༥༢༥. ཙཱུ་ལ༹་སུ་ཏ་སོ་མ་ཛཱ་ཏ་ཀཾ (༥)
༡༩༥. ‘‘ཨཱ་མ་ནྟ་ཡཱ་མི ནི་ག་མཾ, མི་ཏྟཱ་མ་ཙྩེ པ་རི་སྶ་ཛེ [པཱ་རི་ས་ཛྫེ (སཱི. སྱཱ.)];
སི་ར་སྨིཾ པ་ལི་ཏཾ ཛཱ་ཏཾ, པ་བྦ་ཛྫཾ དཱ་ནི རོ་ཙ་ཧཾ’’.
༡༩༦. ‘‘ཨ་བྷུ་མྨེ ཀ་ཐཾ ནུ བྷ་ཎ་སི, ས་ལླཾ མེ དེ་ཝ ཨུ་ར་སི ཀ་པྤེ་སི [ཀ་མྤེ་སི (པཱི.)];
ས་ཏྟ་ས་ཏཱ ཏེ བྷ་རི་ཡཱ, ཀ་ཐཾ ནུ ཏེ ཏཱ བྷ་ཝི་སྶ་ནྟི’’.
༡༩༧. ‘‘པ་ཉྙཱ་ཡི་ཧི་ནྟི ཨེ་ཏཱ, ད་ཧ་རཱ ཨ་ཉྙ་མྤི ཏཱ ག་མི་སྶ་ནྟི;
ས་གྒ་ཉྩ་སྶ པ་ཏྠ་ཡཱ་ནོ, ཏེ་ན ཨ་ཧཾ པ་བྦ་ཛི་སྶཱ་མི’’.
༡༩༨. ‘‘དུ་ལླ་དྡྷཾ མེ ཨཱ་སི སུ་ཏ་སོ་མ, ཡ་སྶ ཏེ ཧོ་མ་ཧཾ མཱ་ཏཱ;
ཡཾ མེ ཝི་ལ་པ་ནྟི་ཡཱ, ཨ་ན་པེ་ཀྑོ པ་བྦ་ཛ་སི དེ་ཝ.
༡༩༩. ‘‘དུ་ལླ་དྡྷཾ མེ ཨཱ་སི སུ་ཏ་སོ་མ, ཡཾ ཏཾ ཨ་ཧཾ ཝི་ཛཱ་ཡི་སྶཾ;
ཡཾ མེ ཝི་ལ་པ་ནྟི་ཡཱ, ཨ་ན་པེ་ཀྑོ པ་བྦ་ཛ་སི དེ་ཝ’’.
༢༠༠. ‘‘ཀོ ནཱ་མེ་སོ དྷ་མྨོ, སུ་ཏ་སོ་མ ཀཱ ཙ ནཱ་མ པ་བྦ་ཛྫཱ;
ཡཾ ནོ ཨ་མྷེ ཛི་ཎྞེ, ཨ་ན་པེ་ཀྑོ པ་བྦ་ཛ་སི དེ་ཝ.
༢༠༡. ‘‘པུ་ཏྟཱ་པི ཏུ་ཡ྄ཧཾ བ་ཧ་ཝོ, ད་ཧ་རཱ ཨ་པྤ་ཏྟ་ཡོ་བྦ་ནཱ;
མ་ཉྫཱུ ཏེ་པི [ཏེ (སཱི. པཱི.)] ཏཾ ཨ་པ་སྶ་ནྟཱ, མ་ཉྙེ དུ་ཀྑཾ ནི་ག་ཙྪ་ནྟི’’.
༢༠༢. ‘‘པུ་ཏྟེ་ཧི ཙ མེ ཨེ་ཏེ་ཧི, ད་ཧ་རེ་ཧི ཨ་པྤ་ཏྟ་ཡོ་བྦ་ནེ་ཧི;
མ་ཉྫཱུ་ཧི ས་བྦེ་ཧི་པི ཏུ་མྷེ་ཧི, ཙི་ར་མྤི ཋ་ཏྭཱ ཝི་ནཱ་ས་བྷཱ་ཝོ’’ [ཝི་ནཱ་བྷཱ་ཝོ (སཱི. སྱཱ. པཱི.)].
