༣. ཀ་ལྱཱ་ཎ་ཝ་གྒོ
༡༧༡. ཀ་ལྱཱ་ཎ་དྷ་མྨ་ཛཱ་ཏ་ཀཾ (༢-༣-༡)
༤༡. ཀ་ལྱཱ་ཎ་དྷ་མྨོ་ཏི ཡ་དཱ ཛ་ནི་ནྡ, ལོ་ཀེ ས་མ་ཉྙཾ ཨ་ནུ་པཱ་པུ་ཎཱ་ཏི;
ཏ་སྨཱ ན ཧི་ཡྻེ་ཐ [ཧཱི་ཡེ་ཐ (སཱི.)] ན་རོ ས་པ་ཉྙོ, ཧི་རི་ཡཱ་པི ས་ནྟོ དྷུ་ར་མཱ་དི་ཡ་ནྟི.
༤༢. སཱ་ཡཾ ས་མ་ཉྙཱ ཨི་དྷ མ་ཛྫ པ་ཏྟཱ, ཀ་ལྱཱ་ཎ་དྷ་མྨོ་ཏི ཛ་ནི་ནྡ ལོ་ཀེ;
ཏཱ་ཧཾ ས་མེ་ཀྑཾ ཨི་དྷ པ་བྦ་ཛི་སྶཾ, ན ཧི མ་ཏྠི ཚ་ནྡོ ཨི་དྷ ཀཱ་མ་བྷོ་གེ་ཏི.
ཀ་ལྱཱ་ཎ་དྷ་མྨ་ཛཱ་ཏ་ཀཾ པ་ཋ་མཾ.
༡༧༢. ད་དྡ་ར་ཛཱ་ཏ་ཀཾ (༢-༣-༢)
༤༣. ཀོ ནུ ས་དྡེ་ན མ་ཧ་ཏཱ, ཨ་བྷི་ནཱ་དེ་ཏི ད་དྡ་རཾ;
ཏཾ སཱི་ཧཱ ན་པྤ་ཊི་ན་ད་ནྟི [ཀིཾ སཱི་ཧཱ ན་པྤ་ཊི་ན་ད་ནྟི (སཱི. པཱི.), ན སཱི་ཧཱ པ་ཊི་ན་ད་ནྟི (ཀ.)], ཀོ ནཱ་མེ་སོ མི་གཱ་དྷི་བྷཱུ.
༤༤. ཨ་དྷ་མོ མི་ག་ཛཱ་ཏཱ་ནཾ, སི་ངྒཱ་ལོ ཏཱ་ཏ ཝ་སྶ་ཏི;
ཛཱ་ཏི་མ་སྶ ཛི་གུ་ཙྪ་ནྟཱ, ཏུ་ཎྷཱི སཱི་ཧཱ ས་མ་ཙྪ་རེ་ཏི.
ད་དྡ་ར་ཛཱ་ཏ་ཀཾ དུ་ཏི་ཡཾ.
༡༧༣. མ་ཀྐ་ཊ་ཛཱ་ཏ་ཀཾ (༢-༣-༣)
༤༥. ཏཱ་ཏ མཱ་ཎ་ཝ་ཀོ ཨེ་སོ, ཏཱ་ལ་མཱུ་ལཾ ཨ་པ་སྶི་ཏོ;
ཨ་གཱ་ར་ཀ་ཉྩི་དཾ ཨ་ཏྠི, ཧ་ནྡ དེ་མ་སྶ་གཱ་ར་ཀཾ.
༤༦. མཱ ཁོ ཏྭཾ ཏཱ་ཏ པ་ཀྐོ་སི, དཱུ་སེ་ཡྻ ནོ ཨ་གཱ་ར་ཀཾ;
ནེ་ཏཱ་དི་སཾ མུ་ཁཾ ཧོ་ཏི, བྲཱ་ཧྨ་ཎ་སྶ སུ་སཱི་ལི་ནོ་ཏི.
མ་ཀྐ་ཊ་ཛཱ་ཏ་ཀཾ ཏ་ཏི་ཡཾ.
༡༧༤. དུ་བྦྷི་ཡ་མ་ཀྐ་ཊ་ཛཱ་ཏ་ཀཾ (༢-༣-༤)
༤༧. ཨ་ད་མྷ ཏེ ཝཱ་རི པ་ཧཱུ་ཏ་རཱུ་པཾ, གྷ་མྨཱ་བྷི་ཏ་ཏྟ་སྶ པི་པཱ་སི་ཏ་སྶ;
སོ དཱ་ནི པི་ཏྭཱ་ན [པཱི་ཏྭཱ་ན (སཱི. པཱི.)] ཀི་རི་ངྐ་རོ་སི [ཀི་ཀིཾ་ཀ་རོ་སི (སཱི. སྱཱ. པཱི.)], ཨ་ས་ངྒ་མོ པཱ་པ་ཛ་ནེ་ན སེ་ཡྻོ.
