༥༢༤. ས་ངྑ་པཱ་ལ་ཛཱ་ཏ་ཀཾ (༤)
༡༤༣. ‘‘ཨ་རི་ཡཱ་ཝ་ཀཱ་སོ་སི པ་ས་ནྣ་ནེ་ཏྟོ, མ་ཉྙེ བྷ་ཝཾ པ་བྦ་ཛི་ཏོ ཀུ་ལ་མྷཱ;
ཀ་ཐཾ ནུ ཝི་ཏྟཱ་ནི པ་ཧཱ་ཡ བྷོ་གེ, པ་བྦ་ཛི ནི་ཀྑ་མྨ གྷ་རཱ ས་པ་ཉྙ’’ [ས་པ་ཉྙོ (སྱཱ.), ས་པ་ཉྙཱ (པཱི.)].
༡༤༤. ‘‘ས་ཡཾ ཝི་མཱ་ནཾ ན་ར་དེ་ཝ དི་སྭཱ, མ་ཧཱ་ནུ་བྷཱ་ཝ་སྶ མ་ཧོ་ར་ག་སྶ;
དི་སྭཱ་ན པུ་ཉྙཱ་ན མ་ཧཱ་ཝི་པཱ་ཀཾ, ས་དྡྷཱ་ཡ་ཧཾ པ་བྦ་ཛི་ཏོ་མྷི རཱ་ཛ’’.
༡༤༥. ‘‘ན ཀཱ་མ་ཀཱ་མཱ ན བྷ་ཡཱ ན དོ་སཱ, ཝཱ་ཙཾ མུ་སཱ པ་བྦ་ཛི་ཏཱ བྷ་ཎ་ནྟི;
ཨ་ཀྑཱ་ཧི མེ པུ་ཙྪི་ཏོ ཨེ་ཏ་མ་ཏྠཾ, སུ་ཏྭཱ་ན མེ ཛཱ་ཡི་ཧི་ཏི་པྤ་སཱ་དོ’’.
༡༤༦. ‘‘ཝཱ་ཎི་ཛྫ [ཝ་ཎི་ཛྫ (པཱི.)] ར་ཊྛཱ་དྷི་པ ག་ཙྪ་མཱ་ནོ, པ་ཐེ ཨ་དྡ་སཱ་སི་མྷི བྷོ་ཛ་པུ་ཏྟེ [མི་ལཱ་ཙ་པུ་ཏྟེ (སཱི. པཱི.)];
པ་ཝ་དྡྷ་ཀཱ་ཡཾ ཨུ་ར་གཾ མ་ཧ་ནྟཾ, ཨཱ་དཱ་ཡ ག་ཙྪ་ནྟེ པ་མོ་ད་མཱ་ནེ’’.
༡༤༧. ‘‘སོ་ཧཾ ས་མཱ་ག་མྨ ཛ་ནི་ནྡ ཏེ་ཧི, པ་ཧ་ཊྛ་ལོ་མོ ཨ་ཝ་ཙ་མྷི བྷཱི་ཏོ;
ཀུ་ཧིཾ ཨ་ཡཾ ནཱི་ཡ་ཏི [ནི་ཡྻ་ཏི (ཀ.)] བྷཱི་མ་ཀཱ་ཡོ, ནཱ་གེ་ན ཀིཾ ཀཱ་ཧ་ཐ བྷོ་ཛ་པུ་ཏྟཱ.
༡༤༨. ‘‘ནཱ་གོ ཨ་ཡཾ ནཱི་ཡ་ཏི བྷོ་ཛ་ན་ཏྠཱ [བྷོ་ཛ་ན་ཏྠཾ (སཱི. སྱཱ. པཱི.)], པ་ཝ་དྡྷ་ཀཱ་ཡོ ཨུ་ར་གོ མ་ཧ་ནྟོ;
སཱ་དུ་ཉྩ ཐཱུ་ལ་ཉྩ མུ་དུ་ཉྩ མཾ་སཾ, ན ཏྭཾ ར་ས་ཉྙཱ་སི ཝི་དེ་ཧ་པུ་ཏྟ.
༡༤༩. ‘‘ཨི་ཏོ མ་ཡཾ ག་ནྟྭཱ ས་ཀཾ ནི་ཀེ་ཏཾ [ནི་ཀེ་ཏ་ནཾ (པཱི.)], ཨཱ་དཱ་ཡ ས་ཏྠཱ་ནི ཝི་ཀོ་པ་ཡི་ཏྭཱ;
མཾ་སཱ་ནི བྷོ་ཀྑཱ་མ [བྷ་ཀྑཱ་མ (སྱཱ.)] པ་མོ་ད་མཱ་ནཱ, མ་ཡ་ཉྷི ཝེ ས་ཏྟ་ཝོ པ་ནྣ་གཱ་ནཾ.