༢༠༣. ‘‘ཚི་ནྣཾ ནུ ཏུ་ཡ྄ཧཾ ཧ་ད་ཡཾ, ཨ་དུ ཏེ [ཨཱ་དུ (སཱི. པཱི.), ཨཱ་དཱུ (སྱཱ.)] ཀ་རུ་ཎཱ ཙ ན་ཏྠི ཨ་མྷེ་སུ;
ཡཾ ནོ ཝི་ཀ་ནྡ་ནྟི་ཡོ [ཝི་ཀྐ་ནྡ་ནྟི་ཡོ (སཱི.)], ཨ་ན་པེ་ཀྑོ པ་བྦ་ཛ་སི དེ་ཝ’’.
༢༠༤. ‘‘ན ཙ མ་ཡ྄ཧཾ ཚི་ནྣཾ ཧ་ད་ཡཾ, ཨ་ཏྠི ཀ་རུ་ཎཱ་པི མ་ཡ྄ཧཾ ཏུ་མྷེ་སུ;
ས་གྒ་ཉྩ པ་ཏྠ་ཡཱ་ནོ, ཏེ་ན ཨ་ཧཾ [ཏེ་ནཱ་ཧཾ (སཱི. སྱཱ.), ཏེ་ན་མ་ཧཾ (པཱི.)] པ་བྦ་ཛི་སྶཱ་མི’’.
༢༠༥. ‘‘དུ་ལླ་དྡྷཾ མེ ཨཱ་སི, སུ་ཏ་སོ་མ ཡ་སྶ ཏེ ཨ་ཧཾ བྷ་རི་ཡཱ;
ཡཾ མེ ཝི་ལ་པ་ནྟི་ཡཱ, ཨ་ན་པེ་ཀྑོ པ་བྦ་ཛ་སི དེ་ཝ.
༢༠༦. ‘‘དུ་ལླ་དྡྷཾ མེ ཨཱ་སི, སུ་ཏ་སོ་མ ཡ་སྶ ཏེ ཨ་ཧཾ བྷ་རི་ཡཱ;
ཡཾ མེ ཀུ་ཙྪི་པ་ཊི་ས་ནྡྷིཾ [མཾ ཀུ་ཙྪི་མ་ཏིཾ ས་ནྟིཾ (པཱི.)], ཨ་ན་པེ་ཀྑོ པ་བྦ་ཛ་སི དེ་ཝ.
༢༠༧. ‘‘པ་རི་པ་ཀྐོ མེ ག་བྦྷོ, ཀུ་ཙྪི་ག་ཏོ ཡཱ་ཝ ནཾ ཝི་ཛཱ་ཡཱ་མི;
མཱ་ཧཾ ཨེ་ཀཱ ཝི་དྷ་ཝཱ, པ་ཙྪཱ དུ་ཀྑཱ་ནི ཨ་དྡ་ཀྑིཾ’’.
༢༠༨. ‘‘པ་རི་པ་ཀྐོ ཏེ ག་བྦྷོ, ཀུ་ཙྪི་ག་ཏོ ཨི་ངྒྷ ཏྭཾ [ཏྭ (སཱི.), ནཾ (པཱི.)] ཝི་ཛཱ་ཡ་སྶུ;
པུ་ཏྟཾ ཨ་ནོ་མ་ཝ་ཎྞཾ, ཏཾ ཧི་ཏྭཱ པ་བྦ་ཛི་སྶཱ་མི’’.
༢༠༩. ‘‘མཱ ཏྭཾ ཙ་ནྡེ རུ་དི, མཱ སོ་ཙི ཝ་ན་ཏི་མི་ར་མ་ཏྟ་ཀྑི;
ཨཱ་རོ་ཧ ཝ་ར་པཱ་སཱ་དཾ [ཙ པཱ་སཱ་དཾ (པཱི.)], ཨ་ན་པེ་ཀྑོ ཨ་ཧཾ ག་མི་སྶཱ་མི’’.