༤༨. ཀོ ཏེ སུ་ཏོ ཝཱ དི་ཊྛོ ཝཱ, སཱི་ལ་ཝཱ ནཱ་མ མ་ཀྐ་ཊོ;
ཨི་དཱ་ནི ཁོ ཏཾ ཨོ་ཧ་ཙྪཾ [ཨཱུ་ཧ་ཙྩ (སཱི. པཱི.), ཨོ་ཧ་ཙྩཾ (སྱཱ.), ཨུ་ཧ་ཛྫཾ (ཀ.)], ཨེ་སཱ ཨ་སྨཱ་ཀ དྷ་མྨ་ཏཱ་ཏི.
དུ་བྦྷི་ཡ་མ་ཀྐ་ཊ་ཛཱ་ཏ་ཀཾ ཙ་ཏུ་ཏྠཾ.
༡༧༥. ཨཱ་དི་ཙྩུ་པ་ཊྛཱ་ན་ཛཱ་ཏ་ཀཾ (༢-༣-༥)
༤༩. ས་བྦེ་སུ ཀི་ར བྷཱུ་ཏེ་སུ, ས་ནྟི སཱི་ལ་ས་མཱ་ཧི་ཏཱ;
པ་སྶ སཱ་ཁཱ་མི་གཾ ཛ་མྨཾ, ཨཱ་དི་ཙྩ་མུ་པ་ཏི་ཊྛ་ཏི.
༥༠. ནཱ་སྶ སཱི་ལཾ ཝི་ཛཱ་ནཱ་ཐ, ཨ་ན་ཉྙཱ་ཡ པ་སཾ་ས་ཐ;
ཨ་གྒི་ཧུ་ཏྟ་ཉྩ ཨུ་ཧ་ནྣཾ [ཨཱུ་ཧ་ནྟཾ (སཱི.), ཨཱུ་ཧ་ནཾ (སྱཱ.), ཨཱུ་ཧ་ནྟི (པཱི.), ཨུ་ཧ་དཾ (ཀ.)], དྭེ ཙ བྷི་ནྣཱ ཀ་མ་ཎྜ་ལཱུ་ཏི.
ཨཱ་དི་ཙྩུ་པ་ཊྛཱ་ན་ཛཱ་ཏ་ཀཾ པ་ཉྩ་མཾ.
༡༧༦. ཀ་ལཱ༹་ཡ་མུ་ཊྛི་ཛཱ་ཏ་ཀཾ (༢-༣-༦)
༥༡. བཱ་ལོ ཝ་ཏཱ་ཡཾ དུ་མ་སཱ་ཁ་གོ་ཙ་རོ, པ་ཉྙཱ ཛ་ནི་ནྡ ན་ཡི་མ་སྶ ཝི་ཛྫ་ཏི;
ཀ་ལཱ༹་ཡ་མུ་ཊྛིཾ [ཀ་ལཱ་ཡ་མུ་ཊྛིཾ (སཱི. པཱི.)] ཨ་ཝ་ཀི་རི་ཡ ཀེ་ཝ་ལཾ, ཨེ་ཀཾ ཀ་ལཱ༹་ཡཾ པ་ཏི་ཏཾ ག་ཝེ་ས་ཏི.
༥༢. ཨེ་ཝ་མེ་ཝ མ་ཡཾ རཱ་ཛ, ཡེ ཙ་ཉྙེ ཨ་ཏི་ལོ་བྷི་ནོ;
ཨ་པྤེ་ན བ་ཧུཾ ཛི་ཡྻཱ་མ, ཀ་ལཱ༹་ཡེ་ནེ་ཝ ཝཱ་ན་རོ་ཏི.
ཀ་ལཱ༹་ཡ་མུ་ཊྛི་ཛཱ་ཏ་ཀཾ ཚ་ཊྛཾ.
༡༧༧. ཏི་ནྡུ་ཀ་ཛཱ་ཏ་ཀཾ (༢-༣-༧)
༥༣. དྷ་ནུ་ཧ་ཏྠ་ཀ་ལཱ་པེ་ཧི, ནེ་ཏྟིཾ ས་ཝ་ར་དྷཱ་རི་བྷི;
ས་མ་ནྟཱ པ་རི་ཀི་ཎྞ་མྷ, ཀ་ཐཾ མོ་ཀྑོ བྷ་ཝི་སྶ་ཏི.
༥༤. ཨ་པྤེ་ཝ བ་ཧུ་ཀི་ཙྩཱ་ནཾ, ཨ་ཏྠོ ཛཱ་ཡེ་ཐ ཀོ་ཙི ནཾ;
ཨ་ཏྠི རུ་ཀྑ་སྶ ཨ་ཙྪི་ནྣཾ, ཁ་ཛྫ་ཐ་ཉྙེ་ཝ ཏི་ནྡུ་ཀ་ནྟི.
