༤༥༥. མཱ་ཏུ་པོ་ས་ཀ་ཛཱ་ཏ་ཀཾ (༡)
༡. ཏ་སྶ ནཱ་ག་སྶ ཝི་པྤ་ཝཱ་སེ་ན, ཝི་རཱུ་ལ༹ྷཱ ས་ལླ་ཀཱི ཙ ཀུ་ཊ་ཛཱ ཙ;
ཀུ་རུ་ཝི་ནྡ་ཀ་ར་ཝཱི་རཱ [ཀ་ར་ཝ་རཱ (སཱི. སྱཱ.)] ཏི་ས་སཱ་མཱ ཙ, ནི་ཝཱ་ཏེ པུ་པྥི་ཏཱ ཙ ཀ་ཎི་ཀཱ་རཱ.
༢. ཀོ་ཙི་དེ་ཝ སུ་ཝ་ཎྞ་ཀཱ་ཡུ་རཱ, ནཱ་ག་རཱ་ཛཾ བྷ་ར་ནྟི པི་ཎྜེ་ན;
ཡ་ཏྠ རཱ་ཛཱ རཱ་ཛ་ཀུ་མཱ་རོ ཝཱ, ཀ་ཝ་ཙ་མ་བྷི་ཧེ་སྶ་ཏི ཨ་ཚ་མྦྷི་ཏོ [ཨ་ས་མྦྷཱི་ཏོ (སཱི. སྱཱ. པཱི.)].
༣. ག་ཎྷཱ་ཧི ནཱ་ག ཀ་བ་ལ༹ཾ, མཱ ནཱ་ག ཀི་ས་ཀོ བྷ་ཝ;
བ་ཧཱུ་ནི རཱ་ཛ་ཀི་ཙྩཱ་ནི, ཏཱ་ནི [ཡཱ་ནི (སཱི. པཱི.)] ནཱ་ག ཀ་རི་སྶ་སི.
༤. སཱ ནཱུ་ན་སཱ ཀ་པ་ཎི་ཀཱ, ཨ་ནྡྷཱ ཨ་པ་རི་ཎཱ་ཡི་ཀཱ;
ཁཱ་ཎུཾ པཱ་དེ་ན གྷ་ཊྚེ་ཏི, གི་རིཾ ཙ་ཎྜོ་ར་ཎཾ པ་ཏི.
༥. ཀཱ ནུ ཏེ སཱ མ་ཧཱ་ནཱ་ག, ཨ་ནྡྷཱ ཨ་པ་རི་ཎཱ་ཡི་ཀཱ;
ཁཱ་ཎུཾ པཱ་དེ་ན གྷ་ཊྚེ་ཏི, གི་རིཾ ཙ་ཎྜོ་ར་ཎཾ པ་ཏི.
༦. མཱ་ཏཱ མེ སཱ མ་ཧཱ་རཱ་ཛ, ཨ་ནྡྷཱ ཨ་པ་རི་ཎཱ་ཡི་ཀཱ;
ཁཱ་ཎུཾ པཱ་དེ་ན གྷ་ཊྚེ་ཏི, གི་རིཾ ཙ་ཎྜོ་ར་ཎཾ པ་ཏི.
༧. མུ་ཉྩ་ཐེ་ཏཾ མ་ཧཱ་ནཱ་གཾ, ཡོ་ཡཾ བྷ་ར་ཏི མཱ་ཏ་རཾ;
ས་མེ་ཏུ མཱ་ཏ་རཱ ནཱ་གོ, ས་ཧ ས་བྦེ་ཧི ཉཱ་ཏི་བྷི.
༨. མུ་ཏྟོ ཙ བ་ནྡྷ་ནཱ ནཱ་གོ, མུ་ཏྟ་མཱ་དཱ་ཡ ཀུ་ཉྫ་རོ [ཀཱ་སི་རཱ་ཛེ་ན པེ་སི་ཏོ (སཱི. སྱཱ.), མུ་ཏྟོ དཱ་མཱ་ཏོ ཀུ་ཉྫ་རོ (པཱི. སཱི. ནི་ཡྻ)];
མུ་ཧུ་ཏྟཾ ཨ་སྶཱ་ས་ཡི་ཏྭཱ [ཝི་སྶ་མི་ཏྭཱ་ན (སཱི.)], ཨ་ག་མཱ ཡེ་ན པ་བྦ་ཏོ.
༩. ཏ་ཏོ སོ ན་ལི༹་ནིཾ [ནི་ལི་ནཾ (སྱཱ.)] ག་ནྟྭཱ, སཱི་ཏཾ ཀུ་ཉྫ་ར་སེ་ཝི་ཏཾ;
སོ་ཎྜཱ་ཡཱུ་ད་ཀ་མཱ་ཧ་ཏྭཱ [མཱ་ཧི་ཏྭཱ (སྱཱ. ཀ.)], མཱ་ཏ་རཾ ཨ་བྷི་སི་ཉྩ་ཐ.
༡༠. ཀོ་ཡ ཨ་ན་རི་ཡོ དེ་ཝོ, ཨ་ཀཱ་ལེ་ན་པི ཝ་སྶ་ཏི [ཨ་ཀཱ་ལེ་ན པ་ཝ་སྶ་ཏི (སཱི. སྱཱ.), ཨ་ཀཱ་ལེ་ན’ཏི་ཝ་སྶ་ཏི (པཱི.)];
ག་ཏོ མེ ཨ་ཏྲ་ཛོ པུ་ཏྟོ, ཡོ མ་ཡ྄ཧཾ པ་རི་ཙཱ་ར་ཀོ.
༡༡. ཨུ་ཊྛེ་ཧི ཨ་མྨ ཀིཾ སེ་སི, ཨཱ་ག་ཏོ ཏྱཱ་ཧ་མ་ཏྲ་ཛོ;
མུ་ཏྟོ་མྷི ཀཱ་སི་རཱ་ཛེ་ན, ཝེ་དེ་ཧེ་ན ཡ་ས་སྶི་ནཱ.
༡༢. ཙི་རཾ ཛཱི་ཝ་ཏུ སོ རཱ་ཛཱ, ཀཱ་སཱི་ནཾ ར་ཊྛ་ཝ་ཌྜྷ་ནོ;
ཡོ མེ པུ་ཏྟཾ པ་མོ་ཙེ་སི, ས་དཱ ཝུ་དྡྷཱ་པ་ཙཱ་ཡི་ཀ་ནྟི.
མཱ་ཏུ་པོ་ས་ཀ་ཛཱ་ཏ་ཀཾ པ་ཋ་མཾ.