༢༡༠. ‘‘ཀོ ཏཾ ཨ་མྨ ཀོ་པེ་སི, ཀིཾ རོ་ད་སི པེ་ཀྑ་སི ཙ མཾ བཱ་ལ༹ྷཾ;
ཀཾ ཨ་ཝ་ཛ྄ཛྷཾ གྷཱ་ཏེ་མི [གྷཱ་ཏེ་མི ཀཾ ཨ་ཝ་ཛ྄ཛྷཾ (པཱི.), ཏཾ ཨ་ཝ་ཛ྄ཛྷཾ གྷཱ་ཏེ་མི (ཀ.)], ཉཱ་ཏཱི་ནཾ ཨུ་དི་ཀྑ་མཱ་ནཱ་ནཾ’’.
༢༡༡. ‘‘ན ཧི སོ ས་ཀྐཱ ཧ་ནྟུཾ, ཝི་ཛི་ཏཱ་ཝཱི [ཛཱི་ཝི་ཏཱ་ཝཱི (པཱི.)] ཡོ མཾ ཏཱ་ཏ ཀོ་པེ་སི;
པི་ཏཱ ཏེ མཾ ཏཱ་ཏ ཨ་ཝ་ཙ, ཨ་ན་པེ་ཀྑོ ཨ་ཧཾ ག་མི་སྶཱ་མི’’.
༢༡༢. ‘‘ཡོ་ཧཾ པུ་བྦེ ནི་ཡྻཱ་མི, ཨུ་ཡྻཱ་ནཾ མ་ཏྟ་ཀུ་ཉྫ་རེ ཙ ཡོ་དྷེ་མི;
སུ་ཏ་སོ་མེ པ་བྦ་ཛི་ཏེ, ཀ་ཐཾ ནུ དཱ་ནི ཀ་རི་སྶཱ་མི’’.
༢༡༣. ‘‘མཱ་ཏུ་ཙྩ [མཱ་ཏུ ཙ (སཱི. སྱཱ.)] མེ རུ་ད་ནྟྱཱ [རུ་ད་ཏྱཱ (པཱི.)], ཛེ་ཊྛ་སྶ ཙ བྷཱ་ཏུ་ནོ ཨ་ཀཱ་མ་སྶ;
ཧ་ཏྠེ་པི ཏེ ག་ཧེ་སྶཾ, ན ཧི ག་ཙྪ་སི [ག་ཉྪི་སི (པཱི.)] ནོ ཨ་ཀཱ་མཱ་ནཾ’’.
༢༡༤. ‘‘ཨུ་ཊྛེ་ཧི ཏྭཾ དྷཱ་ཏི, ཨི་མཾ ཀུ་མཱ་རཾ ར་མེ་ཧི ཨ་ཉྙ་ཏྠ;
མཱ མེ པ་རི་པ་ནྠ་མ་ཀཱ་སི [མ་ཀཱ (སཱི. པཱི.)], ས་གྒཾ མ་མ པ་ཏྠ་ཡཱ་ན་སྶ’’.
༢༡༥. ‘‘ཡཾ ནཱུ་ནི་མཾ ད་དེ་ཡྻཾ [ཛ་ཧེ་ཡྻཾ (པཱི.)] པ་བྷ་ངྐ་རཾ, ཀོ ནུ མེ ཨི་མི་ནཱ་ཏྠོ [ཀོ ནུ མེ ཨི་མི་ནཱ ཨ་ཏྠོ (སཱི. སྱཱ.), ཀོ ནུ མེ ན་ཏྠོ (པཱི.)];
སུ་ཏ་སོ་མེ པ་བྦ་ཛི་ཏེ, ཀིཾ ནུ མེ་ནཾ ཀ་རི་སྶཱ་མི’’.
༢༡༦. ‘‘ཀོ་སོ ཙ ཏུ་ཡ྄ཧཾ ཝི་པུ་ལོ, ཀོ་ཊྛཱ་གཱ་ར་ཉྩ ཏུ་ཡ྄ཧཾ པ་རི་པཱུ་རཾ;
པ་ཐ་ཝཱི ཙ ཏུ་ཡ྄ཧཾ ཝི་ཛི་ཏཱ, ར་མ་སྶུ མཱ པ་བྦ་ཛི [པ་བྦ་ཛ་སྶུ (སཱི.), པ་བྦ་ཛ (པཱི.)] དེ་ཝ’’.
