༤. ཨ་ས་དི་ས་ཝ་གྒོ
༡༨༡. ཨ་ས་དི་ས་ཛཱ་ཏ་ཀཾ (༢-༤-༡)
༦༡. དྷ་ནུ་གྒ་ཧོ ཨ་ས་དི་སོ, རཱ་ཛ་པུ་ཏྟོ མ་ཧ་བྦ་ལོ;
དཱུ་རེ་པཱ་ཏཱི ཨ་ཀྑ་ཎ་ཝེ་དྷཱི, མ་ཧཱ་ཀཱ་ཡ་པྤ་དཱ་ལ་ནོ.
༦༢. ས་བྦཱ་མི་ཏྟེ ར་ཎཾ ཀ་ཏྭཱ, ན ཙ ཀ་ཉྩི ཝི་ཧེ་ཋ་ཡི;
བྷཱ་ཏ་རཾ སོ་ཏྠིཾ ཀ་ཏྭཱ་ན, སཾ་ཡ་མཾ ཨ་ཛ྄ཛྷུ་པཱ་ག་མཱི་ཏི.
ཨ་ས་དི་ས་ཛཱ་ཏ་ཀཾ པ་ཋ་མཾ.
༡༨༢. ས་ངྒཱ་མཱ་ཝ་ཙ་ར་ཛཱ་ཏ་ཀཾ (༢-༤-༢)
༦༣. ས་ངྒཱ་མཱ་ཝ་ཙ་རོ སཱུ་རོ, བ་ལ་ཝཱ ཨི་ཏི ཝི་སྶུ་ཏོ;
ཀིཾ ནུ ཏོ་ར་ཎ་མཱ་ས་ཛྫ, པ་ཊི་ཀྐ་མ་སི ཀུ་ཉྫ་ར.
༦༤. ཨོ་མ་དྡ ཁི་པྤཾ པ་ལི་གྷཾ, ཨེ་སི་ཀཱ་ནི ཙ ཨ་བྦ་ཧ [ཨུ་བྦ་ཧ (སྱཱ.), ཨ་བྦྷུ་ཧ (ཀ.)];
ཏོ་ར་ཎཱ་ནི ཙ མ་དྡི་ཏྭཱ, ཁི་པྤཾ པ་ཝི་ས ཀུ་ཉྫ་རཱ་ཏི.
ས་ངྒཱ་མཱ་ཝ་ཙ་ར་ཛཱ་ཏ་ཀཾ དུ་ཏི་ཡཾ.
༡༨༣. ཝཱ་ལོ་ད་ཀ་ཛཱ་ཏ་ཀཾ (༢-༤-༣)
༦༥. ཝཱ་ལོ་ད་ཀཾ ཨ་པྤ་ར་སཾ ནི་ཧཱི་ནཾ, པི་ཏྭཱ [པཱི་ཏྭཱ (སཱི. པཱི.)] མ་དོ ཛཱ་ཡ་ཏི ག་དྲ་བྷཱ་ནཾ;
ཨི་མ་ཉྩ པི་ཏྭཱ་ན ར་སཾ པ་ཎཱི་ཏཾ, མ་དོ ན ས་ཉྫཱ་ཡ་ཏི སི་ནྡྷ་ཝཱ་ནཾ.
༦༦. ཨ་པྤཾ པི་ཝི་ཏྭཱ་ན ནི་ཧཱི་ན་ཛ་ཙྩོ, སོ མ་ཛྫ་ཏཱི ཏེ་ན ཛ་ནི་ནྡ པུ་ཊྛོ [ཕུ་ཊྛོ (སཱི. སྱཱ.), མུ་ཊྛོ (ཀ.)];
དྷོ་ར་ཡ྄ཧ་སཱི་ལཱི ཙ ཀུ་ལ་མྷི ཛཱ་ཏོ, ན མ་ཛྫ་ཏཱི ཨ་གྒ་ར་སཾ པི་ཝི་ཏྭཱ་ཏི.
ཝཱ་ལོ་ད་ཀ་ཛཱ་ཏ་ཀཾ ཏ་ཏི་ཡཾ.
༡༨༤. གི་རི་ད་ཏྟ་ཛཱ་ཏ་ཀཾ (༢-༤-༤)
༦༧. དཱུ་སི་ཏོ གི་རི་ད་ཏྟེ་ན [གི་རི་ད་ནྟེ་ན (པཱི.)], ཧ་ཡོ སཱ་མ་སྶ པ་ཎྜ་ཝོ;
པོ་རཱ་ཎཾ པ་ཀ་ཏིཾ ཧི་ཏྭཱ, ཏ་སྶེ་ཝཱ་ནུ་ཝི་དྷི་ཡྻ་ཏི [ནུ་ཝི་དྷཱི་ཡ་ཏི (སཱི. པཱི.)].
