༡. ཨ་ཝཱ་རི་ཡ་ཝ་གྒོ
༣༧༦. ཨ་ཝཱ་རི་ཡ་ཛཱ་ཏ་ཀཾ (༦-༡-༡)
༡. མཱ་སུ ཀུ་ཛ྄ཛྷ བྷཱུ་མི་པ་ཏི, མཱ་སུ ཀུ་ཛ྄ཛྷ ར་ཐེ་ས་བྷ;
ཀུ་དྡྷཾ ཨ་པྤ་ཊི་ཀུ་ཛ྄ཛྷ་ནྟོ, རཱ་ཛཱ ར་ཊྛ་སྶ པཱུ་ཛི་ཏོ.
༢. གཱ་མེ ཝཱ ཡ་དི ཝཱ་ར་ཉྙེ, ནི་ནྣེ ཝཱ ཡ་དི ཝཱ ཐ་ལེ;
ས་བྦ་ཏྠ ཨ་ནུ་སཱ་སཱ་མི, མཱ་སུ ཀུ་ཛ྄ཛྷ [མཱ་སྶུ ཀུ་ཛ྄ཛྷི (སཱི. པཱི.)] ར་ཐེ་ས་བྷ.
༣. ཨ་ཝཱ་རི་ཡ་པི་ཏཱ ནཱ་མ, ཨ་ཧུ ག་ངྒཱ་ཡ ནཱ་ཝི་ཀོ;
པུ་བྦེ ཛ་ནཾ ཏཱ་རེ་ཏྭཱ་ན, པ་ཙྪཱ ཡཱ་ཙ་ཏི ཝེ་ཏ་ནཾ;
ཏེ་ན་སྶ བྷ་ཎྜ་ནཾ ཧོ་ཏི, ན ཙ བྷོ་གེ་ཧི ཝ་ཌྜྷ་ཏི.
༤. ཨ་ཏི་ཎྞཾ་ཡེ་ཝ ཡཱ་ཙ་སྶུ, ཨ་པཱ་རཾ ཏཱ་ཏ ནཱ་ཝི་ཀ;
ཨ་ཉྙོ ཧི ཏི་ཎྞ་སྶ མ་ནོ, ཨ་ཉྙོ ཧོ་ཏི པཱ་རེ་སི་ནོ [ཏ་རེ་སི་ནོ (སཱི. པཱི.), ཏི་རེ་སི་ནོ (སྱཱ.)].
༥. གཱ་མེ ཝཱ ཡ་དི ཝཱ་ར་ཉྙེ, ནི་ནྣེ ཝཱ ཡ་དི ཝཱ ཐ་ལེ;
ས་བྦ་ཏྠ ཨ་ནུ་སཱ་སཱ་མི, མཱ་སུ ཀུ་ཛ྄ཛྷི་ཏྠ ནཱ་ཝི་ཀ.
༦. ཡཱ་ཡེ་ཝཱ་ནུ་སཱ་ས་ནི་ཡཱ, རཱ་ཛཱ གཱ་མ་ཝ་རཾ ཨ་དཱ;
ཏཱ་ཡེ་ཝཱ་ནུ་སཱ་ས་ནི་ཡཱ, ནཱ་ཝི་ཀོ པ་ཧ་རཱི མུ་ཁཾ.
༧. བྷ་ཏྟཾ བྷི་ནྣཾ ཧ་ཏཱ བྷ་རི་ཡཱ, ག་བྦྷོ ཙ པ་ཏི་ཏོ ཚ་མཱ;
མི་གོ་ཝ ཛཱ་ཏ་རཱུ་པེ་ན, ན ཏེ་ན་ཏྠཾ ཨ་བ་ནྡྷི སཱུ་ཏི [ཨ་ཝ་ཌྜྷི་ཏུ་ནྟི (སཱི. སྱཱ.), ཨ་ཝ་ཌྜྷི སཱུ་ཏི (?)].
ཨ་ཝཱ་རི་ཡ་ཛཱ་ཏ་ཀཾ པ་ཋ་མཾ.
༣༧༧. སེ་ཏ་ཀེ་ཏུ་ཛཱ་ཏ་ཀཾ (༦-༡-༢)
༨. མཱ ཏཱ་ཏ ཀུ་ཛ྄ཛྷི ན ཧི སཱ་དྷུ ཀོ་དྷོ, བ་ཧུ་མྤི ཏེ ཨ་དི་ཊྛ་མ་སྶུ་ཏ་ཉྩ;
མཱ་ཏཱ པི་ཏཱ དི་ས་ཏཱ [དི་སཱ ཏཱ་ཏ (སྱཱ.), དི་སཱ ཏཱ (པཱི.)] སེ་ཏ་ཀེ་ཏུ, ཨཱ་ཙ་རི་ཡ་མཱ་ཧུ དི་ས་ཏཾ པ་ས་ཏྠཱ.