༢༡༧. ‘‘ཀོ་སོ ཙ མ་ཡ྄ཧཾ ཝི་པུ་ལོ, ཀོ་ཊྛཱ་གཱ་ར་ཉྩ མ་ཡ྄ཧཾ པ་རི་པཱུ་རཾ;
པ་ཐ་ཝཱི ཙ མ་ཡ྄ཧཾ ཝི་ཛི་ཏཱ, ཏཾ ཧི་ཏྭཱ པ་བྦ་ཛི་སྶཱ་མི’’.
༢༡༨. ‘‘མ་ཡ྄ཧ་མྤི དྷ་ནཾ པ་ཧཱུ་ཏཾ, ས་ངྑཱ་ཏུཾ [ས་ངྑྱཱ་ཏུཾ (སཱི.)] ནོ་པི དེ་ཝ ས་ཀྐོ་མི;
ཏཾ ཏེ ད་དཱ་མི ས་བྦ་མྤི [ཏཾ དེ་ཝ ཏེ ད་དཱ་མི ས་བྦ་མྤི (སཱི.), ཏཾ ཏེ ད་དཱ་མི ས་བྦཾ (པཱི.)], ར་མ་སྶུ མཱ པ་བྦ་ཛི དེ་ཝ’’.
༢༡༩. ‘‘ཛཱ་ནཱ་མི [ཛཱ་ནཱ་མི ཏེ (སཱི. སྱཱ.)] དྷ་ནཾ པ་ཧཱུ་ཏཾ, ཀུ་ལ་ཝ་དྡྷ་ན པཱུ་ཛི་ཏོ ཏ་ཡཱ ཙ་སྨི;
ས་གྒ་ཉྩ པ་ཏྠ་ཡཱ་ནོ, ཏེ་ན ཨ་ཧཾ པ་བྦ་ཛི་སྶཱ་མི’’.
༢༢༠. ‘‘ཨུ་ཀྐ་ཎྛི་ཏོ་སྨི བཱ་ལ༹ྷཾ, ཨ་ར་ཏི མཾ སོ་མ་ད་ཏྟ ཨཱ་ཝི་ས་ཏི [ཨཱ་ཝཱི་ས་ཏི (ཀ.)];
བ་ཧུ་ཀཱ་པི [བ་ཧུ་ཀཱ ཧི (སཱི. སྱཱ.)] མེ ཨ་ནྟ་རཱ་ཡཱ, ཨ་ཛྫེ་ཝཱ་ཧཾ པ་བྦ་ཛི་སྶཱ་མི’’.
༢༢༡. ‘‘ཨི་ད་ཉྩ ཏུ་ཡ྄ཧཾ རུ་ཙི་ཏཾ, སུ་ཏ་སོ་མ ཨ་ཛྫེ་ཝ དཱ་ནི ཏྭཾ པ་བྦ་ཛ;
ཨ་ཧ་མྤི པ་བྦ་ཛི་སྶཱ་མི, ན ཨུ་སྶ་ཧེ ཏ་ཡཱ ཝི་ནཱ ཨ་ཧཾ ཋཱ་ཏུཾ’’.
༢༢༢. ‘‘ན ཧི ས་ཀྐཱ པ་བྦ་ཛི་ཏུཾ, ན་ག་རེ ན ཧི པ་ཙྩ་ཏི ཛ་ན་པ་དེ ཙ’’;
‘‘སུ་ཏ་སོ་མེ པ་བྦ་ཛི་ཏེ, ཀ་ཐཾ ནུ དཱ་ནི ཀ་རི་སྶཱ་མ’’.
༢༢༣. ‘‘ཨུ་པ་ནཱི་ཡ་ཏི་དཾ མ་ཉྙེ, པ་རི་ཏྟཾ ཨུ་ད་ཀཾ་ཝ ཙ་ངྐ་ཝཱ་ར་མྷི;
ཨེ་ཝཾ སུ་པ་རི་ཏྟ་ཀེ ཛཱི་ཝི་ཏེ, ན ཙ པ་མ་ཛྫི་ཏུཾ ཀཱ་ལོ.