༦༨. ས་ཙེ ཙ ཏ་ནུ་ཛོ པོ་སོ, སི་ཁ་རཱ་ཀཱ་ར [སི་ངྒཱ་རཱ་ཀཱ་ར (སྱཱ.)] ཀ་པྤི་ཏོ;
ཨཱ་ན་ནེ ནཾ [ཏཾ (སཱི. སྱཱ. པཱི.)] ག་ཧེ་ཏྭཱ་ན, མ་ཎྜ་ལེ པ་རི་ཝ་ཏྟ་ཡེ;
ཁི་པྤ་མེ་ཝ པ་ཧ་ནྟྭཱ་ན, ཏ་སྶེ་ཝཱ་ནུ་ཝི་དྷི་ཡྻ་ཏཱི་ཏི.
གི་རི་ད་ཏྟ་ཛཱ་ཏ་ཀཾ ཙ་ཏུ་ཏྠཾ.
༡༨༥. ཨ་ན་བྷི་ར་ཏི་ཛཱ་ཏ་ཀཾ (༢-༤-༥)
༦༩. ཡ་ཐོ་ད་ཀེ ཨཱ་ཝི་ལེ ཨ་པྤ་ས་ནྣེ, ན པ་སྶ་ཏི སི་པྤི་ཀ་ས་མྦུ་ཀ་ཉྩ;
ས་ཀྑ་རཾ ཝཱ་ལུ་ཀཾ མ་ཙྪ་གུ་མྦཾ, ཨེ་ཝཾ ཨཱ་ཝི་ལ་མྷི [ཨཱ་ཝི་ལེ ཧི (སཱི.)] ཙི་ཏྟེ;
ན པ་སྶ་ཏི ཨ་ཏྟ་ད་ཏྠཾ པ་ར་ཏྠཾ.
༧༠. ཡ་ཐོ་ད་ཀེ ཨ་ཙྪེ ཝི་པྤ་ས་ནྣེ, སོ པ་སྶ་ཏི སི་པྤི་ཀ་ས་མྦུ་ཀ་ཉྩ;
ས་ཀྑ་རཾ ཝཱ་ལུ་ཀཾ མ་ཙྪ་གུ་མྦཾ, ཨེ་ཝཾ ཨ་ནཱ་ཝི་ལ་མྷི ཙི་ཏྟེ;
སོ པ་སྶ་ཏི ཨ་ཏྟ་ད་ཏྠཾ པ་ར་ཏྠ་ནྟི.
ཨ་ན་བྷི་ར་ཏི་ཛཱ་ཏ་ཀཾ པ་ཉྩ་མཾ.
༡༨༦. ད་དྷི་ཝཱ་ཧ་ན་ཛཱ་ཏ་ཀཾ (༢-༤-༦)
༧༡. ཝ་ཎྞ་ག་ནྡྷ་ར་སཱུ་པེ་ཏོ, ཨ་མྦོ་ཡཾ ཨ་ཧུ་ཝཱ པུ་རེ;
ཏ་མེ་ཝ པཱུ་ཛཾ ལ་བྷ་མཱ་ནོ, ཀེ་ན་མྦོ ཀ་ཊུ་ཀ་པྥ་ལོ.
༧༢. པུ་ཙི་མ་ནྡ་པ་རི་ཝཱ་རོ, ཨ་མྦོ ཏེ ད་དྷི་ཝཱ་ཧ་ན;
མཱུ་ལཾ མཱུ་ལེ་ན སཾ་ས་ཊྛཾ, སཱ་ཁཱ སཱ་ཁཱ [སཱ་ཁཾ (སྱཱ. ཀ.)] ནི་སེ་ཝ་རེ [ནི་ཝཱི་ས་རེ (ཀ.)];
ཨ་སཱ་ཏ་ས་ནྣི་ཝཱ་སེ་ན, ཏེ་ན་མྦོ ཀ་ཊུ་ཀ་པྥ་ལོ་ཏི.
ད་དྷི་ཝཱ་ཧ་ན་ཛཱ་ཏ་ཀཾ ཚ་ཊྛཾ.
༡༨༧. ཙ་ཏུ་མ་ཊྛ་ཛཱ་ཏ་ཀཾ (༢-༤-༧)
༧༣. ཨུ་ཙྩེ ཝི་ཊ་བྷི་མཱ་རུ་ཡ྄ཧ, མ་ནྟ་ཡ་ཝ྄ཧོ ར་ཧོ་ག་ཏཱ;
ནཱི་ཙེ ཨོ་རུ་ཡ྄ཧ མ་ནྟ་ཝ྄ཧོ, མི་ག་རཱ་ཛཱ་པི སོ་སྶ་ཏི.
