༩. ཨུ་པཱ་ཧ་ན་ཝ་གྒོ
༢༣༡. ཨུ་པཱ་ཧ་ན་ཛཱ་ཏ་ཀཾ (༢-༩-༡)
༡༦༡. ཡ་ཐཱ་པི ཀཱི་ཏཱ པུ་རི་ས་སྶུ་པཱ་ཧ་ནཱ, སུ་ཁ་སྶ ཨ་ཏྠཱ་ཡ དུ་ཁཾ ཨུ་ད་བྦ་ཧེ;
གྷ་མྨཱ་བྷི་ཏ་ཏྟཱ ཐ་ལ་སཱ པ་པཱི་ལི༹་ཏཱ, ཏ་སྶེ་ཝ པཱ་དེ པུ་རི་ས་སྶ ཁཱ་ད་རེ.
༡༦༢. ཨེ་ཝ་མེ་ཝ ཡོ དུ་ཀྐུ་ལཱི་ནོ ཨ་ན་རི་ཡོ, ཏ་མྨཱ་ཀ [ཏ་མྷཱ་ཀ (སཱི.), ཏུ་མྷཱ་ཀ (སྱཱ. པཱི.)] ཝི་ཛྫ་ཉྩ སུ་ཏ་ཉྩ ཨཱ་དི་ཡ;
ཏ་མེ་ཝ སོ ཏ་ཏྠ སུ་ཏེ་ན ཁཱ་ད་ཏི, ཨ་ན་རི་ཡོ ཝུ་ཙྩ་ཏི དུ་པཱ་ཧ་ནཱུ་པ་མོ་ཏི [པཱ་ན་དཱུ་པ་མོ་ཏི (སཱི. པཱི.)].
ཨུ་པཱ་ཧ་ན་ཛཱ་ཏ་ཀཾ པ་ཋ་མཾ.
༢༣༢. ཝཱི་ཎཱ་གུ་ཎ་ཛཱ་ཏ་ཀཾ (༢-༩-༢)
༡༦༣. ཨེ་ཀ་ཙི་ནྟི་ཏོ ཡ་མ་ཏྠོ, བཱ་ལོ ཨ་པ་རི་ཎཱ་ཡ་ཀོ;
ན ཧི ཁུ་ཛྫེ་ན ཝཱ་མེ་ན, བྷོ་ཏི ས་ངྒ་ནྟུ་མ་ར་ཧ་སི.
༡༦༤. པུ་རི་སཱུ་ས་བྷཾ མ་ཉྙ་མཱ་ནཱ, ཨ་ཧཾ ཁུ་ཛྫ་མ་ཀཱ་མ་ཡིཾ;
སོ་ཡཾ སཾ་ཀུ་ཊི་ཏོ སེ་ཏི, ཚི་ནྣ་ཏ་ནྟི ཡ་ཐཱ ཝི་ཎཱ་ཏི [ཐུ་ཎཱ་ཏི (སཱི.)].
ཝཱི་ཎཱ་གུ་ཎ་ཛཱ་ཏ་ཀཾ དུ་ཏི་ཡཾ.
༢༣༣. ཝི་ཀ་ཎྞ་ཛཱ་ཏ་ཀཾ (༢-༩-༣)
༡༦༥. ཀཱ་མཾ ཡ་ཧིཾ ཨི་ཙྪ་སི ཏེ་ན ག་ཙྪ, ཝི་དྡྷོ་སི མ་མྨ་མྷི [མ་མ་སྨི (ཀ.)] ཝི་ཀ་ཎྞ་ཀེ་ན;
ཧ་ཏོ་སི བྷ་ཏྟེ་ན སུ་ཝཱ་དི་ཏེ་ན [ས་ཝཱ་དི་ཏེ་ན (སཱི. སྱཱ. པཱི.)], ལོ་ལོ ཙ མ་ཙྪེ ཨ་ནུ་བ་ནྡྷ་མཱ་ནོ.
