་ཏྠ་ཡ་སཱི པ་ཝ་སྶ དེ་ཝ’’.
༡༩. ‘‘ཨ་ཀྐོ་དྷ་ནོ ཝི་ག་ཏ་ཁི་ལོ་ཧ་མ་སྨི [ཝི་ག་ཏ་ཁཱི་ལོ་ཧ་མ་སྨི (སཱི. པཱི.)], (ཨི་ཏི བྷ་ག་ཝཱ)
ཨ་ནུ་ཏཱི་རེ མ་ཧི་ཡེ་ཀ་ར་ཏྟི་ཝཱ་སོ;
ཝི་ཝ་ཊཱ ཀུ་ཊི ནི་བྦུ་ཏོ གི་ནི, ཨ་ཐ ཙེ པ་ཏྠ་ཡ་སཱི པ་ཝ་སྶ དེ་ཝ’’.
༢༠. ‘‘ཨ་ནྡྷ་ཀ་མ་ཀ་སཱ ན ཝི་ཛྫ་རེ, (ཨི་ཏི དྷ་ནི་ཡོ གོ་པོ)
ཀ་ཙྪེ རཱུ་ལ༹ྷ་ཏི་ཎེ ཙ་ར་ནྟི གཱ་ཝོ;
ཝུ་ཊྛི་མྤི ས་ཧེ་ཡྻུ་མཱ་ག་ཏཾ, ཨ་ཐ ཙེ པ་ཏྠ་ཡ་སཱི པ་ཝ་སྶ དེ་ཝ’’.
༢༡. ‘‘བ་དྡྷཱ་སི བྷི་སཱི སུ་ས་ངྑ་ཏཱ, (ཨི་ཏི བྷ་ག་ཝཱ)
ཏི་ཎྞོ པཱ་ར་ག་ཏོ ཝི་ནེ་ཡྻ ཨོ་གྷཾ;
ཨ་ཏྠོ བྷི་སི་ཡཱ ན ཝི་ཛྫ་ཏི, ཨ་ཐ ཙེ པ་ཏྠ་ཡ་སཱི པ་ཝ་སྶ དེ་ཝ’’.
༢༢. ‘‘གོ་པཱི མ་མ ཨ་སྶ་ཝཱ ཨ་ལོ་ལཱ, (ཨི་ཏི དྷ་ནི་ཡོ གོ་པོ)
དཱི་གྷ་ར་ཏྟཾ [དཱི་གྷ་ར་ཏྟ (ཀ.)] སཾ་ཝཱ་སི་ཡཱ མ་ནཱ་པཱ;
ཏ་སྶཱ ན སུ་ཎཱ་མི ཀི་ཉྩི པཱ་པཾ, ཨ་ཐ ཙེ པ་ཏྠ་ཡ་སཱི པ་ཝ་སྶ དེ་ཝ’’.
༢༣. ‘‘ཙི་ཏྟཾ མ་མ ཨ་སྶ་ཝཾ ཝི་མུ་ཏྟཾ, (ཨི་ཏི བྷ་ག་ཝཱ)
དཱི་གྷ་ར་ཏྟཾ པ་རི་བྷཱ་ཝི་ཏཾ སུ་ད་ནྟཾ;
པཱ་པཾ པ་ན མེ ན ཝི་ཛྫ་ཏི, ཨ་ཐ ཙེ པ་ཏྠ་ཡ་སཱི པ་ཝ་སྶ དེ་ཝ’’.
༢༤. ‘‘ཨ་ཏྟ་ཝེ་ཏ་ན་བྷ་ཏོ་ཧ་མ་སྨི, (ཨི་ཏི དྷ་ནི་ཡོ གོ་པོ)
པུ་ཏྟཱ ཙ མེ ས་མཱ་ནི་ཡཱ ཨ་རོ་གཱ;
ཏེ་སཾ ན སུ་ཎཱ་མི ཀི་ཉྩི པཱ་པཾ, ཨ་ཐ ཙེ པ་ཏྠ་ཡ་སཱི པ་ཝ་སྶ དེ་ཝ’’.
༢༥. ‘‘ནཱ་ཧཾ བྷ་ཏ་ཀོ་སྨི ཀ་སྶ་ཙི, (ཨི་ཏི བྷ་ག་ཝཱ)
ནི་བྦི་ཊྛེ་ན ཙ་རཱ་མི ས་བྦ་ལོ་ཀེ;
ཨ་ཏྠོ བྷ་ཏི་ཡཱ ན ཝི་ཛྫ་ཏི, ཨ་ཐ ཙེ པ་ཏྠ་ཡ་སཱི པ་ཝ་སྶ དེ་ཝ’’.
༢༦. ‘‘ཨ་ཏྠི ཝ་སཱ ཨ་ཏྠི དྷེ་ནུ་པཱ, (ཨི་ཏི དྷ་ནི་ཡོ གོ་པོ)
གོ་དྷ་ར་ཎི་ཡོ པ་ཝེ་ཎི་ཡོ་པི ཨ་ཏྠི;
ཨུ་ས་བྷོ་པི ག་ཝ་མྤ་ཏཱི་དྷ ཨ་ཏྠི, ཨ་ཐ ཙེ པ་ཏྠ་ཡ་སཱི པ་ཝ་སྶ དེ་ཝ’’.