༩. ཨ་གཱ་རི་ནོ ཨ་ནྣ་ད་པཱ་ན་ཝ་ཏྠ་དཱ [ཨ་ནྣ་པཱ་ན་ཝ་ཏྠ་དཱ (སྱཱ. ཀ.)], ཨ་ཝ྄ཧཱ་ཡི་ཀཱ ཏ་མྤི དི་སཾ ཝ་ད་ནྟི;
ཨེ་སཱ དི་སཱ པ་ར་མཱ སེ་ཏ་ཀེ་ཏུ, ཡཾ པ་ཏྭཱ དུ་ཀྑཱི སུ་ཁི་ནོ བྷ་ཝ་ནྟི.
༡༠. ཁ་རཱ་ཛི་ནཱ ཛ་ཊི་ལཱ པ་ངྐ་ད་ནྟཱ, དུ་མྨ་ཀྑ་རཱུ་པཱ [དུ་མུ་ཀྑ་རཱུ་པཱ (སཱི. སྱཱ.), དུ་མྨུ་ཀྑ་རཱུ་པཱ (པཱི. ཀ.)] ཡེ་མེ ཛ་པྤ་ནྟི མ་ནྟེ;
ཀ་ཙྩི ནུ ཏེ མཱ་ནུ་ས་ཀེ པ་ཡོ་གེ, ཨི་དཾ ཝི་དཱུ པ་རི་མུ་ཏྟཱ ཨ་པཱ་ཡཱ.
༡༡. པཱ་པཱ་ནི ཀ་མྨཱ་ནི ཀ་ཏྭཱ་ན རཱ་ཛ, བ་ཧུ་སྶུ་ཏོ ཙེ ན [བ་ཧུ་སྶུ་ཏོ ནེ་ཝ (སཱི. སྱཱ.)] ཙ་རེ་ཡྻ དྷ་མྨཾ;
ས་ཧ་སྶ་ཝེ་དོ་པི ན ཏཾ པ་ཊི་ཙྩ, དུ་ཀྑཱ པ་མུ་ཉྩེ ཙ་ར་ཎཾ ཨ་པ་ཏྭཱ.
༡༢. ས་ཧ་སྶ་ཝེ་དོ་པི ན ཏཾ པ་ཊི་ཙྩ, དུ་ཀྑཱ པ་མུ་ཉྩེ ཙ་ར་ཎཾ ཨ་པ་ཏྭཱ;
མ་ཉྙཱ་མི ཝེ་དཱ ཨ་ཕ་ལཱ བྷ་ཝ་ནྟི, ས་སཾ་ཡ་མཾ ཙ་ར་ཎ་མེ་ཝ [ཙ་ར་ཎ་ཉྙེ་ཝ (སཱི. སྱཱ. པཱི.)] ས་ཙྩཾ.
༡༣. ན ཧེ་ཝ ཝེ་དཱ ཨ་ཕ་ལཱ བྷ་ཝ་ནྟི, ས་སཾ་ཡ་མཾ ཙ་ར་ཎ་མེ་ཝ ས་ཙྩཾ;
ཀི་ཏྟི་ཉྷི པ་པྤོ་ཏི ཨ་དྷི་ཙྩ ཝེ་དེ, ས་ནྟིཾ པུ་ཎེ་ཏི [ས་ནྟཾ པུ་ནེ’ཏི (སཱི. པཱི.)] ཙ་ར་ཎེ་ན ད་ནྟོ་ཏི.
སེ་ཏ་ཀེ་ཏུ་ཛཱ་ཏ་ཀཾ དུ་ཏི་ཡཾ.
༣༧༨. ད་རཱི་མུ་ཁ་ཛཱ་ཏ་ཀཾ (༦-༡-༣)
༡༤. པ་ངྐོ ཙ ཀཱ་མཱ པ་ལི་པོ ཙ ཀཱ་མཱ, བྷ་ཡ་ཉྩ མེ་ཏཾ ཏི་མཱུ་ལཾ པ་ཝུ་ཏྟཾ;
ར་ཛོ ཙ དྷཱུ་མོ ཙ མ་ཡཱ པ་ཀཱ་སི་ཏཱ, ཧི་ཏྭཱ ཏུ་ཝཾ པ་བྦ་ཛ བྲ་ཧྨ་ད་ཏྟ.