ཏི་ནྡུ་ཀ་ཛཱ་ཏ་ཀཾ ས་ཏྟ་མཾ.
༡༧༨. ཀ་ཙྪ་པ་ཛཱ་ཏ་ཀཾ (༢-༣-༨)
༥༥. ཛ་ནི་ཏྟཾ མེ བྷ་ཝི་ཏྟཾ མེ, ཨི་ཏི པ་ངྐེ ཨ་ཝ་སྶ་ཡིཾ;
ཏཾ མཾ པ་ངྐོ ཨ་ཛ྄ཛྷ་བྷ་ཝི, ཡ་ཐཱ དུ་བྦ་ལ་ཀཾ ཏ་ཐཱ;
ཏཾ ཏཾ ཝ་དཱ་མི བྷ་གྒ་ཝ, སུ་ཎོ་ཧི ཝ་ཙ་ནཾ མ་མ.
༥༦. གཱ་མེ ཝཱ ཡ་དི ཝཱ ར་ཉྙེ, སུ་ཁཾ ཡ་ཏྲཱ་དྷི་ག་ཙྪ་ཏི;
ཏཾ ཛ་ནི་ཏྟཾ བྷ་ཝི་ཏྟ་ཉྩ, པུ་རི་ས་སྶ པ་ཛཱ་ན་ཏོ;
ཡ་མྷི ཛཱི་ཝེ ཏ་མྷི ག་ཙྪེ, ན ནི་ཀེ་ཏ་ཧ་ཏོ སི་ཡཱ་ཏི.
ཀ་ཙྪ་པ་ཛཱ་ཏ་ཀཾ ཨ་ཊྛ་མཾ.
༡༧༩. ས་ཏ་དྷ་མྨ་ཛཱ་ཏ་ཀཾ (༢-༣-༩)
༥༧. ཏ་ཉྩ ཨ་པྤ་ཉྩ ཨུ་ཙྪི་ཊྛཾ, ཏ་ཉྩ ཀི་ཙྪེ་ན ནོ ཨ་དཱ;
སོ་ཧཾ བྲཱ་ཧྨ་ཎ་ཛཱ་ཏི་ཀོ, ཡཾ བྷུ་ཏྟཾ ཏ་མྤི ཨུ་གྒ་ཏཾ.
༥༨. ཨེ་ཝཾ དྷ་མྨཾ ནི་རཾ་ཀ་ཏྭཱ [ནི་རཱ་ཀ་ཏྭཱ (?) ནི + ཨཱ + ཀ་ར + ཏྭཱ], ཡོ ཨ་དྷ་མྨེ་ན ཛཱི་ཝ་ཏི;
ས་ཏ་དྷ་མྨོ་ཝ ལཱ་བྷེ་ན, ལ་དྡྷེ་ན་པི ན ན་ནྡ་ཏཱི་ཏི.
ས་ཏ་དྷ་མྨ་ཛཱ་ཏ་ཀཾ ན་ཝ་མཾ.
༡༨༠. དུ་དྡ་ད་ཛཱ་ཏ་ཀཾ (༢-༣-༡༠)
༥༩. དུ་དྡ་དཾ ད་ད་མཱ་ནཱ་ནཾ, དུ་ཀྐ་རཾ ཀ་མྨ ཀུ་བྦ་ཏཾ;
ཨ་ས་ནྟོ ནཱ་ནུ་ཀུ་བྦ་ནྟི, ས་ཏཾ དྷ་མྨོ དུ་ར་ནྣ་ཡོ.
༦༠. ཏ་སྨཱ ས་ཏ་ཉྩ ཨ་ས་ཏཾ, ནཱ་ནཱ ཧོ་ཏི ཨི་ཏོ ག་ཏི;
ཨ་ས་ནྟོ ནི་ར་ཡཾ ཡ་ནྟི, ས་ནྟོ ས་གྒ་པ་རཱ་ཡ་ཎཱ་ཏི [པ་རཱ་ཡ་ནཱ (སྱཱ. ཀ.)].
དུ་དྡ་ད་ཛཱ་ཏ་ཀཾ ད་ས་མཾ.
ཀ་ལྱཱ་ཎ་ཝ་གྒོ ཏ་ཏི་ཡོ.
ཏ་སྶུ་དྡཱ་ནཾ –
སུ་ས་མ་ཉྙ་མི་གཱ་དྷི་བྷཱུ མཱ་ཎ་ཝ་ཀོ, ཝཱ་རི་པ་ཧཱུ་ཏ་རཱུ་པཱ་དི་ཙྩུ་པ་ཊྛཱ་ནཱ;
ས་ཀ་ལཱ༹་ཡ་ས་ཏི་ནྡུ་ཀ་པ་ངྐ པུ་ན, ས་ཏ་དྷ་མྨ སུ་དུ་དྡ་ད་ཀེ་ན ད་སཱ་ཏི.