༧༤. ཡཾ སུ་ཝ་ཎྞོ སུ་ཝ་ཎྞེ་ན [ཡཾ སུ་པ་ཎྞོ སུ་པ་ཎྞེ་ན (སཱི. སྱཱ. པཱི.)], དེ་ཝོ དེ་ཝེ་ན མ་ནྟ་ཡེ;
ཀིཾ ཏེ་ཏྠ ཙ་ཏུ་མ་ཊྛ་སྶ, བི་ལཾ པ་ཝི་ས ཛ་མྦུ་ཀཱ་ཏི.
ཙ་ཏུ་མ་ཊྛ་ཛཱ་ཏ་ཀཾ ས་ཏྟ་མཾ.
༡༨༨. སཱི་ཧ་ཀོ་ཏྠུ་ཛཱ་ཏ་ཀཾ (༢-༤-༨)
༧༥. སཱི་ཧ་ངྒུ་ལཱི སཱི་ཧ་ན་ཁོ, སཱི་ཧ་པཱ་ད་པ་ཏི་ཊྛི་ཏོ;
སོ སཱི་ཧོ སཱི་ཧ་ས་ངྒྷ་མྷི, ཨེ་ཀོ ན་ད་ཏི ཨ་ཉྙ་ཐཱ.
༧༦. མཱ ཏྭཾ ན་དི རཱ་ཛ་པུ་ཏྟ, ཨ་པྤ་ས་དྡོ ཝ་ནེ ཝ་ས;
ས་རེ་ན ཁོ [མཱ (ཀ.)] ཏཾ ཛཱ་ནེ་ཡྻུཾ, ན ཧི ཏེ པེ་ཏྟི་ཀོ ས་རོ་ཏི.
སཱི་ཧ་ཀོ་ཏྠུ་ཛཱ་ཏ་ཀཾ ཨ་ཊྛ་མཾ.
༡༨༩. སཱི་ཧ་ཙ་མྨ་ཛཱ་ཏ་ཀཾ (༢-༤-༩)
༧༧. ནེ་ཏཾ སཱི་ཧ་སྶ ན་དི་ཏཾ, ན བྱ་གྒྷ་སྶ ན [བྱ་གྒྷ་སྶ ན ཙ (ཀ.)] དཱི་པི་ནོ;
པཱ་རུ་ཏོ སཱི་ཧ་ཙ་མྨེ་ན, ཛ་མྨོ ན་ད་ཏི ག་དྲ་བྷོ.
༧༨. ཙི་ར་མྤི ཁོ ཏཾ ཁཱ་དེ་ཡྻ, ག་དྲ་བྷོ ཧ་རི་ཏཾ ཡ་ཝཾ;
པཱ་རུ་ཏོ སཱི་ཧ་ཙ་མྨེ་ན, ར་ཝ་མཱ་ནོ་ཝ དཱུ་ས་ཡཱི་ཏི.
སཱི་ཧ་ཙ་མྨ་ཛཱ་ཏ་ཀཾ ན་ཝ་མཾ.
༡༩༠. སཱི་ལཱ་ནི་སཾ་ས་ཛཱ་ཏ་ཀཾ (༢-༤-༡༠)
༧༩. པ་སྶ ས་དྡྷཱ་ཡ སཱི་ལ་སྶ, ཙཱ་ག་སྶ ཙ ཨ་ཡཾ ཕ་ལཾ;
ནཱ་གོ ནཱ་ཝཱ་ཡ ཝ་ཎྞེ་ན, ས་དྡྷཾ ཝ་ཧ་ཏུ་པཱ་ས་ཀཾ.
༨༠. ས་བྦྷི་རེ་ཝ ས་མཱ་སེ་ཐ, ས་བྦྷི ཀུ་བྦེ་ཐ ས་ནྠ་ཝཾ;
ས་ཏ་ཉྷི ས་ནྣི་ཝཱ་སེ་ན, སོ་ཏྠིཾ ག་ཙྪ་ཏི ནྷཱ་པི་ཏོ་ཏི.
སཱི་ལཱ་ནི་སཾ་ས་ཛཱ་ཏ་ཀཾ ད་ས་མཾ.
ཨ་ས་དི་ས་ཝ་གྒོ ཙ་ཏུ་ཏྠོ.
ཏ་སྶུ་དྡཱ་ནཾ –
དྷ་ནུ་གྒ་ཧ ཀུ་ཉྫ་ར ཨ་པྤ་ར་སོ, གི་རི་ད་ཏྟ་མ་ནཱ་ཝི་ལ་ཙི་ཏྟ་ཝ་རཾ;
ད་དྷི་ཝཱ་ཧ་ན ཛ་མྦཱུ་ཀ སཱི་ཧ་ན་ཁོ, ཧ་རི་ཏ་ཡ་ཝ ནཱ་ག་ཝ་རེ་ན ད་སཱ་ཏི.