༡༥. ག་དྷི་ཏོ [ག་ཐི་ཏོ (སཱི.)] ཙ ར་ཏྟོ ཙ ཨ་དྷི་མུ་ཙྪི་ཏོ ཙ, ཀཱ་མེ་སྭ་ཧཾ བྲཱ་ཧྨ་ཎ བྷིཾ་ས་རཱུ་པཾ;
ཏཾ ནུ་སྶ་ཧེ ཛཱི་ཝི་ཀ་ཏྠོ པ་ཧཱ་ཏུཾ, ཀཱ་ཧཱ་མི པུ་ཉྙཱ་ནི ཨ་ན་པྤ་ཀཱ་ནི.
༡༦. ཡོ ཨ་ཏྠ་ཀཱ་མ་སྶ ཧི་ཏཱ་ནུ་ཀ་མྤི་ནོ, ཨོ་ཝ་ཛྫ་མཱ་ནོ ན ཀ་རོ་ཏི སཱ་ས་ནཾ;
ཨི་ད་མེ་ཝ སེ་ཡྻོ ཨི་ཏི མ་ཉྙ་མཱ་ནོ, པུ་ན་པྤུ་ནཾ ག་བྦྷ་མུ་པེ་ཏི མ་ནྡོ.
༡༧. སོ གྷོ་ར་རཱུ་པཾ ནི་ར་ཡཾ ཨུ་པེ་ཏི, སུ་བྷཱ་སུ་བྷཾ མུ་ཏྟ་ཀ་རཱི་ས་པཱུ་རཾ;
ས་ཏྟཱ ས་ཀཱ་ཡེ ན ཛ་ཧ་ནྟི གི་དྡྷཱ, ཡེ ཧོ་ནྟི ཀཱ་མེ་སུ ཨ་ཝཱི་ཏ་རཱ་གཱ.
༡༨. མཱི་ལ༹ྷེ་ན ལི་ཏྟཱ རུ་ཧི་རེ་ན མ་ཀྑི་ཏཱ, སེ་མྷེ་ན ལི་ཏྟཱ ཨུ་པ་ནི་ཀྑ་མ་ནྟི;
ཡཾ ཡ་ཉྷི ཀཱ་ཡེ་ན ཕུ་ས་ནྟི ཏཱ་ཝ་དེ, ས་བྦཾ ཨ་སཱ་ཏཾ དུ་ཁ་མེ་ཝ ཀེ་ཝ་ལཾ.
༡༩. དི་སྭཱ ཝ་དཱ་མི ན ཧི ཨ་ཉྙ་ཏོ ས་ཝཾ, པུ་བྦེ་ནི་ཝཱ་སཾ བ་ཧུ་ཀཾ ས་རཱ་མི;
ཙི་ཏྲཱ་ཧི གཱ་ཐཱ་ཧི སུ་བྷཱ་སི་ཏཱ་ཧི, ད་རཱི་མུ་ཁོ ནི་ཛ྄ཛྷཱ་པ་ཡི སུ་མེ་དྷ་ནྟི.
ད་རཱི་མུ་ཁ་ཛཱ་ཏ་ཀཾ ཏ་ཏི་ཡཾ.
༣༧༩. ནེ་རུ་ཛཱ་ཏ་ཀཾ (༦-༡-༤)
༢༠. ཀཱ་ཀོ་ལཱ ཀཱ་ཀ་ས་ངྒྷཱ ཙ, མ་ཡ་ཉྩ པ་ཏ་ཏཾ ཝ་རཱ [ཝ་ར (ཀ.) མ་ཡ་ནྟི་པ་ད་སྶ ཧི ཝི་སེ་ས་ནཾ];
ས་བྦེ་ཝ ས་དི་སཱ ཧོ་མ, ཨི་མཾ ཨཱ་ག་མྨ པ་བྦ་ཏཾ.
༢༡. ཨི་དྷ སཱི་ཧཱ ཙ བྱ་གྒྷཱ ཙ, སི་ངྒཱ་ལཱ ཙ མི་གཱ་དྷ་མཱ;
ས་བྦེ་ཝ ས་དི་སཱ ཧོ་ནྟི, ཨ་ཡཾ ཀོ ནཱ་མ པ་བྦ་ཏོ.
༢༢. ཨི་མཾ ནེ་རཱུ་ཏི [ནེ་རུ་ནྟི (སཱི. སྱཱ.)] ཛཱ་ན་ནྟི, མ་ནུ་སྶཱ པ་བྦ་ཏུ་ཏྟ་མཾ;
ཨི་དྷ ཝ་ཎྞེ་ན ས་མྤ་ནྣཱ, ཝ་ས་ནྟི ས་བྦ་པཱ་ཎི་ནོ.