༢༢༤. ‘‘ཨུ་པ་ནཱི་ཡ་ཏི་དཾ མ་ཉྙེ, པ་རི་ཏྟཾ ཨུ་ད་ཀཾ་ཝ ཙ་ངྐ་ཝཱ་ར་མྷི;
ཨེ་ཝཾ སུ་པ་རི་ཏྟ་ཀེ ཛཱི་ཝི་ཏེ, ཨ་ནྡྷ་བཱ་ལཱ [ཨ་ཐ བཱ་ལཱ (སཱི. སྱཱ. པཱི.)] པ་མ་ཛྫ་ནྟི.
༢༢༥. ‘‘ཏེ ཝ་ཌྜྷ་ཡ་ནྟི ནི་ར་ཡཾ, ཏི་ར་ཙྪཱ་ན་ཡོ་ནི་ཉྩ པེ་ཏྟི་ཝི་ས་ཡ་ཉྩ;
ཏ་ཎྷཱ་ཡ བ་ནྡྷ་ན་བ་དྡྷཱ, ཝ་ཌྜྷེ་ནྟི ཨ་སུ་ར་ཀཱ་ཡཾ’’.
༢༢༦. ‘‘ཨཱུ་ཧ་ཉྙ་ཏེ ར་ཛ་གྒཾ, ཨ་ཝི་དཱུ་རེ པུ་བྦ་ཀ་མྷི ཙ [པུ་པྥ་ཀ་མྷི ཙ (སཱི. པཱི.)] པཱ་སཱ་དེ;
མ་ཉྙེ ནོ ཀེ་སཱ ཚི་ནྣཱ, ཡ་ས་སྶི་ནོ དྷ་མྨ་རཱ་ཛ་སྶ’’.
༢༢༧. ‘‘ཨ་ཡ་མ་སྶ པཱ་སཱ་དོ, སོ་ཝ་ཎྞ [སོ་ཝ་ཎྞོ (པཱི.)] པུ་པྥ་མཱ་ལྱ་ཝཱི་ཏི་ཀི་ཎྞོ;
ཡ་ཧི [ཡ་མྷི (པཱི.)] མ་ནུ་ཝི་ཙ་རི རཱ་ཛཱ, པ་རི་ཀི་ཎྞོ ཨི་ཏྠཱ་གཱ་རེ་ཧི.
༢༢༨. ‘‘ཨ་ཡ་མ་སྶ པཱ་སཱ་དོ, སོ་ཝ་ཎྞ་པུ་པྥ་མཱ་ལྱ་ཝཱི་ཏི་ཀི་ཎྞོ;
ཡ་ཧི་མ་ནུ་ཝི་ཙ་རི རཱ་ཛཱ, པ་རི་ཀི་ཎྞོ ཉཱ་ཏི་ས་ངྒྷེ་ན.
༢༢༩. ‘‘ཨི་ད་མ་སྶ ཀཱུ་ཊཱ་གཱ་རཾ, སོ་ཝ་ཎྞ་པུ་པྥ་མཱ་ལྱ་ཝཱི་ཏི་ཀི་ཎྞཾ;
ཡ་ཧི་མ་ནུ་ཝི་ཙ་རི རཱ་ཛཱ, པ་རི་ཀི་ཎྞོ ཨི་ཏྠཱ་གཱ་རེ་ཧི.
༢༣༠. ‘‘ཨི་ད་མ་སྶ ཀཱུ་ཊཱ་གཱ་རཾ, སོ་ཝ་ཎྞ [སོ་ཝ་ཎྞཾ (པཱི.)] པུ་པྥ་མཱ་ལྱ་ཝཱི་ཏི་ཀི་ཎྞཾ;
ཡ་ཧི་མ་ནུ་ཝི་ཙ་རི རཱ་ཛཱ, པ་རི་ཀི་ཎྞོ ཉཱ་ཏི་ས་ངྒྷེ་ན.
༢༣༡. ‘‘ཨ་ཡ་མ་སྶ ཨ་སོ་ཀ་ཝ་ནི་ཀཱ, སུ་པུ་པྥི་ཏཱ ས་བྦ་ཀཱ་ལི་ཀཱ ར་མྨཱ;
ཡ་ཧི་མ་ནུ་ཝི་ཙ་རི རཱ་ཛཱ, པ་རི་ཀི་ཎྞོ ཨི་ཏྠཱ་གཱ་རེ་ཧི.
