༢. ཁ་ར་པུ་ཏྟ་ཝ་གྒོ
༣༨༦. ཁ་ར་པུ་ཏྟ་ཛཱ་ཏ་ཀཾ (༦-༢-༡)
༧༦. ས་ཙྩཾ ཀི་རེ་ཝ་མཱ་ཧཾ་སུ, ཝ་སྟཾ [བྷ་སྟཾ (སཱི. པཱི.), ཀ་ལ་ཀཾ (སྱཱ.), ག་རཾ (ཀ.)] བཱ་ལོ་ཏི པ་ཎྜི་ཏཱ;
པ་སྶ བཱ་ལོ ར་ཧོ་ཀ་མྨཾ, ཨཱ་ཝི་ཀུ་བྦཾ ན བུ་ཛ྄ཛྷ་ཏི.
༧༧. ཏྭཾ ཁོ་པི [ཏྭཾ ནུ ཁོ (སཱི. སྱཱ.), ཏྭ་ཉྩ ཁོ (པཱི.)] ས་མྨ བཱ་ལོ་སི, ཁ་ར་པུ་ཏྟ ཝི་ཛཱ་ན་ཧི;
ར་ཛྫུ་ཡཱ ཧི [ར་ཛྫུ་ཡཱ་སི (པཱི.)] པ་རི་ཀྑི་ཏྟོ, ཝ་ངྐོ་ཊྛོ ཨོ་ཧི་ཏོ་མུ་ཁོ.
༧༨. ཨ་པ་ར་མྤི ས་མྨ ཏེ བཱ་ལྱཾ [ཨ་ཡ་མྤི ས་མྨ ཏེ བཱ་ལོ (ཀ.)], ཡོ མུ་ཏྟོ ན པ་ལཱ་ཡ་སི;
སོ ཙ བཱ་ལ་ཏ་རོ ས་མྨ, ཡཾ ཏྭཾ ཝ་ཧ་སི སེ་ན་ཀཾ.
༧༩. ཡཾ ནུ ས་མྨ ཨ་ཧཾ བཱ་ལོ, ཨ་ཛ་རཱ་ཛ ཝི་ཛཱ་ན་ཧི;
ཨ་ཐ ཀེ་ན སེ་ན་ཀོ བཱ་ལོ, ཏཾ མེ ཨ་ཀྑཱ་ཧི པུ་ཙྪི་ཏོ.
༨༠. ཨུ་ཏྟ་མ་ཏྠཾ ལ་བྷི་ཏྭཱ་ན, བྷ་རི་ཡཱ་ཡ ཡོ པ་ད་སྶ་ཏི [བྷ་ཡི་ཡཱ ཡོ པ་ད་སྶ་ཏི (པཱི.), བྷ་ཡི་ཡཱ ན བྷ་ཝི་སྶ་ཏི (ཀ.)];
ཏེ་ན ཛ་ཧི་སྶ་ཏ་ཏྟཱ་ནཾ, སཱ ཙེ་ཝ་སྶ ན ཧེ་སྶ་ཏི.
༨༡. ན ཝེ པི་ཡ་མྨེ་ཏི [ན པི་ཡ་མེ་ཏི (ཀ.), ན པི་ཡ་མེ་ད་ནྟི (ཀ་ཏྠ་ཙི)] ཛ་ནི་ནྡ ཏཱ་དི་སོ, ཨ་ཏྟཾ ནི་རཾ་ཀ་ཏྭཱ པི་ཡཱ་ནི སེ་ཝ་ཏི [སེ་ཝ་ཡེ (?)];
ཨ་ཏྟཱ་ཝ སེ་ཡྻོ པ་ར་མཱ ཙ སེ་ཡྻོ, ལ་བྦྷཱ པི་ཡཱ ཨོ་ཙི་ཏ་ཏྠེ་ན པ་ཙྪཱ་ཏི.
ཁ་ར་པུ་ཏྟ་ཛཱ་ཏ་ཀཾ པ་ཋ་མཾ.
༣༨༧. སཱུ་ཙི་ཛཱ་ཏ་ཀཾ (༦-༢-༢)
༨༢. ཨ་ཀ་ཀྐ་སཾ ཨ་ཕ་རུ་སཾ, ཁ་ར་དྷོ་ཏཾ སུ་པཱ་སི་ཡཾ;
སུ་ཁུ་མཾ ཏི་ཁི་ཎ་གྒ་ཉྩ, ཀོ སཱུ་ཙིཾ ཀེ་ཏུ་མི་ཙྪ་ཏི.
༨༣. སུ་མ་ཛྫ་ཉྩ སུ་པཱ་ས་ཉྩ, ཨ་ནུ་པུ་བྦཾ [ཨ་ནུ་པུ་བྦ (སཱི. སྱཱ.)] སུ་ཝ་ཊྚི་ཏཾ;
གྷ་ན་གྷཱ་ཏི་མཾ པ་ཊི་ཐ་དྡྷཾ, ཀོ སཱུ་ཙིཾ ཀེ་ཏུ་མི་ཙྪ་ཏི.
