༤༧༤. ཨ་མྦ་ཛཱ་ཏ་ཀཾ (༡)
༡. ཨ་ཧཱ་སི [ཨཱ་ཧཱ་སི (?)] མེ ཨ་མྦ་ཕ་ལཱ་ནི པུ་བྦེ, ཨ་ཎཱུ་ནི ཐཱུ་ལཱ་ནི ཙ བྲ་ཧྨ་ཙཱ་རི;
ཏེ་ཧེ་ཝ མ་ནྟེ་ཧི ན དཱ་ནི ཏུ་ཡ྄ཧཾ, དུ་མ་པྥ་ལཱ པཱ་ཏུ་བྷ་ཝ་ནྟི བྲ་ཧྨེ.
༢. ན་ཀྑ་ཏྟ་ཡོ་གཾ པ་ཊི་མཱ་ན་ཡཱ་མི, ཁ་ཎཾ མུ་ཧུ་ཏྟ་ཉྩ མ་ནྟེ ན པ་སྶཾ [ཁ་ཎཾ མུ་ཧུ་ཏྟཾ ན མཾ ཏོ་ས་ཡ་ནྟི (སཱི. པཱི.)];
ན་ཀྑ་ཏྟ་ཡོ་ག་ཉྩ ཁ་ཎ་ཉྩ ལ་དྡྷཱ, ཨ་དྡྷཱ་ཧ་རི་སྶ་མྦ་ཕ་ལཾ [ཨ་ཐཱ་ཧ་རི་སྶ་མྦ་ཕ་ལཾ (སཱི. པཱི.)] པ་ཧཱུ་ཏཾ.
༣. ན་ཀྑ་ཏྟ་ཡོ་གཾ ན པུ་རེ ཨ་བྷཱ་ཎི, ཁ་ཎཾ མུ་ཧུ་ཏྟཾ ན པུ་རེ ཨ་སཾ་སི;
ས་ཡཾ ཧ་རཱི [ཨ་ཐཱ་ཧ་རཱི (སཱི. སྱཱ. པཱི.)] ཨ་མྦ་ཕ་ལཾ པ་ཧཱུ་ཏཾ, ཝ་ཎྞེ་ན ག་ནྡྷེ་ན ར་སེ་ནུ་པེ་ཏཾ.
༤. མ་ནྟཱ་བྷི་ཛ་པྤེ་ན པུ་རེ ཧི [པུ་ར’སྶ (སཱི. པཱི.), པུ་རེ་པི (སྱཱ.)] ཏུ་ཡ྄ཧཾ, དུ་མ་པྥ་ལཱ པཱ་ཏུ་བྷ་ཝ་ནྟི བྲ་ཧྨེ;
སྭཱ་ཛྫ ན པཱ་རེ་སི ཛ་པྤ་མྤི མ་ནྟཾ [ཛ་པ་མྤི མ་ནྟེ (སཱི. པཱི.)], ཨ་ཡཾ སོ ཀོ ནཱ་མ ཏ་ཝ་ཛྫ དྷ་མྨོ.
༥. ཙ་ཎྜཱ་ལ་པུ་ཏྟོ མ་མ ས་མྤ་དཱ་སི, དྷ་མྨེ་ན མ་ནྟེ པ་ཀ་ཏི་ཉྩ སཾ་སི;
མཱ ཙ་སྶུ མེ པུ་ཙྪི་ཏོ ནཱ་མ་གོ་ཏྟཾ, གུ་ཡ྄ཧི་ཏྠོ ཨ་ཏྠཾ [མཱ ཏཾ (སཱི. སྱཱ. པཱི.)] ཝི་ཛ་ཧེ་ཡྻ མ་ནྟོ [ཝི་ཛ་ཧེ་ཡྻུ་མ་ནྟཱ (སྱཱ.)].
༦. སོ་ཧཾ ཛ་ནི་ནྡེ་ན ཛ་ན་མྷི པུ་ཊྛོ, མ་ཀྑཱ་བྷི་བྷཱུ་ཏོ ཨ་ལི་ཀཾ ཨ་བྷཱ་ཎིཾ;
‘‘མ་ནྟཱ ཨི་མེ བྲཱ་ཧྨ་ཎ་སྶཱ’’ཏི མི་ཙྪཱ, པ་ཧཱི་ན་མ་ནྟོ ཀ་པ་ཎོ རུ་དཱ་མི.
༧. ཨེ་ར་ཎྜཱ པུ་ཙི་མ་ནྡཱ ཝཱ, ཨ་ཐ ཝཱ པཱ་ལི་བྷ་དྡ་ཀཱ;
མ་དྷུཾ མ་དྷུ་ཏྠི་ཀོ ཝི་ནྡེ, སོ ཧི ཏ་སྶ དུ་མུ་ཏྟ་མོ.
