༧. ཝ་གྒུ་ལི་ངྒ་པ་ཉྷོ

༧. ‘‘བྷ་ནྟེ ནཱ་ག་སེ་ན, ‘ཝ་གྒུ་ལི་སྶ དྭེ ཨ་ངྒཱ་ནི ག་ཧེ་ཏ་བྦཱ་ནཱི’ཏི ཡཾ ཝ་དེ་སི, ཀ་ཏ་མཱ་ནི ཏཱ་ནི དྭེ ཨ་ངྒཱ་ནི ག་ཧེ་ཏ་བྦཱ་ནཱི’’ཏི? ‘‘ཡ་ཐཱ, མ་ཧཱ་རཱ་ཛ, ཝ་གྒུ་ལི གེ་ཧཾ པ་ཝི་སི་ཏྭཱ ཝི་ཙ་རི་ཏྭཱ ནི་ཀྑ་མ་ཏི, ན ཏ་ཏྠ པ་ལི་བུ་དྡྷ་ཏི, ཨེ་ཝ་མེ་ཝ ཁོ, མ་ཧཱ་རཱ་ཛ, ཡོ་གི་ནཱ ཡོ་གཱ་ཝ་ཙ་རེ་ན གཱ་མཾ པི་ཎྜཱ་ཡ པ་ཝི་སི་ཏྭཱ ས་པ་དཱ་ནཾ ཝི་ཙ་རི་ཏྭཱ པ་ཊི་ལ་དྡྷ་ལཱ་བྷེ་ན ཁི་པྤ་མེ་ཝ ནི་ཀྑ་མི་ཏ་བྦཾ, ན ཏ་ཏྠ པ་ལི་བུ་དྡྷེ་ན བྷ་ཝི་ཏ་བྦཾ. ཨི་དཾ, མ་ཧཱ་རཱ་ཛ, ཝ་གྒུ་ལི་སྶ པ་ཋ་མཾ ཨ་ངྒཾ ག་ཧེ་ཏ་བྦཾ.

‘‘པུ་ན ཙ་པ་རཾ, མ་ཧཱ་རཱ་ཛ, ཝ་གྒུ་ལི པ་ར་གེ་ཧེ ཝ་ས་མཱ་ནོ ན ཏེ་སཾ པ་རི་ཧཱ་ནིཾ ཀ་རོ་ཏི, ཨེ་ཝ་མེ་ཝ ཁོ, མ་ཧཱ་རཱ་ཛ, ཡོ་གི་ནཱ ཡོ་གཱ་ཝ་ཙ་རེ་ན ཀུ་ལཱ་ནི ཨུ་པ་ས་ངྐ་མི་ཏྭཱ ཨ་ཏི་ཡཱ་ཙ་ནཱ་ཡ ཝཱ ཝི་ཉྙ་ཏྟི་བ་ཧུ་ལ་ཏཱ་ཡ ཝཱ ཀཱ་ཡ་དོ་ས་བ་ཧུ་ལ་ཏཱ་ཡ ཝཱ ཨ་ཏི་བྷཱ་ཎི་ཏཱ་ཡ ཝཱ ས་མཱ་ན་སུ་ཁ་དུ་ཀྑ་ཏཱ་ཡ ཝཱ ན ཏེ་སཾ ཀོ་ཙི ཝི་པྤ་ཊི་སཱ་རོ ཀ་ར་ཎཱི་ཡོ, ན་པི ཏེ་སཾ མཱུ་ལ་ཀ་མྨཾ པ་རི་ཧཱ་པེ་ཏ་བྦཾ, ས་བྦ་ཐཱ ཝ་ཌྜྷི ཡེ་ཝ ཨི་ཙྪི་ཏ་བྦཱ. ཨི་དཾ, མ་ཧཱ་རཱ་ཛ, ཝ་གྒུ་ལི་སྶ དུ་ཏི་ཡཾ ཨ་ངྒཾ ག་ཧེ་ཏ་བྦཾ. བྷཱ་སི་ཏ་མྤེ་ཏཾ, མ་ཧཱ་རཱ་ཛ, བྷ་ག་ཝ་ཏཱ དེ་ཝཱ་ཏི་དེ་ཝེ་ན དཱི་གྷ་ནི་ཀཱ་ཡ་ཝ་རེ ལ་ཀྑ་ཎ་སུ་ཏྟ་ནྟེ –

‘‘‘ས་དྡྷཱ་ཡ སཱི་ལེ་ན སུ་ཏེ་ན བུ་དྡྷི་ཡཱ, ཙཱ་གེ་ན དྷ་མྨེ་ན བ་ཧཱུ་ཧི སཱ་དྷུ་ཧི;

དྷ་ནེ་ན དྷ་ཉྙེ་ན ཙ ཁེ་ཏྟ་ཝ་ཏྠུ་ནཱ, པུ་ཏྟེ་ཧི དཱ་རེ་ཧི ཙ་ཏུ་པྤ་དེ་ཧི ཙ.

‘‘‘ཉཱ་ཏཱི་ཧི མི་ཏྟེ་ཧི ཙ བ་ནྡྷ་ཝེ་ཧི, བ་ལེ་ན ཝ་ཎྞེ་ན སུ་ཁེ་ན ཙཱུ་བྷ་ཡཾ;

ཀ་ཐཾ ན ཧཱ་ཡེ་ཡྻུཾ པ་རེ་ཏི ཨི་ཙྪ་ཏི, ཨ་ཏྠ་ས་མི་དྡྷི་ཉྩ པ་ནཱ་བྷི་ཀ་ངྑ་ཏཱི’’’ཏི.

ཝ་གྒུ་ལི་ངྒ་པ་ཉྷོ ས་ཏྟ་མོ.