༨༤. ཨི་ཏོ དཱ་ནི པ་ཏཱ་ཡ་ནྟི, སཱུ་ཙི་ཡོ བ་ལི༹་སཱ་ནི ཙ;
ཀོ་ཡཾ ཀ་མྨཱ་ར་གཱ་མ་སྨིཾ, སཱུ་ཙིཾ ཝི་ཀྐེ་ཏུ་མི་ཙྪ་ཏི.
༨༥. ཨི་ཏོ ས་ཏྠཱ་ནི ག་ཙྪ་ནྟི, ཀ་མྨ་ནྟཱ ཝི་ཝི་དྷཱ པུ་ཐཱུ;
ཀོ་ཡཾ ཀ་མྨཱ་ར་གཱ་མ་སྨིཾ, སཱུ་ཙིཾ ཝི་ཀྐེ་ཏུ་མི་ཙྪ་ཏི [མ་ར་ཧ་ཏི (སཱི. སྱཱ. པཱི.)].
༨༦. སཱུ་ཙིཾ ཀ་མྨཱ་ར་གཱ་མ་སྨིཾ, ཝི་ཀྐེ་ཏ་བྦཱ པ་ཛཱ་ན་ཏཱ;
ཨཱ་ཙ་རི་ཡཱ་ཝ ཛཱ་ན་ནྟི [ཨཱ་ཙ་རི་ཡཱ ས་ཉྫཱ་ན་ནྟི (ཀ.), ཨཱ་ཙ་རི་ཡཱ པ་ཛཱ་ན་ནྟི (སྱཱ.), ཨཱ་ཙ་རི་ཡཱ་ཝ ས་ཉྫཱ་ན་ནྟི (པཱི.)], ཀ་མྨཾ སུ་ཀ་ཏ་དུ་ཀྐ་ཊཾ [དུ་ཀྐ་ཏཾ (སཱི. པཱི.)].
༨༧. ཨི་མཾ ཙེ [ཨི་མ་ཉྩ (སཱི. སྱཱ. པཱི.)] ཏེ པི་ཏཱ བྷ་དྡེ, སཱུ་ཙིཾ ཛ་ཉྙཱ མ་ཡཱ ཀ་ཏཾ;
ཏ་ཡཱ ཙ མཾ ནི་མ་ནྟེ་ཡྻ, ཡ་ཉྩ་ཏྠ་ཉྙཾ གྷ་རེ དྷ་ན་ནྟི.
སཱུ་ཙི་ཛཱ་ཏ་ཀཾ དུ་ཏི་ཡཾ.
༣༨༨. ཏུ་ཎྜི་ལ་ཛཱ་ཏ་ཀཾ (༦-༢-༣)
༨༨. ན་ཝ་ཚ་ནྣ་ཀེ [ན་ཝ་ཚ་ནྡ་ཀེ (སཱི. པཱི.), ན་ཝ་ཙྪ་དྡ་ཀེ (སྱཱ.)] དཱ་ནི [དོ་ཎི (ཀ.), དཱ་ནཾ, དཱ་ནེ (ཀ་ཏྠ་ཙི)] དི་ཡྻ་ཏི, པུ་ཎྞཱ་ཡཾ དོ་ཎི སུ་ཝཱ་མི་ནཱི ཋི་ཏཱ;
བ་ཧུ་ཀེ ཛ་ནེ པཱ་ས་པཱ་ཎི་ཀེ, ནོ ཙ ཁོ མེ པ་ཊི་བྷཱ་ཏི བྷུ་ཉྫི་ཏུཾ.
༨༩. ཏ་ས་སི བྷ་མ་སི ལེ་ཎ་མི་ཙྪ་སི, ཨ་ཏྟཱ་ཎོ་སི ཀུ་ཧིཾ ག་མི་སྶ་སི;
ཨ་པྤོ་སྶུ་ཀྐོ བྷུ་ཉྫ ཏུ་ཎྜི་ལ, མཾ་ས་ཏྠཱ་ཡ ཧི པོ་སི་ཏཱ་མྷ་སེ [པོ་སི་ཡཱ་མ་སེ (སཱི. སྱཱ. པཱི.)].
༩༠. ཨོ་ག་ཧ ར་ཧ་དཾ ཨ་ཀ་དྡ་མཾ, ས་བྦཾ སེ་ད་མ་ལཾ པ་ཝཱ་ཧ་ཡ;
ག་ཎྷཱ་ཧི ན་ཝཾ ཝི་ལེ་པ་ནཾ, ཡ་སྶ ག་ནྡྷོ ན ཀ་དཱ་ཙི ཚི་ཛྫ་ཏི.