༡༥༠. ‘‘ས་ཙེ ཨ་ཡཾ ནཱི་ཡ་ཏི བྷོ་ཛ་ན་ཏྠཱ, པ་ཝ་དྡྷ་ཀཱ་ཡོ ཨུ་ར་གོ མ་ཧ་ནྟོ;
ད་དཱ་མི ཝོ བ་ལི་བ་དྡཱ་ནི [བ་ལི་ཝ་དྡཱ་ནི (པཱི.)] སོ་ལ༹་ས, ནཱ་གཾ ཨི་མཾ མུ་ཉྩ་ཐ བ་ནྡྷ་ན་སྨཱ.
༡༥༡. ‘‘ཨ་དྡྷཱ ཧི ནོ བྷ་ཀྑོ ཨ་ཡཾ མ་ནཱ་པོ, བ་ཧཱུ ཙ ནོ ཨུ་ར་གཱ བྷུ་ཏྟ་པུ་བྦཱ [བ་ཧུཾ ཙ ནོ ཨུ་ར་གོ བྷུ་ཏྟ་པུ་བྦོ (ཀ.)];
ཀ་རོ་མ ཏེ ཏཾ ཝ་ཙ་ནཾ ཨ་ལཱ༹་ར [ཨཱ་ལཱ༹་ར (ཀ.) ཨེ་ཝ་མུ་པ་རི་པི], མི་ཏྟ་ཉྩ ནོ ཧོ་ཧི ཝི་དེ་ཧ་པུ་ཏྟ.
༡༥༢. ‘‘ཏ་ད་སྶུ ཏེ བ་ནྡྷ་ནཱ མོ་ཙ་ཡིཾ་སུ, ཡཾ ན་ཏྠུ་ཏོ པ་ཊི་མོ་ཀྐ་སྶ པཱ་སེ;
མུ་ཏྟོ ཙ སོ བ་ནྡྷ་ནཱ ནཱ་ག་རཱ་ཛཱ, པ་ཀྐཱ་མི པཱ་ཙཱི་ན་མུ་ཁོ མུ་ཧུ་ཏྟཾ.
༡༥༣. ‘‘ག་ནྟྭཱ་ན པཱ་ཙཱི་ན་མུ་ཁོ མུ་ཧུ་ཏྟཾ, པུ་ཎྞེ་ཧི ནེ་ཏྟེ་ཧི པ་ལོ་ཀ་ཡཱི མཾ;
ཏ་དཱ་སྶ་ཧཾ པི་ཊྛི་ཏོ ཨ་ནྭ་ག་ཙྪིཾ, ད་ས་ངྒུ་ལིཾ ཨ་ཉྫ་ལིཾ པ་གྒ་ཧེ་ཏྭཱ.
༡༥༤. ‘‘ག་ཙྪེ་ཝ ཁོ ཏྭཾ ཏ་ར་མཱ་ན་རཱུ་པོ, མཱ ཏཾ ཨ་མི་ཏྟཱ པུ་ན་ར་གྒ་ཧེ་སུཾ;
དུ་ཀྑོ ཧི ལུ་དྡེ་ཧི པུ་ནཱ ས་མཱ་ག་མོ, ཨ་ད་སྶ་ནཾ བྷོ་ཛ་པུ་ཏྟཱ་ན ག་ཙྪ.
༡༥༥. ‘‘ཨ་ག་མཱ་སི སོ ར་ཧ་དཾ ཝི་པྤ་ས་ནྣཾ, ནཱི་ལོ་བྷཱ་སཾ ར་མ་ཎཱི་ཡཾ སུ་ཏི་ཏྠཾ;
ས་མོ་ཏ་ཏཾ [ས་མོ་ན་ཏཾ (སྱཱ. ཀ.)] ཛ་མྦུ་ཧི ཝེ་ཏ་སཱ་ཧི, པཱ་ཝེ་ཀྑི ནི་ཏྟི་ཎྞ་བྷ་ཡོ པ་ཏཱི་ཏོ.