༢༣. ཨ་མཱ་ན་ནཱ ཡ་ཏྠ སི་ཡཱ, ས་ནྟཱ་ནཾ ཝཱ ཝི་མཱ་ན་ནཱ;
ཧཱི་ན་ས་མྨཱ་ན་ནཱ ཝཱ་པི, ན ཏ་ཏྠ ཝ་ས་ཏིཾ ཝ་སེ [ཝ་ས་ཏཱི ཝ་སེ (སྱཱ.), ཝ་ས དི་ཝ་སེ (པཱི.)].
༢༤. ཡ་ཏྠཱ་ལ་སོ ཙ ད་ཀྑོ ཙ, སཱུ་རོ བྷཱི་རུ ཙ པཱུ་ཛི་ཡཱ;
ན ཏ་ཏྠ ས་ནྟོ ཝ་ས་ནྟི, ཨ་ཝི་སེ་ས་ཀ་རེ ན་རེ [ན་གེ (སཱི. སྱཱ. པཱི.)].
༢༥. ནཱ་ཡཾ ནེ་རུ ཝི་བྷ་ཛ་ཏི, ཧཱི་ན་ཨུ་ཀྐ་ཊྛ་མ་ཛ྄ཛྷི་མེ;
ཨ་ཝི་སེ་ས་ཀ་རོ ནེ་རུ, ཧ་ནྡ ནེ་རུཾ ཛ་ཧཱ་མ་སེ་ཏི.
ནེ་རུ་ཛཱ་ཏ་ཀཾ ཙ་ཏུ་ཏྠཾ.
༣༨༠. ཨཱ་ས་ངྐ་ཛཱ་ཏ་ཀཾ (༦-༡-༥)
༢༦. ཨཱ་སཱ་ཝ་ཏཱི ནཱ་མ ལ་ཏཱ, ཛཱ་ཏཱ ཙི་ཏྟ་ལ་ཏཱ་ཝ་ནེ;
ཏ་སྶཱ ཝ་སྶ་ས་ཧ་སྶེ་ན, ཨེ་ཀཾ ནི་བྦ་ཏྟ་ཏེ ཕ་ལཾ.
༢༧. ཏཾ དེ་ཝཱ པ་ཡི་རུ་པཱ་ས་ནྟི, ཏཱ་ཝ དཱུ་ར་ཕ་ལཾ ས་ཏིཾ;
ཨཱ་སཱི་སེ་ཝ [ཨཱ་སིཾ་སེ་ཝ (སཱི. སྱཱ. པཱི.)] ཏུ་ཝཾ རཱ་ཛ, ཨཱ་སཱ ཕ་ལ་ཝ་ཏཱི སུ་ཁཱ.
༢༨. ཨཱ་སཱི་ས་ཏེ་ཝ [ཨཱ་སིཾ་སེ་ཐེ་ཝ (སཱི. སྱཱ. པཱི.)] སོ པ་ཀྑཱི, ཨཱ་སཱི་ས་ཏེ་ཝ [ཨཱ་སིཾ་སེ་ཐེ་ཝ (སཱི. སྱཱ. པཱི.)] སོ དི་ཛོ;
ཏ་སྶ ཙཱ་སཱ [ཏ་སྶེ་ཝཱ་སཱ (སྱཱ.)] ས་མི་ཛ྄ཛྷ་ཏི, ཏཱ་ཝ དཱུ་ར་ག་ཏཱ ས་ཏཱི;
ཨཱ་སཱི་སེ་ཝ ཏུ་ཝཾ རཱ་ཛ, ཨཱ་སཱ ཕ་ལ་ཝ་ཏཱི སུ་ཁཱ.
༢༩. ས་མྤེ་སི ཁོ མཾ ཝཱ་ཙཱ་ཡ, ན ཙ ས་མྤེ་སི [སཾ་སེ་སི (ཀ.)] ཀ་མྨུ་ནཱ;
མཱ་ལཱ སེ་རེ་ཡྻ་ཀ་སྶེ་ཝ, ཝ་ཎྞ་ཝ་ནྟཱ ཨ་ག་ནྡྷི་ཀཱ.
༣༠. ཨ་ཕ་ལཾ མ་དྷུ་རཾ ཝཱ་ཙཾ, ཡོ མི་ཏྟེ་སུ པ་ཀུ་བྦ་ཏི;
ཨ་ད་དཾ ཨ་ཝི་སྶ་ཛཾ བྷོ་གཾ, ས་ནྡྷི ཏེ་ན་སྶ ཛཱི་ར་ཏི.
༣༡. ཡ་ཉྷི ཀ་ཡི་རཱ ཏ་ཉྷི ཝ་དེ, ཡཾ ན ཀ་ཡི་རཱ ན ཏཾ ཝ་དེ;
ཨ་ཀ་རོ་ནྟཾ བྷཱ་ས་མཱ་ནཾ, པ་རི་ཛཱ་ན་ནྟི པ་ཎྜི་ཏཱ.