༢༣༢. ‘‘ཨ་ཡ་མ་སྶ ཨ་སོ་ཀ་ཝ་ནི་ཀཱ, སུ་པུ་པྥི་ཏཱ ས་བྦ་ཀཱ་ལི་ཀཱ ར་མྨཱ;
ཡ་ཧི་མ་ནུ་ཝི་ཙ་རི རཱ་ཛཱ, པ་རི་ཀི་ཎྞོ ཉཱ་ཏི་ས་ངྒྷེ་ན.
༢༣༣. ‘‘ཨི་ད་མ་སྶ ཨུ་ཡྻཱ་ནཾ, སུ་པུ་པྥི་ཏཾ ས་བྦ་ཀཱ་ལི་ཀཾ ར་མྨཾ;
ཡ་ཧི་མ་ནུ་ཝི་ཙ་རི རཱ་ཛཱ, པ་རི་ཀི་ཎྞོ ཨི་ཏྠཱ་གཱ་རེ་ཧི.
༢༣༤. ‘‘ཨི་ད་མ་སྶ ཨུ་ཡྻཱ་ནཾ, སུ་པུ་པྥི་ཏཾ ས་བྦ་ཀཱ་ལི་ཀཾ ར་མྨཾ;
ཡ་ཧི་མ་ནུ་ཝི་ཙ་རི རཱ་ཛཱ, པ་རི་ཀི་ཎྞོ ཉཱ་ཏི་ས་ངྒྷེ་ན.
༢༣༥. ‘‘ཨི་ད་མ་སྶ ཀ་ཎི་ཀཱ་ར་ཝ་ནཾ, སུ་པུ་པྥི་ཏཾ ས་བྦ་ཀཱ་ལི་ཀཾ ར་མྨཾ;
ཡ་ཧི་མ་ནུ་ཝི་ཙ་རི རཱ་ཛཱ, པ་རི་ཀི་ཎྞོ ཨི་ཏྠཱ་གཱ་རེ་ཧི.
༢༣༦. ‘‘ཨི་ད་མ་སྶ ཀ་ཎི་ཀཱ་ར་ཝ་ནཾ, སུ་པུ་པྥི་ཏཾ ས་བྦ་ཀཱ་ལི་ཀཾ ར་མྨཾ;
ཡ་ཧི་མ་ནུ་ཝི་ཙ་རི རཱ་ཛཱ, པ་རི་ཀི་ཎྞོ ཉཱ་ཏི་ས་ངྒྷེ་ན.
༢༣༧. ‘‘ཨི་ད་མ་སྶ པཱ་ཊ་ལི་ཝ་ནཾ [པཱ་ཊ་ལཱི་ཝ་ནཾ (སཱི.)], སུ་པུ་པྥི་ཏཾ ས་བྦ་ཀཱ་ལི་ཀཾ ར་མྨཾ;
ཡ་ཧི་མ་ནུ་ཝི་ཙ་རི རཱ་ཛཱ, པ་རི་ཀི་ཎྞོ ཨི་ཏྠཱ་གཱ་རེ་ཧི.
༢༣༨. ‘‘ཨི་ད་མ་སྶ པཱ་ཊ་ལི་ཝ་ནཾ, སུ་པུ་པྥི་ཏཾ ས་བྦ་ཀཱ་ལི་ཀཾ ར་མྨཾ;
ཡ་ཧི་མ་ནུ་ཝི་ཙ་རི རཱ་ཛཱ, པ་རི་ཀི་ཎྞོ ཉཱ་ཏི་ས་ངྒྷེ་ན.
༢༣༩. ‘‘ཨི་ད་མ་སྶ ཨ་མྦ་ཝ་ནཾ, སུ་པུ་པྥི་ཏཾ ས་བྦ་ཀཱ་ལི་ཀཾ ར་མྨཾ;
ཡ་ཧི་མ་ནུ་ཝི་ཙ་རི རཱ་ཛཱ, པ་རི་ཀི་ཎྞོ ཨི་ཏྠཱ་གཱ་རེ་ཧི.