༩༡. ཀ་ཏ་མོ ར་ཧ་དོ ཨ་ཀ་དྡ་མོ, ཀིཾ་སུ སེ་ད་མ་ལ་ནྟི ཝུ་ཙྩ་ཏི;
ཀ་ཏ་མ་ཉྩ ན་ཝཾ ཝི་ལེ་པ་ནཾ, ཡ་སྶ ག་ནྡྷོ ན ཀ་དཱ་ཙི ཚི་ཛྫ་ཏི.
༩༢. དྷ་མྨོ ར་ཧ་དོ ཨ་ཀ་དྡ་མོ, པཱ་པཾ སེ་ད་མ་ལ་ནྟི ཝུ་ཙྩ་ཏི;
སཱི་ལ་ཉྩ ན་ཝཾ ཝི་ལེ་པ་ནཾ, ཏ་སྶ ག་ནྡྷོ ན ཀ་དཱ་ཙི ཚི་ཛྫ་ཏི.
༩༣. ན་ནྡ་ནྟི ས་རཱི་ར་གྷཱ་ཏི་ནོ, ན ཙ ན་ནྡ་ནྟི ས་རཱི་ར་དྷཱ་རི་ནོ;
པུ་ཎྞཱ་ཡ ཙ པུ་ཎྞ་མཱ་སི་ཡཱ, ར་མ་མཱ་ནཱ་ཝ ཛ་ཧ་ནྟི ཛཱི་ཝི་ཏ་ནྟི.
ཏུ་ཎྜི་ལ་ཛཱ་ཏ་ཀཾ ཏ་ཏི་ཡཾ.
༣༨༩. སུ་ཝ་ཎྞ་ཀ་ཀྐ་ཊ་ཛཱ་ཏ་ཀཾ (༦-༢-༤)
༩༤. སི་ངྒཱི་མི་གོ ཨཱ་ཡ་ཏ་ཙ་ཀྑུ་ནེ་ཏྟོ, ཨ་ཊྛི་ཏྟ་ཙོ ཝཱ་རི་ས་ཡོ ཨ་ལོ་མོ;
ཏེ་ནཱ་བྷི་བྷཱུ་ཏོ ཀ་པ་ཎཾ རུ་དཱ་མི, ཧ་རེ ས་ཁཱ ཀི་སྶ ནུ མཾ ཛ་ཧཱ་སི.
༩༥. སོ པ་སྶ་ས་ནྟོ མ་ཧ་ཏཱ ཕ་ཎེ་ན, བྷུ་ཛ་ངྒ་མོ ཀ་ཀྐ་ཊ་མ་ཛ྄ཛྷ་པ་ཏྟོ;
ས་ཁཱ ས་ཁཱ་རཾ པ་རི་ཏཱ་ཡ་མཱ་ནོ, བྷུ་ཛ་ངྒ་མཾ ཀ་ཀྐ་ཊ་ཀོ ག་ཧེ་སི.
༩༦. ན ཝཱ་ཡ་སཾ ནོ པ་ན ཀ་ཎྷ་ས་པྤཾ, གྷཱ་ས་ཏྠི་ཀོ ཀ་ཀྐ་ཊ་ཀོ ཨ་དེ་ཡྻ;
པུ་ཙྪཱ་མི ཏཾ ཨཱ་ཡ་ཏ་ཙ་ཀྑུ་ནེ་ཏྟ, ཨ་ཐ ཀི་སྶ ཧེ་ཏུ་མྷ ཨུ་བྷོ ག་ཧཱི་ཏཱ.
༩༧. ཨ་ཡཾ པུ་རི་སོ མ་མ ཨ་ཏྠ་ཀཱ་མོ, ཡོ མཾ ག་ཧེ་ཏྭཱ་ན ད་ཀཱ་ཡ ནེ་ཏི;
ཏ་སྨིཾ མ་ཏེ དུ་ཀྑ་མ་ན་པྤ་ཀཾ མེ, ཨ་ཧ་ཉྩ ཨེ་སོ ཙ ཨུ་བྷོ ན ཧོ་མ.
༩༨. མ་མ་ཉྩ དི་སྭཱ་ན པ་ཝ་དྡྷ་ཀཱ་ཡཾ, ས་བྦོ ཛ་ནོ ཧིཾ་སི་ཏུ་མེ་ཝ མི་ཙྪེ;
སཱ་དུ་ཉྩ ཐཱུ་ལ་ཉྩ མུ་དུ་ཉྩ མཾ་སཾ, ཀཱ་ཀཱ་པི མཾ དི་སྭཱ་ན [དི་སྭ (སཱི. པཱི.)] ཝི་ཧེ་ཋ་ཡེ་ཡྻུཾ.