༣༢. བ་ལ་ཉྩ ཝ་ཏ མེ ཁཱི་ཎཾ, པཱ་ཐེ་ཡྻ་ཉྩ ན ཝི་ཛྫ་ཏི;
ས་ངྐེ པཱ་ཎཱུ་པ་རོ་དྷཱ་ཡ, ཧ་ནྡ དཱ་ནི ཝ་ཛཱ་མ་ཧཾ.
༣༣. ཨེ་ཏ་དེ་ཝ ཧི མེ ནཱ་མཾ, ཡཾ ནཱ་མ་སྨི ར་ཐེ་ས་བྷ;
ཨཱ་ག་མེ་ཧི མ་ཧཱ་རཱ་ཛ, པི་ཏ་རཾ ཨཱ་མ་ནྟ་ཡཱ་མ་ཧ་ནྟི.
ཨཱ་ས་ངྐ་ཛཱ་ཏ་ཀཾ པ་ཉྩ་མཾ.
༣༨༡. མི་གཱ་ལོ་པ་ཛཱ་ཏ་ཀཾ (༦-༡-༦)
༣༤. ན མེ རུ་ཙྩི མི་གཱ་ལོ་པ, ཡ་སྶ ཏེ ཏཱ་དི་སཱི ག་ཏཱི;
ཨ་ཏུ་ཙྩཾ ཏཱ་ཏ པ་ཏ་སི, ཨ་བྷཱུ་མིཾ ཏཱ་ཏ སེ་ཝ་སི.
༣༥. ཙ་ཏུ་ཀྐ་ཎྞཾ་ཝ ཀེ་དཱ་རཾ, ཡ་དཱ ཏེ པ་ཐ་ཝཱི སི་ཡཱ;
ཏ་ཏོ ཏཱ་ཏ ནི་ཝ་ཏྟ་སྶུ, མཱ་སྶུ ཨེ་ཏྟོ པ་རཾ ག་མི.
༣༦. ས་ནྟི ཨ་ཉྙེ་པི ས་ཀུ་ཎཱ, པ་ཏྟ་ཡཱ་ནཱ ཝི་ཧ་ངྒ་མཱ;
ཨ་ཀྑི་ཏྟཱ ཝཱ་ཏ་ཝེ་གེ་ན, ན་ཊྛཱ ཏེ ས་སྶ་ཏཱི་ས་མཱ.
༣༧. ཨ་ཀ་ཏྭཱ ཨ་པ་ན་ནྡ་སྶ [ཨ་པ་ར་ཎྞ་སྶ (སཱི. སྱཱ. པཱི.)], པི་ཏུ ཝུ་དྡྷ་སྶ སཱ་ས་ནཾ;
ཀཱ་ལ་ཝཱ་ཏེ ཨ་ཏི་ཀྐ་མྨ, ཝེ་ར་མྦྷཱ་ནཾ ཝ་སཾ ཨ་གཱ [ག་ཏོ (སཱི.)].
༣༨. ཏ་སྶ པུ་ཏྟཱ ཙ དཱ་རཱ ཙ, ཡེ ཙ་ཉྙེ ཨ་ནུ་ཛཱི་ཝི་ནོ;
ས་བྦེ བྱ་ས་ན་མཱ་པཱ་དུཾ, ཨ་ནོ་ཝཱ་ད་ཀ་རེ དི་ཛེ.
༣༩. ཨེ་ཝ་མྤི ཨི་དྷ ཝུ་དྡྷཱ་ནཾ, ཡོ ཝཱ་ཀྱཾ ནཱ་ཝ་བུ་ཛ྄ཛྷ་ཏི;
ཨ་ཏི་སཱི་མ་ཙ་རོ [ཨ་ཏི་སཱི་མཾ ཙ་རོ (སཱི. སྱཱ. ཀ.)] དི་ཏྟོ, གི་ཛ྄ཛྷོ་ཝཱ་ཏཱི་ཏ་སཱ་ས་ནོ;
ས་བྦེ བྱ་ས་ནཾ པ་པྤོ་ནྟི, ཨ་ཀ་ཏྭཱ བུ་དྡྷ་སཱ་ས་ན་ནྟི.
མི་གཱ་ལོ་པ་ཛཱ་ཏ་ཀཾ ཚ་ཊྛཾ.
