༦. སུ་ཏྟ་ཏྠ་ས་མུ་ཙྩ་ཡ་བྷཱུ་མི
༦༠. བུ་དྡྷཱ་ནཾ བྷ་ག་ཝ་ནྟཱ་ནཾ སཱ་ས་ནཾ ཏི་ཝི་དྷེ་ན ས་ངྒ་ཧཾ ག་ཙྪ་ཏི, ཁ་ནྡྷེ་སུ དྷཱ་ཏཱུ་སུ ཨཱ་ཡ་ཏ་ནེ་སུ ཙ. ཏ་ཏྠ པ་ཉྩ་ཀྑ་ནྡྷཱ རཱུ་པ་ཀྑ་ནྡྷོ ཡཱ་ཝ ཝི་ཉྙཱ་ཎ་ཀྑ་ནྡྷོ. ད་ས རཱུ་པ་ཨཱ་ཡ་ཏ་ནཱ་ནི ཙ་ཀྑུ རཱུ་པཱ ཙ ཡཱ་ཝ ཀཱ་ཡོ ཕོ་ཊྛ་བྦཱ ཙ, ཨ་ཡཾ རཱུ་པ་ཀྑ་ནྡྷོ. ཏ་ཏྠ ཚ ཝེ་ད་ནཱ་ཀཱ་ཡཱ ཝེ་ད་ནཱ་ཀྑ་ནྡྷོ ཙ་ཀྑུ་ས་མྥ་སྶ་ཛཱ ཝེ་ད་ནཱ ཡཱ་ཝ མ་ནོ་ས་མྥ་སྶ་ཛཱ ཝེ་ད་ནཱ, ཨ་ཡཾ ཝེ་ད་ནཱ་ཀྑ་ནྡྷོ. ཏ་ཏྠ ཚ ས་ཉྙཱ་ཀཱ་ཡཱ ས་ཉྙཱ་ཀྑ་ནྡྷོ, རཱུ་པ་ས་ཉྙཱ ཡཱ་ཝ དྷ་མྨ་ས་ཉྙཱ ཨི་མེ ཚ ས་ཉྙཱ་ཀཱ་ཡཱ, ཨ་ཡཾ ས་ཉྙཱ་ཀྑ་ནྡྷོ. ཏ་ཏྠ ཚ ཙེ་ཏ་ནཱ་ཀཱ་ཡཱ ས་ངྑཱ་ར་ཀྑ་ནྡྷོ, རཱུ་པ་ས་ཉྩེ་ཏ་ནཱ ཡཱ་ཝ དྷ་མྨ་ས་ཉྩེ་ཏ་ནཱ ཨི་མེ ཚ ཙེ་ཏ་ནཱ་ཀཱ་ཡཱ, ཨ་ཡཾ ས་ངྑཱ་ར་ཀྑ་ནྡྷོ. ཏ་ཏྠ ཚ ཝི་ཉྙཱ་ཎ་ཀཱ་ཡཱ ཝི་ཉྙཱ་ཎ་ཀྑ་ནྡྷོ, ཙ་ཀྑུ་ཝི་ཉྙཱ་ཎཾ ཡཱ་ཝ མ་ནོ་ཝི་ཉྙཱ་ཎཾ ཨི་མེ ཚ ཝི་ཉྙཱ་ཎ་ཀཱ་ཡཱ, ཨ་ཡཾ ཝི་ཉྙཱ་ཎ་ཀྑ་ནྡྷོ. ཨི་མེ པ་ཉྩ་ཀྑ་ནྡྷཱ.
ཏེ་སཾ ཀཱ པ་རི་ཉྙཱ? ཨ་ནི་ཙྩཾ དུ་ཀྑཾ ས་ཉྙཱ ཨ་ན་ཏྟཱ་ཏི ཨེ་སཱ ཨེ་ཏེ་སཾ པ་རི་ཉྙཱ. ཏ་ཏྠ ཀ་ཏ་མོ ཁ་ནྡྷ་ཏྠོ? ས་མཱུ་ཧ་ཏྠོ ཁ་ནྡྷ་ཏྠོ, པུ་ཉྫ་ཏྠོ ཁ་ནྡྷ་ཏྠོ, རཱ་ས་ཏྠོ ཁ་ནྡྷ་ཏྠོ. ཏཾ ཡ་ཐཱ ད་བྦ་ཀྑ་ནྡྷོ ཝ་ན་ཀྑ་ནྡྷོ དཱ་རུ་ཀྑ་ནྡྷོ ཨ་གྒི་ཀྑ་ནྡྷོ ཨུ་ད་ཀ་ཀྑ་ནྡྷོ ཝཱ་ཡུ་ཀྑ་ནྡྷོ ཨི་ཏི ཨེ་ཝཾ ཁ་ནྡྷེ་སུ ས་བྦ་ས་ངྒ་ཧོ་ཝ ཨེ་ཝཾ ཁ་ནྡྷ་ཏྠོ.
ཏ་ཏྠ ཨ་ཊྛཱ་ར་ས དྷཱ་ཏུ་ཡོ ཙ་ཀྑུ་དྷཱ་ཏུ རཱུ་པ་དྷཱ་ཏུ ཙ་ཀྑུ་ཝི་ཉྙཱ་ཎ་དྷཱ་ཏུ…པེ… མ་ནོ་དྷཱ་ཏུ དྷ་མྨ་དྷཱ་ཏུ མ་ནོ་ཝི་ཉྙཱ་ཎ་དྷཱ་ཏུ. ཨེ་ཏཱ་ཡོ ཨ་ཊྛཱ་ར་ས དྷཱ་ཏུ་ཡོ. ཏཱ་སཾ པ་རི་ཉྙཱ ཨ་ནི་ཙྩཾ དུ་ཀྑཾ ས་ཉྙཱ ཨ་ན་ཏྟཱ་ཏི ཨེ་སཱ ཨེ་ཏཱ་སཾ པ་རི་ཉྙཱ. ཏ་ཏྠ ཀོ དྷཱ་ཏུ་ཨ་ཏྠོ? ཝུ་ཙྩ་ཏེ ཨ་ཝ་ཡ་ཝ་ཏྠོ དྷཱ་ཏུ་ཨ་ཏྠོ. ཨ་ཝ་ཡ་ཝོ་ཏི ཙ་ཀྑུ ནོ པ་སཱ་དོ ཙ་ཀྑུ་དྷཱ་ཏུ. ཨེ་ཝཾ པ་ཉྩ་སུ དྷཱ་ཏཱུ་སུ པུ་ན རཱ་ག་ཝ་ཝ་ཙྪེ་ད་ཏྠོ དྷཱ་ཏུ་ཨ་ཏྠོ. ཝ་ཝ་ཙྪི་ནྣཱ ཧི ཙ་ཀྑུ་དྷཱ་ཏུ. ཨེ་ཝཾ པ་ཉྩ་སུ པུ་ན་རཱ་ཧ ཨེ་ཀ་ནྟི་པ་ཀ་ཏྱ་ཏྠེ་ན དྷཱ་ཏུ་ཨ་ཏྠོ་ཏི ཝུ་ཙྩ་ཏེ. ཏཾ ཡ་ཐཱ, པ་ཀ་ཏི་ཡཱ ཨ་ཡཾ པུ་རི་སོ པི་ཏྟི་ཀོ སེ་མྷི་ཀོ ཝཱ་ཏི་ཀོ ས་ནྣི་པཱ་ཏི་ཀོ་ཏི ཨེ་ཝཾ པ་ཀ་ཏི་ཙ་ཀྑུ་དྷཱ་ཏུ ད་ས་ནྣཾ པི་ཡཱ ཙ ས་བྦེ་སུ ཨི་ནྡྲི་ཡེ་སུ…པེ… ཝི་ས་བྷཱ་ག་ཏྠོ དྷཱ་ཏུ་ཨ་ཏྠོ.
ཏ་ཏྠ དྭཱ་ད་སཱ་ཡ་ཏ་ནཱ་ནི ཀ་ཏ་མཱ་ནི? ཚ ཨ་ཛ྄ཛྷ་ཏྟི་ཀཱ་ནི ཚ བཱ་ཧི་རཱ་ནི. ཙ་ཀྑཱ་ཡ་ཏ་ནཾ ཡཱ་ཝ མ་ནཱ་ཡ་ཏ་ན་ནྟི ཨ་ཛ྄ཛྷ་ཏྟི་ཀཾ, རཱུ་པཱ་ཡ་ཏ་ནཾ ཡཱ་ཝ དྷ་མྨཱ་ཡ་ཏ་ན་ནྟི བཱ་ཧི་རཾ. ཨེ་ཏཱ་ནི དྭཱ་ད་ས ཨཱ་ཡ་ཏ་ནཱ་ནི. ཨེ་ཏེ་སཾ ཀཱ པ་རི་ཉྙཱ? ཨ་ནི་ཙྩཾ དུ་ཀྑཾ ས་ཉྙཱ ཨ་ན་ཏྟཱ་ཏི, ཨེ་སཱ ཨེ་ཏེ་སཾ པ་རི་ཉྙཱ. ཨ་པི ཙ དྭི་དྷཱ པ་རི་ཉྙཱ ཉཱ་ཏ་པ་རི་ཉྙཱ ཙ པ་ཧཱ་ན་པ་རི་ཉྙཱ ཙ. ཏ་ཏྠ ཉཱ་ཏ་པ་རི་ཉྙཱ ནཱ་མ ཨ་ནི་ཙྩཾ དུ་ཀྑཾ ས་ཉྙཱ ཨ་ན་ཏྟཱ་ཏི, ཨེ་སཱ ཉཱ་ཏ་པ་རི་ཉྙཱ. པ་ཧཱ་ན་པ་རི་ཉྙཱ པ་ན ཚ་ནྡ་རཱ་ག་པྤ་ཧཱ་ནཱ, ཨེ་སཱ པ་ཧཱ་ན་པ་རི་ཉྙཱ. ཏ་ཏྠ ཀ་ཏ་མོ ཨཱ་ཡ་ཏ་ན་ཏྠོ? ཝུ་ཙྩ་ཏེ ཨཱ་ཀཱ་ར་ཏྠོ ཨཱ་ཡ་ཏ་ན་ཏྠོ. ཡ་ཐཱ སུ་ཝ་ཎྞཱ་ཀ་རོ དུ་བྦ་ཎྞཱ་ཀ་རོ, ཡ་ཐཱ དྭཱི་ཧི ཏེ་ཧི ཨཱ་ཀཱ་རེ་ཧི ཏེ ཏེ གཱ་ཝཱ ཨུ་ཏྟི་ཊྛ་ནྟི. ཨེ་ཝཾ ཨེ་ཏེ་ཧི ཙི་ཏྟ་ཙེ་ཏ་སི་ཀཱ གཱ་ཝཱ ཨུ་ཏྟི་ཊྛ་ནྟི ཀ་མྨ་ཀི་ལེ་སཱ དུ་ཀྑ་དྷ་མྨཱ ཙ. པུ་ན་རཱ་ཧ ཨཱ་ཡ་དཱ་ན་ཏྠོ ཨཱ་ཡ་ཏ་ན་ཏྠོ. ཡ་ཐཱ ར་ཉྙོ ཨཱ་ཡ་དཱ་ནེ་ཧི ཨཱ་ཡོ བྷ་ཝ་ཏི, ཨེ་ཝཾ ཨཱ་ཡ་དཱ་ན་ཏྠོ ཨཱ་ཡ་ཏ་ན་ཏྠོ.
༦༡. ཙ་ཏྟཱ་རི ཨ་རི་ཡ་ས་ཙྩཱ་ནི དུ་ཀྑཾ ས་མུ་ད་ཡོ ནི་རོ་དྷོ མ་གྒོ ཙ. དུ་ཀྑཾ ཡ་ཐཱ ས་མཱ་སེ་ན དྷ་མྨཱ་ཙ་རི་ཡཾ མཱ་ན་ས་ཉྩ, ས་མུ་ད་ཡོ ས་མཱ་སེ་ན ཨ་ཝི་ཛྫཱ ཙ ཏ་ཎྷཱ ཙ, ནི་རོ་དྷོ ས་མཱ་སེ་ན ཝི་ཛྫཱ ཙ ཝི་མུ་ཏྟི ཙ, མ་གྒོ ས་མཱ་སེ་ན ས་མ་ཐོ ཙ ཝི་པ་སྶ་ནཱ ཙ.
ཏ་ཏྠ ས་ཏྟ་ཏིཾ་ས བོ་དྷི་པ་ཀྑི་ཀཱ དྷ་མྨཱ ཀ་ཏ་མེ? ཙ་ཏྟཱ་རོ ས་ཏི་པ་ཊྛཱ་ནཱ ཡཱ་ཝ ཨ་རི་ཡོ ཨ་ཊྛ་ངྒི་ཀོ མ་གྒོ, ཨེ་ཝ་མེ་ཏེ ས་ཏྟ་ཏིཾ་ས བོ་དྷི་པ་ཀྑི་ཀཱ དྷ་མྨཱ. ཡེ དྷ་མྨཱ ཨ་ཏཱི་ཏཱ་ནཱ་ག་ཏ་པ་ཙྩུ་པྤ་ནྣཱ་ནཾ བུ་དྡྷཱ་ནཾ བྷ་ག་ཝ་ནྟཱ་ནཾ པ་ཙྩེ་ཀ་བུ་དྡྷཱ་ནཾ སཱ་ཝ་ཀཱ་ནཾ ཙ ནི་བྦཱ་ནཱ་ཡ སཾ་ཝ་ཏྟ་ནྟཱི་ཏི, སོ མ་གྒོ ཙ་ཏྟཱ་རོ ས་ཏི་པ་ཊྛཱ་ནཱ. ཀ་ཏ་མེ ཙ་ཏྟཱ་རོ? ཨི་དྷ བྷི་ཀྑུ ཀཱ་ཡེ ཀཱ་ཡཱ་ནུ་པ་སྶཱི ཝི་ཧ་ར་ཏི, ས་མྨ་པྤ་དྷཱ་ནཾ…པེ… ཨི་དྡྷི་པཱ་དཾ…པེ… ཨི་ནྡྲི་ཡཱ་ནི…པེ… བ་ལཱ་ནི…པེ… ཏ་ཏྠ ཀོ ཨི་ནྡྲི་ཡ་ཏྠོ? ཨི་ནྡ་ཏྠོ ཨི་ནྡྲི་ཡ་ཏྠོ, ཨཱ་དྷི་པ་ཏེ་ཡྻ་ཏྠོ ཨི་ནྡྲི་ཡ་ཏྠོ, པ་སཱ་ད་ཏྠོ ཨི་ནྡྲི་ཡ་ཏྠོ, ཨ་སཱ་དྷཱ་ར་ཎཾ ཀ་སྶ ཀི་རི་ཡ་ཏྠོ ཨི་ནྡྲི་ཡ་ཏྠོ ཨ་ན་ཝ་པ་རི་ཡ་ཏྠོ བ་ལ་ཏྠོ, ཐཱ་མ་ཏྠོ བ་ལ་ཏྠོ, ཨུ་པཱ་དཱ་ཡ་ཏྠོ བ་ལ་ཏྠོ, ཨུ་པ་ཏྠ་མྦྷ་ན་ཏྠོ བ་ལ་ཏྠོ.
ཏ་ཏྠ ཀ་ཏ་མེ ས་ཏྟ བོ་ཛ྄ཛྷ་ངྒཱ? ས་ཏི་ས་མྦོ་ཛ྄ཛྷ་ངྒོ ཡཱ་ཝ ཨུ་པེ་ཀྑཱ་ས་མྦོ་ཛ྄ཛྷ་ངྒོ. ཏ་ཏྠ ཀ་ཏ་མོ ཨ་ཊྛ་ངྒི་ཀོ མ་གྒོ? ས་མྨཱ་དི་ཊྛི ཡཱ་ཝ ས་མྨཱ་ས་མཱ་དྷི. ཏ་ཏྠ ཨ་ཊྛ་ངྒི་ཀོ མ་གྒོ་ཏི ཁ་ནྡྷོ སཱི་ལ་ཀྑ་ནྡྷོ ཙ ས་མཱ་དྷི་ཀྑ་ནྡྷོ ཙ པ་ཉྙཱ་ཀྑ་ནྡྷོ ཙ. ཏ་ཏྠ ཡཱ ཙ ས་མྨཱ་ཝཱ་ཙཱ ཡོ ཙ ས་མྨཱ་ཀ་མྨ་ནྟོ ཡོ ཙ ས་མྨཱ་ཨཱ་ཛཱི་ཝོ, ཨ་ཡཾ སཱི་ལ་ཀྑ་ནྡྷོ. ཡཱ ཙ ས་མྨཱ་ས་ཏི ཡོ ཙ ས་མྨཱ་ཝཱ་ཡཱ་མོ ཡོ ཙ ས་མྨཱ་ས་མཱ་དྷི, ཨ་ཡཾ ས་མཱ་དྷི་ཀྑ་ནྡྷོ. ཡོ ཙ ས་མྨཱ་ས་ངྐ་པྤོ ཡཱ ཙ ས་མྨཱ་དི་ཊྛི, ཨ་ཡཾ པ་ཉྙཱ་ཀྑ་ནྡྷོ. ཨེ་ཝཾ ཏཱ་ཡོ ཏི་སྶོ སི་ཀྑཱ. ཨེ་ཝཾ ཏཱི་ཧཱ་ཀཱ་རེ་ཧི ད་ས པ་དཱ་ནི…པེ….
ཏ་ཏྠ ཡོ་གཱ་ཝ་ཙ་རོ སཱི་ལ་ཀྑ་ནྡྷེ ཋི་ཏོ དོ་སཾ ཨ་ཀུ་ས་ལཾ ན ཨུ་པཱ་དི་ཡ་ཏི, དོ་སཱ་ནུ་ས་ཡཾ ས་མཱུ་ཧ་ན་ཏི, དོ་ས་ས་ལླཾ ཨུ་དྡྷ་ར་ཏི, དུ་ཀྑ་ཝེ་ད་ནཾ པ་རི་ཛཱ་ནཱ་ཏི, ཀཱ་མ་དྷཱ་ཏུཾ ས་མ་ཏི་ཀྐ་མ་ཏི. ས་མཱ་དྷི་ཀྑ་ནྡྷེ ཋི་ཏོ ལོ་བྷཾ ཨ་ཀུ་ས་ལཾ ན ཨུ་པཱ་དི་ཡ་ཏི, རཱ་གཱ་ནུ་ས་ཡཾ ས་མཱུ་ཧ་ན་ཏི, ལོ་བྷ་ས་ལླཾ ཨུ་དྡྷ་ར་ཏི, སུ་ཁ་ཝེ་ད་ནཾ པ་རི་ཛཱ་ནཱ་ཏི, རཱུ་པ་དྷཱ་ཏུཾ ས་མ་ཏི་ཀྐ་མ་ཏི. པ་ཉྙཱ་ཀྑ་ནྡྷེ ཋི་ཏོ མོ་ཧཾ ཨ་ཀུ་ས་ལཾ ན ཨུ་པཱ་དི་ཡ་ཏི, ཨ་ཝི་ཛྫཱ་ནུ་ས་ཡཾ ས་མཱུ་ཧ་ན་ཏི, མོ་ཧ་ས་ལླཾ དི་ཊྛི་ས་ལླ་ཉྩ ཨུ་དྡྷ་ར་ཏི, ཨ་དུ་ཀྑ་མ་སུ་ཁ་ཝེ་ད་ནཾ པ་རི་ཛཱ་ནཱ་ཏི, ཨ་རཱུ་པ་དྷཱ་ཏུཾ ས་མ་ཏི་ཀྐ་མ་ཏི. ཨི་ཏི ཏཱི་ཧི ཁ་ནྡྷེ་ཧི ཏཱི་ཎི ཨ་ཀུ་ས་ལ་མཱུ་ལཱ་ནི ན ཨུ་པཱ་དི་ཡ་ཏི, ཙ་ཏྟཱ་རི ས་ལླཱ་ནི ཨུ་དྡྷ་ར་ཏི, ཏི་སྶོ ཝེ་ད་ནཱ པ་རི་ཛཱ་ནཱ་ཏི, ཏེ་དྷཱ་ཏུ་ཀཾ ས་མ་ཏི་ཀྐ་མ་ཏི.