༩༩. ས་ཙེ་ཏ་སྶ ཧེ་ཏུ་མྷ ཨུ་བྷོ ག་ཧཱི་ཏཱ, ཨུ་ཊྛཱ་ཏུ པོ་སོ ཝི་ས་མཱ་ཝ་མཱ་མི [ཝི་ས་མཱ་ཙ་མཱ་མི (སཱི. པཱི. ཀ.)];
མ་མ་ཉྩ ཀཱ་ཀ་ཉྩ པ་མུ་ཉྩ ཁི་པྤཾ, པུ་རེ ཝི་སཾ གཱ་ལ༹ྷ་མུ་པེ་ཏི མ་ཙྩཾ.
༡༠༠. ས་པྤཾ པ་མོ་ཀྑཱ་མི ན ཏཱ་ཝ ཀཱ་ཀཾ, པ་ཊི་བ་ནྡྷ་ཀོ [པ་ཊི་བ་དྡྷ་ཀོ (སཱི. པཱི.)] ཧོ་ཧི་ཏི [ཧོ་ཏི ཧི (སྱཱ.)] ཏཱ་ཝ ཀཱ་ཀོ;
པུ་རི་ས་ཉྩ དི་སྭཱ་ན སུ་ཁིཾ ཨ་རོ་གཾ, ཀཱ་ཀཾ པ་མོ་ཀྑཱ་མི ཡ་ཐེ་ཝ ས་པྤཾ.
༡༠༡. ཀཱ་ཀོ ཏ་དཱ དེ་ཝ་ད་ཏྟོ ཨ་ཧོ་སི, མཱ་རོ པ་ན ཀ་ཎྷ་ས་པྤོ ཨ་ཧོ་སི;
ཨཱ་ན་ནྡ་བྷ་དྡོ ཀ་ཀྐ་ཊ་ཀོ ཨ་ཧོ་སི, ཨ་ཧཾ ཏ་དཱ བྲཱ་ཧྨ་ཎོ ཧོ་མི ས་ཏྠཱ་ཏི [ཏ་ཏྠཱ་ཏི (སཱི. པཱི.)].
སུ་ཝ་ཎྞ་ཀ་ཀྐ་ཊ་ཛཱ་ཏ་ཀཾ ཙ་ཏུ་ཏྠཾ.
༣༩༠. མ་ཡ྄ཧ་ཀ་ཛཱ་ཏ་ཀཾ (༦-༢-༥)
༡༠༢. ས་ཀུ་ཎོ མ་ཡ྄ཧ་ཀོ ནཱ་མ, གི་རི་སཱ་ནུ་ད་རཱི་ཙ་རོ;
པ་ཀྐཾ པི་པྥ་ལི་མཱ་རུ་ཡ྄ཧ, མ་ཡ྄ཧཾ མ་ཡ྄ཧ་ནྟི ཀ་ནྡ་ཏི.
༡༠༣. ཏ་སྶེ་ཝཾ ཝི་ལ་པ་ནྟ་སྶ, དི་ཛ་ས་ངྒྷཱ ས་མཱ་ག་ཏཱ;
བྷུ་ཏྭཱ་ན པི་པྥ་ལིཾ ཡ་ནྟི, ཝི་ལ་པ་ཏྭེ་ཝ སོ དི་ཛོ.
༡༠༤. ཨེ་ཝ་མེ་ཝ ཨི་དྷེ་ཀ་ཙྩོ, ས་ངྒྷ་རི་ཏྭཱ བ་ཧུཾ དྷ་ནཾ;
ནེ་ཝ་ཏྟ་ནོ ན ཉཱ་ཏཱི་ནཾ, ཡ་ཐོ་དྷིཾ པ་ཊི་པ་ཛྫ་ཏི.
༡༠༥. ན སོ ཨ་ཙྪཱ་ད་ནཾ བྷ་ཏྟཾ, ན མཱ་ལཾ ན ཝི་ལེ་པ་ནཾ;
ཨ་ནུ་བྷོ་ཏི [ནཱ་ནུ་བྷོ་ཏི (སྱཱ. ཀ.)] ས་ཀིཾ ཀི་ཉྩི, ན ས་ངྒ་ཎྷཱ་ཏི ཉཱ་ཏ་ཀེ.
༡༠༦. ཏ་སྶེ་ཝཾ ཝི་ལ་པ་ནྟ་སྶ, མ་ཡ྄ཧཾ མ་ཡ྄ཧ་ནྟི ར་ཀྑ་ཏོ;
རཱ་ཛཱ་ནོ ཨ་ཐ ཝཱ ཙོ་རཱ, དཱ་ཡ་དཱ ཡེ ཝ [ཡེ ཙ (སྱཱ. ཀ.)] ཨ་པྤི་ཡཱ;
དྷ་ན་མཱ་དཱ་ཡ ག་ཙྪ་ནྟི, ཝི་ལ་པ་ཏྭེ་ཝ སོ ན་རོ.