༡༥༦. ‘‘སོ ཏཾ པ་ཝི་སྶ ན ཙི་ར་སྶ ནཱ་གོ, དི་བྦེ་ན མེ པཱ་ཏུ་ར་ཧུཾ ཛ་ནི་ནྡ;
ཨུ་པ་ཊྛ་ཧཱི མཾ པི་ཏ་རཾ་ཝ པུ་ཏྟོ, ཧ་ད་ཡ་ངྒ་མཾ ཀ་ཎྞ་སུ་ཁཾ བྷ་ཎ་ནྟོ.
༡༥༧. ‘‘ཏྭཾ མེ་སི མཱ་ཏཱ ཙ པི་ཏཱ [པི་ཏཱ ཙ (པཱི.)] ཨ་ལཱ༹་ར, ཨ་བྦྷ་ནྟ་རོ པཱ་ཎ་ད་དོ ས་ཧཱ་ཡོ;
ས་ཀ་ཉྩ ཨི་དྡྷིཾ པ་ཊི་ལཱ་བྷ་ཀོ་སྨི [པ་ཊི་ལཱ་བྷི་ཏོ་སྨི (པཱི.)], ཨ་ལཱ༹་ར པ་སྶ མེ ནི་ཝེ་ས་ནཱ་ནི;
པ་ཧཱུ་ཏ་བྷ་ཀྑཾ བ་ཧུ་ཨ་ནྣ་པཱ་ནཾ, མ་ས་ཀྐ་སཱ་རཾ ཝི་ཡ ཝཱ་ས་ཝ་སྶ’’.
༡༥༨. ‘‘ཏཾ བྷཱུ་མི་བྷཱ་གེ་ཧི ཨུ་པེ་ཏ་རཱུ་པཾ, ཨ་ས་ཀྑ་རཱ ཙེ་ཝ མུ་དཱུ སུ་བྷཱ ཙ;
ནཱི་ཙ་ཏྟི་ཎཱ [ནཱི་ཙཱ ཏི་ཎཱ (སྱཱ. པཱི.)] ཨ་པྤ་ར་ཛཱ ཙ བྷཱུ་མི, པཱ་སཱ་དི་ཀཱ ཡ་ཏྠ ཛ་ཧ་ནྟི སོ་ཀཾ.
༡༥༩. ‘‘ཨ་ནཱ་ཝ་ཀུ་ལཱ ཝེ་ལུ༹་རི་ཡཱུ་པ་ནཱི་ལཱ, ཙ་ཏུ་དྡི་སཾ ཨ་མྦ་ཝ་ནཾ སུ་ར་མྨཾ;
པ་ཀྐཱ ཙ པེ་སཱི ཙ ཕ་ལཱ སུ་ཕུ་ལླཱ, ནི་ཙྩོ་ཏུ་ཀཱ དྷཱ་ར་ཡ་ནྟཱི ཕ་ལཱ་ནི.
༡༦༠. ‘‘ཏེ་སཾ ཝ་ནཱ་ནཾ ན་ར་དེ་ཝ མ་ཛ྄ཛྷེ, ནི་ཝེ་ས་ནཾ བྷ་སྶ་ར་ས་ནྣི་ཀཱ་སཾ;
ར་ཛ་ཏ་གྒ་ལ༹ཾ སོ་ཝ་ཎྞ་མ་ཡཾ ཨུ་ལཱ༹་རཾ, ཨོ་བྷཱ་ས་ཏཱི ཝི་ཛྫུ་རི་ཝ་ནྟ་ལི་ཀྑེ.
༡༦༡. ‘‘མ་ཎཱི་མ་ཡཱ སོ་ཎྞ་མ་ཡཱ [སོ་ཝ་ཎྞ་མ་ཡཱ (སཱི. སྱཱ. པཱི.)] ཨུ་ལཱ༹་རཱ, ཨ་ནེ་ཀ་ཙི་ཏྟཱ ས་ཏ་ཏཾ སུ་ནི་མྨི་ཏཱ;
པ་རི་པཱུ་རཱ ཀ་ཉྙཱ་ཧི ཨ་ལ་ངྐ་ཏཱ་བྷི, སུ་ཝ་ཎྞ་ཀཱ་ཡཱུ་ར་དྷ་རཱ་ཧི རཱ་ཛ.
༡༦༢. ‘‘སོ ས་ངྑ་པཱ་ལོ ཏ་ར་མཱ་ན་རཱུ་པོ, པཱ་སཱ་ད་མཱ་རུ་ཡ྄ཧ ཨ་ནོ་མ་ཝ་ཎྞོ;
ས་ཧ་སྶ་ཐ་མྦྷཾ ཨ་ཏུ་ལཱ་ནུ་བྷཱ་ཝཾ, ཡ་ཏྠ་སྶ བྷ་རི་ཡཱ མ་ཧེ་སཱི ཨ་ཧོ་སི.