༣༨༢. སི་རི་ཀཱ་ལ༹་ཀ་ཎྞི་ཛཱ་ཏ་ཀཾ (༦-༡-༧)
༤༠. ཀཱ ནུ ཀཱ་ལེ༹་ན ཝ་ཎྞེ་ན, ན ཙཱ་པི [ན ཙཱ་སི (སཱི.)] པི་ཡ་ད་སྶ་ནཱ;
ཀཱ ཝཱ ཏྭཾ ཀ་སྶ ཝཱ དྷཱི་ཏཱ, ཀ་ཐཾ ཛཱ་ནེ་མུ ཏཾ མ་ཡཾ.
༤༡. མ་ཧཱ་རཱ་ཛ་སྶ་ཧཾ དྷཱི་ཏཱ, ཝི་རཱུ་པ་ཀྑ་སྶ ཙ་ཎྜི་ཡཱ;
ཨ་ཧཾ ཀཱ་ལཱི༹ ཨ་ལ་ཀྑི་ཀཱ, ཀཱ་ལ༹་ཀ་ཎྞཱི་ཏི མཾ ཝི་དཱུ;
ཨོ་ཀཱ་སཾ ཡཱ་ཙི་ཏོ དེ་ཧི, ཝ་སེ་མུ ཏ་ཝ ས་ནྟི་ཀེ.
༤༢. ཀིཾ་སཱི་ལེ ཀིཾ་ས་མཱ་ཙཱ་རེ, པུ་རི་སེ ནི་ཝི་ས་སེ ཏུ་ཝཾ;
པུ་ཊྛཱ མེ ཀཱ་ལི༹ ཨ་ཀྑཱ་ཧི, ཀ་ཐཾ [ཡ་ཐཱ (སཱི. པཱི.)] ཛཱ་ནེ་མུ ཏཾ མ་ཡཾ.
༤༣. མ་ཀྑཱི པ་ལཱ༹་སཱི སཱ་ར་མྦྷཱི, ཨི་སྶུ་ཀཱི མ་ཙྪ་རཱི ས་ཋོ;
སོ མ་ཡ྄ཧཾ པུ་རི་སོ ཀ་ནྟོ, ལ་དྡྷཾ ཡ་སྶ ཝི་ན་སྶ་ཏི.
༤༤. ཀོ་དྷ་ནོ ཨུ་པ་ནཱ་ཧཱི ཙ, པི་སུ་ཎོ ཙ ཝི་བྷེ་ད་ཀོ;
ཀ་ཎྜ་ཀ་ཝཱ་ཙོ [ཨ་ཎྜ་ཀ་ཝཱ་ཙོ (ཀ. སཱི. པཱི.)] ཕ་རུ་སོ, སོ མེ ཀ་ནྟ་ཏ་རོ ཏ་ཏོ.
༤༥. ཨ་ཛྫ སུ་ཝེ་ཏི པུ་རི་སོ, ས་ད་ཏྠཾ ནཱ་ཝ་བུ་ཛ྄ཛྷ་ཏི;
ཨོ་ཝ་ཛྫ་མཱ་ནོ ཀུ་པྤ་ཏི, སེ་ཡྻཾ སོ ཨ་ཏི་མ་ཉྙ་ཏི.
༤༦. ད་ཝ་པྤ་ལུ་དྡྷོ [དེ་ཝ་པྤ་ལུ་དྡྷོ (ཀ.), ད་ཝ་པྤ་ལ་དྡྷོ (པཱི.)] པུ་རི་སོ, ས་བྦ་མི་ཏྟེ་ཧི དྷཾ་ས་ཏི;
སོ མ་ཡ྄ཧཾ པུ་རི་སོ ཀ་ནྟོ, ཏ་སྨིཾ ཧོ་མི ཨ་ནཱ་མ་ཡཱ.
༤༧. ཨ་པེ་ཧི ཨེ་ཏྟོ ཏྭཾ ཀཱ་ལི༹, ནེ་ཏཾ ཨ་མྷེ་སུ ཝི་ཛྫ་ཏི;
ཨ་ཉྙཾ ཛ་ན་པ་དཾ ག་ཙྪ, ནི་ག་མེ རཱ་ཛ་དྷཱ་ནི་ཡོ.
༤༨. ཨ་ཧ་མྤི ཁོ ཏཾ [ཙེ་ཏཾ (སཱི.)] ཛཱ་ནཱ་མི, ནེ་ཏཾ ཏུ་མྷེ་སུ ཝི་ཛྫ་ཏི;
ས་ནྟི ལོ་ཀེ ཨ་ལ་ཀྑི་ཀཱ, ས་ངྒྷ་ར་ནྟི བ་ཧུཾ དྷ་ནཾ;
ཨ་ཧཾ དེ་ཝོ ཙ མེ བྷཱ་ཏཱ, ཨུ་བྷོ ནཾ ཝི་དྷ་མཱ་མ་སེ.