༡༠༧. དྷཱི་རོ [དྷཱི་རོ ཙ (སཱི.)] བྷོ་གེ ཨ་དྷི་ག་མྨ, ས་ངྒ་ཎྷཱ་ཏི ཙ ཉཱ་ཏ་ཀེ;
ཏེ་ན སོ ཀི་ཏྟིཾ པ་པྤོ་ཏི, པེ་ཙྩ ས་གྒེ པ་མོ་ད་ཏཱི་ཏི [ས་གྒེ ཙ མོ་ད་ཏཱི་ཏི (སཱི. པཱི.)].
མ་ཡ྄ཧ་ཀ་ཛཱ་ཏ་ཀཾ པ་ཉྩ་མཾ.
༣༩༡. ཝི་ཛྫཱ་དྷ་ར་ཛཱ་ཏ་ཀཾ (༦-༢-༦)
༡༠༨. དུ་བྦ་ཎྞ་རཱུ་པཾ ཏུ་ཝ་མ་རི་ཡ་ཝ་ཎྞཱི, པུ་ར་ཀྑ་ཏྭཱ [པུ་ར་ཀྑི་ཏྭཱ (སྱཱ. ཀ.)] པ་ཉྫ་ལི་ཀོ ན་མ་སྶ་སི;
སེ་ཡྻོ ནུ ཏེ སོ ཨུ་ད་ཝཱ [ཨུ་དཱ་ཧུ (སྱཱ. ཀ.)] ས་རི་ཀྑོ, ནཱ་མཾ པ་ར་སྶ་ཏྟ་ནོ ཙཱ་པི བྲཱུ་ཧི.
༡༠༩. ན ནཱ་མ་གོ་ཏྟཾ ག་ཎྷ་ནྟི རཱ་ཛ, ས་མྨ་གྒ་ཏཱ་ནུ་ཛྫུ་ག་ཏཱ་ན [ས་མ་གྒ་ཏཱ་ནུ་ཛྫུ་ག་ཏཱ་ན (སྱཱ.), ས་མུ་གྒ་ཏཱ་ནུ་ཛྫུ་ག་ཏཱ་ན (ཀ.)] དེ་ཝཱ;
ཨ་ཧ་ཉྩ ཏེ ནཱ་མ་དྷེ་ཡྻཾ ཝ་དཱ་མི, ས་ཀྐོ་ཧ་མ་སྨཱི ཏི་ད་སཱ་ན་མི་ནྡོ.
༡༡༠. ཡོ དི་སྭཱ བྷི་ཀྑུཾ ཙ་ར་ཎཱུ་པ་པ་ནྣཾ, པུ་ར་ཀྑ་ཏྭཱ པ་ཉྫ་ལི་ཀོ ན་མ་སྶ་ཏི;
པུ་ཙྪཱ་མི ཏཾ དེ་ཝ་རཱ་ཛེ་ཏ་མ་ཏྠཾ, ཨི་ཏོ ཙུ་ཏོ ཀིཾ ལ་བྷ་ཏེ སུ་ཁཾ སོ.
༡༡༡. ཡོ དི་སྭཱ བྷི་ཀྑུཾ ཙ་ར་ཎཱུ་པ་པ་ནྣཾ, པུ་ར་ཀྑ་ཏྭཱ པ་ཉྫ་ལི་ཀོ ན་མ་སྶ་ཏི;
དི་ཊྛེ་ཝ དྷ་མྨེ ལ་བྷ་ཏེ པ་སཾ་སཾ, ས་གྒ་ཉྩ སོ ཡཱ་ཏི ས་རཱི་ར་བྷེ་དཱ.
༡༡༢. ལ་ཀྑཱི ཝ་ཏ མེ ཨུ་ད་པཱ་དི ཨ་ཛྫ, ཡཾ ཝཱ་ས་ཝཾ བྷཱུ་ཏ་པ་ཏི་དྡ་སཱ་མ;
བྷི་ཀྑུ་ཉྩ དི་སྭཱ་ན ཏུ་ཝ་ཉྩ ས་ཀྐ, ཀཱ་ཧཱ་མི པུ་ཉྙཱ་ནི ཨ་ན་པྤ་ཀཱ་ནི.
༡༡༣. ཨ་དྡྷཱ ཧ་ཝེ སེ་ཝི་ཏ་བྦཱ ས་པ་ཉྙཱ, བ་ཧུ་སྶུ་ཏཱ ཡེ བ་ཧུ་ཋཱ་ན་ཙི་ནྟི་ནོ;
བྷི་ཀྑུ་ཉྩ དི་སྭཱ་ན མ་མ་ཉྩ རཱ་ཛ, ཀ་རོ་ཧི པུ་ཉྙཱ་ནི ཨ་ན་པྤ་ཀཱ་ནི.