༡༦༦. ཨེ་ཝ་མྤི ལོ་ཀཱ་མི་སཾ ཨོ་པ་ཏ་ནྟོ, ཝི་ཧ་ཉྙ་ཏཱི ཙི་ཏྟ་ཝ་སཱ་ནུ་ཝ་ཏྟཱི;
སོ ཧ་ཉྙ་ཏི ཉཱ་ཏི་ས་ཁཱ་ན མ་ཛ྄ཛྷེ, མ་ཙྪཱ་ནུ་གོ སོ་རི་ཝ སུཾ་སུ་མཱ་རོ་ཏི [སུ་སུ་མཱ་རོ (ཀ.)].
ཝི་ཀ་ཎྞ་ཛཱ་ཏ་ཀཾ ཏ་ཏི་ཡཾ.
༢༣༤. ཨ་སི་ཏཱ་བྷཱུ་ཛཱ་ཏ་ཀཾ (༢-༩-༤)
༡༦༧. ཏྭ་མེ་ཝ དཱ་ནི་མ་ཀ་ར [མ་ཀ་རི (སྱཱ.), མ་ཀ་རཱ (ཀ. སཱི.)], ཡཾ ཀཱ་མོ བྱ་ག་མཱ ཏ་ཡི;
སོ་ཡཾ ཨ་པྤ་ཊི་ས་ནྡྷི་ཀོ, ཁ་ར་ཚི་ནྣཾ་ཝ རེ་ནུ་ཀཾ [རེ་རུ་ཀཾ (སཱི. པཱི.)].
༡༦༨. ཨ་ཏྲི་ཙྪཾ [ཨ་ཏྲི་ཙྪཱ (སཱི. སྱཱ. པཱི.)] ཨ་ཏི་ལོ་བྷེ་ན, ཨ་ཏི་ལོ་བྷ་མ་དེ་ན ཙ;
ཨེ་ཝཾ ཧཱ་ཡ་ཏི ཨ་ཏྠ་མྷཱ, ཨ་ཧཾ་ཝ ཨ་སི་ཏཱ་བྷུ་ཡཱ་ཏི.
ཨ་སི་ཏཱ་བྷཱུ་ཛཱ་ཏ་ཀཾ ཙ་ཏུ་ཏྠཾ.
༢༣༥. ཝ་ཙྪ་ན་ཁ་ཛཱ་ཏ་ཀཾ (༢-༩-༥)
༡༦༩. སུ་ཁཱ གྷ་རཱ ཝ་ཙྪ་ན་ཁ, ས་ཧི་ར་ཉྙཱ ས་བྷོ་ཛ་ནཱ;
ཡ་ཏྠ བྷུ་ཏྭཱ པི་ཝི་ཏྭཱ ཙ, ས་ཡེ་ཡྻཱ་ཐ ཨ་ནུ་སྶུ་ཀོ.
༡༧༠. གྷ་རཱ ནཱ་ནཱི་ཧ་མཱ་ན་སྶ, གྷ་རཱ ནཱ་བྷ་ཎ་ཏོ མུ་སཱ;
གྷ་རཱ ནཱ་དི་ནྣ་ད་ཎྜ་སྶ, པ་རེ་སཾ ཨ་ནི་ཀུ་བྦ་ཏོ [ཨ་ནི་ཀྲུ་བྦ་ཏོ (ཀ.)];
ཨེ་ཝཾ ཚི་དྡཾ དུ་ར་བྷི་ས་མྦྷ་ཝཾ [དུ་ར་བྷི་བྷ་ཝཾ (སཱི. པཱི.)], ཀོ གྷ་རཾ པ་ཊི་པ་ཛྫ་ཏཱི་ཏི.
ཝ་ཙྪ་ན་ཁ་ཛཱ་ཏ་ཀཾ པ་ཉྩ་མཾ.