༦༢. ཏ་ཏྠ ཀ་ཏ་མཱ ཨ་ཝི་ཛྫཱ? ཡཾ ཙ་ཏཱུ་སུ ཨ་རི་ཡ་ས་ཙྩེ་སུ ཨ་ཉྙཱ་ཎ་ནྟི ཝི་ཏྠཱ་རེ་ན ཡ་ཐཱ སོ པཱ་ཎ་ས་ཛྫེ་སུ ཀ་ཐཾ་ཀ་ཐཱ ཀཱ་ཏ་བྦཾ. ཏ་ཏྠ ཀ་ཏ་མཾ ཝི་ཉྙཱ་ཎཾ? ཚ ཝི་ཉྙཱ་ཎ་ཀཱ་ཡཱ ཝེ་ད་ནཱ ས་ཉྙཱ ཙེ་ཏ་ནཱ ཕ་སྶོ མ་ན་སི་ཀཱ་རོ, ཨི་དཾ ནཱ་མཾ. ཏ་ཏྠ ཀ་ཏ་མཾ རཱུ་པཾ? ཙཱ་ཏུ་མ་ཧཱ་བྷཱུ་ཏི་ཀཾ ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཨུ་པཱ་དཱ་ཡ་རཱུ་པ་སྶ པ་ཉྙ་ཏྟིཾ. ཨི་ཏི པུ་རི་མ་ཀ་ཉྩ ནཱ་མཾ ཨི་ད་ཉྩ རཱུ་པཾ ཏ་དུ་བྷ་ཡཾ ནཱ་མ་རཱུ་པ་ནྟི ཝུ་ཙྩ་ཏི. ཏ་ཏྠ ཚ་ལཱ༹་ཡ་ཏ་ན་ནྟི ཚ ཨ་ཛ྄ཛྷ་ཏྟི་ཀཱ་ནི ཨཱ་ཡ་ཏ་ནཱ་ནི, ཙ་ཀྑུ ཨ་ཛ྄ཛྷ་ཏྟི་ཀཾ ཨཱ་ཡ་ཏ་ནཾ ཡཱ་ཝ མ་ནོ ཨ་ཛ྄ཛྷ་ཏྟི་ཀཾ ཨཱ་ཡ་ཏ་ནཾ. ཕ་སྶོ་ཏི ཚ ཕ་སྶ་ཀཱ་ཡཱ ཙ་ཀྑུ་ས་མྥ་སྶོ ཡཱ་ཝ མ་ནོ་ས་མྥ་སྶོ་ཏི ཕ་སྶོ. ཚ ཝེ་ད་ནཱ་ཀཱ་ཡཱ ཝེ་ད་ནཱ. ཏ་ཎྷཱ་ཏི ཚ ཏ་ཎྷཱ་ཀཱ་ཡཱ ཏ་ཎྷཱ. ཨུ་པཱ་དཱ་ན་ནྟི ཙ་ཏྟཱ་རི ཨུ་པཱ་དཱ་ནཱ་ནི ཀཱ་མུ་པཱ་དཱ་ནཾ དི་ཊྛུ་པཱ་དཱ་ནཾ སཱི་ལ་བྦ་ཏུ་པཱ་དཱ་ནཾ ཨ་ཏྟ་ཝཱ་དུ་པཱ་དཱ་ན་ནྟི ཨུ་པཱ་དཱ་ནཾ. བྷ་ཝོ་ཏི ཏ་ཡོ བྷ་ཝཱ ཀཱ་མ་བྷ་ཝོ རཱུ་པ་བྷ་ཝོ ཨ་རཱུ་པ་བྷ་ཝོ. ཏ་ཏྠ ཀ་ཏ་མཱ ཛཱ་ཏི? ཡཱ པ་ཋ་མཾ ཁ་ནྡྷཱ་ནཾ པ་ཋ་མཾ དྷཱ་ཏཱུ་ནཾ པ་ཋ་མཾ ཨཱ་ཡ་ཏ་ནཱ་ནཾ ཨུ་པྤ་ཏྟི ཛཱ་ཏི ས་ཉྫཱ་ཏི ཨོ་ཀྐ་ནྟི ཨ་བྷི་ནི་བྦ་ཏྟི ཁ་ནྡྷཱ་ནཾ པཱ་ཏུ་བྷཱ་ཝོ, ཨ་ཡཾ ཛཱ་ཏི. ཏ་ཏྠ ཀ་ཏ་མཱ ཛ་རཱ? ཛ་རཱ ནཱ་མ ཡཾ ཏཾ ཁ་ཎྜི་ཙྩཾ པཱ་ལི་ཙྩཾ ཝ་ལི་ཏྟ་ཙ་ཏཱ པ་ཝི་ཝི་ཏྟཾ ཙ་ཏུ་ནྣཾ མ་ཧཱ་བྷཱུ་ཏཱ་ནཾ ཝི་ཝ་ཎྞ་ཏཾ བྷ་གྒོ ཏཾ ཛ་རཱ ཧཱི་ཡ་ནཱ པ་ཧཱི་ཡ་ནཱ ཨཱ་ཡུ་ནོ ཧཱ་ནི སཾ་ཧཱ་ནི ཨི་ནྡྲི་ཡཱ་ནཾ པ་རི་བྷེ་དོ ཨུ་པ་ནཱ་ཧོ པ་རི་པཱ་ཀོ, ཨ་ཡཾ ཛ་རཱ. ཏ་ཏྠ ཀ་ཏ་མཾ མ་ར་ཎཾ? མ་ར་ཎཾ ནཱ་མ ཡཾ ཏ་སྨིཾ ཏ་སྨིཾ ས་ཏྟ་ནི་ཀཱ་ཡེ ཏེ་སཾ ཏེ་སཾ ས་ཏྟཱ་ནཾ ཙུ་ཏི ཙ་ཝ་ན་ཏཱ མ་ར་ཎཾ ཀཱ་ལ་ངྐི་རི་ཡཱ ཨུ་དྡྷུ་མཱ་ཏ་ཀཱ་ནཾ བྷེ་དོ ཀཱ་ཡ་སྶ ཛཱི་ཝི་ཏི་ནྡྲི་ཡ་སྶ ཨུ་པ་ཙྪེ་དོ, ཨི་དཾ མ་ར་ཎཾ. ཨི་ཏི པུ་རི་མི་ཀཱ ཙ ཛ་རཱ ཨི་ད་ཉྩ མ་ར་ཎཾ ཏ་དུ་བྷ་ཡཾ ཛ་རཱ་མ་ར་ཎཾ.
ཏ་ཏྠ ཨ་ནྡྷ་ཀཱ་ར་ཏི་མི་སཱ ཡ་ཐཱ་བྷཱུ་ཏཾ ཨ་པྤ་ཛཱ་ན་ན་ལ་ཀྑ་ཎཱ ཨ་ཝི་ཛྫཱ ས་ངྑཱ་རཱ་ནཾ པ་ད་ཊྛཱ་ནཾ ཧ. ཨ་བྷི་ས་ངྑ་ར་ཎ་ལ་ཀྑ་ཎཱ ས་ངྑཱ་རཱ, ཨུ་པ་ཙ་ཡ་པུ་ན་བྦྷ་ཝཱ་བྷི་རོ་པ་ན་པ་ཙྩུ་པ་ཊྛཱ་ནཱ. ཏེ ཝི་ཉྙཱ་ཎ་སྶ པ་ད་ཊྛཱ་ནཾ. ཝ་ཏྠུ ས་ཝི་ཉྙ་ཏྟི་ལ་ཀྑ་ཎཾ ཝི་ཉྙཱ་ཎཾ, ཏཾ ནཱ་མ་རཱུ་པ་སྶ པ་ད་ཊྛཱ་ནཾ. ཨ་ནེ་ཀ་ས་ནྣི་སྶ་ཡ་ལ་ཀྑ་ཎཾ ནཱ་མ་རཱུ་པཾ, ཏཾ ས་ལཱ༹་ཡ་ཏ་ན་སྶ པ་ད་ཊྛཱ་ནཾ. ཨི་ནྡྲི་ཡ་ཝ་ཝ་ཏྠཱ་པ་ན་ལ་ཀྑ་ཎཾ ས་ལཱ༹་ཡ་ཏ་ནཾ, ཏཾ ཕ་སྶ་སྶ པ་ད་ཊྛཱ་ནཾ. ས་ནྣི་པཱ་ཏ་ལ་ཀྑ་ཎོ ཕ་སྶོ, སོ ཝེ་ད་ནཱ་ཡ པ་ད་ཊྛཱ་ནཾ. ཨ་ནུ་བྷ་ཝ་ན་ལ་ཀྑ་ཎཱ ཝེ་ད་ནཱ, སཱ ཏ་ཎྷཱ་ཡ པ་ད་ཊྛཱ་ནཾ. ཨ་ཛ྄ཛྷོ་སཱ་ན་ལ་ཀྑ་ཎཱ ཏ་ཎྷཱ, སཱ ཨུ་པཱ་དཱ་ན་སྶ པ་ད་ཊྛཱ་ནཾ. ཨཱ་དཱ་ན་པ་རི་ཧ་ན་ན་ལ་ཀྑ་ཎཾ ཨུ་པཱ་དཱ་ནཾ, ཏཾ བྷ་ཝ་སྶ པ་ད་ཊྛཱ་ནཾ. ནཱ་ནཱ་ག་ཏི་ཝི་ཀྑེ་པ་ལ་ཀྑ་ཎོ བྷ་ཝོ, སོ ཛཱ་ཏི་ཡཱ པ་ད་ཊྛཱ་ནཾ. ཁ་ནྡྷཱ་ནཾ པཱ་ཏུ་བྷཱ་ཝ་ལ་ཀྑ་ཎཱ ཛཱ་ཏི, སཱ ཛ་རཱ་ཡ པ་ད་ཊྛཱ་ནཾ. ཨུ་པ་ན་ཡ་པ་རི་པཱ་ཀ་ལ་ཀྑ་ཎཱ ཛ་རཱ, སཱ མ་ར་ཎ་སྶ པ་ད་ཊྛཱ་ནཾ. ཨཱ་ཡུ་ཀྑ་ཡ་ཛཱི་ཝི་ཏ་ཨུ་པ་རོ་དྷ་ལ་ཀྑ་ཎཾ མ་ར་ཎཾ, ཏཾ དུ་ཀྑ་སྶ པ་ད་ཊྛཱ་ནཾ. ཀཱ་ཡ་ས་མྤཱི་ལ༹་ན་ལ་ཀྑ་ཎཾ དུ་ཀྑཾ, ཏཾ དོ་མ་ན་སྶ་སྶ པ་ད་ཊྛཱ་ནཾ. ཙི་ཏྟ་ས་མྤཱི་ལ༹་ན་ལ་ཀྑ་ཎཾ དོ་མ་ན་སྶཾ, ཏཾ སོ་ཀ་སྶ པ་ད་ཊྛཱ་ནཾ. སོ་ཙ་ན་ལ་ཀྑ་ཎོ སོ་ཀོ, སོ པ་རི་དེ་ཝ་སྶ པ་ད་ཊྛཱ་ནཾ. ཝ་ཙཱི་ནི་ཙྪཱ་ར་ཎ་ལ་ཀྑ་ཎོ པ་རི་དེ་ཝོ, སོ ཨུ་པཱ་ཡཱ་ས་སྶ པ་ད་ཊྛཱ་ནཾ. ཡེ ཨཱ་ཡཱ་སཱ ཏེ ཨུ་པཱ་ཡཱ་སཱ.
ན་ཝ པ་དཱ་ནི ཡ་ཏྠ ས་བྦོ ཨ་ཀུ་ས་ལ་པ་ཀྑོ ས་ངྒ་ཧཾ ས་མོ་ས་ར་ཎཾ ག་ཙྪ་ཏི. ཀ་ཏ་མཱ་ནི ན་ཝ པ་དཱ་ནི? དྭེ མཱུ་ལ་ཀི་ལེ་སཱ, ཏཱི་ཎི ཨ་ཀུ་ས་ལ་མཱུ་ལཱ་ནི, ཙ་ཏྟཱ་རོ ཝི་པ་ལླཱ་སཱ. ཏ་ཏྠ དྭེ མཱུ་ལ་ཀི་ལེ་སཱ ཨ་ཝི་ཛྫཱ ཙ བྷ་ཝ་ཏ་ཎྷཱ ཙ, ཏཱི་ཎི ཨ་ཀུ་ས་ལ་མཱུ་ལཱ་ནི ལོ་བྷོ དོ་སོ མོ་ཧོ ཙ. ཙ་ཏྟཱ་རོ ཝི་པ་ལླཱ་སཱ [ཨ. ནི. ༤.༤༩] – ‘‘ཨ་ནི་ཙྩེ ནི་ཙྩ’’ནྟི ས་ཉྙཱ་ཝི་པ་ལླཱ་སོ ཙི་ཏྟ་ཝི་པ་ལླཱ་སོ དི་ཊྛི་ཝི་པ་ལླཱ་སོ, ‘‘དུ་ཀྑེ སུ་ཁ’’ནྟི ས་ཉྙཱ་ཝི་པ་ལླཱ་སོ ཙི་ཏྟ་ཝི་པ་ལླཱ་སོ དི་ཊྛི་ཝི་པ་ལླཱ་སོ, ‘‘ཨ་ན་ཏྟ་ནི ཨ་ཏྟཱ’’ཏི ས་ཉྙཱ་ཝི་པ་ལླཱ་སོ ཙི་ཏྟ་ཝི་པ་ལླཱ་སོ དི་ཊྛི་ཝི་པ་ལླཱ་སོ, ‘‘ཨ་སུ་བྷེ སུ་བྷ’’ནྟི ས་ཉྙཱ་ཝི་པ་ལླཱ་སོ ཙི་ཏྟ་ཝི་པ་ལླཱ་སོ དི་ཊྛི་ཝི་པ་ལླཱ་སོ.
༦༣. ཏ་ཏྠ ཨ་ཝི་ཛྫཱ ནཱ་མ ཙ་ཏཱུ་སུ ཨ་རི་ཡ་ས་ཙྩེ་སུ ཡ་ཐཱ་བྷཱུ་ཏཾ ཨ་ཉྙཱ་ཎཾ, ཨ་ཡཾ ཨ་ཝི་ཛྫཱ. བྷ་ཝ་ཏ་ཎྷཱ ནཱ་མ ཡོ བྷ་ཝེ་སུ རཱ་གོ སཱ་རཱ་གོ ཨི་ཙྪཱ མུ་ཙྪཱ པ་ཏྠ་ནཱ ན་ནྡཱི ཨ་ཛ྄ཛྷོ་སཱ་ནཾ ཨ་པ་རི་ཙྩཱ་གོ, ཨ་ཡཾ བྷ་ཝ་ཏ་ཎྷཱ.
ཏ་ཏྠ ཀ་ཏ་མོ ལོ་བྷོ ཨ་ཀུ་ས་ལ་མཱུ་ལཾ?
ལོ་བྷོ ནཱ་མ སོ ཏེ་སུ ཏེ་སུ པ་ར་ཝ་ཏྠཱུ་སུ པ་ར་ད་བྦེ་སུ པ་ར་ཊྛཱ་ནེ་སུ པ་ར་སཱ་པ་ཏེ་ཡྻེ་སུ པ་ར་པ་རི་གྒ་ཧི་ཏེ་སུ ལོ་བྷོ ལུ་བྦྷ་ནཱ ཨི་ཙྪཱ མུ་ཙྪཱ པ་ཏྠ་ནཱ ན་ནྡཱི ཨ་ཛ྄ཛྷོ་སཱ་ནཾ ཨ་པ་རི་ཙྩཱ་གོ, ཨ་ཡཾ ལོ་བྷོ ཨ་ཀུ་ས་ལ་མཱུ་ལཾ. ཀ་སྶེ་ཏཾ མཱུ་ལཾ? ལོ་བྷོ ལོ་བྷ་ཛ་སྶ ཨ་ཀུ་ས་ལ་སྶ ཀཱ་ཡ་ཀ་མྨ་སྶ ཝ་ཙཱི་ཀ་མྨ་སྶ མ་ནོ་ཀ་མྨ་སྶ ཙ, ཏ་ཐཱ ཡ་ཐཱ ཏཾ་ས་མྤ་ཡུ་ཏྟཱ་ནཾ ཙི་ཏྟ་ཙེ་ཏ་སི་ཀཱ་ནཾ དྷ་མྨཱ་ནཾ མཱུ་ལཾ.
ཏ་ཏྠ ཀ་ཏ་མོ དོ་སོ ཨ་ཀུ་ས་ལ་མཱུ་ལཾ?
སོ ས་ཏྟེ་སུ ཨཱ་གྷཱ་ཏོ ཨ་ཀྑ་ནྟི ཨ་པྤ་ཙྩ་ཡོ བྱཱ་པཱ་དོ པ་དོ་སོ ཨ་ན་ཏྠ་ཀཱ་མ་ཏཱ ཙེ་ཏ་སོ པ་ཊི་གྷཱ་ཏོ, ཨ་ཡཾ དོ་སོ ཨ་ཀུ་ས་ལ་མཱུ་ལཾ.
ཀ་སྶེ་ཏཾ མཱུ་ལཾ?
དོ་ས་ཛ་སྶ ཀཱ་ཡ་ཀ་མྨ་སྶ ཝ་ཙཱི་ཀ་མྨ་སྶ མ་ནོ་ཀ་མྨ་སྶ ས་མྤ་ཡུ་ཏྟཱ་ན་ཉྩ ཙི་ཏྟ་ཙེ་ཏ་སི་ཀཱ་ནཾ དྷ་མྨཱ་ནཾ མཱུ་ལཾ.
ཏ་ཏྠ ཀ་ཏ་མོ མོ་ཧོ ཨ་ཀུ་ས་ལ་མཱུ་ལཾ?