༡༡༤. ཨ་ཀྐོ་དྷ་ནོ ནི་ཙྩ་པ་ས་ནྣ་ཙི་ཏྟོ, ས་བྦཱ་ཏི་ཐཱི་ཡཱ་ཙ་ཡོ་གོ བྷ་ཝི་ཏྭཱ;
ནི་ཧ་ཙྩ མཱ་ནཾ ཨ་བྷི་ཝཱ་ད་ཡི་སྶཾ, སུ་ཏྭཱ་ན དེ་ཝི་ནྡ སུ་བྷཱ་སི་ཏཱ་ནཱི་ཏི.
ཝི་ཛྫཱ་དྷ་ར [དྷ་ཛ་ཝི་ཧེ་ཋ་ཀ (སཱི. པཱི.), པ་བྦ་ཛི་ཏ་ཝི་ཧེ་ཋ་ཀ (སྱཱ.)] ཛཱ་ཏ་ཀཾ ཚ་ཊྛཾ.
༣༩༢. སི་ངྒྷ་པུ་པྥ་ཛཱ་ཏ་ཀཾ (༦-༢-༧)
༡༡༥. ཡ་མེ་ཏཾ [ཡ་མེ་ཀཾ (པཱི.)] ཝཱ་རི་ཛཾ པུ་པྥཾ, ཨ་དི་ནྣཾ ཨུ་པ་སི་ངྒྷ་སི;
ཨེ་ཀ་ངྒ་མེ་ཏཾ ཐེ་ཡྻཱ་ནཾ, ག་ནྡྷ་ཐེ་ནོ་སི མཱ་རི་ས.
༡༡༦. ན ཧ་རཱ་མི ན བྷ་ཉྫཱ་མི, ཨཱ་རཱ སི་ངྒྷཱ་མི ཝཱ་རི་ཛཾ;
ཨ་ཐ ཀེ་ན ནུ ཝ་ཎྞེ་ན, ག་ནྡྷ་ཐེ་ནོ་ཏི ཝུ་ཙྩ་ཏི.
༡༡༧. ཡོ་ཡཾ བྷི་སཱ་ནི ཁ་ཎ་ཏི, པུ་ཎྜ་རཱི་ཀཱ་ནི བྷ་ཉྫ་ཏི;
ཨེ་ཝཾ ཨཱ་ཀི་ཎྞ་ཀ་མྨ་ནྟོ, ཀ་སྨཱ ཨེ་སོ ན ཝུ་ཙྩ་ཏི.
༡༡༨. ཨཱ་ཀི་ཎྞ་ལུ་དྡོ པུ་རི་སོ, དྷཱ་ཏི་ཙེ་ལཾ་ཝ མ་ཀྑི་ཏོ;
ཏ་སྨིཾ མེ ཝ་ཙ་ནཾ ན་ཏྠི, ཏ་ཉྩཱ་ར་ཧཱ་མི ཝ་ཏྟ་ཝེ.
༡༡༩. ཨ་ན་ངྒ་ཎ་སྶ པོ་ས་སྶ, ནི་ཙྩཾ སུ་ཙི་ག་ཝེ་སི་ནོ;
ཝཱ་ལ་གྒ་མ་ཏྟཾ པཱ་པ་སྶ, ཨ་བྦྷཱ་མ་ཏྟཾ་ཝ ཁཱ་ཡ་ཏི.
༡༢༠. ཨ་དྡྷཱ མཾ ཡ་ཀྑ ཛཱ་ནཱ་སི, ཨ་ཐོ མཾ ཨ་ནུ་ཀ་མྤ་སི;
པུ་ན་པི ཡ་ཀྑ ཝ་ཛྫཱ་སི, ཡ་དཱ པ་སྶ་སི ཨེ་དི་སཾ.
༡༢༡. ནེ་ཝ ཏཾ ཨུ་པ་ཛཱི་ཝཱ་མི, ན་པི ཏེ བྷ་ཏ་ཀཱ་མྷ་སེ [བྷ་ཏ་ཀ་མྷ་སེ (སཱི. པཱི.), བྷ་ཏི་ཀ་མྷ་སེ (སྱཱ.)];
ཏྭ་མེ་ཝ བྷི་ཀྑུ ཛཱ་ནེ་ཡྻ, ཡེ་ན ག་ཙྪེ་ཡྻ སུ་གྒ་ཏི་ནྟི.
སི་ངྒྷ་པུ་པྥ [བྷི་ས་པུ་པྥ (སཱི. པཱི.), ཨུ་པ་སི་ངྒྷ་པུ་པྥ (སྱཱ.)] ཛཱ་ཏ་ཀཾ ས་ཏྟ་མཾ.
༣༩༣. ཝི་གྷཱ་སཱ་ད་ཛཱ་ཏ་ཀཾ (༦-༢-༨)
༡༢༢. སུ་སུ་ཁཾ ཝ་ཏ ཛཱི་ཝ་ནྟི, ཡེ ཛ་ནཱ ཝི་གྷཱ་སཱ་དི་ནོ;
དི་ཊྛེ་ཝ དྷ་མྨེ པཱ་སཾ་སཱ, ས་མྤ་རཱ་ཡེ ཙ སུ་གྒ་ཏཱི.
