༩. སཾ་སཱ་ར་པ་ཉྷོ

༩. རཱ་ཛཱ ཨཱ་ཧ ‘‘བྷ་ནྟེ ནཱ་ག་སེ་ན, ཡཾ པ་ནེ་ཏཾ བྲཱུ་སི ‘སཾ་སཱ་རོ’ཏི, ཀ་ཏ་མོ སོ སཾ་སཱ་རོ’’ཏི? ‘‘ཨི་དྷ, མ་ཧཱ་རཱ་ཛ, ཛཱ་ཏོ ཨི་དྷེ་ཝ མ་ར་ཏི, ཨི་དྷ མ་ཏོ ཨ་ཉྙ་ཏྲ ཨུ་པྤ་ཛྫ་ཏི, ཏ་ཧིཾ ཛཱ་ཏོ ཏ་ཧིཾ ཡེ་ཝ མ་ར་ཏི, ཏ་ཧིཾ མ་ཏོ ཨ་ཉྙ་ཏྲ ཨུ་པྤ་ཛྫ་ཏི, ཨེ་ཝཾ ཁོ, མ་ཧཱ་རཱ་ཛ, སཾ་སཱ་རོ ཧོ་ཏཱི’’ཏི. ‘‘ཨོ་པ་མྨཾ ཀ་རོ་ཧཱི’’ཏི. ‘‘ཡ་ཐཱ, མ་ཧཱ་རཱ་ཛ, ཀོ་ཙི་དེ་ཝ པུ་རི་སོ པ་ཀྐཾ ཨ་མྦཾ ཁཱ་དི་ཏྭཱ ཨ་ཊྛིཾ རོ་པེ་ཡྻ, ཏ་ཏོ མ་ཧ་ནྟོ ཨ་མྦ་རུ་ཀྑོ ནི་བྦ་ཏྟི་ཏྭཱ ཕ་ལཱ་ནི ད་དེ་ཡྻ, ཨ་ཐ སོ པུ་རི་སོ ཏ་ཏོ་པི པ་ཀྐཾ ཨ་མྦཾ ཁཱ་དི་ཏྭཱ ཨ་ཊྛིཾ རོ་པེ་ཡྻ, ཏ་ཏོ་པི མ་ཧ་ནྟོ ཨ་མྦ་རུ་ཀྑོ ནི་བྦ་ཏྟི་ཏྭཱ ཕ་ལཱ་ནི ད་དེ་ཡྻ, ཨེ་ཝ་མེ་ཏེ་སཾ རུ་ཀྑཱ་ནཾ ཀོ་ཊི ན པ་ཉྙཱ་ཡ་ཏི, ཨེ་ཝ་མེ་ཝ ཁོ, མ་ཧཱ་རཱ་ཛ, ཨི་དྷ ཛཱ་ཏོ ཨི་དྷེ་ཝ མ་ར་ཏི, ཨི་དྷ མ་ཏོ ཨ་ཉྙ་ཏྲ ཨུ་པྤ་ཛྫ་ཏི, ཏ་ཧིཾ ཛཱ་ཏོ ཏ་ཧིཾ ཡེ་ཝ མ་ར་ཏི, ཏ་ཧིཾ མ་ཏོ ཨ་ཉྙ་ཏྲ ཨུ་པྤ་ཛྫ་ཏི, ཨེ་ཝཾ ཁོ, མ་ཧཱ་རཱ་ཛ, སཾ་སཱ་རོ ཧོ་ཏཱི’’ཏི.

‘‘ཀ་ལློ་སི, བྷ་ནྟེ ནཱ་ག་སེ་ནཱ’’ཏི.

སཾ་སཱ་ར་པ་ཉྷོ ན་ཝ་མོ.