ཡཾ ཙ་ཏཱུ་སུ ཨ་རི་ཡ་ས་ཙྩེ་སུ ཨ་ན་བྷི་ས་མ་ཡོ ཨ་ས་མྤ་ཛྫ་གྒཱ་ཧོ ཨ་པྤ་ཊི་ཝེ་དྷོ མོ་ཧོ མུ་ཡ྄ཧ་ནཱ ས་མྨོ་ཧོ ས་མྨུ་ཡ྄ཧ་ནཱ ཨ་ཝི་ཛྫཱ ཏ་མོ ཨ་ནྡྷ་ཀཱ་རོ ཨཱ་ཝ་ར་ཎཾ ནཱི་ཝ་ར་ཎཾ ཚ་ད་ནཾ ཨ་ཙྪ་ད་ནཾ [ཨ་ཝེ་ཙྪ་ད་ནཾ (པཱི. ཀ.)] ཨ་པ་ས་ཙྪཱ་ག་མ་ནཾ ཀུ་ས་ལཱ་ནཾ དྷ་མྨཱ་ནཾ, ཨ་ཡཾ མོ་ཧོ ཨ་ཀུ་ས་ལ་མཱུ་ལཾ.
ཀ་སྶེ་ཏཾ མཱུ་ལཾ?
མོ་ཧ་ཛ་སྶ ཨ་ཀུ་ས་ལ་སྶ ཀཱ་ཡ་ཀ་མྨ་སྶ ཝ་ཙཱི་ཀ་མྨ་སྶ མ་ནོ་ཀ་མྨ་སྶ ཙ ཏཾ་ས་མྤ་ཡུ་ཏྟ་ཀཱ་ན་ཉྩ ཙི་ཏྟ་ཙེ་ཏ་སི་ཀཱ་ནཾ དྷ་མྨཱ་ནཾ མཱུ་ལཾ.
ཏ་ཏྠ ཝི་པ་ལླཱ་སཱ ཛཱ་ནི་ཏ་བྦཱ, ཝི་པ་ལླཱ་སཱ་ནཾ ཝ་ཏྠུ ཛཱ་ནི་ཏ་བྦཾ. ཡཾ ཝི་པ་ལླཱ་སཾ སི་ཡཱ, ཏཾ ཛཱ་ནི་ཏ་བྦཾ. ཏ་ཏྠ ཨེ་ཀོ ཝི་པ་ལླཱ་སོ ཏཱི་ཎི ཝི་པ་ལླཱ་སཱ་ནི ཙ་ཏྟཱ་རི ཝི་པ་ལླཱ་ས་ཝ་ཏྠཱུ་ནི. ཀ་ཏ་མོ ཨེ་ཀོ ཝི་པ་ལླཱ་སོ ཙ, ཡེ་ན པ་ཊི་པ་ཀྑེ་ན ཝི་པ་ལླཱ་སི་ཏཾ ག་ཎྷཱ་ཏི?
‘‘ཨ་ནི་ཙྩེ ནི་ཙྩ’’ནྟི, ‘‘དུ་ཀྑེ སུ་ཁ’’ནྟི, ‘‘ཨ་ན་ཏྟ་ནི ཨ་ཏྟཱ’’ཏི, ‘‘ཨ་སུ་བྷེ སུ་བྷ’’ནྟི, ཨ་ཡཾ ཨེ་ཀོ ཝི་པ་ལླཱ་སོ.
ཀ་ཏ་མཱ་ནི ཙ་ཏྟཱ་རི ཝི་པ་ལླཱ་ས་ཝ་ཏྠཱུ་ནི?
ཀཱ་ཡོ ཝེ་ད་ནཱ ཙི་ཏྟཾ དྷ་མྨཱ ཙ. ཨི་མཱ་ནི ཙ་ཏྟཱ་རི ཝི་པ་ལླཱ་ས་ཝ་ཏྠཱུ་ནི.
ཀ་ཏ་མཱ་ནི ཏཱི་ཎི ཝི་པ་ལླཱ་སཱ་ནི?
ས་ཉྙཱ ཙི་ཏྟཾ དི་ཊྛི ཙ. ཨི་མཱ་ནི ཏཱི་ཎི ཝི་པ་ལླཱ་སཱ་ནི.
ཏ་ཏྠ མ་ནཱ་པི་ཀེ ཝ་ཏྠུ་མྷི ཨི་ནྡྲི་ཡ་ཝ་ཏྠེ ཝ་ཎྞཱ་ཡ་ཏ་ནེ ཝཱ ཡོ ནི་མི་ཏྟ་སྶ ཨུ་གྒཱ་ཧོ, ཨ་ཡཾ ས་ཉྙཱ་ཝི་པ་ལླཱ་སོ. ཏ་ཏྠ ཝི་པ་རཱི་ཏ་ཙི་ཏྟ་སྶ ཝ་ཏྠུ་མྷི ས་ཏི ཝི་ཉྙ་ཏྟི, ཨ་ཡཾ ཙི་ཏྟ་ཝི་པ་ལླཱ་སོ. ཏ་ཏྠ ཝི་པ་རཱི་ཏ་ཙི་ཏྟ་སྶ ཏ་མྷི རཱུ་པེ ‘‘ཨ་སུ་བྷེ སུ་བྷ’’ནྟི ཡཱ ཁ་ནྟི རུ་ཙི ཨུ་པེ་ཀྑ་ནཱ ནི་ཙྪ་ཡོ དི་ཊྛི ནི་ད་སྶ་ནཾ ས་ནྟཱི་ར་ཎཱ, ཨ་ཡཾ དི་ཊྛི་ཝི་པ་ལླཱ་སོ. ཏ་ཏྠ ཝ་ཏྠུ་བྷེ་དེ་ན ཀཱ་ཡེ་སུ དྭཱ་ད་ས ཝི་པ་ལླཱ་སཱ བྷ་ཝ་ནྟི. ཏ་ཡོ ཀཱ་ཡེ ཏ་ཡོ ཝེ་ད་ནཱ་ཡ ཏ་ཡོ ཙི་ཏྟེ ཏ་ཡོ དྷ་མྨེ, ཙ་ཏྟཱ་རོ ས་ཉྙཱ་ཝི་པ་ལླཱ་སཱ ཙ་ཏྟཱ་རོ ཙི་ཏྟ་ཝི་པ་ལླཱ་སཱ ཙ་ཏྟཱ་རོ དི་ཊྛི་ཝི་པ་ལླཱ་སཱ, ཨཱ་ཡ་ཏ་ནཱུ་པ་ཙ་ཡ་ཏོ ཙ་ཀྑུ་ཝི་ཉྙཱ་ཎ་ས་ཉྙཱ་ས་མ་ངྒི་སྶ རཱུ་པེ་སུ དྭཱ་ད་ས ཝི་པ་ལླཱ་སཱ ཡཱ་ཝ མ་ནོ ས་ཉྙཱ་ས་མ་ངྒི་སྶ, དྷ་མྨེ་སུ དྭཱ་ད་ས ཝི་པ་ལླཱ་སཱ ཚ དྭཱ་ད་ས་ཀཱ ཙ་ཏྟཱ་རི ཝི་པ་ལླཱ་སཱ བྷ་ཝ་ནྟི. ཨཱ་ར་མྨ་ཎ་ནཱ་ན་ཏྟ་ཏོ ཧི ཨ་པ་རི་མི་ཏ་ས་ངྑེ་ཡྻཱ་ནཾ ས་ཏྟཱ་ནཾ [ཨ་ཏྟཱ་ནཾ (ཀ.)] ཨ་པ་རི་མི་ཏ་མ་ས་ངྑེ་ཡྻཱ ཝི་པ་ལླཱ་སཱ བྷ་ཝ་ནྟི ཧཱི་ནུ་ཀྐ་ཊྛ་མ་ཛ྄ཛྷི་མ་ཏཱ་ཡ.
༦༤. ཏ་ཏྠ པ་ཉྩ་ཀྑ་ནྡྷཱ ཙ་ཏྟཱ་རི ཨ་ཏྟ་བྷཱ་ཝ་ཝ་ཏྠཱུ་ནི བྷ་ཝ་ནྟི. ཡོ རཱུ་པ་ཀྑ་ནྡྷོ, སོ ཀཱ་ཡོ ཨ་ཏྟ་བྷཱ་ཝ་ཝ་ཏྠུ. ཡོ ཝེ་ད་ནཱ་ཀྑ་ནྡྷོ, སོ ཝེ་ད་ནཱ ཨ་ཏྟ་བྷཱ་ཝ་ཝ་ཏྠུ. ཡོ ས་ཉྙཱ་ཀྑ་ནྡྷོ ཙ ས་ངྑཱ་ར་ཀྑ་ནྡྷོ ཙ, ཏེ དྷ་མྨཱ ཨ་ཏྟ་བྷཱ་ཝ་ཝ་ཏྠུ. ཡོ ཝི་ཉྙཱ་ཎ་ཀྑ་ནྡྷོ, སོ ཙི་ཏྟཾ ཨ་ཏྟ་བྷཱ་ཝ་ཝ་ཏྠུ. ཨི་ཏི པ་ཉྩ་ཀྑ་ནྡྷཱ ཙ་ཏྟཱ་རི ཨ་ཏྟ་བྷཱ་ཝ་ཝ་ཏྠཱུ་ནི. ཏ་ཏྠ ཀཱ་ཡེ ‘‘ཨ་སུ་བྷེ སུ་བྷ’’ནྟི ཝི་པ་ལླཱ་སོ བྷ་ཝ་ཏི. ཨེ་ཝཾ ཝེ་ད་ནཱ་སུ…པེ… ཙི་ཏྟེ…པེ… དྷ་མྨེ་སུ ཙ ཨ་ཏྟ་ཝི་པ་ལླཱ་སོ བྷ་ཝ་ཏི. ཏ་ཏྠ ཙ་ཏུ་ནྣཾ ཝི་པ་ལླཱ་སཱ་ནཾ ས་མུ་གྒྷཱ་ཏ་ན་ཏྠཾ བྷ་ག་ཝཱ ཙ་ཏྟཱ་རོ ས་ཏི་པ་ཊྛཱ་ནེ དེ་སེ་ཏི པ་ཉྙ་པེ་ཏི ཀཱ་ཡེ ཀཱ་ཡཱ་ནུ་པ་སྶཱི ཝི་ཧ་ར་ཏོ ‘‘ཨ་སུ་བྷེ སུ་བྷ’’ནྟི ཝི་པ་ལླཱ་སཾ ས་མུ་གྒྷཱ་ཏེ་ཏི, ཨེ་ཝཾ ཝེ་ད་ནཱ་སུ, ཙི་ཏྟེ, དྷ་མྨེ་སུ ཙ ཀཱ་ཏ་བྦཾ.
ཏ་ཏྠ ཨ་ནྡྷ་ཀཱ་ར་ཏི་མི་སཱ ཨ་པྤ་ཊི་ཝེ་དྷ་ལ་ཀྑ་ཎཱ ཨ་ཝི་ཛྫཱ, ཏ་སྶཱ ཝི་པ་ལླཱ་ས་པ་ད་ཊྛཱ་ནཾ. ཨ་ཛ྄ཛྷོ་སཱ་ན་ལ་ཀྑ་ཎཱ ཏ་ཎྷཱ, ཏ་སྶཱ པི་ཡ་རཱུ་པ་སཱ་ཏ་རཱུ་པཾ པ་ད་ཊྛཱ་ནཾ. ཨ་ཏྟཱ་ས་ཡ་ཝ་ཉྩ་ནཱ་ལ་ཀྑ་ཎོ ལོ་བྷོ, ཏ་སྶ ཨ་དི་ནྣཱ་དཱ་ནཾ པ་ད་ཊྛཱ་ནཾ. ཨི་དྷ ཝི་ཝཱ་ད་ལ་ཀྑ་ཎོ དོ་སོ, ཏ་སྶ པཱ་ཎཱ་ཏི་པཱ་ཏོ པ་ད་ཊྛཱ་ནཾ. ཝ་ཏྠུ་ཝི་པྤ་ཊི་པ་ཏྟི་ལ་ཀྑ་ཎོ མོ་ཧོ, ཏ་སྶ མི་ཙྪཱ་པ་ཊི་པ་ཏྟི པ་ད་ཊྛཱ་ནཾ. ས་ངྑ་ཏཱ་ནཾ དྷ་མྨཱ་ནཾ ཨ་ཝི་ནཱ་ས་གྒ་ཧ་ཎ་ལ་ཀྑ་ཎཱ ནི་ཙྩ་ས་ཉྙཱ, ཏ་སྶཱ ས་བྦ་ས་ངྑཱ་རཱ པ་ད་ཊྛཱ་ནཾ. སཱ་ས་ཝ་ཕ་སྶོ་པ་ག་མ་ན་ལ་ཀྑ་ཎཱ སུ་ཁ་ས་ཉྙཱ, ཏ་སྶཱ མ་མ་ངྐཱ་རོ པ་ད་ཊྛཱ་ནཾ. དྷ་མྨེ་སུ ཨུ་པ་ག་མ་ན་ལ་ཀྑ་ཎཱ ཨ་ཏྟ་ས་ཉྙཱ, ཏ་སྶཱ ཨ་ཧ་ངྐཱ་རོ པ་ད་ཊྛཱ་ནཾ. ཝ་ཎྞ་ས་ངྒ་ཧ་ཎ་ལ་ཀྑ་ཎཱ སུ་བྷ་ས་ཉྙཱ, ཏ་སྶཱ ཨི་ནྡྲི་ཡ་ཨ་སཾ་ཝ་རོ པ་ད་ཊྛཱ་ནཾ. ཨེ་ཏེ་ཧི ན་ཝ་ཧི པ་དེ་ཧི ཨུ་དྡི་ཊྛེ་ཧི ས་བྦོ ཨ་ཀུ་ས་ལ་པ་ཀྑོ ནི་དྡི་ཊྛོ བྷ་ཝ་ཏི, སོ ཙ ཁོ བ་ཧུ་སྶུ་ཏེ་ན ས་ཀྐཱ ཛཱ་ནི་ཏུཾ ནོ ཨ་པྤ་སྶུ་ཏེ་ན, པ་ཉྙ་ཝ་ཏཱ ནོ དུ་པྤ་ཉྙེ་ན, ཡུ་ཏྟེ་ན ནོ ཨ་ཡུ་ཏྟེ་ན.
ན་ཝ པ་དཱ་ནི ཀུ་ས་ལཱ་ནི ཡ་ཏྠ ས་བྦོ ཀུ་ས་ལ་པ་ཀྑོ ས་ངྒ་ཧོ ས་མོ་ས་ར་ཎཾ ག་ཙྪ་ནྟི. ཀ་ཏ་མཱ་ནི ན་ཝ པ་དཱ་ནི? ས་མ་ཐོ ཝི་པ་སྶ་ནཱ ཨ་ལོ་བྷོ ཨ་དོ་སོ ཨ་མོ་ཧོ ཨ་ནི་ཙྩ་ས་ཉྙཱ དུ་ཀྑ་ས་ཉྙཱ ཨ་ན་ཏྟ་ས་ཉྙཱ ཨ་སུ་བྷ་ས་ཉྙཱ ཙ.
ཏ་ཏྠ ཀ་ཏ་མོ ས་མ་ཐོ? ཡཱ ཙི་ཏྟ་སྶ ཋི་ཏི ས་ཎྛི་ཏི ཨ་ཝ་ཊྛི་ཏི ཋཱ་ནཾ པ་ཊྛཱ་ནཾ ཨུ་པ་ཊྛཱ་ནཾ ས་མཱ་དྷི ས་མཱ་དྷཱ་ནཾ ཨ་ཝི་ཀྑེ་པོ ཨ་ཝི་པྤ་ཊི་སཱ་རོ ཝཱུ་པ་ས་མོ མཱ་ན་སོ ཨེ་ཀ་གྒཾ ཙི་ཏྟ་སྶ, ཨ་ཡཾ ས་མ་ཐོ.
ཏ་ཏྠ ཀ་ཏ་མཱ ཝི་པ་སྶ་ནཱ? ཁ་ནྡྷེ་སུ ཝཱ དྷཱ་ཏཱུ་སུ ཝཱ ཨཱ་ཡ་ཏ་ནེ་སུ ཝཱ ནཱ་མ་རཱུ་པེ་སུ ཝཱ པ་ཊི་ཙྩ་ས་མུ་པྤཱ་དེ་སུ ཝཱ པ་ཊི་ཙྩ་ས་མུ་པྤ་ནྣེ་སུ ཝཱ དྷ་མྨེ་སུ དུ་ཀྑེ་སུ ཝཱ ས་མུ་ད་ཡེ་སུ ཝཱ ནི་རོ་དྷེ ཝཱ མ་གྒེ ཝཱ ཀུ་ས་ལཱ་ཀུ་ས་ལེ་སུ ཝཱ དྷ་མྨེ་སུ སཱ་ཝ་ཛྫ་ཨ་ན་ཝ་ཛྫེ་སུ ཝཱ ཀ་ཎྷ་སུ་ཀྐེ་སུ ཝཱ སེ་ཝི་ཏ་བྦ་ཨ་སེ་ཝི་ཏ་བྦེ་སུ ཝཱ སོ ཡ་ཐཱ་བྷཱུ་ཏཾ ཝི་ཙ་ཡོ པ་ཝི་ཙ་ཡོ ཝཱི་མཾ་སཱ པ་ར་ཝཱི་མཾ་སཱ གཱ་ཧ་ནཱ ཨ་གྒཱ་ཧ་ནཱ པ་རི་གྒཱ་ཧ་ནཱ ཙི་ཏྟེ་ན པ་རི་ཙི་ཏ་ནཱ ཏུ་ལ་ནཱ ཨུ་པ་པ་རི་ཀྑཱ ཉཱ་ཎཾ ཝི་ཛྫཱ ཝཱ ཙ་ཀྑུ བུ་དྡྷི མེ་དྷཱ པ་ཉྙཱ ཨོ་བྷཱ་སོ ཨཱ་ལོ་ཀོ ཨཱ་བྷཱ པ་བྷཱ ཁ་གྒོ ནཱ་རཱ་ཙོ [ནཱ་ར་ཛྫོ (པཱི. ཀ.)] དྷ་མྨ་ཝི་ཙ་ཡ་ས་མྦོ་ཛ྄ཛྷ་ངྒོ ས་མྨཱ་དི་ཊྛི མ་གྒ་ངྒཾ, ཨ་ཡཾ ཝི་པ་སྶ་ནཱ. ཏེ་ནེ་སཱ ཝི་པ་སྶ་ནཱ ཨི་ཏི ཝུ་ཙྩ་ཏི ཝི་ཝི་དྷཱ ཝཱ ཨེ་སཱ ཝི་པ་སྶ་ནཱ་ཏི, ཏ་སྨཱ ཨེ་སཱ ཝི་པ་སྶ་ནཱ་ཏི ཝུ་ཙྩ་ཏི. དྭི་དྷཱ ཙེ་སཱ ཧི ཝི་པ་སྶ་ནཱ དྷ་མྨ་ཝི་པ་སྶ་ནཱ་ཏི ཝུ་ཙྩ་ཏི, དྭི་དྷཱ ཨི་མཱ་ཡ པ་སྶ་ཏི སུ་བྷ་ཉྩ ཨ་སུ་བྷ་ཉྩ ཀ་ཎྷ་ཉྩ སུ་ཀྐ་ཉྩ སེ་ཝི་ཏ་བྦ་ཉྩ ཨ་སེ་ཝི་ཏ་བྦ་ཉྩ ཀ་མྨ་ཉྩ ཝི་པཱ་ཀ་ཉྩ བ་ནྡྷ་ཉྩ ཝི་མོ་ཀྑ་ཉྩ ཨཱ་ཙ་ཡ་ཉྩ ཨ་པ་ཙ་ཡ་ཉྩ པ་ཝ་ཏྟི་ཉྩ ནི་ཝ་ཏྟི་ཉྩ སཾ་ཀི་ལེ་ས་ཉྩ ཝོ་དཱ་ན་ཉྩ, ཨེ་ཝཾ ཝི་པ་སྶ་ནཱ་ཏི ཝུ་ཙྩ་ཏི. ཨ་ཐ ཝཱ ཝི་ཨི་ཏི ཨུ་པ་ས་གྒོ པ་སྶ་ནཱ་ཏི ཨ་ཏྠོ ཏ་སྨཱ ཝི་པ་སྶ་ནཱ་ཏི ཝུ་ཙྩ་ཏེ, ཨ་ཡཾ ཝི་པ་སྶ་ནཱ.