༢༣༦. བ་ཀ་ཛཱ་ཏ་ཀཾ (༢-༩-༦)
༡༧༡. བྷ་དྡ་ཀོ ཝ་ཏ་ཡཾ པ་ཀྑཱི, དི་ཛོ ཀུ་མུ་ད་ས་ནྣི་བྷོ;
ཝཱུ་པ་ས་ནྟེ་ཧི པ་ཀྑེ་ཧི, མ་ནྡ་མ་ནྡོ་ཝ ཛྷཱ་ཡ་ཏི.
༡༧༢. ནཱ་སྶ སཱི་ལཾ ཝི་ཛཱ་ནཱ་ཐ, ཨ་ན་ཉྙཱ་ཡ པ་སཾ་ས་ཐ;
ཨ་མྷེ དི་ཛོ ན པཱ་ལེ་ཏི, ཏེ་ན པ་ཀྑཱི ན ཕ་ནྡ་ཏཱི་ཏི.
བ་ཀ་ཛཱ་ཏ་ཀཾ ཚ་ཊྛཾ.
༢༣༧. སཱ་ཀེ་ཏ་ཛཱ་ཏ་ཀཾ (༢-༩-༧)
༡༧༣. ཀོ ནུ ཁོ བྷ་ག་ཝཱ ཧེ་ཏུ, ཨེ་ཀ་ཙྩེ ཨི་དྷ པུ་གྒ་ལེ;
ཨ་ཏཱི་ཝ ཧ་ད་ཡཾ ནི་བྦཱ་ཏི, ཙི་ཏྟ་ཉྩཱ་པི པ་སཱི་ད་ཏི.
༡༧༤. པུ་བྦེ་ཝ ས་ནྣི་ཝཱ་སེ་ན, པ་ཙྩུ་པྤ་ནྣ་ཧི་ཏེ་ན ཝཱ;
ཨེ་ཝཾ ཏཾ ཛཱ་ཡ་ཏེ པེ་མཾ, ཨུ་པྤ་ལཾ་ཝ ཡ་ཐོ་ད་ཀེ་ཏི.
སཱ་ཀེ་ཏ་ཛཱ་ཏ་ཀཾ ས་ཏྟ་མཾ.
༢༣༨. ཨེ་ཀ་པ་ད་ཛཱ་ཏ་ཀཾ (༢-༩-༨)
༡༧༥. ཨི་ངྒྷ ཨེ་ཀ་པ་དཾ ཏཱ་ཏ, ཨ་ནེ་ཀ་ཏྠ་པ་ད་སྶི་ཏཾ [པ་ད་ནི་སྶི་ཏཾ (སཱི. པཱི.)];
ཀི་ཉྩི ས་ངྒཱ་ཧི་ཀཾ བྲཱུ་སི, ཡེ་ན་ཏྠེ སཱ་དྷ་ཡེ་མ་སེ.
༡༧༦. ད་ཀྑེ་ཡྻེ་ཀ་པ་དཾ ཏཱ་ཏ, ཨ་ནེ་ཀ་ཏྠ་པ་ད་སྶི་ཏཾ;
ཏ་ཉྩ སཱི་ལེ་ན ས་ཉྙུ་ཏྟཾ, ཁ་ནྟི་ཡཱ ཨུ་པ་པཱ་དི་ཏཾ;
ཨ་ལཾ མི་ཏྟེ སུ་ཁཱ་པེ་ཏུཾ, ཨ་མི་ཏྟཱ་ནཾ དུ་ཁཱ་ཡ ཙཱ་ཏི.
ཨེ་ཀ་པ་ད་ཛཱ་ཏ་ཀཾ ཨ་ཊྛ་མཾ.