༡༦༣. ‘‘ཨེ་ཀཱ ཙ ནཱ་རཱི ཏ་ར་མཱ་ན་རཱུ་པཱ, ཨཱ་དཱ་ཡ ཝེ་ལུ༹་རི་ཡ་མ་ཡཾ མ་ཧ་གྒྷཾ;
སུ་བྷཾ མ་ཎིཾ ཛཱ་ཏི་མ་ནྟཱུ་པ་པ་ནྣཾ, ཨ་ཙོ་དི་ཏཱ ཨཱ་ས་ན་མ་བྦྷི་ཧཱ་སི.
༡༦༤. ‘‘ཏ་ཏོ མཾ ཨུ་ར་གོ ཧ་ཏྠེ ག་ཧེ་ཏྭཱ, ནི་སཱི་ད་ཡཱི པཱ་མུ་ཁ་ཨཱ་ས་ན་སྨིཾ;
ཨི་ད་མཱ་ས་ནཾ ཨ་ཏྲ བྷ་ཝཾ ནི་སཱི་ད་ཏུ, བྷ་ཝ་ཉྷི མེ ཨ་ཉྙ་ཏ་རོ ག་རཱུ་ནཾ.
༡༦༥. ‘‘ཨ་ཉྙཱ ཙ ནཱ་རཱི ཏ་ར་མཱ་ན་རཱུ་པཱ, ཨཱ་དཱ་ཡ ཝཱ་རིཾ ཨུ་པ་ས་ངྐ་མི་ཏྭཱ;
པཱ་དཱ་ནི པ་ཀྑཱ་ལ་ཡཱི མེ ཛ་ནི་ནྡ, བྷ་རི་ཡཱ་ཝ [བྷ་རི་ཡཱ ཙ (པཱི.)] བྷ་ཏྟཱུ པ་ཏི་ནོ པི་ཡ་སྶ.
༡༦༦. ‘‘ཨ་པ་རཱ ཙ ནཱ་རཱི ཏ་ར་མཱ་ན་རཱུ་པཱ, པ་གྒ་ཡ྄ཧ སོ་ཝ་ཎྞ་མ་ཡཱ་ཡ [སོ་ཝ་ཎྞ་མ་ཡཱ (པཱི.)] པཱ་ཏི་ཡཱ;
ཨ་ནེ་ཀ་སཱུ་པཾ ཝི་ཝི་དྷཾ ཝི་ཡ་ཉྫ་ནཾ, ཨུ་པ་ནཱ་མ་ཡཱི བྷ་ཏྟ མ་ནུ་ཉྙ་རཱུ་པཾ.
༡༦༧. ‘‘ཏུ་རི་ཡེ་ཧི [ཏཱུ་རི་ཡེ་ཧི (ཀ.)] མཾ བྷཱ་ར་ཏ བྷུ་ཏྟ་ཝ་ནྟཾ, ཨུ་པ་ཊྛ་ཧུཾ བྷ་ཏྟུ མ་ནོ ཝི་དི་ཏྭཱ;
ཏ་ཏུ་ཏྟ་རིཾ [ཏ་དུ་ཏྟ་རིཾ (ཀ.)] མཾ ནི་པ་ཏཱི མ་ཧ་ནྟཾ, དི་བྦེ་ཧི ཀཱ་མེ་ཧི ཨ་ན་པྤ་ཀེ་ཧི.
༡༦༨. ‘‘བྷ་རི་ཡཱ མ་མེ་ཏཱ ཏི་ས་ཏཱ ཨ་ལཱ༹་ར, ས་བྦ་ཏྟ་མ་ཛ྄ཛྷཱ པ་དུ་མུ་ཏྟ་རཱ་བྷཱ;
ཨ་ལཱ༹་ར ཨེ་ཏཱ་སྶུ ཏེ ཀཱ་མ་ཀཱ་རཱ, ད་དཱ་མི ཏེ ཏཱ པ་རི་ཙཱ་ར་ཡ་སྶུ.