༦༥. ཏ་ཏྠ དྭེ རོ་གཱ ས་ཏྟཱ་ནཾ ཨ་ཝི་ཛྫཱ ཙ བྷ་ཝ་ཏ་ཎྷཱ ཙ, ཨེ་ཏེ་སཾ དྭི་ནྣཾ རོ་གཱ་ནཾ ནི་གྷཱ་ཏཱ་ཡ བྷ་ག་ཝ་ཏཱ དྭེ བྷེ་ས་ཛྫཱ་ནི ཝུ་ཏྟཱ་ནི ས་མ་ཐོ ཙ ཝི་པ་སྶ་ནཱ ཙ. ཨི་མཱ་ནི དྭེ བྷེ་ས་ཛྫཱ་ནི པ་ཊི་སེ་ཝེ་ནྟོ དྭེ ཨ་རོ་གེ ས་ཙྪི་ཀ་རོ་ཏི རཱ་ག་ཝི་རཱ་གཾ ཙེ་ཏོ་ཝི་མུ་ཏྟིཾ ཨ་ཝི་ཛྫཱ་ཝི་རཱ་ག་ཉྩ པ་ཉྙཱ་ཝི་མུ་ཏྟིཾ. ཏ་ཏྠ ཏ་ཎྷཱ་རོ་ག་སྶ ས་མ་ཐོ བྷེ་ས་ཛྫཾ, རཱ་ག་ཝི་རཱ་གཱ ཙེ་ཏོ་ཝི་མུ་ཏྟི ཨ་རོ་གཾ. ཨ་ཝི་ཛྫཱ་རོ་ག་སྶ ཝི་པ་སྶ་ནཱ་བྷེ་ས་ཛྫཾ ཨ་ཝི་ཛྫཱ་ཝི་རཱ་གཱ པ་ཉྙཱ་ཝི་མུ་ཏྟི ཨ་རོ་གཾ. ཨེ་ཝ་ཉྷི བྷ་ག་ཝཱ ཙཱ་ཧ, ‘‘དྭེ དྷ་མྨཱ པ་རི་ཉྙེ་ཡྻཱ [པ་སྶ དཱི. ནི. ༣.༣༥༢] ནཱ་མ་ཉྩ རཱུ་པ་ཉྩ, དྭེ དྷ་མྨཱ པ་ཧཱ་ཏ་བྦཱ ཨ་ཝི་ཛྫཱ ཙ བྷ་ཝ་ཏ་ཎྷཱ ཙ, དྭེ དྷ་མྨཱ བྷཱ་ཝེ་ཏ་བྦཱ ས་མ་ཐོ ཙ ཝི་པ་སྶ་ནཱ ཙ, དྭེ དྷ་མྨཱ ས་ཙྪི་ཀཱ་ཏ་བྦཱ ཝི་ཛྫཱ ཙ ཝི་མུ་ཏྟི ཙཱ’’ཏི. ཏ་ཏྠ ས་མ་ཐཾ བྷཱ་ཝེ་ནྟོ རཱུ་པཾ པ་རི་ཛཱ་ནཱ་ཏི, རཱུ་པཾ པ་རི་ཛཱ་ན་ནྟོ ཏ་ཎྷཾ པ་ཛ་ཧ་ཏི, ཏ་ཎྷཾ པ་ཛ་ཧ་ནྟོ རཱ་ག་ཝི་རཱ་གཱ ཙེ་ཏོ་ཝི་མུ་ཏྟིཾ ས་ཙྪི་ཀ་རོ་ཏི, ཝི་པ་སྶ་ནཾ བྷཱ་ཝེ་ནྟོ ནཱ་མཾ པ་རི་ཛཱ་ནཱ་ཏི, ནཱ་མཾ པ་རི་ཛཱ་ན་ནྟོ ཨ་ཝི་ཛྫཾ པ་ཛ་ཧ་ཏི, ཨ་ཝི་ཛྫཾ པ་ཛ་ཧ་ནྟོ ཨ་ཝི་ཛྫཱ་ཝི་རཱ་གཱ པ་ཉྙཱ་ཝི་མུ་ཏྟིཾ ས་ཙྪི་ཀ་རོ་ཏི. ཡ་དཱ བྷི་ཀྑུ་ནོ དྭེ དྷ་མྨཱ པ་རི་ཉྙཱ་ཏཱ བྷ་ཝ་ནྟི ནཱ་མ་ཉྩ རཱུ་པ་ཉྩ, ཏ་ཐཱ་སྶ དྭེ དྷ་མྨཱ པ་ཧཱི་ནཱ བྷ་ཝ་ནྟི ཨ་ཝི་ཛྫཱ ཙ བྷ་ཝ་ཏ་ཎྷཱ ཙ. དྭེ དྷ་མྨཱ བྷཱ་ཝི་ཏཱ བྷ་ཝ་ནྟི ས་མ་ཐོ ཙ ཝི་པ་སྶ་ནཱ ཙ, དྭེ དྷ་མྨཱ ས་ཙྪི་ཀཱ་ཏ་བྦཱ བྷ་ཝ་ནྟི ཝི་ཛྫཱ ཙ ཝི་མུ་ཏྟི ཙ. ཨེ་ཏྟཱ་ཝ་ཏཱ བྷི་ཀྑུ ཀ་ཏ་ཀི་ཙྩོ བྷ་ཝ་ཏི. ཨེ་སཱ སོ་པཱ་དི་སེ་སཱ ནི་བྦཱ་ན་དྷཱ་ཏུ. ཏ་སྶ ཨཱ་ཡུ་པ་རི་ཡཱ་དཱ་ནཱ ཛཱི་ཝི་ཏི་ནྡྲི་ཡ་སྶ ཨུ་པ་རོ་དྷཱ ཨི་ད་ཉྩ དུ་ཀྑཾ ནི་རུ་ཛ྄ཛྷ་ཏི, ཨ་ཉྙ་ཉྩ དུ་ཀྑཾ ན ཨུ་པྤ་ཛྫ་ཏི. ཏ་ཏྠ ཡོ ཨི་མེ་སཾ ཁ་ནྡྷཱ་ནཾ དྷཱ་ཏུ་ཨཱ་ཡ་ཏ་ནཱ་ནཾ ནི་རོ་དྷོ ཝཱུ་པ་ས་མོ ཨ་ཉྙེ་ས་ཉྩ ཁ་ནྡྷ་དྷཱ་ཏུ་ཨཱ་ཡ་ཏ་ནཱ་ནཾ ཨ་པྤ་ཊི་ས་ནྡྷི ཨ་པཱ་ཏུ་བྷཱ་ཝོ, ཨ་ཡཾ ཨ་ནུ་པཱ་དི་སེ་སཱ ནི་བྦཱ་ན་དྷཱ་ཏུ.
ཏ་ཏྠ ཀ་ཏ་མཾ ཨ་ལོ་བྷོ ཀུ་ས་ལ་མཱུ་ལཾ? ཡཾ་དྷཱ་ཏུ་ཀོ ཨ་ལོ་བྷོ ཨ་ལུ་བྦྷ་ནཱ ཨ་ལུ་བྦྷི་ཏ་ཏྟཾ ཨ་ནི་ཙྪཱ ཨ་པ་ཏྠ་ནཱ ཨ་ཀ་ནྟཱ ཨ་ན་ཛ྄ཛྷོ་སཱ་ནཾ. ཨ་ཡཾ ཨ་ལོ་བྷོ ཀུ་ས་ལ་མཱུ་ལཾ. ཀ་སྶེ་ཏཾ མཱུ་ལཾ? ཨ་ལོ་བྷ་ཛ་སྶ ཀུ་ས་ལ་སྶ ཀཱ་ཡ་ཀ་མྨ་སྶ ཝ་ཙཱི་ཀ་མྨ་སྶ མ་ནོ་ཀ་མྨ་སྶ ཏཾ་ས་མྤ་ཡུ་ཏྟཱ་ན་ཉྩ ཙི་ཏྟ་ཙེ་ཏ་སི་ཀཱ་ནཾ དྷ་མྨཱ་ནཾ མཱུ་ལཾ. ཨ་ཐ ཝཱ ཨ་རི་ཡོ ཨ་ཊྛ་ངྒི་ཀོ མ་གྒོ ཀུ་ས་ལ་ནྟི ཝུ་ཙྩ་ཏི, སོ ཏི་ཎྞཾ མ་གྒ་ངྒཱ་ནཾ མཱུ་ལཾ. ཀ་ཏ་མེ་སཾ ཏི་ཎྞཾ, ས་མྨཱ་ས་ངྐ་པྤ་སྶ ས་མྨཱ་ཝཱ་ཡཱ་མ་སྶ ས་མྨཱ་ས་མཱ་དྷི་སྶ ཙ ཨི་མེ་སཾ མཱུ་ལ་ནྟི, ཏ་སྨཱ ཀུ་ས་ལ་མཱུ་ལ་ནྟི ཝུ་ཙྩ་ཏི.
ཏ་ཏྠ ཀ་ཏ་མཾ ཨ་དོ་སོ ཀུ་ས་ལ་མཱུ་ལཾ? ཡཱ ས་ཏྟེ་སུ ཝཱ ས་ངྑཱ་རེ་སུ ཝཱ ཨ་ན་གྷཱ་ཏོ ཨ་པྤ་ཊི་གྷཱ་ཏོ ཨ་བྱཱ་པ་ཏྟི ཨ་བྱཱ་པཱ་དོ ཨ་དོ་སོ མེ་ཏྟཱ མེ་ཏྟཱ་ཡ་ནཱ ཨ་ཏྠ་ཀཱ་མ་ཏཱ ཧི་ཏ་ཀཱ་མ་ཏཱ ཙེ་ཏ་སོ པ་སཱ་དོ, ཨ་ཡཾ ཨ་དོ་སོ ཀུ་ས་ལ་མཱུ་ལཾ. ཀ་སྶེ་ཏཾ མཱུ་ལཾ? ཨ་དོ་ས་ཛ་སྶ ཀུ་ས་ལ་སྶ ཀཱ་ཡ་ཀ་མྨ་སྶ ཝ་ཙཱི་ཀ་མྨ་སྶ མ་ནོ་ཀ་མྨ་སྶ ཏཾ་ས་མྤ་ཡུ་ཏྟཱ་ན་ཉྩ ཙི་ཏྟ་ཙེ་ཏ་སི་ཀཱ་ནཾ དྷ་མྨཱ་ནཾ མཱུ་ལཾ. ཨ་ཐ ཝཱ ཏི་ཎྞཾ མ་གྒ་ངྒཱ་ནཾ མཱུ་ལཾ. ཀ་ཏ་མེ་སཾ ཏི་ཎྞཾ? ས་མྨཱ་ཝཱ་ཙཱ་ཡ ས་མྨཱ་ཀ་མྨ་ནྟ་སྶ ས་མྨཱ་ཨཱ་ཛཱི་ཝ་སྶ ཙ ཨི་མེ་སཾ ཏི་ཎྞཾ མ་གྒ་ངྒཱ་ནཾ མཱུ་ལཾ, ཏ་སྨཱ ཀུ་ས་ལ་མཱུ་ལ་ནྟི ཝུ་ཙྩ་ཏི.
ཏ་ཏྠ ཀ་ཏ་མཾ ཨ་མོ་ཧོ ཀུ་ས་ལ་མཱུ་ལཾ? ཡཾ ཙ་ཏཱུ་སུ ཨ་རི་ཡ་ས་ཙྩེ་སུ ཡ་ཐཱ་བྷཱུ་ཏཾ ཉཱ་ཎ་ད་སྶ་ནཾ ཨ་བྷི་ས་མ་ཡོ ས་མྨཱ ཙ པ་ཙྩཱ་ག་མོ པ་ཊི་ཝེ་དྷོ ཨ་མོ་ཧོ ཨ་ས་མྨུ་ཡ྄ཧ་ནཱ ཨ་ས་མྨོ་ཧོ ཝི་ཛྫཱ་པ་ཀཱ་སོ ཨཱ་ལོ་ཀོ ཨ་ནཱ་ཝ་ར་ཎཾ སེ་ཀྑཱ་ནཾ ཀུ་ས་ལཱ་ནཾ དྷ་མྨཱ་ནཾ, ཨ་ཡཾ ཨ་མོ་ཧོ ཀུ་ས་ལ་མཱུ་ལཾ. ཀ་སྶེ་ཏཾ མཱུ་ལཾ? ཨ་མོ་ཧ་ཛ་སྶ ཀུ་ས་ལ་སྶ ཀཱ་ཡ་ཀ་མྨ་སྶ ཝ་ཙཱི་ཀ་མྨ་སྶ མ་ནོ་ཀ་མྨ་སྶ ཏཾ་ས་མྤ་ཡུ་ཏྟཱ་ན་ཉྩ ཙི་ཏྟ་ཙེ་ཏ་སི་ཀཱ་ནཾ དྷ་མྨཱ་ནཾ མཱུ་ལཾ. ཨ་ཐ ཝཱ དྭི་ནྣཾ མ་གྒ་ངྒཱ་ནཾ ཨེ་ཏཾ མཱུ་ལཾ. ཀ་ཏ་མེ་སཾ དྭི་ནྣཾ? ས་མྨཱ་དི་ཊྛི་ཡཱ ཙ ས་མྨཱ་ས་ཏི་ཡཱ ཙ ཨི་མེ་སཾ དྭི་ནྣཾ མ་གྒ་ངྒཱ་ནཾ མཱུ་ལཾ, ཏ་སྨཱ ཀུ་ས་ལ་མཱུ་ལ་ནྟི ཝུ་ཙྩ་ཏི. ཨེ་ཝཾ ཨི་མེ་སཾ ཏཱི་ཧི ཀུ་ས་ལ་མཱུ་ལེ་ཧི ཨ་ཊྛ་ངྒི་ཀོ མ་གྒོ ཡོ་ཛེ་ཏ་བྦོ.
༦༦. ཏ་ཏྠ ཀ་ཏ་མཱ ཨ་ནི་ཙྩ་ས་ཉྙཱ? ‘‘ས་བྦེ ས་ངྑཱ་རཱ ཨུ་པྤཱ་ད་ཝ་ཡ་དྷ་མྨི་ནོ’’ཏི ཙ ཡཱ ས་ཉྙཱ ས་ཉྫཱ་ན་ནཱ ཝ་ཝ་ཏྠ་པ་ནཱ ཨུ་གྒཱ་ཧོ, ཨ་ཡཾ ཨ་ནི་ཙྩ་ས་ཉྙཱ. ཏ་སྶཱ ཀོ ནི་སྶ་ནྡོ? ཨ་ནི་ཙྩ་ས་ཉྙཱ་ཡ བྷཱ་ཝི་ཏཱ་ཡ བ་ཧུ་ལཱི་ཀ་ཏཱ་ཡ ཨ་ཊྛ་སུ ལོ་ཀ་དྷ་མྨེ་སུ ཙི་ཏྟཾ ནཱ་ནུ་ས་ནྡྷ་ཏི ན ས་ནྡྷ་ཏི ན ས་ཎྛ་ཧ་ཏི, ཨུ་པེ་ཀྑཱ ཝཱ པ་ཊི་ཀྐཱུ་ལ་ཏཱ ཝཱ ས་ཎྛ་ཧ་ཏི, ཨ་ཡ་མ་སྶཱ ནི་སྶ་ནྡོ.
ཏ་ཏྠ ཀ་ཏ་མཱ དུ་ཀྑ་ས་ཉྙཱ? ‘‘ས་བྦེ ས་ངྑཱ་རཱ དུ་ཀྑཱ’’ཏི ཡཱ ས་ཉྙཱ ས་ཉྫཱ་ན་ནཱ ཝ་ཝ་ཏྠ་པ་ནཱ ཨུ་གྒཱ་ཧོ, ཨ་ཡཾ དུ་ཀྑ་ས་ཉྙཱ. ཏ་སྶཱ ཀོ ནི་སྶ་ནྡོ? དུ་ཀྑ་ས་ཉྙཱ་ཡ བྷཱ་ཝི་ཏཱ་ཡ བ་ཧུ་ལཱི་ཀ་ཏཱ་ཡ ཨཱ་ལ་སྶེ སཾ་པ་མཱ་དེ ཝི་མྷ་ཡེ ཙ ཙི་ཏྟཾ ནཱ་ནུ་ས་ནྡྷ་ཏི ན ས་ནྡྷ་ཏི ན ས་ཎྛ་ཧ་ཏི, ཨུ་པེ་ཀྑཱ ཝཱ པ་ཊི་ཀྐཱུ་ལ་ཏཱ ཝཱ ས་ཎྛ་ཧ་ཏི, ཨ་ཡ་མ་སྶཱ ནི་སྶ་ནྡོ.
ཏ་ཏྠ ཀ་ཏ་མཱ ཨ་ན་ཏྟ་ས་ཉྙཱ? ‘‘ས་བྦེ་སུ དྷ་མྨེ་སུ ཨ་ན་ཏྟཱ’’ཏི ཡཱ ས་ཉྙཱ ས་ཉྫཱ་ན་ནཱ ཝ་ཝ་ཏྠ་པ་ནཱ ཨུ་གྒཱ་ཧོ, ཨ་ཡཾ ཨ་ན་ཏྟ་ས་ཉྙཱ. ཏ་སྶཱ ཀོ ནི་སྶ་ནྡོ, ཨ་ན་ཏྟ་ས་ཉྙཱ་ཡ བྷཱ་ཝི་ཏཱ་ཡ བ་ཧུ་ལཱི་ཀ་ཏཱ་ཡ ཨ་ཧ་ངྐཱ་རོ ཙི་ཏྟཾ ནཱ་ནུ་ས་ནྡྷ་ཏི ན ས་ནྡྷ་ཏི, མ་མ་ངྐཱ་རོ ན ས་ཎྛ་ཧ་ཏི, ཨུ་པེ་ཀྑཱ ཝཱ པ་ཊི་ཀྐཱུ་ལ་ཏཱ ཝཱ ས་ཎྛ་ཧ་ཏི, ཨ་ཡ་མ་སྶཱ ནི་སྶ་ནྡོ.