༢༤༠. ‘‘ཨི་ད་མ་སྶ ཨ་མྦ་ཝ་ནཾ, སུ་པུ་པྥི་ཏཾ ས་བྦ་ཀཱ་ལི་ཀཾ ར་མྨཾ;
ཡ་ཧི་མ་ནུ་ཝི་ཙ་རི རཱ་ཛཱ, པ་རི་ཀི་ཎྞོ ཉཱ་ཏི་ས་ངྒྷེ་ན.
༢༤༡. ‘‘ཨ་ཡ་མ་སྶ པོ་ཀྑ་ར་ཎཱི, ས་ཉྪ་ནྣཱ ཨ་ཎྜ་ཛེ་ཧི ཝཱི་ཏི་ཀི་ཎྞཱ;
ཡ་ཧི་མ་ནུ་ཝི་ཙ་རི རཱ་ཛཱ, པ་རི་ཀི་ཎྞོ ཨི་ཏྠཱ་གཱ་རེ་ཧི.
༢༤༢. ‘‘ཨ་ཡ་མ་སྶ པོ་ཀྑ་ར་ཎཱི, ས་ཉྪ་ནྣཱ ཨ་ཎྜ་ཛེ་ཧི ཝཱི་ཏི་ཀི་ཎྞཱ;
ཡ་ཧི་མ་ནུ་ཝི་ཙ་རི རཱ་ཛཱ, པ་རི་ཀི་ཎྞོ ཉཱ་ཏི་ས་ངྒྷེ་ན’’.
༢༤༣. ‘‘རཱ་ཛཱ ཝོ ཁོ [རཱ་ཛཱ ཁོ (སཱི. སྱཱ. པཱི.)] པ་བྦ་ཛི་ཏོ, སུ་ཏ་སོ་མོ ར་ཛྫཾ ཨི་མཾ པ་ཧ་ཏྭཱ་ན [པ་ཧ་ནྟྭཱ་ན (སྱཱ. ཀ.)];
ཀཱ་སཱ་ཡ་ཝ་ཏྠ་ཝ་ས་ནོ, ནཱ་གོ་ཝ ཨེ་ཀ་ཀོ [ཨེ་ཀ་ཀོ་ཝ (སཱི.)] ཙ་ར་ཏི’’.
༢༤༤. ‘‘མཱ་སྶུ པུ་བྦེ ར་ཏི་ཀཱི་ལི༹་ཏཱ་ནི, ཧ་སི་ཏཱ་ནི ཙ ཨ་ནུ་སྶ་རི་ཏྠ [ཨ་ནུ་སྶ་རི་ཏྠོ (པཱི.)];
མཱ ཝོ ཀཱ་མཱ ཧ་ནིཾ་སུ, ར་མྨཾ ཧི [སུ་ར་མྨ་ཉྷི (སྱཱ. ཀ.)] སུ་ད་སྶ་ནཾ [སུ་ད་སྶ་ནཾ ནཱ་མ (སཱི.)] ན་ག་རཾ.
༢༤༥. ‘‘མེ་ཏྟ་ཙི་ཏྟ་ཉྩ [མེ་ཏྟ་ཉྩ (པཱི.)] བྷཱ་ཝེ་ཐ, ཨ་པྤ་མཱ་ཎཾ དི་ཝཱ ཙ ར་ཏྟོ ཙ;
ཨ་ག་ཙྪི་ཏྠ [ཨ་ཐ ག་ཉྪི་ཏྠ (སཱི. སྱཱ. པཱི.)] དེ་ཝ་པུ་ར, ཨཱ་ཝཱ་སཾ པུ་ཉྙ་ཀ་མྨི་ན’’ནྟི [པུ་ཉྙ་ཀ་མྨཱ་ན་ནྟི (པཱི.)].
ཙཱུ་ལ༹་སུ་ཏ་སོ་མ་ཛཱ་ཏ་ཀཾ པ་ཉྩ་མཾ.
ཙ་ཏྟཱ་ལཱི་ས་ནི་པཱ་ཏཾ ནི་ཊྛི་ཏཾ.