༡༦༩. ‘‘སཾ་ཝ་ཙྪ་རཾ དི་བྦ་ར་སཱ་ནུ་བྷུ་ཏྭཱ, ཏ་དཱ་སྶུ་ཧཾ [ཏ་ད་སྶ་ཧཾ (པཱི.)] ཨུ་ཏྟ་རི་མ་ཛ྄ཛྷ་བྷཱ་སིཾ [ཨུ་ཏྟ་རི པ་ཙྩ་བྷཱ་སིཾ (སཱི. སྱཱ.), ཨུ་ཏྟ་རིཾ པ་ཙྩ་བྷཱ་སིཾ (པཱི.)];
ནཱ་ག་སྶི་དཾ ཀི་ནྟི ཀ་ཐ་ཉྩ ལ་དྡྷཾ, ཀ་ཐ་ཛ྄ཛྷ་ག་མཱ་སི ཝི་མཱ་ན་སེ་ཊྛཾ’’.
༡༧༠. ‘‘ཨ་དྷི་ཙྩ ལ་དྡྷཾ པ་རི་ཎཱ་མ་ཛཾ ཏེ, ས་ཡཾ་ཀ་ཏཾ ཨུ་དཱ་ཧུ དེ་ཝེ་ཧི དི་ནྣཾ;
པུ་ཙྪཱ་མི ཏཾ [ཏེ (པཱི.)] ནཱ་ག་རཱ་ཛེ་ཏ་མ་ཏྠཾ, ཀ་ཐ་ཛ྄ཛྷ་ག་མཱ་སི ཝི་མཱ་ན་སེ་ཊྛཾ’’.
༡༧༡. ‘‘ནཱ་དྷི་ཙྩ ལ་དྡྷཾ ན པ་རི་ཎཱ་མ་ཛཾ མེ, ན ས་ཡཾ་ཀ་ཏཾ ནཱ་པི དེ་ཝེ་ཧི དི་ནྣཾ;
ས་ཀེ་ཧི ཀ་མྨེ་ཧི ཨ་པཱ་པ་ཀེ་ཧི, པུ་ཉྙེ་ཧི མེ ལ་དྡྷ་མི་དཾ ཝི་མཱ་ནཾ’’.
༡༧༢. ‘‘ཀིཾ ཏེ ཝ་ཏཾ ཀིཾ པ་ན བྲ་ཧྨ་ཙ་རི་ཡཾ, ཀི་སྶ སུ་ཙི་ཎྞ་སྶ ཨ་ཡཾ ཝི་པཱ་ཀོ;
ཨ་ཀྑཱ་ཧི མེ ནཱ་ག་རཱ་ཛེ་ཏ་མ་ཏྠཾ, ཀ་ཐཾ ནུ ཏེ ལ་དྡྷ་མི་དཾ ཝི་མཱ་ནཾ’’.
༡༧༣. ‘‘རཱ་ཛཱ ཨ་ཧོ་སིཾ མ་ག་དྷཱ་ན་མི་སྶ་རོ, དུ་ཡྻོ་དྷ་ནོ ནཱ་མ མ་ཧཱ་ནུ་བྷཱ་ཝོ;
སོ ཨི་ཏྟ་རཾ ཛཱི་ཝི་ཏཾ སཾ་ཝི་དི་ཏྭཱ, ཨ་ས་སྶ་ཏཾ ཝི་པ་རི་ཎཱ་མ་དྷ་མྨཾ.
༡༧༤. ‘‘ཨ་ནྣ་ཉྩ པཱ་ན་ཉྩ པ་ས་ནྣ་ཙི་ཏྟོ, ས་ཀྐ་ཙྩ དཱ་ནཾ ཝི་པུ་ལཾ ཨ་དཱ་སིཾ [ཨ་དཱ་སི (པཱི.)];
ཨོ་པཱ་ན་བྷཱུ་ཏཾ མེ གྷ་རཾ ཏ་དཱ་སི, ས་ནྟ་པྤི་ཏཱ ས་མ་ཎ་བྲཱ་ཧྨ་ཎཱ ཙ.
༡༧༥. [ཨ་ཡཾ གཱ་ཐཱ པཱི. པོ་ཏྠ་ཀེ ན་ཏྠི] ‘‘མཱ་ལ་ཉྩ ག་ནྡྷ་ཉྩ ཝི་ལེ་པ་ན་ཉྩ, པ་དཱི་པི་ཡཾ [པ་དཱི་པ་ཡཾ (སྱཱ. ཀ.)] ཡཱ་ན་མུ་པ་སྶ་ཡ་ཉྩ;
ཨ་ཙྪཱ་ད་ནཾ སེ་ཡྻ་མ་ཐ་ནྣ་པཱ་ནཾ, ས་ཀྐ་ཙྩ དཱ་ནཱ་ནི ཨ་ད་མྷ ཏ་ཏྠ [ཨ་ཡཾ གཱ་ཐཱ པཱི. པོ་ཏྠ་ཀེ ན་ཏྠི].