ཏ་ཏྠ ཀ་ཏ་མཱ ཨ་སུ་བྷ་ས་ཉྙཱ? ‘‘ས་ཏྟ ས་ངྑཱ་རཱ ཨ་སུ་བྷཱ’’ཏི ཡཱ ས་ཉྙཱ ས་ཉྫཱ་ན་ནཱ ཝ་ཝ་ཏྠ་པ་ནཱ ཨུ་གྒཱ་ཧོ, ཨ་ཡཾ ཨ་སུ་བྷ་ས་ཉྙཱ. ཏ་སྶཱ ཀོ ནི་སྶ་ནྡོ? ཨ་སུ་བྷ་ས་ཉྙཱ་ཡ བྷཱ་ཝི་ཏཱ་ཡ བ་ཧུ་ལཱི་ཀ་ཏཱ་ཡ སུ་བྷ་ནི་མི་ཏྟེ ཙི་ཏྟཾ ནཱ་ནུ་ས་ནྡྷ་ཏི ན ས་ནྡྷ་ཏི ན ས་ཎྛ་ཧ་ཏི, ཨུ་པེ་ཀྑཱ ཝཱ པ་ཊི་ཀྐཱུ་ལ་ཏཱ ཝཱ ས་ཎྛ་ཧ་ཏི, ཨ་ཡ་མ་སྶཱ ནི་སྶ་ནྡོ.
ཏ་ཏྠ པ་ཉྩ་ནྣཾ ཁ་ནྡྷཱ་ནཾ པ་རི་ཉྙཱ བྷ་ག་ཝ་ཏཱ དེ་སི་ཏཱ, ཡོ ཏ་ཏྠ ཨ་སུ་བྷ་ས་ཉྙཱ རཱུ་པ་ཀྑ་ནྡྷ་སྶ པ་རི་ཉྙ་ཏྟཾ, དུ་ཀྑ་ས་ཉྙཱ ཝེ་ད་ནཱ་ཀྑ་ནྡྷ་སྶ པ་རི་ཉྙ་ཏྟཾ, ཨ་ན་ཏྟ་ས་ཉྙཱ ས་ཉྙཱ་ཀྑ་ནྡྷ་སྶ ས་ངྑཱ་ར་ཀྑ་ནྡྷ་སྶ པ་རི་ཉྙ་ཏྟཾ, ཨ་ནི་ཙྩ་ས་ཉྙཱ ཝི་ཉྙཱ་ཎ་ཀྑ་ནྡྷ་སྶ པ་རི་ཉྙ་ཏྟཾ. ཏ་ཏྠ ས་མ་ཐེ་ན ཏ་ཎྷཾ ས་མུ་གྒྷཱ་ཏེ་ཏི, ཝི་པ་སྶ་ནཱ ཨ་ཝི་ཛྫཾ ས་མུ་གྒྷཱ་ཏེ་ཏི, ཨ་དོ་སེ་ན དོ་སཾ ས་མུ་གྒྷཱ་ཏེ་ཏི, ཨ་མོ་ཧེ་ན མོ་ཧཾ ས་མུ་གྒྷཱ་ཏེ་ཏི, ཨ་ནི་ཙྩ་ས་ཉྙཱ་ཡ ནི་ཙྩ་ས་ཉྙཾ ས་མུ་གྒྷཱ་ཏེ་ཏི, དུ་ཀྑ་ས་ཉྙཱ་ཡ སུ་ཁ་ས་ཉྙཾ ས་མུ་གྒྷཱ་ཏེ་ཏི, ཨ་ན་ཏྟ་ས་ཉྙཱ་ཡ ཨ་ཏྟ་ས་ཉྙཾ ས་མུ་གྒྷཱ་ཏེ་ཏི, ཨ་སུ་བྷ་ས་ཉྙཱ་ཡ སུ་བྷ་ས་ཉྙཾ ས་མུ་གྒྷཱ་ཏེ་ཏི.
ཙི་ཏྟ་ཝི་ཀྑེ་པ་པ་ཊི་སཾ་ཧ་ར་ཎ་ལ་ཀྑ་ཎོ ས་མ་ཐོ, ཏ་སྶ ཛྷཱ་ནཱ་ནི པ་ད་ཊྛཱ་ནཾ. ས་བྦ་དྷ་མྨཾ ཡ་ཐཱ་བྷཱུ་ཏཾ པ་ཊི་ཝེ་དྷ་ལ་ཀྑ་ཎཱ ཝི་པ་སྶ་ནཱ, ཏ་སྶཱ ས་བྦ་ནེ་ཡྻཾ པ་ད་ཊྛཱ་ནཾ. ཨི་ཙྪཱ་པ་ཊི་སཾ་ཧ་ར་ཎ་ལ་ཀྑ་ཎོ ཨ་ལོ་བྷོ, ཏ་སྶ ཨ་དི་ནྣཱ་དཱ་ནཱ ཝེ་ར་མ་ཎཱི པ་ད་ཊྛཱ་ནཾ. ཨ་བྱཱ་པཱ་ད་ལ་ཀྑ་ཎོ ཨ་དོ་སོ, ཏ་སྶ པཱ་ཎཱ་ཏི་པཱ་ཏཱ ཝེ་ར་མ་ཎཱི པ་ད་ཊྛཱ་ནཾ. ཝ་ཏྠུ་ཨ་པྤ་ཊི་ཧ་ཏ་ལ་ཀྑ་ཎོ ཨ་མོ་ཧོ, ཏ་སྶ ས་མྨཱ་པ་ཊི་པ་ཏྟི པ་ད་ཊྛཱ་ནཾ. ས་ངྑ་ཏཱ་ནཾ དྷ་མྨཱ་ནཾ ཝི་ནཱ་ས་གྒ་ཧ་ཎ་ལ་ཀྑ་ཎཱ ཨ་ནི་ཙྩ་ས་ཉྙཱ, ཏ་སྶཱ ཨུ་ད་ཡ་བྦ་ཡོ པ་ད་ཊྛཱ་ནཾ. སཱ་ས་ཝ་ཕ་སྶ་ས་ཉྫཱ་ན་ན་ལ་ཀྑ་ཎཱ དུ་ཀྑ་ས་ཉྙཱ, ཏ་སྶཱ ཝེ་ད་ནཱ པ་ད་ཊྛཱ་ནཾ. ས་བྦ་དྷ་མྨ་ཨ་ནུ་པ་ག་མ་ན་ལ་ཀྑ་ཎཱ ཨ་ན་ཏྟ་ས་ཉྙཱ, ཏ་སྶཱ དྷ་མྨ་ས་ཉྙཱ པ་ད་ཊྛཱ་ནཾ. ཝི་ནཱི་ལ་ཀ་ཝི་པུ་བྦ་ཀ་ཨུ་དྡྷུ་མཱ་ཏ་ཀ་ས་མུ་གྒ་ཧ་ཎ་ལ་ཀྑ་ཎཱ ཨ་སུ་བྷ་ས་ཉྙཱ, ཏ་སྶཱ ནི་བྦི་དཱ པ་ད་ཊྛཱ་ནཾ. ཨི་མེ་སུ ན་ཝ་སུ པ་དེ་སུ ཨུ་པ་དི་ཊྛེ་སུ ས་བྦོ ཀུ་ས་ལ་པ་ཀྑོ ཨུ་པ་དི་ཊྛོ བྷ་ཝ་ཏི, སོ ཙ བ་ཧུ་སྶུ་ཏེ་ན ས་ཀྐཱ ཛཱ་ནི་ཏུཾ ནོ ཨ་པྤ་སྶུ་ཏེ་ན, པ་ཉྙ་ཝ་ཏཱ ནོ དུ་པྤ་ཉྙེ་ན, ཡུ་ཏྟེ་ན ནོ ཨ་ཡུ་ཏྟེ་ནཱ་ཏི.
༦༧. ཏ་ཏྠ ནི་ཙྩ་ས་ཉྙཱ་དྷི་མུ་ཏྟ་སྶ ཨ་པ་རཱ་པ་རཾ ཙི་ཏྟཾ པ་ཎཱ་མེ་ནྟོ ས་ཏི་མ་པ་ཙྩ་ཝེ་ཀྑ་ཏོ ཨ་ནི་ཙྩ་ས་ཉྙཱ ན ཨུ་པ་ཊྛཱ་ཏི, པ་ཉྩ་སུ ཀཱ་མ་གུ་ཎེ་སུ སུ་ཁ་སྶཱ་དཱ་དྷི་མུ་ཏྟ་སྶ ཨི་རི་ཡཱ་པ་ཐ་སྶ ཨ་ག་ཏི་མ་པ་ཙྩ་ཝེ་ཀྑ་ཏོ དུ་ཀྑ་ས་ཉྙཱ ན ཨུ་པ་ཊྛཱ་ཏི, ཁ་ནྡྷ་དྷཱ་ཏུ་ཨཱ་ཡ་ཏ་ནེ་སུ ཨ་ཏྟཱ་དྷི་མུ་ཏྟ་སྶ ནཱ་ནཱ་དྷཱ་ཏུ་ཨ་ནེ་ཀ་དྷཱ་ཏུ་ཝི་ནི་བྦྷོ་ག་མ་པ་ཙྩ་ཝེ་ཀྑ་ཏོ ཨ་ན་ཏྟ་ས་ཉྙཱ ན ཨུ་པ་ཊྛཱ་ཏི, ཝ་ཎྞ་ས་ཎྛཱ་ནཱ་བྷི་ར་ཏ་སྶ ཀཱ་ཡེ སུ་བྷཱ་དྷི་མུ་ཏྟ་སྶ ཙ ཝི་པྤ་ཊི་ཙྪ་ནྣཱ ཨ་སུ་བྷ་ས་ཉྙཱ ན ཨུ་པ་ཊྛཱ་ཏི.
ཨ་ཝི་པྤ་ཊི་སཱ་ར་ལ་ཀྑ་ཎཱ ས་དྡྷཱ, ས་དྡ་ཧ་ནཱ པ་ཙྩུ་པ་ཊྛཱ་ནཾ. ཏ་སྶ ཙ་ཏྟཱ་རི སོ་ཏཱ་པ་ཏྟི་ཡ་ངྒཱ་ནི པ་ད་ཊྛཱ་ནཾ. ཨེ་ཝ་ཉྷི ཝུ་ཏྟཾ བྷ་ག་ཝ་ཏཱ [པ་སྶ སཾ་ཡུ་ཏྟ་ནི་ཀཱ་ཡེ] ས་དྡྷི་ནྡྲི་ཡཾ བྷི་ཀྑ་ཝེ, ཀུ་ཧིཾ ད་ཊྛ་བྦཾ, ཙ་ཏཱུ་སུ སོ་ཏཱ་པ་ཏྟི་ཡ་ངྒེ་སུ ཀུ་ས་ལེ་སུ དྷ་མྨེ་སུ.
སཱུ་རཱ་ཨ་པ་ཊི་ཀྑེ་པ་ན་ལ་ཀྑ་ཎཾ ཝཱི་རི་ཡི་ནྡྲི་ཡཾ, ཝཱི་རི་ཡི་ནྡྲི་ཡཱ་ར་མྦྷོ པ་ཙྩུ་པ་ཊྛཱ་ནཾ. ཏ་སྶ ཨ་ཏཱི་ཏཱ ཙ་ཏྟཱ་རོ ས་མྨ་པྤ་དྷཱ་ནཱ པ་ད་ཊྛཱ་ནཾ. ཡ་ཐཱ ཝུ་ཏྟཾ བྷ་ག་ཝ་ཏཱ [པ་སྶ སཾ་ཡུ་ཏྟ་ནི་ཀཱ་ཡེ] ཝཱི་རི་ཡི་ནྡྲི་ཡཾ, བྷི་ཀྑ་ཝེ, ཀུ་ཧིཾ ད་ཊྛ་བྦཾ, ཙ་ཏཱུ་སུ ས་མྨ་པྤ་དྷཱ་ནེ་སུ.
ས་ཏི ས་ར་ཎ་ལ་ཀྑ་ཎཱ, ཨ་ས་མྨོ་ཧ་པ་ཙྩུ་པ་ཊྛཱ་ནཱ. ཏ་སྶ ཨ་ཏཱི་ཏཱ ཙ་ཏྟཱ་རོ ས་ཏི་པ་ཊྛཱ་ནཱ པ་ད་ཊྛཱ་ནཾ. ཡ་ཐཱ ཝུ་ཏྟཾ བྷ་ག་ཝ་ཏཱ ས་ཏི་ནྡྲི་ཡཾ བྷི་ཀྑ་ཝེ, ཀུ་ཧིཾ ད་ཊྛ་བྦཾ, ཙ་ཏཱུ་སུ ས་ཏི་པ་ཊྛཱ་ནེ་སུ.
ཨེ་ཀ་གྒ་ལ་ཀྑ་ཎོ ས་མཱ་དྷི, ཨ་ཝི་ཀྑེ་པ་པ་ཙྩུ་པ་ཊྛཱ་ནོ, ཏ་སྶ ཙ་ཏྟཱ་རི ཉཱ་ཎཱ་ནི པ་ད་ཊྛཱ་ནཾ. ཡ་ཐཱ ཝུ་ཏྟཾ བྷ་ག་ཝ་ཏཱ ས་མཱ་དྷི་ནྡྲི་ཡཾ, བྷི་ཀྑ་ཝེ, ཀུ་ཧིཾ ད་ཊྛ་བྦཾ, ཙ་ཏཱུ་སུ ཛྷཱ་ནེ་སུ.
པ་ཛཱ་ན་ན་ལ་ཀྑ་ཎཱ པ་ཉྙཱ, བྷཱུ་ཏ་ཏྠ་ས་ནྟཱི་ར་ཎཱ པ་ཙྩུ་པ་ཊྛཱ་ནཱ, ཏ་སྶ ཙ་ཏྟཱ་རི ཨ་རི་ཡ་ས་ཙྩཱ་ནི པ་ད་ཊྛཱ་ནཾ. ཡ་ཐཱ ཝུ་ཏྟཾ བྷ་ག་ཝ་ཏཱ [པ་སྶ སཾ་ཡུ་ཏྟ་ནི་ཀཱ་ཡེ] པ་ཉྙི་ནྡྲི་ཡཾ, བྷི་ཀྑ་ཝེ, ཀུ་ཧིཾ ད་ཊྛ་བྦཾ, ཙ་ཏཱུ་སུ ཨ་རི་ཡ་ས་ཙྩེ་སུ.
ཙ་ཏྟཱ་རི ཙ་ཀྐཱ་ནི [པ་སྶ ཨ. ནི. ༤.༣༡] པ་ཏི་རཱུ་པ་དེ་ས་ཝཱ་སོ ཙ་ཀྐཾ, ས་པྤུ་རི་སཱུ་པ་ནི་སྶ་ཡོ ཙ་ཀྐཾ, ཨ་ཏྟ་ས་མྨཱ་པ་ཎི་དྷཱ་ནཾ ཙ་ཀྐཾ, པུ་བྦེ ཀ་ཏ་པུ་ཉྙ་ཏཱ ཙ་ཀྐཾ. ཏ་ཏྠ ཨ་རི་ཡ་ས་ནྣི་སྶ་ཡ་ལ་ཀྑ་ཎོ པ་ཏི་རཱུ་པ་དེ་ས་ཝཱ་སོ, སོ ས་པྤུ་རི་སཱུ་པ་ནི་སྶ་ཡ་སྶ པ་ད་ཊྛཱ་ནཾ. ཨ་རི་ཡ་ས་ནྣི་སྶ་ཡ་ལ་ཀྑ་ཎོ ས་པྤུ་རི་སྶཱུ་པ་ནི་སྶ་ཡོ, སོ ཨ་ཏྟ་ས་མྨཱ་པ་ཎི་དྷཱ་ན་སྶ པ་ད་ཊྛཱ་ནཾ. ས་མྨཱ་པ་ཊི་པ་ཏྟི་ལ་ཀྑ་ཎཾ ཨ་ཏྟ་ས་མྨཱ་པ་ཎི་དྷཱ་ནཾ, ཏཾ པུ་ཉྙཱ་ནཾ པ་ད་ཊྛཱ་ནཾ. ཀུ་ས་ལ་དྷ་མྨོ་པ་ཙ་ཡ་ལ་ཀྑ་ཎཾ པུ་ཉྙཾ, ཏཾ ས་བྦ་ས་མྤ་ཏྟཱི་ནཾ པ་ད་ཊྛཱ་ནཾ.
ཨེ་ཀཱ་ད་ས་སཱི་ལ་མཱུ་ལ་ཀཱ དྷ་མྨཱ སཱི་ལ་ཝ་ཏོ ཨ་ཝི་པྤ་ཊི་སཱ་རོ བྷ་ཝ་ཏི…པེ… སོ ཝི་མུ་ཏྟི་ཉཱ་ཎ་ད་སྶ་ནཾ ‘‘ནཱ་པ་རཾ ཨི་ཏྠ་ཏྟཱ་ཡཱ’’ཏི པ་ཛཱ་ན་ནཱ. ཏ་ཏྠ ཝེ་ར་མ་ཎི་ལ་ཀྑ་ཎཾ སཱི་ལཾ, ཏཾ ཨ་ཝི་པྤ་ཊི་སཱ་ར་སྶ པ་ད་ཊྛཱ་ནཾ. ན ཨ་ཏྟཱ་ནུ་ཝཱ་ད་ལ་ཀྑ་ཎོ ཨ་ཝི་པྤ་ཊི་སཱ་རོ, སོ པཱ་མོ་ཛྫ་སྶ པ་ད་ཊྛཱ་ནཾ. ཨ་བྷི་པྤ་མོ་ད་ན་ལ་ཀྑ་ཎཾ པཱ་མོ་ཛྫཾ, ཏཾ པཱི་ཏི་ཡཱ པ་ད་ཊྛཱ་ནཾ. ཨ་ཏྟ་མ་ན་ལ་ཀྑ་ཎཱ པཱི་ཏི, སཱ པ་སྶ་དྡྷི་ཡཱ པ་ད་ཊྛཱ་ནཾ. ཀ་མྨ་ནི་ཡ་ལ་ཀྑ་ཎཱ པ་སྶ་དྡྷི, སཱ སུ་ཁ་སྶ པ་ད་ཊྛཱ་ནཾ. ཨ་བྱཱ་པཱ་ད་ལ་ཀྑ་ཎཾ སུ་ཁཾ, ཏཾ ས་མཱ་དྷི་ནོ པ་ད་ཊྛཱ་ནཾ. ཨ་ཝི་ཀྑེ་པ་ན་ལ་ཀྑ་ཎོ ས་མཱ་དྷི, སོ ཡ་ཐཱ་བྷཱུ་ཏ་ཉཱ་ཎ་ད་སྶ་ན་སྶ པ་ད་ཊྛཱ་ནཾ. ཨ་ཝི་པ་རཱི་ཏ་ས་ནྟཱི་ར་ཎ་ལ་ཀྑ་ཎཱ པ་ཉྙཱ, སཱ ནི་བྦི་དཱ་ཡ པ་ད་ཊྛཱ་ནཾ ཨ་ནཱ་ལ་ཡ་ན་ལ་ཀྑ་ཎཱ ནི་བྦི་དཱ, སཱ ཝི་རཱ་ག་སྶ པ་ད་ཊྛཱ་ནཾ. ཨ་སཾ་ཀི་ལེ་ས་ལ་ཀྑ་ཎོ ཝི་རཱ་གོ, སོ ཝི་མུ་ཏྟི་ཡཱ པ་ད་ཊྛཱ་ནཾ. ཨ་ཀུ་ས་ལ་དྷ་མྨ་ཝི་ཝེ་ཀ་ལ་ཀྑ་ཎཱ ཝི་མུ་ཏྟི, སཱ ཝི་མུ་ཏྟི་ནོ ཝོ་དཱ་ན་སྶ པ་ད་ཊྛཱ་ནཾ.