༤༩. ཀཱ ནུ དི་བྦེ་ན ཝ་ཎྞེ་ན, པ་ཐ་བྱཱ སུ་པ་ཏི་ཊྛི་ཏཱ;
ཀཱ ཝཱ ཏྭཾ ཀ་སྶ ཝཱ དྷཱི་ཏཱ, ཀ་ཐཾ ཛཱ་ནེ་མུ ཏཾ མ་ཡཾ.
༥༠. མ་ཧཱ་རཱ་ཛ་སྶ་ཧཾ དྷཱི་ཏཱ, དྷ་ཏ་ར་ཊྛ་སྶ སི་རཱི་མ་ཏོ [དྷ་ཏ་ར་ཊྛ་སི་རཱི་མ་ཏོ (སྱཱ. ཀ.)];
ཨ་ཧཾ སི་རཱི ཙ ལ་ཀྑཱི ཙ, བྷཱུ་རི་པ་ཉྙཱ་ཏི མཾ ཝི་དཱུ;
ཨོ་ཀཱ་སཾ ཡཱ་ཙི་ཏོ དེ་ཧི, ཝ་སེ་མུ ཏ་ཝ ས་ནྟི་ཀེ.
༥༡. ཀིཾ་སཱི་ལེ ཀིཾ་ས་མཱ་ཙཱ་རེ, པུ་རི་སེ ནི་ཝི་ས་སེ ཏུ་ཝཾ;
པུ་ཊྛཱ མེ ལ་ཀྑི ཨ་ཀྑཱ་ཧི, ཀ་ཐཾ [ཡ་ཐཱ (སཱི. པཱི.)] ཛཱ་ནེ་མུ ཏཾ མ་ཡཾ.
༥༢. ཡོ ཙཱ་པི སཱི་ཏེ ཨ་ཐ་ཝཱ་པི ཨུ་ཎྷེ, ཝཱ་ཏཱ་ཏ་པེ ཌཾ་ས་ས་རཱི་ས་པེ ཙ;
ཁུ་དྷཾ [ཁུ་དྡཾ (སྱཱ. ཀ.), ཁུ་དཾ (པཱི.)] པི་པཱ་སཾ ཨ་བྷི་བྷུ་ཡྻ ས་བྦཾ, ར་ཏྟི་ནྟི་ཝཾ ཡོ ས་ཏ་ཏཾ ནི་ཡུ་ཏྟོ;
ཀཱ་ལཱ་ག་ཏ་ཉྩ ན ཧཱ་པེ་ཏི ཨ་ཏྠཾ, སོ མེ མ་ནཱ་པོ ནི་ཝི་སེ ཙ ཏ་མྷི.
༥༣. ཨ་ཀྐོ་དྷ་ནོ མི་ཏྟ་ཝཱ ཙཱ་ག་ཝཱ ཙ, སཱི་ལཱུ་པ་པ་ནྣོ ཨ་ས་ཋོ་ཛུ་བྷཱུ་ཏོ [ཨ་ས་ཋོ ཨུ་ཛྫུ་བྷཱུ་ཏོ (པཱི.)];
ས་ངྒཱ་ཧ་ཀོ ས་ཁི་ལོ ས་ཎྷ་ཝཱ་ཙོ, མ་ཧ་ཏྟ་པ་ཏྟོ་པི ནི་ཝཱ་ཏ་ཝུ་ཏྟི;
ཏ་སྨིཾ་ཧཾ [ཏ་སྨཱ་ཧཾ (སཱི. པཱི.)] པོ་སེ ཝི་པུ་ལཱ བྷ་ཝཱ་མི, ཨཱུ་མི ས་མུ་དྡ་སྶ ཡ་ཐཱ་པི ཝ་ཎྞཾ.
༥༤. ཡོ ཙཱ་པི མི་ཏྟེ ཨ་ཐ་ཝཱ ཨ་མི་ཏྟེ, སེ་ཊྛེ ས་རི་ཀྑེ ཨ་ཐ ཝཱ་པི ཧཱི་ནེ;
ཨ་ཏྠཾ ཙ་ར་ནྟཾ ཨ་ཐ་ཝཱ ཨ་ན་ཏྠཾ, ཨཱ་ཝཱི ར་ཧོ ས་ངྒ་ཧ་མེ་ཝ ཝ་ཏྟེ [ཝ་ཏྟོ (སྱཱ. ཀ.)].
ཝཱ་ཙཾ ན ཝ་ཛྫཱ ཕ་རུ་སཾ ཀ་དཱ་ཙི, མ་ཏ་སྶ ཛཱི་ཝ་སྶ ཙ ཏ་སྶ ཧོ་མི.