༡༧༦. ‘‘ཏཾ མེ ཝ་ཏཾ ཏཾ པ་ན བྲ་ཧྨ་ཙ་རི་ཡཾ, ཏ་སྶ སུ་ཙི་ཎྞ་སྶ ཨ་ཡཾ ཝི་པཱ་ཀོ;
ཏེ་ནེ་ཝ མེ ལ་དྡྷ་མི་དཾ ཝི་མཱ་ནཾ, པ་ཧཱུ་ཏ་བྷ་ཀྑཾ བ་ཧུ་ཨ་ནྣ་པཱ་ནཾ’’;
‘‘ན་ཙྩེ་ཧི གཱི་ཏེ་ཧི ཙུ་པེ་ཏ་རཱུ་པཾ, ཙི་ར་ཊྛི་ཏི་ཀཾ ན ཙ ས་སྶ་ཏཱ་ཡཾ.
༡༧༧. ‘‘ཨ་པྤཱ་ནུ་བྷཱ་ཝཱ ཏཾ མ་ཧཱ་ནུ་བྷཱ་ཝཾ, ཏེ་ཛ་སྶི་ནཾ ཧ་ནྟི ཨ་ཏེ་ཛ་ཝ་ནྟོ;
ཀི་མེ་ཝ དཱ་ཋཱ་ཝུ་དྷ ཀིཾ པ་ཊི་ཙྩ, ཧ་ཏྠ་ཏྟ [ཧ་ཏྠ་ཏྠ (སཱི. སྱཱ. པཱི.)] མཱ་ག་ཙྪི ཝ་ནི་བྦ་ཀཱ་ནཾ [ཝ་ཎི་བྦ་ཀཱ་ནཾ (སཱི.)].
༡༧༨. ‘‘བྷ་ཡཾ ནུ ཏེ ཨ་ནྭ་ག་ཏཾ མ་ཧ་ནྟཾ, ཏེ་ཛོ ནུ ཏེ ནཱ་ནྭ་གཾ ད་ནྟ་མཱུ་ལཾ;
ཀི་མེ་ཝ དཱ་ཋཱ་ཝུ་དྷ ཀིཾ པ་ཊི་ཙྩ, ཀི་ལེ་ས་མཱ་པ་ཛྫི ཝ་ནི་བྦ་ཀཱ་ནཾ’’.
༡༧༩. ‘‘ན མེ བྷ་ཡཾ ཨ་ནྭ་ག་ཏཾ མ་ཧ་ནྟཾ, ཏེ་ཛོ ན ས་ཀྐཱ མ་མ ཏེ་ཧི ཧ་ནྟུཾ [ཏེ་བྷི་ཧ་ནྟུཾ (སྱཱ. ཀ.)];
ས་ཏ་ཉྩ དྷ་མྨཱ་ནི སུ་ཀི་ཏྟི་ཏཱ་ནི, ས་མུ་དྡ་ཝེ་ལཱ་ཝ དུ་ར་ཙྩ་ཡཱ་ནི.
༡༨༠. ‘‘ཙཱ་ཏུ་དྡ་སིཾ པ་ཉྩ་ད་སིཾ ཨ་ལཱ༹་ར, ཨུ་པོ་ས་ཐཾ ནི་ཙྩ་མུ་པཱ་ཝ་སཱ་མི;
ཨ་ཐཱ་ག་མུཾ སོ་ལ༹་ས བྷོ་ཛ་པུ་ཏྟཱ, ར་ཛྫུཾ ག་ཧེ་ཏྭཱ་ན ད་ལ༹ྷ་ཉྩ པཱ་སཾ.
༡༨༡. ‘‘བྷེ་ཏྭཱ་ན ནཱ་སཾ ཨ་ཏི་ཀ་སྶ [ཨ་ནྟ་ཀ་སྶ (ཀ.)] ར་ཛྫུཾ, ན་ཡིཾ་སུ མཾ ས་མྤ་རི་ག་ཡ྄ཧ ལུ་དྡཱ;
ཨེ་ཏཱ་དི་སཾ དུ་ཀྑ་མ་ཧཾ ཏི་ཏི་ཀྑཾ [ཏི་ཏི་ཀྑིཾ (པཱི.)], ཨུ་པོ་ས་ཐཾ ཨ་པྤ་ཊི་ཀོ་པ་ཡ་ནྟོ’’.