༦༨. ཙ་ཏ་སྶོ ཨ་རི་ཡ་བྷཱུ་མི་ཡོ ཙ་ཏྟཱ་རི སཱ་མ་ཉྙ་ཕ་ལཱ་ནི. ཏ་ཏྠ ཡོ ཡ་ཐཱ་བྷཱུ་ཏཾ པ་ཛཱ་ནཱ་ཏི, ཨེ་སཱ ད་སྶ་ན་བྷཱུ་མི. སོ་ཏཱ་པ་ཏྟི་ཕ་ལ་ཉྩ སོ ཡ་ཐཱ་བྷཱུ་ཏཾ པ་ཛཱ་ནི་ཏྭཱ ནི་བྦི་ནྡ་ཏི, ཨི་དཾ ཏ་ནུ་ཀཱ་མ་རཱ་ག་སྶ པ་ད་ཊྛཱ་ནཾ བྱཱ་པཱ་དཱ་ནཾ. ས་ཀ་དཱ་གཱ་མི་ཕ་ལ་ཉྩ ས་ཎྷཾ ཝི་ར་ཛྫ་ཏི, ཨ་ཡཾ རཱ་ག་ཝི་རཱ་གཱ ཙེ་ཏོ་ཝི་མུ་ཏྟི. ཨ་ནཱ་གཱ་མི་ཕ་ལ་ཉྩ ཡཾ ཨ་ཝི་ཛྫཱ་ཝི་རཱ་གཱ ཝི་མུ་ཙྩ་ཏི, ཨ་ཡཾ ཀ་ཏཱ་བྷཱུ་མི. ཨ་ར་ཧ་ཏྟ་ཉྩ སཱ་མ་ཉྙ་ཕ་ལཱ་ནཱི་ཏི ཀོ ཝ་ཙ་ན་ཏྠོ, ཨ་རི་ཡོ ཨ་ཊྛ་ངྒི་ཀོ མ་གྒོ སཱ་མ་ཉྙཾ, ཏ་སྶེ་ཏཱ་ནི ཕ་ལཱ་ནི སཱ་མ་ཉྙ་ཕ་ལཱ་ནཱི་ཏི ཝུ་ཙྩ་ཏི. ཀི་སྶ བྲ་ཧྨ་ཉྙ་ཕ་ལཱ་ནཱི་ཏི ཝུ་ཙྩ་ནྟེ? བྲ་ཧྨ་ཉྙ་ཨ་རི་ཡོ ཨ་ཊྛ་ངྒི་ཀོ མ་གྒོ, ཏ་སྶ ཏཱ་ནི ཕ་ལཱ་ནཱི་ཏི བྲ་ཧྨ་ཉྙ་ཕ་ལཱ་ནཱི་ཏི ཝུ་ཙྩ་ནྟེ.
ཏ་ཏྠ སོ་ཏཱ་པ་ནྣོ ཀ་ཐཾ ཧོ་ཏི? ས་ཧ ས་ཙྩཱ་བྷི་ས་མ་ཡཱ ཨ་རི་ཡ་སཱ་ཝ་ཀ་སྶ ཏཱི་ཎི སཾ་ཡོ་ཛ་ནཱ་ནི པ་ཧཱི་ཡ་ནྟི ས་ཀྐཱ་ཡ་དི་ཊྛི ཝི་ཙི་ཀི་ཙྪཱ སཱི་ལ་བྦ་ཏ་པ་རཱ་མཱ་སོ ཙ, ཨི་མེ་སཾ ཏི་ཎྞཾ སཾ་ཡོ་ཛ་ནཱ་ནཾ པ་ཧཱ་ནཱ པ་རི་ཀྑ་ཡཱ ཨ་རི་ཡ་སཱ་ཝ་ཀོ ཧོ་ཏི སོ་ཏཱ་པ་ནྣོ ཨ་ཝི་ནི་པཱ་ཏ་དྷ་མྨོ ཡཱ་ཝ དུ་ཀྑ་སྶ་ནྟཾ ཀ་རོ་ཏི.
ཏ་ཏྠ ཀ་ཏ་མཱ ས་ཀྐཱ་ཡ་དི་ཊྛི? ཨ་སྶུ་ཏ་ཝཱ བཱ་ལོ པུ་ཐུ་ཛྫ་ནོ ཡཱ་ཝ ཨ་རི་ཡ་དྷ་མྨེ ཨ་ཀོ་ཝི་དོ, སོ རཱུ་པཾ ཨ་ཏྟ་ཏོ ས་མ་ནུ་པ་སྶ་ཏི ཡཱ་ཝ ཝི་ཉྙཱ་ཎ་སྨིཾ ཨ་ཏྟཱ་ནཾ, སོ ཨི་མེ་སུ པ་ཉྩ་སུ ཁ་ནྡྷེ་སུ ཨ་ཏྟ་གྒཱ་ཧོ ཝཱ ཨ་ཏྟ་ནི་ཡ་གྒཱ་ཧོ ཝཱ ཨེ་སོ་ཧ་མ་སྨི ཨེ་ཀ་སྨིཾ ཝ་ས་ཝ་ཏྟི་ཀོ [ཨ་ཝ་ཏྟི་ཏོ (པཱི. ཀ.)] པ་ཀྑི་ཏྟོ ཨ་ནུ་གྒ་ཧོ ཨ་ནུ་ས་ཡ་ནྟོ ཨ་ངྒ་མ་ངྒ་ནྟི པ་ར་ཏི. ཡཱ ཏ་ཐཱ་བྷཱུ་ཏ་སྶ ཁ་ནྟི རུ་ཙི པེ་ཀྑ་ནཱ ཨཱ་ཀཱ་ར་པ་རི་ཝི་ཏ་ཀྐོ དི་ཊྛི་ནི་ཛ྄ཛྷཱ་ཡ་ནཱ ཨ་བྷི་པྤ་ས་ནྣཱ, ཨ་ཡཾ ཝུ་ཙྩ་ཏེ ས་ཀྐཱ་ཡ་དི་ཊྛཱི་ཏི.
ཏ་ཏྠ པ་ཉྩ དི་ཊྛི་ཡོ ཨུ་ཙྪེ་དཾ བྷ་ཛ་ནྟི. ཀ་ཏ་མཱ་ཡོ པ་ཉྩ? རཱུ་པཾ ཨ་ཏྟ་ཏོ ས་མ་ནུ་པ་སྶ་ཏི, ཡཱ་ཝ ཝི་ཉྙཱ་ཎཾ ཨ་ཏྟ་ཏོ ས་མ་ནུ་པ་སྶ་ཏི, ཨི་མཱ་ཡོ པ་ཉྩ ཨུ་ཙྪེ་དཾ བྷ་ཛ་ནྟི, ཨ་ཝ་སེ་སཱ་ཡོ པ་ནྣ་ར་ས ས་སྶ་ཏཾ བྷ་ཛ་ནྟི. ཨི་ཏི ས་ཀྐཱ་ཡ་དི་ཊྛི་པ་ཧཱ་ནཱ དྭཱ་ས་ཊྛི་དི་ཊྛི་ག་ཏཱ་ནི པ་ཧཱི་ཡ་ནྟི. པ་ཧཱ་ནཱ ཨུ་ཙྪེ་དཾ ས་སྶ་ཏ་ཉྩ ན བྷ་ཛ་ཏི. ཨི་ཏི ཨུ་ཙྪེ་ད་ས་སྶ་ཏ་པྤ་ཧཱ་ནཱ ཨ་རི་ཡ་སཱ་ཝ་ཀ་སྶ ན ཀི་ཉྩི དི་ཊྛི་ག་ཏཾ བྷ་ཝ་ཏི, ཨ་ཉྙཱ ཝཱ ལོ་ཀུ་ཏྟ་རཱ་ཡ ས་མྨཱ་དི་ཊྛི་ཡཱ. ཀ་ཐཾ པ་ན ས་ཀྐཱ་ཡ་དི་ཊྛི ན བྷ་ཝ་ཏི? ཨི་དྷ ཨ་རི་ཡ་སཱ་ཝ་ཀོ སུ་ཏ་ཝཱ ཧོ་ཏི, ས་བྦོ སུ་ཀྐ་པ་ཀྑོ ཀཱ་ཏ་བྦོ, ཡཱ་ཝ ཨ་རི་ཡ་དྷ་མྨེ་སུ ཀོ་ཝི་དོ རཱུ་པཾ ཨ་ན་ཏྟ་ཏོ ས་མ་ནུ་པ་སྶ་ཏི, ཡཱ་ཝ ཝི་ཉྙཱ་ཎཾ…པེ… ཨེ་ཝ་མ་སྶ ས་མ་ནུ་པ་སྶ་ནྟ་སྶ ས་ཀྐཱ་ཡ་དི་ཊྛི ན བྷ་ཝ་ཏི.
ཀ་ཐཾ ཝི་ཙི་ཀི་ཙྪཱ ན བྷ་ཝ་ཏི? ཨི་དྷ ཨ་རི་ཡ་སཱ་ཝ་ཀོ བུ་དྡྷེ ན ཀ་ངྑ་ཏི, ན ཝི་ཙི་ཀི་ཙྪ་ཏི ཨ་བྷི་པྤ་སཱི་ད་ཏི, ཨི་ཏི་པི སོ བྷ་ག་ཝཱ་ཏི ས་བྦཾ. དྷ་མྨེ ན ཀ་ངྑ་ཏི ན ཝི་ཙི་ཀི་ཙྪ་ཏི ས་བྦཾ. ཡཱ་ཝ ཏ་ཎྷ་ཀྑ་ཡོ ཝི་རཱ་གོ ནི་རོ་དྷོ ནི་བྦཱ་ན་ནྟི, ཨི་མི་ནཱ དུ་ཏི་ཡེ་ན ཨཱ་ཀ་ངྑི་ཡེ་ན དྷ་མྨེ་ན ས་མ་ནྣཱ་ག་ཏོ ཧོ་ཏི. ས་ངྒྷེ ན ཀ་ངྑ་ཏི…པེ… ཡཱ་ཝ པཱུ་ཛཱ དེ་ཝཱ་ན་ཉྩ མ་ནུ་སྶཱ་ན་ཉྩཱ་ཏི, ཨི་མི་ནཱ ཏ་ཏི་ཡེ་ན ཨཱ་ཀ་ངྑི་ཡེ་ན དྷ་མྨེ་ན ས་མ་ནྣཱ་ག་ཏོ ཧོ་ཏི.
ས་བྦེ ས་ངྑཱ་རཱ དུ་ཀྑཱ་ཏི ན ཀ་ངྑ་ཏི ན ཝི་ཙི་ཀི་ཙྪ་ཏི ཨ་དྷི་མུ་ཙྩ་ཏི ཨ་བྷི་པྤ་སཱི་ད་ཏི. ཏ་ཎྷཱ དུ་ཀྑ་ས་མུ་ད་ཡོ་ཏི ན ཀ་ངྑ་ཏི ན ཝི་ཙི་ཀི་ཙྪ་ཏི. ཏ་ཎྷཱ་ནི་རོ་དྷཱ དུ་ཀྑ་ནི་རོ་དྷོ་ཏི ན ཀ་ངྑ་ཏི ན ཝི་ཙི་ཀི་ཙྪ་ཏི. ཨ་རི་ཡོ ཨ་ཊྛ་ངྒི་ཀོ མ་གྒོ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ་ཏི ན ཀ་ངྑ་ཏི ན ཝི་ཙི་ཀི་ཙྪ་ཏི ཨ་དྷི་མུ་ཙྩ་ཏི ཨ་བྷི་པྤ་སཱི་ད་ཏི. ཡཱ་ཝ བུ་དྡྷེ ཝཱ དྷ་མྨེ ཝཱ ས་ངྒྷེ ཝཱ དུ་ཀྑེ ཝཱ ས་མུ་ད་ཡེ ཝཱ ནི་རོ་དྷེ ཝཱ མ་གྒེ ཝཱ ཀ་ངྑཱ་ཡ་ནཱ ཝི་མ་ཏི ཝི་ཙི་ཀི་ཙྪཱ དྭེ་དྷཱ་པ་ཐཱ ཨཱ་ས་པྤ་ནཱ [ཨ་པྤ་ནཱ (པཱི. ཀ.) དྷ. ས. ༡༠༠༨ ནི་ཀྑེ་པ་ཀ་ཎྜེ པ་སྶི་ཏ་བྦཾ] པ་རི་ས་པྤ་ནཱ ཨ་ན་ཝ་ཊྛཱ་ནཾ ཨ་དྷི་ཊྛཱ་ག་མ་ནཾ [ཨ་ནི་ཊྛཱ་ག་མ་ནཾ (ཀ.)] ཨ་ནེ་ཀཾ་སོ ཨ་ནེ་ཀཾ་སི་ཀ་ཏཱ, ཏེ ཏ་སྶ པ་ཧཱི་ནཱ བྷ་ཝ་ནྟི པ་ཎུ་ནྣཱ ཨུ་ཙྪི་ནྣ་མཱུ་ལཱ ཏཱ་ལཱ་ཝ་ཏྠུ་ཀ་ཏཱ ཨ་ན་བྷཱ་ཝཾ་ཀ་ཏཱ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ.
༦༩. ཏ་ཏྠ སཱི་ལ་བྦ་ཏ་པ་རཱ་མཱ་སོ དྭི་དྷཱ – སཱི་ལ་སྶ ཝཱ སུ་དྡྷ་སྶ ཝཱ. ཏ་ཏྠ སཱི་ལ་སྶ སཱི་ལ་བྦ་ཏ་པ་རཱ་མཱ་སོ ཨི་མི་ནཱ་ཧཾ སཱི་ལེ་ན ཝཱ ཝ་ཏེ་ན ཝཱ ཏ་པེ་ན ཝཱ བྲ་ཧྨ་ཙ་རི་ཡེ་ན ཝཱ དེ་ཝོ ཝཱ བྷ་ཝི་སྶཱ་མི དེ་ཝ་ཉྙ་ཏ་རོ ཝཱ ཏ་ཏྠ ཀ་པོ་ཏ་པཱ་དཱ་ཧི ཨ་ཙྪ་རཱ་ཧི ས་དྡྷིཾ ཀཱི་ལི༹་སྶཱ་མི ར་མི་སྶཱ་མི པ་རི་ཙ་རི་སྶཱ་མཱི་ཏི. ཡ་ཐཱ་བྷཱུ་ཏ་ད་སྶ་ན་ནྟི རུ་ཙི་ཝི་མུ་ཏྟི རཱ་གོ རཱ་ག་པ་རི་ཝ་ཏྟ་ཀཱ དི་ཊྛི་རཱུ་པ་ནཱ པ་སྶ་ནཱ ཨ་ས་ནྟུ་སྶི་ཏ་སྶ སཱི་ལ་བྦ་ཏ་པ་རཱ་མཱ་སོ. ཏ་ཏྠ ཀ་ཏ་མོ སུ་དྡྷ་སྶ སཱི་ལ་བྦ་ཏ་པ་རཱ་མཱ་སོ? ཨི་དྷེ་ཀ་ཙྩོ སཱི་ལཾ པ་རཱ་མ་ས་ཏི, སཱི་ལེ་ན སུ་ཛ྄ཛྷ་ཏི, སཱི་ལེ་ན ནཱི་ཡ་ཏི, སཱི་ལེ་ན མུ་ཙྩ་ཏི, སུ་ཁཾ ཝཱི་ཏི་ཀྐ་མ་ཏི, དུ་ཀྑཾ ཝཱི་ཏི་ཀྐ་མ་ཏི, སུ་ཁ་དུ་ཀྑཾ ཝཱི་ཏི་ཀྐ་མ་ཏི ཨ་ནུ་པཱ་པུ་ཎཱ་ཏི ཨུ་པ་རི་མེ་ན. ཏ་དུ་བྷ་ཡཾ སཱི་ལ་ཝ་ཏཾ པ་རཱ་མ་ས་ཏི ཏ་དུ་བྷ་ཡེ་ན སཱི་ལ་ཝ་ཏེ་ན སུ་ཛ྄ཛྷ་ནྟི མུ་ཙྩ་ནྟི ནཱི་ཡ་ནྟི, སུ་ཁཾ ཝཱི་ཏི་ཀྐ་མ་ནྟི, དུ་ཀྑཾ ཝཱི་ཏི་ཀྐ་མ་ནྟི, སུ་ཁ་དུ་ཀྑཾ ཝཱི་ཏི་ཀྐ་མ་ནྟི, ཨ་ནུ་པཱ་པུ་ཎ་ནྟཱི་ཏི ཨ་ཝི་སུ་ཙི་ཀ་རཾ དྷ་མྨཾ ཨ་ཝི་མུ་ཏྟི་ཀ་རཾ དྷ་མྨཾ ཝི་སུ་ཙི་ཏོ ཝི་མུ་ཏྟི་ཏོ པ་ཙྩཱ་ག་ཙྪ་ནྟ་སྶ ཡཱ ཏ་ཐཱ་བྷཱུ་ཏ་སྶ ཁ་ནྟི རུ་ཙི མུ་ཏྟི པེ་ཀྑ་ནཱ ཨཱ་ཀཱ་ར་པ་རི་ཝི་ཏ་ཀྐོ དི་ཊྛི་ནི་ཛ྄ཛྷཱ་ཡ་ནཱ པ་སྶ་ནཱ, ཨ་ཡཾ སུ་དྡྷ་སྶ སཱི་ལ་བྦ་ཏ་པ་རཱ་མཱ་སོ. ཨེ་ཏེ ཨུ་བྷོ པ་རཱ་མཱ་སཱ ཨ་རི་ཡ་སཱ་ཝ་ཀ་སྶ པ་ཧཱི་ནཱ བྷ་ཝ་ནྟི ཡཱ་ཝ ཨཱ་ཡ་ཏིཾ ཨ་ནུ་པྤཱ་ད་དྷ་མྨཱ, སོ སཱི་ལ་ཝཱ བྷ་ཝ་ཏི ཨ་རི་ཡ་ཀ་ནྟེ་ཧི སཱི་ལེ་ཧི ས་མ་ནྣཱ་ག་ཏོ ཨ་ཀྑ་ཎྜེ་ཧི ཡཱ་ཝ ཨུ་པ་ས་མ་སཾ་ཝ་ཏྟ་ནི་ཀེ་ཧི. ཨི་མེ་སཾ ཏི་ཎྞཾ སཾ་ཡོ་ཛ་ནཱ་ནཾ པ་ཧཱ་ནཱ སུ་ཏ་ཝཱ ཨ་རི་ཡ་སཱ་ཝ་ཀོ བྷ་ཝ་ཏི སོ་ཏཱ་པ་ནྣོ ཨ་ཝི་ནི་པཱ་ཏ་དྷ་མྨོ, ས་བྦཾ.