༥༥. ཨེ་ཏེ་སཾ ཡོ ཨ་ཉྙ་ཏ་རཾ ལ་བྷི་ཏྭཱ, ཀ་ནྟཱ སི་རཱི [ཀ་ནྟ་སི་རིཾ (ཀ་ཏྠ་ཙི), ཀ་ནྟཾ སི་རིཾ (སྱཱ.) ཨ་ཊྛ་ཀ་ཐཱ་ཡཾ དུ་ཏི་ཡ་ཏ་ཏི་ཡ་པཱ་ཋ་ནྟ་རཱ་ནི] མ་ཛྫ་ཏི ཨ་པྤ་པ་ཉྙོ;
ཏཾ དི་ཏྟ་རཱུ་པཾ ཝི་ས་མཾ ཙ་ར་ནྟཾ, ཀ་རཱི་ས་ཋཱ་ནཾ་ཝ [ཀ་རཱི་ས་ཛཱ་ཏཾ ཝ (སཱི. སྱཱ.)] ཝི་ཝ་ཛྫ་ཡཱ་མི.
༥༦. ཨ་ཏྟ་ནཱ ཀུ་རུ་ཏེ ལ་ཀྑིཾ, ཨ་ལ་ཀྑིཾ ཀུ་རུ་ཏ་ཏྟ་ནཱ;
ན ཧི ལ་ཀྑིཾ ཨ་ལ་ཀྑིཾ ཝཱ, ཨ་ཉྙོ ཨ་ཉྙ་སྶ ཀཱ་ར་ཀོ་ཏི.
སི་རི་ཀཱ་ལ༹་ཀ་ཎྞི་ཛཱ་ཏ་ཀཾ ས་ཏྟ་མཾ.
༣༨༣. ཀུ་ཀྐུ་ཊ་ཛཱ་ཏ་ཀཾ (༦-༡-༨)
༥༧. སུ་ཙི་ཏྟ་པ་ཏྟ་ཚ་ད་ན, ཏ་མྦ་ཙཱུ་ལ༹ ཝི་ཧ་ངྒ་མ;
ཨོ་རོ་ཧ དུ་མ་སཱ་ཁཱ་ཡ, མུ་དྷཱ བྷ་རི་ཡཱ བྷ་ཝཱ་མི ཏེ.
༥༨. ཙ་ཏུ་པྤ་དཱི ཏྭཾ ཀ་ལྱཱ་ཎི, དྭི་པ་དཱ་ཧཾ མ་ནོ་ར་མེ;
མི་གཱི པ་ཀྑཱི ཨ་ས་ཉྙུ་ཏྟཱ, ཨ་ཉྙཾ པ་རི་ཡེ་ས སཱ་མི་ཀཾ.
༥༩. ཀོ་མཱ་རི་ཀཱ ཏེ ཧེ་སྶཱ་མི, མ་ཉྫུ་ཀཱ པི་ཡ་བྷཱ་ཎི་ནཱི;
ཝི་ནྡ མཾ ཨ་རི་ཡེ་ན ཝེ་དེ་ན, སཱ་ཝ་ཡ མཾ ཡ་དི་ཙྪ་སི.
༦༠. ཀུ་ཎ་པཱ་དི་ནི ལོ་ཧི་ཏ་པེ, ཙོ་རི ཀུ་ཀྐུ་ཊ་པོ་ཐི་ནི;
ན ཏྭཾ ཨ་རི་ཡེ་ན ཝེ་དེ་ན, མ་མཾ བྷ་ཏྟཱ་ར་མི་ཙྪ་སི.
༦༡. ཨེ་ཝ་མྤི ཙ་ཏུ་རཱ [ཙཱ་ཏུ་རཱ (སྱཱ. ཀ.)] ནཱ་རཱི, དི་སྭཱ་ན ས་དྷ་ནཾ [པ་ཝ་རཾ (སཱི. སྱཱ. པཱི.)] ན་རཾ;
ནེ་ནྟི ས་ཎྷཱ་ཧི ཝཱ་ཙཱ་ཧི, བི་ལཱ༹་རཱི ཝི་ཡ ཀུ་ཀྐུ་ཊཾ.
༦༢. ཡོ ཙ ཨུ་པྤ་ཏི་ཏཾ ཨ་ཏྠཾ, ན ཁི་པྤ་མ་ནུ་བུ་ཛ྄ཛྷ་ཏི;
ཨ་མི་ཏྟ་ཝ་ས་མ་ནྭེ་ཏི, པ་ཙྪཱ ཙ ཨ་ནུ་ཏ་པྤ་ཏི.
༦༣. ཡོ ཙ ཨུ་པྤ་ཏི་ཏཾ ཨ་ཏྠཾ, ཁི་པྤ་མེ་ཝ ནི་བོ་དྷ་ཏི;