༡༢༣. སུ་ཀ་སྶ [སུ་ཝ་སྶ (སཱི. སྱཱ. པཱི.)] བྷཱ་ས་མཱ་ན་སྶ, ན ནི་སཱ་མེ་ཐ པ་ཎྜི་ཏཱ;
ཨི་དཾ སུ་ཎཱ་ཐ སོ་ད་རི་ཡཱ, ཨ་མྷེ་ཝཱ་ཡཾ པ་སཾ་ས་ཏི.
༡༢༤. ནཱ་ཧཾ ཏུ་མྷེ པ་སཾ་སཱ་མི, ཀུ་ཎ་པཱ་དཱ སུ་ཎཱ་ཐ མེ;
ཨུ་ཙྪི་ཊྛ་བྷོ་ཛི་ནོ [བྷོ་ཛ་ནཱ (ཀ.)] ཏུ་མྷེ, ན ཏུ་མྷེ ཝི་གྷཱ་སཱ་དི་ནོ.
༡༢༥. ས་ཏྟ་ཝ་སྶཱ པ་བྦ་ཛི་ཏཱ, མེ་ཛ྄ཛྷཱ་ར་ཉྙེ [མ་ཛ྄ཛྷེ་ར་ཉྙེ (ཀ.)] སི་ཁ་ཎྜི་ནོ;
ཝི་གྷཱ་སེ་ནེ་ཝ ཡཱ་པེ་ནྟཱ, མ་ཡཾ ཙེ བྷོ་ཏོ གཱ་ར་ཡ྄ཧཱ;
ཀེ ནུ བྷོ་ཏོ པ་སཾ་སི་ཡཱ.
༡༢༦. ཏུ་མྷེ སཱི་ཧཱ་ནཾ བྱ་གྒྷཱ་ནཾ, ཝཱ་ལཱ༹་ན་ཉྩཱ་ཝ་སི་ཊྛ་ཀཾ;
ཨུ་ཙྪི་ཊྛེ་ནེ་ཝ ཡཱ་པེ་ནྟཱ, མ་ཉྙི་ཝ྄ཧོ ཝི་གྷཱ་སཱ་དི་ནོ.
༡༢༧. ཡེ བྲཱ་ཧྨ་ཎ་སྶ ས་མ་ཎ་སྶ, ཨ་ཉྙ་སྶ ཝཱ [ཨ་ཉྙ་སྶ ཙ (སཱི. སྱཱ.), ཨ་ཉྙ་སྶེ་ཝ (པཱི.)] ཝ་ནི་བྦི་ནོ [ཝ་ཎི་བྦི་ནོ (སཱི. སྱཱ.)];
ད་ཏྭཱ་ཝ [ད་ཏྭཱ་ན (པཱི. ཀ.)] སེ་སཾ བྷུ་ཉྫ་ནྟི, ཏེ ཛ་ནཱ ཝི་གྷཱ་སཱ་དི་ནོ་ཏི.
ཝི་གྷཱ་སཱ་ད་ཛཱ་ཏ་ཀཾ ཨ་ཊྛ་མཾ.
༣༩༤. ཝ་ཊྚ་ཀ་ཛཱ་ཏ་ཀཾ (༦-༢-༩)
༡༢༨. པ་ཎཱི་ཏཾ བྷུ་ཉྫ་སེ བྷ་ཏྟཾ, ས་པྤི་ཏེ་ལ་ཉྩ མཱ་ཏུ་ལ;
ཨ་ཐ ཀེ་ན ནུ ཝ་ཎྞེ་ན, ཀི་སོ ཏྭ་མ་སི ཝཱ་ཡ་ས.
༡༢༩. ཨ་མི་ཏྟ་མ་ཛ྄ཛྷེ ཝ་ས་ཏོ, ཏེ་སུ ཨཱ་མི་ས་མེ་ས་ཏོ;
ནི་ཙྩཾ ཨུ་བྦི་གྒ་ཧ་ད་ཡ་སྶ, ཀུ་ཏོ ཀཱ་ཀ་སྶ ད་ལ༹ྷི་ཡཾ.
༡༣༠. ནི་ཙྩཾ ཨུ་བྦེ་གི་ནོ [ཨུ་བྦི་གྒི་ནོ (སྱཱ. ཀ.), ཨུ་བྦེ་དྷི་ནོ (སཱི.)] ཀཱ་ཀཱ, དྷ་ངྐཱ པཱ་པེ་ན ཀ་མྨུ་ནཱ;
ལ་དྡྷོ པི་ཎྜོ ན པཱི་ཎེ་ཏི, ཀི་སོ ཏེ་ན་སྨི ཝ་ཊྚ་ཀ.