༡༨༢. ‘‘ཨེ་ཀཱ་ཡ་ནེ ཏཾ པ་ཐེ ཨ་དྡ་སཾ་སུ, བ་ལེ་ན ཝ་ཎྞེ་ན ཙུ་པེ་ཏ་རཱུ་པཾ;
སི་རི་ཡཱ པ་ཉྙཱ་ཡ ཙ བྷཱ་ཝི་ཏོ་སི, ཀིཾ པ་ཏྠ་ཡཾ [ཀི་མ་ཏྠི་ཡཾ (སཱི. སྱཱ. པཱི.)] ནཱ་ག ཏ་པོ ཀ་རོ་སི.
༡༨༣. ‘‘ན པུ་ཏྟ་ཧེ་ཏཱུ ན དྷ་ན་སྶ ཧེ་ཏུ, ན ཨཱ་ཡུ་ནོ ཙཱ་པི ཨ་ལཱ༹་ར ཧེ་ཏུ;
མ་ནུ་སྶ་ཡོ་ནིཾ ཨ་བྷི་པ་ཏྠ་ཡཱ་ནོ, ཏ་སྨཱ པ་ར་ཀྐ་མྨ ཏ་པོ ཀ་རོ་མི’’.
༡༨༤. ‘‘ཏྭཾ ལོ་ཧི་ཏ་ཀྑོ ཝི་ཧ་ཏ་ནྟ་རཾ་སོ, ཨ་ལ་ངྐ་ཏོ ཀ་པྤི་ཏ་ཀེ་ས་མ་སྶུ;
སུ་རོ་སི་ཏོ ལོ་ཧི་ཏ་ཙ་ནྡ་ནེ་ན, ག་ནྡྷ་བྦ་རཱ་ཛཱ་ཝ དི་སཱ པ་བྷཱ་ས་སི [པ་བྷཱ་སི (ཀ.)].
༡༨༥. ‘‘དེ་ཝི་དྡྷི་པ་ཏྟོ་སི མ་ཧཱ་ནུ་བྷཱ་ཝོ, ས་བྦེ་ཧི ཀཱ་མེ་ཧི ས་མ་ངྒི་བྷཱུ་ཏོ;
པུ་ཙྪཱ་མི ཏཾ ནཱ་ག་རཱ་ཛེ་ཏ་མ་ཏྠཾ, སེ་ཡྻོ ཨི་ཏོ ཀེ་ན མ་ནུ་སྶ་ལོ་ཀོ’’.
༡༨༦. ‘‘ཨ་ལཱ༹་ར ནཱ་ཉྙ་ཏྲ མ་ནུ་སྶ་ལོ་ཀཱ, སུ་དྡྷཱི ཝ སཾ་ཝི་ཛྫ་ཏི སཾ་ཡ་མོ ཝཱ;
ཨ་ཧ་ཉྩ ལ་དྡྷཱ་ན མ་ནུ་སྶ་ཡོ་ནིཾ, ཀཱ་ཧཱ་མི ཛཱ་ཏི་མ་ར་ཎ་སྶ ཨ་ནྟཾ’’.
༡༨༧. ‘‘སཾ་ཝ་ཙྪ་རོ མེ ཝ་ས་ཏོ [ཝུ་སི་ཏོ (པཱི.)] ཏ་ཝ་ནྟི་ཀེ, ཨ་ནྣེ་ན པཱ་ནེ་ན ཨུ་པ་ཊྛི་ཏོ་སྨི;
ཨཱ་མ་ནྟ་ཡི་ཏྭཱ་ན པ་ལེ་མི ནཱ་ག, ཙི་ར་པྤ་ཝུ་ཊྛོ་སྨི [ཙི་ར་པྤ་ཝུ་ཏྠོ ཨ་སྨི (པཱི.)] ཨ་ཧཾ ཛ་ནི་ནྡ’’.