༨. ཁ་ཏྟི་ཡཱ བྲཱ་ཧྨ་ཎཱ ཝེ་སྶཱ, སུ་དྡཱ ཙ་ཎྜཱ་ལ་པུ་ཀྐུ་སཱ;
ཡ་མྷཱ དྷ་མྨཾ ཝི་ཛཱ་ནེ་ཡྻ, སོ ཧི ཏ་སྶ ན་རུ་ཏྟ་མོ.
༩. ཨི་མ་སྶ ད་ཎྜ་ཉྩ ཝ་དྷ་ཉྩ ད་ཏྭཱ, ག་ལེ ག་ཧེ་ཏྭཱ ཁ་ལ་ཡཱ་ཐ [བ་ལ་ཡཱ་ཐ (སྱཱ.), ག་ལ་ཡཱ་ཐ (ཀ.)] ཛ་མྨཾ;
ཡོ ཨུ་ཏྟ་མ་ཏྠཾ ཀ་སི་རེ་ན ལ་དྡྷཾ, མཱ་ནཱ་ཏི་མཱ་ནེ་ན ཝི་ནཱ་ས་ཡི་ཏྠ.
༡༠. ཡ་ཐཱ ས་མཾ མ་ཉྙ་མཱ་ནོ པ་ཏེ་ཡྻ, སོ་བྦྷཾ གུ་ཧཾ ན་ར་ཀཾ པཱུ་ཏི་པཱ་དཾ;
ར་ཛྫཱུ་ཏི ཝཱ ཨ་ཀྐ་མེ ཀ་ཎྷ་ས་པྤཾ, ཨ་ནྡྷོ ཡ་ཐཱ ཛོ་ཏི་མ་དྷི་ཊྛ་ཧེ་ཡྻ;
ཨེ་ཝ་མྤི མཾ ཏྭཾ ཁ་ལི་ཏཾ ས་པ་ཉྙ [ས་པ་ཉྙཱ (པཱི.)], པ་ཧཱི་ན་མ་ནྟ་སྶ པུ་ན་པྤ་དཱ་ཧི [པུ་ན ས་མྤ་དཱ་ཧི (སྱཱ.), པུ་ན་པྤ་སཱི་ད (སཱི. པཱི.)].
༡༡. དྷ་མྨེ་ན མ་ནྟཾ [མ་ནྟེ (སཱི. སྱཱ. པཱི.)] ཏ་ཝ ས་མྤ་དཱ་སིཾ, ཏུ་ཝ་མྤི དྷ་མྨེ་ན [ཏྭ་མྤི དྷ་མྨེ་ནེ་ཝ (ཀ.)] པ་རི་གྒ་ཧེ་སི;
པ་ཀ་ཏི་མྤི ཏེ ཨ་ཏྟ་མ་ནོ ཨ་སཾ་སིཾ, དྷ་མྨེ ཋི་ཏཾ ཏཾ [པ་ཏི་ཊྛཾ (ཀ.)] ན ཛ་ཧེ་ཡྻ མ་ནྟོ.
༡༢. ཡོ བཱ་ལ མ་ནྟཾ [བ་ལ་མ་ནྟཾ (ཀ.)] ཀ་སི་རེ་ན ལ་དྡྷཾ, ཡཾ དུ་ལླ་བྷཾ ཨ་ཛྫ མ་ནུ་སྶ་ལོ་ཀེ;
ཀི་ཉྩཱ་པི ལ་དྡྷཱ ཛཱི་ཝི་ཏུཾ ཨ་པྤ་པ་ཉྙོ [ཀི་ཙྪཱ ལ་དྡྷཾ ཛཱི་ཝི་ཀཾ ཨ་པྤ་པ་ཉྙོ (སཱི. སྱཱ.), ཀ་ཙྪཱ་པི ལ་དྡྷཱ ཛཱི་ཝི་ཀཾ ཨ་པྤ་ཉྙ (པཱི.)], ཝི་ནཱ་ས་ཡཱི ཨ་ལི་ཀཾ བྷཱ་ས་མཱ་ནོ.
༡༣. བཱ་ལ་སྶ མཱུ་ལ༹ྷ་སྶ ཨ་ཀ་ཏ་ཉྙུ་ནོ ཙ, མུ་སཱ བྷ་ཎ་ནྟ་སྶ ཨ་ས་ཉྙ་ཏ་སྶ;
མ་ནྟེ མ་ཡཾ ཏཱ་དི་ས་ཀེ ན དེ་མ, ཀུ་ཏོ མ་ནྟཱ ག་ཙྪ ན མ་ཡ྄ཧ རུ་ཙྩ་སཱི་ཏི.
ཨ་མྦ་ཛཱ་ཏ་ཀཾ པ་ཋ་མཾ.