༢༧. ‘‘ན་ཏྠི ཝ་སཱ ན་ཏྠི དྷེ་ནུ་པཱ, (ཨི་ཏི བྷ་ག་ཝཱ)
གོ་དྷ་ར་ཎི་ཡོ པ་ཝེ་ཎི་ཡོ་པི ན་ཏྠི;
ཨུ་ས་བྷོ་པི ག་ཝ་མྤ་ཏཱི་དྷ ན་ཏྠི, ཨ་ཐ ཙེ པ་ཏྠ་ཡ་སཱི པ་ཝ་སྶ དེ་ཝ’’.
༢༨. ‘‘ཁི་ལཱ ནི་ཁཱ་ཏཱ ཨ་ས་མྤ་ཝེ་དྷཱི, (ཨི་ཏི དྷ་ནི་ཡོ གོ་པོ)
དཱ་མཱ མུ་ཉྫ་མ་ཡཱ ན་ཝཱ སུ་ས་ཎྛཱ་ནཱ;
ན ཧི ས་ཀྑི་ནྟི དྷེ་ནུ་པཱ་པི ཚེ་ཏྟུཾ [ཚེ་ཏུཾ (ཀ.)], ཨ་ཐ ཙེ པ་ཏྠ་ཡ་སཱི པ་ཝ་སྶ དེ་ཝ’’.
༢༩. ‘‘ཨུ་ས་བྷོ་རི་ཝ ཚེ་ཏྭ [ཚེ་ཏྭཱ (སྱཱ. ཀ.)] བ་ནྡྷ་ནཱ་ནི, (ཨི་ཏི བྷ་ག་ཝཱ)
ནཱ་གོ པཱུ་ཏི་ལ་ཏཾ་ཝ དཱ་ལ་ཡི་ཏྭཱ [པཱུ་ཏི་ལ་ཏཾ པ་དཱ་ལ་ཡི་ཏྭཱ (སྱཱ. ཀ.)];
ནཱ་ཧཾ པུ་ནུ་པེ་སྶཾ [པུ་ན ཨུ་པེ་སྶཾ (སཱི. སྱཱ. ཀཾ. པཱི.), པུ་ནུ་པེ་ཡྻ (ཀ.)] ག་བྦྷ་སེ་ཡྻཾ, ཨ་ཐ ཙེ པ་ཏྠ་ཡ་སཱི པ་ཝ་སྶ དེ་ཝ’’.
༣༠. ‘‘ནི་ནྣ་ཉྩ ཐ་ལ་ཉྩ པཱུ་ར་ཡ་ནྟོ, མ་ཧཱ་མེ་གྷོ པ་ཝ་སྶི ཏཱ་ཝ་དེ་ཝ;
སུ་ཏྭཱ དེ་ཝ་སྶ ཝ་སྶ་ཏོ, ཨི་མ་མ་ཏྠཾ དྷ་ནི་ཡོ ཨ་བྷཱ་ས་ཐ.
༣༡. ‘‘ལཱ་བྷཱ ཝ་ཏ ནོ ཨ་ན་པྤ་ཀཱ, ཡེ མ་ཡཾ བྷ་ག་ཝ་ནྟཾ ཨ་དྡ་སཱ་མ;
ས་ར་ཎཾ ཏཾ ཨུ་པེ་མ ཙ་ཀྑུ་མ, ས་ཏྠཱ ནོ ཧོ་ཧི ཏུ་ཝཾ མ་ཧཱ་མུ་ནི.
༣༢. ‘‘གོ་པཱི ཙ ཨ་ཧ་ཉྩ ཨ་སྶ་ཝཱ, བྲ་ཧྨ་ཙ་རི་ཡཾ [བྲ་ཧྨ་ཙ་རི་ཡ (ཀ.)] སུ་ག་ཏེ ཙ་རཱ་མ་སེ;
ཛཱ་ཏི་མ་ར་ཎ་སྶ པཱ་ར་གཱུ [པཱ་ར་གཱ (སཱི. སྱཱ. ཀཾ. པཱི.)], དུ་ཀྑ་སྶ་ནྟ་ཀ་རཱ བྷ་ཝཱ་མ་སེ’’.
༣༣. ‘‘ན་ནྡ་ཏི པུ་ཏྟེ་ཧི པུ་ཏྟི་མཱ, (ཨི་ཏི མཱ་རོ པཱ་པི་མཱ)
གོ་མཱ [གོ་མི་ཀོ (སཱི. པཱི.), གོ་པི་ཀོ (སྱཱ. ཀཾ.), གོ་པི་ཡོ (ཀ.)] གོ་ཧི ཏ་ཐེ་ཝ ན་ནྡ་ཏི;
ཨུ་པ་དྷཱི ཧི ན་ར་སྶ ན་ནྡ་ནཱ, ན ཧི སོ ན་ནྡ་ཏི ཡོ ནི་རཱུ་པ་དྷི’’.
༣༤. ‘‘སོ་ཙ་ཏི པུ་ཏྟེ་ཧི པུ་ཏྟི་མཱ, (ཨི་ཏི བྷ་ག་ཝཱ)
གོ་པི་ཡོ གོ་ཧི ཏ་ཐེ་ཝ སོ་ཙ་ཏི;
ཨུ་པ་དྷཱི ཧི ན་ར་སྶ སོ་ཙ་ནཱ, ན ཧི སོ སོ་ཙ་ཏི ཡོ ནི་རཱུ་པ་དྷཱི’’ཏི.
དྷ་ནི་ཡ་སུ་ཏྟཾ དུ་ཏི་ཡཾ ནི་ཊྛི་ཏཾ.