༡༨༨. ‘‘པུ་ཏྟཱ ཙ དཱ་རཱ ཨ་ནུ་ཛཱི་ཝི་ནོ ཙ [ཙ’ནུ་ཛཱི་ཝི་ནོ (སྱཱ. པཱི.)], ནི་ཙྩཱ་ནུ་སི་ཊྛཱ ཨུ་པ་ཏི་ཊྛ་ཏེ ཏཾ;
ཀ་ཙྩི་ནྣུ ཏཾ ནཱ་བྷི་ས་པི་ཏྠ [ནཱ་བྷི་སཾ་སི་ཏྠ (སྱཱ. པཱི.)] ཀོ་ཙི, པི་ཡ་ཉྷི མེ ད་སྶ་ནཾ ཏུ་ཡ྄ཧཾ [ཏུ་ཡ྄ཧ (པཱི.)] ཨ་ལཱ༹་ར’’.
༡༨༩. ‘‘ཡ་ཐཱ་པི མཱ་ཏཱུ ཙ པི་ཏཱུ ཨ་གཱ་རེ, པུ་ཏྟོ པི་ཡོ པ་ཊི་ཝི་ཧི་ཏོ ཝ་སེ་ཡྻ [སེ་ཡྻོ (པཱི.)];
ཏ་ཏོ་པི མ་ཡ྄ཧཾ ཨི་དྷ་མེ་ཝ སེ་ཡྻོ, ཙི་ཏྟ་ཉྷི ཏེ ནཱ་ག མ་ཡཱི པ་ས་ནྣཾ’’.
༡༩༠. ‘‘མ་ཎཱི མ་མཾ ཝི་ཛྫ་ཏི ལོ་ཧི་ཏ་ངྐོ [ལོ་ཧི་ཏ་ངྒོ (ཀ.)], དྷ་ནཱ་ཧ་རོ མ་ཎི་ར་ཏ་ནཾ ཨུ་ལཱ༹་རཾ;
ཨཱ་དཱ་ཡ ཏྭཾ [ཏཾ (པཱི.)] ག་ཙྪ ས་ཀཾ ནི་ཀེ་ཏཾ, ལ་དྡྷཱ དྷ་ནཾ ཏཾ མ་ཎི་མོ་སྶ་ཛ་སྶུ’’.
༡༩༡. ‘‘དི་ཊྛཱ མ་ཡཱ མཱ་ནུ་ས་ཀཱ་པི ཀཱ་མཱ, ཨ་ས་སྶ་ཏཱ ཝི་པ་རི་ཎཱ་མ་དྷ་མྨཱ;
ཨཱ་དཱི་ན་ཝཾ ཀཱ་མ་གུ་ཎེ་སུ དི་སྭཱ, ས་དྡྷཱ་ཡ་ཧཾ པ་བྦ་ཛི་ཏོ་མྷི རཱ་ཛ.
༡༩༢. ‘‘དུ་མ་པྥ་ལཱ་ནཱི་ཝ པ་ཏ་ནྟི མཱ་ཎ་ཝཱ, ད་ཧ་རཱ ཙ ཝུ་དྡྷཱ ཙ ས་རཱི་ར་བྷེ་དཱ;
ཨེ་ཏ་མྤི དི་སྭཱ པ་བྦ་ཛི་ཏོ་མྷི རཱ་ཛ, ཨ་པ་ཎྞ་ཀཾ སཱ་མ་ཉྙ་མེ་ཝ སེ་ཡྻོ’’.
༡༩༣. ‘‘ཨ་དྡྷཱ ཧ་ཝེ སེ་ཝི་ཏ་བྦཱ ས་པ་ཉྙཱ, བ་ཧུ་སྶུ་ཏཱ ཡེ བ་ཧུ་ཋཱ་ན་ཙི་ནྟི་ནོ;
ནཱ་ག་ཉྩ སུ་ཏྭཱ་ན ཏ་ཝ་ཉྩ་ལཱ༹་ར, ཀཱ་ཧཱ་མི པུ་ཉྙཱ་ནི ཨ་ན་པྤ་ཀཱ་ནི’’.
༡༩༤. ‘‘ཨ་དྡྷཱ ཧ་ཝེ སེ་ཝི་ཏ་བྦཱ ས་པ་ཉྙཱ, བ་ཧུ་སྶུ་ཏཱ ཡེ བ་ཧུ་ཋཱ་ན་ཙི་ནྟི་ནོ;
ནཱ་ག་ཉྩ སུ་ཏྭཱ་ན མ་མ་ཉྩ རཱ་ཛ, ཀ་རོ་ཧི པུ་ཉྙཱ་ནི ཨ་ན་པྤ་ཀཱ་ནཱི’’ཏི.
ས་ངྑ་པཱ་ལ་ཛཱ་ཏ་ཀཾ ཙ་ཏུ་ཏྠཾ.