༡༣༡. ལཱུ་ཁཱ་ནི ཏི་ཎ་བཱི་ཛཱ་ནི, ཨ་པྤ་སྣེ་ཧཱ་ནི བྷུ་ཉྫ་སི;
ཨ་ཐ ཀེ་ན ནུ ཝ་ཎྞེ་ན, ཐཱུ་ལོ ཏྭ་མ་སི ཝ་ཊྚ་ཀ.
༡༣༢. ཨ་པྤི་ཙྪཱ ཨ་པྤ་ཙི་ནྟཱ་ཡ, ཨ་དཱུ་ར་ག་མ་ནེ་ན ཙ;
ལ་དྡྷཱ་ལ་དྡྷེ་ན ཡཱ་པེ་ནྟོ, ཐཱུ་ལོ ཏེ་ན་སྨི ཝཱ་ཡ་ས.
༡༣༣. ཨ་པྤི་ཙྪ་སྶ ཧི པོ་ས་སྶ, ཨ་པྤ་ཙི་ནྟ་སུ་ཁ་སྶ [ཨ་པྤ་ཙི་ནྟི་སུ་ཁ་སྶ (སཱི. སྱཱ. པཱི.)] ཙ;
སུ་ས་ངྒ་ཧི་ཏ་མཱ་ན་སྶ [སུ་ས་ངྒ་ཧི་ཏ་པ་མཱ་ཎ་སྶ (སཱི. སྱཱ. པཱི.)], ཝུ་ཏྟཱི སུ་ས་མུ་དཱ་ན་ཡཱ་ཏི.
ཝ་ཊྚ་ཀ་ཛཱ་ཏ་ཀཾ ན་ཝ་མཾ.
༣༩༥. པཱ་རཱ་ཝ་ཏ་ཛཱ་ཏ་ཀཾ (༦-༢-༡༠)
༡༣༤. ཙི་ར་སྶཾ ཝ་ཏ པ་སྶཱ་མི, ས་ཧཱ་ཡཾ མ་ཎི་དྷཱ་རི་ནཾ;
སུ་ཀ་ཏཱ [སུ་ཀ་ཏཱ་ཡ (སཱི. པཱི.)] མ་སྶུ་ཀུ་ཏྟི་ཡཱ, སོ་བྷ་ཏེ ཝ་ཏ མེ ས་ཁཱ.
༡༣༥. པ་རཱུ་ལ༹ྷ་ཀ་ཙྪ་ན་ཁ་ལོ་མོ, ཨ་ཧཾ ཀ་མྨེ་སུ བྱཱ་ཝ་ཊོ;
ཙི་ར་སྶཾ ནྷཱ་པི་ཏཾ ལ་དྡྷཱ, ལོ་མཾ ཏཾ ཨ་ཛྫཾ ཧཱ་ར་ཡིཾ [ཨ་པ་ཧཱ་ར་ཡིཾ (སཱི. པཱི.)].
༡༣༦. ཡཾ ནུ ལོ་མཾ ཨ་ཧཱ་རེ་སི, དུ་ལླ་བྷཾ ལ་དྡྷ ཀ་པྤ་ཀཾ;
ཨ་ཐ ཀི་ཉྩ་ར་ཧི ཏེ ས་མྨ, ཀ་ཎྛེ ཀི་ཎི་ཀི་ཎཱ་ཡ་ཏི [ཨི་དཾ ཀ་ཎྛེ ཀི་ཎཱ་ཡ་ཏི (ཀ.), ཀ་ཎྛེ ཀིཾ་ནི་ཀི་ལཱ་ཡ་ཏི (སྱཱ.)].
༡༣༧. མ་ནུ་སྶ་སུ་ཁུ་མཱ་ལཱ་ནཾ, མ་ཎི ཀ་ཎྛེ་སུ ལ་མྦ་ཏི;
ཏེ་སཱ་ཧཾ ཨ་ནུ་སི་ཀྑཱ་མི, མཱ ཏྭཾ མ་ཉྙི ད་ཝཱ ཀ་ཏཾ.
༡༣༨. ས་ཙེ་པི་མཾ པི་ཧ་ཡ་སི, མ་སྶུ་ཀུ་ཏྟིཾ སུ་ཀཱ་རི་ཏཾ;
ཀཱ་ར་ཡི་སྶཱ་མི ཏེ ས་མྨ, མ་ཎི་ཉྩཱ་པི ད་དཱ་མི ཏེ.
༡༣༩. ཏྭ་ཉྙེ་ཝ མ་ཎི་ནཱ ཚ་ནྣོ, སུ་ཀ་ཏཱ་ཡ ཙ མ་སྶུ་ཡཱ;
ཨཱ་མ་ནྟ ཁོ ཏཾ ག་ཙྪཱ་མི, པི་ཡཾ མེ ཏ་ཝ ད་སྶ་ན་ནྟི.