༢༣༩. ཧ་རི་ཏ་མ་ཎྜཱུ་ཀ་ཛཱ་ཏ་ཀཾ (༢-༩-༩)
༡༧༧. ཨཱ་སཱི་ཝི་ས་མྤི མཾ [ཨཱ་སཱི་ཝི་སཾ མ་མཾ (སཱི. པཱི.)] ས་ནྟཾ, པ་ཝི་ཊྛཾ ཀུ་མི་ནཱ་མུ་ཁཾ;
རུ་ཙྩ་ཏེ ཧ་རི་ཏཱ་མཱ་ཏཱ, ཡཾ མཾ ཁཱ་ད་ནྟི མ་ཙྪ་ཀཱ.
༡༧༨. ཝི་ལུ་མྤ་ཏེ་ཝ པུ་རི་སོ, ཡཱ་ཝ་སྶ ཨུ་པ་ཀ་པྤ་ཏི;
ཡ་དཱ ཙ་ཉྙེ ཝི་ལུ་མྤ་ནྟི, སོ ཝི་ལུ་ཏྟོ ཝི་ལུ་མྤ་ཏཱི་ཏི [ཝི་ལུ་པྤ་ཏཱི་ཏི (?)].
ཧ་རི་ཏ་མ་ཎྜཱུ་ཀ་ཛཱ་ཏ་ཀཾ ན་ཝ་མཾ.
༢༤༠. མ་ཧཱ་པི་ངྒ་ལ་ཛཱ་ཏ་ཀཾ (༢-༩-༡༠)
༡༧༩. ས་བྦོ ཛ་ནོ ཧིཾ་སི་ཏོ པི་ངྒ་ལེ་ན, ཏ་སྨིཾ མ་ཏེ པ་ཙྩ་ཡཱ [པ་ཙྩ་ཡཾ (སཱི. སྱཱ. པཱི.)] ཝེ་ད་ཡ་ནྟི;
པི་ཡོ ནུ ཏེ ཨཱ་སི ཨ་ཀ་ཎྷ་ནེ་ཏྟོ, ཀ་སྨཱ ནུ ཏྭཾ རོ་ད་སི དྭཱ་ར་པཱ་ལ.
༡༨༠. ན མེ པི་ཡོ ཨཱ་སི ཨ་ཀ་ཎྷ་ནེ་ཏྟོ, བྷཱ་ཡཱ་མི པ་ཙྩཱ་ག་མ་ནཱ་ཡ ཏ་སྶ;
ཨི་ཏོ ག་ཏོ ཧིཾ་སེ་ཡྻ མ་ཙྩུ་རཱ་ཛཾ, སོ ཧིཾ་སི་ཏོ ཨཱ་ནེ་ཡྻ པུ་ན ཨི་དྷ.
༡༨༡. ད་ཌྜྷོ ཝཱ་ཧ་ས་ཧ་སྶེ་ཧི, སི་ཏྟོ གྷ་ཊ་ས་ཏེ་ཧི སོ;
པ་རི་ཀྑ་ཏཱ ཙ སཱ བྷཱུ་མི, མཱ བྷཱ་ཡི ནཱ་ག་མི་སྶ་ཏཱི་ཏི.
མ་ཧཱ་པི་ངྒ་ལ་ཛཱ་ཏ་ཀཾ ད་ས་མཾ.
ཨུ་པཱ་ཧ་ན་ཝ་གྒོ ན་ཝ་མོ.
ཏ་སྶུ་དྡཱ་ནཾ –
ཝ་རུ་པཱ་ཧ་ན ཁུ་ཛྫ ཝི་ཀ་ཎྞ་ཀ་ཀོ, ཨ་སི་ཏཱ་བྷུ་ཡ པ་ཉྩ་མ་ཝ་ཙྪ་ན་ཁོ;
དི་ཛ པེ་མ་ཝ་རུ་ཏྟ་མ་ཨེ་ཀ་པ་དཾ, ཀུ་མི་ནཱ་མུ་ཁ པི་ངྒ་ལ་ཀེ་ན ད་སཱ་ཏི.