ས་ཧ་ས་ཙྩཱ་བྷི་ས་མ་ཡཱ, ཨི་ཏི ཀོ ཝ་ཙ་ན་ཏྠོ? ཙ་ཏྟཱ་རོ ཨ་བྷི་ས་མ་ཡཱ, པ་རི་ཉྙཱ་བྷི་ས་མ་ཡོ པ་ཧཱ་ནཱ་བྷི་ས་མ་ཡོ ས་ཙྪི་ཀི་རི་ཡཱ་བྷི་ས་མ་ཡོ བྷཱ་ཝ་ནཱ་བྷི་ས་མ་ཡོ.
ཏ་ཏྠ ཨ་རི་ཡ་སཱ་ཝ་ཀོ དུ་ཀྑཾ པ་རི་ཉྙཱ་བྷི་ས་མ་ཡེ་ན ཨ་བྷི་ས་མེ་ཏི, ས་མུ་ད་ཡཾ པ་ཧཱ་ནཱ་བྷི་ས་མ་ཡེ་ན ཨ་བྷི་ས་མེ་ཏི, ནི་རོ་དྷཾ ས་ཙྪི་ཀི་རི་ཡཱ་བྷི་ས་མ་ཡེ་ན ཨ་བྷི་ས་མེ་ཏི, མ་གྒཾ བྷཱ་ཝ་ནཱ་བྷི་ས་མ་ཡེ་ན ཨ་བྷི་ས་མེ་ཏི. ཀིཾ ཀཱ་ར་ཎཾ? དུ་ཀྑ་སྶ པ་རི་ཉྙཱ་བྷི་ས་མ་ཡོ, ས་མུ་ད་ཡ་སྶ པ་ཧཱ་ནཱ་བྷི་ས་མ་ཡོ, ནི་རོ་དྷ་སྶ ས་ཙྪི་ཀི་རི་ཡཱ་བྷི་ས་མ་ཡོ, མ་གྒ་སྶ བྷཱ་ཝ་ནཱ་བྷི་ས་མ་ཡོ. ས་མ་ཐ་ཝི་པ་སྶ་ནཱ་ཡ ཀ་ཐཾ ཨ་བྷི་ས་མེ་ཏི? ཨཱ་ར་མྨ་ཎེ ཙི་ཏྟཾ ཨུ་པ་ནི་བ་ནྡྷེ་ཏྭཱ པ་ཉྩ་ཀྑ་ནྡྷེ དུ་ཀྑ་ཏོ པ་སྶ་ཏི. ཏ་ཏྠ ཡོ ཨུ་པ་ནི་བ་ནྡྷོ, ཨ་ཡཾ ས་མ་ཐོ. ཡཱ པ་རི་ཡོ་གཱ་ཧ་ནཱ, ཨ་ཡཾ ཝི་པ་སྶ་ནཱ. པ་ཉྩ་ཀྑ་ནྡྷེ དུ་ཀྑཱ་ཏི པ་སྶ་ཏོ ཡོ པ་ཉྩ་ཀྑ་ནྡྷེ་སུ ཨཱ་ལ་ཡོ ནི་ཀ་ནྟི ཨུ་པ་ག་མ་ནཾ ཨ་ཛ྄ཛྷོ་སཱ་ནཱ ཨི་ཙྪཱ མུ་ཙྪཱ པ་ཎི་དྷི པ་ཏྠ་ནཱ པ་ཧཱི་ཡ་ཏི. ཏ་ཏྠ པ་ཉྩ་ཀྑ་ནྡྷཱ དུ་ཀྑཾ. ཡོ ཏ་ཏྠ ཨཱ་ལ་ཡོ ནི་ཀ་ནྟི ཨུ་པ་ག་མ་ནཾ ཨ་ཛ྄ཛྷོ་སཱ་ནཾ ཨི་ཙྪཱ མུ་ཙྪཱ པ་ཎི་དྷི པ་ཏྠ་ནཱ, ཨ་ཡཾ ས་མུ་ད་ཡོ. ཡཾ ཏ་སྶ པ་ཧཱ་ནཾ, སོ ནི་རོ་དྷོ ས་མ་ཐོ ཝི་པ་སྶ་ནཱ ཙ མ་གྒོ, ཨེ་ཝཾ ཏེ་སཾ ཙ་ཏུ་ནྣཾ ཨ་རི་ཡ་ས་ཙྩཱ་ནཾ ཨེ་ཀ་ཀཱ་ལེ ཨེ་ཀ་ཀྑ་ཎེ ཨེ་ཀ་ཙི་ཏྟེ ཨ་པུ་བྦཾ ཨ་ཙ་རི་མཾ ཨ་བྷི་ས་མ་ཡོ བྷ་ཝ་ཏི. ཏེ་ནཱ་ཧ བྷ་ག་ཝཱ ‘‘ས་ཧ་ས་ཙྩཱ་བྷི་ས་མ་ཡཱ ཨ་རི་ཡ་སཱ་ཝ་ཀ་སྶ ཏཱི་ཎི སཾ་ཡོ་ཛ་ནཱ་ནི པ་ཧཱི་ཡ་ནྟཱི’’ཏི.
༧༠. ཏ་ཏྠ ས་མ་ཐ་ཝི་པ་སྶ་ནཱ ཡུ་ག་ན་དྡྷཱ ཝ་ཏྟ་མཱ་ནཱ ཨེ་ཀ་ཀཱ་ལེ ཨེ་ཀ་ཀྑ་ཎེ ཨེ་ཀ་ཙི་ཏྟེ ཙ་ཏྟཱ་རི ཀི་ཙྩཱ་ནི ཀ་རོ་ཏི, དུ་ཀྑཾ པ་རི་ཉྙཱ་བྷི་ས་མ་ཡེ་ན ཨ་བྷི་ས་མེ་ཏི, ཡཱ་ཝ མ་གྒཾ བྷཱ་ཝ་ནཱ་བྷི་ས་མ་ཡེ་ན ཨ་བྷི་ས་མེ་ཏི. ཀིཾ ཀཱ་ར་ཎཱ? དུ་ཀྑཾ པ་རི་ཉྙཱ་བྷི་ས་མ་ཡོ, ཡཱ་ཝ མ་གྒཾ བྷཱ་ཝ་ནཱ་བྷི་ས་མ་ཡོ. ཨེ་ཝཾ དི་ཊྛ་ནྟོ ཡ་ཐཱ ནཱ་ཝཱ ཛ་ལཾ ག་ཙྪ་ནྟཱི ཙ་ཏྟཱ་རི ཀི་ཙྩཱ་ནི ཀ་རོ་ཏི, པཱ་རི་མཾ ཏཱི་རཾ པཱ་པེ་ཏི, ཨོ་རི་མཾ ཏཱི་རཾ ཛ་ཧ་ཏི, བྷཱ་རཾ ཝ་ཧ་ཏི, སོ་ཏཾ ཚི་ནྡ་ཏི; ཨེ་ཝ་མེ་ཝ ས་མ་ཐ་ཝི་པ་སྶ་ནཱ ཡུ་ག་ན་དྡྷཱ ཝ་ཏྟ་མཱ་ནཱ ཨེ་ཀ་ཀཱ་ལེ ཨེ་ཀ་ཀྑ་ཎེ ཨེ་ཀ་ཙི་ཏྟེ ཙ་ཏྟཱ་རི ཀི་ཙྩཱ་ནི ཀ་རོ་ཏི, དུ་ཀྑཾ པ་རི་ཉྙཱ་བྷི་ས་མ་ཡེ་ན ཨ་བྷི་ས་མེ་ཏི, ཡཱ་ཝ མ་གྒཾ བྷཱ་ཝ་ནཱ་བྷི་ས་མ་ཡེ་ན ཨ་བྷི་ས་མེ་ཏི. ཡ་ཐཱ ཝཱ སཱུ་རི་ཡོ ཨུ་ད་ཡ་ནྟོ ཨེ་ཀ་ཀཱ་ལེ ཨ་པུ་བྦཾ ཨ་ཙ་རི་མཾ ཙ་ཏྟཱ་རི ཀི་ཙྩཱ་ནི ཀ་རོ་ཏི, ཨ་ནྡྷ་ཀཱ་རཾ ཝི་དྷ་མ་ཏི, ཨཱ་ལོ་ཀཾ པཱ་ཏུ་ཀ་རོ་ཏི, རཱུ་པཾ ནི་ད་སྶཱི་ཡ་ཏི, སཱི་ཏཾ པ་རི་ཡཱ་དི་ཡ་ཏི; ཨེ་ཝ་མེ་ཝ ས་མ་ཐ་ཝི་པ་སྶ་ནཱ ཡུ་ག་ན་དྡྷཱ ཝ་ཏྟ་མཱ་ནཱ ཨེ་ཀ་ཀཱ་ལེ…པེ… ཡ་ཐཱ པ་དཱི་པོ ཛ་ལ་ནྟོ ཨེ་ཀ་ཀཱ་ལེ ཨ་པུ་བྦཾ ཨ་ཙ་རི་མཾ ཙ་ཏྟཱ་རི ཀི་ཙྩཱ་ནི ཀ་རོ་ཏི, ཨ་ནྡྷ་ཀཱ་རཾ ཝི་དྷ་མ་ཏི, ཨཱ་ལོ་ཀཾ པཱ་ཏུ་ཀ་རོ་ཏི, རཱུ་པཾ ནི་ད་སྶཱི་ཡ་ཏི, ཨུ་པཱ་དཱ་ནཾ པ་རི་ཡཱ་དི་ཡ་ཏི; ཨེ་ཝ་མེ་ཝ ས་མ་ཐ་ཝི་པ་སྶ་ནཱ ཡུ་ག་ན་དྡྷཱ ཝ་ཏྟ་མཱ་ནཱ ཨེ་ཀ་ཀཱ་ལེ…པེ….
ཡ་དཱ ཨ་རི་ཡ་སཱ་ཝ་ཀོ སོ་ཏཱ་པ་ནྣོ བྷ་ཝ་ཏི ཨ་ཝི་ནི་པཱ་ཏ་དྷ་མྨོ ནི་ཡ་ཏོ ཡཱ་ཝ དུ་ཀྑ་སྶ་ནྟཾ ཀ་རོ་ཏི, ཨ་ཡཾ ད་སྶ་ན་བྷཱུ་མི. སོ་ཏཱ་པ་ཏྟི་ཕ་ལ་ཉྩ སོ་ཏཱ་པ་ཏྟི་ཕ་ལེ ཋི་ཏོ ཨུ་ཏྟ་རི ས་མ་ཐ་ཝི་པ་སྶ་ནཾ བྷཱ་ཝེ་ནྟོ ཡུ་ག་ན་དྡྷཱ ཝ་ཏྟ་མཱ་ནཱ ཀཱ་མ་རཱ་ག་བྱཱ་པཱ་དཱ་ནཾ ཡེ་བྷུ་ཡྻེ་ན པ་ཧཱ་ནཱ ཨ་རི་ཡ་སཱ་ཝ་ཀོ ཧོ་ཏི. ས་ཀ་དཱ་གཱ་མི པ་རི་ནི་ཊྛི་ཏ་ཏྟཱ ས་ཀི་དེ་ཝ ཨི་མཾ ལོ་ཀཾ ཨཱ་ག་ནྟྭཱ དུ་ཀྑ་སྶ་ནྟཾ ཀ་རོ་ཏི, ཨ་ཡཾ ཏ་ནུ་བྷཱུ་མི.
ས་ཀ་དཱ་གཱ་མི་ཕ་ལ་ཉྩ ཡོ ས་ཀ་དཱ་གཱ་མི་ཕ་ལེ ཋི་ཏོ ཝི་པ་སྶ་ནཾ བྷཱ་ཝེ་ནྟོ ཀཱ་མ་རཱ་ག་བྱཱ་པཱ་དེ སཱ་ནུ་ས་ཡེ ཨ་ན་ཝ་སེ་སཾ པ་ཛ་ཧ་ཏི, ཀཱ་མ་རཱ་ག་བྱཱ་པཱ་དེ་སུ ཨ་ན་ཝ་སེ་སཾ པ་ཧཱི་ནེ་སུ པ་ཉྩོ་ར་མྦྷཱ་གི་ཡཱ་ནི སཾ་ཡོ་ཛ་ནཱ་ནི པ་ཧཱི་ནཱ་ནི བྷ་ཝ་ནྟི ས་ཀྐཱ་ཡ་དི་ཊྛི སཱི་ལ་བྦ་ཏ་པ་རཱ་མཱ་སོ ཝི་ཙི་ཀི་ཙྪཱ ཀཱ་མ་ཙྪ་ནྡོ བྱཱ་པཱ་དོ ཙ, ཨི་མེ་སཾ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་ཧཱ་ནཱ [པ་ཧཱ་ནཱ་ཡ (པཱི. ཀ.)] ཨ་རི་ཡ་སཱ་ཝ་ཀོ ཧོ་ཏི ཨ་ནཱ་གཱ་མཱི ཏ་ཏྠ པ་རི་ནི་བྦཱ་ཡཱི ཨ་ནཱ་ཝ་ཏྟི་དྷ་མྨོ ཏ་སྨཱ ལོ་ཀཱ, ཨ་ཡཾ ཝཱི་ཏ་རཱ་ག་བྷཱུ་མི.
ཨ་ནཱ་གཱ་མི་ཕ་ལ་ཉྩ ཨ་ནཱ་གཱ་མི་ཕ་ལེ ཋི་ཏོ ཨུ་ཏྟ་རི ས་མ་ཐ་ཝི་པ་སྶ་ནཾ བྷཱ་ཝེ་ནྟོ པ་ཉྩ ཨུ་དྡྷ་མྦྷཱ་གི་ཡཱ་ནི སཾ་ཡོ་ཛ་ནཱ་ནི པ་ཛ་ཧ་ཏི རཱུ་པ་རཱ་ག་ཨ་རཱུ་པ་རཱ་ག་མཱ་ན་ཨུ་དྡྷ་ཙྩ་ཨ་ཝི་ཛྫ་ཉྩ. ཨི་མེ་སཾ པ་ཉྩ་ནྣཾ ཨུ་དྡྷ་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་ཧཱ་ནཱ ཨ་རི་ཡ་སཱ་ཝ་ཀོ ཨ་ར་ཧཱ བྷ་ཝ་ཏི, ཁཱི་ཎཱ་ས་ཝོ ཝུ་སི་ཏ་ཝཱ ས་མྨ་ད་ཉྙཱ [ས་མྤ་ཛ་ཉྙོ (པཱི. ཀ.)] ཝི་མུ་ཏྟོ པ་རི་ཀྑཱི་ཎ་བྷ་ཝ་སཾ་ཡོ་ཛ་ནོ ཨ་ནུ་པྤ་ཏྟ་ས་ད་ཏྠོ, ཨ་ཡཾ ཀ་ཏཱ་བྷཱུ་མི.
ཨ་ར་ཧ་ནྟོ་ཝ ཨ་ཡཾ སོ་པཱ་དི་སེ་སཱ ནི་བྦཱ་ན་དྷཱ་ཏུ. ཏ་སྶ ཨཱ་ཡུ་ཀྑ་ཡཱ ཛཱི་ཝི་ཏི་ནྡྲི་ཡཱ་པ་རོ་དྷཱ ཨི་ད་ཉྩ དུ་ཀྑཾ ནི་རུ་ཛ྄ཛྷ་ཏི, ཨ་ཉྙ་ཉྩ དུ་ཀྑཾ ན ཨུ་པྤ་ཛྫ་ཏི. ཡོ ཨི་མ་སྶ དུ་ཀྑ་སྶ ནི་རོ་དྷོ ཝཱུ་པ་ས་མོ, ཨ་ཉྙ་སྶ ཙ ཨ་པཱ་ཏུ་བྷཱ་ཝོ, ཨ་ཡཾ ཨ་ནུ་པཱ་དི་སེ་སཱ ནི་བྦཱ་ན་དྷཱ་ཏུ. ཨི་མཱ དྭེ ནི་བྦཱ་ན་དྷཱ་ཏུ་ཡོ. ཨི་ཏི ས་ཙྩཱ་ནི ཝུ་ཏྟཱ་ནི. ས་ཙྩཱ་བྷི་ས་མ་ཡོ ཝུ་ཏྟོ, ཀི་ལེ་ས་ཝ་ཝ་ཏྠཱ་ནཾ ཝུ་ཏྟཾ, པ་ཧཱ་ནཾ ཝུ་ཏྟཾ, བྷཱུ་མི་ཡོ ཝུ་ཏྟཱ, ཕ་ལཱ་ནི ཝུ་ཏྟཱ་ནི, ནི་བྦཱ་ན་དྷཱ་ཏུ་ཡོ ཝུ་ཏྟཱ. ཨེ་ཝ་མི་མེ་སུ ཝུ་ཏྟེ་སུ ས་བྦ་བོ་དྷི ཝུ་ཏྟཱ བྷ་ཝ་ཏི. ཨེ་ཏྠ ཡོ་གོ ཀ་ར་ཎཱི་ཡོ.
༧༡. ཏ་ཏྠ ཀ་ཏ་མཱ་ཡོ ན་ཝ ཨ་ནུ་པུ་བྦ་ས་མཱ་པ་ཏྟི་ཡོ? ཙ་ཏྟཱ་རི ཛྷཱ་ནཱ་ནི ཙ་ཏ་སྶོ ཙ ཨ་རཱུ་པ་ས་མཱ་པ་ཏྟི་ཡོ ནི་རོ་དྷ་ས་མཱ་པ་ཏྟི ཙ. ཏ་ཏྠ ཙ་ཏྟཱ་རི ཛྷཱ་ནཱ་ནི ཀ་ཏ་མཱ་ནི? ཨི་དྷ, བྷི་ཀྑ་ཝེ, [པ་སྶ དཱི་གྷ་ནི་ཀཱ་ཡེ] བྷི་ཀྑུ ཝི་ཝི་ཙྩེ་ཝ ཀཱ་མེ་ཧཱི་ཏི ཝི་ཏྠཱ་རེ་ན ཀཱ་ཏ་བྦཱ་ནི. ཏ་ཏྠ ཀ་ཏ་མཱ ཙ་ཏྟཱ་རོ ཨ་རཱུ་པ་ས་མཱ་པ་ཏྟི་ཡོ? ཝི་རཱ་གི་ནོ ཝ་ཏ ཝ་ཏྟ་བྦོ, ཡཱ་ཝ ནི་རོ་དྷ་ས་མཱ་པ་ཏྟི ཝི་ཏྠཱ་རེ་ན ཀཱ་ཏ་བྦཱ. ཨི་མཱ་ཡོ ན་ཝ ཨ་ནུ་པུ་བྦ་ས་མཱ་པ་ཏྟི་ཡོ.
ཏ་ཏྠ ཀ་ཏ་མཾ པ་ཋ་མཾ ཛྷཱ་ནཾ? པ་ཉྩ་ངྒ་ཝི་པྤ་ཡུ་ཏྟཾ པ་ཉྩ་ངྒ་ས་མ་ནྣཱ་ག་ཏཾ. ཀ་ཏ་མེ་ཧི པ་ཉྩ་ཧི ཨ་ངྒེ་ཧི ཝི་པྤ་ཡུ་ཏྟཾ? པ་ཉྩ་ཧི ནཱི་ཝ་ར་ཎེ་ཧི. ཏ་ཏྠ ཀ་ཏ་མཱ་ནི པ་ཉྩ ནཱི་ཝ་ར་ཎཱ་ནི? ཀཱ་མ་ཙྪ་ནྡོ་ཏི ཝི་ཏྠཱ་རེ་ཏ་བྦོ. ཏ་ཏྠ ཀ་ཏ་མོ ཀཱ་མ་ཙྪ་ནྡོ? ཡོ པ་ཉྩ་སུ ཀཱ་མ་གུ་ཎེ་སུ ཚ་ནྡ་རཱ་གོ པེ་མཾ ནི་ཀ་ནྟི ཨ་ཛ྄ཛྷོ་སཱ་ནཾ ཨི་ཙྪཱ མུ་ཙྪཱ པ་ཏྠ་ནཱ ཨ་པ་རི་ཙྩཱ་གོ ཨ་ནུ་ས་ཡོ པ་རི་ཡུ་ཊྛཱ་ནཾ, ཨ་ཡཾ ཀཱ་མ་ཙྪ་ནྡ་ནཱི་ཝ་ར་ཎཾ. ཏ་ཏྠ ཀ་ཏ་མཾ བྱཱ་པཱ་ད་ནཱི་ཝ་ར་ཎཾ? ཡོ ས་ཏྟེ་སུ ས་ངྑཱ་རེ་སུ ཙ ཨཱ་གྷཱ་ཏོ…པེ… ཡ་ཐཱ དོ་སེ ཏ་ཐཱ ནི་ཨོ་ཊྛཱ་ནཱ, ཨ་ཡཾ བྱཱ་པཱ་དོ ནཱི་ཝ་ར་ཎཾ. ཏ་ཏྠ ཀ་ཏ་མཾ མི་དྡྷཾ? ཡཱ ཙི་ཏྟ་སྶ ཛ་ལ༹་ཏཱ ཙི་ཏྟ་སྶ ག་རུ་ཏྟཾ ཙི་ཏྟ་སྶ ཨ་ཀ་མྨ་ནཱི་ཡ་ཏཱ ཙི་ཏྟ་སྶ ནི་ཀྑེ་པོ ནི་དྡཱ་ཡ་ནཱ པ་ཙ་ལི་ཀ་ཏཱ པ་ཙ་ལཱ་ཡ་ནཱ པ་ཙ་ལཱ་ཡ་ནཾ, ཨི་དཾ མི་དྡྷཾ. ཏ་ཏྠ ཀ་ཏ་མཾ ཐི་ནཾ [ཐཱི་ནཾ (པཱི.)]? ཡཱ ཀཱ་ཡ་སྶ ཐི་ན་ཏཱ ཛ་ལ༹་ཏཱ ཀཱ་ཡ་སྶ ག་རུ་ཏྟཱ ཀཱ་ཡ་སྶ ཨ་པྤ་སྶ་དྡྷི, ཨི་དཾ ཐི་ནཾ. ཨི་ཏི ཨི་ད་ཉྩ ཐི་ནཾ པུ་རི་མ་ཀ་ཉྩ མི་དྡྷཾ ཏ་དུ་བྷ་ཡཾ ཐི་ན་མི་དྡྷ་ནཱི་ཝ་ར་ཎ་ནྟི ཝུ་ཙྩ་ཏི. ཏ་ཏྠ ཀ་ཏ་མཾ ཨུ་དྡྷ་ཙྩཾ? ཡོ ཨ་ཝཱུ་པ་ས་མོ ཙི་ཏྟ་སྶ, ཨི་དཾ ཨུ་དྡྷ་ཙྩཾ. ཏ་ཏྠ ཀ་ཏ་མཾ ཀུ་ཀྐུ་ཙྩཾ? ཡོ ཙེ་ཏ་སོ ཝི་ལེ་ཁོ ཨ་ལ་ཉྩ་ནཱ ཝི་ལ་ཉྩ་ནཱ ཧ་ད་ཡ་ལེ་ཁོ ཝི་པྤ་ཊི་སཱ་རོ, ཨི་དཾ ཀུ་ཀྐུ་ཙྩཾ. ཨི་ཏི ཨི་ད་ཉྩ ཀུ་ཀྐུ་ཙྩཾ པུ་རི་མ་ཀ་ཉྩ ཨུ་དྡྷ་ཙྩཾ ཏ་དུ་བྷ་ཡཾ ཨུ་དྡྷ་ཙྩ་ཀུ་ཀྐུ་ཙྩ་ནཱི་ཝ་ར་ཎ་ནྟི ཝུ་ཙྩ་ཏི. ཏ་ཏྠ ཀ་ཏ་མཾ ཝི་ཙི་ཀི་ཙྪཱ་ནཱི་ཝ་ར་ཎཾ? ཡོ བུ་དྡྷེ ཝཱ དྷ་མྨེ ཝཱ ས་ངྒྷེ ཝཱ…པེ… ཨ་ཡཾ ཝི་ཙི་ཀི་ཙྪཱ. ཨ་པི ཙ ཁོ པ་ན པ་ཉྩ ཝི་ཙི་ཀི་ཙྪཱ་ཡོ ས་མ་ན་ནྟ་རཱ་ཡི་ཀཱ དེ་ས་ནྟ་རཱ་ཡི་ཀཱ ས་མཱ་པ་ཏྟ་ནྟ་རཱ་ཡི་ཀཱ མ་གྒ་ནྟ་རཱ་ཡི་ཀཱ ས་གྒ་ནྟ་རཱ་ཡི་ཀཱ, ཨི་མཱ་ཡོ པ་ཉྩ ཝི་ཙི་ཀི་ཙྪཱ་ཡོ. ཨི་དྷ པ་ན ས་མཱ་པ་ཏྟ་ནྟ་རཱ་ཡི་ཀཱ ཝི་ཙི་ཀི་ཙྪཱ ཨ་དྷི་པྤེ་ཏཱ. ཨི་མེ པ་ཉྩ ནཱི་ཝ་ར་ཎཱ.
ཏ་ཏྠ ནཱི་ཝ་ར་ཎཱ་ནཱི་ཏི ཀོ ཝ་ཙ་ན་ཏྠོ, ཀུ་ཏོ ནི་ཝཱ་ར་ཡ་ནྟཱི་ཏི? ས་བྦ་ཏོ ཀུ་ས་ལ་པ་ཀྑི་ཀཱ ནི་ཝཱ་ར་ཡ་ནྟི. ཀ་ཐཾ [ཀིཾ ཀཾ (པཱི. ཀ.)] ནི་ཝཱ་ར་ཡ་ནྟི? ཀཱ་མ་ཙྪ་ནྡོ ཨ་སུ་བྷ་ཏོ ནི་ཝཱ་ར་ཡ་ཏི, བྱཱ་པཱ་དོ མེ་ཏྟཱ་ཡ [མེ་ཏྟ་ཏོ (པཱི.)] ནི་ཝཱ་ར་ཡ་ཏི, ཐི་ནཾ པ་སྶ་དྡྷི་ཏོ ནི་ཝཱ་ར་ཡ་ཏི, མི་དྡྷཾ ཝཱི་རི་ཡཱ་ར་མྦྷ་ཏོ ནི་ཝཱ་ར་ཡ་ཏི, ཨུ་དྡྷ་ཙྩཾ ས་མ་ཐ་ཏོ ནི་ཝཱ་ར་ཡ་ཏི, ཀུ་ཀྐུ་ཙྩཾ ཨ་ཝི་པྤ་ཊི་སཱ་ར་ཏོ ནི་ཝཱ་ར་ཡ་ཏི, ཝི་ཙི་ཀི་ཙྪཱ པ་ཉྙཱ་ཏོ པ་ཊི་ཙྩ་ས་མུ་པྤཱ་ད་ཏོ ནི་ཝཱ་ར་ཡ་ཏི.
ཨ་པ་རོ པ་རི་ཡཱ་ཡོ. ཀཱ་མ་ཙྪ་ནྡོ ཨ་ལོ་བྷ་ཏོ ཀུ་ས་ལ་མཱུ་ལ་ཏོ ནི་ཝཱ་ར་ཡ་ཏི, བྱཱ་པཱ་དོ ཨ་དོ་ས་ཏོ ནི་ཝཱ་ར་ཡ་ཏི, ཐི་ན་མི་དྡྷཾ ས་མཱ་དྷི་ཏོ ནི་ཝཱ་ར་ཡ་ཏི, ཨུ་དྡྷ་ཙྩ་ཀུ་ཀྐུ་ཙྩཾ ས་ཏི་པ་ཊྛཱ་ནེ་ཧི ནི་ཝཱ་ར་ཡ་ཏི, ཝི་ཙི་ཀི་ཙྪཱ ཨ་མོ་ཧ་ཏོ ཀུ་ས་ལ་མཱུ་ལ་ཏོ ནི་ཝཱ་ར་ཡ་ཏི.
ཨ་པ་རོ པ་རི་ཡཱ་ཡོ. ཏ་ཡོ ཝི་ཧཱ་རཱ དི་བྦ་ཝི་ཧཱ་རོ བྲ་ཧྨ་ཝི་ཧཱ་རོ ཨ་རི་ཡ་ཝི་ཧཱ་རོ. དི་བྦ་ཝི་ཧཱ་རོ ཙ་ཏྟཱ་རི ཛྷཱ་ནཱ་ནི, བྲ་ཧྨ་ཝི་ཧཱ་རོ ཙ་ཏྟཱ་རི ཨ་པྤ་མཱ་ཎཱ་ནི, ཨ་རི་ཡ་ཝི་ཧཱ་རོ ས་ཏྟ་ཏིཾ་ས བོ་དྷི་པ་ཀྑི་ཡཱ དྷ་མྨཱ. ཏ་ཏྠ ཀཱ་མ་ཙྪ་ནྡོ ཨུ་དྡྷ་ཙྩཾ ཀུ་ཀྐུ་ཙྩ་ཉྩ དི་བྦ་ཝི་ཧཱ་རཾ ནི་ཝཱ་ར་ཡ་ཏི, བྱཱ་པཱ་དོ བྲ་ཧྨ་ཝི་ཧཱ་རཾ ནི་ཝཱ་ར་ཡ་ཏི, ཐི་ན་མི་དྡྷཾ ཝི་ཙི་ཀི་ཙྪཱ ཙ ཨ་རི་ཡ་ཝི་ཧཱ་རཾ ནི་ཝཱ་ར་ཡ་ཏི.
ཨ་པ་རོ པ་རི་ཡཱ་ཡོ. ཀཱ་མ་ཙྪ་ནྡོ བྱཱ་པཱ་དོ ཨུ་དྡྷ་ཙྩ་ཀུ་ཀྐུ་ཙྩ་ཉྩ ས་མ་ཐཾ ནི་ཝཱ་ར་ཡ་ནྟི, ཐི་ན་མི་དྡྷཾ ཝི་ཙི་ཀི་ཙྪཱ ཙ ཝི་པ་སྶ་ནཾ ནི་ཝཱ་ར་ཡ་ནྟི, ཨ་ཏོ ནཱི་ཝ་ར་ཎ་ནྟི ཝུ་ཙྩ་ནྟེ. ཨི་མེ་ཧི པ་ཉྩ་ཧི ཨ་ངྒེ་ཧི ཝི་པྤ་ཡུ་ཏྟཾ པ་ཋ་མཾ ཛྷཱ་ནཾ.
ཀ་ཏ་མེ་ཧི པ་ཉྩ་ཧི ཨ་ངྒེ་ཧི ས་མྤ་ཡུ་ཏྟཾ པ་ཋ་མཾ ཛྷཱ་ནཾ? ཝི་ཏ་ཀྐ་ཝི་ཙཱ་རེ་ཧི པཱི་ཏི་ཡཱ སུ་ཁེ་ན ཙ ཙི་ཏྟེ་ཀ་གྒ་ཏཱ་ཡ ཙ. ཨི་མེ་སཾ པ་ཉྩ་ནྣཾ ཨ་ངྒཱ་ནཾ ཨུ་པྤཱ་ད་པ་ཊི་ལཱ་བྷ་ས་མ་ནྣཱ་ག་མོ ས་ཙྪི་ཀི་རི་ཡཾ པ་ཋ་མཾ ཛྷཱ་ནཾ པ་ཊི་ལ་དྡྷ་ནྟི ཝུ་ཙྩ་ཏི. ཨི་མཱ་ནི པ་ཉྩ ཨ་ངྒཱ་ནི ཨུ་པྤཱ་དེ་ཏྭཱ ཝི་ཧ་ར་ཏཱི་ཏི, ཏེ་ན ཝུ་ཙྩ་ཏེ པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏཱི་ཏི དི་བྦེ་ན ཝི་ཧཱ་རེ་ན.
ཏ་ཏྠ དུ་ཏི་ཡཾ ཛྷཱ་ནཾ ཙ་ཏུ་ར་ངྒ་ས་མ་ནྣཱ་ག་ཏཾ པཱི་ཏི་སུ་ཁེ་ན ཙི་ཏྟེ་ཀ་གྒ་ཏཱ་ཡ ཨ་ཛ྄ཛྷ་ཏྟཾ ས་མྤ་སཱ་ད་ནེ་ན ཨི་མཱ་ནི ཙ་ཏྟཱ་རི ཨ་ངྒཱ་ནི ཨུ་པྤཱ་དེ་ཏྭཱ ས་མྤཱ་དེ་ཏྭཱ ཝི་ཧ་ར་ཏི, ཏེ་ན ཝུ་ཙྩ་ཏི དུ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏཱི་ཏི.
ཏ་ཏྠ པ་ཉྩ་ངྒ་ས་མ་ནྣཱ་ག་ཏཾ ཏ་ཏི་ཡཾ ཛྷཱ་ནཾ ས་ཏི་ཡཱ ས་མྤ་ཛ་ཉྙེ སུ་ཁེ་ན ཙི་ཏྟེ་ཀ་གྒ་ཏཱ་ཡ ཨུ་པེ་ཀྑཱ་ཡ ཨི་མཱ་ནི པ་ཉྩ་ངྒཱ་ནི ཨུ་པྤཱ་དེ་ཏྭཱ ས་མྤཱ་དེ་ཏྭཱ ཝི་ཧ་ར་ཏི, ཏེ་ན ཝུ་ཙྩ་ཏི ཏ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏཱི་ཏི.
ཏ་ཏྠ ཙ་ཏུ་ཏྠཾ ཛྷཱ་ནཾ ཙ་ཏུ་ར་ངྒ་ས་མ་ནྣཱ་ག་ཏཾ ཨུ་པེ་ཀྑཱ་ཡ ས་ཏི་པཱ་རི་སུ་དྡྷི་ཡཱ ཨ་དུ་ཀྑ་མ་སུ་ཁཱ་ཡ ཝེ་ད་ནཱ་ཡ ཙི་ཏྟེ་ཀ་གྒ་ཏཱ ཙ, ཨི་མེ་ཧི ཙ་ཏཱུ་ཧ་ངྒེ་ཧི ས་མ་ནྣཱ་ག་ཏཾ ཙ་ཏུ་ཏྠཾ ཛྷཱ་ནཾ. ཨི་ཏི ཨི་མེ་སཾ ཙ་ཏུ་ནྣཾ ཨ་ངྒཱ་ནཾ ཨུ་པྤཱ་དོ པ་ཊི་ལཱ་བྷོ ས་མ་ནྣཱ་ག་མོ ས་ཙྪི་ཀི་རི་ཡཱ ཙ་ཏུ་ཏྠཾ ཛྷཱ་ནཾ པ་ཊི་ལ་དྡྷ་ནྟི ཝུ་ཙྩ་ཏི. ཨི་མཱ་ནི ཙ་ཏྟཱ་རི ཛྷཱ་ནཱ་ནི ཨུ་པྤཱ་དེ་ཏྭཱ ས་མྤཱ་དེ་ཏྭཱ ཨུ་པ་ས་མྤ་ཛྫ ཝི་ཧ་ར་ཏི, ཏེ་ན ཝུ་ཙྩ་ཏི དི་བྦེ་ན ཝི་ཧཱ་རེ་ན ཝི་ཧ་ར་ཏཱི་ཏི.
ཏ་ཏྠ ཀ་ཏ་མོ ཨ་ནི་ཙྩ་ཊྛོ? པཱི་ལ༹་ན་ཊྛོ ཨ་ནི་ཙྩ་ཊྛོ པ་བྷ་ངྒ་ཊྛོ ས་མྤཱ་པ་ན་ཊྛོ ཝི་ཝེ་ཀ་ཊྛོ ཨ་ནི་ཙྩ་ཊྛོ, ཨ་ཡཾ ཨ་ནི་ཙྩ་ཊྛོ.
ཏ་ཏྠ ཀ་ཏ་མོ དུ་ཀྑ་ཊྛོ? པཱི་ལ༹་ན་ཊྛོ དུ་ཀྑ་ཊྛོ ས་མྤཱི་ལ༹་ན་ཊྛོ སཾ་ཝེ་ག་ཊྛོ བྱཱ་དྷི་ན་ཊྛོ, ཨ་ཡཾ དུ་ཀྑ་ཊྛོ.
ཏ་ཏྠ ཀ་ཏ་མོ སུ་ཉྙ་ཊྛོ? ཨ་ནུ་པ་ལི་ཏྟོ སུ་ཉྙ་ཊྛོ, ཨ་ས་མྦྷཱ་ཛ་ན་ཊྛོ ག་ཏ་པ་ཊྛོ [ཨ་པྤ་ཊྛོ (པཱི.)] ཝི་ཝ་ཊྚ་ཊྛོ, ཨ་ཡཾ སུ་ཉྙ་ཊྛོ.
ཏ་ཏྠ ཀ་ཏ་མོ ཨ་ན་ཏྟ་ཊྛོ? ཨ་ནི་སྶ་རི་ཡ་ཊྛོ ཨ་ན་ཏྟ་ཊྛོ, ཨ་ཝ་ས་ཝ་ཏྟ་ན་ཊྛོ, ཨ་ཀཱ་མ་ཀཱ་རི་ཊྛོ པ་རི་ཝི་ད་ཊྛོ, ཨ་ཡཾ ཨ་ན་ཏྟ་ཊྛོ་ཏི.
སུ་ཏྟ་ཏྠ་ས་མུ་ཙྩ་ཡོ ནཱ་མ སཾ་ཝ་ཏྟི་ས་ནྟི་ཀཱ པེ་ཊ་ཀ་བྷཱུ་མི ས་མ་ཏྟཱ.